3 مرات
05-15-2016 06:04 PM


– فلان (خطب) 3 مرات .. ومالو؟ إحتمال حظو وحش وكل ما يخطب ليهو بت يلاقي عندها تصرفات ما تعجبو !

– فلان إتزوج 3 مرات .. ومالو؟ ربنا حلل ليهو أربعه .. وبعدين الراجل ربنا فاتحا عليهو وشغال غسيل اموال
– الكهرباء قطعت الليلة 3 مرات … ومالو ؟ دي حاجة جديدة يعني؟ ما قاعدة تقطع ليها سنين بدون حساب
– الخطوط الأمازونية عندها 3 رحلات يومية من الخرطوم للخليج .. ومالو؟ حاجة عادية الناس كووولها عاوزة تطفش من البلد
– شارع مدني الليله فيهو 3 حوادث مأساوية .. وشنو يعني ؟ الناس الماتو في الشارع ده أكتر من الناس الماتو في الحرب العالمية
– فلان موظف وعندو 3 عمارات .. ومالو؟ عااادي مش يمكن دخل ليهو صندوق وشال الصرفة الأولى؟
– تلقى منتخبنا القومي 3 هزائم متتالية في المشاركات الخارجية … ويعني شنو؟ هو متين شال ليهو كأس من سنة 70
– فلان (طلق مرنو) 3 طلقات .. يعني شنو؟ تكون الحالة ضاقت بيهو .. لكن المشكلة إنو بعد ده لازم لو عاوز يرجعا يعمل ليهو زول (تحلل) !
– خريج دخل 3 معاينات وما شالوهو.. عااادي في ناس بتدخل معاينات ليها خمسة وعشرين سنة وما قاعدين يشيلوهم ..المشكلة وين؟
– الاسرة دي عندها 3 أشخاص عندهم سرطان .. عاادي مع عدم الرقابة على الأطعمة و(الحاويات المشعة) كل شئ وارد
– المسؤول ده ليهو 3 عقود إلا شوية شغال (وزير) … شنو يعني؟ زول كفاءة .. أقل حاجة بيتكلم أربعه لغات .. الفصحى والدارجية والرندوك ولغة العيون !
– الدكتور كتب ليهو 3 حبات في اليوم .. حبه بعد كل وجبة .. ما مشكلة لكن هو كان بياكل تلاته وجبات ما كان مشى الدكتور
– فلان ده جاتو الملاريا 3 مرات في السنة دي.. ومالو ؟ أنا بعرف زول جاتو مرة وااحدة وإستمرت سنة؟ الكم مليار دولار الإتصرفت في سد مروي دي مش كانت قضت نهائياً على الملايا بدل ما نعيش هسه في (سخانة وباعوض)؟
– فلان ده عندو 3 درجات دكتوراة .. في المحاسبة والكيمياء والتاريخ … مع جامعاتنا و(التسهيلات) بتاعتا .. ممكن كمان يكون شغال (محامي) !
– (التلاتات) الفوق ديل كوووولهم ما مشكلة وممكن يحصلو لكن تعالو معاي شوفو التلاتة الجاية دي والمفروض ما تحصل (كلو كلو) … (الرجاء إن كنت تعاني من أمراض القلب تأكد من تناول الحبوب) .. جاء بصحيفة التيار عدد أول أمس (الثلاثاء) خبراً يفيد بأن إبن أحد المسؤولين في وزارة (إقتصادية) قد قام بإرتكاب حادث مروري أثناؤ قيادته للعربة الحكومية التي تخص والده وهي بوكس دبل كاب موديل 2016 يعني موديل السنة وتضيف الصحيفة بأن هذا هو الحادث رقم 3 لإبن المسؤول وهو يستغل هذه العربة الحكومية وقد تم وضع العربة في حوش الوزارة (ويا دار ما دخلك شر) !!

ولد المسؤول يصدم بعربة الوزارة 3 مرات ؟ … أهو دي المشكلة .. طيب المرة الأولى وصدم بيها (أبوهو ده) ما حذرو ما يسوقا تاني عشان دي (أموال الشعب الغلبان ده)؟ طيب ساقا صدم بيها للمرة التانية .. رد الفعل بتاع أبوهو المسؤول (العارف بالله) شنوووو؟ وعمل شنووو عشان (الود ده) ما يسوق عربية الحكومة المؤتمن عليها؟
أها (يا جماعة الخير) هل يعقل بعد ده كووولو (الود يسوق العربية) ويصدم بيها للمرة التالته ؟ !! بالله عليكم الزول ده مسؤول ؟ (الأب طبعن) !!
كسرة :
رفقاً بممتلكات هذا الشعب البائس الفقير يا من تصومون الإتنين والخميس !!

كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووووووووووو)+و +(و)
كسرة ثابتة (جديدة)
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووووووو) +(وووووووووووو)+و+(و))
كسرة جديدة لنج :
أخبار (أجهزة التصنت عالية الدقة) التي إستخدمت في غش إمتحانات الشهادة السودانية لسنة 2016 يا وزيرة التربية شنوووووووو؟ : (و)


تعليقات 11 | إهداء 0 | زيارات 7363

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1461777 [جوكس]
4.19/5 (6 صوت)

05-16-2016 03:24 PM
ورئيس يترشح 3 مرات برضو عااااادي

[جوكس]

#1461773 [ابوبكر]
4.07/5 (5 صوت)

05-16-2016 03:08 PM
يا الفاتح انت بقيت ماعندك موضوع
بالله لو ماعندك مزاج كتابه احتجب
كورتك فكت

[ابوبكر]

#1461663 [ابو الزفت]
4.07/5 (5 صوت)

05-16-2016 11:49 AM
يا عمك... أية المنافق 3... أذا حدث كذب واذا ا}نمن خان واذا أوعد أخلف...

[ابو الزفت]

#1461629 [سامي]
4.19/5 (6 صوت)

05-16-2016 10:43 AM
ماهو أنت تدفع وتسكت عن الكلام المباح يااستاذ جبرا وكان ما عاجبك الكلام دا هاجر وامشي جزيرة فيتس قالوا فيها أنقي أنواع الهواء وبعدين ولد المسعول الحكومي دا لو ما اتسلى بالحوادث دي كيف يطلع الشحوم الي في جسمو دي واتحللي واتحللي ونحن قلوبنا بالنار منصلية وبعدين الولد دا ما نضايقو شديد وهو اصلا مستعجل ولاحق ليهو partener في احدى الشقق المفروشة

[سامي]

#1461562 [ممدوح عبد الوهاب مكه المكرمه]
4.19/5 (6 صوت)

05-16-2016 08:50 AM
الاستاذ الفاتح لك التحيه
ما مشكله لو بقت على البوكس موديل 2016 الموضوع دخل فى اللحم الحى ياعزيزى

[ممدوح عبد الوهاب مكه المكرمه]

#1461470 [خواجة]
4.07/5 (5 صوت)

05-16-2016 04:52 AM
وين ناس المرور.يمكن عنده حصانة.تغطية شاملة مع
الأسرة.

[خواجة]

#1461447 [julgam]
4.19/5 (6 صوت)

05-16-2016 12:46 AM
ياود جبرا انا خايف عليك تلحق ود عووضه..يعنى شنو أمور التلات ورقات دى ..ياخي ممكن انا العنقالى دا اعمل الف ثلاثيه..غايتو الله يعوضنا..

[julgam]

#1461400 [على]
4.19/5 (6 صوت)

05-15-2016 09:58 PM
كسراتك دى يالفاتح لو ماختيت ليها كسرة اساسية عن حلايب السودانية مااظن تظبط معاك كدى ختها وقول يامسهل

[على]

#1461358 [ابوبكرنك]
4.19/5 (6 صوت)

05-15-2016 08:26 PM
نسيت 3 مهمه جدا وهي علي الطلاق بالتلاته.

[ابوبكرنك]

#1461357 [حكم]
4.19/5 (6 صوت)

05-15-2016 08:16 PM
هى موديل السنة وصدم بيها ثلاث مرات؟؟

يعنى ثلاثة حوادث فى خمسة شهور؟؟

الزول دا عندو رخصة؟؟

الدلع يعمل اكتر من كدا

[حكم]

#1461325 [الفاتح]
4.19/5 (6 صوت)

05-15-2016 06:59 PM
أبوهو ده يا أستاذ عندو ثلاث عربات حكومية وعندو ثلاث عمارات مبنيه وعندو ثلاث زوجات شرعية ومشغول عن ولدو ده وما يهمه موضوع العربيه يعني شنو بكره ياخد غيره

[الفاتح]

ردود على الفاتح
[SUDANI] 05-15-2016 09:32 PM
موش نحن بندفع؟


الفاتح جبرا
 الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة