05-16-2016 06:05 PM


فى اليوم الخامس من شهر ذو الحجة سنة 1436هـ الموافق اليوم التاسع عشر من شهر سبتمبر سنة 2015م أصدر السيد د. عوض الحسن النور وزير العدل بعض القرارت بخصوص فقدان الخطوط الجوية السودانية لحق زمن الهبوط والاقلاع بمطار هيثرو بلندن منذ العام 2007 . (ما يعرف بملف خط هيثرو) ،حيث طالب سيادته السيد المدعى العام لجمهورية السودان بفتح بلاغ تحت المواد (21/177) من القانون الجنائى لسنة 1991م ، ضد :كل من إيان باتريك و الكابتن على ديتشى، وكل من تثبت علاقته بالتعاون والاتفاق والتحريض معهما وتسبب فى فقدان خط هيثرو .

وقد وعد السيد وزير العدل عندها بالإنتهاء من التحقيق في هذا الملف وتقديم الوالغين فيه إلى العدالة في ظرف (شهرين) من إصدار سيادته لذلك القرار إلا أن وعد السيد الوزير قد تبخر وها نحن نقترب من العام دون ان نرى نهاية هذا الملف المحير حقاً .
ما دعى العبدلله إلى كتابة هذا المقال هو تصريح جاء بصحف الأمس أطلقه الباشمهندس مكاوى وزير النقل (أطال الله عمره) عند سؤاله عن هذا الملف حيث صرح قائلاً ( خط هيثرو خبرو عند وزير العدل) ، أي انه لا يعلم عنه شيئاً ، قالها الوزير بكل بساطة وكانه قد تم سؤاله عن شيء خاص لا عن شيء عام يقع تحت دائرة إختصاصه، وقد بذل العبدلله مجهوداً ذهنياً مقدراً (وركب الفهامة) حتى يجد مبرراً أو أسبابا تجعل السيد وزير النقل (يزوغ) من الإجابة على تساؤل الصحفيين رامياً الكرة في ملعب وزير العدل فلم يستطع !
لماذا لم يقم السيد مكاوي (أمد الله في أيامه) بتمليكنا نحن المواطنين المعلومات التي تخص بيع هذا الخط ؟ ولماذا لم يخبرنا إلى أي (محطة) وصلت المسألة ؟ وبما أنه الآن المسؤول الأول الذي يتبع له هذا الملف ، لماذا (الدغمسة) واللف والدوران في قضية عامة تهم كل المواطنين بحسبانهم المالك الحقيقي لحق زمن الهبوط والاقلاع بمطار هيثرو بلندن الذي تم بيعه غيلة وغدراً بثمن بخس مقارنة بثمنه الحقيقي دون أن يورد من ثمنه (جنيه واحد) لحكومة السودان؟
أكثر من ثمانية سنوات منذ أن تم البيع .. ومثيلاتها في التحقيق .. تعاقب على هذا الملف أكثر من (نائب عام) وأكثر من (وزير عدل) ، وأكثر من رئيس لجنة النقل بالبرلمان ولم يفلح أي منهم (حتى اللحظة) في الوصول بالملف إلى ساحة القضاء والكشف عمن قبضوا الثمن .
لعل ما يجعل أمر هذا الملف (عجيباً وغريباً) هذه الثلاثة أعوام التي مضت منذ أن صدرت توجيهات السيد رئيس الجمهورية (شخصياً) بمحاسبة الجهات التي تورطت فى فقدان الخط، ومطالبة سعادته باتخاذ الاجراءات القانونية اللازمة لحفظ حقوق الخطوط الجوية؟؟
السيد وزير العدل :
هاهو السيد وزير النقل يصرح بان (ملف خط هيثرو خبرو عندك) .. وأنت تعدنا بتقديم الملف إلى العدالة في ظرف شهرين و(القصة) ماشة على السنة ! .. لو الملف (مات) يا سعادتك كلمنا عشان (ندق الصيوان) ونتقبل التعازي ونشيل الفاتحة … ولا عزاء لمن لا يملكون ثمن (شريط مضاد حيوي) !!
كسرة :
ما قدرنا نكتب كسرة ذاااتو … هااات الحبووووب ياااا ولد

كسرة ثابتة (قديمة):
أخبار ملف خط هيثرو العند النائب العام شنو (وووووووووووو)+(وووووووووووو)+ (وووووووووووو)+(وووووووووووو)+و +(و)

 كسرة ثابتة (جديدة) :
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووووووو) +(وووووووووووو)+و+(و)

كسرة جديدة لنج :
أخبار (أجهزة التصنت عالية الدقة) التي إستخدمت في غش إمتحانات الشهادة السودانية لسنة 2016 يا وزيرة التربية شنوووووووو؟ : (و) ….
عن هذه الإعلانات


تعليقات 12 | إهداء 0 | زيارات 5728

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1462225 [ود عدلان]
4.07/5 (5 صوت)

05-17-2016 12:45 PM
تحية كبيرة للاستاذ الماسك علي جمرة هيثرو الفاتح جبرة

الشعب السوداني صاحب الخط يا استاذ الفاتح و انت سيد العارفين صاحب تار

و اصحاب التار لا يقيمون العزاء و لا ينصبون الصيوانات ولا السرادق الا بعد اخذ تارهم عنوة واقتدارا من الذين اغتصبوه
طال الزمن ام قصر
هذه رسالتنا نحن الشعب السوداني صاحب الخط لصعاليك الانقاذ و الموتمر الوطني كما يسمون اتفسهم

وسيعلم الذين ظلموا اي منقلب ينقلبون

و خط هيثرو ليس وحده
كل المسروقات حتما سترجع لاصحابها

[ود عدلان]

#1462183 [ashkan]
4.07/5 (5 صوت)

05-17-2016 11:49 AM
طال عمرك يا أستاذ جبرا الحكاية باينة زي الشمس في رابعة النهار وبدل ما تضيع وقتك بالواوات الما حتنتهي كلف واحد من طلاب الدراسات العليا يعمل بحثو في الموضوع دا عندما قام ناس المؤتمر الوطني الكانو تنفيذيين في سودانير ببيع جزء من الشركة لشركة عارف لانو القصة بدات من هنا والغرض الأساسي لإشراك عارف كان بيع خط هيثرو وبعد ما تمت العملية بنجاح كل واحد راح لحالو بعد ما إقتسموا الغنيمة أو الغنايم
شفت الإجرام كيف عند الناس ديل

[ashkan]

#1462056 [وحيد]
4.07/5 (5 صوت)

05-17-2016 08:58 AM
يا عزيزي جبره الجماعة كلهم بما فيهم الابله المسمى رئيس جمهورية - جميعهم في خشومهم ماء ... هم يا سيدي باعوا سودانير كلها بدون ثمن و دفعوا ثمنا غاليا لاستردادها مشلعة ... و هم - مسئولو المشروخ الحضاري و وزرائه ذوي الايدي المتوضئة - اشتغلوا ديوثين و محللين حين انشأوا شركة بالباطن مسجلة باسمائهم و تتبع لعارف حتى يتم لها السيطرة على كامل الشركة خصما من نصيب السودان ... هل تعتقد ان ذلك تم بدون علم و موافقة الرئيس و كبار الفاسدين و هل تتوقع انهم ( ما شالوا حقهم)؟؟؟
جيبو المكحل الممسح الشريف بدر اسالوه

[وحيد]

#1461978 [خاتي اللوم]
4.07/5 (5 صوت)

05-17-2016 05:48 AM
أستاذ جبرا
عملت لينا شنو في الكسرة الاقترحناها ليك وهي:

من الذي استأجر القناصة؟

ولا عندك الإجابة والقصة ماعايزة سوْال ؟

[خاتي اللوم]

#1461970 [خواجة]
4.07/5 (5 صوت)

05-17-2016 04:46 AM
الخط سبلوهو زمان. ولاعزاء ولايحزنون ولا صيوان.
خلاص delete.

[خواجة]

#1461966 [Ismail Hussein]
4.07/5 (5 صوت)

05-17-2016 03:15 AM
ياأستاذ جبره،
"أولا هيثرو ده مش في لندن ولندن ده مش في إنكلترا وهي من بلاد الكفار والإستكبار المعادية للتوجه الحضاري، عشان كده خط هيثرو ده إتباع عشان تقطعوا رجلكم من بلاد الكفار." منقول بتصرف من فتوى لتبرير بيع خط هيثرو.

[Ismail Hussein]

#1461960 [A. Rahman]
4.19/5 (6 صوت)

05-17-2016 02:17 AM
يا الفاتح الجماعة اللي عندهم سلطة لبيع الخط ليسوا اكثر من أصابع اليد الواخدة، كما ان العملية لا يمكن ان تتم دون موافقة الحرامي الأساسي و هو مدفع الدلاقين المعروف مجازا برئيس الجمهورية الذي ظل ينقل المتورطين من منصب لآخر الى يومنا هذا، و سيبنا من حكاية توجيهه بالتحقيق مع المتورطين، و سيدنا من حكاية منصب النائب العام الذي تعاقب عليه كذا واحد ما قادرين يحسموا قصة هذا الملف

[A. Rahman]

#1461936 [samer]
4.07/5 (5 صوت)

05-16-2016 11:53 PM
تعرف يا ود جبرا موضوع خط هيثرو دا زى لعبتنا زمان شليل وين راح خطفو التمساح بتاع الانقاذ و شليل وينو اكلو الدودو بتاع الانقاذ و بعدين قول خط هيثرو موجود اين له الطائرات؟؟ راحن فى حق الله و لحقن امات طه و لكن على عثمان ود طه قاعد حى يرزق و بعدين ما تستعمل الحبوب احسن تطلع الشارع ممكن اجيب فايده بدل الواوات الضكريه .

[samer]

#1461908 [رجب حسان]
4.07/5 (5 صوت)

05-16-2016 09:10 PM
خط هثرووو معكنن فيه علي عثمان وهو الخازوق الدي اتلف غيره من مشاريع زراعية وسكة حديد وخطوط بحرية وجوية وانت عايز ياجبرة تلقي منووو خبر؟؟هده سياسات العملا لتدمير البلد

[رجب حسان]

#1461906 [كاسـترو عـبدالحـمـيـد]
4.07/5 (5 صوت)

05-16-2016 09:02 PM
اقتباس :-
لعل ما يجعل أمر هذا الملف (عجيباً وغريباً) هذه الثلاثة أعوام التي مضت منذ أن صدرت توجيهات السيد رئيس الجمهورية (شخصياً) بمحاسبة الجهات التي تورطت فى فقدان الخط، ومطالبة سعادته باتخاذ الاجراءات القانونية اللازمة لحفظ حقوق الخطوط الجوية؟؟
----------------------------------------------------------------------- اصبحت اشك فى ذاكرتك يا استاذ / الفاتح . فكيف غاب عليك انه صدرت توجيهات من السيد/ رئيس الجمهورية ( شخصيا ) بمحاسبة الجهات التى تورطت فى فقدان الخط الخ ..... الا تعلم بأن مجرد تدخل رئيس الجمهورية فى اى موضوع أو مشكلة وخاصة اذا كانت فساد , انه الموضوع دا خلاص يتقفل بالضبة والمفتاح . اتضح انه دا كود سرى لزوم العملية انها تموت . بالله كيف راحت عليك هذه المعلومة ؟ مع انه الشعب السودانى كله عارف الحكاية دى ولو سألت ولدك البجيب ليك حبوب الضغط كان قال ليك يابوى انت مالك دائما بتنسى . الموضوع دا ما تتدخل فيه البشير واصدر تعليمات فيه بأن يتقفل ومافى تحقيقات ولا محاكمات ولا سجن والا اى حاجة . انت ما عارف يا ابوى انه تعليمات البشير عمرها ما اتنفذت ولا بيحترمها اى مسؤول . دحين الميادين اللى استولوا عليها الفاسدين والحرامية رجعت زى ما كانت ارض فاضية يلعبوا فيها الأولاد ويقيموا فيها الناس المناسبات الخ ... حسب ما امر الرئيس البشير باعادتها الى سيرتها الأولى . وبمناسبة سيرتها الأولى التى دائما تذكرنا بمشروع الجزيرة . هل رجع لسيرته الأولى ؟ ما اهو كل يوم كل المسؤلين صاروا يستعملوا هذه الجملة فى اى عمل يخص وزاراتهم .

كسرة :- والله الولد طلع اشطر من ابوه . يعنى البشير لو هو فعلا جاد فى محاربة الفساد . ممكن يكون السبب فى دخول زوجته واخوانه ونسابته السجن ؟ معقول دى تحصل يا جبرة ؟ والله الولد ليه حق . اها توبة تانى كان اجيب سيرة خط هيثرو دى تانى على لسانى . ومن اليوم دا توبة .وبس حا اكتب فى قضايا الفساد التى لم يقم البشير باصدار توجيهات فيها بعد اكتشاف الولد الشقى دا ( للكود الشفرة بتاع البشير مع جماعته المسمى ( توجيهات الرئيس ) .

[كاسـترو عـبدالحـمـيـد]

#1461895 [من الاااااااخر كدة]
4.07/5 (5 صوت)

05-16-2016 08:30 PM
(السيد وزير العدل :
هاهو السيد وزير النقل يصرح بان (ملف خط هيثرو خبرو عندك) .. وأنت تعدنا بتقديم الملف إلى العدالة في ظرف شهرين و(القصة) ماشة على السنة ! .. لو الملف (مات) يا سعادتك كلمنا عشان (ندق الصيوان) ونتقبل التعازي ونشيل الفاتحة … ولا عزاء لمن لا يملكون ثمن (شريط مضاد حيوي) !!)


الاستاذ الفاتح جبرا



للاسف كنت واحد من المتابعين باهتمام لمقالاتك بخصوص خط هثيرو ولكن المقتبس اعلاه يلخص مدي الهوان الذي وصلنا اليه نحن اهل السودان وان خلاصة الموضوع شيل فاتحة ودق صيوان بس الشي الفايت علينا اننا لن نجد ارضا لدق مسمار مش صيوان


نحن ما بندق صيوان ولن نقبل عزاء مش في خط هيثرو بس بل في كل السودان الذي قتل بايدي هذه العصابة مالم نكن رجال فعلا وناخذ بثارنا من هذه العصابة الموجودة الان


من الاخر لابد من اقتلاع هذه العصابة فورا مش نضيع الوقت في الكلام عن جرائمهم ولم اقل كشفها لان الكل يعرف ذلك


الاقتلاع والتصفيه للعصابة فعلا وفورا هو المطلب الان


الكلام الكتير عن اجرامهم مضيعة للوقت ويعطيها طابع الاعتياد للاسف ويصب في مصلحتهم للاسف

[من الاااااااخر كدة]

#1461877 [أبوعديلة المندهش]
4.16/5 (6 صوت)

05-16-2016 07:42 PM
ياأستاذ جبرا الموضوع لايحتاج لكل هذا الكم من الواوات لأن اللص الذى صبت فى جيبه وجيب بطانته عوائد بيع خط هيثرو وغير خط هيثرو هو اللص الأكبر عمر البشير. هذه هى المسألة بأختصار شديد وعشان كده مافى واحد عايز يتجرأ ويقول البغلة فى الأبريق .

[أبوعديلة المندهش]

الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |الفيديو |الصوتيات |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة