صندوق دعم المسئولين
04-04-2011 12:10 PM

ساخر سبيل

صندوق دعم المسئولين

الفاتح يوسف جبرا

(فجأتن) وبدون أن يسألهم أحد بدأ كبار المسئولين فى الإفصاح عن (رواتبهم) ! ولأول مرة يعرف (العبدلله) ومعاهو الشعب السودانى الفضل كم يبلغ مرتب السيد نائب رئيس الجمهورية وكم يبلغ مرتب والي الخرطوم .. وكم كان سوف يكون جميلا لو بالمرة كشف لنا المسئولون عن مرتبات (الجيش الجرار) من المستشارين الذين لا يستشارون !

بعض أن إطلعت على مرتبات أولئك المسئولين من خلال تصريحاتهم الأخيرة حتى هتفت فى حزن وأسى ( حرام والله حرام معقولة بس؟ هسه القريشات دى بتعمل ليهم شنو؟).. كان قلنا الكهرباء البيت كلو مولع من صباح الرحمن والكم تلاجه الفريزر ما بيقيفوا أصلو لزوم اللحمة والبيرقر والسجق ما تجيهم حاجة .. وشاشات البلازما والكمبيوترات حقات الأولاد وكمان الغسالة الفل أوتوماتيك والخلاطة والسحانة والشنو ما بعر داك .. أها الكهرباء دى بى كم؟

خليكم من الكهرباء .. البنزين ده ما مشكلة ؟ العربية البتودى الأولاد المدرسة وتجيبهم عاوزه ليها فى اليوم بنزين بي كم؟ .. العربية البتودى المدام للشوبنج وللمناسبات عاوزه ليها بنزين بي كم؟ .. العربية البتجيب اللحمة والخضار وباقى الأغراض .. (بإعتبار المسئول عندو ترحيل جماعي) البنزين بتاعا فى اليوم بي كم ؟ أها العربات دى بتمشى بالموية ؟ شوفوا البنزين البتستهلكو ده قدر شنو؟ وبي كم ؟

نجى للمدارس .. لو بس المسئول عندو تلاته فى مدارس خاصة وواحد فى جامعة خاصة ديل براهم ما (نص المرتب) !

خليكم من مصروف الجيب اليوماتى وحق الفطور (المسئول) والإسكراتشات والبارد والساخن واللازم منو !

ده غير العلاج .. (بالخارج طبعن) فما أن تلتهب إحدى أذنى المسئول نسبة لعدم إستخدامهما بالسنين حتى يهرع بالحصول على تذاكر الدرجة الأولي له وللعائلة الكريمة ويدفع (دم قلبو) فى نفقات الكشف والعلاج والأدوية والإقامة الخمسة نجوم .. ثم العودة محملا بالهدايا للأقارب والأصحاب والجيران (معقول مسئول يرجع من السفر وإيدينو فاضية)

أها (مرتب الجن) ده بيستحمل حاجات زى دى؟

الناس دى غلبانه والله .. الناس دى عايشة كيف؟ حالتو لسه ما إتكلمنا على (الملبس) المفروض يكون (ما خمج) والمأكل المفروض يكون (من طيبات ما رزقناكم) وضيافة الزوار من (بارد وساخن) وشاى وسكر وبن ولين والمواجبة فى بيوت الأفراح والأتراح (يعنى معقول والي يخت ليهو فى الكشف عشرين جنيه) !

المسئولون أعزائى المواطنين لايجأرون مثلكم بالشكوى .. وما قاعدين (يتجرسو) زيكم كده .. هم راضون بما قسمه لهم الله من مرتبات تكاد بالكاد تفي بضروريات الحياة ولأن المسئولية تفرض عليهم تحمل الصعاب فهم يعملون فى صمت من أجل أن تكفيهم هذه المرتبات الهزيلة ولا تستغربوا أبداً أعزائى المواطنين إذا جاء اليوم الذى تقومون فيه بمشاهده أحد هذه المواقف :

- (مسئول يخاطب تيم الحراسة الذى يتقدمة) : بالله ما تلفو شمال عشان آدم سيد الدكان ده ما أديتو حسابو وكمان ما تمشوا بالظلط داك عشان عباس الجزار ده أنا زائغ منو

- (بتاع اللبن الصباح يخاطب الخفير) : والله أنا لا بعرف والي لا بعرف جن أحمر لو ما أديتونى حق الشهر ده والفات رطل واااحد ما بديكم ليهو

- (الزوجة تخاطبه) : هسه الأولاد ديل ح تعمل ليهم شنو؟ قالو ليهم لو ما جبتو القسط بتاع الرسوم ما تجوا المدرسة

- (الأبن الصغير يخاطبه) : معقوله بس يا بابا كل يوم جنيه بس مصروف ده هسه بيجيب شنو؟

- (يخاطب زوجته) : معقوله .. كل يوم عدس .. كل يوم عدس .. بكره أعملي لينا رشوشه !

- (يخاطب أولاده) : يا أولاد وقفوا التلاجه دى وأطفوا النور .. الجمرة دى عاوزه تقطع

كسرة :

المسئولين ديل غلبانين خلاس عشان كده حقو نعمل ليهم .. صدم .. (صندوق دعم المسئولين) !!


تعليقات 19 | إهداء 3 | زيارات 6088

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#122642 [ام محمد]
0.00/5 (0 صوت)

04-05-2011 03:24 PM
يمكن يا جبرا الناس ديل فيهم بركة زى بركة مريم العذراء مثلا ...بيكونو قاعدين فى المحرابات اقصد الصوالين بتاعتهم دى وربنا برسل ليهم رزقهم لحدى عندهم...مع الفارق الرزق مازى فى حالة مريم عليها السلام اكل 00الرزق هنا قروش حييييية بتنزل عليهم من ربهم زى المطر...يا جماعة ماتحسدوهم ساى زى ما قال المتعافن ..المتعافن قال بقرا المعوزتين قبل النوم كل يوم خوفا من الحسد


#122637 [فلان]
0.00/5 (0 صوت)

04-05-2011 03:12 PM
يا nubian هم الشريف بدوربيهم شنو قول يمشن حريمهم الخطيرات ديل


#122636 [بت ام الحسن]
0.00/5 (0 صوت)

04-05-2011 03:08 PM
سمعت ياجبراآخر خبر ...المصريين بعد ما(حلبو ) بقر البشير واللبن جاهم دافر من (الحلابات) ....خجلو وخاطرهم انكسر وقالو ح يرجعو لينا حلايب ....شفتو البشير شفت كيفن ..اهو رجع لينا حلايب بدون نقطة دم واحدة ياخى ده راجل عندو بعد نظر مابدفق بقرو اقصد مويتو على الرهاب


#122628 [ام الحسن ]
0.00/5 (0 صوت)

04-05-2011 02:52 PM
غايتو انا بتتبرع للصندوق ده ب10 ريال .. قدرتى .ماتقولو لى شوية مالها انشاء يشترو بيها مرقة للرشوشة الداير الوالى يغير بيها العدس الطار ليهو ده ها ها هههههههههه


#122433 [امين الشريف]
0.00/5 (0 صوت)

04-05-2011 10:40 AM
يا عمنا جبره نسيت انو اولادهم بيدرسوا في الجامعات الخارجية وواحد من اولاد الجماعة ديل مات في اوروبا ايام كان بيحضر في الدكتوراة والناس اتشاكلت في الورثة اللي بالدولار!!!!!!!!!! اها عايز اقول ليك حاجة مهمة الناس ديل نظام شغلهم زي نظام شغل (الشوام) في الخليج اللي ما بيعتمدوا على راتب الشركة الضعيف اصلا لكن اعتمادهم وفايدتهم كوووووووولها في (النسبة) نعم النسبة التي تحسب لهم في مبيعاتهم او في المكاسب الايجابية التي يحققونها للشركة فتجد انه لا مقارنة ما بين الراتب والنسبة فجماعتك ديل كمان معتمدين على النسبة والحاجات اللي ذكرتها ليك قبل كدا في موضوع الفساد من حوافز من اعمال اللجان وحوافز مؤتمرات وكدا ودي الحاجة المعيشاهم لكن تاني ما عندهم اي حاجة من شركات واستثمارات وخلافه ....


#122401 [طفشان منهم]
0.00/5 (0 صوت)

04-05-2011 09:47 AM
يا أستاذ جبرا
أنت ما وريتنا المسؤول دا معين بالدرجه الكم يمكن تكون التاسعه يعني مرتبه (275 جنيه) وفي الحالة دي عشان نعمل ليه دراسة حالة إجتماعية ونتوسط ليه عند أمين الصندوق .
كسرة :
والله ديل الصندوق العرب الكويتي للتنمية ما يعمل ليهم حاجه


#122365 [المغتاظ]
0.00/5 (0 صوت)

04-05-2011 08:24 AM
والله صدقا لي كلامك ده سمعنا كلنا انو اخو الريس كان عنده مشوار لي لندن القريبة دي ويحلف انه ماعنده حق التذكرة ده كلام ياناس


#122311 [أبورماز]
0.00/5 (0 صوت)

04-04-2011 11:52 PM
تعرف يا جبرا نكتة الشافع القال لأبوهو الموظف أدينى خمسماية جنيه عشان المدرسه جايبين فيها حاوى ، الراجل قال ليولدو يا ولدى هو فى حاوى غيرى أنا المعيشكم بمرتب الحكومه ........... دحين يا جبرا يا خوى مسعولنك ديل مش حوى ...!!!!


#122306 [nubian]
0.00/5 (0 صوت)

04-04-2011 11:31 PM
طيب ما يسافروا للشريف


#122297 [قاسم خالد]
0.00/5 (0 صوت)

04-04-2011 10:48 PM
مصداقا لكلامك يا شيخ جبرا حكى لي صديقي أنه وجد الوزير شاكاني على باب مسجد العارف بالله والد كبير حكام البلد و هو مادا يده و يجعر : لله يا محسنين . سأله صديقي : ما هذا يا أيها الورع ؟ أجابه ( بعد تفكير كما قال الشاعر : وقف الشيخ طويلا كما فحل الضباع ) قال له : تصور حق العرسة نقص عليّ ... سأله صديقي : أليس لديك أربع في حبلك ؟ أجابه الشيخ الورع : لا طلقت الكبيرة قبل تلاتة شهور ... سأله صديقي : و دي العروس نمرة كم ؟ أجابه الشيخ الوزير : و الله يا دوبك نمرة خمستاشر ، انت قايلني زي شيخنا داك تميت العدد دستتين ؟ قال صديقي شعرت بالحزن لحال الرجل خاصة عندما عرفت أن عروسه الجديدة تبلغ الثامنة عشرة و الفرق بينهما فقط أربعين عاما ، بكيت من أجل الرجل و زاد حزني لأني كما تعلم مفلس لا أملك ما أساعده به لكنني قلت له : معليش يا شيخنا خد حقك من قروشي المدفوعة في بند النفايات ...


#122280 [ابو الهول]
0.00/5 (0 صوت)

04-04-2011 09:22 PM
انت يا جبرة ما دايرنا نقرا ليك الاسبوع الجاي ولا شنو ؟

غايتو انا حجزت ليك الشقة المقابلاني ..


#122270 [وحيد]
0.00/5 (0 صوت)

04-04-2011 08:40 PM
اذا كان حافز وكيل وزارة مهمشة 165 مليون ... تفتكر كم المرتب و الحوافز الاخري و امتيازات الوظيفة و نثريات السفريات ؟ اضرب دا في 3 عشان تحصل مستحقات الوزير و اضربها في سبعين اتحادي و كم كم وكيل و بضع مئات من المديرين العامين و الولاة و وزراء الولايات و المعتمدين و \"الممثلين \" بالشعب في المجلس المسمي وطني و مجالس الولايات و المحليات و المطبلاتبة و المزوراتية و العاملين في الشركات التي تمولها الدولة و يحلبها \" المجاهدون\" ناهيك عن المنظمات الخيرية \" جبت سيرة اي عربية هايلكس؟\" و غير الخيرية ...
اما ميزانية كلاب الحراسة و ماكلها و نثرياتها و بدل استعدادها \" لسحق \" اي معارضة فدا موضوع تاني...
تقول لي البترول مشي وين!


#122203 [زنقه زنقه]
0.00/5 (0 صوت)

04-04-2011 05:53 PM
بابا جبره نسيت كمان مرتبات الشغالين في البيت من فلبينيات وحبشيات و غفراء وسواقين وسفرجيه وديل مرتباتهم بتكون علي الاقل مريار كدى والله مساكين شديد المسئولين ديل


ردود على زنقه زنقه
United Arab Emirates [وليد] 04-05-2011 10:42 AM

وعلى قول عادل امام في مسرحية الزعيم:

اللهم افقرنا واغنيهم
اللهم خد مننا واديهم
اللهم شلحنا وغطيهم
اللهم انفخنا وفسيهم


#122172 [الزول السمح ( الأصل )]
0.00/5 (0 صوت)

04-04-2011 04:42 PM

نعمل ليهم (صـدم)

إلهى وإنت جاهى ...أسالك بأسمائك الحسنى .....وملكوت ملائكتك ...ورسالات رسلك

أن تخص كل من ينتمى للمؤتمر الوطنى والإنقاذ والمؤتمر الشعبى ..ومكوناتهم من المؤصلين والمفصلين والمفسرين والمفتين وتابعيهم بصدمات سكرى فيصبحوا هامدين
إلى يوم الدين


#122088 [Saif AlHagg]
0.00/5 (0 صوت)

04-04-2011 01:59 PM
يا جبرا والله انت مسيكين خلاص يعنى دى رواتبم الاصلية ولا دا الاساس بس
http://www.alrakoba.net/articles.php?action=show&id=6839
وين المخصصات؟

عاوزين صندوق كبير لكنس كل المفسدين


#122087 [زول حقانى]
0.00/5 (0 صوت)

04-04-2011 01:58 PM
خلاص ما دام قلتو كده نقترح ان يدعم الصندوق من الجهات التالية:
1/ الرسوم التى تستقطع من عرق اطفال الدرداقات بالاسواق وقدرها 10 جنيه فى اليوم.
2/ استقطاع 50% من حصة وزير الداخلية فى ايصالات المخالفات.
3/ تخصيص 50% من رسوم النفايات.
4/ تخصيص 50% من الدعم المقدم لدور الاطفال اللقطاء.
5/ واخيرا نوصى بدعم مقدر من ديوان الزكاة.
واذا ما كفى ده كلو وماظنو حيكفى نقترح فرض ضريبة جديدة على المواطن يمكن تسميتها بضريبة استنشاق الهواء.
حقا ان شر البلية مايضحك.


#122066 [محمد المبارك]
0.00/5 (0 صوت)

04-04-2011 01:19 PM
السلام عليكم الليله دي قويه و الله


#122044 [ابو كره]
0.00/5 (0 صوت)

04-04-2011 12:39 PM
والله انا ماعرفر المسلطك على الجماعة ديل منو ؟؟


ولا يكون عندك حصانة دوبلماسية او حتى حمارة دبلوماسية .. ولا هم يكون صابرينلك فوق رأي


#122024 [El Hadi]
0.00/5 (0 صوت)

04-04-2011 12:21 PM
فساد في السويد .. يالطيف... خربت الدنيا


فساد في السويد !!!!!!!!!!!
فضيحة عمدة استكهولم !!

حاكمة استوكهولم السويديه - عضو برلمان ورئيسة حزب
.. ويقول الخبر الذي شغل وسائل الإعلام : ان عمدة ( أو حاكمة) مدينة استكهولم السويدية ( وهي سيدة معروفة في بلادها اذ هي عضو في البرلمان ورئيسة حزب إضافة الى كونها عمدة استكهولم ) أحدثت فضيحة مدوية اتهمت من جرائها بالفساد الإداري وتهم أخرى شنيعة ، حدث كل هذا حين أقدمت هذه السيدة على ملء خزان وقود سيارتها الخاصة واستقطاع الثمن من دفتر بطاقات حكومية ، وهنا تزلزل العالم من حولها وحصلت تداعيات خطيرة جراء ما أقدمت عليه : بأي حق تستخدم البطاقات الحكومية لتسديد ثمن وقود سيارتها الخاصة؟ لماذا تصرفت في ملكية عامة لشان خاص؟ لماذا خانت الأمانة وهي حاكمة المدينة؟!.
ونشطت الصحافة ( بأنواعها ) وكذلك الجمعيات والمنتديات المهتمة بالحقوق العامة ومكافحة الفساد وتناولت ( الفضيحة ) الكبرى وكشفت للرأي العام القضية المثارة من جوانبها المختلفة ومبلغ الأضرار التي أحدثتها على سمعة الوطن !.. وقد حاولت العمدة الدفاع عن نفسها أمام المحكمة بالقول (( أنها اضطرت لذلك لأنها لم تكن تملك في جيبها النقود)) فرد عليها القاضي مؤنبا (( هذا لا يبرر فعلتك الشنعاء إذ كان بإمكانك ان تركني عربتك وتصعدين بالقطار العام !)).
وقد انتهت التحقيقات القانونية وحيثيات المحاكمة والمواكبة اليومية من وسائل الإعلام واستطلاعات الرأي إلى إدانة شديدة لتصرف العمدة ( الذي وصف بالفاسد والمشين ) ومن جراء هذه الإدانة اضطرت السيدة إلى تقديم استقالتها من منصبها كعمدة للمدينة كما تم رفع عضويتها من البرلمان وجمدت مناصبها جميعا فقضي عليها وجلست في بيتها !.. فمن اجل ثمن بسيط وتصرف شخصي اضطراري لم يشفع لها احد في بلاد الكفّار ، ولم يدافع عنها واحد من ( شللها ) العديدة كما لم يبادر ( حزبها ) ويلفلف القضية وفق نظرية ( عفا الله عما سلف !) ولم تسّود الصحف بتسفيه التهم وخلط الأوراق ورمي الفضيحة على رؤوس المحاصصة والمناطحة! كما لم يحاجج متنطع من كون ( المتهمة ) حاكمة المدينة وعضو في البرلمان مما يجعل تصرفاتها مأمورة من عند الله !.
من سوء حظ هذه الحاكمة أنها ولدت في بلاد الأحياء ، وكان يمكن أن تحكم كما تشاء وأنّى تشاء ( وفق مبادئ الحق الإلهي ) فقط لو أنها حكمت شعبا مكتوبا عليه ألا يفيق من نومة الكهوف!!.



الفاتح يوسف جبرا
الفاتح يوسف جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة