باغة وااااحدة
07-28-2016 05:09 AM




تقول الطرفة بأن إحدى بائعات الخمور البلدية قد تم إحضارها إلى المحكمة وفي معيتها عدد من (الباغات) ولما سألعا القاضي :
• الباغات دي بتاعتك
حلفت يمين وأجابت (بالبقطعها) إنو حقتا بس باغة وااااحدة (مع إنو العقوبة هي ذاااتا وكدة) !
أسباب إيراد هذه الطرفة هو ما جاء في صحف الأمس حيث أعلنت رئيسة لجنة الطاقة بالبرلمان حياة الماحي، اختفاء 72 مليون دولار من الحسابات الختامية للمؤسسة السودانية للنفط وليس 628 مليون دولار (باغة واحدة) كما ذكر تقرير المراجع العام الطاهر عبد القيوم لعام 2013م ، مع إنو المراجع العام كشف في وقت سابق عن غموض في صرف 960 مليون دولار خلال 16 عاماً يعني ما (باغة واحدة) ، وقال (المراجعة رصدت احتساب مصروفات تشغيلية ورأسمالية في قطاع النفط بزيادة دون وجه حق بلغت 960 مليون دولار، عند توزيع الأنصبة بين الحكومة والشركاء، خلال الفترة من 1996 وحتى 2012م، وتم اعتماد مبلغ 332 مليون دولار منها كمصروفات حقيقية، وما يزال المتبقي البالغ 628 مليون دولار تحت المناقشة) !
ليت الوزارة أقرت (بالباغة الواحدة) لكنها إستنكرت عدم الاعلان عن تلك التجاوزات التي يعود تاريخها لعام 1996م الا في 2015م، ولامت (شفتا كيف فيها لوم كمان) المراجع العام لعدم تزويدها بنسخة من تقريره الخاص بها، واوضحت ان تقرير مراجعة الحسابات الختامية للمؤسسة السودانية للنفط لعام 2014م المعد من الوزارة والمجاز بواسطة المراجع العام نفسه 2013م خلا من هذه النقطة تماماً، وذكرت (تفاجأنا بها في الجرائد) والمعني واضح (الفات مات) !! يعني بالعربي كده الوزارة بتقول للمراجع (ما تنكت لينا الحاجات القديمة أنحنا أولاد هسه) !
الغريب وعجيب في الموضوع أن (البرلمانية) رئيسة رئيسة لجنة الطاقة دافعت دفاعاً مستميتاً عن وزير النفط (بدلا من أن تحكها لحدت ما تجيب الدم ) إذ قالت أن الوزير اشار الى ان المراجعة المقصودة تستند على اتفاقية قسمة الانتاج بين الحكومة والشركاء التي تعتمد على (البراميل)، وان وزارة المالية هي من يستلم العائدات المالية وليست وزارته (شفتو كيف؟)!
لكنها (أي الأستاذة حياة) أكدت في تصريحات صحفية امس، عقب اجتماع مشترك بوزير النفط ومسئولين بالمؤسسة السودانية للنفط، ان الوزير اوضح ان المبلغ الذي لم يظهر في الحسابات الختامية للمؤسسة يبلغ 72 مليون دولار، وليس 628 مليون دولار الواردة في تقرير المراجع العام (يعني باغة واحدة) !!
خلاصة الأمر أن رئيسة لجنة الطاقة بالبرلمان حياة الماحي قد أقرت باختفاء 72 مليون دولار (باغة) من الحسابات الختامية للمؤسسة السودانية للنفط .. بينما يقر المراجع العام بأن المبلغ المختفي هو 628 مليون دولار ، ولعلم القارئ الكريم فإن هذا المبلغ (628 مليون دولار) يعادل تقريباً حوالي ثمانية (بليون) جنيه سوداني (يعني اللهط بقى بالبلايين) أكرمكم الله ، يحدث هذا في بلاد تكتظ بالبلايا والرزايا والإحن !
طيب السؤال البطرح نفسو بقوة وشدة؟ القروش الما هينة دي (مشت وين؟) .. أين ذهبت يا (ولاة أمرنا) هذه الملايين من الدولارات ولماذا لم تظهر مستندات صرفها ؟ وهل هنالك إرادة سياسية للبحث والتحقيق والإستقصاء لمعرفة أين ذهبت ؟ العبدلله شخصياً بعد (مهزلة) بيع خط هيثرو و(السكوت) المريب لكافة الأجهزة المناط بها تحقيق العدالة (السنوات دي كوووولها) رغم كل هذه (الواوات) اليومية يعتبر أن (إختفاء) هذه الملايين من الدولارات شيء أكثر من عادي في بلد تمت إستباحته تماما ، إن ما حدث هو (نهب مصلح) لهذه الملايين من الدولارات (المختفية) لا يمكن بأي حال من الأحوال إسترجاعه (زي هيثرو وكده) ولعل ما يوجع ويؤلم حقاً أن كل هذا (اللبع البليوني) المن دون رأفة يحدث بإسم الدين وأن من يقومون به هم (رفقاء صلاة الفجر) الذي هو أت لا ريب فيه !!
كسرة:
نجيب ليكم (التومة الوداعية) بتشوف الرايحة وكده !! هات الحبوب يا ولد !!
• كسرة ثابتة (قديمة) :أخبار ملف خط هيثرو العند النائب العام شنو؟ 80 واو - (ليها ستة سنوات و 9 شهور) ؟• كسرة ثابتة (جديدة):أخبار تنفيذ توجيهات السيد الرئيس بخصوص ملف خط هيثرو شنو؟ 39 واو (ليها ثلاث سنوات وأربعة شهور)
الجريدة


تعليقات 20 | إهداء 0 | زيارات 8284

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1495876 [وحيد]
0.00/5 (0 صوت)

07-30-2016 11:07 PM
يا جبرة يا اخوي .. الناس ديل وصلوا مرحلة الطغيان المطلق و الفساد المطلق و اصبح السفح و اللفح و الفساد علني و على عينك يا تاجر و ما داسنه ... اها حتسوي شنو؟ باعوا البترول و لهطوا قروشو و باعوا الاراضي و سفوا قروشها و باعوا خط هيثرو و كل مقدرات البلاد و سفةا قروشها و بقوا يدينوا باسم السودان و يسفوا الديون و يخلوها قيد في رقبة الاجيال و يمكن تصحى بكره تلقى روحك بلا وطن و بيتك ذاتو باعوه .... اها العمل شنو؟

[وحيد]

#1495608 [ابو عمر]
0.00/5 (0 صوت)

07-30-2016 11:23 AM
دى جركانات عديل ما باغات

[ابو عمر]

#1495534 [زول هناك]
0.00/5 (0 صوت)

07-30-2016 09:17 AM
طالما فقه السترة موجود ما بتجيهم عوجة تاب وبنومو قفا بلع حبوبك ساكت والعنده مستندات بيجيبا زي ما قال كبيرهم والمراجع العام دا الكلام دا جابو من راسه ما عنده مستندات واللا ما معترفين بيه بياذن في مالطة وهي لله هي لله القروش دي بنوها عمارات وشركات ومزراع وقصور وفلل من كافروي الى دبي وماليزيا وسويسرا

[زول هناك]

#1495117 [abushihab]
5.00/5 (1 صوت)

07-29-2016 10:54 AM
شايفك اليومين ديل كترت من الحبوب ,وبهدلت الشافع, الله يستر.

[abushihab]

#1494930 [هلال زاهر الساداتي]
5.00/5 (1 صوت)

07-28-2016 08:31 PM
مريسة بقرسين ( قرشين )وبيده (بيضة )كمان
عزيزي الفاتح جبرا لك التحية
ذكرتني طرفة باغة واحدة بطرفة أخري مشابهة عندما كنت في التونج بجنوب السودان المفقود ، وقدم لي نائب العميد رئيس العمال بالمعهد وقال لي أنه سكران وفي ساعات العمل واستدعيت الرجل وقال لي دفاعا" عن نفسه أنه غير سكران ولكنه شرب مريسة بقرشين فقط ومريسة بيضة كمان ، يعني أنها غير مسكرة .
أما هؤلاء الكيزان فانهم يأكلون مال الله ورسوله بعين قوية ولا يطرف لهم جفن

[هلال زاهر الساداتي]

#1494849 [مواطن سودانى]
0.00/5 (0 صوت)

07-28-2016 05:19 PM
شى لله
وزير النفط الحالى ود نوبا نضيف عشان كده انكشف المستور
الجماعه ديكا كان دفننهاتحت البطانيه
شكرا لك دكتور زايد و ربنا يمدك بالصحه و العافيه

[مواطن سودانى]

ردود على مواطن سودانى
[abushihab] 07-29-2016 11:00 AM
اولا بطل غمز ثانيا التقرير يتحدث عن المال المسروق مدة 19 عام وليس في عهد ود النوبة النضيف وربما الوزير الحالي برئ من كل التجاوزات.


#1494740 [quickly]
0.00/5 (0 صوت)

07-28-2016 02:01 PM
احتفت ويين ؟؟!! انت قايل في زول جايب خبرك بي هضرباتك دي
هي لله ياجبرة ...بعدين لو الفي بالي بالك داك
في حاجة في الدين اسمها التحلل ما سمعت بيهاولا شنو ؟؟
أقعد وأنت ساكت بس!

[quickly]

#1494706 [صابر الصابر]
0.00/5 (0 صوت)

07-28-2016 01:24 PM
الناس ديل كلهم لاهطين في ماعون واحد من غفيرها لي مديرها عشان كده مابحاسبوا اي مسئول زي ماقال واحد منهم خلوها مستورة..

[صابر الصابر]

#1494689 [اليوم الأخير]
5.00/5 (1 صوت)

07-28-2016 01:07 PM
يعني بقت على رئيسة لجنة الطاقة ،،
على الهواء مباشرة البشير قال لأحمد منصور عدد القتلى في دارفور عشرة ألف مش ثلاثمائة ألف

[اليوم الأخير]

#1494654 [abu hussain]
0.00/5 (0 صوت)

07-28-2016 11:59 AM
والله يا الفاتح اخوي كل يوم اقول ما أقرى مقالك عشان ما يجينا اكتئاب ونقول يمكن الناس دي تتوب وتخاف من ربنا وعلى اقل تقدير يا أخي حاسبو الناس البتلهط في حقوقنا دي والمراجع العام دا الفايدة منه شنو ساكت على البلع ويطلع لينا في البلاوي . بس انا اقول المراجع ذاتو مدسوس ومسيس ويمكن يكون من بتوع الامن ولا تابع لي علي عثمان أو نافع ويا بلد ما ليك وجيع

[abu hussain]

#1494600 [قساس فادي]
0.00/5 (0 صوت)

07-28-2016 10:47 AM
على الاقل لو أدونا نصيبنا من الباغات دي كنا وقفنا تنقل

[قساس فادي]

#1494560 [سامي]
0.00/5 (0 صوت)

07-28-2016 09:51 AM
اللهم سلط عليهم البلاوي والامراض وعذاب الدنيا والاخره يالله ياربنا ياواحد ياأحد انتقم منهم اللهم إنهم قتلوا أهلنا ودمروا مشاريعنا وشردوا شبابنا ونهبوا البلد إنك يالله عزيز ذو انتقام

[سامي]

#1494557 [wad GRAS]
5.00/5 (2 صوت)

07-28-2016 09:45 AM
اسألواعوض الجاز وابنته اين اختفت هذه الباغات اقصد الملايين..

[wad GRAS]

#1494549 [mustofaaliahmad]
4.00/5 (1 صوت)

07-28-2016 09:35 AM
انشاء الله وببركة رسول الله اي دولار اخذوه دون وجه يقيف ليهم في حلقهم لا ينبللع ولا ينلاك

[mustofaaliahmad]

#1494533 [منصورالمهذب]
0.00/5 (0 صوت)

07-28-2016 09:19 AM
ياعم كان زمان في كل مدينة تلقى مجنون واحد ، مثلا في الخرطوم تلقى المارشال و في امدرمان طلقا وببحري الحبشية. الان السودان شخصيا جنه جنونا باينا وانت ماسمعت بالمثل البقول ما تتكلم مع مجنون و ما تخليهو يكلمك! مش تهذيب؟

[منصورالمهذب]

#1494528 [سيد الرايحة]
0.00/5 (0 صوت)

07-28-2016 09:16 AM
والله يا جبرة ما خليت شىء لوزير العدل كان قاصد يحقق العدالة ويحفظ مال الغلابى مرضى الفشل الكلوى والسرطان والتهاب الكبد الوبائى ولكن الحقيقة التى يجب ان يعلمها كل الشعب الفضل ان هذه العصابة الفاجرة الماكرة الداعرة لاتخشى الله ولا تستحى من خلقه والفساد منظومة متكاملة من البشير للغفير وبهذا اقترح على كل كتاب الراكوبة وكل الاخوة بكافة مواقع التواصل الاجتماعى بان يتم اطلاق لقب مكب النفايات على حزب المؤتمر الوثنى ومن اليوم ارجو الا يذكر احد عبارة المؤتمر الوطنى ونطالب ادارة الراكوبة الاستجابة لهذا الطلب البسيط لان مكب النفايات يجمع كل القاذورات والاوساخ والقرف الذى اذى شعبنا 27 عاما واصبح الكل يبحث عن وطن بديل هروبا من جحيم عصابة الرقاص سائق عربة النفايات .

[سيد الرايحة]

#1494519 [عبدالواحد المستغرب اشد الإستغراب!!]
0.00/5 (0 صوت)

07-28-2016 09:07 AM
يا جبرا حبوب شنو العايز الولد يجيبا ليك ؟!! يا اخى نحن تجاوزنا الحته دى لينا زمن والحبوب ما منها غير المزيد من الصرف الغير مرشد فضلا عن إن الحبوب ذاتا مضروبه وحتى المضروبة دى بدون بطاقة تآمين صحى بتنفض جيبك والحل (هات الكريز يا ولد) والله وتالله الناس دى ما بتجى إلا بالكريز!!واسمعا منى نصيحه النظام ما مستعد يسمع اى واحد والقروش دى راحت كلها في دعم (المشروع الحضارى)والنظام خوفا من أن يتهم بدعمه للارهاب العالمى يخفى أوجه الصرف واى قروش ضايعه تآكد إنها أنفقة في دعم المشروع إياه وبالمناسبه دى حجتهم في ضياع الآموال ولكنهم ما حيقدروا يعلنوها صراحة يعنى كل واحد يلهف كام مليون دولار وتسآلوا يقول ليك (من آجل إعلاء كلمة الله) واحد بقوليك كده تقدر تعترض؟!! ودى بتذكرنا بعادل أمام في مسرحية الواد سيد الشغال وهو يساوم الراحل عمر الحريرى (لتسديد ديون مصر!!)!!.

[عبدالواحد المستغرب اشد الإستغراب!!]

ردود على عبدالواحد المستغرب اشد الإستغراب!!
European Union [عبدالواحد المستغرب اشد الإستغراب!!] 07-28-2016 02:03 PM
سقط سهوا : المقصود (مشروع العقارات الحضاريه)وليس (المشروع الحضارى) الغنايو مات وشبع موت!!.

European Union [quickly] 07-28-2016 02:03 PM
بالله عمر الحريري مات ؟؟ ربنا يرحمه ويغفر له


#1494506 [samer]
0.00/5 (0 صوت)

07-28-2016 08:50 AM
يا ود جبرا كل هذه الامور انشاء الله سوف تظهر بدون مراجع و اى حرامى بنى عماره سوف يحاسب من اى بند نهب و لن نعول على الاحزاب الكسيحه و سوف تحاسب هى ايضا و الايام دى الحراميه بيهاجروا الى امريكا و كدا و بيحولوا اموالهم اليها لانو دبى و ماليزا دنا عزابها لهم و صارت مكشوفه

[samer]

#1494474 [الداندورمي.]
0.00/5 (0 صوت)

07-28-2016 07:57 AM
لا حول ولا قوه إلا بالله
لا حول ولا قوه إلا بالله
هي لله هي لله هي لله هي لله هي لله هي لله
رفقاء زوار الفجر رفقاء زوار الفجر رفقاء زوار الفجر.
الدولارات مشت ووووووووووووووووووووووووووووين؟
الدولارات مشت وووووووووووووووووووووووووووووين؟
بالملاييييييييييييييين بالملاييييييييييييييييييييييييييييييييييييييييييين
التماسيح التماسيح التماسيح التماسيح التماسيح التماسيح التماسيح التماسيح التماسيح.

[الداندورمي.]

#1494439 [سارق حليب الاطفال]
5.00/5 (4 صوت)

07-28-2016 05:48 AM
960 مليون دولار فقط لاغير دي باغة واحدة أين باقي الباغات ؟،، اقصد المليارات من الدولارات منذ تصدير اول برميل من النفط الخام،، اسال الله ان ينتقم من كل الذين سرقوا من مال السودان وان كان حبة من خردل فساد فساد أعوذ بالله العظيم

[سارق حليب الاطفال]

الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة