المقالات
مكتبة كتاب المقالات والأعمدة
الفاتح يوسف جبرا
سرطنة الشعب
سرطنة الشعب
04-23-2011 12:13 PM

ساخر سبيل

سرطنة الشعب

الفاتح جبرا

فشت في السنوات الأخيرة بعض الأوبئة والسرطانات المختلفة مثل سرطان الدم وسرطان الأطفال وسرطان المخ وفيروس سى والفشل الكبدى والكلوى وغيرها من الأمراض التى لم نسمع عنها من قبل بل تزايدت نسبة الذين يفقدون حياتهم من جراء الإصابة بهذه الأمراض لدرجة مهولة كم قريب وزميل وجار وصديق فقدتموه في غضون سنوات قليلة مضت! أصبحت مقولة أن (فلان) عندو (سرطان) عااادية لا تثير الدهشة .. مثلها مثل (إختراق إسرائيل لمجالنا الجوي) ..

ظللت مندهشاً لتفاقم أعداد الإصابة بهذا المرض اللعين لكن زالت دهشتي حينما قرأت ضمن ما قرأت عن فضيحة (التقاوى الفاسدة) بان تلك التقاوى التى تم إستيرادها للموسم الزراعى 2008-2009 (تسبب السرطان) !!

من الذى أدخل هذه التقاوى الفاسدة والمسرطنة !! من الذي (يلعب) بأرواح الشعب السوداني الفضل ؟ هذا السؤال لم تتم الإجابه عليه ولم يتوصل المسئولون في الدولة طيلة ثلاث سنوات إلى (الجاني) ! وفي نهاية الأمر فإن البلاغ سوف يتم تقييده ضد مجهول (ده لو في بلاغ من أساسو) !

مسئول (كبير) صرح مؤخراً قائلاً بما معناه (ورونا الفساد وأنحنا ح تلقونا قدام) ! طيب ياخى حاجة ذى دى تقعد ليها تلاااته سنين؟ لماذا لم يتم تحركاً رسمياً يوازى حجم هذه الكارثة ويستشعر مدى الخطر !! الفساد والسعى لكسب المال بطرق غير مشروعة.. عطاءآت .. كومشنات .. إحتكارات .. إختلاسات .. شركات وهمية .. (ده كلو بقى شئ عادى) ولكن أن يسعى البعض لكسب للمال بقتل النفوس البريئة فهذا أمر لا يجوز فيه التلكؤ أو التباطؤ .. (إنتو النفوس دى ربنا ما بيسألكم منها؟) !! ألا تعلمون بأنه ليس في الكون كله قضية تعادل حياة إنسان واحد .. ألم يقل رسولنا صلى الله عليه وسلم \" لزوال الدنيا عند الله أهون من دم امرئ مسلم \" ؟!

لقد تعود (الشعب الفضل) علي السكوت وعدم المطالبة والملاحقة لناهبي المال العام لعلمه بأن (القصة بايظة) وأن الحكومة تعتمد فى محاكمة الفساد على (فقه السترة) لكن أن يصل الأمر لأن نساق كل يوم إلى مذابحنا قرابين لثراء هؤلاء القتلة معدومي الضمير ، فلا وألف لا !

من أدخل هذه \"التقاوي المسرطنة \" ؟ ولماذ تعطل (التحري) في هذه القضية كل هذه السنوات؟ ما هي تلك الشركة التى تم تسجيلها بعد إستيرادها لهذه التقاوى؟ وكيف حدث ذلك ؟ هل مرت هذه التقاوى على المختبرات التي نسمع بها ولا نراها ؟ وما هى نتيجة الفحص؟ من تستر على علي دخولها عبر الموانئ وكثير من الأسئلة التى تحتاج إلى إجابات من المسئولين (ده لو ما فيها حاجه يعنى) !



كسرة :

السيد (وزير الزراعة) المسئول الأول عن هذه الكارثة تم سؤاله عن (القصة) فى لقاء تلفزيوني فاجاب بإبتسامته المعهودة :

- مافي تقرير علمى بيقول إنو التقاوى دى فاسده !!

طيب ياخى تعال (البر أمان) قول الكلام ده لى (نوام الشعب) وأنا أضمن ليك (الكتاحه ما تجيك) هى قبل كده (الكتاحة) دى جات لمنو؟


تعليقات 14 | إهداء 0 | زيارات 4300

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#133386 [ود.جوله]
0.00/5 (0 صوت)

04-25-2011 11:52 AM
استاز..جبرا.....لك التحية والتقدير.........ويارب تكون وزير..........وتشوف موضوع ........التقاوى...الفاسدة باالتقدير...........................................


#133213 [عبد الملك]
0.00/5 (0 صوت)

04-24-2011 11:45 PM
أخيراً شفنا الفاخورة البتطلع الكلام الخطير المثير بس مقال اليوم مافيهو نفس الفاتح جبرا.


#133138 [وحيد]
0.00/5 (0 صوت)

04-24-2011 07:42 PM
يا اخوانا في معلقاتية كده بيتكلموا عن الانجازات و \" امانة\" المجاهدين الذين يصلون الليل بالنهار لتحقيق تلك الانجازات و ان فيهم علماء و صالحين كان ساي جبت سيرتهم \" ينفخوك\" و كثير من جنس دا التضليل، لكن في المواضيع الزي دي بيختفو تماما و لا نسمع لهم صوتا... ما يورونا رايهم و يحاولوا يقنعونا انو استيراد التقاوي الفاسدة و المبيدات الفاسدة دي هي \" جهاد\" و \" اجتهاد\" ينال فاعله الاجر!


#132762 [ الزول]
0.00/5 (0 صوت)

04-24-2011 03:01 AM
كرهتناالكمبيوتر ونظارتنا ضايعة ارجع لعمتك يعرفوك كيف كل الجريدة صلع ونظارات وثياب خليك بصورة العمة عشان ماتطشش بينا


#132682 [الزول الكان سمح ]
0.00/5 (0 صوت)

04-23-2011 07:33 PM

يا أستاذ جبرا

سمعت بالمثل البقول ( القمرى مابيعتق التقاة ) والتقاة دى للناس الما أولاد مزارعية وكدة...هى المنطقة البتم فيها ( درس ) المحصول بعد حصاده لفصل الحبوب عن السنابل أو ( القناديل ) مايقومو الجماعة يفسرو القناديل دى بالشى داك!!!!!

دحين يا خوى موضوع التقاوى ده مربوط بالتقاة وشرح المثل ده أنا ربطتو بى موضوعك لأنو القمرى ما بنسى محل درس العيش والقمح أو أى حبوب لمن يحل الموسم يفضل يزور التقاة دى مرة مرة..
وناس الوزير ده وجماعتو معتبرين السودان ده تقاتهم يرعوا ساكت ولا فى زول يقول ليهم حــــا......يا طيـــر


#132664 [احمد]
0.00/5 (0 صوت)

04-23-2011 06:43 PM
ياأخونا والله نحن شعب بتاع شمارات ساكت تذكروا مشكلة المحاليل الوريديه قومه وقعده وطلعت فاضي خلو الاجهزه ذات الصله تشوف شغلها


#132662 [ام الحسن ]
0.00/5 (0 صوت)

04-23-2011 06:37 PM
ده شنو يااستاذ مالك كبرت فجأتن 20سنة...مالك ابيت العمة والله دى كانت عاملة ليك كارزما...والدليل على كدى طشتى دى ...لى اكتر من ساعة بفتش فى الراكوبة عن مقالك مره فى مكتبة الصور ومره فى الاخبار ومره فى المقالات...وكان ما عبارة ساخر سبيل دى كنت بضهب لى حسى....السرطان الحقيقى هو الكيزان بس نجيب ليهو كيماوى من وييين


#132658 [زنقه زنقه]
0.00/5 (0 صوت)

04-23-2011 06:27 PM
الشعب يريد ان ينام


#132641 [سيف الحق]
0.00/5 (0 صوت)

04-23-2011 05:56 PM
لك التحية أستاذنا جبرا
نعم هذه القضية مهمة جدا وحساسة!!! انها ليست قضية بل انها جريمة ضد الانسانية- يعنى الجرائم دى الاتكون بالرصاص!!!!
غيرى قالوا وانا اكرر مايسمى بفقه السترة هذا تلاعب وتحايل-فاذا افترضنا انه ليس هناك مايسمى بهذا الفقه كان يمكن ان يسهل عملية استجواب ومحاكة هؤلاء المسئولين!!! فالحكاية ترجع ايضا لعلماء السلطان الذين يذللون الشريعة للحكام حتى يستمرأوا بالخطأ ويكون سائغا لفسادهم أكثر.
الشى الثانى هذا البرطمان او اقصد قد قال رئيسه انه برلمان ربانى اى يعمل بالرقابة الربانية- فاذا استجوب ام لم يستجوب فانتيجة هى الكتاحة بتجى على الشعب الفضل.
أخيرا دى مشكلتنا: التسامح والتهاون. لماذا نحن شعب نتهاون بارواحنا ونتسامح مع من يريد بنا وباولادنا واجيالنا واهلنا الشر!!!
كسرة
يارب اذا ما شلنا حقنا بي يدنا هل ترى ان البرطمان/البرلمان او علماء السلطان/فقه السترة والضرورة حيشيلوا لينا!!!
يمهل ولا يهمل وانا لله وان اليه راجعون من هذه المصيبة


#132639 [امين الشريف]
0.00/5 (0 صوت)

04-23-2011 05:55 PM
ابكيك يا وطني الجريح
ابكيك يا وطني الاسير
ابكيك يا وطني المتشظي
ابكيك ايها الشعب الابي
ابكيك يا صانع الثورات
ابكيك يا معلم الثورات
لقد رأت عينك ظلم الظالمين
لقد رأت عينك فساد المفسدين
لقد تجرعت المرارة من المتشدقين باسم الدين
لقد اماتوا الثورة في دواخلك الى حين
لقد قتلوا الثورة فيك الى ابد الآبدين
والا فقل لي لم السكوت عن الحق في وجه الظالمين
ولم الركون والجلوس في ركين حزين
يا شباب السودان دكوا حصون القاتلين
انتم الامل في خلاصنا من هذا الفرعون اللعين


#132622 [الطيب عثمان]
0.00/5 (0 صوت)

04-23-2011 05:21 PM

والله يا أخونا محمد عبدالمجيد والله الفاتح جبره لما يرفع نظارتوا فوق يشوق المابنشاف خليك لما يكون لابس العمه دى حاجه تانيه .
اخونا الاستاذ الفاتح جبرا الله يخليك لينا ويحفظك من اولاد الحرام طبعا الحرام عارفهم انت ياالفاتح مش اياهم الساكنين فى المايقوما لكن شىء غريب وعجيب دى ظاهره ظهرت جديده اقصد كثرتهم وغير الظواهر الثانية خليك من مسألة السرطانات يا أخونا الفاتح هناك ظاهرة أغرب وأخطر وأشد خطورة من السرطانات ظاهرة اختطاف الاطفال والبنات والمتاجرة بأعضائهم البشرية ايو نعم وتتم فى غاية السرية وهنالك عصابات من ضمنهم أجانب ، يا أخى لوكانت الكلوه بمبلغ 15 الى 20 الف دولار والكبد بملبغ 50 الف دولار ليه ما تكون هناك عصابات لسرقة الاطفال والبنات وعندى مايؤكد ذلك


ردود على الطيب عثمان
Sudan [زنقه زنقه] 04-23-2011 06:33 PM
يا الطيب عثمان اولاد المايقوما ديل انت ما عارفهم ديل مستقبلهم ح يتخرجوا كتائب وبلطجيه وامنجيه للنظام عشان كدي هم مراعنهم (كتائب المايقوما)


#132493 [صديق]
0.00/5 (0 صوت)

04-23-2011 01:38 PM
شركات السيد الوزير المرابي تاجر البندقية الذي لم يكفية اموال النفاية والجباية وكركر وشركات الطرق ومصارف الامطار المتهالكة ومقاولات الجنوب الذي فيه يلومون فيه الاخرين!! وشراكة الشركات والعمولات فانبري مع البنوك الزراعية الموغلة في الفساد في تدمير الاقتصاد الزراعي وسرطنة المواطن المغلوب!!! من سيجرؤا علي رميه بحجر!!!!! من !!! من !!!
من يملك مثله سرا !!!
من يعبث ازواجه باموال البنوك جهرا !!
من يهدي الفيلل كيلا!!
ام البرلمان المصفق دوما!!
ام مستوردي النفايات الطبية ليلا!!!


#132470 [احمد القهران]
0.00/5 (0 صوت)

04-23-2011 12:55 PM
الشعب لو مات مزعلك اوى يااستاذنا الجماعه ديل بقى عندهم الموت ده شى عادى لانهم هم البعرفوا الدين وهم بعرفوا مصلحة الشعب وين


#132465 [محمد عبدالمجيد]
0.00/5 (0 صوت)

04-23-2011 12:47 PM
يا أستاذ انت مما رفعت نظارتك دي لي فوق بقيت تشوف حاجات كدة زي الخيالات...
بعدين وزير الزراعة دهـ قال الموضوع دهـ ما تم في عهدهـ .. يعني خلاص يا أخي الفات مات.. مش كدة؟!؟


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الفيديو |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة