و(بتاع) العسل !!
05-01-2016 10:01 AM




*حكيت مرة قصة (عوير) حينا مع صلاة الجمعة..
*فهو دائماً يأتي متأخراً ثم يحمل المصلين مسؤولية تأخره..
*وحفظ الناس عبارة سخطه من كثرة ترديدها (طوالي مستعجلين)..
*ثم يضيف إليها ساخراً (لا خلاص لحقتوا الجنة)..
*ولكنه عند الولائم يأتي مستعجلاً ولا يتأخر أبداً..
*وكذلك معارضونا يتأخرون دوماً عن مواعيد ممارسة (شعائر) واجباتهم..
*ولكنهم عند استشعار لحظة ولائم ما بعد الانتفاضة يأتون مهرولين..
*لا يأتون إلى (الميدان) بأجسادهم وإنما يشكلون حضوراً ببياناتهم (الثورية)..
*وكل منهم يحاول نفض الغبار عن ذاكرة الشعب تجاهه تعريفاً بنفسه..
*إنه شيء أشبه بحكاية القروي الذي ندمت (أسرة) عاصمية على قبولها هديته..
*فهو كلما (يكبس) عليها- في أي وقت- يقول لها (أنا بتاع العسل)..
*ثم لم يقتصر الأمر عليه وإنما شمل أقرباءه أيضاً بحجة أنهم (تبع بتاع العسل)..
*بل جاءها يوماً من يقول لها (أنا جار نسابة بتاع العسل)..
*فهذا رئيس الجبهة (الفلانية الفلتكانية) المقيم بفرنسا..
*وذاك زعيم الكيان (العلاني الترتكاني) الذي يناضل من فرجينيا..
*وتلك أمينة الحزب المنبثق عن المنسلخ عن المنشق عن (الأولاني) من لندن..
*كلهم يريدون أن (يلحقوا جنة) المغنم السياسي بأقل جهد ممكن..
*بل لا جهد خالص سوى (شوية طرقعة) على مفاتيح حواسيبهم..
*و(على حس) البيانات هذه صار كل منهم مناضلاً..
*محض إنشاء تحث الآخرين على (الموت) من أجل أن (يحيوا) هم..
*ولم ينس المهدي تسجيل حضوره فأرسل (توقيعه) على دفتر الأحداث من القاهرة..
*هذا هو الواقع نرويه كما هو من زاوية الحياد..
*فلا نحن مع الحكومة ، ولا نحن مع المعارضة..
*ولكنا نؤمن بالديمقراطية إيمان العجائز إلى أن نلقى الله..
*فهي من صميم الدين قبل أن تكون نظاماً مستورداً من الخارج..
*وما يجعلنا ضد الإنقاذ والمعارضة معاً افتقارهما إلى الديمقراطية..
*ثم تزداد نقمتنا على المعارضة - تحديداً- لعجزها عن المواكبة..
*يعني حتى الحراك الذي يفعله نظام الإنقاذ كي يبدو ديمقراطًياً تعجز عنه المعارضة..
*فهي كما هي منذ (27) عاماً ؛ محلك سر..
*لا هي قادرة على تغيير جلدها ، ولا تغيير قياداتها، ولا تغيير النظام..
*فقط تنتظر إرهاصات تغيير لا يد لها فيه لتسارع بالبيانات..
*والآن كلهم (مستعجلون) يسابقون الزمن تذكيراً للناس بذواتهم..
*حتى المرشح الرئاسي ذاك أتانا بيانه مهرولاً بحسبانه (والد الطفل بتاع الساعة)..
*وكذلك بيان (بتاع الثورية) النائم في العسل بالخارج..
*وأضيف أنا من عندي (بتاع العسل !!!).



الصيحة


تعليقات 19 | إهداء 0 | زيارات 3974

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1453982 [alaaza bit wad almsaed]
4.19/5 (7 صوت)

05-01-2016 11:04 PM
يا عووضة بتاع العسل .. أنت بقيت باعوضة .. مبروك مقدما وزير دولة.. بس ما يكون حظك نحس وما تلحق تقعد فيها يومين وأمورك تبوظ .. بعدين أنت جاي بعد إييييه .. بعد الأمور كلها باظت ( والحتات كلها باعوها ) حرام عليك ،بشة يشوف وزارة دولة من وين ؟؟ بعدين بقيتو كتار زي الفنانين ..يراضو منو ويخلوا ... الله ينعلكم .. يعني بشة فاضي هسع ليكم عشان يقوم يفتش ليك حاجة يختك فيها .. نصيحة اكتفي بشوية دولارات .. أهو ينفعوك يا عسل....

وأتحداك .. كلو عربي مظبط ومربط ... كلو للعسل

[alaaza bit wad almsaed]

#1453960 [راي]
4.07/5 (5 صوت)

05-01-2016 09:58 PM
(ولم ينس المهدي تسجيل حضوره فأرسل (توقيعه) على دفتر الأحداث من القاهرة..)

يا اخي ناس حزب الامة بدأوا في تحديد خصومهم من الان ومنو معاهم بعد الانتفاضة ومنو المامعاهم وكلهم في القاهرة جنس شفقة.وكمان بتحدثوا باسم الشعب السوداني !!!!!!!!!!!!!!!!!!!!!!!!!!!!

[راي]

#1453948 [abdulbagi]
4.19/5 (6 صوت)

05-01-2016 09:33 PM
ما هى الديمقراطيه التى تؤمن بها ياعووضه نورنا يمكن ننضم ليك بعدين ذى ماقال واحد اذا انا ضد كل هذه الاحزاب ومعارض الانقاذ اكون فى ياتو خانه نحن ناس غبش مادرسنا فلسفه ذيك نورنا ما انت ديمقراطى . يا اخى روح

[abdulbagi]

#1453931 [الراجل]
4.19/5 (7 صوت)

05-01-2016 08:54 PM
اشك فى انك ود عووضة زولنا الزماااان الاصلى لكن ياها صورتك المعلقة فوق دى منو العوض واليه العوض يا ودعووضة

[الراجل]

#1453877 [ابونزار]
4.19/5 (7 صوت)

05-01-2016 06:11 PM
بالله أنت لا مع الحكومة لا مع المعارضة...؟ طيب المعارضة دي عاصر عليها شديد ليه؟
وعليك الله دا وقتو جنس الكلام دا؟...

[ابونزار]

#1453863 [دلدوم حجر التوم]
4.19/5 (6 صوت)

05-01-2016 05:38 PM
ولم ينس المهدي تسجيل حضوره فأرسل (توقيعه) على دفتر الأحداث من القاهرة..
والله يا خو،،،،ابو ام سلمه دا عدد المرات اللى دخل فيها السجن ،او التى استدعى فيها بواسطة اجهزة الأمن ،او التى هدد فيها بالقتل او المرات التى نفي فيها زول لو،،زيك كده ما يقدر يحسبها،،،احسن ترعى بقيدك،،،

[دلدوم حجر التوم]

#1453827 [توفيق صديق عمر]
4.07/5 (5 صوت)

05-01-2016 04:39 PM
سؤال ملح شديد يا عووضه ارجو ان تلقا الوقت او المزاج الرايق علي الاجابة علبه
طيب اذا انا لا مع المعارضة بتاعت باريس او لندن او فرجينيا اوالكي بورد او الصادق او غيرهم
ولا مع الحكومة
ولكني معارض دعنا نقول من منازلهم لهذه الحكومة واقولها واغعالها
اكون في الحالة دي شنو معارض او عارض او متعارص
وانتا رغم انك بس بتحب الديمقراطية. لكنك لا مع الحكومة ولا مع المعارضة ماذا ممكن ان نطلق عليك من القاب
عووضه الديمقراطي؟
يا راجل!!!!

[توفيق صديق عمر]

#1453745 [أبورماز]
4.07/5 (5 صوت)

05-01-2016 02:42 PM
والله يا عووضه الكلام البتكتبو فيهو دا الهندى عزالدين وفاطمه شاش وعبدالباقى الظافر وضياء الدين بلال وكل أولاد البلال الطيب وحتى صاحب نعمتك مالك الصيحة الطيب مصطفى يستحوا إنو يكتبوهو ,,,

الآن فقط حق لنا أن ننعى قلم الكاتب عووضه ...

[أبورماز]

#1453684 [رقم صفر]
4.19/5 (10 صوت)

05-01-2016 01:41 PM
قال الشاعر
الناس ناطين وعووضة يا دوب داير يركب
الناس حالقين وعووضة يا دوب داير يربي دقن
جيت متأخر يا عووضة..البتاعات كلها مصتها الباعوضة

[رقم صفر]

#1453663 [abdulbagi]
4.19/5 (6 صوت)

05-01-2016 01:08 PM
هذا مقال انصرافى وهو جزء من حمله منظمه لتتبيج مقالات انصرافيه وجربدة الخال الرئاسى هى راْس الرمح فى هذه الحمله وعووضه وامثاله مخلب من مخالبها.يااخ الذين بحصدهم رصاص الامن ليس معارضة الداخل او الخارج هم الطلبه الذين قلت فيهم انت ماقلت. هذه هبه شعبيه لاعلاقة لها بالاحزاب. هل كانت ثورة اكتوبر ثورة احزاب ام ثورة شعب . تلف ودور ولم يفتح الله عليك بكلمه فى حق الشهيد ولا هذا جزء من الحمله انو ما تجيبو سيرة الشهداء . يااخى الناس صارت واعيه وتقدر تفرز الكيمان .

[abdulbagi]

#1453654 [سودانية]
4.19/5 (6 صوت)

05-01-2016 12:59 PM
فعلا كلام في محلو ...انتفاضة سبتمبر اجهضها تخاذل الشيوخ اسياد الاحزاب الكبيرة وقبضوا الثمن كاش داون ...مثلا حزب الامة فقط اذا امر كوادره بالخروج الي الشارع ح يقلعوا الكيزان في ظرف تلاتة ساعات لكن بنفس منطقك كل واحد بيقول ليييه انا اعرض كوادري للموت عشان الباقين يلقوها علي الجاهز ...
نقد الله يرحمو عندما كتب عبارة حضرنا ولم نجدكم كان يقصد الشيوخ المتخاذلين ديل ...
الثورة تبدأ بكنس كل المتخاذلين والمتنفعين والمستفيدين الذين وضعوا الشعب بين مطرقة الحرب وسندان الفساد داخل السودان وخارجه

[سودانية]

#1453650 [لبني]
4.07/5 (5 صوت)

05-01-2016 12:49 PM
How about you ? قدم روحك وبرامجك يمكن النفع يكون فيك وما هذا باستهذاء والله علي ما اقول شهيد. نحنا هنا في بلد ( أمريكا ) المنتخبين بيحومو يعرفو روحهم ويقبلو عزايم ويسلمو علي الناس وبياخدو صور مع الطبرعات

[لبني]

ردود على لبني
[km] 05-01-2016 03:46 PM
طبرعات يا


#1453636 [كبسور]
4.19/5 (6 صوت)

05-01-2016 12:28 PM
الآن عرفت انك قاعد تتقف من الراكوبة وتمشى تكتب لى الخال الرئاسى عمودك وتقبض
ماشه معاك باسطة يا عووضة اتعوضت تمن نضالك هنا ،
تكتب برد الفعل تجاه فعل الراكوبة


الناس البكتبو فى الكيبوردات ديل كلهم دفعوا ضريبة النضال سجن وجلد واهانة ومصادرة اموال ووظائف ومضايقات
ثم خرجوا وتركوا الجمل بما حمل لامثالك لتاكل من فتات مال السحت ،- بالمناسبة مخدمك دا قبل الانقاذ كان برضو مغترب - ما حكى ليك تجربتو لما كان فنى هاتف ؟؟

الكيبورد دا اخطر من الدوشكا لو ما عارف تأثير القلم يا صحفى الغفلة ممكن يغير عقلية المغشوشين من العسكر والطلاب والغبش يا بجم

[كبسور]

#1453626 [زايد الخير]
4.07/5 (5 صوت)

05-01-2016 12:12 PM
أستاذ و الله لا خير في المعارضة و لا خير في الحكومة و هذا ما نجحت فيه الحكومة طول الوقت و مع اشتداد الشدائد يقول المسبحون بحمد الحكومة اها البديل منو ؟؟
و هذه صارت مسلم بها من هو البديل لنظام الإسلاميين الفاشي ، تجمع الثوري الذي يتفاتل علي البردعة ؟؟؟

[زايد الخير]

#1453625 [ابو الزفت]
4.19/5 (6 صوت)

05-01-2016 12:12 PM
قسما بالله انا مع الانقاذ من سنة 89 لليوم.....لكن زي الحركات البتعمل فيها الايام دي يا عووضة ما شوفتها الا في سبدرات...كسير تلج زايد عن الحد.. ياهو الزيكم ديل الجابو للانقاذ كفوة الله لا كسبكم يا ارزقية.
يا رب....يا رب....الحكومة دي تسقط بكرة القريبة دي ويجي مالك عقار يمعط ليك شنبك صوفة صوفة. كرهتونا

[ابو الزفت]

ردود على ابو الزفت
[ابو الزفت] 05-03-2016 09:34 AM
تصدق يا "الراجل" انا طلعت من الصنف التاني يعني العورة، اخواننا غشونا بالصيام وقيام الليل ولما مرقنا من المسجد لقيناهم لهطوا الحاجات كلها ونحن مرقنا بقد القفة...الله لا كسبهم. اغرب حاجة لقينا الغرباء زي ناس سبدرات وبدرية وحاج موسى وغيرهم دخلوا ولهطوا مع الجماعة واستفادوا. هسع زي عووضة ده بالرغم انو داخل في الزمن بدل الضايع لكنه برضو حيلقى ليهو لحسة..وانحنا غير الدقينة ما طلعنا بحاجة.

[الراجل] 05-02-2016 02:31 PM
انت مع الانقاذ من89 اها عملت ليك كم عمارة؟؟
اوع تقول ما عندك حاجة وشيلوك القفة وطلعت بى قدها.عشان ناس الانقاذ نوعيين يا مجرميين وحرامية وكتالين كتله اما عوره ورجرجة ودلاهات ساى


#1453603 [من أنتم]
4.19/5 (6 صوت)

05-01-2016 11:35 AM
حسن اسمعيل القادم فترقبوه

[من أنتم]

#1453587 [حنكوش]
4.19/5 (6 صوت)

05-01-2016 11:07 AM
يا عووضة بقيت تهضرب .. قلت لي في مقالك بتاع (جيل البطالات) شتمت الشباب قلت ليهم انكم بتاعين خرشة وصياعة وكان قصدك إستفزاز إيجابي !!

ههههههه

[حنكوش]

#1453585 [حكواتي]
4.19/5 (7 صوت)

05-01-2016 11:04 AM
عووضة والله فكت منك وبقيت تهضرب وكل يوم انت حاتل في الطين زيادة .. لانك عنيد ومكابر .. ياخي انت ما عندك صديق او شخص تثق فيه ينصحك ويقول ليك بطل البتسوي فيه ده !! ده كلام عيب وبقيت مضحكة الناس البيقوا يجو جاريين جري علي مقالك عشان يستهزأوا بيك.

انصحك بأن تعتزل الكتابة لفترة وترجع البلد تقعد مع جنس العوير البتحكي عنه ده وتراجع نفسك وافكارك .. عسى ولعل يمكن ترجع تبقى بني آدم ثاني

[حكواتي]

#1453579 [hassan]
4.19/5 (6 صوت)

05-01-2016 10:48 AM
سقطت سقوطاً مخزياً بمحاولتك إثارة نعرات جهوية
قرأنا في خطة الكيزان لاحتواء الحراك الثوري عن ضرورة إثارة نعرات عنصرية وجهوية لضرب وحدة الجماهير الثائرة.
هل أنت من ضمن المكلفين باثارة النعرات العنصرية والجهوية؟

[hassan]

صلاح الدين عووضة
صلاح الدين عووضة

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة