المقالات
السياسة
ارشيف مقالات سياسية
دافننو سوا
دافننو سوا
04-20-2011 08:24 AM

دافننو سوا

أسماء الجنيد

*****


بعد ما هلل وكبر نافع في مكتب البشير ، نبل توشاااااااك بي باقي خوفته ورجفته، لي مكتب علي عثمان .
خلى الريس يحقص زي ابو الحرقص في مكتبه.
نافع نفسو قايم موجه كلامو لي علي عثمان.
ده شنو السويتو فيني الليلة يا علي مع الريس ؟
علي عثمان ,
مدنقر في ورقو وعامل فيها ما فاهم شيء, في شنو؟ سويت شنو ؟؟
نافع,,
مشيت الليلة تقلت العيار وقلبت الدار فوق تحت !!!
يعاين ليو علي بي طرف عينو ومحمر ليهو,,
وانت السويتو شوية؟؟؟ كلامك فات اضاني بي هناك.
لا خليت اوكامبو ، ولا خليت نيفاشا ،ولا خليت حسني مبارك و حلايب ،كلها الليلة سوطتها بي كراعك.
نافع
كنت بتتجسس علي كمان ؟ وتقول لي الريس انا البتجسس عليكم ؟
علي ,
وانت كنت بتعمل في شنو ورا الباب لامن كنت انا مع الريس ؟
موقفنك غفير لينا ؟ قايلني ما شايفك ولا ما عارف إمورك واساليبك الخسيسة !!!؟
نافع,,
عمايلي خسيسة آي ، لكن لو ما انا وخجة الإنتخابات الأخيرة دي ، كنت إنت نائب الريس هسه؟ و متجدع من بلد لي بلد كمان؟
ما تنسا نحن ما دافننو سوا !! نسيت ولا اتناسيت ؟؟؟
بعدين اتفاقنا ما كان كده! عليم الله مرقني كرعيني منو الليلة ,, هاج وزبد فيني وبدور يعمتني من رقبتي يقصها لي .
عشان كده كبيت ليو العندي كلها، يا روح ما بعدك روح .
اخليه ينفرد بي واروح في داهية وتطلع انت الكسبان وتشيل الجمل بما حمل ؟
تلقاها عند الغافل دي . احسن تنعدل معاي كويس ، عشان نواصل المشوار ده لي قدام... ولا حرررررم عليا وعلى اعدائي.
بعدين انت زاتك صوتها من الأول كده مالك وكترت المحلبية ؟ انت عارف لا انا ببقى برا مكايدك وخططك، ولا انت بتبقى برا كضبي وتجسسي وصواتي الما عجبتك دي !!. وما تنسا بيوت الأشباح النجضت بيها الما بدورنا كلو..
نحن ألإتنين كاتلين الجدادة وخامين بيضها.. وريسنا ده ممسكنو ضنب الككو من زمنا خدو مشلخ .
خلي يرعي بي الضنب ده لامن هو يرعى في الخلاء بعدما يجن ويقعد يفلع في الناس ولا يعضض في هدومو
ويقيس ويعبر في جضومو.
ونحن ننفرد بي كل شيء , والله تاني إلا يقلعنا الله من فوق.
الحاجه التانية الريس ماسك في عبد الرحيم ، انت ما تخلي على غباهو ، بطنو طامة منو وشايفو زي اليوم الشال السمحين
دحين خليهو يا زول , ولا خليني انا النمشي اجيه ليه مكيدة جديدة ونركب عبد الرحيم التونسية يتحكر مع العجوز بن علي..
ينط ليه علي بي حدة رافع ايدو في وش نافع,
اوعااااااااك ... انا كلمتك قلت ليك تهورك ده يوم بغرقنا كلنا ,,,, تصرفاتك وافكارك المستهترة من راسك دي انا ما دايرها.
شفت عبد الرحيم ده بالنسبة لينا زي الدرويش في حلقة الذكر , يدور ويدور ويلف ساااااااي ما جايب خبر
نضايرو محل ما دايرين ، حسب المزاج و الكيف, لا مغلت علينا ولا موسخ كرعينا
بي هبالتو دي باقي لينا ضرا وساتر , والجن البنعرفو اخير من الما بنعرفو.
إن الريس شالو في حق الله ، نحن واطاتنا اصبحت.
عبد الرحيم زاتو ما تشوف تناحتو دي، اول بالتبادي بنقلب علينا وبمرق المرقوت الملبد تحت اللحفات ، .. تاني شيئ وده الأخطر . يقوم الريس يجيب لينا مصيبة زمان و يعين لينا كبة جديدة ويبقالنا خازوق في الطايووق.
دحين خلينا كده مرتاحين.
بعدين عليك الله وللمرة الألف إندفاعاتك المشاترة دي يا نافع خفف منها شوية ؟ لو في مصيبة انا متأكد بتجينا من شتارتك دي,,
بالذات مع ناس الشارع , تتحلف وتتجزم وتتوعد . فت الريس بي غادي , هسة بني قريظة دي في زول سبقك عليها ؟؟
قررررررررررررر يضحك علي
سامع الريس قال ليك بتدور تبقى نبي آآ نافع ؟ والله ضحكت لامن ضهري طقطق,
اها هسي دي في داعي ليها؟ براك بتسويها في رقبتك ، والمشكلة بتشبكنا نحن معاك ، كان بتقع انت فيها براك ما مشكلة ، عشان تتأدب . لكن بتجرجر لينا معاك الأزية .
كلمتك الف مرة مد كراعك قدر لحافك ,, هدد ، و وعد زي ما داير، لكن كمان ما تسويلك جنحات وتقول داير تطير تتلب في إسرائيل ، زي ما قالها الهطلة عبد الرحيم,
انت زاتك يا نافع اليومين ديل شايفاك ماشي في درب عبد الرحيم ، لامن تجيب اجلنا,,
يا زول ده آخر إنذار وزي ما قلت إنت يا روح ما بعدك روح ، المرة الجاية لو حسيت بيك كترتها وبديت تفرفر تاني ما تلوم إلا روحك دي.
كدي هسة امشي تم باقي جسيستك على الريس وشوفوا بعد الصاقعتين الجنو مني ومنك الحصل عليهو شنو!
ما تلقاهو نشف في كرسيهو ده ونرتاح منو ومن خلقته دي ...!
بعدين اتجسس بي ذكاء وما تتسايف في الباب يوم بقبضوك تحت العتبة,
بعدين في حاجة مهمة ،خلي الناس دي كلها في غباها ، ويفتكروا نحن فعلا متحاربين، واوعك تغلط تاني وتسلم على قدام الناس ، بحرجك تاني زي المرة الفاتت يوم العيد,, ركز معاي وقلل هوشتك دي...
امرق واقفل الباب ده معاك...
نافع’,,,
سمح مارق لكن انت زاتك يا شيخ الريس إن فرفرت لي بمرق الدافننو سوا زماااااااااان ، انا نافع ما عبد الرحيم نااااااافع يا شيخ علي...
يمرق نافع يتم باقي لبيدتو , يخلي علي عثمان يطقطق في اصابعينو , ويطنطن بصوت مسموع ما خاتين عليك كان سموك ابو العفين. مرضتنا الله يمرضك
نواصل إن شاء الله
****
الدعاء على أهل الأنقاذ
يا حنان يا منان
تنزل عليهم وباء يمسك المصران
يخليهم يتحرقصوا و ينونو زي ابو الدنان
يمرضوا وينشفوا يعافهم البني آدم والحيوان
ريحتهم تجيب الضهبان ويتلم فوقهم الضبان
ويبقوا عبرة للأجيال طول الأزمان
النبي فيكم قولوا آمين

اضغط هنا الجزء الاول :

برطعة في القصر الجمهوري


ودعتكم الله


تعليقات 6 | إهداء 1 | زيارات 3016

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#131790 [فاعل خير]
0.00/5 (0 صوت)

04-21-2011 06:01 PM
اللهم اهدى الجميع انا اشوف احسن تشوفوا دينكم من الكلام الذى لايعقبكم الاخسرانا مبينا


#131717 [waleed ali]
0.00/5 (0 صوت)

04-21-2011 03:52 PM
امين يارب العالمين عاجلا غير اجل يارب


#131078 [بت مريود]
0.00/5 (0 صوت)

04-20-2011 03:02 PM

امين انشاءالله كلهم .
الهطلة ابو ريالة ، وابو العفين , والشيخ الثعلب ، و العبوب برودليهم الكبير ابو طراريم .


#130901 [عبدالله جولاي]
0.00/5 (0 صوت)

04-20-2011 11:13 AM
الدعاء على أهل الأنقاذ
يا حنان يا منان
تنزل عليهم وباء يمسك المصران
يخليهم يتحرقصوا و ينونو زي ابو الدنان
يمرضوا وينشفوا يعافهم البني آدم والحيوان
ريحتهم تجيب الضهبان ويتلم فوقهم الضبان
ويبقوا عبرة للأجيال طول الأزمان
النبي فيكم قولوا آمين

آميييين يا بت الجنيد يسلم يراعك وكمان على قول حبوبتك إنشاء الله يقرّصهم باعوض الإستباليات 0 ههههههههههههههه0


#130877 [عبدالله جولاي]
0.00/5 (0 صوت)

04-20-2011 10:45 AM
الدعاء على أهل الأنقاذ
يا حنان يا منان
تنزل عليهم وباء يمسك المصران
يخليهم يتحرقصوا و ينونو زي ابو الدنان
يمرضوا وينشفوا يعافهم البني آدم والحيوان
ريحتهم تجيب الضهبان ويتلم فوقهم الضبان
ويبقوا عبرة للأجيال طول الأزمان
النبي فيكم قولوا آمين

أسماء الجنيد - مالك عليهم قهرتك بي الله - الناس ديل أولياء أمورنا وهًم حاملين الأمانة وهًم مسؤولون عنها أمام الله يوم القيامة 0


#130790 [محمد احمد]
0.00/5 (0 صوت)

04-20-2011 08:48 AM
آمييييييييين آمين يسمع منك ومننا يا بت شيخ الجنيد ويتقبل دعواتنا الما نام ولا أكل الطعام بجاه الحبيب المصطفى صلى الله عليه وعلى آله وصحبه وسلم


أسماء الجنيد
 أسماء الجنيد

مساحة اعلانية






الرئيسة |المقالات |الأخبار |الفيديو |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2016 www.alrakoba.net - All rights reserved

صحيفة الراكوبة