المقالات
السياسة
لماذا تغادر.....؟!
لماذا تغادر.....؟!
10-06-2016 10:05 PM

بسم الله الرحمن الرحيم






جاء في الأخبار أنّ وزير الصحة بولاية الخرطوم البروفيسور مامون حمّيدة ، صَرّحَ بأنّه سيُغادر مقعده كوزيرٍ للصحة بعد شهرين من الآن ، كما علّق حمّيدة على إضراب الأطباء خلال الأيام الماضية بأنّه إضرابٌ سياسيٌّ ليس إلاّ.



والسُّؤال الذي يفرض نفسه لماذا يغادر الوزير مامون حمّيدة الوزارة؟!..

ماتخلِّيك قاعد معانا شوية يا عَم مامون.. أهو نحن مُتونِّسين بيك وبوجُودك..!!وشوفتك بالدنيا كلها.....

لماذا تغادر بعد شهرين مالسه بدري..!! يعني نحنا صبرنا على الإنقاذ 27 سنة مَا حانصبر عليك أنت.. مَعقولة يارَاجل..!!


ثُمّ لماذا أصلاً تغادر يا حمّيدة..إنت أصلاً الزيّك منو...؟
!لماذا تغادر وانت وزير وتاجر ودكتور ومُقدِّم برنامج وسبعة صنائع والبخت ضائع في مُؤسّسات الحكومة بس..!


لماذا تغادر والزيتونة تتوسّع وتتجمّل ومستشفى الخرطوم تنكمش وتُجفّف......لماذا تغادر والمستشفى الأكاديمي ينجب ابناً غير شرعي هو مستشفى التميز..في حين تحتضر المستشفيات الحكومية بنات الحلال..!



لماذا تغادر وأنت تُرسخ للعلاج الطبقي والتعليم الطبقي...!!


لماذا تغادر ومرضى السرطان يُهاجرون إلى ود مدني بحثاًعن العلاج الكيميائي بعد تعطل الجهاز الوحيد في مستشفى الذرة بالخرطوم..؟!


طيِّب أقول ليك حاجة..... والله نحنا أصلاً ما حاننساك ومُستحيل ننساك.....كيف ننساك بس.....انت.. انت بتتنسي..تررم تررم..ما انت روحنا وحبنا..مع الاعتذار لشاعر الأغنية.


حتى لو استقلت يا حمُيدة..كيف ينساك المرضى الذين يهرولون بين المستشفيات بحثاً عن أساسيات الإسعاف في أقسام الطوارئ.....كيف ينساك المُواطن الذي يشتري القطن والشاش والبنج والإبرة من الصيدليات لتضميد جرحه أو خياطته....... كيف ينساك من يحملون مريضهم داخل درداقة بين المستشفيات بحثاً عن أنبوبة أوكسجين أو سرير في عنبر أو زول ساااااي يقول ليهم الله يجيركم..!


كيف ينساك من يتسوّلون حق الدواء في ظل عجز الحكومة وفقر المستشفيات وبرنامج النصب المُسمى التأمين الصحي والذي لا تغطي مَظلّته عورة فشلكم.. كيف ينساك المرضى والأدوية إمّا مغشوشة أو معدومة أو مُتاحة بأرقام فلكية..!



ثم لماذا تعزي إضراب الأطباء إلى أنه إضرابٌ سياسيٌّ......يعني الطبيب من هؤلاء يستحمل البهدلة والمُرتّب الضعيف والبيئة السيئة وكمان الضرب من قِبل المُواطنين والقوات النظامية ويستحمل أنه أنت وزيره وخشمو مايفتحو..!


خارج السور:

والله حاتوحشنا الضفادع!!

*نقلا عن التيار


تعليقات 12 | إهداء 0 | زيارات 3463

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1529944 [كاره الكيزان]
5.00/5 (1 صوت)

10-08-2016 10:14 PM
ما بدري يا خليفة

[كاره الكيزان]

#1529742 [عبده]
0.00/5 (0 صوت)

10-08-2016 02:20 PM
ابنتي الاساذة سهير

الله يديك العافية ..
مفخرة لوالدك والله ..
سيظل مامون حميدة ومن على شاكلته كابوسا في وجدان الشعب السوداني لن يخرج منه الا بعد الحساب ..
وياله من حساب ..

[عبده]

#1529717 [ابو محمد]
0.00/5 (0 صوت)

10-08-2016 01:15 PM
ربنا يديك العافية
اضربي الكلاب
اليومين ديل انتي رهييييييييبة

[ابو محمد]

#1529501 [سيف رمضان]
0.00/5 (0 صوت)

10-07-2016 09:46 PM
حتى انت ياسهير ؟؟؟؟

[سيف رمضان]

#1529498 [هشام]
0.00/5 (0 صوت)

10-07-2016 09:38 PM
برافو سهير ماقصرت عملت ليهو نفسيات لو بحس البهيم دة

[هشام]

#1529471 [ABDALLA MOHAMED]
0.00/5 (0 صوت)

10-07-2016 07:18 PM
يديكي العافية يا استاذة سهير

[ABDALLA MOHAMED]

#1529374 [اوكامبو الضكر]
2.50/5 (2 صوت)

10-07-2016 03:03 PM
غور يا مامون حميضة ولا بارك الله فيك والقصة ما انتهت لابد من يوم للحساب والجرد في الدنيا قبل الآخرة ما بنخليكم لي الله إن الله سبحانه وتعالى مخير معاكم الشعب السوداني سيحاسبكم يا كلاب وقسما بالله ندخل ليكم في بيوتكم دا لو بقيتو رجال وما شردتو من البلد دي

[اوكامبو الضكر]

#1529366 [مستغرب]
0.00/5 (0 صوت)

10-07-2016 02:39 PM
ولماذا تغادر يا حميده بعدما أصبحت مهنة الطب لا نؤكل عيش الا خارج السودان وفى حالة عمله فى السودان ياخد مصروفاته من امه وابيه

[مستغرب]

#1529278 [الصقر الجائع]
0.00/5 (0 صوت)

10-07-2016 08:59 AM
التسويهو تلقاهو
تبا لكم يا حكومة

[الصقر الجائع]

#1529149 [ابونزار]
5.00/5 (2 صوت)

10-07-2016 12:14 AM
صديق عزيز ما عندو شغلة باساليب الاتصالات الحديثة طلب مني ان انقل للاستاذة سهير ما يلي
"يا زولة انتي والله اليومين ديل عاجبانا عجب..إلا قولي لي انتي حبوب فؤاد المهندس دي لقيتيها وين؟"

[ابونزار]

ردود على ابونزار
European Union [abushihab] 10-07-2016 07:35 AM
والله يا ابونزار انا ماشي عشان اكتب نفس تعليقك دا, وانا شريكك, هاها. مع تحياتي لك ولصديقك.


#1529120 [المغبون]
5.00/5 (1 صوت)

10-06-2016 11:31 PM
والله كلام ، رضينا بالهم والهم ما راضى بينا
فى 61 يا دكتور

[المغبون]

#1529109 [حكم]
5.00/5 (2 صوت)

10-06-2016 10:33 PM
وليه المغادرة بعد شهرين وما تكون اسع؟

[حكم]

ردود على حكم
European Union [abushihab] 10-07-2016 09:57 AM
ليتدخل اكبر عدد من المطبلاتية ويرجعوهو.


سهير عبدالرحيم
سهير عبدالرحيم

مساحة اعلانية




الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة