ليه اليأس؟
10-10-2016 10:52 PM




العبد لله يقر ويعترف بأن الحكومة غلبت فينا وإننا شعب (مش وش نعمة) كما يقول أهلنا في شمال الوادي وإنو لا بعجبنا العجب وللا الصيام في رجب وإننا شعب مفترى ومن فقرنا وعنطظتنا سدينا نفس الحكومة التعبانة فينا .. حكومة ليها 27 سنة لم تألو جهداً خلالها من (نغنغتنا) والعمل على إسعادنا بينما نحنا نقوم بالتنكيد عليها حتى تعبت ويئست مننا ومن جحودنا وكفرنا بنعمتها مما جعلها تضطر وكلها أسف لمعاقبة كل من يتسبب في خلق ونشر مناخ تشاؤمي بين أفراد الشعب !!
العبدلله يقر ويعترف بأننا تحولنا إلي شعب نكدي عابس الوجه (مكشر) تخين الجلد لا يشعر ولا يحس يغلب عليه التشاؤم ، شعب من كثرة الضغوط أصبح (يكلم روحو) ، صحيح إنو الحكومة مقطعة روحا علينا وكل أمانيها تشوفنا في (أحمد شرفي) لكن المشكلة فينا انحنا لأننا ما عاوزين نتفاءل ، لازم يا جماعة نتفاءل والأسعار كل يوم زايدة ، لازم يا جماعة نتفاءل و 60% من التلاميذ ما عندهم كتب ، لازم يا جماعة نتفاءل وإمتحانات الشهادة بقت (تتسرب وتنكشف) ، لازم نتفاءل ونسبة البطالة بقت 90% ، لازم نتفاءل ونسبة العنوسة فاقت ال 80% من الجنسين (طبعن) ، لازم نتفاءل وأكثر من 30 ألف مواطن يتركون البلاد شهرياً ، لازم نتفاءل ومرتب الموظف أصبح لا يكفيه أكثر من أسبوع واحد، لازم نتفاءل .. لازم .. ليه اليأس ؟؟ ونحنا علي رأس قائمة الدول في معدلات الإصابة بأمراض السرطان وفيروس سي والفشل الكلوي !! ، وليه اليأس ونسبة المتسولون في العاصمة (شايفنها برااكم) !
ليه اليأس ونحنا في ذيل الدول شفافية وفي أعلاها خرقاً لحقوق الإنسان .. ليه اليأس ونحنا حتي الكورة (خايبين) فيها وآخر كأس خارجي شلناهو سنة 1970 ولم نصل لكاس العالم ولا مرة !
ليه اليأس وروح المواطن أصبحت (لا شيء) وما تساوي (تعريفة)... بحيث خلت المستشفيات من أي حاجة حتى (الحقن والشاش) مما جعل الأطباء يضربون عن العمل ؟!
ليه اليأس .. وبعض الأحياء تقطع عنها الماء بالأيام بينما (النيل) يبعد عنها أمتاراً ؟
ليه اليأس والسرطانات تضرب معظم الولايات بحيث صار معدلها في البعض 3 حالات في الأسرة الواحدة (مش حالة في كل 3 أسر) !
ليه اليأس ومعظم بناتنا قد وصلن سن (اليأس) ولم يتمكن من اللحاق بقطار الزواج (المركون) في محطة (المستحيل) بعد أن أصبحت الحياة لا تحتمل تكوين أسرة؟
ليه اليأس .. والرشوة قد أصبحت (عينىي عينك) وأي معاملة لن تتم ما لم يقوم المواطن بدفع المعلوم
ليه اليأس .. والتعليم قد أضحى مقصوراً على أبناء الأغنياء والذوات بحيث أضحت رسوم رياض الأطفال تفوق العشرة ملايين في السنة !
ليه اليأس وقد أضحت الوظيفة من نصيب الشخص الذي يحمل كارت مكتوب عليه (حامل هذا الكارت يهمني أمره) وليس من هو كفؤ وجدير بها .؟
ليه اليأس ودخل (الحنانة) في اليوم يعادل مرتب (أستاذ جامعي في الشهر) ؟
ليه اليأس .. والمجتمع قد صار هدفاً لحاويات المخدرات (مجهولة المصادر) ؟
ليه اليأس وشبابنا بدلاً أن يكون عضوا فاعلا في المجتمع أصبح يبيع بعضاً من أعضائه لتعينه على مصروفات الهجرة عبر (مراكب الموت) ؟
ليه الياس .. والحرب مستمرة بين أبناء الوطن الواحد .. وقد إمتلأت معسكرات النزوح التي تفتقر إلى أدنى مقومات الحياة !؟
ورغم أن الحياة جميلة وتدعوللتفاؤل مثلما رأيتم ورغم كل ما تبذله الحكومة ووزراؤها ومسئولوها من جهود جبارة إلا أن الشعب السوداني شعب متشائم لا يعرف التفاؤل طريقاً إليه .. ليه ما تعرف؟
يبدو لي أن العيب فيك انت أيها المواطن ..لأنك ما وزير في الحكومة.. ولا عضوفي البرلمان ...ولا وال أو معتمد لأنك لو كنتا واحد من ديل كنتا ح تشوف الحياة (وردية) وكنت ح تشوف إنو أي حاجة عال العال والدنيا لونها (بمبي) وإنو لا عندك مشكلة سكن .. ..لا أكل ..لا شراب ..لا كهرباء.. لا مواصلات .. لا علاج !
من وين نجيب التفاؤل والدولار يوالي الإرتفاع وهذا الشعب المسكين ما عارف السبب .. وما عارف القصة دي حدها وين؟
من وين نجيب التفاؤل والشكوي من الفساد ملء السمع والأبصار ومع هذا لم نر مسئولا واحدا تتم محاسبته وأي مسؤول سادي دي بي طينة ودي بي عجينة ولما تسألو يعمل (رايح) ! من وين نجيب التفاؤل وقد أصبح أفراد هذا الشعب كالأيتام على موائد اللئام (الحكومة والمعارضة) !!
كسرة :
ليه اليأس والبلاد تدار بطريقة (رزق اليوم باليوم) !!
• كسرة ثابتة (قديمة) :أخبار ملف خط هيثرو العند النائب العام شنو؟ 82 واو - (يعني ليها سبعة سنوات بالتمام والكمال) ؟
• كسرة ثابتة (جديدة): أخبار تنفيذ توجيهات السيد الرئيس بخصوص ملف خط هيثرو شنو؟ 40 واو (يعني ليها ثلاث سنوات وسبع شهور)
الجريدة


تعليقات 11 | إهداء 0 | زيارات 6382

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#1531743 [محمد غالب]
0.00/5 (0 صوت)

10-12-2016 04:47 PM
المريح في الأمر إننا وبلا استثناء سنموت ونقف أمام العدل المطلق الذي نبحث عنه بإستمرار فيؤخذ منا حق من ظلمناهم ونأخذ حقنا كاملا ممن ظلمونا
(انا ما متشائم) لكن إن شاء الله القيامة تقوم
قابلة لي واحد من اهنا في ريف البطانة ودار الحوار في الدين والتدين وستهليت حديثي معه
هل تصلي الفجر حاضرا
فقال لا
قلت له أين انت من الذين يقومون للفجر في عز البرد
قال هم مساكين لا يعرفون الله
قلت هم يخافون الله وانت لا تخاف الله
قال انا اخاف الله واعرفه لكني أخاف الحكومه أكثر
قلت كيف
قال الله رحيم وهؤلاء لا يعرفون الرحمة
في قرارة نفسي أحسبه أعطاني درس
استغفر الله العظيم

[محمد غالب]

#1531737 [tigani]
0.00/5 (0 صوت)

10-12-2016 04:25 PM
ليه الياس ده ومخرجات الحوار الوطني عبارة عن تصفير لكل بلاوي الانقاذ علي مدي ال27 سنة ليه الياس ده وللانقاذ مدافعين مثل الامين العام للشعبي الذي ما انفك يحدثنا عن تطبيق الشريعة الاسلامية المفقودة ليه الياس ده وكثير من الاخزاب والجماعات التي تتخذ من ممارسه السياسة نافذة بل بابا واسعا لتحقيق المكاسب المعنوية والمادية وترك الشعب السوداني لفجر كاذب لايسمن ولا يغني من جوع ليه الياس ده ونحن ننحدر رويدا رويدا الي القاع......ليه الياس ده وليس هنالك اي اشارة للمساءلة ...نحن نسال هل نجح الانقاذ علي مدي ال27 سنة؟ وفي ماذا ؟ ولماذا نعتقد انها سوف تنجح في ال30 سنة القادمة....والله ده غلوطية كبيرة جدا.

[tigani]

#1531416 [فتونة]
0.00/5 (0 صوت)

10-12-2016 07:31 AM
با جبرة ليها الناس ما تتفاءل وانت قلت بعضمة لسانك دخل الحنانة فى اليوم يساوى دخل استاذ جامعى الحنانة دى بتحنن منو معناه القروش راقدة والنسوان بتحننو والحنة لو المرأة راجلها مفلس ما بتتحنن حتى لو عندها حق الحنة يعنى الرجال عندهم قروش ياخى الرزق عند الله ما عند بشر اتفاءلوا خيراً

[فتونة]

#1531031 [suzan osman]
0.00/5 (0 صوت)

10-11-2016 12:13 PM
لك التحية الفاتح جبرا عايزه أديك كسره مزلزله قبل يومين زارتنا مجموعه نسوه من جمهوريه سوريا بطلب المساعده في حي الشعبية بحري وأدخلناهم المنزل وقدمنا لهم ما جاد به كرمنا السوداني من حسن ضيافه وهلم جرا وأخبار سوريا وتشتت الأسر وكيف بتتواصلوا مع بعض وكانت كلها مآسي في مآسي ..... لكن السؤال الذي سألته للأخوات وحتى اللحظه عقلي لا يستطيع ترجمه الإجابة فكان سؤالي لماذا لجأتم للسودان البلد التعيس في الزمن التعيس فكانت المفاجأة أنها قالت كل الموجودين في سوريا حالياً وعايزين يغادروا للخارج عندهم معلموة أنو السودان خلال 24 ساعة تستلم الجنسية السودانية بدلاً من بطاقه اللاجئين والخطوات تعمل معروض في بوابه القصر الجمهوري الإستقبال ترفع للرئيس يقوم بالتصديق الفوري بالجنسية بالتجنس وفي اليوم الثاني نورد 5 ألف دولار لمدير مكتب الرئيس عن كل راس ونستلم كشف الجنسية فيهو من 50 لي 100 شخص يومياً ونذهب للرقم الوطني قسم القضائية حيث تقضي باقي الإجراءات خلال ساعة بالظبط نستلم الرقم الوطني السوداني ونطلع الباسبورت السوداني مهزله وقانون التجنس السوداني المعروف للكل أنو الأجنبي يقضي فترة عشرة سنوات متواصله دون مغادرة للسودان وسيرة ذاتية نظيفة (يعني الفيش ) وبعد كده يقدم وبعد مماطله وجرجرة 5 سنوات ما بين مدير الجنسية ومدير عام الشرطة ووزير الداخلية تخرج الجنسية السودانية . وقالت لي كدي أمشي براكي شوفي عدد المراجعين السوريين اليومي في القسم ده
كسرة : علشان كده الدولار طالع نازل حسب السوق السوري بتاع تجارة البشر ؟أفتونا يا علماء السودان في الأمر ده وروحوا براكم شوفوا بي عينكم وأسألوا أخوانكم السوريين عن الإجراءات

[suzan osman]

ردود على suzan osman
Romania [abdulbagi] 10-11-2016 04:21 PM
اشهد الله ان اخ سورى اخبرنى قبل يومين ان السوريين يذهبون للسودان من اجل التجنس والجواز الذى يساعدهم فى الذهاب الى اى بلد اخر


#1530995 [طارق]
5.00/5 (1 صوت)

10-11-2016 10:40 AM
نسبة البطالة 90% ؟؟
التلاميد الماعندهم كتب 60% ؟؟
نسبة العنوسة 80% ؟؟

أنا يدوب عرفت أنت يائس لشنو.. لأنك عايش في واقع بتاعك براك.. واقعك الغير واقعي ده أسود قبيح.. قال البطالة 90% والعنوسة 80% قال.. أهو أنتو سبب المعاناة والقهر والتخلف زاتو.. يا الفاتح جبرا الهظار شئ والجد شئ آخر وأنا شايفك جادي في إحباط الناس وبقول ليك: أتقي الله وخاف ربك.

[طارق]

#1530990 [abdulbagi]
0.00/5 (0 صوت)

10-11-2016 10:27 AM
1-ليه البأس و70 فى المائه من ميزانيتنا يذهب للامن ومخصصات الدستوريين 2-ليه اليأس وواحد فى المائه من ميزانبتنا يصرف على الصحه . واحد فى المائه على الصحه مش كتير ياجبرا . لانه المواطن بياكل كويس ويشرب كويس والشوارع نظيفه والهواء نقى بعد دا كلو يمرض ليه الا اكون افترى منو ساكت

[abdulbagi]

#1530984 [خواجة]
0.00/5 (0 صوت)

10-11-2016 10:08 AM
أخبار الاكتئاب والزهايمر وصل وين.

[خواجة]

#1530958 [Awad]
0.00/5 (0 صوت)

10-11-2016 09:14 AM
يا ود جبرة بقيت تشوت ضفارى وقلت أحسن كده ولكن الشعب المسكين على موائد اللئام واللئام ليست المعارضة لكن هى الحكومة وبما أنك عارف ذلك فكان أحسن مع شوتتك دى تقول الحكومة الحرامية وعلى رأسها ديك العدة اللابس فنيلة ميسى وفستان لولى الحبشية.تانى ماعاوزين تغطية الرأس والعيون فالشوت يبقى شوت فى المرمى وليس بعيدا قليل من المرمى.

[Awad]

#1530895 [Amani]
0.00/5 (0 صوت)

10-11-2016 07:06 AM
يه اليأس ودخل (الحنانة) في اليوم يعادل مرتب (أستاذ جامعي في الشهر) ؟ دي يالفاتح جبره مفارقه ولا ما مفارقة اذا دخل الحنانه كده معناها في رفاهية ومافي زول جعان ياخ انت بتتكلم عن الجوع جوع وين والمطاعم الغاليه محل تخت كراعك مافي

[Amani]

#1530886 [محمد فريد]
0.00/5 (0 صوت)

10-11-2016 06:14 AM
الف الف رحمة تنزل على السودان غايتو بس الباقى سد النهضة يجى يمسحو من الواطة اها النشوف تانى بحكموا شنو

[محمد فريد]

#1530882 [الحلومر/خريج الابتدائية]
0.00/5 (0 صوت)

10-11-2016 05:47 AM
ليه اليأس ومعظم بناتنا قد وصلن سن (اليأس) ولم يتمكن من اللحاق بقطار الزواج (المركون) في محطة (المستحيل) بعد أن أصبحت الحياة لا تحتمل تكوين أسرة؟
البنات مفتريات يا جبرا ما دايرات يركبن قطار الزواج ومنتظرات يركبن قطار الحكومة المكندش
كسرة مؤقتة- مشروع المحطة النووية متي يوضع حجر الأساس ؟؟
سؤال برىء - الحكومة دي مصدقة انو الشعب مغرم بيها ولاشنو ؟؟

[الحلومر/خريج الابتدائية]

الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة