لتأجير الخراف !
09-06-2016 12:07 PM




قال لي صديقي حزيناً متأثراً :
• مقولة بس يا استاذ عندنا كل الثروة الحيوانية دي والناس ما تقدر (تضحي) والخرفان سعرها يطير في السماء كده ؟ هسسه الواحد يضحي كيف؟
• الضحية دي لكن يا عباس ما كسر رقبة دي سُنّة مؤكدة تجوز عند المقدرة ؟
• يا أستاذ نحنا عارفين الكلام ده لكن القصة بقت تقليد إجتماعي .. مفلس .. ما عندك التكتح .. لازم تضحي لازم تضحي !
• غايتو يا عباس مع إالإرتفاع الجيب في أسعار الخرفان دي أنا خائف تنتشر محلات (تأجير الخرفان) .. يعني ذي مافي محلات لتأجير الصيوانات والمكرفونات والكراسي ! كدي يا عباس إتخيل معاي السيناريو ده
المنظر :
أمام أحد الساحات .. عدد من الأشخاص يلبسون جلاليب بيضاء وسديريهات أمام مكتب صغير ، مكتوب على بابه (ما تخاف لتأجير الخراف) بالقرب منهم تجلس (ست شاي) .. عدد من الخراف أمامها كمية من القش والرسيم وجرادل الماء .. يقوم (عوض) بإيقاف عربته المتهالكة متجهاً نحو المحل :
- اهلا وسهلا يا أستاذ .. إتفضل ؟ - والله أنا عاوز ليا خروف معقول كده ..
- وعاوزو كم يوم ؟
- يعني قول قبل الوقفة بي تلاته يوم
- وح ترجعوا متين ؟
- قول تاني يوم في العيد
- يعني إنتا عاوز خروف إيجار لمدة خمسة يوم !
- مثلاً ... (وهو يمسك بقرن أحد الخراف) .. هسسسه ده بتأجروهو ليا بي كم ؟
- (ينظلر للخرف) : ده بي مية وعشرة في اليوم
- (في إستغراش) : خروف وللا (أكسنت) قول ليك كلام معقول -خلاس نقول بي مية !
-.(وهو يشير إلى أحد الخراف الضعيفة ) : خليك من ده طيب .. طيب المجلفط السغيروني داااك إيجارو كم؟
-(وهو يمسك به) : ده ما مجلفط ..بالله تعال جسو كويس ، خلاس بنديك ليهو بي تمانين ! (بيستخرج أله حاسبة من جيبه) ... تمانين في خمسة ... أربعمية.ثم يصيح ... تعال يا ولد خت الخروف ده في الميزان
- (مندهشاً) : ميزان شنوووو؟
- ما لازم نعرف وزنو كم ؟ على فكرة لمن ترجعو ح نوزنو تاااني وأي كيلو ناقص بنشيل فيهو غرامة تمن كيلو لحم .. يعني تسعين ألف !
- أي كيلو نااااقص ؟ طيب قول الخروف ده هسسه شلتو وضربتو عقرب كتلتو ؟
- مافي مشكلة ... تأمينك بس ح يسقط !
- (فى إندهاش) تأمين شنو؟ .- (يضحك متهكما) : يعنى إنتا عاوز تدفع ليك أربعمية جنيه إيجار وتشيل ليك خروف بي تلاته مليون ساااكت بدون ما تخت ليك شيك ضمان ؟
- دفتر شيكات ما عندي .. هي القروش البيعملو ليها دفتر وينا ؟
- خلاس أكتب لينا إيصال أمانة يقوم (عوض) بكتابة إيصال أمانة بالمبلغ ويسلمه ومعه القروش لصاحب محل تأجير الخرفان الذي لا يزال ممسكاً بالخروف ، يقرأ الإيصال ثم يلتفت إلى عوض :
- الرقم الوطني؟
- شنووو؟ عاوزين تطلعو ليا جواز سفر؟
- يا أخونا ده إجراء عادي بس عشان نتأكد من شخصيتك ثم مشيراً إلى الشخصين اللذين معه ..
- تعالو أشهدو !!
- يقوم (عوض) بكتابة بيانات رقمه الوطني على الإيصل ثم يوقع ويوقع الشاهدان ..
- يمسك (عوض) برجل الخروف متجها إلى عربته .. يستوقفه صاحب المحل قائلاً ... خليك عااارف أي يوم تأخير بي تمانين ألف !!
بعد أن يضع عوض الخروف داخل ضهرية العربة يجلس إلى المقود .. يستغرق في محادثة مع الأولاد يسألونه عن الخروف .. ينتهي من المحادثة ثم يشغل الماكينة فينبعث من الراديو :
- بااااااع ... باااع .. بااااع ثم (صوت أنثوى مايع) : - شركة البدائل للإنتاج الفنى يسرها أن تقدم للمواطنين الألبوم الجديد (خروف الضحية) .. يحتوى الشريط على (نغمات فردية) ... ( نغمة ثنائية) .. نغمات كورالية .. خلفيات مختلفة .. (مثلا أصوات الشفع وهم قاعدين يلعبو معاهو) .. عزيزى المواطن أحجز نسختك من الآن .. بخمسة جنيهات فقط يمكنك توفير خمسة ألف جنيه ... مع تحيات ( شركة البدائل للإنتاج الفنى)
• قرر عوض إرجاع الخروف .. قائلاً في نفسه وكت القصة كده أخير القروش دي إشتري بيها للأولاد كم كيلو لحم !
• قام عوض بإيقاف المحرك .. نزل وقام بفتح الضهرية ...لدهشته وجد الخروف (جثة هامدة) !!

كسرة :
عزيزي المواطن فكرة الإيجار فكرة غير مضمونة العواقب فربما تبقيك إلى حين السداد .. وكل سنة وإنتا طيب ..

• كسرة ثابتة (قديمة) :أخبار ملف خط هيثرو العند النائب العام شنو؟ 81 واو - (يعني ليها ستة سنوات و 11 شهر) ؟
• كسرة ثابتة (جديدة): أخبار تنفيذ توجيهات السيد الرئيس بخصوص ملف خط هيثرو شنو؟ 40 واو (يعني ليها ثلاث سنوات وستة شهور)
الجريدة


تعليقات 6 | إهداء 0 | زيارات 4698

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1516990 [ود عشمانة]
4.00/5 (1 صوت)

09-07-2016 07:08 PM
كل الناس الكانت كل سنة حتضحي ولكن لللعنات هي الاكثر سيلا من دماء الخراف

[ود عشمانة]

#1516864 [اللدر]
0.00/5 (0 صوت)

09-07-2016 02:21 PM
ماذا نستفيد من هذا ؟

[اللدر]

#1516863 [اللدر]
0.00/5 (0 صوت)

09-07-2016 02:19 PM
ماذا نستفيد من هذا ؟

[اللدر]

#1516238 [عبده]
4.00/5 (1 صوت)

09-06-2016 03:46 PM
مبدع ياحبرة الله يحفظك

[عبده]

#1516207 [tyson]
5.00/5 (2 صوت)

09-06-2016 02:32 PM
عزيزى جبرا

بعد التحية و الحبشتكانات

بالنسبة لى خرفان الضحية دى الخروف بجى من الحمرة كدارى اى محلية بيمر بيها بياخدوا رسوم اى ولاية يقطعها حكومة الولاية بتاخد عليهو رسوم بالضبط كده السيد الخروف دا بيقطع ثلاثة ولايات و عشرين محلية و خمسين نقطة تفتيش و الف و خمسمائة عسكرى بدفع رسوم فى كل محطة و مرات بتكون رسمين فى المحطة الواحدة او ثلاثة الرسوم دى ما بستفيد منها شخص غير الناس البتحصلوها يعنى لو عندنا حكومة فيها واحد بس عاقل كان اقترح عليهم انو الرسوم دى يوجهوها لى تنمية مناطف الانتاج يعملو مراكز ابحاث لزيادة انتاج الضان وممكن يعملو سلخانات حديثة لتصدير الضان
منها عملة صعبة للبلد و منها انتاج وفير و رخيص للمستهلك المحلى
لكن ناس امسح اكشح ما تجيبو حى قاعدين للشعب السودانى دا فى العزيزة تقول طالبو تار

[tyson]

ردود على tyson
Romania [quickly] 09-06-2016 08:55 PM
هههههه الخروف بجي ماشي كداري من حلته في جنوب كردفان للخرطوم وبرضوا بياخدوا عليهو رسوم عبور للحرتوم محل الطيارة بتقوم !!!..... تقلي شني وتقلي مني؟؟!!
والله أبدعتوا يابني كوزستان !!


#1516123 [ابو الدرداء]
4.00/5 (2 صوت)

09-06-2016 12:38 PM
خليناكم لى الله ياناس المؤتمر الوطنى
حسبنا الله ونعم الوكيل فيكم
الله اكبر عليكم
ربنا ينتقم منكم
ويهلككم هلاك عاد وثمود
وينشر بينكم الفتنة والضغينة والدمار وكشف الحال
ربنا يغطسكم فى قعر جهتم وقود للنار

[ابو الدرداء]

الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة