المقالات
السياسة
طبيب سوداني يقارن بين الطواري في السعوديه والسودان
طبيب سوداني يقارن بين الطواري في السعوديه والسودان
09-27-2016 12:55 AM

image

و الله انا متاكد انك لو سديت يوم ولا يومين حوادث 24 ساعة ما بتقول كلامك دة انا اشتغلت في السودان 3 سنة واسي في السعودية لي سنة انا بخت ليك مقارنة بسيطة لمريض عامل حادث سيارة في السعودية وفي السودان وانت احكم براك وده ما قصة ولا خيال دي حاجة انا مريت بيها..

اول ما حصل الحادث في السعودية الاسعاف بجي على طول وفيه مسعفين مدربين و الاسعاف مجهز بكامل الادوية المنقذة للحياة و الاجهزة اللازمة و بصل في زمن قياسي وبتم عمل الاسعافات الاولية للمريض و بتواصل الاسعاف باللاسلكي مع المستشفي بيبن تفاصيل الحالة و الشيء المتوقع و الحاجات المحتاجينها.. يعني بقول ليك شاب 32 سنة كسر في الحوض و اصابة في الراس و نزيف و هكذا و المفروض يتجهز 5 وحدات دم و اتصلوا باخصائي العظام (الغالباً حيكون سوداني) و اخصائي المخ و الاعصاب (غالبا برضو حيكون سوداني) وجهزو الاشعة المقطعية و الرنين و ادو خبر لي ناس العملية عشان يكونو جاهزين.. المريض لما يصل بعد ربع ساعة طبيب الطواري و الاصابات العمومي ( وغالبا برضو سوداني) لانو لا درجتو العلمية و لا معرفتو ولا واجبو في وصفو الوظيفي بسمح انو يتعامل مع حالة زي دي فدورو بكون انو يستقبل الحالة ويستدعي الاخصائيين المجهزنهم من قبييل.. بتلقي في نفس اللحظة اربعة ممرضات واقفات في راس العيان يركبو الفراشة ولو دايرين قسطرة بولية ويقيسو العلامات الحيوية المحاليل الوريدية و الدم بكون جاهز ركب طوالي عشان تلحق النزيف في 10 دقايق بودو الاشعة بعملو رنين ولا اشعة مقطعية و بقدرو ( الاستشاريين و الاخصائيين وليس العمومي المسكين) يحددو المشكلة بالظبط شنو و يدخلوه غرفة العمليات في اقل من نص ساعة ويكونو واقفين في العملية استشاري عظام و استشاري جراحة و استشاري تخدير غير عدد من الاخصائيين و اشياء اخري مفيدة بعداك بطلع من العملية طوالي بودوه العناية المكثفة عشان يتنوم فيها تحت متابعة استشاري التخدير و العناية المكثفة و غالبا و الله حيكون (سوداني) وكل العلاجات مجانا و كل الاحتياجات متوفرة و الدنيا عسل و الامور باسطة و بعد اسبوعين العيان ببقا انصح مني ومنك..
تعال نشوف عيان بتاع حادث في السودان اول شي بكون مجدوع تحت العربية المفرومة نص ساعة و الناس تعافر و تجرجر عشان تطلعو وبعد مرقو بشيلوه زي شوال البصل ولا الفحم وبجدعو في اقرب بكسي ورا... غالبا لو في اصابة في الظهر او العنق حيكونو ضاعفوها 5 مرات لانو في طريقة معينة للتعامل مع مريض الاصابة المتعددة و ناسنا ديل مستحيل يكونو عارفنها وحكومتك ما عندها اسعاف كافي لانو قعد توديه غزة وبعداك بكون مجدوع في البكسي مسافة الشارع ساعة كاملة ضارباه الشمس و الدقداق و دمو كابي في البمسي لحدي ما يجيبو الحوادث.. اها بعد كدة جو داخلين الحوادث فيها 20 عيان و3 دكاترة عمومين لانو الباقين حكومتك صدرتهم السعودية مع النبق بقوم واحد من ال3 ديل بجي علي المريض و ال500 مرافق المعاه لمن يفجهم دي دنيا براها و بعداك تبدا الماساة اول شي انت كطبيب ما مسموح ليك تتعامل مع مريض اصابة الا باورنيك تمانية ( دي قوانين حكومتك كدة) ولا بعداك تخش السجن انت وتاخد تهمة قتل لو اتعاملت معاه بدون الاورنيك بمشي جيش المرافقين للمكتب حق الشرطة بلقا العساكر مافي و جيش المرافقين دة كلو بعمل حميييل و بجي راجع يدق جرس للدكاترة عشان العساكر مافيشين طبعا لا المرافق لا الدكتور بقدر اتكلم مع عسكري لانو سيد بلد وكدة و زرارة قميصو اهم من عين الدكتور لو قعت زرارتو تخش سجن ستة شهور لكن لو قديت عين دكتور يبقي يستاهل لانو دكتور مستهتر وما ببتسم في وش المريض المهم العسكري مافي و الخطا في وش الدكتور القااااعد منتظر العسكري مع المرافقين و بعد حضرة سيادتو يجي من الجبنة مرافقينك الحمشين ديل زاتهم خشمهم ما بفتحو معاه وبعتبرو دة اهمال من الدكتور لانو المفروض هو يشوفو بدون اورنيك 8 لانو الطب مهنة انسانية تشوف العيان وبعداك انت كطبيب خش السجن مافي زول عندو بيك شغلة شايف كيف.. المهم بعد جنابو يجي ويملا الاورنيك الممرضين بكونو 4 وفي 30 عيان اها الحل شنو اي زول شايف انو عيانو دة اهم زول ولو خليتو مشيت منو المفروض يدقك طوالي فما في حل للمساكين ديل الا يتقسمو اي واحد يقسم نفسو علي 7 ولا جيبو الممرضين حقننا الفي السعودية ولا صحي بنصدرهم برضو مع النبق و الدكاترة المهم ركبو الفراشة و مشو الصيدلية عشان يفتشو الدرب قامو لقوه مافي اضطروا مشو اشتروه بي قروشهم من برة جوك راجعين بعد نص ساعة تاني اها دايرين فحوصات في المستشفي مافي يقومو ال500 مرافق يطلعو يعملوا الفحوصات برة دي برضو بتاخد نص ساعة غير بنك الدم البكونو مغطينو اتنين و هم بخدم مستشفي الطواري حقتا بتشوف الف مريض و بعداك دايرين اشعة مقطعية في المستشفي مافي دايرين رنين في المستشفي مافي محتاج عملية لكن الا تتعمل في مستشفي شرق النيل ولا الزيتونة لانو ما متوفرة.. مافي اخصائي لانو كلهم في السعودية.. مافي سرير يرقد فيه المريض لانو كسرو الخرطوم و العيانين كلهم بقوا يجو امدرمان و المستشفي وسخانة لانو شركة النضافة المتعاقدين معاها للمستشفي بتكون حقت شيخ مجاهد اشتغلت ما اشتغلت مافي زول بسالا و الاكسجين قاطع ومافي دربات و عادي.. المهم بعداك بتقول للمريض الا نحولك بقومو اهلو بمشو مستشفي سين الخاص بي تقرير بالحالة بقومو ناس المستشفي الخاص بقولو ليهم الا تدفعو 40 مليون تامين حتي ندخل العيان و دة كلو والعيان مجدوع في النقالة في الحوادث بقومو بعملوا اجتماع سريع وبفتشو تبرعات و ببيعو دهب مرتو عشان يلموا المبلغ المطلوب و دة كلو و العيان مجدوع في النقالة و بعداك بجوك راجعين تقوم تتصل بالاسعاف المركزي عشان يجو يشيلو العيان و انت عارف انو نحن عاصمة في كم مليون و بخدمو فيها كم اسعاف فممكن الاسعاف يجيك بعد ساعتين لانو اسعافاتنا بتسعف في اهل غزة و دة كلو و العيان مجدوع في النقالة بعد 5 ساعات و نص من الجرجرة يقوم عيانك يموت في النقالة و طبعا انت في الرواية دي كلها ما شايف زول غلطان الا الطبيب العمومي القاعد في الطواري عشان كدة بتقوم تدقو و تجي تكتب في الفيس اهمال و خطا طبي و يجي الناشط اسعد التاي يقول علي الطبيب مستهتر وصاري وشو والمفروض يدقو.. غلطان و الله عشان قاعد في بلد زي دي ويستاهل الدق المفروض يخلي الطواري من البداية فاضية عشان العيان بعد يموت نشوف جيس المرافقين ديل بقدروا يتشطرو علي القراصين الكبار ولا بسكتوا كالعادة


صفحة د.خالد حاتم عبدالله - فيسبوك


تعليقات 5 | إهداء 0 | زيارات 35192

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1525035 [أبو السمح]
0.00/5 (0 صوت)

09-28-2016 01:33 PM
في السودان الفساد يزكم الأنوف و مافي حد قلبو على البلد بالمرة
الإمكانيات العندنا لو خلصت النفوس مش ها نكون اقل من غيرنا في شئ
حكى لي أحد أصحابي ان أغلب المراجعين في السعودية يسألون عن جنسية الطبيب و عيادات الأطباء السودانين هي دائما" المفضلة و المكتظة بالمراجعين
و الله لو (نط) في السلطة ود حلال و سوداني جد جد بكرة الناس تهاجر تجي تتعالج عندنا مش دكاترتنا تهاجر لبرة

[أبو السمح]

#1524371 [shackle]
0.00/5 (0 صوت)

09-27-2016 11:44 AM
كلام زي التمباك

[shackle]

#1524331 [ود شندي]
0.00/5 (0 صوت)

09-27-2016 10:27 AM
غايتو يا دكتور في حاجات بالغت فيها رغم اني زميلك وفى السعودية ، فالمريض البحصل ليهو حادث وهناك نزيف وهو واعي ويتكلم حتى لو كان هنالك كسر فغالبا لايحتاج لرنين مغنطيسى لانو يستخدم للكشف عن الاورام ولا يحتاج لاشعة مقطعية الا اذا شكينا فى انفجار الطحال او نزيف بالجمجمة ،وغالبا اشعة سينية تكفى ، ولا نبري الطبيب السودانى فى الحوادث فربما كان ربط الجرع والضغط عليه كل ما يحتاجه لوقف النزف وبعد داك محاليل وريدية لاستقرار الحالة وبعض مسكنات الالم وعلى كل احد فى الحقل الطبي دوره.

[ود شندي]

#1524261 [فيلق]
0.00/5 (0 صوت)

09-27-2016 08:30 AM
حق الشعب السوداني عند جلاوزة الانقاذ كلهم
مثلا مامون حميده وزير الصحة قفل مستشفي الخرطوم عشان تشتغل مستشفي الزينونة حقتو
مفترض نحنا نمشي نكسر مستشفي الزيتونة وبشائر ونشيل الاجهزة نجي نختها في مستشفي الخرطوم
تبا لهم

[فيلق]

#1524228 [zeer]
0.00/5 (0 صوت)

09-27-2016 06:48 AM
نسيت ياسعاده الدكتور انو الطبيب الشغال فى السعوديه بيستلم اخر كل شهر راتب متفق عليه ومجزى بينما الطبيب السودانى بيسلم الحكومه اخر كل شهر مبلغ عشره الف جنيه علشان يكمل اختصاصه او يستلم 50 جنيه خدمه الزاميه وعلى راسو مدير طبى كوز فاشل من خريجى جامعه ست فله عشان يظبط الحضور والانصراف

[zeer]

د. خالد حاتم عبدالله
مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة