الطيارة أم ضنب
04-11-2011 03:09 AM

الطيارة أم ضنب

أسماء الجنيد
[email protected]

المشهد التاني

الريس
تعال تعال انت يا العاضي جلابيتك دي
ماشي وين يا عبد الرحيم؟؟
كدي خليها تل ابيب اريتك بالدبيب اليسقط حجرك
امشي بي جريتك دي ناغم لي شيخ علي عثمان شوفوا لي وين
النشوف الحكاية دي آخرتها
بعد مدة يجي علي عثمان داخل
البشير مكردم ومكفرن ومدردم ومشلضلم ومكوم كلامو فوق شلاضيمو
يعاين لي علي عثمان بي قلق وحراق روح
ويقبل يتكلم مع على عثمان وهو محتار وزهجان وحيران
حكاية الطيارة دي كيفنها يا علي ياخ
الناس ديل العملوها فيني نجار في خشبة ما سواها ، نشروا مخي نشر
والله ده الجن الماعندي ليه دوا، ولا كلام ، ولا كضب
الكضب كلو كبيتو وكملتو في دار فور وحلايب
والعندي الفضل كملت بيهو خجة الإنتخابات وفصل الجنوب الله يفصل ركبته عبد الرحيم
كان جاب لي الأزية على عقاب عمري الزول العولاق ده

ينط علي عثمان بي ضيق شديد
انت يا عمر عينك في الفيل وتطعن في ضلو..؟؟
هسي انت بي الصح و بالكضب بي موية
مصدق انه المصيبة الجاتنا دي من الدلاهة عبد الرحيم ده ؟؟
الريس
اها من منو يعني ؟؟

ياخ ده زولك الرمة الإسمو نافع وما نافع ده
انا ما عارف المصبرك عليهو شنو الزمن ده كلو ؟؟؟
زمااااااااااان كلمتك قلت ليك الزول ده اكشحو بي طش في اي ملف وريحنا منو
والله البلاوي دي كلها جايانا من تحت فاخورتو الماكنة وفاضية دي
اتبوجح ويطلع في شعارتو الفاضية ويتوعد ويحلب التيس قشطة وهو ما ناقش حنانو

الريس
يا علي ياخ انا عارفك انت الزول ده مكجنو من زمااان
وعارفك مستعد تلحس المكواة نمرة ستة وما تشوفوا
لكن كمان ما ني متوقع انه هو سبب البلوة دي بالذات
ينط علي وكثافته وصلت الحد
علي الطلاق القصة دي كلها من زولك الما نافع ده
علي الطلاق بالتلاتة تشيل الزول ده إلا اضانا تبرد و نشبع نوم
ياخ نحن هسي لينا كم زمن عينينا ديل ما اتلاقن
والشعب الكارهنا بي سبب المكروه ده يمكن يحبنا
كل ما نبرد لينا من بلية من بلاويه , يجينا بي كفوة جديدة ..
والأخيرة كمان جابتلها لحسان كوع
ان شاء الله كوعو بالسلخة وايدو بي الملخة
هسة يا ريس بتتوقع الفتنة الفي اسرائيل دي جاية من وين ؟
الريس
اها من وين ؟ ما من خيابة جيشنا وحرسنا
وعبد الرحيم الفاقع مرارتي وفشفاشي ده
انا عبد الرحيم اليومين ديل شايفو قدو قدو ... قدو قدو
إن قبلت عليهو علي بالطلاق علا اوديهو حلايب كداري وافجخوا باللواري
علي يخبت التربيزة بي زعل ويقوم حردان مارق
قلت ليك مااااااااا من الزول المامنو فايدة ده ..
يا زول على كيفك انا مارق زاتي ...
ينخ الريس الجخاخ ويبدأ يحنس ويتوسل
. يا زول تعال بطل حردانك الكتير ده ، تعال ياخ ما تبقى علي انت ولبن العشر أب ريالة ده
قول لي برواقة بسمعك ،حرم اسمعك
اها من منو ؟؟؟
نورني ياخ خليني ارتاح.

يرجع علي عثمان على مضض
يقعد ويمرق عمتو يرميها في التربيزة بي حرقة
ومكوم اخلاقو بنية في التربيزة قدامو ..
كان لقى فرصة بتلب في البشير زاتو يقلم رقبتو
يقبل علي بي زعلة ونهرة موجه كلامو للبشير
تتذكر المرض المانافع ده المشاكل الجراها لينا من دارفور ؟؟؟
والخلق الطفشوا من البلد دي بي سببه ؟؟
كره الناس في البلد كلها
ياخ الناس فضلوا اليهود في إسرائيل علينا
وعلى البلد
ومشوا لليهود بي كرعينهم و إرادتهم
وده كلو بسبب الخازوق الفي نافوخنا كلنا ده
. الله يرضي عليك ريحنا منو وريح البلد كان داير ليك كم سنة تاني لي قدام
شفت الناس المشوا إسرائيل ديل أكيد وقطع شك نافع ده دس وسطهم عشرات من ناسو
اها الناس الدساهم نافع ديل هم زاتهم البلغوا إليهود عليك
بي طلب من نافع شخصيا وجوا ضربوك
وانت عارفني كويس من ما طبخنا الإنقلاب ده سوا
ما بقول لي كلام ساي ماني متأكد منو
وما حصل يوم ورطتك
الريس
عرقاااااااااان وطفشان ويتهبب بي طرف عمتو رغم الكندشة
علي الطلاق دي مصيبة اخير منها اوكامبو
كتلوك كتلوك .. اخير من جوك جوك ..
كدي النفكر في الموضوع ده بي رواقة
لكن والله يا علي كلامك ظنيتو صاح
ينط علي
علي الطلاق صاح
انا غايتو نورتك للمرة ألألف وذنبنا كلو على جنبك
الريس
كدي خليني النفكر وما بخليهو نافع علي الطلاق ما بخليهو
جني وجن زول يزازي بي
ويزرزرني زرة كلب في طاحونة
كمان بعدما المشاكل حوطتني زي الميس من كل جهة
بقت تجيني من فوق وتحت ؟؟ بعدما نجضتني من كل الجهات ونجمتني نجام قبورة !!!
بعدين عينة الصواريخ ولا الطيارات البترك وسط الزلط دي وتحرق نص الليل
وتختف كف زي الصقر,
وتلقط البتدور تلقطو . دي انا خايفة تجيني في بكاني ده
ويتلفت مخلوع
انا ما قلت ليكم ما داير لي اي شباك مفتوووووووووح ولا كركبة في المكان ده كلو
ما تكركبوا مخنا اكتر من هو مكركب
يا ريس ديل ناس الإعلام
اها ديل بدورو شنو بي كشافاتهم دي
نحن ناقصين كشف حال
كمان تجينا ضربة على الهواء ونبقى فرجة لي كل الشمات ؟؟؟
هنا يهم علي متخارج من مكتب الريس
يقاطعه الريس بالله عليك الله يا شيخ علي وانت مارق علي مكتبك شوف لي معاك نافع ده الله لا نفعه ,,
يقاطعه علي مكرفس وشيهو
يا زول انا لا بنادي ليك ولا حاجة ,و ان قابلني في وشي ما بتكلم معاه
شوف ليك زول تاني غيري يناديه ليك.
البشير يعفص جرس مكتبه بي قوة لامن اصبعو يحمر
يجيه داخل مصطفي عثمان يقول ليه نعم يا ريس
ايوة يا مصطفي إسماعيل يا الطفل المعجزة
شوف لي نافع ده وين داير اختو تحت جزمتي دي الليلة
يتخارج الطفل المعجزة وشو ينعل قفاه
نواصل في الحلقة القادمة


تعليقات 6 | إهداء 1 | زيارات 3693

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#126556 [isamh3]
0.00/5 (0 صوت)

04-12-2011 10:27 AM
الموضوع جميل وهادف
الا اننى اختلف مع الكاتبة
فى ان المتهم الاول هو وزير الدفاع
وليس ذلك ريدة فى نافع الما نافع
بسبب بسيط وهو ان هذا ليس مجاله
والموضوع اكبر منو بكثير وخارج دائرة
تخصصه


#126266 [shafia]
0.00/5 (0 صوت)

04-11-2011 04:14 PM
رررررووووووووووعة يابت الجنيد

لك التحيه


#126237 [ناصر]
0.00/5 (0 صوت)

04-11-2011 03:34 PM
السلام عليكم............... صراحة لم يعجبنى الموضوع.. به كثير من الاسفاف والتجريح الشخصى الذى لا فائدة منه سوى ايغار الصدور وزراعة الاحقاد...


#126049 [خالد]
0.00/5 (0 صوت)

04-11-2011 11:00 AM
الاستاذه اسماء الجنيد خفة دم بجد سكر جنيد عديل كده وطريقة سخريه مشابهه لاسلوب خيال الظل ومسرح العرائس الكان بيلجأ ليهو الناس ايام الدوله العثمانيه وايضا ايام الحكم المملوكي لمصر


#125978 [حافظ أحمد]
0.00/5 (0 صوت)

04-11-2011 09:25 AM
الأخت أسماء الجنيد .. تحياتى لك ...

الطيارة أم ضنب والإنجليزى أب شنب ..

إنت كان عمرك كم سنة لما ثورة الإنقاذ قامت فى عام 1989م ؟ أسألى من الذين يكبروك سناً ( وهذا ليست تقليل لشأنك) إنما إستزادة من المعرفة وأسأليهم عن وزير الدفاع ده ليه هم متمسكين به إلى هذا الحد الذى يجعله وزير دفاع للسودان وأسأليهم ماهى قصته مع ثورة الإنقاذ مع إنه لم يكن أحد أفراداها؟ عموماً القصة ليست طويلة والعجيب فى سر البقاء على هذا الرجل ..

وسردك لما يدور داخل القصر حسب توقاعاتك ووجهة نظرك .. ده يوحى لنا أن السودان ده زريبة كبيرة بدون راعى ..

خلى دول الإستكبار والإجرام بالسلاح والنار والمال .. يورى موسفينى ..بتاع أوغندا الماقام من الواطه.. جرّ علينا عكازو عليك الله ماهُنا وإطمرمطنا..



#125971 [ام حميد]
0.00/5 (0 صوت)

04-11-2011 09:14 AM
انتي يااسماء رائعة جبتي التايهة والله دي مسرحية تستحق انهاتعرض في المسرح على الهواء والناس كلها تتفرج


أسماء الجنيد
أسماء الجنيد

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة