الفيهم مكفيهم !!
08-19-2016 02:37 PM

لن تكن حادثة الإعتداء (البدني واللفظي) التي تعرضت لها مؤخراً الطبيبة (إسلام أحمد منير) التي تعمل (نائب أخصائي) بمستشفى البان جديد من قبل افراد من القوات النظامية هي آخر حوادث الإعتداء على الكوادر الطبية بالمستشفيات إذ أن المسألة الظاهر (بقت موضة) فقد تم من قبل إعتداء (نظامي) على طبيبة بمستشفى وادي حلفا وأخرى (ميسون عادل) بمستشفى الخرطوم ورابعة (تقوي ياسر) بمستشفى ساهرون بل لقد سجلت محاضر الشرطة حادثة اطلاق نار على طبيب من قبل أحد افراد القوات النظامية بمستشفى الخرطوم بحري !
تصاعدت حوادث الاعتداء على الاطباء بالمستشفيات العامة في الآونة الاخيرة وبصورة لافتة و(مقلقة) إذ يبدو أن من يقومون بهذه الأفعال الهمجية يعلمون قصور القوانين والاجراءات المتبعة لحماية الاطباء والممرضين اثناء تأدية عملهم والقيام بواجبهم .
إن الطب مهنة انسانية سامية هدفها التخفيف من معاناة الناس وآلامهم ، والطبيب (عندنا) يعمل في ظل ظروف صعبة للغاية إبتداءاً من رداءة البيئة (غير الصحية) في المستشفيات وإنعدام الأجهزة والمعدات الضرورية وإنتهاء بالرواتب (التعبانة) التي لا تكفي (المواصلات والفطور) ! وعلى الرغم من ذلك نجدهم يعملون الساعات الطوال في مساعدة المرضي وتخفيف أوجاعهم دون كلل أو ملل.
مما لا شك فيه إن تزايد هذه الظاهرة بهذا الشكل غير الطبيعى يساهم في عدم تمكين الأطباء من ممارسة دورهم الإنساني في علاج المرضى نتيجة لعدم شعورهم بالأمان ، ان الاعتداء على الطبيب هو اهانة وانتقاص من هيبة المهنة وجلالها ويسيء لها أيما إساءة فيجب أن يعي كل مرافق او مريض حدود تعامله مع الطبيب أو الممرض او اوالموظف ، كما يجب وضع ضوابط تنهي هذه الحالة من الفوضى التي تحدث مثل هذه الإعتداءآت .
إن الاعتداء على الطبيب (أو أي من الكوادر الطبية) أمر لا يمكن تبريره بأي حال من الأحوال وصورة (غير حضارية) ولللأسف الشديد إن أغلب هذه الإعتداءآت قد تمت من قبل أشخاص يتبعون للقوات النظامية (ما حكومة وكده) ، والغريب في الأمر إن مسألة الضرب والعنف وتوجيه الاهانات طالت حتى (الطبيبات) على الرغم من أن مجتمعنا يعد ضرب (الحريم) ليس من شيم (الرجال) .. لكن الظاهر إتطورنا للأسوأ !
العبدلله يعتقد بداية ازالة اسباب الاشتباك والتشاجر بتنظيم العمل داخل المستشفيات (وخاااصة الحكومية) .. ما معقول أهل المريض يدخلوا معاهو (أي حتة) ! فالملاحظ أن كل هذه الإعتداءآت تحدث من قبل مرافقي المرضى لذلك يجب ايجاد منظومة جديدة داخل المستشفيات الحكومية تشمل طريقة دخول المراجعين والمرضى وذويهم الى المستشفى بصورة تمنع احتكاكهم المباشر بالكوادر الطبية وتلزمهم بالبقاء بغرف الانتظار (لو في غرف!)

إن مسألة الإعتداء على الأطباء داخل المستشفيات باتت تشكل ظاهرة شاذة وغريبة عن مجتمعنا (المسالم) الذي ينبذ (العنف) ويراعي حميد الأخلاق ويحرص على المعاملة الحسنة .
نحن ندرك ان الدولة غير قادرة على تعيين (شرطي) لكل (طبيب) من اجل حمايته كما ندرك أيضاً أن هذه الظاهرة لا يمكن ان تنتهي او تتلاشى بصورة كلية ما لم تقم الجهات المعنية بوضع قوانين خاصة تحمي (الكوادر الطبية) لتستمر في أداء واجبها الانساني المميز دون أي مضايقات فـ(الأطباء ديل الفيهم مكفيهم) .
تنبيه :
عزيزي المواطن (كن حضارياً) .. من حقك التقدم بشكوى قانونية لوزارة الصحة ونقابة الاطباء اذا تعرضت (أو أحد ذويك) لسوء معاملة او اهمال من قبل اي طبيب ..

كسرة :
إذا القصة إستمرت نطالب بوضع مادة (التاكندو) ضمن مقررات كليات الطب !

• كسرة ثابتة (قديمة) :
أخبار ملف خط هيثرو العند النائب العام شنو (وووووووووووو)+وووووووووووو)+ (وووووووووووو)+(وووووووووووو)+(وووووووووووو)+ (وووووووووووو)+و+و+و+و+و+و+و+و+(و)+و

• كسرة ثابتة (جديدة)
أخبار تنفيذ توجيهات السيد الرئيس بخصوص ملف خط هيثرو شنو(وووو وووو وووو)+(ووووووووووووو) +(وووووووووووو)+و+و+و+(و)+و

• كسرة جديدة لنج :
أخبار (أجهزة التصنت عالية الدقة) التي إستخدمت في غش إمتحانات الشهادة السودانية لسنة 2016 يا وزيرة التربية شنو (و)+(و)+(و) +و؟


تعليقات 16 | إهداء 0 | زيارات 6667

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1507628 [الرشيد عثمان]
0.00/5 (0 صوت)

08-21-2016 03:01 PM
أمس السبت الساعة 5 مساء
المكان : مستشفى أحمد قاسم - حوادث الأطفال
عنبر التنفس -الصدرية
كل الممرضين المسئولين عن العنبر ما موجودين وكل طفل عندو جرعة أبوهو شايلو وبفتش في الممرضين
الدكتورات المحترمات ملائكة الإنسانية قالن نحن بنكتب التعليمات والممرضات هم البتابعو
المدير الطبي سيادتو قال أنا جيت الساعة أربعة ولقيتم مشو من الساعة تلاتة قبل ما يسلمو الوردية التانية
طيب عملت شنو ؟؟؟؟؟
قال بضرب ليهم في التلفونات وما بيردوا
الناس بقت تحنس في الممرضين الشغالين في العنابر التانية ويضحكو ويقولو للناس أمشو للمدير الطبي
عليك الله يا جبرة ديل موش يستاهلو الضرب
لو الشغلة ما نافعة معاهم يقدمو إستقالاتهم ويمشو . لأنو الأجر مقابل العمل وللا ما كدة
مهدى لوزير الصحة الولائى مامون حميدة

[الرشيد عثمان]

#1507604 [khalid]
0.00/5 (0 صوت)

08-21-2016 02:41 PM
(ديل مش يستاهلو الدق)

صحيفة الرأى العام
الجمعة الموافق 15 يونيو 2007
موقع الكاتب : www.alfatihgabra.com

المكان : غرفة قسم الحوادث بأحدى المستشفيات (الحكومية) بجمهورية (الأمازون) وتحديدا فى العاصمة (أمازونيا)
الزمان : الساعة 12 منتصف ليل الخميس ( أى خميس)
الكادر : 4 أطباء حديثى التخرج يعملون فى (نبطشية) الليل ( هيثم ، تامر ، رندا ، هاله)

على الرغم من أن (الدنيا آخر ليل) إلا أن المستشفى وخاصة قسم (الحوادث) يعج بالمرضى والمرافقين والذين إصيبو فى حوادث مختلفة ، يدخل مجموعة من (الناس) يبدو أنهم من عائلة واحدة وهم يضعون شاباً على (نقاله) قالت إحدى السيدات وهى تمسح الدمع من عينها تخاطب (دكتور هيثم) :
- والله (عماد) أخوى ده عندو (نفسيات) ليهو مده عشان إتخرج ليهو (عشرة سنين) وما لاقى ليهو شغل .. والليلة دخلنا أوضتو لقيناهو حاول ينتحر !!
- حاول ينتحر بى شنو؟
- والله ما عارفنو بس لقيناهو كاضم جنس (الكضمة) دى !!
- طيب بس لو سمحتو تطلعوهو معانا فى (الكنبة) بتاعت الكشف دى عشان نكشف عليهو ؟
- (بعد أن تم وضع المريض) : خلاص بالله لوسمحتو بس زحوا لينا شويه من هنا
ثم بعد أن زح أهل المريض وقفت (مجموعة الأطباء) حوله :
- هسع (الشاب) ده نفوقو كيف؟ مفروض نعمل ليهو طبعا أول حاجه resuscitation (يعنى إعادتو لوضعو الطبيعى) !!
- يعنى كيف نرشو بى موية بارده ولا نشممو بصلة؟
- دقيقة النتذكر .. فى حاجه كده بسووها فى الحالات دى أدونا ليها فى سميستر 8 ... و
- أنا ذاتى كنت متذكراها والله !!
- أنا بفتكر إنو نكسب الزمن ونتصل بى دكتور (كمال) الإستشارى
يمسك (هيثم) بالموبايل ويتصل :
- آلو دكتور كمال ... إن شاء الله كويس يا دكتور
- الحمد لله ..(منزعجاً) معاى منو؟ فى شنو؟
- لا مافى حاجه يا دكتور .. معاك دكتور هيثم (الطبيب المناوب) فى قسم الحوادث
- إن شاء خير فى شنو عندكم؟
- والله يا دكتور عندنا حاله كده ما قدرنا نتعامل معاها
- حالت شنو يعنى؟
- والله يا دكتور عندنا مريض جابوهو لينا (كاضم) .. قالو كان عاوز ينتحر !!
- عاوز ينتحر بى شنو؟ صبغة؟ حبوب؟ شنو؟
- والله أهلو قالو بس كان عندو (نفسيات)
- ما طبعا عاوز ينتحر أكيد عندو (مشاكل ونفسيات) أنا بسأل عن طريقه محاولت الإنتحار كانت شنو؟
- والله يا دكتور مافى زول عارف!
- طيب ما تعملو ليهو (ريسسيتإيشن) resuscitation
- يا دكتور نحنا (الريسسيتإيشن) ده عارفنو لاكين بسووهو كيف؟
- معقولة إنتو ما عارفين تعملو للمريض (resuscitation) ؟ إنتو درستو فى الكلية شنو؟
- لكن يا دكتورالكلام ده درسناهو قبل 4 سنين عاوزنا نتذكرو هسع ؟
- طيب خلاص اعملو ليهو CPR ولا كمان ما عارفنها برضو؟
- هو أنخنا عرفنا ديك يا دكتور عشان نعرف دى ؟ كدى دقيقه يا دكتور
يلتفت إلى (هاله) هامسا :
- إنتى يا دكتورة (هالة) بتعرفى تعملى CPR
- دى مش بتاعت الزول (يضغطو) ليهو (صدرو) ويعملو ليهو (تنفس) ديك !!؟
- هو يعنى أنا عارف ؟؟ كدى نسأل ونتأكد من دكتور (كمال)
يمسك بالموبايل مجددا :
- يا دكتور والله ذى الإتذكرتها ، الـ CPR دى مش بتاعت الزول (يضغطو) ليهو (صدرو) ويعملو ليهو (تنفس) ديك !!؟
- أيوااا عليك نور
- طيب يا دكتور خلاص شكرن ليك كتير !!
(هيثم) يلتفت نحو البقية :
- يلا خلاص نعمل للشاب ده الـ CPR القالا دكتور (كمال) دى !!
- إنتى يا دكتورة (رندا) أمسكى (الضغط) وإنتى يا دكتورة (هاله) أضغطى على (الصدر) وإنت يا دكتور (تامر) دخل ليهو الأنبوبة
- وإنت سعادتك ح تقعد متفرج مش كده ؟
- لا أنا ح أمشى أجيب ليا ليهو مهدئ !!
(تامر) يحاول إدخال الانبوب فى فم المريض وينفخ وفى كل مرة يكتشف أنه ينفخ فى (المعده) وليس (القصبة الهوائية) فيخاطب (رندا) :
- كدى بالله أمسكى ليا حنك الزول ده كلما أمسكو (يتزلق) منى - ثم فى ضجر- هو بالله ما لقى يحاول ينتحر إلا فى (نبطشيتنا) دى !!
- أها كده يا (رندا) الأنبوبة دخلت .. كدى يا (هاله) أمسكى ليهو (النبض) شوفيهو ح يطلع كم؟
- لكن يا (تامر) أنا ما بتذكر الطريقه البيقيسو بيها (النبض) .. غايتو بتذكر إنو فى طريقه كده الزول بيعرف بيها إنو (الدقيقه) أنتهت .. حاجه كده ذى.. ون.. تو .. ون .. تو .. ون .. تو
-(فى تبرم) : إنتى قايله نفسك فى إختبار ما تعملى أى حاجه وتخلصينا !!
- عليكى الله يا (رندا) بتتذكرى زمان قالو لينا لمن نجى ناخد (النبض) بنقول شنو؟ - أفتكر إنو مفروض (تدقى) التربيزه كده (وهى تشرح لها عملياً) : .. ون ..طق .. إتنين ... طق ... تلاته .. طق لحدتما تحصلى (60 طق) تكون الدقيقه كملت !!
- (فى تبرم شديد) : طق .. بق ... بس خلصونا !!! - ثم فى زهج- هو بالله الزول ده ما لقى يحاول ينتحر إلا فى (نبطشيتنا) دى !!
فى هذه الأثناء يدخل (هيثم) يحمل فى يده (حقنه) :
- زحو زحو يا شباب .. أنا ح (اصحيهو ليكم) أنا جبت ليهو حقنت بيثيديين pethedine ..
-(الممرضه تلحق به) : لا.. لا .. يا دكتور
- مالك فى شنو؟
- (البيثيديين) ده يا دكتور )مسكن للألم( وهو يا دكتور ما عندو ألم هو عندو (كوما) دلوقتى
- يعنى شنو؟
- يعنى الزول ده كده ما محتاج هسع لى (البيثيديين) ده وإحتمال يعمل ليهو (مضاعفات) عشان هو فاقد الوعى !
- والله الممرضه دى شكلها كده فاهمة ِأكتر مننا حقو نخلى ليها الكيس case ده يا (هيثم)
ونخارج روحنا من الموضوع
- على كيفكم خلوهو ليها
- (يلتفت للممرضه) : خلاص أنا ما ح أديهو حقنت (البيثيديين) إنتى شوفى تديهو شنو؟
- خلاص يا دكتور أكتب ليهو أدميشن (تنويم) عشان نوديهو نرقدو فى العنبر بعدين
(فى هذه الأثناء يدخل شرطى وهو يمسك فى يده ببعض الأوراق) :
- الزول العاوز ينتحر ده جاكم هنا !!
- يجينا كيف يعنى وهو كان عاوز ينتحر؟
- لا أنا بقصد جابوهو ليكم هنا
- أيوه
- طيب ليه ما حولتوهو لينا عشان نعمل ليهو أورنيك 8
- نحول ليهو شنو ؟ هو كاضم وفى غيبوبة !!
- خلاص لمن يصحى نحنا عاوزنو عشان نفتح ليهو (بلاغ إنتحار) !!

الساعه الواحدة والنصف :

يدخل شاب فى العشرين من العمر وهو يتكئ على رفيقه وما أن يصل إلى حيث يجلس دكتور (هيثم) حتى يبادره :

- لو سمحت يا دكتور أنا عندى جرح فى رجلى وجيت أمبارح هنا لقيت الدكتور الكان (مناوب) أمبارح وقام طهر لي الجرح وأدانى حقنة ولف ليا الجرح بى قطن وشاش وقال ليا تعال لينا بكرة عشان نغير ليك ونديك حقنة تانى
- طيب أنادخلني شنو؟ انا قلت ليك تعال يعني
- لا ما هو أصلو الـ
- عارف عارف عاوز تقول ليا الدكتور الأمبارح وشنو وشنو مش كده ؟ بس أنا بفتكر بدل التلتلة دى والتعب ده كان تمشى أى مستوصف من المستوصفات الكتيرة المالية الدنيا دى يغيرو ليك ويدوك الحقنه !!
- لا أنا جيت هنا عشان عندكم قسم للسكرى!!
- والسكرى دخلو شنو؟
- ما لأنو أنا عندى سكرى !!
(هيثم ينادى البقية .. يقفون حوله فى شكل دائرة يتهامسون ثم يتجه هيثم للشاب مرة أخرى ) :
- كدى ورينا الجرح ده (يفك الشاب الأربضة والشاش ويريه الجرح)
- عندك (سكرى) ومجروح قدر ده ؟ ما بالغت عاد لكن؟
- هسع يعنى نعمل ليك شنو؟
- حقو نتصل فى دكتور (كمال) الإستشارى
- ح يكون نائم يا (هيثم) ح تزعجو ساكت !!
- طيب نسوى شنو؟ ما لازم نتصرف ؟
- قول ليهو تعال لينا باكر !!
- (يلتفت إلى المريض آخذاً بنصيحة رندا) : لو ممكن بس تجينا بكرة ؟
- أجيكم بكرة دى شنو أنا عاوز (أفصل بنطلون)؟ ما تغيرو ليا وتدونى (الحقنة) هسع وتخلونى أمشى
- لكن ..
- لكن شنو هى عمليت (قلب مفتوح) ما نضافة وحقنة !
- طيب بس ممكن دقيقه ؟ - ثم يلتفت نحو البقية - :
- شوفو يا شباب أنا أول مره أشوف ليا مريض سكرى عندو جرح وما إتعاملت مع case ذى ده قبل كده و
- والله أنا ذاتى !! لكن بفتكر مفروض نعمل ليهو CPR
- أنا بفتكر قبلما نعمل ليهو CPR حقو نتصل بى دكتور (كمال) الأستشارى
( يمسك بالموبايل ويتصل ) : معاك دكتور هيثم يا دكتور
-أهلا
- والله يادكتور اولا اسفين على الازعاج
- لا مافى ازعاج دى الساعة لسه (بدرى) بعد (نص الليل)
- يادكتور والله الحقيقة جانا مريض بيقول انجرح امبارح وجا هنا وعملو ليهو نضافة وأدوهو حقنه مع ملاحظة إنو عندو سكرى !
- وإنتو عملتو ليهو شنو؟
- والله يا دكتور لسه ما عملنا ليهو حاجه لكن قلنا نشوف رائك عشان عاوزين نعمل ليهو CPR ؟؟
-(يهتاج) : معقوله بس ؟؟ الراجل جاييكم بى كرعينو لحدت عندكم تعملو ليهو CPR ؟؟
- يعنى ما نعملا ؟
- أكيد !!
- (هيثم يضع الموبايل فى جيبه ويخاطب تامر) :
- هسع يا (تمورى) -إسم الدلع- نعمل للزول ده شنو؟
- (تامر يلتفت للمريض) :
- إنت يا أبو الشباب امس كنت (واعى) لمن جيت للحوادث هنا؟
- أيوه (واعى) يعنى جيت (سكران) ؟
- لا ما اقصد كده؟ يعني شفتهم وسمعتهم وهم بيعالجو فيك ؟؟
- أيوه طبعاً
- حلو .. حلو جداً
- (فى إستغراب): هو شنو الحلو؟
- حلو لأنو أكيد تكون سمعت الدكتور قال ليك عندك شنو؟
- كيف يعنى ؟
- لا.. لا خلاص إتذكرت (مخاطباً هيثم):
- إنت يا (هيثومى) شنو إسم المرض البجى مع الجروح لمن تكون (وسخانه) وما نضيفة وكده ؟ - مواصلا- تتذكر أدانا ليهو (بروفيسور سعيد) فى سميستر 6 !!
- أيوه بتذكر إسمو إسمو ... أيواا لقيتو !! إسمو (الكزاز) !!
- نو .. نو.. نو.. أنا عاوزو (إن إنجلش) - يعنى بالإنجليزى- !!
- دقيقه إتذكرو ليك ... حاجه كده ذى (تايتانيك) !! أيواا إفتكر حاجه كده آخراها (أوس) أتيااتيتوس تيانييييكوس ... تيتانيسيس ... أيواا ... عرفتو ... إسمو (تيتانوس)
- طيب بتتذكر علاجو شنو ؟
- شنو البعرفنى؟؟ يعنى عاوزنى أعلرف إسمو وكمان أعرف ليك علاجو ؟
- أكيد غايتو يكون مضاد حيوى .. بس ما متأكد
- أها يعنى هسع نعمل شنو؟
(هيثم وهويلتفت للمريض) :
- شوف يا أبو الشباب إنت امس شفتهم وهم بيدو فيك الحقنه ... صاح؟؟
- صاح
- جميل .. طيب تعال معايا (ياخذه لدولاب الادويه) : مابتتذكر أدوك ياتو نوع من الحقن دى؟؟ كدى حاول تتذكر على مهلك نحنا ما ورانا حاجه
- (فى زهج) : لكن انا الوراى حاجه .. هو ده طب ولا (شختك بختك) .. خلونا بالله دكاترة آخر زمن .. مع السلامه !!


الساعه 2 وربع :

الممرضة تجرى داخلة يا دكتور حصل دكتورة (منال) بتاعت (النساء والولاده) على التلفون .. يذهب (هيثم) ليكلمها على (التلفون الثابت) ثم يعود بعد دقائق :
- يا شباب دكتورة (منال) بتقول عندها حاله مريضة انخفض ضغطها الى 50/120 وعاوزة واحد مننا يمشى ليها فى العنبر الراقده فيهو عشان يكشف عليها لأنها هى مشت البيت الليلة بدرى عشان عندها ظرف - متسائلاً - أها منو اليمشى يشوف المريضة دى؟
-(كلهم بصوت واحد) : أمشى إنت!!
-أنا شنو ؟ والله أنا ما بكره ألا قسم (الجاينا) - يعنى النساء والولاده- !! - مواصلا- أمشى إنت يا (تامر) !!
- والله أنا (الجاينا) دى نجحت فيها يا الله يا الله !! بعد ما روحى طلعت !! شوفو ليكم زول تانى !! -مواصلاً - أنا بفتكر طالما القصة قصة (جاينا ونسوان) وكده حقو تمشى ليها (هاله أو رندا)!!
- انا امشى وكمان عند (دكتورة منال) ؟؟ إنتو ناسين إنها سقطتنى تلاته مرات فى إمتحان (الجاينا) والله أنا (مكجناها) ولا بمش لا حاجه !! شوفو (رندا) !!
- والله يا جماعة أنا ما ناقشة أى حاجه فى (الجاينا) لو بس كنت أعرف أى حاجه ما بتفرق معاى كان مشيت ليكم عادى كده والله!!
- شوفو يا جماعة (دكتورة منال) عاوزة زول يساعدا ... صاح؟
- (الجميع) : صاح
- والزول المفروض يساعدا مفروض يكون أكتر زول فاهم فينا ...صاح؟
- (الجميع) : صاح
- خلاص أنا بفتكر نرسل ليها (عشة الممرضه) !!
- (كلهم بصوت واحد) : عشة الممرضة ؟؟؟؟؟؟؟!


الساعه 3 صباحاً :

يدخل إلى غرفة الحوادث أشخاص يحملون شخص يسيل الدم من رأسه بغزارة وهو يتأوه بصوت عال يبدو أنه مصاب فى حادث ، تشير إليهم (الممرضة) ليضعونه على (كنبة) الكشف ، ينظر (هيثم) للبقية كيما ينهضوا لمباشرة الحاله :
- يلا يا جماعة نشوف الزول ده الحاصل ليهو شنو باين عليهو (حالتو صعبة) !! - مواصلاً - لازم نسوي لينا خطة عمل نوزع فيهاالادوار علشان ننقذو باسرع مايمكن ....
- خلاص انا مهمتي اسجل البيانات بتاعتو وانتو عليكم الباقى
- لا بالله يا شيخ ... شلت أسهل حاجه !!
- خلاص واحد يسجل البيانات وواحد يعمل ليهو CPRوواحد يوصل له IV line(درب تغذية) وواحد يجهز ليهوالادويه وواحد يسوي ليهو فحص سريري!
- خلاص بس أنا بعمل ليهو الفحص السريرى !!
- لا .. (أنا ورندا) النعمل ليهو (الفحص السريرى)
- شوفو يا شباب وكت كلنا عاوزين (الفحص السريرى) ده أيه رايكم نعملا بالقرعة ؟ - يبدأ بتقطيع الورقه التى فى يده إلى قطهع صغيرة يكتب عليها ثم يرمى بها على الطاوله ثم يأخذ كل فرد ورقه)
- (رنده وهى تنطط) : وووى ...ووووى أنا ال ح أعمل الفحص السريرى) ثم تتجه نحو المريض الذى يئن بصوت عال
- (الممرضة):المريض ده لازم تدوهو (محلول) حالا لأنو نزف دم كتير
- محلول شنو ؟ محلول الجفاف ؟
- والله ما عارف ؟ حقو نتصل على دكتور( كمال ) نسألو !!
- يا جماعه دكتور (كمال) ده ما جنناهو جن حقو نشوف لينا دكتور تانى نتصل عليهو؟
- هو مش رئيس الوحده بتاعتنا ؟ خلاص يستحملنا !! وبعدين هو زول كويس وما بزعل مننا
- خلاص كان كده إتصل أسألو
- (هيثم يمسك بالموبايل ثم بعد عدة دقائق يرد) :
- عندكم شنو كمان تانى ؟ كرهتونا الطب ذاتو!!
- معليش يا دكتور
- معليش شنو؟ أنا هسع ما ذى الشغال سادى خدمه معاكم !!
- معليش .. يا دكتور بس آخر مرة !!
- طيب فى شنو؟
- والله يا دكتور (كمال) جابو لينا مريض عامل ليهو حادث حركة ومدشدش كلو ونازف دم كتير .. عملنا ليهو اللازم لكن بس ما عارفين نديهو ياتو محلول؟
- كمية الدم النزفها قدر شنو؟ ليتر ولا ليترين ولا كم يعنى؟
- بتبالغ يا دكتور لكن يعنى ؟؟ نعرفو كيف بس ؟ - بعد تفكير- قول كده 4 لترات !!
- إنتو يا إبنى إتخرجتو كيف؟ كان نزف 4 لترات كان مات زماان !!
- والله يا دكتور لى هسع بيكون فات الأربعه لتر
- ليه ؟ ما وقفتو ليهو النزيف؟
- (وهو يبتعد عن صراخ النساء الذين يبكون على المريض الذى أخرج الروح) : لا ما قلنا قبلما نتصرف برانا أول حاجه نسألك يا دكتورنديهو ياتو محلول ؟ .

الساعه 4 وربع صباحا :

يدخل رجل يحمل بين يديه طفل صغير يمدده على التربيزة التى يجلس عليها (الدكاترة) :
- لا بأس عليه يا حاج عندو شنو؟ مالو؟
- كان نائم قام وقع من (العنقريب)
- (رندا وهى تلتفت نحو هاله) : (العنجريب) ده مش الحاجه البتشبه السرير دى ؟
- أيوه بس ما عندو راسين بالجنبات
- (هيثم يرفع الطفل ويلاحظ أن أحدى رجليه بها إنثناء) : طيب يا شباب لما نشتبه إنو فى زول رجلو مكسورة شنو الخطوات البنعملا ؟
- والله غايتو بتذكر إنو أول حاجه لازم نعمل ليهو صورة بالاشعه
- أها وبعدين؟
- نقوم نديهو مسكن للألم
- وبعدين؟
- نشوف تاريخو المرضى يعنى الـ History بتاعو
- (هيثم وهو يخاطب والد الطفل) طيب على كده خلاص يا حاج شيل الورقه دى وأمشى أعمل لينا صورة بالأشعه لى كراع الود ده !!
- (يخرج والد الطفل لعمل الأشعه بينما يخاطب هيثم البقية) : كدى قبل الراجل ده ما يجيب أشعت ولدو منو البعرف يعمل (جبيره) فيكم ؟
- والله النصيحة أنا قبل كده ما عملتها والكسور دى فى الرياضيات ما بدورا ولا بحبها !!
- والله أنا لمن الدكتور شرحا لينا أنا كنت (داكه) المحاضرة العملى ديك لأنى كنت فى (عرس) ناس (نانسى) صاحبتى
- وإنت يا (تامر) ما بتعرف تعملا ؟
- والله أنا الجبس ده ما بدورو لأنو بيعمل ليا حساسية فى الجيوب الأنفية وغير كده أنا ذاتى ما بعرف أعمل (الجزيرة) ولا الإسمها شنو دى !!
- طيب هسع وكت نحنا كلنا ما عارفين نعمل شنو؟ الراجل ده هسع بجينا !!
- دى عاوزة ليها نعمل شنو؟ ما تتصل بى دكتور (كمال) هو فى غيرو ؟
-(هيثم يمسك بالموبايل ويتصل) : معليش يا دكتور والله بس آخر مرة
- (فى تبرم وزهج) : يا إبنى إنتو طلعتو (عين أهلى) معقول بس كده ؟؟
- معليش يا دكتور والله ما عندنا غيرك !!
- أها مالكم ؟
- والله يا دكتور عندنا طفل شاكين إنو كراعو فيها كسر وحولناهو الأشعة عشان يعملو ليهو صورة وقلنا قبل أهلو ما يجيبو النتيجه نتصل بيك عشان نعرف كان طلع كسر نعمل ليهو (الجبيرة) بتاعت الجبس كيف؟ وبعدين نحنا ذاتو ما عارفين نعملا ليهو immediately ولا نصبر شويه؟
- إنت يا إبنى منو القال ليك أنا دكتور (عظام)؟ إنت ما عارف إنى (باطنية)؟ إتصل فى دكتور (عبود) بتاع العظام الله لا عظم أجرك !! الواحد ما قادر يرتاح معاكم !!


الساعة 5 صباحا :

تدخل إلى غرفة الحوادث إمرأة تحمل في يديها طفلة لا تتجاوز التسعة أعوام يبدو عليها علامات الأعياء .
- والله يا دكتور البت ما خلتنا ننوم من (الحمى) .. جسمها ده ذى (الصاج)-
- طيب يا حاجه هسع نكشف عليها ونوريك الحاصل
يضعها الجميع على (طاولة الكشف) .. قام (هيثم) بقياس (الحرارة) طلب منها (تامر) أن تفتح (فمها) .. قامت (رندا) بالكشف على بطنها وصدرها بالسماعة .. قامت (هالة) بقياس (النبض) .. ثم بدأوا يتحدثون تارة بالعربية وأخرى بالإنجليزيه وهم يشخصون الحالة ثم يتفقون على نتيجه يبلغها لها دكتور (هيثم) :
والله يا حاجه بتك دى (اللوز) بتاعتا (ملتهبه) ولازم نشيلا ليها
- لكن يا أولادى (اللوز) دى ما شيلناها ليها زمان .. نشيلا ليها تااااانى

كسرة :
حكايت (اللوز) دى حقيقية !!

[khalid]

#1507547 [المهاجر]
0.00/5 (0 صوت)

08-21-2016 01:24 PM
ورايك شنو فى الدكتور البيعمل العملية وهو سكران ؟؟ دة يستاهل؟؟؟؟؟؟؟ ولا يرضو الفيهو مكفيهو ---

[المهاجر]

#1507513 [جن راكب جواد شايل جيم ثري]
0.00/5 (0 صوت)

08-21-2016 12:10 PM
بتعرف قوات الدعم السريع يا جبرا ؟
اكاد اجزم انه ديل منسوبيهم . كونهم لا يعترفون بوجود قانون رادع لهم

[جن راكب جواد شايل جيم ثري]

#1507072 [سامي]
0.00/5 (0 صوت)

08-20-2016 05:25 PM
ياسيد جبرا والله الطبيب او الطبيبة العارفين شغلهم كويس مافي حد يعترضهم بل يحترموا ويقدروا جدا لكن معظم أطباء اليوم للاسف لانو درسوا بالقروش يعني مش مقدرات فلذلك هذا ينعكس على ادائهم بل تصرفاتهم التي كلها سماجة وهبل وضحك واستهزاء بالمرضى بس نحكم ونقارن بين طبيب الفلوس وطبيب التفوق الاكاديمي

[سامي]

#1506992 [alkamali]
0.00/5 (0 صوت)

08-20-2016 02:40 PM
be whatever you like /adoctor/apoliceman/ect
at the end you are human


focus on correcting yourself
your very own self
you will never ever finish accusing and blaming others
but can always do something about yourself

[alkamali]

#1506875 [منير سعد]
0.00/5 (0 صوت)

08-20-2016 10:49 AM
أخد الصورة يا جبرا من زاوية عكسية,,,,,
لما تجيب ليك قريب بينزف من حادث، أو مبطون الزايدة قربت تنفجر في بطنو، أو مره بددردق بالواطة بسبب مغص كلوي.....

وتلقا ليك تلاته أطباء وائل وشيراز وممدوح عليهم النبطشية وسامعين كواريك زولك العيان ، وعاملين نخرة الحامل مابتشم، وشغالين واتساب ،وتبادل ضحكات في ونسة عن أيام جكيس جامعة مامون.

دكاترة زي ديل غير تدقهم بقاش، وتلفخم بدبشك تسوي ليهم شنو.....؟؟

روتبهم ما بتكفي ومظلومين صاح. الزول العيان وكل المرافقين،ونحنا وإنت سيم سيم.

يبقا الحل شنو؟ جو مواعيد ورديتم يشتغلوا مظبوط زي ما قال الكتاب لغاية ما تخلص النبطشية.
عندهم شكاوى ومظالم بتمنعهم من آداء واجبهم كم ينبغي, يقعدوا في بيوتهم.
أحسن مما يجو، وما يشتغلو، ويندقوا..........

[منير سعد]

#1506867 [سوداني حتى النخاع]
0.00/5 (0 صوت)

08-20-2016 10:38 AM
يا أستاذنا جبرا أنا أعتقد أن رفع الدعم عن الصحة قد تسبب في رفع درجة (الغليان)داخل نفوس أبناء الشعب الفضل مما كان أدى لهذه الإعتداءات!!!

[سوداني حتى النخاع]

ردود على سوداني حتى النخاع
[سوداني حتى النخاع] 08-20-2016 05:09 PM
مما أدى وليس مما كان. آسف لهذا الخطأ غير المقصود


#1506788 [كوكو]
0.00/5 (0 صوت)

08-20-2016 08:10 AM
السلام عليكم
زبون قديم من زمن ساخر سبيل
ود البرير معتز الوداهو يسرق مع الحراميه شنو؟
و لا دى الموضه . ده ما معتز ده منذل

[كوكو]

#1506736 [عسلايه]
5.00/5 (1 صوت)

08-20-2016 02:38 AM
الظاهرة ما موجودة في أي مجتمع إلا في السودان
يطرشنا ما سمعنا بيها قبل كدا

[عسلايه]

#1506685 [احهزة تنصت]
5.00/5 (2 صوت)

08-19-2016 10:19 PM
يا جبرة يطرشنى ما سمعت بحكاية اجهزة التنصت غالية الدقة فى امتحانات الشهادة السودانية ..بالله ممكن توضيح احتمال يكون عندنا اجهزة ونحنا ما عارفين..... غايتو انا لو عندى واحد بكون الولية ام برعى دى مركباهو لى فى خرتى دى لاتو كل يوم ذبذبتها عالية جدا

[احهزة تنصت]

#1506668 [أبوعديلة المندهش]
4.00/5 (3 صوت)

08-19-2016 08:13 PM
الطبيبة غلطانة. يعنى ما ملاحظة وهى الطبيبة بأن جنودنا الأشاوس مهمومين بتحرير حلايب من مصر ومشغولين بأسترداد الفشقة من اثيوبيا وتقوم هى تزيد عليهم الهموم؟

[أبوعديلة المندهش]

#1506636 [sami]
5.00/5 (1 صوت)

08-19-2016 05:58 PM
موضوع جميل

[sami]

ردود على sami
[فقير] 08-20-2016 11:22 AM
الدكاترة فى السودان الواحد يعمل فيها يادنيا ما فيك الا انا
وتجده عديم الثقة فى نفسه وضعيف اخلاقيا ومهنيا
ولو كان الاطباء والممرضين يقومون بدورهم لما تجشم المرافقون للمريض كل هذا العناء والتعب
فاذا لم يوجد مرافق فلن بتلقى المريض العلاج
هذا طبعا لا يبرر باى حال من الاحوال مد الايد وضرب الاطباء او غيرهم
وكذلك النظامييين وهم اسم على غير مسمي
هم مثل الاطباء
الواحد عامل ديجانغو على المساكين
ويكمن دا حال كل السودانيين
اى واحد فى مهنتو عامل ابو عرام
من غفير البوابة فى المشتشفي او المصلحة الى اعلى هرم فى البلاد البشكير الديك


#1506626 [الباشا]
5.00/5 (2 صوت)

08-19-2016 05:22 PM
إذا القصة إستمرت نطالب بوضع مادة (التاكندو) ضمن مقررات كليات الطب !
هذا الاقتراح عملي جدا لان البلد اصبحت جبانة هايصة.

[الباشا]

#1506624 [عائد..عائد يا ترابى!!]
5.00/5 (2 صوت)

08-19-2016 05:20 PM
حﻻوتك يا جبرا قصد ناس اﻻستقبال وﻻ الغفراء هم اليتلقوا الضربه مش ؟!! ياراجل حرام عليك!!إذا عايز حل اليسوروا المستشفيات بسلك شائك وعربيتين براجمات سلف من الجنجويد وعشره قبضايات من قوات حميدتى لحل المشكله من جذورا وانت فاكر العساكر ديل بيقروا كﻻمك ده ؟ وكان قروها ماشين ينفذوهو ديل ياسيدى النظام مديهم كرت بﻻنش فيهو اضرب اكسح ما تجيبو حى !!

[عائد..عائد يا ترابى!!]

#1506610 [يوسف رملي]
5.00/5 (3 صوت)

08-19-2016 03:58 PM
عندما تمارس الدوله الإرهاب ضد شعبها توقع كل شيء
عندما تسلم الانقاذيون السلطه . بدأوا في ممارسة الإرهاب
ضد الشعب .. السحب علي الأرض بالأسواق والضرب
بالخراطيم السوداء . والاختطاف من المنازل الي بيوت
الأشباح وتدبير الحوادث بغرض التصفيه .. والكثير من
الممارسات ولا زالت مستمرة ..

[يوسف رملي]

الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة