ده اسلام شنو ؟
07-08-2016 02:39 PM


الترابي قال انو علي عثمان يكل بساطة معط مليون دولار علشان يكتل مسلم رئيس دولة مسلمة ... ده اسلام شنو ؟ والقروش دي خاتنها في كابدلو كمبوت ولا ريكة ؟ قالوا لينا في الشرع القتل يحدث لكفر بعد ايمان وزنا بعد احصان وقتل النفس التي حرم الله قتلها الا بالحق . وحتي حد الردة تحدث فيه اجتهادات وفتاوي مختلفة . من اين اتي علي عثمان بفتوة اغتيال حسني مبارك ؟ ويقولوا هي لله لا للثروة لا للجاه , في جاه اكتر مما فلوس البلد تكون تحت تصرفك . وتقتل المسلم حسب رغبتك . الفرق بينك وبين الدواعش شنو يا اسلامبولي ؟ ويقول البشير انه يريد شريعة غير مدغمسة . وهو في دغمسة اكتر من كده ؟ المسلمين جعانين وعيانين في السودان . وعلوبة يخرت من مال الشعب لا حسيب لا رقيب !!
الراجل بتاع حماس كان ماشي جايي كل الوكت زي بص الدباغة. قبضوه ب25 مليون دولار في معبر غزة . بكل بساطة قال دي فلوس دعم للفلسطينيين من السودان . يعني الرجل دة كل مرة يشيل ربع مية مليون يكون شال قدر كم ؟وحال الفلسطينيين ما يحلم به اهل دارفور وجبال النوبة والنيل الازرق والشمالية والشرق بعد 100 سنة .
بعد غدوة رائعة في بيت محجوب شريف طيب الله ثراه بي مفروكة وكسرة رهيفة في 1985 وقفنا كالعادة للدرشة قدام الباب ولاحظت ان الساحة الكبيرة قدام بيتهم في الثورة قد قسمت وقامت فيها مباتي فاخرة . فقلت مداعبا . ... يا محجوب العشرين متر دي اولادك عاوزين عشرين سنة علشان يتخطوها . فضحك ضحكته الصافية وقال لي ... ده اذا قدروا ... والظاهر ما حيقدروا . السودانيين عاوزين مية سنة علشان يحصلوا حال الفلسطسنيين . و 200 سنة علشان يحصلوا اللبنانيين الذين اخذ مصطفي نار القصب وهو يتكشم بدون مناسبة المساعدات والمستشفيات المتحركة . هل هي عقدة ام مركب نقص . بكل بجاحة يقولوا المانحين لم يوفوا بوعودهم والامم المتحدة لم تساعدنا .. انت يا ود ابزهانة تاكل في اللكوندة وتنوم في الجامع .
البتوكة زي مابيقولوا ناس العباسية للفلوس بيغرفوها كدة بدون حساب ؟ زمان لو الحكومة عاوزه تجيب حبال يربطوا بيها حمير وبغال الحكومة ا لا تجيب تلاتة عروض ويوقع عليها المشتري والكاتب والباشكاتب والمأمور او نائب المامور .من القصص الطريفة ان الاستاذ محمد الحسن شقيق زوجة الفنان وردي الرحمة للجميع تحصل علي وظيفة بعد اكمال الثانوية . ونقلوه الي الاقاليم . وبعد فترة مات حمار . فارسل خطابا بالانجليزية وهذا في بداية الخمسينات يخبرهم بان الحمار قد مات . اتي الرد بأن الحمار قد فطس,, بيرشد ,, ولم يمت دايد ....وارجو التكرم باعطاء نمرة فايل الحمار ونمرته الخ. واتي خطاب من الرئاسة طالبا تحديد سبب الموت وهل عرض الحمار علي بيطري .
وتواصلت الخطابات تسأل عن اسماء الشهود ومن حضر انتقال الحمار الي العالم الآخر .. وما يثبت الموت ألخ .والفايل يزيد كل يوم . وهو تعبان في الترجمة والردود وهو في بداية عمل الحكومة وغير متمرس. زهج وترك كل شئ . ورجع الي الخرطوم وذهب الي مصر ودرس القانون وعندما رجع قدم للقضائية ورفض طلبه لان اسمه سقط من الغازيتة . وبعد تعب قبل طلبه . كل شي كان مرتبا . مافي قرش بيضيع ساكت . وعلوبة يغرف زي كانه ملاح نعيمية في حرارة . محن سودانية . وكمان بدل يخجل يقول ,, شوت تو كيل . يكلكلك تمساح عشاري .وبكل بجاحة علوبة يطلع ورقة من جيبو في التلفزيون ويقول ماهيتو 12 الف جنيه . طيب المزرعة والبيت ديل ، يكون وفر من حق الفطور ؟ الناس دي ما بتخجل ولا بتفنكر الناس هبل ؟
انتو مصطفي عثمان شحادين قطع الحركة مالو ؟ الايام دي بيسوي في .. يا الله يكون نساني يا الله يكون نساني وما جاب لي سيرة . وابو تفة ,, اللمين ,, الكان الترابي بيربط ليه في الكرفتة وواقف زي ولد الكشافة الادوه المنديل والحبل . اولاد الكشافة من عمرعشرة سنين بيربطوا عشرة عقد مختلفة .انا الما مشين كشافة عرفت الريفنوت والشيبشانق الخ . واللمين كرفتتو غالباه . الاتنين ديل الترابي ما حينساهم . والكيزان كعادتهم السلام في الخشوم والبطن عطرون .قالوا كتلوك ولا جوك ماجوك . زول الكرفتا ما قادر يربطها يمسكوه مصير بلد محن محن ... ومحن . شحادين قال انهم عملوا غلطات لانه ماكان عندهم خبرة في الحكم .... تخيل ! زول كان فاتح كبوت زول تاني ماسك مدقاب ومدربيتة شغال في حشوة اضراس وقلع سنون . فجأة يكون وزير خارجية . سمعنا بنقل كلية اول مرة نسمع بعملية نقل خبرة !في الديمقراطية وزير الخارجية هو الثالث في الحكم . لمن ريقان انضرب رصاص وبوش مافي . هيق مشي علي البيت الابيض وقال ... انا المسئول الآن . لانه كان وزيرا للخارجية .
اتعلموا الحلاقة في رأس الشعب المسكين .... وكلها فاولات وشلاليت . هرسوا مشروع الجزيرة اضاعوا الخطوط البحرية والخطوط الجوية وخربوا الخدمة المدنية . احطوا بمستوي التعليم وخربوا المستشفيات وحرموا الشعب من اي حماية من جشع التجار وادخلوا اسوأ الشركات ورهنوا البلد للصينيين وكل المغامرين . كل كوز جاب ليه اسوأ الشركات كرش ليهم السكاكين وتكى ليهم البلد . فتحوا بيوت الاشباح اللتي اغتصب فيها الرجال قبل النساء . ويفتخر نافع بأنه ,,درش ,, الناس . وبلغ بهم الحقد الاسود لان يطردوا كبار المتعلمين ، يطردون الزوج والزوجة، هل هناك حقد وتشفي بهذا الشكل؟ ده اسلام شنو ؟ يقولون ان الانسان هو اعظم رأس مال. لماذا اضاعت الانقاذ رأس المال الاجود ,, المتعلمون ,, من اجل تمكين من لا يعرف. وكل هذا يإسم الدين والدين برئ . قالوا الما بيعرف يدوه يغرف يكسر الكاس ويعطش الناس ... دي الانقاذ
النظام القضائي السوداني كان يضرب به المثل بارك الله في امثال مولانا صالح فرح والميامين من السودانيين الذين كتبوا دستور الامارات وشكلوا النظام القضائي في الامارات وكثير من الدول : كان الطبيب والقاضي والمحاسب والصراف السوداني عملة صعبة يطلبها الجميع في دول المهجر.
العم ...ي.م كان من المحاسبين في السودان والد زوجته واشقاء زوجته كانوا ولا يزالون من اغني السودانيين كان اهلنا الرباطاب يضربون بهم المثل في الغناء. عمنا كان يمسك دفاتر كثير من التجار منهم اولاد ملاح . ولكنه لا يقرب اعمال اهله ونسابته . كانت هنالك قيم . الطبيب كان لا يعالج اهل بيته حتى لا يكون بعيدا عن الاحتراف.
العم عز الدين حسين من جنوب مصر . كان يستأجر نصف منزل خالي في ملكال كان محاسب التاجر اليوناني ابوستولو في ملكال . لانه مسموح له ببيع الخمور والذخيرة واشياء اخري فكان ملزما حسب قانون الشركات المجاز في 1925 بأن يوظف محاسبا يدون كل صغيرة وكبيرة في الدفاتر والا طارت الرخصة. وكل التجار ملزمون بإمتلاك ما عرف بالاستاذ وهو دفتر كبير . ويمارس ما عرف بالدوبيا وهي الحساب التجاري . وكان هنالك المعهد التجاري في جوبا لتخريج المحاسبين . وكان المعهد التجاري في العاصمة وعميده الاول الاستاذ محمد عثمان شكاك . ومن الخريجين امير الكرة السودانية صديق منزول الذي سكن مع اسرته في شارع السيد الفيل في منزل ايجار كان حصل الانقاذ برضوا ماكان مدى ايده لمليم . لانه لم يستفد حتي من كونه مصنف عالميا في 1958 احد 22 احسن لاعب عالمي . وكانت مدرسة التجارة ومدرسة الامريكان التجارية . الغرض ضبط الاقاصاد ومنع الفساد . واتت الانقاذ وعملت العكس . افسدت القضاء ... المحكمة تحكم علي كوز يغتصب فتاة بعد تخديرها ، ويعفوا عنه البشير . وصار في امكان علوبة ان يخمش مليون دولار وكانها سبروق في جرف .
اي ضبع هذا الذي يمارس الجنس مع جثة هامدة ؟ ده دين شنو . ويسرق المحافظ وصبي المحافظ ويتحللون . ويقتل مجدي واركانجلو وجرجس في مال مش مخدرات او متفجرات . قديما سألت هل هنالك كرتلة يكسب فيها الجميع . هل شاهدتم كوزا او انقاذيا متجردا يعيش في بيت بسيط ويأكل الطعام العادي ويلبس ما يلبس الآخرون ؟
كركاسة
بدأ فضل الله برمة في مغازلة النظام بإيعاز طبعا من الصادق. كلما ينزنق النظام يساومهم الصادق . سقوط النظام يعرض ابناءة للمساءلة ... قالوا الابن مجبنة مبخلة .. عندما حضر جنود الانصار مع بعض الكيزان من ليبيا كان من المفروض ان يتحرك فضل الله برمة من داخل الجيش حسب الاتفاق . وارسل اليه طالب جامعي . لم يتحرك فضل الله وفضل الانتظار . وقال للطالب الجامعي امسك لسانك وانا بطلعك ... يسال الاستاذ الاستاذ كباشي الصافي الذي يسكن انجلترة ويكتب في الاسافير الآن تحت اسم كانتونا 1 عن هذه الحادثة ... فهو كان طالبا !!!!!.
كان فضل الله يحاكم المقاتلين . وفي منزلنا الذي كان يتردد عليه كثيرا بسبب علاقة اسرية كان يفتخر ويتشدق بهرس المرتزقة ومحاكماتهم ومن سمعوا هذا الكلام عائشون . ولهذ صار فضل الله برمة طوع بنان للصادق لا يستطيع ان يعترض علي اي قرار . مسكين السودان .
الموضوع شيلني واشيلك . شريف التهامي متزوج من فاطمة عبد الرحمن المهدي . حوكم في الانتفاضة بتهمة سرقة فلوس البترول وكانت المحاكمات المتلفزة الشغل الشاغل للناس ولم يكمل عمرمحمد الطيب نائب نميري سجنه .. ابنة شريف التهامي متزوجة من ابن ابراهيم احمد عمر كبير الكيزان كانت الفلوس التي قيل انها 100 مليون دولار باسمه بعد موته المفاجئ طالب الكيزان بالفلوس لم ترجع الي الآن . عندما استلم الترابي العدل ماتت قضية شريف التهامي فالكل اهل ونسابة حتي علي عثمان دخل في الحلقة .. ماكلهم مسلمين وبقية الشعب وثنيين !!! الغريبة ناس شريف التهامي زعلانين جدا من الصادق لانه لم يحمي زوج عمته منذ البداية . ده اسلام شنو ؟
اقتباس .... من موضوع مدافع الطين
يقولون ان اقوي سلسلة هي بقوة الحلقة الاضعف . بمعني اننا اذا صنعنا اقوي سلسلة من الصلب والتيتينيوم والالمنيوم والحبال الغليظة وحلقة واحدة من الدبارة فتلك السلسلة هي بقوة الدبارة . وهذه الجبهة الجديدة هي بقوة الصادق لانه الحلقة الضعيفة . ان له ارتباطات تاريخية مع الكيزان . وابنائه في القصر . وهم جزء من النظام الذي قرر والدهم محاربته بالسلاح . واذا حمي وطيس المعركة قد يضعهم النظام في واجهة المعارك . كيف الدبارة ؟ انا علي اقتناع كامل بان الصادق ماحيواصل لنهاية المشوار . الموضوع حردة . وانا في وانتو في ، وحتشوفوا . .

[email protected]


تعليقات 29 | إهداء 0 | زيارات 12028

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1485807 [الفقير]
5.00/5 (1 صوت)

07-10-2016 07:46 AM
أخي العزيز شوقي

ربما هناك كثيريين غيري ، يرجعون مثلي لمتابعة الجديد من التعليقات على مواضيعك.

أعجبني جداً طلب الأخ عكر للترجمة و أعجبني أكثر إنه إنسان عملي جداً ، و قام بتمحيص و إحصاء مواقع الكلمات المطلوبة ، ليثبت صدق نواياه و جديته ، و أعتقد لو أن أجيالنا الجديدة إتبعت هذا النهج الجاد في مناحي حياتهم ستتعزز أسباب نجاحهم أكثر إن شاء الله.

أصدقك القول ، إول مرة أعرف معنى الكابدلو.

في أوائل الثمانيات صادفنا تيم من مصائد الأسماك يقوم بأبحاث قرب بحر أبيض و رئيس التيم كانت دكتورة من أقباط المسالمة ، و كانوا مخيمين قرب النيل و دعوناهم للعشاء و دعونا بدورهم اليوم التالي للعشاء و عشونا عصيدة بالكجيك رائعة و بعد العشاء أعطونا فكرة عن عملهم و نحن إهتمينا بشرحهم المفصل عن طريقة عمل الصريمة و بالذات لصيد التماسيح و إهتمينا أكثر بأن نعرف أنواع العقد ، لأن العقد البحرية معقدة أكثر.

جميع قبائل و مناطق السودان المختلفة لديها عقد knots مميزة جداً لإستخداماتهم المختلفة منها للحيوانات و منها للرواكيب و البيوت ، لكن لا أحد يفوق الحواتة ، و لقد وجدت في النت الكثير جداً من عقد الحواتة و لا أعلم هل المصدر واحد.

معظم أجيالنا كانوا يعرفون هذه المعارف في شبابهم لكنهم مع تقلبات الحياة نسوا معظمها و نادراً ما ينقلوا هذه المعارف لأبنائهم لظروف الحياة و تقلباتها ، لكن أمريكا و الدول الغربية يهتمون بها و البريطانيين يهتمون بها أكثر لإرتباطها بتاريخ إمبراطوريتهم و تاريخ البحرية الملكية.

يحزنني جداً أن يكون منا من يستهذئ بمقالاتك و يعتقد إنك تدعي البطولات ، و هو بجهله هذا ينال من من تاريخ و مورثات مجتمعما ، و أشير لتعقيب الأخوان STRANGER و kak kak ، فهو قد لفتا نظري مشكورين ، بإننا قد تركنا هذا التعامل بالأريحية و روح مجتمعاتنا التي كانت سائدة و التي تحاول أن تُحييها فينا بمقالاتك و نحن لن نستطيع إحياء أمجادنا إن لم ننقل قييمنا و موروثاتنا للأجيال الجديدة ، لأن هذا ما يسعى النظام الحاكم لتدميره و نحن يجب أن نبزل جهدنا لتسليح أجيالنا الواعدة بكل موروثاتنا و تقاليدنا ، و هذا من أقوى الأسلحة لمحاربة النظام و في نفس الوقت لا تستطيع أجهزة النظام القمعية من محاسبة المجتمع على تمسكه بالقييم و الموروثات ، و يحضرني هنا مقالات مولانا سيف الدولة و الأستاذ برقاوي ، فهما يحاربان النظام في مقالاتهما بالأخلاق الكريمة و الموروثات.

قد يظن البعض يا أستاذ شوقي إن الشباب قد لا ينجذبون لما تحاول أنت طرحه و هذا يشملنا نحن القراء و المعلقين المعجبين بنهجك ، لكن تعليق الأخ عكر و طلبه للترجمة قد أوحى ليِّ بخاطرة قد تقرب المسافات و تخلق جسر للتواصل بين الأجيال يساعدنا على تفعيل و تسريع نقل المعرفة.

في إحدي مقالاتك (لا أذكر بالضبط) أشرت فيها لمجموعة من الفنانيين الغربيين أذكر منهم البيتلز Beetles و بيري وايت Barry White ، و غالباً ما يكون معظم شبابنا الذين يستمعون لجستن بيبر Justin Bieber و أقرانه ، لذا لن يقدرون من هو بيري وايت و ماذا يعني ، لكن لنا في برامج أمريكان أيدول و أمريكاز قوت تالنت إكس فكتزر (Amerc's got talent, Amercan idol, X Factor) ففي برامج مسابقات المواهب هذه (أمريكا و أوربا و دول أخرى) ، يقدم بعض المتنافسين أغنيات قديمة من تراثهم لإثبات قدراتهم الفنية و صادف أن إختار أحدهم أن يغني لبيري وايت و كان هذا مفاجئاً للحكام ، و ذلك لصعوبة تقليد صوت بيري العريض و الرخيم ، و تعلم أن بعض فرق الجاز السودانية كانت شهيرة بتقديم أغانيه منهم الأصدقاء ، و أعني ببساطة أن هناك مداخل و وسائط مثل هذه البرامج ، تخلق لغة حوار مشتركة مع الأجيال الواعدة لتعرف أن الدهن في العتاقي.

أعتقد أن محمد منير كان أول من لطش أغنية (كده يا الترلة) و إدعى إنها من تأليفه كعادته ، و كان أداؤه لها مريعاً لأنه حاول طمس هويتها ، و جاء بعده فرقة شباب كويتيين أجادوها بطريقة أفضل و أقرب لبيئتنا.

لست متأكداً بالضبط ، لكني سمعت هذه الأغنية في أوائل السبعينات ، و أنت تعلم إنها من أغاني الشارع أي ليس لها سيْد ، و من حين لآخر يضاف لها مقطع حتى أصبحت كلماتها تتنوع بإختلاف المنطقة ، إلا أن الراجح إنها ولدت في أم درمان لذكر كافتريا ميامي فيها في أول أيام إنتشارها و كان أصدقاؤنا و أهلنا من أم درمان يأتونا بالجديد عنها.

لا أعتقد أن أحداً من الشباب كان ليجرؤ على التغني بهذه الأغنية علناً في المدرسة أو الجمعيات الأدبية ، لكن كان تداولها على نطاق ضيق و ربما ضمن فقرات المنلوج.

طبعاً الأغنية لا تخلوا من إيحاءات شوارعية نوعاً ما (عاملينا عنتر و شايلينا خنجر) ، و تعرف رمزية هذه الكلمات ، لكنها في النهاية هزل إجتماعي و من وحي الشارع.

قد يكون لدى الكثير منا من الذين عاصروا تلك الفترة لديهم معلومات و جوانب أخرى عن موضوع هذه الأغنية المولودة بالشارع و ليست لها أب.

و لقد ذكرت تفاصيل عن الأغنية لتوضيح إنها ما كانت لتذاع أو تتلفز في السودان بمعايير و مقاييس ذلك الزمن الفنية ، و لم تكن ترقى حتى لمستوى أغاني الدلوكة ، لذلك لم يفتح أحد من السودانيين فهمه ليحتج على محمد منير في بداية الأمر.

الأستاذ معاوية يس ، كان أفضل من يستطيع تحليل هذه الظواهر فنياً و يعرف أغاني الشباب الحالية التي لا يستطيع أحد إستحسانها فنياً و لا أدبياً و لديه نقد بناء جداً يعرض فيه إعتراضه على الكلمات بأسلوب علمي مقنع لكنه في نفس الوقت مشجع و محفذ للشباب للتفريق بين الفن الراقي و الهابط و عن طريق إحدى مقالاته سمعت لأول مرة عن أغنية (أفتح فيك بلاغ) كتعبير عن الحب ، و جاء على خاطري (أخير لينا ترلتنا) عارفينها حقت شوارع و بنغنيها في الشوارع.
ربنا يطرا أخونا معاوية يس بالخير أينما كان.

أهم شريحة في المجتمع هم الشباب ، لأنهم مستقبلنا ، و ما يفل الحديد إلا الحديد ، تعال ليهم بسكة بيري وايت و فطاحلة العصر الذهبي و بأي سكة تجذبهم ، لأننا نريد أن نضمن نقل القييم و الموروثات إلى أبناءنا و أحفادنا أجيال المستقبل ، و ما ذكرت بيري وايت إلا كمثال و بالطبع لا يفوت عليك ذلك ، و لا يفوت عليك أيضاً ما عجزت كلماتي عن إيصاله لك.

[الفقير]

#1485705 [salah]
0.00/5 (0 صوت)

07-09-2016 09:36 PM
استاذنا العزيز شوقي لك التحيه . اتذكر و نحن شباب بواكير العشرينات الجرائد السودانيه الايام ديك نعت للامه موت جمال عبد الناصر. في واحده من الجرائد يا الايام او الصحافه كتبت و بالخط العريض [ هو ك اللة ] تقصد جمال عبد الناصر. عليك النبي شوفو الغيبوبه النحنا فيها. وين صاحب الجريده التعيس دا و رئيس التحرير و الكاتب المشرك والمصححيين و.....الخ. بشبه المخلق بالخالق بني ادم شديد البلاده دا بفسر عدم رضاء ربنا علي جيلنا كلو . ونحن الان في حاله عقوبه جماعيه. علي ما اظن الكاتب شديد الشيوعيه كنت متذكر اسمو لكن نسيتو. افيدنا افادك الله..…….....

[salah]

#1485693 [عكر]
0.00/5 (0 صوت)

07-09-2016 08:24 PM
الترجمان يا جماعة

الدارجة السودانية جميلة لاهلها طبعا ...لكن لا بد من ترجمة مرافقة حتي تعم الفائدة و تسهل للمناولة و التوثيق.و خصوصا الامثال الشعبية السودانية بالرغم من وضوحها و احيانا من السياق و ما ورد فيه من قصة ...تظل الضبابية و عدم الوضوح حولها فيبدوا ان الدارجة السودانية و اسعة و متنوعة و ثرة بتنوع و اتساع جغرافية السودان. و شكرا (العم شوقي).

1. يكل بساطة معط ...(السطر -01)
2. كابدلو كمبوت ولا ريكة....(السطر -02)
3. بص الدباغة...(السطر -10)
4. نار القصب وهو يتكشم...(السطر -19)
5. يا ود ابزهانة...(السطر -22)
6. البتوكة ...(السطر -23)
7. شوت تو كيل . يكلكلك تمساح عشاري ...(الفقرة - 05 /السطر -05)
8. وابو تفة...(الفقرة - 06 / السطر -02)
9. الريفنوت والشيبشانق ...(الفقرة -05 / السطر -04)
10. سبروق في جرف...(الفقرة -07 / السطر -13)
11. كركاسة...(الفقرة-12 / السطر -01[)

[عكر]

ردود على عكر
[الفقير] 07-10-2016 07:52 AM
ما سألت عن (كيف الدوبارة؟)

و تعليقك ملفت جداً و مهم ، لك الشكر.

[shawgi badri] 07-10-2016 01:25 AM
عكر لك التحية
المعط هو قلع الشعر يقولون ظعط ومعط
الكابدلو جمعها كباكة وعاء ضخم من الزعف بغطاء يربط بحبلين بحيث يرفع الغطاء ويرجع الي مكانه بدون اخراج الغطاء . يحفظ فية ألابري والحلو مر واشياي اخري . الكمبوت اناع من الزعف في شكل حلقات لكي يمتص الصدما ولا ينكسر ما بداخله . المثل يقول الكمبوت لاقا السدادة . عندما يتلائم شخصان او غرضان . الريكة لحمل العيش او السمسم . المثل بيقول ده القندول الشنقل الريكة .
الدباغة شرق ود نوباوي كانت آخر محطة. كانت تدبغ فيها الجلود
نار القصب لا تلتهب باستمرا ولكنها تخبو وتعاود الاشتعال . والتكشم هو اظهار الاسنان في التبسم .
شوت تو كيل دة انجليزي اضرب لتقتل .
التمساح عندما يصل طوله لعشرة اذرع يعرف بالعشاري الذراع 58 سنتيمتر
التفة هي الشعر الغزير ,, آفرو ,,
الريفنوت . نوت تعني عقدة بالانجليزي . هذه انواع العقد التي يتعلمها الكشاف علي الحبل الذي يحمله معه دائما .
السبروق ملاح يصنع من صفق الضرابة او البامية .
كركاسة عندما يبلي الستك الخارجي تقطع قطعة من لستك قديم لقفل الثقب . والكركاسة باروكة صغيرة لتغطية صلعة صغيرة .


#1485692 [salah]
5.00/5 (1 صوت)

07-09-2016 08:22 PM
سمعنا انو السيد الصادق المهدي مشمر و ناوي الجيه و بطالب بكل رقه و لطف يلعب تاني بعد ماتيقن انو قيم الكوتشينه عرج وقفل قفله عدله تامه. الشعب السودانى شعب ذكي و بفهم في السياسه اكتر من محثرفي السياسه الموهومين ديل. نحنا حرنا حرنه حمير وما بنموت اوانطه في الشوارع المليانه حفر مع الشوت تو كيل دى وكل زول يشوف مصلحتو.العاوز يحكم يمرق هو و اولادو و اولاد اولادو و مبروك عليهو مقدما.الحكومه و المعارضه زي اخوان طرده ليهم 27 سنه ينيصوا و يبكو و يدردقو عشان بزه واحده .حمونا النوم . الاتنيين اسأل الله ما يديهم عافيه اكتر من كدي ربنا يسلط عليهم بيف باف نووي يستأصلهم و يببدهم الاتنيين اباده جماعيه شامله . بصراحه كرهناهم . ديل من ما نحن اطفال لقيناهم قدامنا قارفننا بطول اعمارهم و عافيه . المرض دا ما بعرفوهو و لا جربوهو جسد بغال شغال فل اوتوماتيك زي الساعه السويسريه . .. سلام

[salah]

#1485623 [مدحت عروة]
0.00/5 (0 صوت)

07-09-2016 03:09 PM
ناس الاسلام السياسى او الراديكالى الذين خرجوا من عباءة الاخوان المتاسلمين ظهروا على حقيقتهم القذرة الواطية العاهرة الداعرة وان جزمة وبراز العلمانيين اشرف واطهر منهم كلهم بل من الاسسوا هذه الجماعة القذرة الواطية وللمعلومية اقول للجهلة الدلاهات والاغبياء والفاقد التربوى العلمانية لا تعنى محاربة الدين والمتدينين ولكن تحارب الواطين القذرين العهر الدعر الذين يستغلون الدين من اجل السلطة والثروة وهم ابعدالناس عن الدين بل هم اعداء للدين والوطن والله الله الله على ما اقول شهيد!!!

[مدحت عروة]

ردود على مدحت عروة
[shawgi badri] 07-11-2016 10:47 AM
الغالي مدحت لك التحية . من تداخل معك ليس شوقي ود امينة. هذا شخص يحاول ان يثير الفتن . انا لن اخاطبك ابدا بدون الاحترام والتوقير .

[مدحت عروة] 07-10-2016 02:52 PM
بالعكس يا اخ شوقى لوكنت ضارب سيجارة كنت شكرت الكيزان ولكنى فى كامل وعيى وان هؤلاء الكيزان السفلة وصفهم بهذه الالفاظ شوية عليهم!!!
واقول للاسمه المرفعين انا بكتب باسمى وليس باى اسم آخر وما خايف من اى عاهر او داعر وزى ما قلت للاخ شوقى ان هذه الالفاظ شوية عليهم بل اشرف واطهر منهم والله الله الله على ما اقول شهيد!!!

[شوقي بدري] 07-09-2016 09:43 PM
العزيز مدحت عروة كل سنه وانت طيب الليله كلامك مفكفك مالو ؟؟ ضارب ليك سجارة كالعاده و قاعد تكتب لقد سبق ان نصحوك انو ما تعمل كده خليك ذى انا اكتب و انت واعى و اضربها لما تكون ماعندك افكار...... اتمنى لك الصحه والعافيه

[المرفعين] 07-09-2016 09:42 PM
لسانك زفر


#1485550 [SALAH EL HASSAN]
5.00/5 (1 صوت)

07-09-2016 11:13 AM
لك التحية استاذنا الفاضل شوقى بدرى كنت أتمنى ان يكون لأمثالك من الذين يذكرون الحقائق دون نفاق و كذب و دغمسة ضيوف في برامج توثيقية حقيقية و ليس مثل برنامج أسماء في حياتنا ، هذا البرنامج الفاشل لعمر الجزلى الذى استضاف فيه عدد كبير من اهل السياسة و العلم و الفن و لكنه كان يرنامج فاشل بمعنى الكلمة لأن كل الذين استضافهم مجدوا انفسهم و فترة وجودهم في السلطة و تحدثوا عن امجاد لو كانت حقيقية لأصبح هذا السودان اعظم دولة في افريقيا و بل في العالم.
نتمنى ان نرى توثيقك لكل ماتكتب في كتاب حتى يكون مرجعا حقيقيا للأجيال ...!!!

[SALAH EL HASSAN]

#1485538 [لحظة لو سمحت]
0.00/5 (0 صوت)

07-09-2016 10:21 AM
عم شوقى عيدك مبارك
سؤاالك عن ماهية هذا الدين سؤال المستغرب لكن فى عهد الانقاذ كثرة الالهة و اشهرهم
اله على عثمان
اله نافع
اله الخضر
اله موروث من الهالك
و اله خاص بالبشير و عائلته
و غيرهم كثر و لكل اله من هؤلاء له ميزة خاصة و كلها تجمعها صفات اله الهالك
و العياز من القادم

[لحظة لو سمحت]

#1485532 [AbuArwa]
0.00/5 (0 صوت)

07-09-2016 10:12 AM
يبدو أن أمر الكتابة لايطيب لك إلا بالتعرض للسيد الصادق ، لاأدري لماذا تريد التاكيد على أن للسيد الصادق يد في ما تقوم به الانقاذ ؟ هل مازالت نار حقدك القديم متقدة ؟ ألم تنس ثارات والدك ؟

[AbuArwa]

ردود على AbuArwa
[shawgi badri] 07-09-2016 06:20 PM
لتل لا افكر في تارات والدي او اي ثارات . والدي فرد ومات وذهب الي ربه .المشكلة الوطن الذي يتلاعب به الصادق والترابي والميرغني . والمشملة يا ابو اروة اي انتقاد للصادق يقوم الكثيرون بالدفاع . الصادق بشر . اخطأ كثيرا في حق السودان . الم يقل البشير جلدنا وما بنجر فيه الشوك ؟ هذه لوحدها تكفي .


#1485506 [باكاش]
2.00/5 (1 صوت)

07-09-2016 08:03 AM
معلللللللللم يطول في عمرك ويديك الصحة
ياخي جليت ليك مقالتين لحدي ما كابست
الشريط التحت لقيتهم...علوبة متهم بانه
صاحب القرار في تنفيذ مجزرة بورتسودان.

[باكاش]

#1485505 [بنت الناظر]
5.00/5 (1 صوت)

07-09-2016 08:02 AM
كل عام وأنت بألف خير و ندعو الله أن يمد فى عمرك وأعمار كل الشرفاء من أبناء السودان..
الطريف إنه أبو تفة لما سألوه عن صورة ربط الكرافتة أنكر وقال كنا نتناجى أنا وشيخ حسن !!!!
على عثمان زوجته إبنة خال الصادق المهدى يعنى قريبة فطين المهدى عشان كده زيتهم فى دقيقهم..
الإسلام الذى تعرفه ونعرفه برئ من هؤلاء
هؤلاء فى وادى والإسلام فى وادى آخر وأقترح أن يسموا نفسهم بالإخوان المجرمين الحاقدين على الوطن وعلى شعبه ..

[بنت الناظر]

#1485475 [أبوقرجه]
0.00/5 (0 صوت)

07-09-2016 03:59 AM
الاستاذ العزيز الغالي شوقي بدري
لك تحياتي
عايز منك جميع اسماء موالفاته والموقع الموجودة فيه بصراحه كده عايز اقرأها جميعا
لانكً رائع وانسان رائع ربنا يطول عمرك ويديك العافيه
وسأرسل لك رسالة إيميل
طبعا حصلت على كتاب جدك بابكر بدري من النت واسمه حياتي وينكون من جزئين وبقراء فيه الان
لك تحياتي

[أبوقرجه]

ردود على أبوقرجه
[shawgi badri] 07-09-2016 11:22 AM
الاستاذ ابو قرجة لك التحية . كتاب بابكر بدري 3 اجزاء . الجز الثالث قد يكون الاهم لاته دار عن الفترة التي سبقت الاستقلال . اما لا امتلك ولا نسخة واحدة من ما كتبت . رواية الحتق الطبعة الاخيرة . قدم لها الخال محجوب عثمان ويذهب عائدها للحزب الشيوعي السوداني . المشبك الاهدا الي الشهداء جوزيف قرنق الشفيع وعبد الخالق محجوب عثمان العائد للحزب الشيوعي السوداني . وقدم للكتاب الزعيم التجاني الطيب بابكر الرحمة للجميع .
يمكنك الاطلاع علي مكتبة شوقي بدري في الراكوبة وسودانايل . وسودانيواونلاين


#1485426 [مواطن دارفورى]
5.00/5 (1 صوت)

07-08-2016 11:53 PM
بدأ فضل الله برمة في مغازلة النظام بإيعاز طبعا من الصادق. كلما ينزنق النظام يساومهم الصادق .
========================
انا علي اقتناع كامل بان الصادق ماحيواصل لنهاية المشوار . الموضوع حردة . وانا في وانتو في ،
======================
والله انك صادق يا شوقى .. اسع اليومين ديل بيفرفر بالحارينو فيهو دوما .
واليك اخر متغيرات طقسه وطقوسه وهمومه ووهمه الذى يعيشه هذه الأيام :
كشفت مصادر سودانية مطلعة لـ«الشرق الأوسط» عن اجتماع مهم يعقده تحالف قوى «نداء السودان» في العاصمة الإثيوبية أديس أبابا عقب عطلة عيد الفطر، بهدف بحث أزمة خارطة الطريق بين المعارضة والآلية الأفريقية رفيعة المستوى، فيما رجح رئيس حزب الأمة القومي الصادق المهدي توقيع حلفائه في قوى المعارضة على خارطة الطريق، تمهيدًا للدخول في حوار مع النظام الحاكم في السودان.

ياخى دا سياسى عاق لشعبه.

[مواطن دارفورى]

#1485423 [الفقير]
0.00/5 (0 صوت)

07-08-2016 11:47 PM
رد للمدعو:
*[Dr. Kailany Da'oud]

عيدك مبارك

ما هي المشكلة في إيراد الأسماء؟

أولاً الأستاذ شوقي يورد الأسماء كمرجعية و يروي الأحداث من واقع رؤيته و الأسماء فيهم من هو حي أو لديه قريب أو صديق لينفي أو يزيد المعلومات و يؤكدها ، و عودنا الأستاذ شوقي إنه أمين في نقل المعلومات أو تصحيحها تبعاً لما يرد من المعلقين.

و لذلك تمتاز مقالاته هو و الأستاذ بكري الصائغ ، بأن القارئ يضطر للرجوع لها عدة مرات لمتابعة التعليقات الغنية جداً بالمعلومات التي تضيف قيمة لمواضيعهما و لا يفوت عليك أن هذا من أسمى أنواع نشر المعرفة ، حتى نتعلم من تجاربنا و نتطلع للأفضل.

* إشارته للحسابات و الدوبيا فيه رسالة كبيرة للمجتمع و دعوة للعودة للأصول و رسالة للأجيال الجديدة التي عاصرت فساد الإنقاذ و إنعدام هذه القيم ، حتى نتطلع لسودان معافي من مرض الفساد.

* فضل الله برمه يطلق عليه زملاءه و من مقال الأستاذ شوقي عرفت إنها إبنت زعيم و فهمت سبب التسمية ، لأنها ببساطة أفرس منه.

فالعام ١٩٩٠ و أيام هوجة الإعتقالات و بيوت الأشباح ، كان يوجد عدد كبير جداً من المعتقلين في سطوح مباني الأمن بحي المطار ، و أعتقل فضل الله برمة و مهدي بابو نمر و تم حبسهما أسفل السطوح في غرفة صغيرة جداً كانت مخصصة لماكينة المصعد ، و إستطاع المعتقلين بمخاطرة جسيمة تغفيل الحراسة المشددة عليهما و أيصال ساندوتش فول لهما و هذا ليس بالأمر الهين في تلك الظروف العصيبة ، و كان رد فعل السحسوح بابو نمر أن إمتعض من الفول و رفضه.
حتى في تلك الظروف كانوا حيوانات ، فهما لم يقدرا مقدار المجازفة التي خاضها المعتقلين و لم يقيما قيمة التضحية بساندوتش فول ، و كان على برمه أن يردعه و يظهر موقف رجولي يحترم به تصرف المعتقلين الرجولي معهما.
المعتقلين الشهود على هذه الحادثة خليط من السياسيين و الأكاديميين و نخبة من المجتمع ، و فيهم أيضاً أشاوس من مجاهدي الأنصار كتيراب ، و فيهم سكرتير مبارك الفاضل و هو من فرسان البقارة و أيضاً فيهم عبد الرحمن الصادق.

زملاء فضل الله برمة كانوا يعيبون عليه (هلسه) ، لأنه لا يتناسب مع سنه و رتبته و لأن الجميع كان يحترم و يقدر الفارسة بنت الزعيم ، و برمة كان يهابها أيضاً و يعمل المستحيل لمداراة هلسه.

مشكلة برمة و مهدي بابو ، إنهما ينتميان لقبيلة فرسان أشاوس و إن أفعالهما و مواقفهما لا تشبه رجالة و عزة القبيلة.

كلاهما كانا مقربين من الصادق و كلاهما إستشارهما الصادق في تقارير الأمن و تقارير عبد الرحمن فرح عن تحركات الجبهة للإنقلاب.

برمة عمل بالإستخبارات و كان عضواً بالمجلس العسكري و إضطلع منذ الإنتفاضة على كل التقارير عن تحركات الجبهة للإنقلاب.

بابو نمر قال للصادق عندما عرض عليه التقارير: (ديل كابي ما يقدروا يقلبو) !!

شغلهم نئ لا يشبه شغل الجيش و لا يمثل قيم القبيلة.

* موضوع مجدي و أركانجلوا و جرجس ، كان لك أن تستحي و لا تذكر أسمائم ، و السودان و العالم لا يستطيع حتى الآن إستيعاب مدى الظلم و البغى الذي أرتكب بحقهم و حق جميع الشهداء من ضحايا النظام.

* إيراد الأستاذ شوقي للأسماء مسألة عادية ، فجميع المجتمع السوداني يعرف بعضهم البعض ، و نحمد الله أن الأستاذ شوقي لديه ذاكرة كمبيوترية ما شاء الله ، و له الفضل في تحفيذنا و إنعاش ذاكرتنا ، لنُحيِّ قيِّمْنَّا و موروثاتنا و نستعيدها ، و هذا يشكل هاجس لكوادر النظام ، فهم لا يفهمون عن ماذا نتحدث ، و لهذا عبر عنها خالد الذكر الطيب صالح: من أين أتى هولاء.

كان الأجدى لك و لفائدة الرأي العام ، أن تتناول المعلومات التي أوردها و تناقشها بالحجة بدلاً من نشر ثقافة الإساءة و التجريح و هذه مسألة يسهل إكتسابها إذا صفت النفوس و تخيلت أن من تكتب عنه ماثل أمامك ، فبالتأكيد ستتقيد بقواعد الأدب و الإحترام مهما كانت خلفيتك الفكرية أو السياسية ، لأن أي إنسان مهما إنتفت آدميته فهو لديه أهل و عَقَابْ ينتمون للمجتمع.

الأستاذ شوقي بدري لا يريد أن يكون بطلاً ، بل يريد أن يصبح الشعب السودان كله بطلاً.

[الفقير]

ردود على الفقير
[shawgi badri] 07-09-2016 11:13 AM
الفقير لك التحية . من موضوع المسكوت عنه ، اقتبس
وزير الدفاع الذي كان من المفروض ان يحمي العرض والشرف والوطن كان فضل الله برمه. وفي السبعينات كنت اراه كثيرا في منزلنا في ام درمان لان صلاح محمد أحمد صلاح وجده ألأمير صلاح متزوج من شقيقتي ووالده ابن عمة أمي ووالد صلاح كان تاجرا في لقاوه. واللواء فضل الله برمه متزوج من خديجه وهي ابنت خالة صلاح ولهذا كان تواجدهم في منزلنا شيئا عاديا خاصة وان صلاح كان يسكن معنا حتى قبل ان يتزوج من شقيقتي ويصير شريكي. ولقد سمعت فضل الله برمه في السبعينات وامام مجموعه من الناس في منزلنا يقول فخورا بأنهم قد سحقوا المرتزقه وقاموا بازالة الرتب العسكريه من على اكتاف الضباط قبل الحكم عليهم بالأعدام وضربهم بالرصاص. وهؤلاء المرتزقه الذين يتحدث عنهم هم جنود حزب الأمه والأنصار المساكين الذين اتوا على اقدامهم سيرا من ليبيا وغرب السودان ثم صار فضل الله برمه وزيرا للدفاع في حكومة الصادق المهدي.

وعندما رجع فضل الله برمه في بداية الثمانينات بعد ان كان ملحقا عسكريا في نيودلهي لم يكن له مسكنا في الخرطوم وكان يقيم في منزل صلاح ابن خالة زوجته في الثوره شرق مجموعة البيوت التي عرفت ببيوت الصول نصر. وكنت ازوره وزوجته بإنتظام وعندما اصبح وزير دوله للدفاع في الديمقراطيه الأخيره ذهبت لتحيته ووجدت معه اللواء فضل الله حماد وأخرين. وفي تلك الأيام ذهب الصادق المهدي الذي كان وزيرا للدفاع لأنجلترا للتفاوض مع شركة رويال اوردننس التي كانت لعقود عديده تمول السودان بالسلاح. ومباشرة بعد زيارة الصادق المهدي ذهب الأنجليزي الذي يمثل مكتب السودان للمشتروات و طالب بالعموله.

ولأن رويل اوردننس جزء من بريتش ايرسبيس فلقد استغرب جوليان الذي كان وقتها نائب المدير العام لبريتش ايرسبيس ان يتصل شخص بعد زيارة رئيس وزراء السودان. وصلتي بجوليان انه كان مولعا بالسيارات القديمه و مشاهدة مبارايات التنس ويشاركه في هذه الهوايه رمزي شريكي لأكثر من 20 سنه. وعندما صار فضل الله برمه وزيرا للدفاع ظهر مصري يدعى عبدالله وصار يتحدث بإسمه خاصه مع شركة البدفورد ثم ظهر الأنجليزي الذي يمثل مكتب السودان للمشتروات والحقيقه مكتب السودان للمشتروات كان يشتري كل شيء لحكومة السودان حتى السلاح حتى غير الأمير نقدالله هذا النظام في الستينات واصبح للجيش مكتب مشترواته الخاصه. وحاول الأنجليزي ان يلوي ذراع الشركات الأنجليزيه وكان يقول ان الامر يجب ان يسير كما كان ايام جنرال توم وكان يقصد الزبير رجب صديق النميري الحميم والذي كان يتحصل على هذه العمولات ثم بدأ الحديث عن ان الديمقراطيه ستسقط وان الجيش سيستلم السلطه من جديد وكان الانجليزي يقول ان الحكومه العسكريه القادمه ستتعامل عن بواسطته.

فوجدت من اللازم ان أخبر فضل الله برمه. فأخذت معي محمد صالح عبداللطيف وهو قاضي جنايات ام درمان الذي رفض ان يحاكم فاروق ابوعيسى وأحمد سليمان في 1963 فنقل الي قسم الحركه وارجع أحمد العاقب من المعاش وحكم على فاروق واحمد سليمان بست شهور لأنهم في دفاعهم اساؤو للحكومه.

وبعد الساعه السابعه صباحا كنا امام منزل فضل الله برمه في كوبر لكي اخبره بالمصري الذي كان يسيء لأسمه ومحاولة الأنقلاب التي كانت معروفه في لندن. ووجدت شاويشا وعسكري سائق السياره ورجل امن امام المنزل ورفضوا السماح لنا بالدخول. وانتظرنا ساعه وربع وقوفا امام المنزل والسائق يقوم بتلميع السياره المرسيدس 360 بلون البيج المائل للاحمر. وافهمنا رجل الأمن انه من المهم مقابلة فضل الله برمه وقال”هذا غير مسموح انها اوامر خديجه” فأخرجت ورقه لترك رساله لفضل الله فصرخ رجل الأمن والعسكري والسائق بصوت واحد”ممنوع دي اوامر خديجه”
عمر اسماعيل ابن خال خديجه صديق عزيز بالنسه لي كان مدرسا في مدرسة بيت الأمانه في الستينات ثم تقابلنا في كوبنهاجن في نهاية الستينات وبداية السبعينات وكان متزوج من سوزي البريطانيه وله منها ابن والأن يعمل في حقول البترول في جزيرة داس في ابوظبي. وفي التسعينات وبينما فضل الله برمه في السجن ذهب عمر اسماعيل لزيارة ابنة عمته فقبض عليه رجال أمن الجبهه وقيوده وابرحوه ضربا وشتما وهددوه بالموت وطالبوه أن يمتنع عن زيارة خديجه وان لا يخبر احدا بمافعلوه به. وحتى عندما قال أنه يزور اخته لم يشفع له ذلك. ولقد تألمت لما حصل لعمر ولا ادري هل تعرض أخوته الدكتور احمد اسماعيل او عبدالقادر اسماعيل احفاد الناظر قراض القش لنفس المعامله عند زيارة خديجه. اللهم لا شماته ولكن السؤال الذي يطرح نفسه كيف بنى اللواء فضل الله برمه والذي كان لا يملك اي شيء في بداية الثمانينات بيته الفاخر في الرياض؟

[كوكاب] 07-09-2016 02:33 AM
لا فرسان ولا اشاوس ناس بتاعين مشاكل بس الواحد لو ما لقى ليهو زول يشاكلو يتشاكل مع ضله .


#1485391 [الداندورمي.]
0.00/5 (0 صوت)

07-08-2016 09:34 PM
كل عام وأنتم بخير
وربنا يحقق الأماني
لك أجمل التحايا أستاذنا
شوقي أتمني من الراكوباب
التكهن بما تحوي باقي حلقات مسلسل
شاهد علي العصر أنا ,,,بتوقع أحداث إغتيال الزبير وإبراهيم شمس الدين
عشان يفتن أبو كوكا ومدامه ودو .

[الداندورمي.]

#1485390 [خميس ابو سفه المحامى والمستشار]
0.00/5 (0 صوت)

07-08-2016 09:33 PM
كالعاده انت محور وبطل القصه يعنى انت جنب الترابى وعلى عثمان و محجوب شريف و القنصل الامريكى و محمد وردى و نسابتو و اولاد ملاح ..... ياخى الذيك منو؟؟؟؟ لا سفاره لا حطومه لا استخبارات و اجهزة امنيه بتقيف امامك .... ما تزعل تقول اتعلمو الحلاقه فوق راس الشعب المسكين لانو انت بتحلق و تركب تركيب خطير الخلاصة خيالك واسع و اعجابك بنفسك فات المستوى وراسك بارغم عامل ذى البطيخه الصفراء ....

[خميس ابو سفه المحامى والمستشار]

ردود على خميس ابو سفه المحامى والمستشار
[kak kak] 07-09-2016 01:06 PM
العزيز خميس ابو سفه - الناس اللي ذكرهم الاستاذ شوقي لهم علاقه بالموضوع ولذا تم ذكرهم فيه - ايش المشكله في هذا - ودول ناس هم من اعلام المجتمع في ذلك العهد والى الان والاحتكاك بهم والجلوس معهم مش متاح لكل من هب ودب من بتاعين التمباك والصعود والبنقو والسجاير امثالك ولكن الاستاذ شوقي ذكر هذا ليس للتفاخر ولكن هذه بيئته التي نشا فيها وهؤلاء اهله واصحابه وزملائه وهلم جرا وعندما يذكرهم في صياغ حديث فهذا من اجل التاريخ والاعتبار ولكن امثالك من اصحاب الصعوط والتمباك والسجار والبنقو لا تفهمون هذه الامور - الله يهديك يا خي - ولكن الى ان يمن الله عليك بالهدايه يا اخي خليك مع تمباكك وصعوطك وبنقوك وسجايرك دا ووقف الهذيان بتاعك دا ...


#1485384 [Dr. Kailany Da'oud]
0.00/5 (0 صوت)

07-08-2016 08:48 PM
لاحظو كمية الاسماء الموجوده فى المقال الركيك اعلاه:

((الترابي، علي عثمان، محجوب شريف، مصطفي عثمان، مولانا صالح فرح، اولاد ملاح، الاستاذ محمد الحسن شقيق زوجة الفنان وردي، التاجر اليوناني ابوستولو، لعم عز الدين حسين، الاستاذ محمد عثمان شكاك، مجدي واركانجلو وجرجس، ضل الله برمة، الاستاذ كباشي الصافي، شريف التهامي، فاطمة عبد الرحمن المهدي، الصادق المهدى)) هذا بالاضافه الى انه بيعرف كل السفراء وزوجاتهم و مرات عندو اضنين فى كثير من الدول و الممالك واجهزتها الامنيه والعسكريه.....

شوقى عايز يقول انه البطل فى هذه القصه و انه محورها .... بسلاسه غريبه وقدرة فائقه التصور بينقل معلومات دقيقه للغايه و يصعب الحصول عليها،،،، لكن ود بدرى حريف و لاعاب بيدر يجيبها و يكتبها بكل شجاعة،،،، مين ذيك يا مخترق الدوائر الامنيه والجاسوسه يا ولد ياخطير انت ..... وزعلان ليه بتقول (اتعلموا الحلاقة في رأس الشعب المسكين).....؟ ما انت قاعد تتعلم و تتبجح كمان على الشعب المسكين.

[Dr. Kailany Da'oud]

ردود على Dr. Kailany Da'oud
[الفقير] 07-09-2016 01:07 AM
كتبت لحضرتك رد منفصل أعلاه.

ذكرت أن المقال ركيك و مع ذلك واضح من تعليقك إنك قد إضطلعت على كامل المقال ، فما السبب يا ترى؟

يوجظ مقال بلغة رصينة جداً و مليء بالمصطلحات للدكتور عبد الله على إبراهيم يمكنك الإستمتاع به عن ركاكة مقال الأستاذ شوقي ، لكنك لن تجد نفس نوعية المعلقين.
ذكرت لك في ردي على تعليقك ، أن الأستاذ شوقي لا يريد أن يكون بطلاً ، بل يريد للشعب السوداني كله أن يكون بطلاً.

[STRANGER] 07-09-2016 12:14 AM
دكتور كيلاني ، لعلمك الاستاذ / شوقي ، موسوعة ،، من اولاد امدرمان لمن كان فيها العربات بالعدد ودا الكلام انت ممكن تفهموا ،، دا ود ابراهيم بدري يعني كمية الاسماء دي نقطة في بحر يا دكتور وتاني ما عندك موضوع لكن ازيدك فعلا لعاب وحريف وشجاع واخوه كان ملاكم محترف خارج السودان وكمية الاسماء دي شنو قد تكون معقدة بالنسبة ليك دي ممكن الاستاذ/ شوقي ، يقابلهم في مناسبة واحدة بي طفيلياتها ،، ودا بقودنا نقول انت من وين يا دكتور الكتيابي ومواليد سنة كم ؟؟ وقريت وين ؟؟ الحكومة والسياسة كانت بسيطة والشعب والشباب كانو مثقفين ومعلومات الاستاذ يصعب الحصول عليها ، تشكيلة فريدة في نوعها ،، اكيد انت يا دكتور ما بتعرف حاجات كتير ياخي تاني ما تعلق ،،، الكلام بعيد عليك ياخي ديل عارفين مجلس قيادة ثورة نميري واحد واحد بس امسك من هنا وما ح اكتر معاك يمكن تكون من جيل الانقاذ او تابع للكيزان ما بتعرف غيرهم وكل عام وانتم بخير

[الشانق طاقيتو] 07-08-2016 11:53 PM
زعلان شديد يا دكتور، انشاء الله خير بس!

[أبوقرجه] 07-08-2016 11:34 PM
هذا التعليق لا ينبع الا من انسان تابع للنظام
يعني قالوا ليك قول كده


#1485383 [العنقالي]
0.00/5 (0 صوت)

07-08-2016 08:47 PM
ههههه شعرت بغيظك استاذ شوقي المحترم
كلنا مغيوظين
والله يرحم شاعر الشعب محجوب شريف ، كان في الثورة الحارة السابعة قريب من محطة الرومي، والفسحة القدام بيتو بعد الظلط دي الفرودوس الحالية امتداد الحارة 12 درجة اولى ممتدة لغاية الشارع الفاصل بين المنازل القديمة اللي فيهو مدرستنا الجميلة مدرسة الثورة الحارة 12 الابتدائية
دايما تثير الذكريات ويزيد شوقنا للسودان
محجوب شريف وعدني بنسخة من ديوان ليه اسمو مريم والاطفال او شىء من هذا القبيل ولم يحصل هذا يمكن لانو لم يطبع ابدا كتب فيو قصيدة جميلة لطفلتو مي ( تبتبا تبتب تبتب تبتب باكر تكبر تعرف تكتب )مي الان الان بنت كبيرة
المهم نسيت تذكر انو علوبة لمن فشلت محاولة قتل ح مبارك جمع مجلس الجحيم وطالب بتصفية المصريين المشاركين!! وقال ان لديه جميع المبررات والادلة الشرعية لجواز قتلهم !!!
غايتو اعتقد انو صاحب موسم الهجرة كان محقا جدا وهو يقول من اين اتي هؤلأ

[العنقالي]

ردود على العنقالي
[أبوقرجه] 07-08-2016 11:41 PM
العنقالي كل سنه وانت طيب
تعليقك جميل والله وانا سعدت به كثيرا

بس اصحح ليك معلومه. ديوان الشعر ليس اسمه مريم والأطفال
الاسم الصحيح أطفال وعساكر وهذا الديوان طبع في ايام الديمقراطيه قبل انتخابات 1986
لما كان محجوب شريف مرشح في الدايرة 45 باسم الحزب الشيوعي السوداني العملاق
لك تحياتي

[shawgi badri] 07-08-2016 11:04 PM
لك التحية . سافرت السويد ورجعت القي ليك الفسحة راحت وبيوت فخمة في مكانها. كأنما بناها جن سليمان . محجوب اتي لمصر في 1998 اول مرة يطلع برة السودان . بدعوته محمود الدكتور صالح عثمان صالح . والشريط اسمه تبتبات . وكان في زخم اعلامي وتسجيل وكتابة وحضر لي محجوب جلابية ونمنا في الفجر بعد ونسة وضحك . امثال محجوب شريف مهمون لانهم يحدون من غرورنا وتطاولنا عندما تشيتط النفس ويحسب الانسان انه اكثر من لا شئ . وينظر الانسان لمحجوب شريف لكي يحس بضآلته . رحم الله الرجل الكبير محجوب .

[مستغرب] 07-08-2016 10:26 PM
انشاء الله ربنا يقدرك تكتب حقائق زيو بدل مغالطة حفر الليل اب كراع برا او خالف تذكر اقلاها نحن اولاد الجيل نلم بهذه الحقائق


#1485380 [الجقود ود بري]
0.00/5 (0 صوت)

07-08-2016 08:41 PM
تسلم والله يديك العافيه . الكلام دا بتجيبوا من وين ؟

[الجقود ود بري]

#1485379 [ود ابوراس]
0.00/5 (0 صوت)

07-08-2016 08:29 PM
العم شوقى ٠الشحاد مصطفى عثمان اسمعيل بقى سفير فى سويسرا حسى٠شوفته المحن دى كيف ٠كان وزير خارجية حسى سفير عليك الله دى يفهموها كيف

[ود ابوراس]

#1485372 [محمد احمد السامرابى]
0.00/5 (0 صوت)

07-08-2016 08:13 PM
الاسشتاذ شوقي السلام عليكم ورحمة الله وبركاته
انت خليك من دم مسلم وصرف القروش وكدة لو فرضنا انه قتله حلال وبدون تكاليف باهظة ايه اللي كان يحصل ليهم انجاز اذا افلحوا في قتل مبارك ؟
انا شايف ديل مجرد تيران بس

[محمد احمد السامرابى]

#1485362 [البصير]
5.00/5 (1 صوت)

07-08-2016 07:26 PM
جزاك الله خير يا أستاذ شوقى وسنتذكر دوما نبؤة الأستاذ محمود محمد طه بأخلاق وبمصير هؤلاء السفلة ولقد فتنهم الله فيما بينهم وهاهو كبيرهم يكشف أسرارهم من تحت قبره،، حكمة الله.

بالنسبة للأموال التى خزنتها الحركة الإسلامية فى حساب المهندس إسماعيل إبن البروفسير إبراهيم أحمد عمر فى إحدى البنوك ببريطانيا وكان متزوجا من بنت شريف التهامى فقد تم التستر عليها ويقال أن المبلغ كان 200 مليون دولار وتوفى الإبن فجأة فإدعت الزوجة أن المبلغ ملك زوجها وأنها ورثة لها يدعمها فى ذلك القانون البريطانى وفشلت كل جهود الكيزان لرد المبلغ بإعتباره من أملاك الحركة الإسلامية وقد وقف شريف التهامى فى الحياد وسكت إبراهيم أحمد عمر شفت الناس ديل أبالسة كيف وأخيرا سكت الجميع وإختفت القضية.

أما حماس فجملة عطايا وهبات البشير أيام الفورة النفطية فبلغت 300 مليون دولار ويقال بأنها كانت بأمر من الحركة الإسلامية العالمية بإعتبارها دعم مشروع لتسيير حكومة حماس وكان خالد مشعل أو إسماعيل هنية يأتيان الخرطوم كل سنة ويحملانها فى حقائب بمتوسط 30 مليون دولار خلال 10 سنوات وكان المصريون يعرفون ذلك لكنهم يسكتون فى كل مرة وعندما ساءت علاقتهم بحماس هددوا خالد مشعل وهو فى الخرطوم أنه إذا أتى بأى أموال فى طريقها لغزة فسوف يصادرونها فتوقفت وكانت الأموال ترسل بعدها مع دفعات السلاح عبر التهريب والتى ضربها الإسرائيليون عدة مرات.

[البصير]

#1485348 [سارة عبدالله]
5.00/5 (1 صوت)

07-08-2016 06:50 PM
الاخ شوقى
حياك الله
عند ابو تفه اللمين كان الترابى بيربط ليه الكرفته دى ما سبقك عليها زول
ولكن شعره كان زي الهبيز وواقف انتبه

والتانيه محاكمة التهامى دى شريط محفوظ فى الاضابير
التالته 150 الف دولار كانت فى شنطة المرحوم ستي فاطمة قالت مافى كلام زى دا فى برنامج عادل سيداحمد لكن عرفنا على عثمان وابو العريس المتوفى كانوا فى الجوديه
ترجع القروش . يا اخى الناس ديل جنهم القروش
الرابعة شنطة قروش تمويل الغذو الليبي شنطة يقال مليار دولار الى الحزب استلمها خال مبارك الفاضل وقال وقعت بيه الطيارة تصدق 🚀✈

[سارة عبدالله]

ردود على سارة عبدالله
European Union [سارة عبدالله] 07-09-2016 07:16 PM
ارد عليك الأخ شوق انا خزنة أسرار ولو سمعوا ما بقبلوا بيه !!!!

عشت مع هؤلاء ثلاثين سنه من الكتاب الى الدكتوراه


اعرفهم جيد واكره الكيزان صلتى بهم أنصاريه راتب الامام المهدى فى جيبى
ربيت نفسي بنفسي لم يشاركنى حد فى كل منحى الحياة اعرفهم حبهم المال
وارد على لو سمعوا الكلام ده ما بقبلوا بيه سؤال شوقى هو فضل شنوا بالله الفضل ما سمعوا بيه انا اخف وطأة هذه الصحيفة وغيرها أعطت فكره على الحاصل

[shawgi badri] 07-08-2016 11:10 PM
العزيزة سارة لك التحية . انت خزنة اسرار ربنا يحفظك قبل ما الجماعة ديل يدخلوك في مصيبة الكلام ده الناس ما عاوزة تسمعوا . احد اعمامنتا كان مفتش صحة سافر بي حملة جمال رجع بدونا قال الجمال ماتت . قال ليه نمشي نشوفها قال غتتها السفاية . الناس لسة مستغربة السفاية تغطي الجمل وهو جاء ماشي .


#1485342 [جدو]
5.00/5 (2 صوت)

07-08-2016 06:31 PM
الناس ديل يا عم شوقي تجار دين ليس الا ..

هل لاحظتا انو اي حاجة الاسلام محرما هم بسووها

قتل النفس و قطع الارزاق و الفواحش و اكل مال اليتامى و المساكين

[جدو]

#1485335 [Freedom fighter]
5.00/5 (3 صوت)

07-08-2016 06:12 PM
المحيرني فيك يا أبو الاشواق إنك بعيد في السويد ديك ومتابع اخبار البلد بالدقة والدقيقة وبعدين قلبك شديد على الوطن بدليل شوالات الاخبار البتنفض فيها دي. ياخ معلوماتك دي عاوزة توثيق وطباعة عشان تكون مرجع للاجيال الجاية. شكرنا ليك مع ايام العيد

[Freedom fighter]

#1485328 [قاسم أمين]
5.00/5 (2 صوت)

07-08-2016 05:18 PM
الأستاذ العملاق والأمدرماني الأصيل ، شوقي بدري ، لك التحية بهامة النيل العظيم وبصمود التبلدي والأماتونج وأنت تكشف عن زيف وخبث ودناءة عصابة الأخوان المسلمين وكيف أنهم أهلكوا الزرع والضرع وسفكوا الدماء وهتكوا الأعراض وسربلوا البلاد بالدم والبؤس والدموع ..... الصادق المهدي لا نعول عليه كثيراً في الإنتفاضة القادمة لأنه يختلف عن العصابة إختلاف يسير ، على الأقل نحترم نزاهته ..... واصل تعريتك لهذه الخنافس ودمت مخرزاً في عين الطغيان وصبية الهالك الترابي ، ونموذجاً ساطعاً ومتميزاً لأصحاب الضمير الحي .

[قاسم أمين]

#1485319 [salah]
5.00/5 (1 صوت)

07-08-2016 03:59 PM
منور يا معلم شوقي.

[salah]

ردود على salah
[shawgi badri] 07-08-2016 09:23 PM
صلاح اريتك عافية . شكرا علي الانارة نور الله حياتك .


#1485318 [أحمد إبراهيم]
5.00/5 (3 صوت)

07-08-2016 03:47 PM
" كرش ليهم السكاكين وتكى ليهم البلد"
يجازي محنك : بليت لينا النظارة .

[أحمد إبراهيم]

ردود على أحمد إبراهيم
[shawgi badri] 07-08-2016 09:21 PM
احمد ابراهيم كل سنة وانت بخير . العملوه في البلد اكتر من كدة .


#1485317 [ودابراهيم]
0.00/5 (0 صوت)

07-08-2016 03:47 PM
كل عام وانتم بخير وعيد مباركك عليك عمنل وليك كل احترامنا وتقديرنا وربنا يجمعنا بك قبل ان نرحل من الدنيا ومتين يامسافر العوده لامدرمان

[ودابراهيم]

ردود على ودابراهيم
[shawgi badri] 07-08-2016 09:18 PM
ود ابراهي كل سنة وانت بخير . قالوا الاشافي ما بتلاقي . والاشفا هو المخرز ونحنا ما اشافي .ان شاء الله يحصل التلاقي .


#1485309 [الغلبان]
0.00/5 (0 صوت)

07-08-2016 03:13 PM
تعليق بسيط الشغلانة ما دايره ليها شوفان ههههه

[الغلبان]

ردود على الغلبان
[shawgi badri] 07-08-2016 09:16 PM
المشكلة انوفي ناس لسة ما قادرة تشوف وبتدافع بحماس عن الانقاذ .


شوقي بدري
شوقي بدري

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة