المقالات
السياسة
فاطنة السمحة
فاطنة السمحة
05-11-2016 11:36 AM


( مهداه الى المناضلة الجسورة الأستاذة / فاطمة احمد إبراهيم ) ولكل نساء بلادي
.
فاطنة في ليل الأماسي ...
وشوشات شايلة البشاشة
وفاطنة في حرّ الهجاير ..
.همبريب شـــبعان دعاشة
وفاطنة بتذوب زي سحابة
صابة شان تسقي العطاشة
.

.
فاطنة يا بت عازة
أخية نورة بت حبوبة سارة
فاطنة يا طهر العذارى
يا جناح شوق العصافير
المطولة من صغارا
يا نفس فرح البشارة
بي رجوع ناساً مهاجرة
وسايبة دارا
وااا خسارة .البنات بعدك خسارة
البنات الأصبحت كل إهتماماتن
صناعات النضارة
في المظاهر ...
السخافات عايشة
بي إسم الحضارة ...
وااااا خسارة .>>
البنات بعدك خسار
***
فاطنة وقت النيل يتسب
وموجو يدفر
تتقلب شتلة وتخدر
وتدي للناس خير ثمارا
وفاطنة وقت الليل يضلم
تتقلب نجمة وتبهرج
تضوي للناس الحيارا
واااااااااااخسارة ...
البنات بعدك خسارة ..
***
فاطنة مو قوالة فاتنة
وفاطنة بي أخلاقا فاتنة
وفاطنة بي تفكيرا فاطنة
وفاطنة إنتن يا بناتنا
فاطنة جاتنا الليلة جاتنا
وجات نجاتنا
أبشرن عاد يا بناتنا
وزغردن هوي يا بناتنا
***
وفاطنة قالت مرة نامت .
ولما صحيت من مناما
فاطنة قالت شافت الله
وفاطنة أصلها ما تكضب
وفي عيونا أنا شفت الله
شفتو شفتو ................
وشفتو والله شفتو والله
.
شفتو والله في عيونا
وشفتو في ومضات سنونا
وشفتو في البسمة الحنونة ...
وشفتو شفتو وشفتو والله شفتو والله
.
شفتو في طيبة كلاما
وفي البراءة الفي الوسامه
وفي حلاة الإبتسامه
وشفتو في أحضان سلاما
وشفتو شفتو ......
شفتو واللي شفتو والله
***
وفاطنة في ليل الأماسي
وشوشات شايلة البشاشه
وفاطنة في حـــرّ الهجاير
همبريب شبعان دعاشه
وفاطنة بتذوب زي سحابة
صابة شان تسقي العطاشه
......................... علي احمد جارالنبي ................

[email protected]


تعليقات 4 | إهداء 0 | زيارات 1608

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1459374 [عمر عوض الله محمد احمد]
0.00/5 (0 صوت)

05-11-2016 09:12 PM
ياسلاااااااااااااااااااااااااااااااااااام عليك استاذ علي وانت تعيد علينا ذكريات منتدى بربر وجلسات مكتبك الجميل وناس علي جاره الحلوين وباقي الكوكبة الجميلة

[عمر عوض الله محمد احمد]

#1459317 [سوداني]
0.00/5 (0 صوت)

05-11-2016 06:36 PM
1. هذه انشودة جميلة ووفية في حق امنا الاستاذة فاطمة احمد ابراهيم ام عموم السودانيين في مناسبة عيد الام. فنشكر ﻋﻠﻲ ﺍﺣﻤﺪ ﺟﺎﺭﺍﻟﻨﺒﻲ عليها.

2. ينقص من سمو وجمال وسرمدية هذه الانشودة الابيات ادناه. بغض النظر عن سداد مضمونها او عدمه. اولا لان امنا فاطمة احمد ابراهبم لن تروق لها انشودة تحتفل بها وتذم بناتها وحفيداتها. وثانيا لان هذه الابيات تحصر القصيدة في الآن، وتسلب عنها ذاك البعد الساحر المميز للادب الراقي والباقي _ وهو timelessness

【 ﻭﺍﺍﺍ ﺧﺴﺎﺭﺓ . ﺍﻟﺒﻨﺎﺕ ﺑﻌﺪﻙ ﺧﺴﺎﺭﺓ
ﺍﻟﺒﻨﺎﺕ ﺍﻷﺻﺒﺤﺖ ﻛﻞ ﺇﻫﺘﻤﺎﻣﺎﺗﻦ
ﺻﻨﺎﻋﺎﺕ ﺍﻟﻨﻀﺎﺭﺓ
ﻓﻲ ﺍﻟﻤﻈﺎﻫﺮ ...
ﺍﻟﺴﺨﺎﻓﺎﺕ ﻋﺎﻳﺸﺔ
ﺑﻲ ﺇﺳﻢ ﺍﻟﺤﻀﺎﺭﺓ ...
ﻭﺍﺍﺍﺍﺍ ﺧﺴﺎﺭﺓ .
ﺍﻟﺒﻨﺎﺕ ﺑﻌﺪﻙ ﺧﺴﺎﺭ】
「」

【 ﻭﺍﺍﺍﺍﺍﺍﺍﺍﺍﺍﺍﺧﺴﺎﺭﺓ ...
ﺍﻟﺒﻨﺎﺕ ﺑﻌﺪﻙ ﺧﺴﺎﺭﺓ ..】
「」

[سوداني]

ردود على سوداني
[علي احمد جارالنبي المحامي والمستشار القانوني] 05-12-2016 08:44 AM
.
صباحكم خير وعافية وايامنا الجاية صافية ان شاء الله
شكراً لكم الأخ سوداني على هذه الملاحظة العميقة ما نمّ عن شفافية ذوقك ووجدانك النابه نحو بنات بلادنا اللائي احببنا الحياة ولا زلن بالحب يمارسن الوطن كما فاطمة الجسورة ، على غير شاكلة (ﺍﻟﺒﻨﺎﺕ ﺍﻷﺻﺒﺤن ﻛﻞ ﺇﻫﺘﻤﺎﻣﺎﺗﻦ صناعات النضارة )استثناءّ هنّ فئة افرزتها حقبة زمان الآفة التي المت بالبلاد حين غُيّبت فاطمة وبناتها وحفيداتها قسراً عن المشهد ، وتصور روعة المشهد لو كان التاريخ قد جرى على ماظلت فاطمة تناضل من اجله ، ولكن وااااااااا خسارة ضاعت البنت البشارة وما حُظيّ الوطن وما أتحلّ قيدو ....
.
.....................ود وتحية


#1459285 [abdulbagi]
0.00/5 (0 صوت)

05-11-2016 05:32 PM
تستحق فاطنه السمحه .للعلم هكذا يناديها محبوها وعارفى فضلها فى النضال لصالح المراءة السودانيه . فكل ماتتمتع به المراءة السودانيه الان من حقوق (الاجر المتساوى للعمل المتساوى وحق الترشح والتصويت الخ الخ وهو ثمرة نضال طويل قادته فاطنه وزميلاتها ولم تمتن ولم تطلب مقابل فهى لا تملك منزلا اوقطعة ارض ولكن لها منزل فى قلب كل سودانى شفيف عفيف فهى فاطنه السمحه خلقا ونكران ذات . شكرا لك استاذ على

[abdulbagi]

#1459145 [السودان]
0.00/5 (0 صوت)

05-11-2016 01:29 PM
يا ابن الباوقه البار لك غالى التحايا المجرمون اردوا اغراقنا فلنتكاتف فى هذا المنبر لصد هؤلاء الاوباش فغراق الباوقه جنون

[السودان]

ردود على السودان
[علي احمد جارالنبي المحامي والمستشار القانوني] 05-11-2016 05:37 PM
لا للسد ...
.........
رائع من روائع
فيك سر الودائع.
يا الباوقة الجميلة
مطمورة البدائع
نخلة وبرتكانة
منقة ثمارا يانع
حانت لي قِطافها
كلْ من شافها هلل
جلّ الباري صانع
****
قوم امشاكا يلا
خِف الخطوه سارع
الحظ ما يفوتك
كم ليك حظ فارع
*****
لا للسد ولا لا ....
سنقهر كل طامع
لا للسد نصيحه
يوت خليكا سامع
لا لا وضُمّه لالا
سنقهر كل طامع
.
......علي أحمد جارالنبي ........


علي احمد جارالنبي المحامي
علي احمد جارالنبي المحامي

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة