لو ح تضحي !
09-07-2016 01:01 PM




كلنا يعلم ان مسالة شراء الخروف أبو (كم وكمين) أصبحت في مصاف الإستحالة للمواطن العادي .. ولكن بما إنو المسألة كما قلنا من قبل أصبحت في حكم العادة الإجتماعية و(المرا) ممكن تكون (بتنقنق) لأنو أخواتا (رجالهن) قاعدين يضحوا ليهن والأولاد كل دقيقة (الخروف وين يا بابا) .. ويكون (بابا) عندها في حالة نفسية يحسد عليها فيقوم بعمل المستحيل لشراء الخروف !
عزيزي القارئ .. أها بعد عمل المستحيل ده الخروف يطلع مضروب؟ دي تكون حكاية ،عليه وحتى أنقذك وأنت تقوم بإختيار الخروف وعشان قروشك ما تروح (شمار في مرقة) فقد قمت بسؤال عدد من الخبراء الذين قاموا بإسداء هذه النصائح في كيفية إختيار الخروف (الصاح) .. وقبل ما نقول ليك النصائح عاوزين ننبهك لبعض الأشياء ..
أول حاجة لمن تكون ماشي تشتري الخروف أبعد عن الشياكة والأزياء البتخلي البائع يطمع فيك .. يعني أمشي ليك بي (جلابية وشبشب) مثلاً ..
تاني حاجة يستحسن تمشي مع جماعة عشان ناس الخرفان ديل ما ينفردو بيك لأنو لمن تكونو مجموعة بيكون في أكتر من رأي ناهيك عن الدعم اللوجستى منهم وممكن ممارسة بعض الضغوط على البائع .. (على بالطلاق ما تقول حاجة) ... (يا زول خلاس أرفع الخروف بالسعر القلناهو ليك ده) ... !

طيب نجي لمرحلة فحص وإختيار الخروف :

عندما تقف عند قطيع الخراف قم بإختيار الخروف نشيط الحركة الواقف على حيلو ذو القوائم السليمة (مافيهو عرجة) ، وعندما يحضره أمامك البائع أطلب منه أن يضعه على الأرض (يختو في الواطة) لأنو معظم البائعين يرفعون الخروف إلى أعلى من قوائمة مما يعطي إنطباعاً للمشتري إنو ده (حارس مرمى) ما خروف .
• أفحص الرقبة جيدا للتأكد من خلوها من الدمامل مع خلو الفم والأنف من أي إفرازات غريبة .
• عاين لعيون الخروف ما يكون فيهم أي أفرازات أو (إحمرار)
• لو عاوز تعرف (كم اللحم) في الخروف أتحسس بأيدك (ضهر الخروف) فهو يمثل (الشاسيه) الذي يوضح الحجم الحقيقي للخروف .. قم بتمرير يدك من عنق الخروف وحتى ذيله وأنت تضغط بيدك على الصوف وتتبع السلسلة الفقارية للخروف والعضلات التي حولها فهي دليلك إلى حجم الخروف وكمية لحمه ! فإذا كان الخروف (أبو لحم) فسوف تشعر بالعضلات وإذا كان (أبو من غير لحم) فسوف تشعر بالعظام .
• قم بجس (ضنب) الخروف للتأكد من إكتنازه وبالمرة وإنتا رافع الضنب عاين إذا كان هنالك بقايا لأي إسهالات وكده
• الأسنان أهم حاجة لمن تجي تشتري خروف لأنها ذي العداد في العربية بتوريك الخروف (قطع كم) ... يعني عمرو كم؟ .. قم بفتح فك الخروف يمكنك أن تعرف عمر الخروف التقريبي من فحص قواطع الأسنان التي توجد في الفك السفلي .. يقول الخبراء في هذا الشأن أن الخروف المناسب من كانت أسنانه تترواح بين 2-4 أسنان .. الأول يسمونه أهلنا (تني) والثاني يسمونه (رباع) وكلما كثر عدد الأسنان بعد ذلك كلما كان لحمه قويا عسير الهضم ..
• الناس البتفتكر إنو الخروف لازم قرونو تكون كبيرة بنقول ليهم لا توجد حقيقة علمية تقول بأن كبر القرون دليل على جودة وأصالة وعراقة ومعدن الخروف ، هي مجرد سلاح يستخدمه الخروف دفاعاً عن النفس فقط لا أكتر .. (إنتا حقو تركز على اللحم بس !!) والحاجات الشرعية .
• عزيزى المواطن لا تنخدع بكثافة صوف الخروف ولا يغرنك (الفرو) الجميل والشكل (المبغبغ) فالكلام (على اللحم) فربما يكون وزن الخروف (بالصوف) 20 كيلو .. وبعد أن يسلخ ما يطلع ليهو 12 كيلو .. في النهاية الفرو بتاع الخروف ح يشيلو الضباح وما ح تستفيد منو حاجة فلا تنشغل بفرو الخروف وركز في اللحم !

ما بعد الشراء:
• لا تنسى يوم (الوقفة) أن تكثر للخروف من السوائل وتقلل من الأكل تخليهو (شبه صائم) عشان يكون سهل نضافة الأحشاء والمرارة (تطلع سريع) وكده
• بعد قراءة هذا المقال لا تنسـى عزيزي القارئ أن تدعو لنا بظهر الغيب وتذكر هذه النصائح الثمينة عند تذوقك (الشية) !

كسرة :
عزيزي المواطن قم بإختيار خروفك بعناية ... قروشو ما جات بالساهل !!
• كسرة ثابتة (قديمة) :أخبار ملف خط هيثرو العند النائب العام شنو؟ 81 واو - (يعني ليها ستة سنوات و 11 شهر) ؟
• كسرة ثابتة (جديدة): أخبار تنفيذ توجيهات السيد الرئيس بخصوص ملف خط هيثرو شنو؟ 40 واو (يعني ليها ثلاث سنوات وستة شهور)
الجريدة


تعليقات 6 | إهداء 0 | زيارات 3680

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1517079 [صادميم]
0.00/5 (0 صوت)

09-07-2016 11:55 PM
.. في النهاية الفرو بتاع الخروف ح يشيلو الضباح وما ح تستفيد منو حاجة فلا تنشغل بفرو الخروف وركز في اللحم !
يا جبرا قالوا الضباح ما مفروض يشيل فرو الخروف بتاع الضحية ومن الواجب ان يتبرع بيه لمنظمة الشهيد ولا الجريح ما عارف لكن هم في النهاية ضباحين برضو.

[صادميم]

#1516945 [عبدالواحد المستغرب اشد الإستغراب!!]
0.00/5 (0 صوت)

09-07-2016 05:07 PM
يا جبرا طول العمر ليك ،، المقبور الترابى قال عمل الانقلاب وبعداك ما عرف يسوى بيهو شنو!! وانت اديتنا خرطه تفصيليه للخروف وما وريتنا نلقى قروشو وين ولا اديتنا فكره عن نوعية الفحم والزيت ومقدار البهارات (للمراره والشيه والكباب!!) وانا خايف الحيقدر يشترى الخروف ما حيهون عليه ضبحو ده بقى بالشىء الفلانى يابا وديل بقول ليهم الدنيا ما معروفه وما تتصرفو في الجلد ربما تحتاجو ليهو السنه الجايه وتطضرو لحشوه بالقش لزوم منظره وانا عن نفسى جلد خروفى بعد المعالجه محشو بالقش من قبل عشره سنوات والجماعه ما حسو يوم بأنهم فاقدين خروف ضحيه حتى بعض الجيران بيتناقلوا خبر إننا كل جمعه بنضبح!! والبعض ربما يفكر يمشى الزرائب ويكتفى بإلتقاط الصور مع الخرفان وهم مبتسمين يعنى زى الزعماء العرب عندما يجتمعون كى يغطسوا حجر شعوبهم وما فيش حد احسن من حد!!.

[عبدالواحد المستغرب اشد الإستغراب!!]

#1516937 [بنت الجزيرة]
0.00/5 (0 صوت)

09-07-2016 05:02 PM
تسلم يا جبرا كتيييييير من الناس فايته عليها هذه المعلومات مشكور

[بنت الجزيرة]

#1516896 [ود الشريف]
4.50/5 (2 صوت)

09-07-2016 03:23 PM
اقتباس : عاين لعيون الخروف ما يكون فيهم أي أفرازات أو (إحمرار)

يكون ضارب الشاشبندي ولا الحبوب الجاية بالحاويات !!!

[ود الشريف]

#1516852 [جامعة الخرطوم ثكنة عسكرية]
5.00/5 (2 صوت)

09-07-2016 02:05 PM
في تقديري الشعب السوداني الفضل مرفوعة عنه الأضحية
كفاية ضحينا بالجنوب وشعبه
والنيل الأزرق
وجبال النوبة
ودارفور
وضحينا بي 27 سنة من عمر الزمان
تاني ما علينا ضحية يا جبرا

[جامعة الخرطوم ثكنة عسكرية]

#1516839 [جنرال زمان]
5.00/5 (1 صوت)

09-07-2016 01:49 PM
الكلام دا يا عمك جبرا موجه لينا نحن السودانيين الغلابة ديل ولا لي زول تاني؟؟ ولا آآآآآآآ إنت قاصد الجماعة إياهم ناس القدرة والمقدرة والعملة الصعبة جوا الدواليب !!!!!

[جنرال زمان]

الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة