بتاعت منو..؟ا
04-30-2011 12:38 PM

ساخر سبيل

بتاعت منو؟

الفاتح جبرا

لفساد خشم بيوت .. منه ما يرى بالعين المجرده ومنه ما لا يري حتى بأعتى وأضخم (التلسكوبات) .. منه ما يكون فردياً ومنه ما تقوم به مجموعة (فساد جماعي) ، منه ما لا يأخذ إرتكابه زمناً ولا تظهر نتائجه (كومشن ودخل البنك أها تانى شنو؟) ومنه ما تظهر نتائجه ولو علي المدى البعيد .. وقصة التقاوي الفاسدة التى تتصدر الصحف والمجالس مؤخراً هى من النوع الأخير التقاوي تزرع ثم تنبت ثم تحصد فإذا لم يحدث ذلك فالموضوع بلا أدنى شك (فيهو إن) !.

لقد دهشت (إن كان في هذا الزمن الردئ ما يدهش) لوزير الزراعة الذى يحاول في إستماتة أن يقول أن كل شئ عادى وإنو المسألة تمام (مية المية) وإنو الحديث عن فساد في هذا الأمر وراهو قصد سياسي !

طيب خلونا نقول (زى ما السيد الوزير بيقول) إنو كل شئ عادى والحاجات (كوووولها) مشت بالطرق السليمة وإنو ناس البنك الزراعي، وإدارة التقاوي والوقاية والحجر الزراعي في وزارة الزراعة وناس المواصفات وناس الجمارك كل الناس دى إشتغلت صاح وحسب اللوائح والقوانين والتقاوى سليمة وليست مصابة بنوع من الفطريات يضعف الإنتاجية ويتسبب في سرطان الكبد للإنسان .. وخلونا نقول إنو نسبة الإنبات فيها 100% .. وخلونا برضو نقول إنها لم تتسبب في فشل الموسم الزراعي والمزارعين زرعوها و(ما كتبوهم إقرارات ولا حاجة) وإنو التقاوي قامت زى الفل وحققت أعلى إنتاجية .. فلنفترض إنو الكلام ده (كووولو صاح) طيب السؤال الذى يفرض نفسه وكل الشعب السودني الفضل عاوز يعرف إجابتو هو :

كيف يمكن لشركة (هارفست) التي قامت بإستيراد هذه التقاوي بدون عطاء أو يحزنون أن يتم تسجيلها بعد عام من الصفقة التي تبلغ حوالي 6 مليون يورو !! (كما جاء في تقربر اللجنة)

الشعب السوداني الفضل عاوز يعرف الشركة دي بتاعت منو؟ والطريقة الخلت المسئولين (عن القصة البايخة دى) يدوهو الصفقة دى بدون عطاء ولا منافسة شنو؟ وكيفن يسمحوا ليهو وهو (وقتها) ما عندو شركة مسجلة بإنو يستورد التقاوي دى؟

كثير من كبار المسئولين (شابكننا) العندو إثبات على الفساد يجيبو .. العندو إثبات على الفساد يجيبو .. طيب أهو الإثبات (جانا لحدت عندنا) يلا ورونا سيد الشركة (البتستورد قبلما تتسجل) ده منو؟ !! جيبو لينا صورتو فى الجرايد عشان نعرف الناس (البتنهش في البلد دي منو) .. الناس العاوزه تغني بأى طريقه حتي لو يموت تلت المواطنين ويفضلو التلاته أرباع (أو كما قال أحدهم) !

قد تكون التقاوى صالحة وقد لا تكون هذه أشياء علمية لا يفقه العبد لله فيها شيئاً وقد يختلف العلماء في نسبة فسادها وما تسببه من الضرر ... لكن حكاية إنو الزول يستورد وبعدين يعمل الشركة دى ما أدونا ليها !! وهي توضح تمااااما بأن هنالك (فساداً جماعياً) وبالله إذا كانت بداية (الصفقة) من أولها تجاوزات للقوانين و(إستيراد بدون تسجيل) يعني (بالعقل كده) بس كيفن (التقاوى) تكون سليمة والقصة من بدايتها (لولوة) !



قال لي صديقى الذى يجلس امامي وأنا أقوم بكتابة هذا العمود (لو قالوا ليك إتخيل سيد الشركة دى يكون شكلو كيف)

أجبته :

طويل القامة عريض المنكبين .. وضئ الوجه .. تشع منه الأنوار وتتوسط جبهته علامة صلاة قطرها لا يقل عن بوصة ونص .. ذو كرش ممدود (من اللغف طبعن) .. إذا تحدث تحدث همساً (عشان الصفقات السرية وكده) .. لا يجيد المضغ (بيبلع طوااالي) يصوم الإثنين والخميس من كل أسبوع (عشان يمسح ذنوب الأسبوع القبلو) !! وبيكون أكيد قاعد يلبس الساعة باليمين عشان الشيطان (مع إنو الشيطان ذاااتو ما ممكن يستورد وبعدين يسجل الشركة) !

كسرة :

خلونا من (نسبة الإنبات) والشنو ما عارف ! الشعب يريد أن يعرف (الشركة دي بتاعت منو)؟


تعليقات 22 | إهداء 5 | زيارات 6591

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#136937 [سوداني]
0.00/5 (0 صوت)

05-02-2011 09:13 PM
يا باقي الشعب السوداني الفضل ........الجاب التقاوي دي .......وصاحب الشركة المزكورة
هو الرسول (ص) ؟؟؟؟؟؟؟؟!!!!!!!!!

لماذا تصفه بكل هذه الاوصاف المستوحاة من وصفه (ص)......استحي استحي

ولا تنعت المفسدين في رايك بصفات سيد الطاهرين والمصلحين ........وكفي


#136661 [هاشم عبد الماجد خالد]
0.00/5 (0 صوت)

05-02-2011 11:45 AM
شكرا استاذى الفاتح جبرة على الصورة القديمة
يابلدى ياحبوب ابو جلابية وتوب
نتنفس مقالاتك ونحس ان فى هذا الزمن المظلم رجال يناطحون الظلم باقلامهم الجريئة التى يصعب تقليدها
مقالاتك استاذى فى غاية الروعة اسال الله ان يمنحك الصحة والعافية لكى نتفيأ ظلالها الوارفة اكرر شكرى وامتنانى لك


#136538 [abu ahmed]
0.00/5 (0 صوت)

05-02-2011 12:07 AM
انتو يا ناس الصحافة ما عايزين تبذلوا أي مجهود للوصول لأسم صاحب الشركة أو المتستر وراهو مع انو كل شيئ موجود في مكتب المسجل التجاري!!!!!!!!!!!!!!!!!! وين صحفيي التحقيقات ؟ والا الكل جالسين في المكاتب ومنتظرين الأخبار تجيهم طايرة ؟


#136511 [ابراهيم]
0.00/5 (0 صوت)

05-01-2011 10:05 PM
المتعافي قال ليك القضية دي بتجيب ليها رسين كبار


#136476 [Kalifa]
0.00/5 (0 صوت)

05-01-2011 08:20 PM
يا ود جبرة....لا أنا ولا انت عارفين شئ في تفاصيل الزراعة والتقاوي ونسبة الفطريات.........ولكن الجميع يعرفون ان التقاوي صاحبت الموضوع وبدون لولوه لم تنتج زيت يعني تعصرا تديك هواء ومافي مزارع يتعب ويجري في الخلا عشان يطلع محصول ينتج هواء....بالتالي النتيجة العلمية التي وصلت لها العملية من عطاء وإستيراد وتخليص ونقل وتخزين وبيع وتسليم وزرع وري وحصد هي هواء ( اوكسجين نايتروجين ثاني اكسيد الكربون غازات اخري بنسب ضئيلة )،،،،، هذا ما وصلنا اليه بطريقة علمية وعملية كمان،، بالتالي هنالك جهات مخطئه ومقصره في تنفيذ عملها ( ولا نقول مفسده) وأكيد ما المزارع....علية يجب أن تحاسب هذة الجهات وفي كل المراحل ويجب أن تدفع خسائر المزارع ،،،،، ولولوه المتعافي ما بتحلو والشمس ما بغطوها بالأصبع سيدي المتعافي وخليك حريف وما تبقي كيشه !!مادام الموضوع تم في عهد الوزير السابق....أعمل زغبير يا فرده وما تتجوعل ساكت الموضوع مستحمي بالوكس الفاخر أبو ريحة !!!!!!!!! ;) ;) (y


#136204 [الزول الكان سمح]
0.00/5 (0 صوت)

05-01-2011 10:24 AM

تعرف يا استاذ

أنا فى تعليقى على الموضوع نسيت أقول ليك البجيب ليك خبر ( بتعت منو ؟) زول واحد فى السودان ما فى غيرو:

الطــــــــــــــــــــــــــــــــــــااااهر ســـــــــــــــــــــــــــــــــــــــــــاتى


#136105 [زنقه زنقه]
0.00/5 (0 صوت)

05-01-2011 12:36 AM
يا بروف لك التحايا والتجله انا بفتكر تعمل مسابقه وتسال السؤال اعلاه وتكون هناك جائزه كبيره لمن يتحصل علي الاجابه الصحيحه حقت منو؟


#136073 [الزول الكان سمح]
0.00/5 (0 صوت)

04-30-2011 10:20 PM

يا أستاذ

ما هو أول أمبارح منى أبو زيد نشرت مقال من خبير زراعى كان بكسر تلج للمتعافى وهذا الخبير أفاد بأن التقاوى ما فاسدة بدليل إنباتها وإزهارها بأزهار يانعة بس مافيها بذور...يعنى حمل كاذب ..

أكيد الشركة بتاعت واحد بالأوصاف الإنت ذكرتها دى ...لكن هو منو؟؟


#136057 [tarig]
0.00/5 (0 صوت)

04-30-2011 09:14 PM
السلام عليكم قراء وكتاب الراكوبة

الموضوع اعزائى الكرام ليس موضوع تقاوى او محاربة فساد ادلريا كان ام شخصيا الامر احبائ لا يخرج عن كونه مسرحية طويلة ومملة المشاهد لادخالنا فى فصولها كمشهد اساسى متفرج ومتابع بلا وعى للاحداث
المطلوب هو ان نحاسب نحن انفسنا على استسلامنا وانبطاحنا وتعسيلتنا على سياسيينا اللذين يتفننون فى الهائنا عن محاولة حراكنا السياسى لاقتلاع هؤلاء الجرزا قريبا سنحاسبهم جميعا وبلا رحمة
اننا ان شاء الله قادمون وفاعلون


#136038 [صديق]
0.00/5 (0 صوت)

04-30-2011 08:35 PM
اها ات بتاع مشاكل!!! مالشركة دي مابتاعت الوزير!!ولااخوهو!! ولا مرتو!! دي بتاعت مرت ابوه المطلقة قبل مايموت!!!! اها في علاقة!!!
بعدين ات مسعول من العافية ناس وقايت النباتات والزراعة قبيل كان رايم شنو في زهرة الشمش دي!!!! ماقالو اصلو ما محصول بيتزرع عندنا!! وانه مكلف ويقوم باهلاك الاراضي!!! وعملو اضان الحامل طرشه !! ودقو ليهو الدلوكة عشان يرضو المسثمرين!! انشاء الله يهلك ابو سلسفيل البلد!!! ونحنه وين سمسم القضارف اللي مابيكلف يور ولابور وين فول ابو زيتين!!! كدي حفر شوية عشان تعرف خيارزهرة السجم دي منو الدخله ليه!!;( ;( ;( ;( ;( ;(


#136036 [وحيد]
0.00/5 (0 صوت)

04-30-2011 08:26 PM
و الشركات السجلوها في الكويت و بعد كم شهر كده ادوها سودانير دي حقت منو؟
وراء كل فساد \"اسلامي انقاذي\" له لحية تيس.. و وراء كل كذبة اسلامي انقاذي يهلل و وراء كل مصيبة اسلامي انقاذي يكبر لغير الله!
هؤلاء هم مؤسسي و اركان \"فقه\" الفساد و حماته بفقه\" السترة\"... و كل شئ لله! ...و هي لله ......... و قد اضلهم الشيطان و انساهم ان الله طيب لا يقبل الا طيب


#136020 [عقارب]
0.00/5 (0 صوت)

04-30-2011 07:11 PM
اسأل اسحق احمد فضل الله يمكن تكون حقت الشيوعيين او الطيب مصطفي وده انطباع من كتاباته عن الموضوع وليس بناء على معلومة


#136019 [امين الشريف]
0.00/5 (0 صوت)

04-30-2011 07:10 PM
يا جبرا تفتكر وزير الزراعة بدافع باستماتة مصلحتو شنو من الدفاعات البورتسودانية دي اكيد عندو مصلحة في القصة دي و راس السوط لاحقو لاحقو يعني هارفست وكدا وخليك تفتيحة يا ابكرونا ياخي ...


#135996 [عمر أبو أحمد]
0.00/5 (0 صوت)

04-30-2011 06:28 PM
عليك الله يا الفاتح جبرة لو عرفت الشركة دى بتاعت منو كلمنا ده حقنا عليك
بعدين انا عندى طلب انا زول ود عرب وشغال كويس لو عندك بت عرسها لى دى حتكون احسن بنت و خالية من العقد


ردود على عمر أبو أحمد
United Arab Emirates [محمــــــود] 05-01-2011 10:18 AM
حل عقدتك انتا الاولز
ود عرب قال...


#135938 [سوداني]
0.00/5 (0 صوت)

04-30-2011 03:27 PM
الجماعة ديل بعملوا الشركات والشركات بتشتغل تورد وتستورد وتبرطع زي ما عايزه


#135906 [بنت كرار]
0.00/5 (0 صوت)

04-30-2011 02:16 PM
ياابو الجبابير {عشان ماتبقي الجبابرة } انت ابو الفهم تككككككون حقت منومنو مننننننننو البقدر يعمل في المسسسسساكين كدة


#135889 [zein]
0.00/5 (0 صوت)

04-30-2011 01:50 PM
اعتقد ان صاحب شركة هارفست هو عبد الحليم المتعافى (;) ;)


#135877 [هاشم عبد الماجد خالد]
0.00/5 (0 صوت)

04-30-2011 01:31 PM
الاستاذ الفاتح جبرا
طلبى الوحيد ان ترجع صورتك الاولى عشان الصلعة دى بتذكرنى صلعة عمر البشير وانا زول بريدك وما داير اشوف صلعة عمر البشير راكبة فى راسك
ثانيا شركة هارفست صاحبها عندو صلعة ومن بحر ابيض كان ببيع الكمونية والطايوق
وكان واليا للخرطوم ومعرس بت مامون بحيرى


ردود على هاشم عبد الماجد خالد
United Arab Emirates [الفاروق] 05-01-2011 11:38 AM
والله انا مع الزول ده رجع صورتك القديمة موش عشان انا بكره البشير او عندى راى فى زول لكن انت بالصورة القديمة فعلا بشعر بان انسان السودان عائش

Sudan [زنقه زنقه] 05-01-2011 12:30 AM
يا هاشم حرفو المتعافن؟


#135875 [monem musa]
0.00/5 (0 صوت)

04-30-2011 01:28 PM
متزوج مثني وثلاث ورباع دي نسيته


#135874 [ادروب]
0.00/5 (0 صوت)

04-30-2011 01:25 PM
ايوااااااااااه ده كمان داير دليل علمى دة سؤال منطقى


#135860 [وجع الزمان ]
0.00/5 (0 صوت)

04-30-2011 01:06 PM
ياراجل ماتحكها اكتر من كدة وانسي وعيش وخائف عليك يبهدلوك ويجلدوك ويسجنوك وبعدين يحاكموك وتطلع براءة .
كسرة:
يادنيا يامافيك حاجات محيراني
زرعوا القرع طلع البادنجان في ثواني
واه يازماني الفي حكومة الانقاذ رماني
وبالتقاوي الضاربة مجناني
لاخلوا لي كبدي ولامصراني
وكلام في كلام وفي الخر تطلع زوبعة في فنجان
(( الشعب يريد عصير التقاوي ))


#135859 [حبر تبش]
0.00/5 (0 صوت)

04-30-2011 01:06 PM
ما قالوا ليك الشركات الحكومية ما عارفين عددها كم ... أنت نسيت ولا شنو؟؟؟ عالم عجيب ما تخلونا نستر بعض ياخي مالكم تحكوها كده لمن تجيب الدم

لك التحية يا جبرا :D :D :D :D :D ;) ;) ;) ;) ;)


ردود على حبر تبش
Saudi Arabia [صدقي باشا] 05-01-2011 11:05 AM
يا جبرة ..با فاتح.. لوعرفت الماسورة بت منو حتعرف الشركة بت منو..ولا أقول ليك خليها مستورة..

Sudan [سيد الاسم] 04-30-2011 06:09 PM
تقاوي فاسده او فارقة كفراق رووس الشعب السوداني كما يظنون ساستنا !!!!!!!!!

واسمده فاسدة كمان ونفس المشكل العويص البايع والمشتري واحد (فاهمنا دي ولا اشرحا ليكم )
في الحاله الاولئ البايع شركة مملوكة للوزير او معارف الوزير او للوزير عمو لة والمشتري الوزاره التي يتراسها نفس الوزير .......
وفي الحلة الثانية الشركة المستورده(شركة الاقطان ) شركة يراس مجلس ادارتها نفس الشخص الذي يراس اتحاد الجه المشترية (اتحاد مزارعي الجزيرة والمناقل)
فهمتوها ولا لسة اجذم انكم فهمتوها من البداية ولكن من يفهم ساستنا باننا فاهمون ....


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة