من (أكل) أموال أسامة ؟ا
05-04-2011 04:10 PM

حديث المدينة

من (أكل) أموال أسامة ؟؟

عثمان ميرغني

أسامة بن لادن الإسم الأشهر في الكرة الأرضية كلها.. بعد أن أنهى سنوات جهاده في أفغانستان.. بطرد المستعمر الروسي منها.. تعشم في السودانيين خيراً .. وجاء إلى السودان.. لم يعتبرها رحلة (طارئة) تتطلب أن يقضي أيامها عازباً ويترك أسرته في أي ملاذ آمن آخر بعيداً عنه.. بل جاء بأسرته وأمواله.. وأقام مكشوفاً غير متخفي .. يرى ويراه الناس.. المرة الأولى والأخيرة التي رأيته فيها في السودان.. من خلال شاشة التلفزيون السوداني في نشرة الأخبار عندما وقف في منصة الاحتفال جنباً إلى جنب الرئيس البشير بمناسبة افتتاح طريق الخرطوم- شندي (طريق التحدي).. كان ضيفاً رسمياً.. ومن حر ماله.. بخيراته يمول المشروعات.. ولكن فجأة طلبنا منه الرحيل.. أمريكا رفضت عرضاً بتسلمه لسبب بسيط هو أنه غير مطلوب لديها (حتى تلك اللحظة في العام 1996).. حتى تلك اللحظة أسامة بن لادن غير مطلوب دولياً لأية جهة.. ولو كان مقيماً وقتها في بريطانيا مثلاً.. لما كان ممكناً أن تطرده الحكومة البريطانية.. تماماً مثلما أقام راشد الغنوشي في بريطانيا لاجئاً محتمياً بها من جحيم الرئيس التونسي زين العابدين بن علي.. لم يكن ضيفاً ثقيلاً.. ما أن أوعزت إليه الحكومة السودانية بالرحيل. حتى نفض يديه ولم ينتظر تصفية شركاته ولملمة أمواله.. ربما كان يقول في قرارة نفسه ( هي في أيد أمينة.. عند إخواني .. متى طلبتها ستأتيني في اليوم التالي) وسافر إلى أفغانستان منفياً.. قسراً لا اختياراً.. وترك أمواله وشركاته وممتلكاته في السودان. أين ذهبت هذه الأموال والممتلكات والأصول الأخرى؟؟ هل (أكلها الدودو) ؟؟ سمعت مساء أمس الأول من الأخ ضياء الدين بلال رئيس تحرير الزميلة السوداني خلال حوارنا التلفزيوني في قناة النيل الأزرق.. أنه قرأ مقابلة صحفية أجراها عبد الباري عطوان رئيس تحرير صحيفة القدس العربي مع بن لادن .. فسأله عن أمواله وممتلكاته في السودان فقال بن لادن أنها (سرقت منه بصورة مؤسسية.. وباسم الدين).. من سرقها منه.. بصورة مؤسسية.. وباسم الدين (كمان!).. أنا شخصياً لا أعرف وليست لي أية معلومات.. وعلى يقين من أن جميع أقاربي وأصدقائي ومعارفي لا يعرفون.. بل ومتأكد من أن 99.9% من شعب السودان لا يعرفون من سرقها بصورة مؤسسية وباسم الدين (كمان!).. لكني على يقين (واحلف كمان) الباقي من شعب السودان وهم الـ(0.1%) يعلمون.. ويعرفون.. ومتأكدون .. من الذي أكل أموال اسامة بن لادن.. لكن أسامة بن لادن لم يقل أن أمواله (أكلت) منه فحسب.. بل قال (باسم الدين!!).. لماذا لا تبحث جهة ما.. وتفيدنا .. من (أكل) أموال أسامة.. لن نقبض عليه.. ولن نقدمه الى النيابة. ولن نعمل معه (تسوية).. فقط سنقول له ( يا اخي خلي عندك دم . وطلع الزكاة .. نبنى بها مسجداً باسم صاحب المال.. إلا إذا كان من أكل مال أسامة .. هو ممن (يأكلون التراث أكلاً لما)

التيار


تعليقات 28 | إهداء 2 | زيارات 9724

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#138729 [ibnafan]
1.00/5 (1 صوت)

05-07-2011 12:56 PM
يا اخوانا لاتستعجلوا النتيجه معروفه.سرطانات نزيف من الانف والفم والفرج والابط سكتات .اوكانبو عداله دوليه.هروب من البلد .


#138674 [isam]
1.00/5 (1 صوت)

05-07-2011 11:26 AM
اسالوا على عثمان محمد طه
يجيبكم على هذا السوال


#138379 [زول متابع]
1.00/5 (1 صوت)

05-06-2011 11:34 AM
استاذ عثمان ميرغنى ...الآكلوا قروش اسامه بن لاذن هم الناس اللى صلوا عليه صلاة الغائب...جو للصلاة وهم يمتطون ظهور الفارهات من السيارات وقد كانوا يمتطون ظهور الحمير كما اعترفوا من قبل ......بعدين يا استاذ عثمان ديل اكلوا قروش الشعب السودانى كله وواللا ده ما بيهمك؟؟


#138080 [live]
1.00/5 (1 صوت)

05-05-2011 02:11 PM
أرجح أن يكون أحد ( رؤساء نادي القمة الرياضية في السودان ) بحكم ظهوره المفاجيء كراسمالي في الساحة السودانية , وكان يعمل في السعودية .
هذا الشخص قام بشراء بعض المؤسسات الحكومية بالسودان منها المدبغة جنوب أبو حمامة ... والمدهش هذا المشتري أكل أموال العمال بالمدبغة الذين أفنوا زهرة شبابهم وتعب عرقهم بالمدبغة ولم يقم بتعويضهم حسب قوانين العمل.


#138074 [blackberry]
0.00/5 (0 صوت)

05-05-2011 02:01 PM
سيعرفون عندما تعلن أسرة بن لادن عن حصر التركة ومطالبتها للحكومة السودانية بذلك , لكن ربما الحكومة في سبيل أن تتستر علي من سرقها ستقوم بدفع التعويض لأسرة بن لادن من سكات ويا دار ما دخلك شر.


#138053 [عيد الواحد المستغرب جدا!!]
0.00/5 (0 صوت)

05-05-2011 01:16 PM
ياهندسة الاكل حقوق بن لادن هم نفسهم الرجعوا الشيخ صالح كامل الى بلاده فى (عجلة معوقين) بعدما (شلوه)!! تقولى شنو --تقولى منو؟!! ودى فاتت عليك كيف ياحريف؟!! وانت عامل فيها (المقدده) !! وياريت انتهت على كده الجماعة ديل عندهم مقدره عجيبه فى اكل الناس و(تلبيسهم تهم)-- ومن ده تقدر تستخلص ان الامر كله (هى ليست لله إنما هى للمال والجاه) والمسألة بقت ما عايزة فهامه يا فرده!!!وبالمناسبة دى وين املاك (خاشقجى) وده ما خروج عن النص لكن سؤال برىء وفقط دايرين نعرف إذا حكوماتنا المتعاقبة (تخصصت فى أكل اموال المستثمرين) -- مستثمرين (الهم والغم اللمامة) واخشى من ان الحكومات دى بتأكل الشعب من قروش الحرام المستحلنها لنفسهم ولاولادهم ؟!!-


#138050 [حسن]
0.00/5 (0 صوت)

05-05-2011 01:13 PM
اسامة صرح بان الترابي كان ياتيه وياخذ منه مليون دولار لزوم الجهاد وافاد في لقاء نشرته مجلة روز اليوسف المصرية ان النظام الحاكم في السودان مافيا متسترة بالدين وعليه الاكل المال ذكر دون مواربة.


#138034 [mohamed]
0.00/5 (0 صوت)

05-05-2011 12:34 PM
القصه بتاعت ود الخدر المارجع للزول كشكو واولادو الطشو

عليكم الله ورونا ليها هى شنو ؟؟؟


#137996 [سوداني مشرد]
0.00/5 (0 صوت)

05-05-2011 11:21 AM
حلوة والله حلوة دي يا أستاذ عثمان

ديل أهلك وديل عشيرتك وديل حبايبك وديل صحابك وإنت عاااااااااارف والبشير عارف وزمرة البشيرة عارفة

وحتى قوش الإنطرد أخيراً عارف ومالك وساكت وشيخ أبو زيد وعبد الحي والبقية الباقية من المتأسلمين الذين

صلوا على روح أسامة هم الذين أكلوا أموال أسامة

ديل ياأخوي يألكوا ناقة صالح خلي أموال أسامة القبل 15 سنة القريبة دي ، ديل يا أبوي بياكلوا في

في أموال الشعب من 22 سنة مليارات تتتلتل شي أكلوا في السودان وشي هربوا برا وشي عرسوا بي

الخزي والعار للكيزان

الخزي والعار للمنافقين

الخزي والعار لمناصري أسامة

ولانامت أعين المنافقين

وإن عدتم عدنا


#137947 [murad]
0.00/5 (0 صوت)

05-05-2011 10:35 AM
دي دايره ليها مقال اموال بن لادن اكلها الغول الله ينتقم منه!


#137937 [الزول الكان سمح]
0.00/5 (0 صوت)

05-05-2011 10:27 AM

ياعثمان ميرغنى

غايب ليك يومين وراجع بى سؤال إنت عارف إجابتو سلفاً...يعنى أكلوها منو فى تربيزة (ود الأغا) ماديل ناسك وعارفهم كويس..ياكلو ناقة سيدنا صالح

لو كان عندهم ذرة من الأخلاق والأمانة والعفة كان رجعوا للراجل فلوسوا لمن عرف الفيهم.. لكنهم كلهم على شاكلة :

صاحبك ود الخدر المارجع للراجل كشكو... وأولادو الطشو



#137912 [إسماعيل باشرى]
0.00/5 (0 صوت)

05-05-2011 09:52 AM
والله ديل ياكلوا مال النبى خلى بن لادن الشيخ المجاهد الله يرحموا ويغفر ليهو .


#137872 [قاسم خالد ]
0.00/5 (0 صوت)

05-05-2011 07:45 AM
سرقت منه بصورة مؤسسية.. وباسم الدين....... هاهاها .... يعني سرقوها الجماعة ... ما ممكن يكون الحرامية من حزب الأمة مثلا أو من الشيوعيين أو من غيرهم ... من غير الأيادي (المتوضئة) يسرقها !!! و برضو تقول لي : هي لله .... قوموا لفوا ...


#137865 [saif]
0.00/5 (0 صوت)

05-05-2011 07:17 AM
خليك واضح يا جميل الله عارف وانت عارف وانا عارف الشعب الفضل عارف ان الجماعه ديل ياكلو ناقت النبي موش اموال بن لادن هي شبعتهم يا ريت شبعو اموال بن لادن اموال الشعب وماعندهم مانع من اكل الظلط بينهضم


#137817 [محمد موسى]
0.00/5 (0 صوت)

05-05-2011 12:56 AM
هل تستطيع ان تقسم بانك لاتعرف؟ ولا حتكون زى المرحوم الرئيس الراحل السيد احمد الميرغنى عندما سئل اثناء محاكمة اعضاء مجلس مايو عندماساله القاضى( بتعرف المتهم دا؟) قاصدا الرائد زين العابدين محمد احمد - فاجاب السيد ( لا ) وعندما عاتبه الختمية على هذه الكذبة وهو تحت القسم اجابهم ( حاصوم كفارة !!) فهل انت برضو حتصوم كفارة ؟ احسن تاجل الصوم شوية لانو رمضان على الابواب- مع تجياتنا لكل من عبد الباسط حمزة ومحمد الحسن عبد الله وجمال حسين ( دفان ) ومعاوية محمد عثمان وعماد بتاع سودانى


#137780 [الحقيقة]
0.00/5 (0 صوت)

05-04-2011 10:09 PM
ذكر عيد البارى عطوان فى كتابه ان الشيخ الشهيد اسامة رفض ممتعضاً الحديث عن امواله فى السودان لكن عىق عبد البارى ان الشهيد الشيخ بن لادن عندما طرده البشير بدبلماسية انه طلب مبلغ ال 300مليون دولار دينه على حكومة السودان ( يعنى علينا كلنا) ذكر له البشير بان الحكومة لا تملك مال لكن ممكن اذا ارد يمكن ان ياخذها ذرة لان الموسم مبشر. استنكر عبد البارى والشيخ المطارد وقتها( تفجيرات نيروبى و دار السلام) كيف يبيع هذه الذرة


#137775 [الحلاوي]
0.00/5 (0 صوت)

05-04-2011 09:55 PM
عثمان ميرغني أكثر صحفي مؤهل لمتابعة ملف أموال بن لادن وأموال ما يسمى بالحركة الاسلامية بحكم أنك كنت في مركز المعلومات بالتصنيع الحربي وكذلك تعرف جيدا عبدالباسط حمزه وجمال زمقران والجماعة الصغار عبدالله عبدالوهاب وبقية الشلة ولكن دخولك في هذا الدرب الخطيرحتما مصيرك مصير الصحفي محمد طه محمد أحمد


#137772 [رضوان عكاشة]
0.00/5 (0 صوت)

05-04-2011 09:43 PM
أنا شاهدت الحلقة التي بثت بالنيل الازرق الصحفي ضياء الدين لم يقل ما نقله عثمان ميرغني،الكلام دا اتقال وين؟ عثمان يستحق ان نطلق عليه عثمان الكذاب


#137761 [حامدابوعبدالمجيد]
0.00/5 (0 صوت)

05-04-2011 08:26 PM
مساء الخير عليكم
الرجل مضي ميتا او مستشهدا علمو عند الله ربنا يرحمو ويغفر ليو وترك لكم الاموال اسرحوا وامرحوا غنوا وارقصوا ولكني اكبرت فيه تركه للنعيم فى السعودية وملايين الدولارات وذهابه لتورا بورا ووقوفه بجانب اخوانه فى الدين غض النظر عن اتفاقنا او اختلافنا معه اسامة به شئ من اسمه ويكفي انه سعى وراء فكرته ونفذها حد الموت
وجماعتك ديل ناقة صالح مابقصرو فيها ببلعوها والجمال ماشة ومابدو الجنبهم ولا الفقراء حتى الجلد والراس بقسموا للمطبلين والفنانيين وهنا بتذكر عبدالرحمن عبدالله قبل يومين بغني للريس فى المجلد وموتا بالمغصه اشرب الكوارع ياجدي الريل ابو قزيمة
تصبحوا على وطن


#137759 [Kurbeke]
0.00/5 (0 صوت)

05-04-2011 08:18 PM
حسب علمي ليست لاسامه عفوا شيخ اسامه من اموال في السودان سوي حصان اعرج وحسب علمي كمان فلقد اوصي به لعمر الترابي ابن وريثه الشرعي في الارهاب في الوصيه التي تركها عند محاميه الخاص
قائدنا الترابي الارهابي


#137732 [arbab]
0.00/5 (0 صوت)

05-04-2011 06:52 PM
قلت لي قال الجماعة لعبو معاهو كوكان عشرة وضربو بي حرفنة ...شبكوه هي لله وفليعد للدين مجده وصاحبك شالته الهاشمية وبهلها ليهم...دي الصورة المؤسسية اللحقو بيها السودان امات طه....يا استاذنا الفاضل اموال اسامة قااااااااااااااالبة في السوق شيء شركات بترول وشيء إتصالات وشيء اعمال هندسية وشيء مجمعات تجارية ....نعم كتيييييييييييرة من كريم نزلت علي عسكري وبقدرة قادر بقي رجل اعمال...وعمك دا شغال بعيييييييييييد من الاعلام والهيلمانة والاضواء ...لس فاكر الشعب السوداني عبيط وطيب...قول ليهو خليك كدا


#137729 [hamid abdeen]
0.00/5 (0 صوت)

05-04-2011 06:46 PM
عبدالباسط حمزة هذا الضابط الصغير وقتها هو من اكل اموال اسامة بن لادن وقد ورد ذكره في شهادة احد المعتقلين في غوانتانامو عنما تم التحقيق معه بواسطة محكمة امريكية ، وقام عبدالباسط هذا بتسجيل شركة في دبي بمساعدة عبدالله حسن احمد البشير وقد قامت هذة الشركة بالاستيلاء على اموال اسامة بن لادن وفي محاولة منها لتبييض هذه الاموال قامت ببعض الاستثمارات في السودان ودخلت في شراكة مع بن خرباش ورجل اعمال يهودي ونالت حق الامتياز على التنقيب عن الذهب في مصر وذكرت هذه المعلومة عند محاكمة واحد من وزاراء حكومة حسني مبارك ورد فيها اسم المدعو عبدالباسط حمزة.
انت ياعثمان ميرغني تعرف ذلك جيدا ولكن تتعامى عن الحقائق لخوفك من بطش عمر البشير واخوته كما تم تهديدك سابقا بعدم الخوض في محاولة اغتيال حسني مبارك.
لكن الشعب لابد ان يعرف الحقائق كاملة وعما قريب.


#137721 [حمدان]
0.00/5 (0 صوت)

05-04-2011 06:10 PM
عثمان ميرغني
اختشي
ما زمان قلنا ليك حلقنا القنبور



والله انته عارف والله عارف وانا عارف


هي بقت خلاص علي اموال بن لادن


التفت حولك هل بيتك زي بيتك الزامان لمن رجعت من مصر ....
هل سيارتك نفس خب 11
هل
هل
ارحمونا الفينا مكفينا


لا تظنوا اننا اغبياء كما تتوهمون


#137710 [ابو سامي]
0.00/5 (0 صوت)

05-04-2011 05:46 PM
سؤالك يا عثمان فيه شيء من الخبث وغير بريء أنت تعرف من أكل أموال بن لادن وإذا لم تعرف ضع قلم الصحافة وأقلب وجهك شطر سعد قشرة بيع شرابات وملابس داخلية لزوم الحريم والاطفال تكسب دهب أفضل من كونك صحفي ولا تعلم عما يدور في البلد الراعي في فيافي كردفان أو دارفور يعرف من أكلها وللشهيد مقولة في تقييم الانقاذ قال : ( خليط مابين الاسلام والعصابة )


#137703 [ود زروق]
0.00/5 (0 صوت)

05-04-2011 05:39 PM
نحن مالنا ومال بن لادن من اكل اموالنا كنت يا باشمهندس تسال السؤال دا من اكل امال الشعب السودانى طبعا الكيزااااااااااااااااااااااااااااااااااااااااااااااااااااااااااااااااااااان


#137688 [احمد عثمان صالح ]
0.00/5 (0 صوت)

05-04-2011 05:05 PM
منو راح يكون غير الكيزان ياعثمان ميرغنى وانت بتعرفم ذى جوع بطنك وهم يأكلوا مال النبى مش مال اسامة بن لادن واحتمال يكون تمويل جريدة التيار من هذة الاموال ولا استبعد ذلك اطلاقا فيا عثمان ميرغنلى لاتلعب على الحبلين فأنت واحد منهم ومهما كتبت فأنك عضو فى هذا المحفل الماسونى وليكم يوم


ردود على احمد عثمان صالح
Canada [Ibrahim Adam] 05-04-2011 06:00 PM
دى حلوة و قوية أوى يا ود عثمان صالح. و آلله أديتو و أديتهم فى المليان.
أحييك و عافى منك تب.
:D :D :D :D


#137681 [زول بيكره الكيزان تجار الدين]
0.00/5 (0 صوت)

05-04-2011 04:51 PM
السارق معروف .. ورجل اعمل معروف ... وكوز معروف...

.
.
.
.
هو عبد الباسط حمزة ... هذا الشخص كان مديرا لاعمال اسامة بن لادن في السودان .. وهو كان مسؤول من ادارة كل ممتلكات بن لادن بعد ما خرج من السودان
.
.
.
.
.
والا فاليبرهن هذا الرجل من اين اتى بكل هذه الاموال


الكيزان تجار الدين


#137677 [Ibrahim Adam]
0.00/5 (0 صوت)

05-04-2011 04:36 PM
أكلو الدودو. و الدودو وينو؟ عاين فى وجوه الصلوا عليهو صلاة الغائب، ما ياهم الدودو زاتو بعينو و فكينو!! زايداً واحدين تانين أكلوا و مسحوا شنيباتهم، دقونهم، وكروشهم و أزعجونا ب: هى لله، هى لله!!


عثمان ميرغني
عثمان ميرغني

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة