عبدو الشاراط
04-21-2016 11:38 AM


يحكى أن (عبدو) كان يعمل موظفاً بمصلحة المخازن والمهمات سابقاً وبالمناسبة ولأبنائنا من الجيل الحالي فإن (المخازن والمهمات) هذه هي الشقيقة التوأم لـ (النقل الميكانيكي) وأبنه خاله (وزاره الأشغال) وقريبة كل من (السكة الحديد ) ومصلحة المرطبات عليهم جميعا رحمة الله.
( عبدو) معروف بعبدو الشاراط ولهذه قصة فهو منذ صغره مريض بشيء اسمه (الشراط) أى الرهان
- تشارط النبلة بتاعتي بتطير الحجر ابعد من بتاعتك
- تشارط دكان اليماني داك ما فيهو طحنيه
- نشارط بسبقك بالعجلة دي
و (عبدو) حريف جداً في مسألة الشراط هذه ، فهو وقبل أن يورط نفسه يقوم بعمل دراسة سريعة للشيء الذي يود أن يشارط عليه.. قيل أنه كان عائدا من المدرسة فوجد أن هنالك حركة غير عادية في منزل جارهم (حاج طه) الذي كان قد أجريت له عملية مرارة مؤخرا.. فعرف (عبدو) أن الرجل قد إنتقل إلى الرفيق الأعلى وأصبح(أسماء في حياتنا) فأراد أن ينتهز الفرصة ويكسب...
- يمه تشارطي (عم طه) راجل عزيزة دا بموت الليلة ؟
- أنت جنيت يا ولد أنا أمس مشيت ليهو في الزيارة لقيتو شديد وذي الحصان
- زي الحصان زي الحصان .. بس أنتي تشارطي ؟ لو أنا كسبت تشتري ليا العجلة ؟؟
وافقت والدة (عبدو) على الشراط فهي متأكدة من أن (عم طه) عال العال كما تركته بالأمس.. ولكن وبعد وقت قصير ارتفعت أصوات البكاء والعويل والنواح.. خرجت والدة (عبدو) لاستطلاع الأمر فقبل ليها أن عم طه توفى..
- الله يجازيك يا (عبدو) .. الود تقول عندو شواطين
واستمرت ( المرضه) مع عبدو.. فهو لا يفتر من أن يشارط ويراهن على كل شيء وأي شيء حتى أصبح معروفاً بعبدو الشارط وقد قيل أن هذا اللقب أطلقه عليه رواد دار الرياضة بأم درمان حيث أن عبدو مرضان كورة ويدخل كورة العصر يوميا وما أن يدخل الدار حتى يصيح في رواد الدار:
- منو يشارط الإخلاص ح يجيب القون الأول
- منو يشارط النتيجة 2/1
- منو يشارط أول كورنر للهاشماب
- منو يشارط ,,,,,,,,,,,,,,,,

توظف (عبدو) ولم يترك عادته.. بينما كان يجلس مع الموظفين رأي عبر النافذة ( حنان) سكرتيرة المدير وهي تحاسب (سيد الركشة) وحيث أن حنان هذه كثيرة التغيب.. تجي يوم وتغيب شهر فقد استغل عبدو الموقف كعادته.
- منو يشارط أول زول ح يجي داخل من الموظفين حنان
- كلهم بصوت وأحد نشارطك
- خلاص كان جات أول زول تفطروني سمك وكان ما جات أفطركم أنا سمك
وما لبثت حنان أن فتحت باب المكتب وهي تحيي زملائها الذين أصابتهم الدهشة .. بينما كان عبدو يصيح في إنتشاء ...الليلة السمك.. السمك.. السمك.

لأن عبدو كان يضيع معظم وقت العمل مع زملائه في الشراط فقد تضايق منه مديره كثيراً وقام بنقله إلى قسم أخر في المصلحة معروف عن رئيسة الصرامة والعين الحمراء...
بينما كان عبدو يجلس في مكتبة مع زملائه الموظفين في أول يوم عمل له بالقسم الجديد جاء من يخبره بأن المدير يطلبه :

- شوف يا عبدو الوقت هنا للعمل ما عاوز أي عمليات شراط هنا ، تأني لو .. وهنا قاطعة عبدو

- يا سعادتك أنا أي حاجة بشارط فيها بكون متأكد منها 100% يعني هسع أنت بشارطك عندك شامه فى نص ضهرك ، والله اشارطك ميه جنيه ميه جنيه وكانت مبلغاً خرافياً
لأن السيد المدير يعلم تماماً بأنه لا توجد لديه أي شامة أو علامة على ضهره أو أي مكان آخر في جسده فقد وافق على الشراط حتى يقوم بتأديب عبدو ويخليهو يتوب . قام المدير بنزع البدله والكرافتة.. والقميص ثم الفانيله الداخلية.. وأعطى لعبدو ظهره قائلاً :
- أها وينأ.. اها خت ليا أيدك فيها
في هذه الأثناء كان (عبدو) يفتح باب المكتب سامحاً للموظفين الذين كانوا خلف الباب مباشرة بالدخول وهو يقول :

- يلا طلعوا الميتين جنيه.. أهو خليتو ليكم قلع (الفنيلة) ! ؟

كسرة :
تشارطو إنو زول ح (يهبب) لينا الكسرات التحت دي مافي؟
كسرة ثابتة (قديمة):
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووووووووووو)+و +(و)

 كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووووووو) +(وووووووووووو)+و+(و)

كسرة جديدة لنج :
أخبار (أجهزة التصنت عالية الدقة) التي إستخدمت في غش إمتحانات الشهادة السودانية لسنة 2016 يا وزيرة التربية شنوووووووو؟ : (و) ....

[email protected]


تعليقات 14 | إهداء 0 | زيارات 7828

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1449239 [بدرالدين]
4.07/5 (5 صوت)

04-23-2016 09:50 PM
يا استاذ ربنا يديك الصحة والعافية لكن انا شايف بدل ماتضيع وقتك فى الشراط شوف ليك واحد تورثه بمتابعة الواوات بعد عمر مديد انشاء الله

[بدرالدين]

#1448997 [اليوم الأخير]
4.07/5 (5 صوت)

04-23-2016 11:38 AM
بالغت ، النكتة قديمة و عملت الشامة في ظهرو ، مع إنو موقع الشامة في النكتة الأصلية في مكان آخر ، حتى تتفق مع مفارقة النكتة

[اليوم الأخير]

#1448970 [سامي]
4.07/5 (5 صوت)

04-23-2016 10:40 AM
ياسيد جبرا يااخي ليه داسي مننا ابداعاتك الدرامية التلفزيونية نتمنى نشوف حاجة قريبة كدا لأنو حاجاتك بفهم عميق ومن مسببات الراحة

[سامي]

#1448929 [hashim elhadi]
4.07/5 (5 صوت)

04-23-2016 08:48 AM
دي قديمة بس حقيقة لبستها توب جديد .... لو مد الله في عمرك لي رمضان رجع لينا بتاعت رخصة رمضان

[hashim elhadi]

#1448624 [التجاني مصطفي]
4.07/5 (5 صوت)

04-22-2016 07:42 AM
وانا بشارطك ياودجبرة انك ماتقدر تعمل كسرة عن ........

[التجاني مصطفي]

#1448562 [julgam]
4.19/5 (6 صوت)

04-21-2016 11:46 PM
الله يخت محنك ياود جبرا. .بس تشارطونى يالراكوباب ود جبرا دا الواوات طلعت ليه فى راسو. .بس أشارطك ياود جبرا موضوعك الجايى حيكون عن التسريبات. .

[julgam]

#1448512 [عبدالواحد المستغرب اشد الإستغراب!!]
4.19/5 (7 صوت)

04-21-2016 07:22 PM
جبرا اشارطك الف جنيه لالف جنيه بالجديد كمان كان الحكايه دى ما من نسج خيالك؟إيه الجاب (سيد الركشه)مع حكاية مضت عليها على الآقل أربعين سنه؟ وربما عبدو الشارط ذاتو يكون شبع موت!!ياناس يا عالم حصلو عمكم ود جبرا (سلوكو دخلت في بعض)ده كلو من خط هيثرو الملعون وياريت لو الموضوع وقف على كده النظام كل يوم بوريهو جديد ما كان على البال على رآى الشاعر المايوى الذى هجا جعفر نميرى وهو يقصد مدحه!!والله انا خوفى يجى علينا يوم نفج (واوات) جبرا عشان نقرا المواضيع المنشوره فى الموقع !! ويا آهل النظام الراجل حيضيع مننا ارحموه لكى يرحمكم من في السماء إن شاء الله في (واوايه)وااااااحده ينوبكم ثواب !!.
ود عوووضه ما تفتكرنى نسيتك !! بس اصلى المغرب وأجى اشوف موضوعك بتاع الليله واعرف غرضك وقصدك بالضبط شنو!! اصدقائى كونوا معنا ولاتذهبوا نصلى المغرب ونواصل مع الكاتب النحرير صلاااااح عووووضه!!.

[عبدالواحد المستغرب اشد الإستغراب!!]

#1448492 [على]
4.07/5 (6 صوت)

04-21-2016 06:30 PM
تشارط يالفاتح انك مابتقدر تعمل كسرة عن حلايب

[على]

#1448448 [صالة المغادرة]
4.07/5 (5 صوت)

04-21-2016 04:46 PM
والله ياجبرة انا بشارطك المعارضة الشايفة انا دى احسن منها ال..... بس اكيد مش الانقاذ ولاحزب الرقاص .

[صالة المغادرة]

#1448375 [على على]
4.07/5 (5 صوت)

04-21-2016 02:35 PM
يا جبرا ما تالف الشراط كان فى عملية بواسير تلاقيك خفت تلحق عثمان ميرغنى
ولا تأكد كلام وزيرة التربية وساتى عن الاجهزه الحساسة فى المناطق الحساسة

[على على]

#1448370 [خلال الطيب عبدالله]
4.07/5 (5 صوت)

04-21-2016 02:27 PM
ايوا نشارط يا عبدو ...

[خلال الطيب عبدالله]

#1448346 [hassan]
4.19/5 (6 صوت)

04-21-2016 01:30 PM
دي نكتة قديمة بذيئة لكن يا جبرا هذبتها شوية داير تبقى لينا زي ناس الهيلاهوب وبقية فرق المهرجين تحكي نكتة اليوم بكرة تلقاهم عملوها اسكتش أو مسرحية.

[hassan]

#1448344 [بالغت]
4.07/5 (5 صوت)

04-21-2016 01:26 PM
يومتا شفتك في بيت عزا: قربت اقول ليك:

الكسرة ياجبرة!


غايتو بانتظار اليوم البيكون مقالك كلو كسرات!

[بالغت]

#1448323 [حوراني]
4.19/5 (6 صوت)

04-21-2016 12:43 PM
االله يحفظ استاذ جبره الليله قوية جد استحلفك بالله رمضان الجاي تكتب سيناريوهات درامية رمضان

[حوراني]

الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة