عشان الإختلاط
04-20-2011 01:28 PM

ساخر سبيل

عشان الإختلاط

الفاتح جبرا

عندما كنا طلاباً بالمرحلة الوسطي (إتلاشت وكده) كنا نحب حصة التربية الإسلامية ونحرص أشد الحرص علي حضورها وذلك لأننا كنا (فلاسفة صغار) أو هكذا يخيل لنا فى ذلك العمر الغض النضير .. وقد كان أساتذتنا فى هذه المادة فطاحلة نشهد لهم بالعلم والإستقامة وهمو والحمدلله لا زالوا يعيشون بيننا كالأستاذ (محمد أحمد مصطفي) والبروفيسور (محمد أحمد الشامى) !

- من حكمة مشروعية الصوم يا أبنائي أن يحس الغني بمدى معاناة الفقير الذى يجوع ولا يجد ما يأكلة !

- طيب يا أستاذ والفقير يصوم عشان شنو؟

وهكذا كنا نحاول أن نصل إلى الحقيقة والتى بلا شك كان أساتذتنا الأجلاء يعرفونها تماماً ويقدموها لنا فى شرح بسيط مقنع وميسر ، طيب ايه مناسبة الكلام ده ؟ مناسبته (فتوى) أطلقها على الهواء مباشرة (الرئيس علي عبد الله صالح) رئيس اليمن (لحدت كتابة هذه السطور) أفتى فيها بحرمة خروج (المرأة) فى تظاهرات بدعوى الإختلاط !

في رأئي أن الأخ (علي عبدالله) قد جانبه الصواب (وما عرف يلعبا كيف) لأننى لو كنت فى مكانه لأوكلت (ترزية الفتوى) بعمل اللازم لتخرج الفتوى فى أبهى حلة وآخر (تطريز) ومن جهة (متخصصة) ولكن يبدو أن الوقت يداهم (صالح) فأراد لهذه الفتوى أن تبث على الهواء دون تأجيل أو إبطاء .

- خروج المواطنون فى مظاهرات مختلطة حراااام !

- ده كلام صاح يا أستاذ (صالح) !

- كيف يا سوداني

- أقول ليك .. مش خروج الرعية علي الحاكم حرام

- أيوه

- طيب يبقي خروج المواطنين فى مظاهرات حرام

- ومش المظاهرات (مختلطة)

- أيوه

- ومش الإختلاط حرام

- مافي شك

- يبقي خروج المرأة في المظاهرات (حرام تربيع) !

- طيب يا سودانى ما تجى تشتغل (مفتى) معانا

- ده عليا يا (أبويمن) ؟ من زمان كنتا وين ؟ تكلمنى بعد ما الحفلة لموا كراسيها ! (مواصلا) أقول ليك كمان حاجه تانية

- قول يا سوداني

- مش المراة المسلمة لا يجوز لها معارضة زوجها ؟

-أكيد

- طيب مش من باب أولى إنها ما تعارض (سيد زوجها) اللى هو إنتا ! يبقى الموضوع كوووولو حرام في حرام

- والله إنتا يا سوداني ختيييييييير ياخى ما تجى تشتغل معانا

- كدى حكاية الشغل دى خليها هسه أنا مريض وعندى قلب وما بقدر على (سخانة اليمن) دى لكن لو عاوز أرسل ليك (علماء من عندنا) والله يظبطوا ليك الشغل جنس (ظبيط) لمن تآآآأمن

- وأيش عندك تانى يا يا سوداني

- المرأة عندكم مش لا يجوز ليها (قيادة السيارة) في الشارع ؟

- أيوه !

- طيب كيفن تقود الشارع ذاااااتو يا (فخامة الرئيس) ... يعنى يا سعادتك بس بالقياس سااااكت الكلام ده ما بجي

- يعني يا سودانى الفتوى بتاعتى دى صاح؟

- هو إنتو يا زعماء بتقولوا حاجه غلط؟ ده حتى صوت المرأة عورة يثير الرجال .. فكيف يجوز ليها تكورك وتصيح (الشعب يريد إسقاط النظام) والمظاهرة مليانه رجال ..

- عشان كده أنا يا سودانى قلتا ليهم (المرا تطلع الشارع) !

- والله أخير إنتو نحنا ناسنا هنا قالوا لينا (الراجل اليطلع الشارع) !



كسرة :

قال أيه؟ عشان الإختلاط !


تعليقات 19 | إهداء 0 | زيارات 6434

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#131612 [كابوكي]
0.00/5 (0 صوت)

04-21-2011 02:19 PM
انت عارف يااستاذ نحنا صاح ناسنا قالوا الراجل يطلع عشان هم دايرين النسوان يطلعوا يسوا ليهن سواة قدو قدو (نجار ماعملها في خشب ) وطالما قالوا الراجل يطلع الشارع يبقي النسوان في هذه الحالة مابطلعن لانهن يعرفن جيدا ماسيجري لهن وهذا ماارادته الانقاذ بتفكيرها الخبيث لتحرم الجميع من الخروج بطريقة مباشرة وغير مباشرة ولك التحية حبيبنا جبرة


#131489 [احمد القهران]
0.00/5 (0 صوت)

04-21-2011 11:36 AM
والله عجيــــــــــــــــــــــــــــــــــــــب


#131414 [Haider]
0.00/5 (0 صوت)

04-21-2011 10:16 AM
متعك الله بالصحة والعافية ياجبرة ،بالجد فاكهة الراكوبة الي الامام
http://alrakoba.net/vb/showthread.php?t=51036


#131308 [nubian]
0.00/5 (0 صوت)

04-21-2011 12:17 AM
طبعا الريس على استفاد من الهواء عكس حسنى وبن على لانهم لم يستفيدوا من الهواء وناسنا برضوا مستغيدين من الهواء وقالوا الراجل يطلع الشارع و على الهواء لانو عارفين الناس لمن يطلعو ا مظاهرات يقوم يضربهم الهواء و انت عارف الواحد لمن يضربوا الهواء بموت يجوا ناس حقوق الانسان الجماعة يقولو ا ليهم ديل ضربهم الهواء وانت يا جبرا براك عارف الفى بطنو هواء براهو برقص عشان كدة الجماعة قالو لعلى الناس ديل لو شالوك ماحتشم الهواء وانتجاى هات لينا معاك هواء بس انا ما عارف بن على بيقولة كيف بالتونسى بس انشاء اللة حنعرف القذافى حيقولة كيف باليبى وتحيا الامة العربية بس على الهواء و الان مباراة البرشة منقولة على الهواء وكلنا فى الهواء سوا


#131289 [بت ام الحسن]
0.00/5 (0 صوت)

04-20-2011 11:09 PM
انا ما عارفة ليييه الحريم بثيرو حفيظة الدكتاتورييين ديل...والله عندهم حساسية شديده من الحريم ..مره واحد يضرب الهستيريا ويطيح فيهن بكرباج قدو قدو ...والتانى عايز يحبسن فى البيت باسم الدين ...ياجماعة واحد يفسر لى ليه الحريم بستفزو الدكتاتوريين ديل وبوظو ليهم اعصابهم..ويخلوهم يفتفتو من الغيظ


ردود على بت ام الحسن
Sudan [سودانية ] 04-21-2011 04:28 PM
عشان المفهوم الذي نشأ وتربى علية (الجنس الاعلى والطبقة الخادمة )


#131285 [ام الحسن ]
0.00/5 (0 صوت)

04-20-2011 11:01 PM
ههههههههههههههههههه..ههاهاهاهاهاهاههاااااااايه


#131277 [حمدالنيل]
0.00/5 (0 صوت)

04-20-2011 10:38 PM
والله يا استاذ جبرا يبدو أنك بعد الكم وعشرين سنة تحت ظل حكم الانجاس، اقصد الانقاذ الاسلامية اكتسبت خبرة كبيرة جداً في فقه الضرورة وتفصيل الفتاوي حسب المقاس/المزاج الرئاسي. وعشان كدة انا قاعد اقول ناس الحكومة ديل كل يوم طالع ليهم واحد من هيئة علماء السودان بي فتوى ظريفة في حاجات طريفة كدة من وين.
على كل مبروك عليك درجة العالمية وتاني زول يتصل على علماء الشاشات الفارغين ديل مافي ما دام إنت موجود وسوف يعينك رئيسنا كبير مستشاري هيئة علماء باقي السودان الفضل لي باقي عمر الانقاذ الفضل.


#131217 [ابو سامي]
0.00/5 (0 صوت)

04-20-2011 08:29 PM
فقه الضرورة ( أقصد فقه الضرر ) عندنا أنه المرأة لو خرجت الشارع يحل اغتصابها بواسطة عناصر الأمن غير المتدينين لأنه في فقه الضرورة قد ينصر الدين الفاجر لذلك لا بد من وجود كتيبة داخل أجهزة الامن من أبناء الشوارع وهؤلاء لهم مهمتان أولا اكتشاف الجريمة في مهدها لأنهم من نفس الوسط المجرم ولأن كوادرنا المتدينة لا تعرف أوكار الجريمة أو المجرمون أنفسهم وذلك لتربيتهم في المساجد وفي أسر متدينة والامر الآخر أو المهمة الاخرى لهؤلاء العناصر غير المتدينة هو عمليات الاغتصاب التي يفتي بها علماء جهاز الامن لأن في زمن التوجه الحضاري أصبحت عقوبة الاغتصاب عقوبة نافذة


#131192 [nourjola]
0.00/5 (0 صوت)

04-20-2011 07:18 PM
رايع...جدا..المفروض...تكون مستششششششششششار....يااستاز..جبرا


#131156 [لوبة]
0.00/5 (0 صوت)

04-20-2011 06:19 PM
رايع يا جبره الراجل يطلع الشارع عشان يأكل كوارع


#131132 [Saif AlHagg]
0.00/5 (0 صوت)

04-20-2011 05:17 PM
خطير يا جبرا
(الراجل اليطلع الشارع) !
قال أيه؟ عشان الإختلاط !
ياتو رجال ياجبرا!!!


#131128 [الصراف]
0.00/5 (0 صوت)

04-20-2011 05:09 PM
قصدك شنووووووووووووووووووووو


#131122 [tarigosman]
0.00/5 (0 صوت)

04-20-2011 05:01 PM
ياجبرا لوعايز تطلع الشارع,جرب شارع ال60.


#131077 [ابونصر]
0.00/5 (0 صوت)

04-20-2011 04:00 PM
والله يااستاذ جبرة انا خائف الحكومة اليمنيه تشتكيك في مجلس الامن وتقطع علاقتها مع السودان بسببك . شايفك متخصص في الشأن اليمني . طيب جماعتنا ديل ماتدور فيهم شوية وزير دفاعنا الهمام وحكومتنا المطبقة الشريعة الاسلامية وهم في نفسهم ماطبقوها


#131003 [عبدالله جولاي]
0.00/5 (0 صوت)

04-20-2011 02:33 PM
عشان كده يا جبرا ناس الإنقاذ عايزين يطبقو الشريعة - البتخرج للتظاهر يقيمو عليها الحد 0


تخريمه :

كتاباتك ظريفة يا جبرا الظاهر إنت من فصيلة عادل إمام 0


#130968 [dr_islam77]
0.00/5 (0 صوت)

04-20-2011 01:41 PM
تحفة بالجد ياجبرا
طيب الراجل المعولق ده لو كلامو صاح وخروج المرأة حرااااااااااام زي مابيقول الفساد والمحسوبية والظلم وقتل الأبرياء من المتظاهرين والتمسك بكرسي السلطة(بفتح السين)كل هذا حلااااااااااااااااااال في نظره يعني ولاكيف؟
وشر البلية مايضحك


#130967 [blackberry]
0.00/5 (0 صوت)

04-20-2011 01:41 PM


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة