المقالات
السياسة
ارشيف مقالات سياسية
برطعة في القصر الجمهوري
برطعة في القصر الجمهوري
04-15-2011 02:23 PM

برطعة في القصر الجمهوري

أسماء الجنيد
[email protected]

سلام عليكم يا اهلنا كلكم وجمعتكم مباركة

للناس الما متابعننا في الحلقتين الفاتت من مسرحية الإنقاذ الكيزانية
تابعونا مع ملخص لما سبق نشره من كلام عبد الرحيم في المشهد الأول (حرررم نتلب في تل ابيب ) وكان حواره مع الريس ذات نفسه ’ واتخارج بعد زرزرة معتبرة وكان دور الحلاقة بعده للنائب الشيخ على ود عثمان ,, وهنا كبرت المؤامرة ’ حيث ان الشيخ الوقور لبس الطاقية لي المو نافع وفتنو مع الريس وكب الزوقة ,, وكان ده في المشهد التاني تحت إسم (الطيارة ام ضنب,, ) نواصل البرطعة في القصر الجمهوري والمرة دي مع ابو العفين , نشوفوا بتصرف كيف ,,!!!!!

********
برطعة في القصر الجمهوري
00000

قبل ما يتخارج الطفل المعجزة مصطفي اسماعيل كويس من مكتب البشير ،يجي نابل زي النبلة نافع المو نافع ,

ايوة يا ريس انا هنا قريب.
ينط الريس
قريب وين ؟ قريب زي قرابتك مع اهلك اليهود الفتنتني معاهم.!!!
كنت وين جاي تدبأ لي زي الحرامي؟
متلبد زي الدبيب ورا الصريف في الخريف!!
كنت بتتجسس علي زي ما قال شيخ علي ؟؟
بتجسس علي آآآآآ نافع ؟
يقاطع نافع,
لا حررررررم
انا عارفك بتناديني بعدما نضمت مع عليي عثمان
بعدين يا ريس البخليهو هو شيخ علي، وانا نافع حااااااف شنو ؟
يقاطعو الريس.
آآآآي حاااااف وكمان ماك نافع زاتك .
كتر خيري انا الزمن ده كلو بناغمك على غباي بي نافع.
الله ينتف جلدك كان نتفت ريشي وقصرت اجلي
انا عارفك بتجسس علي وبتجسس على البلد دي كلها،
ده ما شغلك البتاكل منو عيشك .
يقاطع نافع ,,
انت مالك الليلة نفسك حار معاي كده يا ريس؟
اكيد علي عثمان ده قال ليك كلام زعلك مني,
ينهره الريس بي حدة.
وانت بالله عليك و في زمتك دي ياتو يوم عملت ليك حاجة كويسة؟؟
ما ياها حالك ، كلها مسويها ضرب وإعتقالات و تعذيب في الناس وبيوت اشباح ، وملافيظ ورجالة بي ضراعك ، وفي الأخير جابتلها مساخة .
لحس الكوع دي زاتها اتعلمناها منك انت.
كل البلاوي دي جبتها معاك من كورساتك الجيت بالينها بيها من إيران
عذبت الناس وكرهتهم فينا.
وهسة ضربة اليهود لينا في بورتسودان دي كلها طالعة من راسك المقودس ده.
ويهب الريس داير يعمت نافع ,
وتقوم الكركبة
كرب رب كو كع بردلب تااااااخ
كلو في الهواء ساااااااي
ده يلافح وداك يتدرق ويتحرقص ويفنجط من تربيزة لي تربيزة
ومن كرسي لي كرس.
يكورك آآآآ زول اقيف ,,, اقيف آآآ زول النحكي ليك انا
اقيف كدي اسمعني زي ما سمعت شيخك علي ده.
اسمعني بعدين الداير تسويهو سويهو ...
علي بالطلاق طلاق تلاتة الزول الإسمو علي عثمان ده بدور
يطفشني من البكان ده حسادة سااااااي منو .
. علي ده مكجني من يوم اتلاقينا.
حررم قلبي ابى دخلته عليك الليلة في مكتبك , من قبيل بزازي بي برة
. عااااارفو جاك هنا ضرا شراه ومشا.
انت زاتك خابرو وخابر مساختو معاي.
انت نسيت يوم عيد الضحية الفات ده؟
جيت باركت ليكم العيد .
من الصباح . طايبت الناس كلها من طرف ، من جيت عندو هو
سلمت عليهو وقتلو العيد مبارك عليك العفو لله والرسول،
نتل ايدو من ايدي وفات.
ما بدورلو عفوا معاي ولا بدورني ..
ينط الريس.
نان انت بتندار يا الطير ابو منقار.؟
قاعد تنقر في روسينا من طرف ونحن مانا خابرين.
كل يوم بلية منك .
وانا قاعد فوق اضني التخان ديل، التقول محوطني عند وداعية !!!
قدر ما يقولوا لي ات فعلا ماك نافع ، اشيل واتعضرلك ، التقول انا ابوك.
الببو اليشقك نصين ....
نص نوديهو دارفور للناس الهجمتهم ورجمتهم وشردتهم.
ونص اسفروا لليهود ان شاء الله يترسوا بيك الشارع.
ولا يسدوبك حفرة ,,
,,,,
العوا حدها السماء والحليفة واقفة ألف أحمر ،
وريسنا يغلي ويزبد.
والعرق يتنتف منو زي موية نقاع زير السبيل .. تف تف تف ....
ونافع قلبو ينتح متل طاحونة الملح من الجكة والتدرق . دق دق دق ,,,
يعاين لي الريس بي طرف عينو، اها بتسمعني ولا افوت ؟
يقاطعو الريس بي نهرة.
تفوت وين ؟؟ تفوت وين يا الدابي اب درقتين ؟؟؟
والله الليلة يحلك مني الحلا بلة...
نافع.
سمح اسمعني وبعدين افجخني في البكان ده ، إن شاء الله تقرشني بي سنونك انا قبلاااااااااان .
الريس ,, اقرشك ؟ مالي جنيت ؟؟ بتدور تسممني ؟؟
حرم افجخك بي جزمتي دي ، اها شايفها الجزمة دي دي .
وأطرشقك وأبعج بطنك ، والله إلا يخموك بي كوريق من هنا.
ونافع يحاول بكل قواه وحيلته انه يهبد الريس في كرسيه.
لأنه منظر الريس بلا هيجان وبلا زعلة لا بتقابل ولا بتصابح.
ناهيكم عن الغضبة والفوران المخلياه يرغي ويزبد ،،
تحلف تقول التور الهايج في السلخانة.
غالب الضباحين والجزازير من المسكة و الضبح..

بعد مزازة و خراج روح حتي قبل الريس يسمع كلام ابو العفين نافع.
الريس,,
اتكلم لكن بي شرط !
عندك ربع ساعة دقيقة ما تزيدها ،واي كضبه والله الليلة إلا تنوم في شرفي.
دايرين ترحلوني وتقعدوا تقدلوا فيها إنتو ؟ تقعدوا في نارا جمرها يشطشط .
بدأ نافع روايته .
اسمع يا ريس البتقول عليه شيخ علي ده، داير كرسيك الهسه انت قاعد فيهو ده.
يحمر ليهو الريس وداير ينط ..
اصبر النتم كلامي وبعدين انت اجدعوا في البحر.
علي بالطلاق الزول ده كل يوم مسافر وكل يوم في بلد، ما لي خيرا ليك.
انت عارفو ياهو زاتو هو دبر محاولة إقتيال حسني مبارك في الحبشة.
وانت زاتك يا ريس زعلت من الموضوع ده لما عرفت علي خطط ودبر الموضوع من وراك. متذكر ولا اذكرك ؟ والترابي حي الدنيا دي شاهد على الكلام ده ، هداك ليه متربس في كوبر امشي اسعلو,,
وبعدها مشا خت راسو مع حسني مبارك زاتو وخلاك تتنازل من حلايب ,
وانت عارف الشعب السوداني كلو غضبان منك بسبب موضوع حلايب.
والجاب ليك الغضبة هو علي عثمان وافكاره الخشنة البدور يطفشك بيها من الكرسي,,
وهو الجاب الجنجويد. وجندهم وسلحهم وخلاك تعترف بي عضم لسانك انك كتلت عشرة ألف مواطن مدني في دار فور، وخلاك تقول ما داير اسرى
اها ده ياهو الورطك مع اوكامبو ,,
بعدين يا ريس علي ده زاتو ياهو الورطك في نيفاشا الخلتك تفصل الجنوب وتزيد غضبة الشارع عليك .
يقاطع الريس
انت ده السبب في فصل الجنوب ، انت ده يا اب فاخورة ، بي سبب مشاكلك ومساختك وشتيمتك ولؤمك العاملها لي مع ناس الحركة الشعبية ؟ .
فصلنا الجنوب ،انت السبب في فصل الجنوب ، يفصل ركبتك ويخليك تتلوح بي ساق برا ركب شاحد ليك الله.
نافع متنح وخجلان من عمايلو.
الطبع كده يا ريس ، الطبع غلب التطبع لكن المهم انا دايرك تعرف عمايل علي اكتر من عمايلي،. انا صحي كتلت وعذبت وشردت لكن ماني طمعان لي في كرسي، علا علي ياهو البخطط لي شيلتك ويقعد مكانك .
بي أي طريقة بدور يكره فيك الشعب .
يقاطعه الريس,
وهسة انت شايف الشعب بقالد فيني في الشارع ؟؟
ولا شايلين صوري حايمين بيها ؟
تحوم عريان بركة ناس ام ضوا بان.
ما هداك الوش بوك كلو ملان منابزة ، والحيشان الفي النت كلها شتيمة
جازنيي جز حمار في السوق..
ده غير واحدين رسامين خلوا شغلتهم كلو كلو وبقوا يشيلوا ويلصقوا في صوري ويبهدلوا فيها، التقول انا ناقص بهدلة ، ولا من سماحتي القاطعة,
ينط نافع
اها انت برااااااااااااك جبت الرايحة
شفت الحاجات دي والله انا ما بخبر دربها كلو كلو .
يا زول انا حدي معاك القصر ده من امشي بيتي لا بعرف نت ولا غيره ، الموبايل ده زاتو ما بخبروا, إلا اناغم الشفع يجي يوروني الحاصل فيهو شنو .
يقاطعوا الريس بي حرقة,,,
نااااااااااافع ما تكضب انا قلت ليك ماااااااااا تكضب ,
انت ماك رئيس شعبة التهكير والتنفير؟ وانت مش العملت وحدة لي مكافحة إرهاب ناس الفيس بوك؟
واعلنت الجهاد على ناس الإنترنت؟ وهسي دي
ما عملت الكتيبة المسلحة لسحق جماعة الفيس بوك والإنترنت؟؟
وحلفت انك تصلي بيهم العصر في بني قريظة؟؟؟
بقيت نبي كمان آآآ نافع ؟؟ نبي عديــــــــل ؟؟ يبنوك حيطة قول آمين,
يرد نافع بي عين مكسورة .
الفيني ده كلو انا عارفو ومعترف بيهو ، لكن ما هبشتك في كرسيك
ولاني مفكر اطعنك في ضهرك.
هسي يا ريس بالله عليك الكلام القلتو ليك في شيخك علي ده مو صحيح؟
امورو البسويها جوة البلد وبرة البلد ، بعرف المحن وبخطط ليها
ده مربى مع الخواجات وبعرف اللغات ومتخرج من الجامعات وبخبر الدريبات .
كلامي مو صحيح ؟؟
آآآي في دي صحيح
اها جاك كلامي الأولاني ؟.
عشان كدي آآ خوي خت الرحمن في قلبك ده ,,
واعرف صليحك من عدوك.
ما كل مرة يجيك شيخ علي يولع النيران في الحيشان ويمرق يمشي
ويخلينا نحن ننكوي بيها برانا.
الزول ده عشان عارفني انا من ايدك دي لي ايدك دي .
بدور يبترني ويقعد هو براه يتحكر ليك ..
لامن يقنطرك وينهزك بره ويقعد هو ويجيب ناسو.
وبعدين يقول للناس انا معاكم انتو وقلبي عليكم , شلت ليكم رأس الحية
الهو انت يا ريس.
يقاطعو الريس بي نهرة
الحية التلحقك ابوي
نافع
انا بوصف ليك و بقول ليك الحكاية ساي ، لكن والله ماني شمتان فيك
. ات بس اسمعني وقول بسم الله وانعل إبليس.
اها بعدما يقلك من الكرسي يقول ليهم مو البشير ده
عامل المشاكل كلها مع الأمريكان ، ومحظور من السفر برة السودان
ومنكد علي الشعب الغلبان
وقسم البلد كيمان كيمان.
فصل الجنوب وبدور يفصل دار فور وحلايب .
اها اول بالتبادي بمشي يصالح اليهود ويصالح الأمريكان
ويجيب ناس حقوق الإنسان والحيوان، ويقول ليهم انتهينا من البشير
والخواجات يكشحوه بي حبة قروش يشيل نصها، ونصها التاني يغش بيه الناس ويفتكر انه عشان الغلاء الشديد ممكن بي زيادة الفين في الراتب
يخلي الحريم يزغرتن في الشارع
والرجال يعرضوا لا الصباح.
وكمان ينسوا الفات كلو ويهللوا للريس شيخ علي.
اها انت يا ريس لما علي يقعد في كرسيك ده انت بتكون وين الوقت داك ؟؟ .....
البشير متمحن طابق يدينو في راسو زي محروقة الحشا...
ومسمر في كرسيه موجع..
يقبل على نافع بي صوت عالي...
شكيتكهم على سيدي الحسن ود حسونة يهينكم ويقطع دلاقينكم
ان بتدوروا تجننوني وتسرحوني بالخلاء
شاحد الله تجنوا إنتو و انا بي ايدي ديل اربطكم في ضريح حسن ود حسونة.
كان انت كان علي ود عثمان .
نافع
علي ولا شيخ علي ؟؟
الريس ..
علي ساااااااااااااااي العلية ام زرد
ينط
نافع
الله اكبر
الله اكبر
عملك انفك تب آآ ريس
انا كنت عارف الزول ده كان مسويلك عمل
الله اكبر ,, الله أكبر تهليل تكبير ,,
ويتخارج نافع تحت التكبيرة الكبيرة
ويخارج روحو من الميتة المحققة
يخلي ريسنا
مرارته مفقوعه
وعينو بي دموعه
ورقبتو مفدوعة
وبطنو ميجوعة
والفي راسو مقطوعة
****
الدعاء على أهل الإنقاذ
يا الله الكريم ويا رب العرش العظيم تلم فيهم باعوض بلاعات الإستباليات كلها على قول حبوبتي التومة ,
وتقرص لحمهم وتفك فيهم ملاريا بعد يومين تبقى تايفويد
تخليهم يتحرقصوا ليل نهار
وحمي يلمسوها بالعود
النبي قولوا آمين
ونواصل أن شاء الله


تعليقات 11 | إهداء 2 | زيارات 5620

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#129411 [isam]
0.00/5 (0 صوت)

04-17-2011 03:44 PM
المعلقين السلبيين ديل سيبك منهم
دة اجمل وابلغ نوع من الكتابات
وهو سرد حقيقى للوقائع
والظاهر كلامك حرق ناس عشان
كدة تعليقاتهم مسيخة
استمرى فى كتابتك اعانك الله


#129242 [ود فليل]
0.00/5 (0 صوت)

04-17-2011 11:10 AM
انا شايف انك تكوني كاتبه دراميه احسن لك من الكلام البتقولي فيه دا وماتضيعي زمنك ساهي والله انت عندك موهبه دراميه حلوه انا بقترح عليك اقتراح شوفي حد عندو فلوس خليه ينتج لك فلم كوميدي والله بتربحي احسن


#128957 [ابو البنات]
0.00/5 (0 صوت)

04-16-2011 06:11 PM

اولا يابت الجنيد لو دا اسلوبك في الكتابة تكوني خسرتي جلد يبقي سقا علي نسق الامثال الشعبية التي تجتهدي في تضمينها كتاباتك.. طالما عندك هذا الخيال الواسع حقو توظفيهو في عمل درامي يساعد في حل او تنوير الناس بمشكلة اجتماعية لكن استمرارك في هذا النسق من الكتابات يسيئ ليك اولا من خلال اساءتك للقراء وعدم احترام عقولهم . اصحي شوية وشوفي بتعملي في شنو.


#128863 [محمد الطيب]
0.00/5 (0 صوت)

04-16-2011 03:44 PM
والله بضيعي في زمنك ساي حتي لوكنت بتكتبي في الدقيقة مائة كلمة أنصحك لوجه الله تعالي مايغشوك هؤلاء الذين يعلقون علي كتابتك ويثنون عليك . لمصلحتك وعشان تلقي الإحترام من القراء أجمعين أكتبوا بموضوعية وعارضي , لكن بإحترام لعقول من يمرون علي صحيفة الراكوبة.


ردود على محمد الطيب
Saudi Arabia [ابوشهد] 04-16-2011 07:15 PM
الى المدعو محمد الطيب (اسم على غير مسمى)

شايف الكلام ما عجبك وكمان حرقك قعدت تردد نفس عبارات الكيزان (لمصلحتك وعشان تلقي الاحترام). اما انك خسيس.
لكن ليكم يوم..


#128711 [محمد احمد]
0.00/5 (0 صوت)

04-16-2011 12:06 PM
آآآآآآمين يا رب العالمين ينزردوا في الدنيا قبل الآخرة آآآآآآآآمين يا رب العالمين وربنا يستجيب دعاك يا بت عمي الشيخ الجنيد


#128484 [عبدالباري]
0.00/5 (0 صوت)

04-15-2011 09:05 PM
التحية لك أسماء .. يوماتي تلقينا راجينك .. للمزيد من الأبداع .. لكشف فساد وتسلط هذه الفئة الباغية .. وندعو الله ان يستجيب للدعاء بزوالها

الى الجعلي
بدور بيهم شنو تاني كم سنه ؟ حاري شنو ... حاري ليك كبري و لا شارع زلط


#128447 [الجعلى]
0.00/5 (0 صوت)

04-15-2011 07:02 PM
كلامك حلو يابت الجنيد لكن الدعاء دا خليهو بكرة السبت الدنيا جمعة وفيها ساعة اجابة يمكن ان تصادف ونحن ما قنعنا من الجماعة ديل بندورن تاني كم سنة كدي


#128444 [Mohamed]
0.00/5 (0 صوت)

04-15-2011 06:57 PM
والله ابداع يا سومة


#128438 [الدرمبل]
0.00/5 (0 صوت)

04-15-2011 06:42 PM
و الله العظيم لو تيسنا عينو حمرة و عندو لسان حبوبتي التومة الله يبارك فيها دا كلو ما كان حصل و ما اصبح العوبة لاجندة و صراعات داخلية و شخصية ودّت السودان في داهية فالريس يشحن بواسطة ابو العفين و او شيخ علي و تفرغ الشحنة مباشرة في نهاية خطاب في رقصة عابرة و بكرة تبحث الاجهزة السياسية و الحزبية عن طريقة لمعادلة الشحنات السالبة التي افرغها القشير من خشمه سما يجعل جسم السودان يتلوي من افعال حيات الانقاذ و تبدا المعلجات بان القشير لم يقصد و اسئ فهمه و ان كل طلقاته و و طلاقاته والتي اطلقها بالفم الملان شلاضيم قد ذهبت ادراج الرياح و اخونا يلبت ولا بغم لو بقدر يقول مثل كلام حبوبة التومة في وجه ابو العفين و يستطيع الجامه لاراحنا من العفن البنقع مثل زير سبيل لم يدهن بالطوب المدروش لسد المسامات الزيرية و نردد معك الدعاء علي اهل الانقاذ و نقول امييييييييييييييييييييييييييييييييييييييييييييييييييين
ا
يا الله الكريم ويا رب العرش العظيم تلم فيهم باعوض بلاعات الإستباليات كلها على قول حبوبتي التومة ,
وتقرص لحمهم وتفك فيهم ملاريا بعد يومين تبقى تايفويد
تخليهم يتحرقصوا ليل نهار
وحمي يلمسوها بالعود
و التحية لك يا ابنه الجنيد


#128436 [عبدالباري]
0.00/5 (0 صوت)

04-15-2011 06:31 PM
يا بت الجنيد مالك علينا .. لو استجاب اللة لدعائك .. معناها ظهور نوع جديد فتاك وخبيث من الملاريا .. ملوث بالسحت .. ربنا يسنر ويلطف ..

الدعاء على عصبة الأنقاذ .. ذكرني الفاضل سعيد .. عليه الرحمة .. بت قضيم .. كان ردحت فيهم ردحي ..وما كان خلت ليهم صفحة يرقدو عليها

تخيلت عصبة الانقاذ عندها حبوبه .. حبوبه غير .. ما ذي حبوباتنا ... شايله موس طويله وسنينه .. تطهر على الطريقة الفرعونية ..

لو حبوبة الأنقاذ تمكنت من القبض على الماجدة .. صفية .. كانت قالت ليها .. تعالي هنا يابت ياقاهر .. يا ام عين قوية .. تمرقي الشارع بلا طرحه .. يا قليلة الحياء خجلتينا .. وفضحتينا .. وخليتي البسوى والما بيسوى يتفرج علينا.. تكضبي وتقولي فعلوا بي ..اغتصبوني .. وتقرص البنيه في الورك قرصه حااااره .. قولي تبت ياحبوبه .. ما بقول كده تاني ياحبوبه ... عشان قلتي توبه ياحبوبه وعشان انتي بت اسحق .. المره دي خليتك .. لاكين كان كضبتي تاني .. وحات ابوي فلان بوديك لى قدو قدو يأدبك ويقطع لحمك بالسوط.

واخيراً الدعاء علي عصابة الأنقاذ:
\" اللهم اهلك الظالمين بالظالمين واخرجنا من بينهم سالمين \"

يروى عن عبدالله بن أبي زيد القيرواني رحمة الله قال: رأيت جملة من الأدعية فما رأيت ولا جربت أسرع فى الاجابة من هذا الدعاء وكان الشيخ الفقية أبو إسحاق التونسي يدعو به على كل سلطان جائر وعلى كل لص خائن


#128360 [بت مريود]
0.00/5 (0 صوت)

04-15-2011 03:01 PM
آمين يابت الجنيد .
انشاء الله بعوض بلاعات المستشفيات والملارية و التايفود و المالطية والزاجلة المصرية معاه النزفية - تبدأ بشيخ علي و ابو العفيين و البرودلي ابو طراريم ويختمها ليهم اكامبوا .


أسماء الجنيد
أسماء الجنيد

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة