الرقم 0969187542
07-03-2016 12:26 PM




بينما كنت أقود عربتي صباح الامس إذا بهاتفي الجوال يرن فقمت على الفور بالوقوف ، نظرت إلى الرقم فإذا هو رقم زين عادي (الفوق ده) ، ولأنني أجيب على كل الهواتف حتى تلك التي تتصل لأول مرة فقد قمت بالرد :
• السلام عليكم
• عليكم السلام ورحمة الله تعالى وبركاته
• معاك قسم التسويق والمسابقات شركة زين ، مش إنتا صاحلب الرقم ........
• أيوه ده رقمي ده ذاااتو .. أهلا وسهلا مرحبا
• (بدأ يقرأ من ورقة) : يسعد شركة زين أن تزف إليك التهنئة بمناسبة إختيار رقمك ضمن آخرين في المسابقة التي أجريت في قناة النيل الازرق هذا وسوف نقوم بتسليمكم الجوائز في أقرب وقت ممكن
• ممكن يا أستاذ ناخد بياناتك؟
• جدا
• الإسم ؟ (هنا دقس لأنو لو شركة مفروض البيانات تكون عندها) !
• ................
• السكن
• ...............
• شركة زين تحييك ومبروك عليك هذه الجائزة وهي عبارة عن محادثات مجانية لمدة شهر ومبلغ تسعة مليون وتسعمية جنيه (يعني الود خصم الضريبة هههه) !
• أها يعني المطلوب منى شنو ؟
• عاوزنك ما تكلم الناس .. المرة الفاتت يا أستاذ عندما أعلنت شركة زين عن تقديم جوائزها تدفق المشتركون على مباني الشركة وحصل تلف للأجهزة والمعدات لذلك عاوزنك تتكتم على خبر فوزك وما تكلم أي زول إلا بعد إستلام الجائزة (ههه يعني يعني الإحتيال يكون كتامي عشان مافي زول مفتح ينصحك لو كنتا طيرة ) !
• حاضر .. هسه أعمل شنووو؟
• أقرب محل لشراء رصيد يأ أستاذ ليك وين؟ عشان ح نرسل ليك مبلغ الجائزة في شكل رصيد
• قريب مسافة دقايق
• طيب يا أستاذ أمشي إشتري منو كرت رصيد بي عشرين جنيه ولمن تجيبو خليك ماسكو في ايدك وأرجع ليا
• (طبعا عرفتا القصة إحتيال .. قلتا أطلع إسمو من برنامج Number Book لقيتو ما مسجل .. دقائق ورجعتا ليهو .. ) :
• (عشان أخليهو مطمئن) : آلو قسم المسابقات بشركة زين؟
• أيوة يا أستاذ
• أها أنا جبتا الكرت أبو عشرين
• طيب يا استاذ عشان نرسل ليك مبلغ الجائزة لازم يتم شحن رصيدك بي مبلغ عشرين جنيه عشان نفعل الخدمة !! (الجائزة تسعة مليون وتسعمية والشركة بتطالب بي عشرين جنيه ههههه)
• كويس أها أنا هسه أعمل شنووو؟
• أكشط الكرت
• كشطناهو
• يلا ملينى الأرقام أول تلاته أرقام
• (من راسي) : 667 .. (وبدأ ينزل الرصيد في تلفون قدامو ههه)
• والبعدهم
• 552
• والبعدهم
• إنتا عاوزني أمليك الأرقام كوووولها !
• آآي عشان نفعل ليك رصيدك
• شوف يا ود يا محتال ... وقف الإحتيال الإنتا بتعمل فيها ده .. وما تفتكر إنو شريحتك دي ما مسجلة إنك ما ح تتمسك وتقوم تحتال على الناس البسطا .. وأنا ح أكلم ليك السلطات عشان يقبضوك يا محتال !
• تتييت .. تتتييت .. تتتييت (وإنقطع الخط) !
من الواضح إنو المسألة دي ممكن تمشي على البسطاء من الناس .. بسهولة ومن الواضح كمان إنو الزول ده إستغل قصة إنو شريحتو (مجهولة) وغير مسجلة مع إنو نحنا كثيراً ما كتبنا عن خطر ظاهرة الشرائح غير المسجلة للهواتف النقالة وأضرارها وتأثيراتها السالبة على المجتمع خاصة على مستوى الجريمة المتنوعة .
في 15 مايو 2014 (تحديدا) أكدت وزيرة العلوم والاتصالات د. تهاني عبد الله عطية على مضي وزارتها قدماً في القضاء على هذه الظاهرة وذلك عن طريق قيادة حملة تحث فيها غير المسجلين من مستخدمي الهواتف السيارة على إكمال عملية التسجيل وقد أوضحت الوزيرة حينها على أن المهلة التي أعطيت لتسجيل الشرائح المجهواة تنتهي بنهاية مايو (2014) وهي غير قابلة للتمديد مرة أخرى .
طيب .. هسه منو المسؤول؟ وزارة العلوم والاتصالات التي لا تتابع عمل شركات الإتصالات ؟ وللا شركة الإتصالات التي لم تتبع تعليمات الوزارة؟
عموما نرفع الأمر للجهات المسؤولة ونحث على سرعة ضبط صاحب هذا الرقم والتحقيق معه ونواسي من إنطلت عليهم هذه الحيلة والجاتكم في (عشرينكم) سامحتكم !

كسرة :
نتوقع رد من وزارة العلوم والإتصالات .. ويا ناس (زين) نحنا نلاقيها من وين وللا من وين؟ !
إنتبه :
هنالك واو (شهر) جديد !!
• كسرة ثابتة (قديمة) :أخبار ملف خط هيثرو العند النائب العام شنو؟ 80 واو - (ليها ستة سنوات و 9 شهور) ؟
• كسرة ثابتة (جديدة)
أخبار تنفيذ توجيهات السيد الرئيس بخصوص ملف خط هيثرو شنو؟ 39 واو (ليها ثلاث سنوات وأربعة شهور)
الجريدة


تعليقات 6 | إهداء 0 | زيارات 8651

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1484170 [عباس]
5.00/5 (2 صوت)

07-04-2016 06:54 PM
مره واحد منهم جرب معاي الدور..قلته ليهو يا أخي إختصر لأني عسي في أوروبا والمحادثة محسوبة علي...
قال لي هو بالله زين بتصل أوروبا ؟؟؟؟؟؟
وإنت يا مدير التسويق والمسابقات شغال في شركة شل ؟ !!
حتي الإستهبال والفهلوة والغش ما شاطرين فيهم..

[عباس]

#1484050 [عبدالواحد المستغرب اشد الإستغراب!!]
5.00/5 (1 صوت)

07-04-2016 12:32 PM
يا جبرا الحوار ده سُجل من قبل عامين وكانت لافه صوتا في مواقع التواصل الاجتماعى وعلى ما أذكر النصاب طلع (ود ناس)وإعتذر للشخص السجل ليهو الكلام يعنى طلع احسن واشرف من النصابين الحاكمين البلد 27سنه وبداؤا معانا(بآلو..نحن ناس الإنقاذ..جينا نصلح البلد ونغركم في نعيم..وبالمره كمان نكسب فيكم آجر ونأخدكم لجنه عرضها السموات والأرض إعدت خصيصا لآهل السودان من دون العالم..بشرط ما تكلموا زول!!)وزى ما شايف يا جبرا 27سنه ونحن في إنتظار الجوائز الموعوده وخشمنا عندنا ما مكلمين اى زووووول والخازوق راكبنا للطيش لا قادرين نستحمل ولا قادرين نسلو ؟!! تقول لى وزيرة شنو كده ما عارف؟!! ما ياها جزء من الخازوق ..والله اكبر عليهم ،،

[عبدالواحد المستغرب اشد الإستغراب!!]

#1483985 [رشدى محمد خليل]
5.00/5 (1 صوت)

07-04-2016 08:45 AM
استاذنا الكبير ( الفاتح كل العلوم )
كل عام وانت والسودان كله بخير ومن غير كسرات... وياليتك والله تضيف الرقم :249922104884- ونفس حكاية الرقم غير ان الضارب (العايز يضربتا) هذه المرة قال متصل من ام ت ام والظاهر انه رسوم الضرب بتاعتهم هذه المرة تحويل مبلغ 200 جنيه اما الجائزة ف 10000 وخمسمائة جنيه لكن يا استاذ الغريب فى الامر انه الزول ده كان هادى وبارد شديد وبيتكلم كأنه موظف جد جد لكنه حاول يقدم التحية والقفلة بتاعت ناس الاتصالات الجميلة ديك لكن للاسف ما جات معاه كويس ولما عكننته شوية بالاسئلة قال لى انا حاحولك للمدير وجا المدير وطلع لامؤاخذه اظرط واضل ولما العلاقات اتوترت بيناتنا قال لى انا الان فى اجتماع وبعد يومين ضرب لى تانى الموظف ونفس الرقم وعاد لى الحكاية والروايه من جديد وقعدت اضحك وقلت ليه ياخى انت نصاب ما منظم , ياخى انت ماضربت لى قبل يومين وانا فى الاخر قلت ليك ياخى الجائزة دى شيلة هدية منى ليك , المهم الجماعة ديل هسا بيكونوا فاتحين ليهم مكتب عديل كده طالما الحكاية ماشية معاهم حلاوة ونا خايف دى تزيد اعباء كسراتك وتضيف كسرة للاتصالات والله لا يضيع اجر من احسن عملا, اخوك رشدى الباشا.

[رشدى محمد خليل]

#1483683 [الطيب عبدالرحمن]
5.00/5 (1 صوت)

07-03-2016 02:29 PM
نسال الله الهدايه ونرجو من الجهات المسؤله اتخاذ الاجراءت اللازمه

[الطيب عبدالرحمن]

#1483657 [جراهام]
5.00/5 (1 صوت)

07-03-2016 01:56 PM
استاذالفاتح نرجو الرجوع الى الكسرة القديمة وذلك لوقعها الخاص وبما ان الكسرات تخص قضايا وهموم المواطن فالارقام قد لا ينتبه لها الكثير من القراء ومتابعى العمود

[جراهام]

#1483648 [faisal]
5.00/5 (3 صوت)

07-03-2016 01:42 PM
موضوع هادف الى اقصى درجة خطورة عدم تسجيل الشرائح. والكسرات اصبحت جميله جدا بالشكل الجديد.

[faisal]

الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة