ملعوبة وكده !
08-17-2016 12:44 PM




جاء بالزميلة (آخر لحظة) بعددها الصادر يوم الأحد 14 أغسطس الخبر التالي (شرعت حكومة ولاية الخرطوم فى التحقيق فى صفقة إستيراد قطارات بقيمة 42 مليون دولار، والمحت مصادر مطلعة لـآخرلحظة الى وجود مخالفات فى عملية إستيراد القطارات التى يبلغ عددها (6) والتى نفذتها إحدي شركات القطاع الخاص، وقالت المصادر أن قيمة الصفقة تم دفعها بالكامل وبسعر مضاعف، وأشار الى أن تلك القطارات التى تتكون من (3) مقطورات وقاطرة تقبع حاليا بإحدي مخازن السكة حديد ببورتسودان بعد أن تحفظت حكومة ولاية الخرطوم الحالية إستلامها ،وزاد" والان تكلفة تخزينها عالية بجانب تكلفة التشغيل حتى يتم الحفاظ على البطاريات" ، وأردفت المصادر الى أن المخالفة تكشفت بعد أن شرعت هيئة السكة حديد فى إستيراد قطارات من ذات المصنع وبنفس المواصفات وتتألف من (6) مقطورات وقاطرتين وبسعر أقل من قيمة الصفقة بكثير، مشيرة الى أن تلك القطارات كان مقرر لها أن تدخل الخدمة فى فبراير من العام الماضي. (إنتهى) ...
عزيزي القارئ تعال معي نقف في كل نقطه إحتواها هذا الخبر :
• إستيراد القاطرات تم تنفيذه بواسطة إحدى شركات القطاع الخاص .. يعني لا عطاءآات لا بطيخ لا شفافية !
• الصفقة قيمتها (42) مليون دولار تم دفعها للشركة بالكااامل وكمان بسعر مضاعف ( مضاعف ليه ما تعرف؟)
• هنالك وجود لمخالفات فى عملية إستيراد القطارات (طبعن شيء متوقع في ظل إنعدام الشفافية ) !
• (3) مقطورات وقاطرة تقبع حاليا بإحدي مخازن السكة حديد ببورتسودان بعد أن تحفظت حكومة ولاية الخرطوم الحالية إستلامها (حلوة تحفظت دي !! يعني متوقعين شنووو؟ هو الشراء ذاااتو تم بالطرق الرسمية .. قال أيه تحفظت)
• والان تكلفة تخزينها عالية بجانب تكلفة التشغيل حتى يتم الحفاظ على البطاريات" (أها الخسارة دي البيدفعا منووو) ؟
• المخالفة تكشفت بعد أن شرعت هيئة السكة حديد فى إستيراد قطارات من ذات المصنع وبنفس المواصفات (طيب دي المرة الأولى ما جبتوها براكم مالكم وأديتوها لى شركة قطاع خاص ليه ؟؟)
بلد ما عندها وجيع .. كل يوم فساد وهبر ولهط في حتة (غير) .. يوم في المؤسسة الفلانية ويوم في المؤسسة العلانية .. يوم في الهيئة العلانية ويوم في الهيئة الفرتكانية .. يوم في الجهاز الفلاني ويوم في الجهاز العلاني .. شيء عجيب .. أيه (اللبع) البدون رأفة ده ؟ وفين القوانين واللوائح والمحاسبة .. وفي النيابة والقضاء والمش عارف أيه؟ هي خلاص القصة هاصت للدرجة دي والضرب بقى (في كل مرفق) بملايين الدولارات ؟ فين (القوى الأمين) ؟ ووين (لا لدنيا قد عملنا)؟ أيه القرف ده؟ ما معقول البلد تكون مستباحة بالشكل ده ومافيش مسؤول واحد يقدم للقضاء .. ده فساد غير مسبوق على مرأى ومسمع من كل المسؤولين الكبار في البلد وقدام كافة الأجهزة العدلية .. هل أصبح الفساد هو الأصل والنزاهة هي الإستثناء؟ الناس البتنهب دى جات من وين؟ البلد دي ما فيها (ناس بطالين) كتار بالحجم ده؟ معقولة الفساد يشمل حتى مؤسسات ليها قدسيتها كالحج والعمرة والأوقاف وديوان الزكاة ؟ والله ده كلام أغرب من غريب ... الناس دي الله ما بتخافو؟ لا وأيه .. كلما يظهر فساد يقولوا ليك (كونا لجنة تحقيق) .. والموضوع (يندفن) على طووول .. مافيش لجنة تحقيق واااحدة (طلعت ليها) أي مخرجات أو تقارير .. بعدين قصة لجان التحقيق في ما يختص بالجرائم الجنائية دي ما أدونا ليها .. مافي حاجة إسمها لجنة تحقيق في زول متهم بلهط أموال الشعب المسكين ده .. في (فتح بلاغ) وتحقيق وتوجيه تهمة ومحاكمة .. وبينات .. يا براءة يا إدانة !
بالله عليكم شوفو هسه الكلام الفوق ده؟ الحكومة عاوزة تستورد قاطرات تقوم تدي الموضوع لشركة قطاع خاص؟ ليه؟ هي ما بتقدر؟ محننة؟ ما عندها إمكانيات؟ ما أهي عاوزة المرة دي تستورد براها؟ طيب المرة الأولى الحصل فيها (اللعب) ده ما إستوردت براها مالا؟ طبعن عشان يحصل الحصل ده .. عشان (جهة ما) تكاوش على ملايين الدولارات دي ... يعني المسألة ملعوبة وكده ..!!
كسرة :
كونتو للقاطرات دي لجنة تحقيق وللا لسه ؟!!! هههههههههههه هات الحبوب يااا ولد !!
• كسرة ثابتة (قديمة) :أخبار ملف خط هيثرو العند النائب العام شنو؟ 80 واو - (ليها ستة سنوات و 10 شهور) ؟�• كسرة ثابتة (جديدة):�أخبار تنفيذ توجيهات السيد الرئيس بخصوص ملف خط هيثرو شنو؟ 39 واو (ليها ثلاث سنوات وخمسة شهور)
الجريدة


تعليقات 15 | إهداء 0 | زيارات 6848

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1506246 [awad alkareem Ahmed]
0.00/5 (0 صوت)

08-18-2016 05:12 PM
هذه بذات مفروض يدخل فيها السيد الريئس شخصيا ويحكها مع الجماعه على الاخر ، ياسيدى الريئس ما يحصل من جماعتكم الله لا يرضاه وانت مسئول امامه عن هذا الهبر الواقعين فيه جماعتكم ، ومافى زول خائف لا من الله ولا منك - لا اعتقد ان هذا يرضيك كل المطلوب منك الا تكون لجنه وتشوف الموضوع ده وبقية الهبر بى نفسك- لو كونت لجنه لضاعة القضيه كالاقطان والزكاة والحج والعمره ووووووووووووووووووxx فى مليار - سيدى الريئس حصل ما تبقى فقد بلغ السيل الزبى ناس لا تخاف حساب الدنيا لانه ليس هنالك من يحاسبهم ولكن هنالك من لهم بالمرصاد يوم تلتف الساق بالساق وهو ليس ببعيد

[awad alkareem Ahmed]

#1506164 [عكر]
0.00/5 (0 صوت)

08-18-2016 02:49 PM
اشان تاني تقولوا حكومة عسكرية ... اها حكمهم استمر لاكثر من ربع قرن و في النهاية ... الحصل شنو شعب مشوه و اقرب الي العبودية ..!!! و ما زال اصحاب العقليات الرجعية يرهنون الامور للرجال و طلب صلاحهم ...!!!
يا ناس اصحوا ما في زول ممكن ترهن عليه الصدق و الشفافية و عدم الحرمجة ... و ما حنتكلم و نتفلسف و نقول فقط النظام الديموقراطي يمكنه ان يكشف و يحاكم الفاسدون و هو القربال الذي يسقط كل الحرامية و الغير مواهلين و يعمل علي تصفية الاجواء السياسية يفضي الي اقتصاد و كرامة للبشر ... بس الكلام دا نحن ما قدروا لان القصة مربوطة بحاجتين (الاخلاق) و (الزمن الطويل) ... الاولي اشك في توفرها الان ... و التانية يعني لو وضعنا اساس للديموقراطية و توفرت الاخلاق و شدينا حيلنا ... الامور بتتظبط لاولادكم او الاحفاد .. يعني برضو ... الانانية تعمل علي غير ذلك ...!!!
باختصار ما عندكم حل غير انتظار القيامة و سماع كلام شيخي و شيخك و الاصتفاف خلف الرجال و العادة القديمة و الدروشة الدينية .... يمشوا الكيزان و يجيك الزعفران... !!! و هاكذا دواليك ....!!!
و شكرا عمنا (جبرا) .. منشط ذاكرة السمك.....!!!

[عكر]

#1505950 [Amani]
0.00/5 (0 صوت)

08-18-2016 09:13 AM
لاتعليق حسبي الله ونعم الوكيل

[Amani]

#1505913 [ود يوسف]
0.00/5 (0 صوت)

08-18-2016 08:18 AM
السؤال الأهم والأخطر : لماذا لم يكتشف الفساد إلا بعد شراء الدفعة الثانية من القطارات واتضاح السعر الحقيقي ؟؟؟ هذا يعني أنه ليس هناك رقابة ولا مراجعة ولا يحزنون ... إنما تم اكتشاف اللعبة بالصدفة فقط !!!

[ود يوسف]

#1505898 [الحلومر/خريج الابتدائية]
0.00/5 (0 صوت)

08-18-2016 07:52 AM
يا ناس الجزيرة مدني قطاركم المكندش اتلحس

[الحلومر/خريج الابتدائية]

#1505873 [الداندورمي.]
0.00/5 (0 صوت)

08-18-2016 07:12 AM
لبع بدون رحمه ههههههههه أم دلدوم .

[الداندورمي.]

#1505842 [منصورالمهذب]
0.00/5 (0 صوت)

08-18-2016 05:21 AM
خوفي عليك بعد الحبوب الحقن! يالطيف !
يا راجل اعتبر الحكاية مسلسل تركي و اتكل على الله.

[منصورالمهذب]

#1505805 [خليل ابراهيم]
0.00/5 (0 صوت)

08-18-2016 01:30 AM
مع قطارات الاستاذة هند ومع كسرات الفاتح جبرة نقول:
القطر الدايرو انتا يتكسر حته حته وتسلم لينا انتا.
بالمناسبة سمعنا انو بشة ماشى فنزويلا قطر مرة نجيب يودى ما يجيب.

[خليل ابراهيم]

#1505768 [adilnugud]
0.00/5 (0 صوت)

08-17-2016 10:42 PM
الفساد ليس ذنب شركة تبحث عن الربح ....................
الفساد نابع من الذين وقعوا لتلك الشركة لاستجلاب تلك القاطرات ..........
لو اتبعوا الطرق الصحيحه لما جرى الذي جرى ولكن النيه مبيته للفعل...........
دي مسرحية يعلمون نهايتها والفاسدون والمجرمون لن يصيبهم شئ..................
دي حالة والي يريد ان يضع استراتجيه لولايته وبي عمليه واحده تنهار كل الاستيراتيجيات الموضوعه نسبة لانها تعني السرقة في المستقبل كيف تتم وماذا يجنون منها وليس تطوير.................................

[adilnugud]

#1505601 [عبدالواحد المستغرب اشد الإستغراب!!]
0.00/5 (0 صوت)

08-17-2016 04:20 PM
يا مولانا الشيخ الفاتح جبره نحن بنقرا ليك ومصنفنك مع الصحفيين اللماحين الازكياء ويا للأسف طلعنا كلنا (كِيَشَه كَيَاشة التابانى) وعمرنا ما سألناكم عن الحيثيات البيخلى النظام سايب ليكم في جريدة (الجريده)بالذات الحبل على القارب وبالذات في الوقت ده؟!! النهب ما ياهو نفس النهب من قبل 27سنه والجَده شنو خلاف مداراة النظام بقدر ما يقدر على الفضائح او تكذيبا في الماضى؟!! يا اخى ماتركزوا معانا شويه وأسألوا نفسكم الجديد شنو؟ وليه في الوقت ده بالذات؟!! جرائدكم كانوا بيعطلوها إذا ما قلتوا النظام كلام (سمح ساكت) وما لاقت عندهم إستحسان او كانوا بيخطعوها لنظرية (الفى بطنو حرقص) والكلام القاعدين نقراهوا ليكم الأيام دى في وقت مضى كان كافى لتعليقكم كما الشرموط اة إجلاسكم علي كرسى كهربائى !! يا جبرا خد عندك الوصفه دى (مش فوق رقبتك شى إسمو راس؟ وفوق سطح الراس حاجه إسمها عمه حسب ما ظاهر لنا في الصوره طيب بين الاتنين ديل مش في حاجه كده مكعبه حاول مجرد محاوله تتخيل الجواهو شنو؟ واكيد حتعرف!! بليس بالانجليزى فلو سمحت ولو تكرمت وبعد إذنك وارجوك وابوس الاقدام بلغتنا الجميله حاول ولو مره تشغل النعمه التحت تحت العمه والقاعده فوق الرقبه النعمه الربنا وهبنا ليها!!وضرورة تقليب الآمور ونقول كان ما كده نعمل كده مش نبقى زى القطارات المخزنه في بورتسودان التي لا يمكن أن تسير إلا على خطى حديد صلب لا تحيد عنهما قيد أنمله!!.

[عبدالواحد المستغرب اشد الإستغراب!!]

ردود على عبدالواحد المستغرب اشد الإستغراب!!
European Union [DELETE] 08-18-2016 03:48 AM
قبل ايام مضت ابدى اخونا عبد الواحد ملاحظه مهمه جدا وهي (ان هناك قضايا تثار في لحظات حاسمه لتغطي علي حدث اكبر )فكل ما مرت الحركه الشيطانيه بزنقه مزلزله عمدت لاخراج ملهاه صارفه للانظار عما هو اكبر ...
بعد تصريحات الترابي المزلزله صرفت الانظار بقضيه اليسع
والان فشل اديس ابابا صرفت الانظار بقضيه القطارات


#1505577 [Almisahir fi izallail]
0.00/5 (0 صوت)

08-17-2016 03:27 PM
الاعرابى داهمته عصابه فى الباديه واخذت منه الجِمال ومعاها النوق العصافير بما حملت فى بطونها وافخاذها وما على الخوايا وما فى سناماتها من مياه عذبة هى كالاحلام فى تلك الفيافى والقفار. دا طبعن اضافة الى ما على ظهورها من مال وهدايا مرسلة من مفرّج بن همام الى عبله بنت مالك اللى ما يتزوجها الآ امثال الاميير مفرج بن همّام
* عاد الاعرابى الى اهله يتمطى وفضل يحكى فى القصه بالتفصيل ويعيد ويكرر ما حصل بالضبط..
بعد زمان من بداية الحكى سأله قومه مضدا فعل بعد ذلك فقلل :
"اوسعتهم شتما واودوا بالابل ".. اها كمان يعنى المعنى. الانقاذ دى ما خلّيتو ليها صفحة ترقد عليها وليس فى جِلْدها ( اللى هو من جْلْد الامام الحبيب الرمز اللى ما عاوز يجُر فوقو الشوك)موضع الآ وبه اََضعاف اضعاف اَلاَضعاف من شتم الاعرابى ..وهى منذ 27 سنه قد اودت بالابل !

[Almisahir fi izallail]

#1505531 [جنرال زمان]
0.00/5 (0 صوت)

08-17-2016 02:45 PM
كلهم حرامية أولاد ستين كلبة

[جنرال زمان]

#1505517 [قساس فادي]
0.00/5 (0 صوت)

08-17-2016 02:15 PM
بالله قول ليهم ما يكونو لجنة ما عايزين خسائر ذيادة ..... والله كيف

[قساس فادي]

#1505489 [صالح عام]
5.00/5 (1 صوت)

08-17-2016 01:46 PM
يا استاذ جبره الموضوع ب الكامل منشور فى الراكوبه اليوم وكل الحراميه ذكرو ب الاسم كمان

[صالح عام]

ردود على صالح عام
Sudan [الزين] 08-17-2016 11:51 PM
يعني انت لغاية هسع ماعارف الأستاذ جبرة خواف وقلبه خفيف..

يخاف من ضـلو..


#1505476 [السمري]
5.00/5 (2 صوت)

08-17-2016 01:34 PM
قرررررربت تطعن في الفيل - لكن شايف لي ملاوزة بسيييطة
لو استمريت بطريقتك دي سنة 2023 حتطعن في الفيل
عليكم الله يا جبرة ماااا بتخجلوا من عثمان شبووونة - الشفت داك مااا عندو لف و دوران - ربنا اداهو ناصية القلم و بيستعملوا كرباج ضد كبير الفسدة و الحرامية عمر البشير و انتوا ربنا اداكم برضوا ناصية القلم بتونسونا بيهو ؟؟؟
يا راجل معقولة انت ما عارف راعي الفساد منووو؟؟؟

[السمري]

الفاتح جبرا
 الفاتح جبرا

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة