المقالات
السياسة
ارشيف مقالات سياسية
الكضب بي لبن بايت..امانة مو فطير
الكضب بي لبن بايت..امانة مو فطير
04-12-2011 11:59 PM

الكضب بي لبن بايت
امانة مو فطير

أسماء الجنيد
[email protected]

من يوم ضربة بورتسودان بقيت شايلة هم المحن والهجائم والرجائم و القلايل ، البجيبوها لينا بالبرشوت من حلاقيمهم الماكنة ناس حكومة الكضب،
والدليب المكردم.
كلهم من طرف يشيلوا ويتندلوا في الكضب ويكردموا ويدردموا ولفخاااااااك يجدعوا بره.
انت وحظك زي ما تجي تجي , ال الله غضبان عليهو يقرأ الخبر اول زول
بكوفر طواااالي ، ولا يكون في مكان عمله معاه واحد متابع اخبار البلد غير السودانيين، يقبل عليه وهاك يا اسئلة تعسفية، يشيل ويتندل ، رحمة مافي
كل الأسئلة محرجة ومافي ليها إجابة, يدخلك في اضافرينك غصبا عنك.
يشهد لله القنابل الفكوها فينا من يوم الضربة، إن جمعوها بتفجر بورتسودان كلها تعدمها طفاي النار .
الشي الناس ديل لا بخجلوا ولا بختشوا ؟
اصلا الخوف من الله ده مافي حساباتهم ضمة.
الليلة جونا بي كضبة بي لبينة بايتة
قال طيارة سودانير كانت حايمة في الهواء
سوداطير دي تطير عيشتها ، إن داروها ساعة الضرورة ووقت الشدة هي في غيبوبة كااااااااملة وديمة في الإنعاش تحمد سيدها وتشكر فضله . راحة طول العمر ,, اجاركم الله عندها شلل هزاز ، تتهوزز في محلها لكن يخربها ما بتعرف تطير لا فوق .طول حياتها ممدة في المطار جنازة راجية
الشهادة و البرود والحنوط والدفن,, والواجعني بتتمدد في مطارات الناس ,,,
هسة لما جات نصيبة من السماء تتعارض العارض سودا طير!!!
وتحمي ناس المدفع الرزام واسد الكدادة الزام الهزة البلد من اليمن لي الشام . تتعارضلوا وتحميهو يدافع عن الوطن ؟ اتلومتي يا سوداطير لوم الجبال والحجار ، لا بترحمي لا بتخلي رحمة الله تنزل ؟ بي سببك راحوا 2 في شأن الله والرسول من ابناء الوطن الحر,,

يعني هسه يا ابين قنابير العوير ده إلا يزرعوا ؟؟؟
كلام العبط واللتاخة البتقولوا فيه ده وفاضحننا بيه وين ما قبلنا
ما لقيتو زولا واحد يعدلكم ريسينكم ديل ؟؟
كضبوا لكن كضب بي موية حاجة خفيفة تنبلع ، لكن اب لبن ده تقيل خلاس يا خوانا ، ,,,
والله حيرتونا !!!!!
قلتوا قررتوا عدم الإشتباك خوفا من وجود العارض سودا طير؟؟
مخير الله على القرار البجي بعد تلاتة يوم!!
قرار هو ولا لبن دايرين تروبوه ؟ راجين تلاتة يوم لامن يبقى روب حتى تمرقوا بره,,,
اها قراركم ده بنموصوا ليكم عكارة ونسقيكم ليه بالوريد,
لامن تبطلوا إدعاتكم الفاضية دي.
وين ما تقبلوا وقدر ما تكضبوا ليكم بالمرصاد.
ممكن تورونا كنتوا وين في ضربة بورتسودان الأولي؟
ويين عند دخول خليل إبراهيم امدرمان ؟؟
وين في ضربة مصنع الشفاء؟؟
إنتو يا ناس بتخجلوا متين ؟
جعجعتكم الفاضية دي وكواريكم الواصلة السماء السابع
والزارعنا غير الله اليجي يقلعنا والدايرنا يجينا في الشارع!!
انتو حكومة ولا بلطجية ؟
عصابة حرامية بدرجة قف تأمل في الكذب والإحتيال والنفخة الكضابة
كضبتكم حقت الليلة دي لا حكت لا بقت
بقت عليكم حكاية مسيلمة الكضاب
وحكاية هجم النمر
تاني ان الصدق جاء مارق بي نافوخكم مافي زولا بصدقكم
العجيبة في الحكاية الكضبة انتو بتصدقوها مقتنعين قناعة تامة إنه دي الحقيقة
الكضب بقى ليكم طبيعة وعادة يومية
صدق المثل البقول من خلا عادته قلت سعادته
انتو عادتكم ما بتخلوها عشان فيها متعتكم وسعادتكم
نحن لينا الله يحلنا منكم
ويفرجها علي اهلنا المطحونين 22 سنة
شكيناكم لي حيا دائم صاحي ما نائم
بقدر الدليب البترزعوه في خلق الله
ترزعكم صاقعة تغتسكم مطامير تحت الواطة
قولوا آميـــــــــن كلكم عليكم الله
نواصل أن شاء الله


تعليقات 20 | إهداء 15 | زيارات 4860

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#127605 [nadus]
1.50/5 (2 صوت)

04-13-2011 09:45 PM
Ameeeeeeeeeeeeeeeeeeeen


#127474 [أبو لين]
3.00/5 (1 صوت)

04-13-2011 05:14 PM
سوما والله كلامك درر وتسلم البطن الجابتك


#127462 [سودانية]
4.00/5 (1 صوت)

04-13-2011 04:47 PM
غايتوا بعد بت الجنيد دي انا اتأكدت انا لا سودانية ولا حاجة ،،، اول مرة اضحك من قلبي علي الكلام السوداني المكرب ،،، بتجيبي الكلام ده من وين ؟؟؟؟؟
وبرضه امييييييييييييييييييييييييييييييييييييييييييييييييييييييييييييييييييييييين;)


#127412 [حسنين]
2.00/5 (2 صوت)

04-13-2011 03:37 PM
سمعنا الناس بتقول ما عندهم نفاخ النار لأنه النارو مولعة معناه كان عندو شي فوقها


#127351 [الباشو]
4.25/5 (3 صوت)

04-13-2011 02:16 PM
آآآآآآآآآآآآآآآآآآميييييييييييييين يا بت الجنيد
المغسة البتفقع المرارة يا أسماء الناس المبارياهم زى الطراطير تدافع عنهم و عن فعايلهم السودة الظاهرة للأعمى قبل البصير .... انا محتار فى الهنابيل البصفقو للرقاص الأعظم كلما حل فى قرية أو فريق .


#127289 [HAIDER]
1.50/5 (2 صوت)

04-13-2011 01:03 PM
امين امين امين0والله يجعل كيدهم في نحرهم المنافقين هجرونا من السودان وجلبو ليناالذل 0خلو البد و رعاة الشاة يسخرو مننا ويوصفوننا بالكسل وفي نفس الوقت تلقاة هو جالس داخل السيارة وعايزني اخدمو وفي نظرو انا كسلان كل ذلك بسب اعلام حكومتنا الفاشلة عايزة تبيض وجهها امام العرب ولا يهمها مواطنيها المهجرين الي متي الي متي الي متي هذا الحال 0كل شعوب العالم نهضت ونحنا همنا فقط نرسل لاهلنا عشان ياكلو ليعيشو ;( ;( ;( ;( ;(


#127273 [قاسم خالد ]
3.75/5 (3 صوت)

04-13-2011 12:41 PM
الأستاذة أسماء ...كلامك يشفي ، في الصميم ، و الله ريحني في حناني ذاتو .... أديهم .... : ترزعكم صاقعة تغتسكم مطامير تحت الواطة !!!! آمين


#127239 [ود الجنيد]
4.25/5 (3 صوت)

04-13-2011 12:00 PM
ترزعكم صاقعة تغتسكم مطامير تحت الواطة
قولوا آميـــــــــن كلكم عليكم الله
نواصل أن شاء الله......................
البنت دعوتها شافية التقول مربياها حبوبتها


#127193 [محمد احمد]
1.00/5 (1 صوت)

04-13-2011 11:00 AM
آمـيــــن آمـيــــن آمـيــــن آمـيــــن آمـيــــن آمـيــــن آمـيــــن آمـيــــن آمـيــــن

وندعوك يا الله بأن تشق عليهم بدعوة سيد الأنام لأمته (اللهم من ولي أمر من امور امتي فشق عليهم اللهم فاشقق عليه)

آمـيــــن آمـيــــن آمـيــــن آمـيــــن آمـيــــن آمـيــــن آمـيــــن آمـيــــن آمـيــــن آمـيــــنآمـيــــن آمـيــــن آمـيــــن آمـيــــن آمـيــــن آمـيــــن آمـيــــن آمـيــــن


#127172 [ود بلد]
3.00/5 (1 صوت)

04-13-2011 10:35 AM


المفردات العندك ابراهيم البزعي ما قالها اتي يابت جاية من وين .


#127147 [متسكع]
4.00/5 (1 صوت)

04-13-2011 09:47 AM
اجمل ما فى سردك للموضوع العامية والشعبية الامدرمانية

باين عليك انت من صليلية ام در العتيقة يعنى -ودنوباوى

اوالعباسية - او بيت المال -او الموردة -العرضة -المسالمة



#127142 [Zingar]
2.00/5 (1 صوت)

04-13-2011 09:36 AM
فعلا يا عمر الفاروق يرقعك دة كلآم ناس الضهارى زى برضو انقرع يا جنى....دى فعلا سخافات وعفن الانقاذ اللى جابوا لينا فى الخرطوم....جاكم البلاء فى لغتكم.


#127132 [الشعب الفضل]
3.75/5 (3 صوت)

04-13-2011 09:24 AM
اللهم امين ومن شايعهم


#127108 [ayman]
2.50/5 (2 صوت)

04-13-2011 08:18 AM
يا أخوانا بت الجنيد ده عاجباني بالحيل ،بدور أعرفلا عنوان ،وربنا يسوي الفيهو الخير


#127074 [كوكى]
2.00/5 (1 صوت)

04-13-2011 02:20 AM
اّمين اّمين اّمين اّمييييييييييييييين ياارب العالمين


#127052 [طشاش]
1.75/5 (3 صوت)

04-13-2011 12:49 AM
المحيرني المامك بمصطلحات اولاد السوق...والرندوق(؟) (؟) (؟)


#127050 [عمر]
1.50/5 (2 صوت)

04-13-2011 12:29 AM
فعلا هو لبن بايت دايرين نروبو ونسقيك ليهو ان شا االله ينفعك ويرقعك


#127049 [ابوعلى]
0.00/5 (0 صوت)

04-13-2011 12:27 AM
الهم لا تستجب امين


#127048 [الجعلي]
3.00/5 (1 صوت)

04-13-2011 12:25 AM
سوداطير في مطار القاهرة بقولوا ليها (الست)
بدل طائرة الخطوط السودنية
الست اقلعت الست وصلت الست متأخرة
لامن الجماعة سألوا ليه اسمها الست
الجواب كان لأنها بتروح وتيجي على كيفها بدون وقت او توقيت


#127044 [sithum]
1.00/5 (1 صوت)

04-13-2011 12:04 AM
آميـــــــــن آميـــــــــن آميـــــــــن آميـــــــــن آميـــــــــن آميـــــــــن آميـــــــــن آميـــــــــن آميـــــــــن آميـــــــــن آميـــــــــن آميـــــــــن آميـــــــــن آميـــــــــن آميـــــــــن آميـــــــــن آميـــــــــن آميـــــــــن آميـــــــــن آميـــــــــن آميـــــــــن آميـــــــــن آميـــــــــن آميـــــــــن آميـــــــــن آميـــــــــن


ردود على sithum
Qatar [أبو هالة ] 04-13-2011 10:50 AM
العاجبني فيك يا أسماء بت الجنيد تجيدين الدارجية باسلوب يفتح الشهية للقاري كأنها الفصحى

واستجابة للطلب

آمييييييييييييييييييييييييييييييييين


أسماء الجنيد
أسماء الجنيد

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة