المقالات
مكتبة كتاب المقالات والأعمدة
الفاتح يوسف جبرا
حيرتوووونا !
حيرتوووونا !
08-04-2016 01:00 PM



المسؤولون بإحدي الولايات عاوزين يعملو ليهم (سدين) سدين وكم مدرسة وإستاد كورة ومنزل للوالي ،المفروض طبعن يعملو مناقصة وإعلان في الجرائد لشركات الإنشاءآت وكل شركة تشوف كراسة المواصفات والخرط وتقدم العطاء بتاعا والسعر مع (صور) وبيانات عن الأعمال السابقة لها وتجي لجنة مؤهلة تنظر في العطاءات وتقارن بين الجوده وحجم الأعمال السابقة للشركات والأسعار التي أرفقتها .. طبعن ده بيحصل في الدول (الكافرة) حفاظاً على المال العام بتاع بيت مال (الكفار) ، أما نحن لا إعلان لا عطاءآات لا منافسة لا بطيخ .. تم الأمر (أم غمتى) ورست العقود التي بمبلغ 300 مليار جنيه على إتنين (متنفذين) من جماعة (القوي الأمين) أحدهما يملك شركة (إسم ساااكت) لم تقم بأي أعمال سابقة أو خبرات هندسية كما ليس لديها أي معدات (ولللا كوريك وااحد) ولا يوجد بها مهندس واااحد .. على الرغم من ذلك تم توقيع العقد لتنفيذ (السدين) بمبلغ بمبلغ 23 مليار وستمائة وسبعة عشر مليون وثمانمائة جنيه (بالقديم)
ولأن القصة في الأخير هي (لغف ولهط) قومي يا الشركة (الما فيها مهندس واحد) بيعي العقد من الباطن لي شركة تانية بمبلغ 6 مليار وخمسمائة ألف جنيه (فقط) وعلى كده يكون (المتنفذين الحكوميين) دخلو في جيبهم الفرق اللى هو سبعتاشر مليار ومائة وسبعتاشر مليون وثمانمائة ألف !
وعندما بدأ الشريك (المن الباطن) العمل لم يجد أي خرط دقيقة أو تصميميات للسدين يعملوا شنووو.. يعملو شنووو .. قاموا كلفو شركة إستشارية لعمل الخرط والتصاميم يملكها شريك في الشركة الباعت العطاء (ذاااتا) !
وهنا تعلل (المتنفذان) بأن هنالك إضافات لم تكن موجودة من قبل فقامت (حكومة الولاية) نتيجة لهذا العبث برفع العقد بقيمة 12 مليار جنيه لتصل القيمة الاجمالية للعقد الى 35 مليار جنيه ، طيب (مال الهبل) ده يتوزع كيف؟ قامت الشركة الباعت العقد بإعطاء (شركة الباطن) 3 مليار لتصبح قيمة عقدها 9 مليار وخمسمائة ألف جنيه (ونامت بالباقي) مما يعنى انو (النفرين ديل) دخلت إلى جيوبهم 24 مليار جنيه بدون أى جهد (بيع ورق ساااكت) !!
في ظل إنعدام الشفافية ، والجشع والطمع واللا مسؤولية لا يمكن للأشياء أن تصل إلى منتهاها الطبيعى .. إذا كانت قيمة العقد الكلية هي 34 مليار جنيه وتم بيع العقد لشركة منفذة من الباطن بمبلغ 9 مليار هل يمكن أن يكون مستوى المواد والإشراف والتنفيذ بنفس الصورة؟ بالطبع لا .. لذلك إنهار (السد الأول) في أول تجربة له حيث جرفته السيول والأمطار بينما يواجه (السد الآخر) مصير رفيقه ..
وزير التخطيط العمراني والمرافق العامة بالولاية (المنهوبة) صرح للصحف بإن السد لم يتم تسليمه حتى الآن وهو الآن مسؤولية الشركة المنفذة، حتى يتم تسليمه بالصورة المطلوبة والمتفق عليه وبما أنو هو المسؤول عن هذه الإنشاءآت نسأله لماذا رسى الأمر لهذه الشركة دون منافسة أو عطاءآت بل بدون أن تكون قد نفذت أي أعمال من قبل؟ ثم نسأله عن (بيع العقد) لشركة لتقوم بالتنفيذ من الباطن؟ ومدى قانونية ذلك؟ والأهم من ده كوووولو بأي حق يقوم (المتنفذان) بالحصول على 34 مليار جنيه دون أي عمل قاما به؟ الغريبة إنو على الرغم من مسؤولية هذا الوزير التامة عن هذه المهزلة إلا إنو عندو كمان نفس (يصرح) .. والله حيرتوووونا ..
كسرة :
سأل المعلم التلاميذ (ما هو أغني بلد في العالم) فأجاب أحدهم (السودان يا استاذ) فدهش المعلم وسألة .. كيف يعني؟ فأجاب التلميذ : يسرقو فيهو جنس السرقة دي وما عايز يكمل !!
• كسرة ثابتة (قديمة) :أخبار ملف خط هيثرو العند النائب العام شنو؟ 80 واو - (ليها ستة سنوات و 10 شهور) ؟• كسرة ثابتة (جديدة):أخبار تنفيذ توجيهات السيد الرئيس بخصوص ملف خط هيثرو شنو؟ 39 واو (ليها ثلاث سنوات وخمسة شهور)
الجريدة


تعليقات 14 | إهداء 0 | زيارات 5893

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1500137 [متحسر]
0.00/5 (0 صوت)

08-08-2016 08:41 AM
حسبنا الله و نعم الوكيل

اللهم ارنا فيهم قدرتك

[متحسر]

#1499214 [مواطن سودانى]
0.00/5 (0 صوت)

08-06-2016 06:31 PM
معليش بدون فوران كدى ناخد نفس
المائل الذى دى لازم المجلس التشريعى يكون فيه لجنه فنيه تشرف على المقاولات دى بالطريقه القانونيه و تكون شركه منفذه و شركه استشاريه و قبل ذلك شركه مصصمه للخرط و الموصفات من ارض الواقع مش من المكاتب المكندشه و الاعتماد على معلومات قديمه
الهم ولى من يصلح

[مواطن سودانى]

#1499109 [عثمان]
0.00/5 (0 صوت)

08-06-2016 12:39 PM
وأزيدك ياأستاذ أبحث عن عقد ترحيل الفحم الحجري من مصفاة الجيلي وحاتشوف العجب , واقع لكوز بسعر ترحيل ضعف سعر السوق ولايملك عربة نقل ويباع للشركات بثلثي التكلفة يعني التمساح بقبض تلت بارد والشركات تستغل الافراد وتبيع بسعر السوق بدون تحريك عربة يشئ بعرفوه اهل النقل اسمه النقل بالعمولة . وانت فاكر الفلل والعربات الجارية دي من المرتب ؟

[عثمان]

#1499106 [Awad Mahgoub]
0.00/5 (0 صوت)

08-06-2016 12:37 PM
يمكن ان ياتى المقاول الرئيسى لاى عمل بن يؤكل الاعمال الى مقاول باطن شريطة ان يكون معتمد من قبل الجهه صاحبة العمل بوجود مكتوب يوضح ذلك وان يعتمد صاحب العمل الاتفاقيه الت تمت بين المقاول الرئيسى ومقاول الباطن ويكون مسئول من تنفيذ الاعمال حسب كراسة المناقصه باشراف الجهه صابحة المل او من تكلفه بمهام الاشراف وتكون كل المراسلات بينهم باسم المقاول ارئيسى للاعمال ويحساب على اى تقصير المقاول ارئيسى لدى جهة العمل

[Awad Mahgoub]

ردود على Awad Mahgoub
[muez] 08-06-2016 01:29 PM
حسب الفيدك لا يجوز توكيل كل الاعمال ل مقاول باطن راجع
كلوس 4.4


#1499099 [ود التوم]
0.00/5 (0 صوت)

08-06-2016 12:10 PM
جيـــــب الحبــــوب يا ولد

[ود التوم]

#1499001 [زول]
0.00/5 (0 صوت)

08-06-2016 07:17 AM
بعد دا يقولوا ليك اذا مافي مستندات ما تتكلم
دي قضية فساد واضحة ويجب ان يحكم عليهم بالإعدام
لانه فساد في الارض

[زول]

#1498780 [واحد والسلام]
0.00/5 (0 صوت)

08-05-2016 10:46 AM
وبالارقام كمان ياخ قعدتكم كانت حلوه جد "اللهم لاحسد"

[واحد والسلام]

#1498709 [كاسـترو عـبدالحـمـيـد]
0.00/5 (0 صوت)

08-05-2016 03:35 AM
يا استاذ/ الفاتح والله يفتح عليك وعلى اولادك , موضوع السدين هذا خطير جدا وعايز كسرات انا فى اعتقادى سوف تتفوق على كسرات مطار هيثرو و اظن كمان وان بعض الظن اثم , ما يقدر عليه الا سيدنا "ذو القرنين " . وانا استغربت لماذا لم تطلب من الولد يناولك الحبوب مع انه موضوع خطير مثل هذا يحتاج لطلب الأسعاف و لدخول المستشفى فورا . ولا الظاهر الحبوب خلصت ولا شنو ؟

[كاسـترو عـبدالحـمـيـد]

#1498599 [رحال]
0.00/5 (0 صوت)

08-04-2016 07:16 PM
كما ليس لديها أي معدات (ولللا كوريك وااحد) ولا يوجد بها مهندس واااحد ..

هههههههههههههههههههههههههههههههههههههه

من اكثر المقالات سخرية
تسلم استاذنا

دا والي غرب كردفان العمل ورشة لمناقشة تشييد البيت حقه ؟؟

[رحال]

#1498576 [نزار مهدي]
0.00/5 (0 صوت)

08-04-2016 06:11 PM
كدى لو اتخيلنا الخليفة الراشد عمر بن الخطاب رضى الله عنه لو قدر ليهو انو يحضر العبث ده كان عمل شنو ؟ اكيد كان قطع ايادى العابثين ديل ورفد الجماعة ديل كلهم وعمل وعمل ، اذا كان الخليفة الراشد لم يقبل على ولدو مجرد الشبهة فى الحرام من بعيد . طيب يا خليفة المسلمين عمر البشير وين انتا من العبث الحاصل ده نحن كلنا فى رقبتك لابحلك تكريم ولافنلة .. حسبنا الله ونعم الوكيل

[نزار مهدي]

ردود على نزار مهدي
[كاسـتـرو عـبدالحـمـيـد] 08-05-2016 03:40 AM
كلامك صاح يا سيد/ نزار مهدى ونحن ما عافيين للبشير دنيا وآخرة وربنا يورينا فيه يوم فى الدنيا قبل الآخرة ليكون عظة لم يأتى بعده .


#1498569 [abdulbagi]
0.00/5 (0 صوت)

08-04-2016 05:46 PM
يا استاذ هذا الموضوع ما فى داعى لنشره بدون ذكر اسماء يعنى استفدنا شنو , اذكر الاسماء والرهيفه اتنقد

[abdulbagi]

ردود على abdulbagi
[تمام] 08-05-2016 08:09 PM
السد في ولاية غرب كردفان
محلية الاضية
سد مربوتة
حكومة الولاية هي المسؤولة.
تحياتي


#1498566 [abdulbagi]
0.00/5 (0 صوت)

08-04-2016 05:41 PM
اذا الوزير نفسه صرح لماذا لاتذكر انت الاسماء حتى يعلم بها الجميع ولايكون هناك مجال لا حد ان ينكر .كما تفعل الصحف فى بلاد الكفر . الصحف فى بلاد الكفر اسقطت رؤساء

[abdulbagi]

ردود على abdulbagi
[تمام] 08-05-2016 08:10 PM
السد في ولاية غرب كردفان
محلية الاضية
سد مربوتة
حكومة الولاية هي المسؤولة.
تحياتي


#1498458 [mustafa]
0.00/5 (0 صوت)

08-04-2016 02:07 PM
يا سيد كسرة
من خلال مطالعتى لمقالاتك ما عندى شك فى رجالتك
لكن فى الموضوع ده تريت ورا
كدى اخد نفس و نورنا بالاسماء عديل كدى

[mustafa]

ردود على mustafa
European Union [زهلة محمد احمد] 08-04-2016 09:06 PM
كان جات على الرجالة اكتب اسمك الحقيقى مربع


#1498434 [abu hussain]
0.00/5 (0 صوت)

08-04-2016 01:29 PM
الله يديك الصحة والعافية أخوي الفاتح . الناس ديل شغالين شغل شديد للبلد ماشاء الله عليهم . عشان كدة كل يوم عمارة قايمة في الخرطوم بتاعت وزير ولائي او معتمد .ليكم يوم يانس السلطة لو ما في الدنيا في الاخرة أكييييييييييد . لكن يا أخوانا الريس وين من ده كلووووووووووووووو ووزير العدل البتوسط لاطلاق الحرامية وين . وجعة قلبنا يا الفاتح أخوي والى الملتقى في وجعه تانية.

[abu hussain]

ردود على abu hussain
[tango] 08-04-2016 04:08 PM
هو الريس فاضى من من استلام الاقمصة ووشاحات العزة والكرامة الافريقية والعربية وتحدى المحكمة الجنائية .الجل جدولة مزحوم شديد


الفاتح جبرا
الفاتح جبرا

مساحة اعلانية




الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة