الطفل المعجزة
04-28-2011 10:00 AM


الطفل المعجزة
أسماء الجنيد

بعد ما نبل نافع جاري من مكتب الريس لا برة ، خلى الريس يتحرقص زي العاضيهو حصان سعران , مكرفس وشيهو وعرقو يتسابق على الواطة
يقوم ويقعد في كرسيهو زي القارشلو قرن شطة. فجأة قبل على جرس مكتبو ، واداهو عصرة رننننننننن ضرب الجرس يناغم في الطفل المعجزة مصطفى إسماعيل ,, نشوف الحصل معاه شنو ..
جاي داخل يتدبأ لي مكتب الريس
وبالرااحة قعد في كرسيه
نعم يا ريس,, طلباتك اوامر
البشير:
نعم يا ريس ؟؟ كمان طلباتي اوامر؟
انت خليت فيها طلبات ولا أوامر ، ولا خليت لينا وش نطلب ونتأمر بيهو تاني؟
الزول السماك الطفل المعجزة ده قدل معاي بي بنبقاية, ما قصر معاي كلو كلو ولا مع الشعب الشتمتوا وبهدلتوا قدام خلق الله,,
نط مصطفى اسماعيل يغرود في عويناتو يستدر عطف الريس، انا يا ريسنا؟ مالي عملت شنو ؟؟؟
الريس:
ما تغرود لي في عويناتك ديل زي الشافع البسنن ,, آآي إنت لحقت تنسا كمان ؟؟عملتك الماسكنها لينا زلة الخلق كلها، حتى الصحافة العربية ما رحمتنا,
نسيت لامن شتمت السودانيين ووصفتهم بالشحادين؟؟
نحن زااااتنا مادين قرعتنا 22 سنة لا خلينا الخليج ولا خلينا باقي الدول التانية . 22 سنة مادين قرعتنا ونشحد جهارا نهارا ,
نشحد صباح ومساء ونبلع في كروشنا المتندلة دي, تجي إنت بي بجاحة تقول على الشعب السوداني شحاد؟؟ وإنت ده البنرسلك لي شحدتنا!!!
إنت ده البتشيل القرعة تحوم بيها البلود . تقوم تجي تقوي عينك وتشتم غيرك ؟؟؟مادي قرعتك وتشتم في غيرك؟
انت ماك عارف السوداني وطبعه ؟ قايلهم كلهم زينا كده؟ السوداني كللل شيء ولا كرامته؟ ماك عارفهم ؟ تمش تهابشهم في كرامتهم وعزة نفسهم ؟؟
يرد مصطفي إسماعيل بي خجلة,,,
لكن يا ريس انا ما قلت شحادين عديل, بعدين انا ما داير ادافع عن الإنقاذ وعشانك,
يقاطعو الريس
قلت ’’ قلت شحاديــــــــن عديل , كمان بتدور تنكر ؟ كلكم شبهينا واتلاقينا
متفقين في الكضب وفي النكران والزوغان, تعملوها وتكبوا الزوغة، وتقع في راسي انا, ما خليتوا لي صفحة ارقد عليها,,
هسة انت لحقت متين تنكرها؟ ما قلت بي قديديمك ده الحكومة لما جات الشعب كان زي الشحادين و جيعانين ، وقلت الناس كانت تقوم من صلاة الصبح تقيف في الصفوف عشان جالون بنزين، و تقيف في الصفوف عشان الرغيف ومرات ياكلوها عصيدة؟ تأكل الأكلتوا حبوبتي.
وقلت سكر مافي الناس كانوا بيشربوا الشاي بالجكة,,
تجك عريان عادم الدلقان, يا مصطفى التغيان.
الجنا خلااااااااااس بدور يدافع عني وعن الإنقاذ,,
اها يا الفالح الإنقاذ سوت شنو ؟ تكلت شواويل السكر قدام بيوتهم ؟ ولا فتحت الطوابين وشتت الرغيف في السهلة؟؟ المعيشة بقت سكر ورغيف؟
كدي قولي انا وانت هسة برانا ما معانا زول ينقل القوالة لي الشعب ولا الإعلام,
قول لي قبال الفخك بي نعالي دي , المرض الهسة حايم في الناس زمان كان في؟ ملاريا ما قدرنا نعالجا، حقن الملاريا في تلتلة، وكمان وزير الإعلام ما قصر برضو يفكفك في التصريحات و يتبوجح ويقول الجنوبي بعد الإنفصال ما بنديهو حقنة في مستشفايتنا. يديهو الكود إن شاء الله,,
التقول عالجنا اهل الشمال كلهم لامن بدور يبخل على ناس الجنوب!!!
ناس الجنوب بي علاجهم وبي خيراتهم,,ما هم محتاجين لينا
يا دووووووب الناس تفكر وتراقبنا بعد الإنفصال ،ويشوفونا بنسوي شنو !!
وبرضو يا الفالح التعليم نسيتو؟ في زمتك دي في زمن مرا على السودان التعليم وصل ما وصل من بلادة وتدني زي زمنا نحن ده؟ اها الهجرة نسيتها ؟ الناس البرة البلد اكتر من الجوة, وكلهم ناجحين وبي شهاداتهم, كلو منكم خليتوني ابراكم زي الكديسة الساكة جناها, خربتوا البلد وطفشتوا اهلها وجبتولي المهانة , جكتك الوصفت بيها الناس وقلت بشربوا بيها الشاي دي قاطعها من نافوخك المصوفن ده،
جبت لي الفقر والمنابزة في صمة خشمي، خليت الماشي والغاشي رافع عصايتو في نافوخي، والشارع السوداني كلو جوة وبرة البلد مولع نار من عملتك الما سبقك عليها زول دي،,,
تعملوها إنتو وتقع فيني انا ده , 22 سنة الشعب صابر علينا ومتحمل مصايبنا ، و22 سنة انا صابر عليكم إنتو وعلى مصايبكم البليتوني بيها , بتدوروا تشلوني , كل ما اتخارج لي من مصيبة زمان , تجيني مصيبة من النعافات الزيك. ماني عارف جيتوني من وين؟ اتعزلتوا لي واتحكرتوا لي فوق راسي زي القوب , بتعرف القوب آآآ ود العمارات؟ القوب ده مرض ، وحبوب وعوار ماااكن بقوم في الراس,,
اها ديل انتو , خسوسا انت وعبد الرحيم الهنبول والمو نافع داك , ياكم القوب القايملي فوق راسي ،كل ما افجخ لي حبة تقوم غيرها , راسي بقى كلو كراضم وعواوير, الله يكرضمكم ويشيلكم من وشي بركة جاه النبي,,,
الشعب السوداني كان عارف الباقي علي منكم ومن بلاويكم كان رحمني ، وحن في حالي، لكن مو عارف
مو عارف المغايس الجاياني من تالاكم . شايفني برقص وبتهوزز مع الغنا ومع المديح
قايلني فرحان وطربان . علي بالطلاق انا رقيصي ده بدور افش بيهو مغايسي وغبايني وحرقتي الكاتمة في بطني منكم ومن عمايلكم,
إن ما سويت كده وتميت الباقي كضب وحليف وجزيمة , كان زمااااااان مشيت ام فكو في شارع الله والرسول
وبدل ما يقبضني اوكامبو ، اقعد انا اقابض في الجراد و القبور في الخور ، ويقابضوني شفع الشارع.
ويتبروا مني وينكروني ناس حوش بانقا بعدما غنيتهم و وريتهم البندر ، وسكنتهم العمارات وركبتهم العربات.
ملكتهم كافوري بعدما كانوا بلعبوا الدافوري,,,
والسبب كلو انت والتلايف المعاك .
اشكيكم على منو ؟ واسوي فيكم شنو ؟ مرضتوني وهردتوا مرارتي وفشفاشي
انا هسة كان بي مرادي ارجع تاني حوش بانقا والعب حرينا وشدت مع رفايقي , وانوم في حوشنا ، لا مزازة ولا زرزرة من اوكامبو والشعب الكارهني. كارهني بي سببكم ، ومن عمايلكم ، الله بلاني بيكم , حظي زي وشي ده, حظ رماني في ناس ابو العفين واب إضنين ، وباقي العولاق التانيين
النعمنو ملقط لي عولاق زيكم باقين لي ازية
صبركم علي بقبل عليكم قريب وبمدد كل واحد في عنقريب ، وشوقكم تاني للهمبريب ..
والليلة بدينا ، و بي قوش قشينا الحوش والكلام ليك يا المنطط عينيك
نواصل إن شاء الله

الدعاء على الأكلوا البلد وقسموها نصين..
يا الله الكريم تلم فيهم جضمارة من الأكلوهو والنهبوهو في بطونهم وتخليهم يتحرقصوا ليل نهار ,
وتلحقهم امات طه
النبي قولوا آمين
ودعتكم الله


تعليقات 7 | إهداء 2 | زيارات 4002

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#136095 [هنادي محمد عبد المجيد]
0.00/5 (0 صوت)

04-30-2011 11:25 PM
اللهم ياواحد ياأحد آآآآآآآآمين


#135603 [بت السودان]
0.00/5 (0 صوت)

04-29-2011 09:02 PM
الله يجازيك يا بت الجنيد والله عرفت ليهم، فشيتيني شوية من هموم الجبايات والكلامات البتكتل الفيل بالله ما تطولي علينا الغيبة


#135413 [ شتيل]
0.00/5 (0 صوت)

04-29-2011 02:22 AM
يا بت الجنيد كلام زى السكر برافو عليك
الله يجازيك و ينقذك بي جاه النبي ..
قولي آمين


#135367 [ابو الهول]
0.00/5 (0 صوت)

04-28-2011 10:50 PM
غايتو بعد دا صاحبتنا ديك

الا تشوف ليها محل تاني


#135267 [مات من الضحك ]
0.00/5 (0 صوت)

04-28-2011 05:07 PM
والله يا بت الجنيد حيرتينى عديل كده انت بجيبى الكلام ده من وين
سكر وبجيبى كلام زى السكر 0 برافو عليك


#135098 [ممغوس ]
0.00/5 (0 صوت)

04-28-2011 11:36 AM
يا بت الجنيد ، الله يجازي محنك .. والله ضحت لمّن بكيت ..
فشيتي غبايّنا الانقاذية .. الله ينقذك بي جاه النبي ..
اصارحك لاول مرة اقرا ليك ، لكين بعد كدى الواحد يخّتك في الآخر عشان يحلّي بيك وينسي (الدراريب) بتاعة ناس عثمان مرغني و (مغسات) ناس البوني والطاهر ساتي و(فلسفات) ناس البطل ومن (لّف سجارتهم) ..
الله يجازيهم ..
قولي آمين ..
بس ما تغيبي كتير ..


#135064 [الزهجان]
0.00/5 (0 صوت)

04-28-2011 10:43 AM
اللهم اااااااااااااااااااااااااااااااااامين واحسنت ي


أسماء الجنيد
أسماء الجنيد

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة