الطفل المعجزة 2
05-05-2011 09:29 PM


الطفل المعجزة 2
أسماء الجنيد


الريس قاعد في مكتبه عرقان ومنرفز وجوفو مولع نار
ولسة مواصل العوا مع مصطفى اسماعيل الطفل المعجزة
وداك قاعد قدامو ممحن متين الريس يكمل كلامو وكواريكو ، ويكب الزوغة يتخارج ، بدون ما يأخد ليهو لبعة ولا رصعة في ضهرو .
ولا لفخة في وشو بي جزمة الريس الشايلا طوالي سلاح قدامو ,,
يقبل عليهو الريس :
هآآآ الطفل المعجزة ما قلت لي من قبيل كنت وين لابد ؟؟
الجرس ده فتر من اصبعي ، برن ليك في الداهي ده لي ساعة؟
ساعة شنو يا ريس؟ .. انا من عتبة الباب طوالي نطيت جوه مكتبك
بتغالتني كمان؟؟ ايوه برن ليك لي ساعة، عندك مانع؟ أمشي جيب لي تلج ..
الطفل المعجزه يطنطن وينضم مع روحو : هو انت بتتغالت يا الصقر؟
الريس: قلت شنو؟
قلت عاوز تلج يا ربي، واللا تقصد مويه بارده فيها تلج يا ريس؟
انت ما بتسمع واللا ما بتفهم البتسمعو؟ قلت ليك تلج .. تلج .. التلج الواحد ده ما بتعرفو كمان؟
الطفل المعجزه: حاضر يا ريس .. اجيب ليك لوح كامل كمان ؟
لوح يا لوح؟ لوح اوديهو وين؟ انت ما بتشوف الليحان الداخله ومارقه على في مكتبي ده؟
عاوز كمان تجيب لي لوح تاني يا لوح على العندي ؟ أوديكم وين تاني؟
جيب لي تلج في جك .. مش جكّه القلت ناس السودان بشربو بيها الشاي
جك تلج، تجك عريان عادم الدلقان قول آمين.
بعدين تعال هنا انت لما قلت الناس بشربو الشاي بالجكّه عشان مافي سكر في البلد،
ما فكرت انو الجكّه دي اغلى من السكر؟ كيف يا معجزه بلد فيها جكه وعجوه وتمر وما فيها سكر؟ نوع غباكم ده ياهو الجايب اجلي وجايب المشاكل مع الشعب البقى يشوف البوم الشوم وما يشوفنا..
أمشي من قدامي قوام وجيب التلج قبال ما الفحك بالنصيبة دي
المعجزه: حاضر يا ريس هوا تلات دقايق سوا يكون التلج بين ايديك ..
بس ما قلت لي يا ريس .. التلج أكسّرو واللا اجيبو كبار كبار؟
الله يكسر فقرتك المافي دي .. جيبو كبار عشان أفلعك بيهو وارجمك بيهو رجم الشياطين..
جيبو مدروش .. يدرشوك ربابيط في العقبة ,,, انت ما بتعرف تتصرف صاح براك أصلو؟ ..
تلج دقاق عاوز ابرد بيهو نافوخي الفاير ده ، الخلاهو لي عبد الرحيم أب رياله ونافع المو نافع وعلي الغتيت ، خلوهو لي زي طابونة الرغيف ..
وإنت يا اللوح جيت تميت الناقصة.
الطفل المعجره: أنا عارف إنت زعلان منهم عشان الطيارات الضربت بورسودان.
طيب يا ريس ما انت الريس وعارف كل حاجه، حل الموضوع براك وارتاح !
أحلو براي؟ أنا بعرف احل براي؟
انا كان بعرف أحل واربط براي كان جنازير راسي بقت محلوجه ولافه في الفاضي، ومسخنه لامن راسي بقى مكنه فاقده مويه؟
نافوخي بقى زي طاحونة العيش , يدقدق النهار ما طال..
أنا من يومي و من ما ختاني شيخك الترابي في الكرسي ده ، قاعد هنا حارس وغفير بس بى طبنجتي دي .
وديل البحلو وبربطو .. يربط حلوقهم إن شاء الله, قوم أجري قوام ألحقني بالتلج
أمشي أجري جك جيب جك التلج يا الأصنج اصلك زي عبد الرحيم ,, تحمدو سيدكم لا عربي لا دين..الخلوة المشوها خلق الله دي كلهم انتو ما شفتوها ولا بتعرفوها, فالحين للمناجضة الفارغة بس..
يمرق المعجزة مجرجر كرعينو وبعد مدة يجي نابل شايل جك التلج و يدخل مكتب الريس ويختو ليهو قدامو في التربيزة ويقبّل متخارج ..
الريس يملا ايديهو الاتنين من التلج المدروش ويمسح بيهو راسو ويتكلم مع روحو:
الله ,, الله .. أححح .. بالله فاخورتي بتدور تطرشق ، بقت كمينة عديل ناقصة الطوب ..
الله لا غزّ فيك بركه يا نافع يا الصبرة ام دبرة .. وعبد الرحيم اب لغوفه ..
وانت يا علي ود عتمان عامل لي عيونك المكتّله دي زي عيون الكديس،
أصبر ساكت كان ما سلخت جلدك أصلو أنا من زمان بدور لي جلد كديس أعملو جزمة ..
اصبرو لي ساكت انا عارفكم انتو التلاته ديل ياكم الملحقني حسني مبارك .. حسني مبارك أخير مني.
تراهو في مصر وفي بلدو، أنا على لاهاي طوالي يا كافي البلا ما عندي صليح
.. لكن حرم حرام تلاتة من حريمي كلهن ما بمشي براي .
إلا اكان اجرجركم كلكم معاي حتى قوش المتندل لي ده بعد كشيتو ما برحمو كاشيهو معاي كاشيهو معاي مافي اتنين تلاتة..
الريس يشيل في التلج ويعرك في الصلعة ..
الطفل المعجزه فتح الباب وقرّب يمرق من المكتب
الريس ينهرهو: تعال هنا ده، ماشي وين؟
تعال إنت ياكا الجبت لي البلاوي دي كلها انت الختيتني في ايد اوكامبو ..
انا يا ريس؟ أحلف ليك بإيه ما انا وحياة ربونا .. ماانا
اسكت سكت حسّك ..
انت مش لما كنت وزير خارجية فرحت بى قرار مجلس الأمن الحول فيهو ملف دارفور للمحكمة الجنائية؟
وقلت ايوه ده احسن قرار؟ .. انت يا البليد ما نططت واتروجلت وقلت أيوه ودونا المحكمة الجنائية وجدعتني لاوكامبو؟
ومرمطتني مرمطة ضلافين في جزارة وخليتني ما قادر امشي تشاد القريبه دي؟
اظني بعد شويه توتي دي ما اقدر ادخلها، خليك من الجنوب الفصلناهو ده، اكيد يسلموني ليهم عديل بي سلام جمهوري كمان ..
عشان كده انا جبتك معاي هنا مرمطون عشان امرمطك عدله وقبلة زي ما مرمطتني وبهدلت حياتي..
ينط الطفل المعجزة ,, لكن انا ما كنت عارف انهم بضربوك كده .. ان شا الله يضربهم الضريب شقاق العناقريب ..
طيب كنت وزير خارجيه على شنو لو ما عارف انو قرار مجلس الامن ده حيوديني في ستين داهيه؟
طبعا طبعا دي واحده من معجزاتك يا معجزه .. أكيد شيخك الترابي قال ليك فكو عكس الهوا وريحنا منو....
مصطفى عثمان يغرود في عيونانتو ويضحك هئ هئ هئ هئ
البضحكك شنو يا الفالح؟ بتضحك علي كمان؟
أبدا ياريس بس عندي خبر حيحل ليك المشكله دي كلها
الريس: إنت معقول يجي منك خبرا زين؟ يا ها كمان ورطه جديده واللا نافع وعلي غمتو ليك ورا الباب؟ عشان تسقطوا حجري.
غمت بتاع شنو يا ريس؟ ديل بغمتو حاجه؟ ديل بغمتو سوا ودافنينو سوا براهم ..
الريس: المره الفاتت انا مش رسلتك وقلتك ليك امشي اتشمشم لي تحت تحت وشوف نافع الصبره بدبر في شنو؟
انا عارفو الصبره ده كل ما يحاول يضرب قوش الضربه تجي فيني أنا ده .. أها لقيت شنو؟ والله انت لو رسلوك البحر تجي فاضي ...
يتهلل وجه الطفل المعجزة ويغرود عويانتو لامن ود عينو راح: اسكت ساكت يا ريس عرفت ليك خبر نافع .. خبر يعجبك ويبرد عليك أحسن من التلج ده ..
الريس: قول
نافع عيان يا ريس!
الريس :عنده وجع عيون؟ ما اصلك طبيب عيون فاشل عشان كده جيت تتصرمح معانا بى جاي
عيان بى شنو وعرفتو كيف عيان؟ كشفت عليهو؟ .. أوعك تقول لي كشفت عليهو كمان .. !!
إطّمن، لا كشفت عليهو ولا حاجه .. عرفت من الراجل البعمل ليهو الشاي والقهوه قال لي نافع اليومين ديل بشرب الشاي مسيخ ....
يمسخك قرد، أصلو نافع مسيخ وممصمص من يومو، لو ختو ليهو سكر السودان كلو ما بطعم، شي لحس كوع وشي هاك ألوي ضراعي وشي رهيفه تنقد وشي ضرب نار في ابو جنزير، واظنه بتف على روحو في المرايه كمان .. عيان بى شنو قول سريع؟
أنا عارف الزول الما بشرب الشاي بالسكر يا غنيان وعيان ، ويا فقران وصرمان ما عندو حق السكر، زي كل الشعب السوداني الخليناهو يشرب الشاي بدون جكه ..
طبعا نافع ما فقران لاحس حق الشعب كلو زي لحس الكوع البقول فيهو داك ..يعني معناها عيان ... شفت جبتها ليك كيف يا ريس؟
يجيبوك مجنز، ده ياهو القدرت عليهو؟ وانا مالي ومال عياهو ان شا الله يموت هسي دي ويريحني ويريح خلق الله المكرهها حياتها,,
ما خاتين عليهو كان سموهو ابو العفين ,,
قول خبرك الجاي تقولو قبال ما تجيب خبري القرّب بي سببكم ....
الخبر ياريس انو عايزين يعينوني أمين عام لجامعة الدول العربية ..
الريس يضحك حتى اهتزت كرشه ها ها هاييي ... إنت ؟!!! مخير الله في عبادو
أيوه أنا ياريس، مالي؟ أنا من شدة ولائي ليك خليت الترابي عشانك وبقيت في خدمتك ترسلني بى جاي وبى جاي وأنا بس ترتار جاري برا دركسون ولا فرامل..
الريس: ما تكضب، انا جني وجن كضبكم ده ..
إنت خليت الترابي عشان المنصب والمكسب ما عشاني أنا وسواد عيوني ..
انا ذاتي ما عندي ولاء لروحي دي إلا للكرسي القاعد فيهو وقابض عليهو بى إيدي الإتنين واصابعي العشرة..
قول ساي قول منو ديل الما نصيحين العايزين يعينوك أمين عام جامعة الدول العربية؟
أيوه يا ريس، في ناس تحت تحت كده مرشحني حساده عشان يقطعو الطريق على الزول المصري الاسمو مصطفى الفقي النبزنا ده.
بعدين يا ريس انا شايف الشغلانه دي نافعه معاي، كلها مراسيل وحوامه، وانت عارفني بحب المراسيل والحوامه هئ هئ ..
الوظيفه دي التقول مفصّله علي زي المريله هئ هئ ..
الريس : ها ها ها هايييي آخ يا راسي، ضحكتني وانا راسي مولع مكوه ...
على الطلاق من حريمي جت الناس الرشحوك ديل لو عارفنك كان رشحوني أنا بي عولاقي دة!
جامعة شنو وعربية شنو؟ انت يا معجزة المرة الفاتت رسلتك لبنان لمّ فيك عمرو موسى بقى يرسلك وصهينت مني .
وبدل ما تجيب لي التقارير بقيت توديها لى عمرو موسى، يعني بقيت مراسله من الباطن.
وعمرو موسى شال منك التقارير وقال ليك أجري ألعب بره يا شاطر ..
هسه عايز تقعد في كرسي عمرو موسى ذاتو؟؟
بطل الهطاله بتاعت عبد الرحيم دي وروق في الواطة دي وفتح عينك سمح.
إنت قايل العرب راضين بيك عربي لامن يعينوك أمين عام كمان؟ ..
بعدين يا أجهل من الناس الرشحوك نحن ذاتنا ما عاوزين ندخل مع المصريين في الحته دي ..
حلايب قلعوها وما قدرنا نقول بغم، عايزنا كمان نقالعم في المنصب عشان يجو يقلعو أم كداده؟
المعجزة يقاطع بسؤال :أم كداده دي ملاح يا ريس؟ بتبخوه كيف ؟؟
يتبخوك بركة النبي بى نعلاتك، إنت أم كداده الجوه بلدك ما عارفا عاوز تبقى أمين الجامعه العربية؟
بعدين الرشحك ذاتو منو؟ في زول غيري برشح من وراي؟
ابدا يا ريس ... انا قآعد في كرسيا القدام بابك ده قريتو في واحده من جرايدنا .
الريس : ها ها ها ها ها ها .. قت لي جرايدنا؟ وصدقتها كمان؟
دي يا العوقه جرايد نحن بنغشغش بيها الشعب التلفان ده، تقوم انت آالفالح تجي تصدقا؟
أوعك كمان بتكون بتصدق كلام الجماعه الاشتريناهم وزرعناهم في المنابر؟ قوم لف بلا جامعه عربيه بلا شمار باير وبايت معاك ..
الطفل المعجزة : عليك ربنا قول خير يا ريس ورشحني بنفعك أحسن من ناس نافع الما نافع غير روحو.
اول حاجه اعملها ليك حأطوي ليك ملف أوكامبو ده زي البرش وزت اجدعو ليك في اقرب خور ..
الريس : إنت؟ إنت يا الورطني مع الجنائية؟
قال زت قال ,,
الله ينعل ابو دي غابة يقبضني فيها الكديس علي، والصبره نافع ، ويورطني فيها الهطله أبرياله، وتجي تفكّني منها انت يا الفار المعجزه . والله لو ما اوكامبو السلطوهو علي كنت مرقتها عند اهلي في حوش بانقا وارتحت من خلقكم دي كلها ..
غور من وشي أجري جُكْ جيب لي جك تلج تاني .. أوعك تجيب لي جكّه يا جكه إنت!!
يمرق الطفل المعجزة يخلي الريس يتوحوح زي اللادغاهو عقرب جروف ..
وينضم براهو ,, مالك علي يا يمة جبتيني في الدنيا دي عشان اتنجض؟
اريتني كان بقيت ديك .. آآي ديك عديل يعوعي من الدغش وينفش ريشو
اصلها دي هوايتي اكورك وانفش ريشي في الفاضي ..
ولا اريتني كان بقيت بليلة ’ آآي بليلة عدسي ولا لوبة عديل , ادهج في النار وياكلني نافع اغلي وافور ليهو في بطنو لامن يطرش مصايرنو
زي ماهو مفور نافوخي,,
أريتني كان بقيت طرحة ,, آآآي طرحة سااي يلبسنها البنوت , يغسلنها ويكونها وإن شاء الله يتشنها بالمكواة
اخير من تشة اوكامبو لي وتشتيش البهايم المعاي ديل ,
اريتني كان بقيت غنماية ,, غنماية ساي اسرح وامرح زي ما داير , زولا ساي يسعلني مافي
ما علي الا ادي الناس اللبينة دي كل مغيرب , وبعدها احوم واسرح واي زولا يتعارض لي يدافع عني اي تيس ي الزريبة ولا الخلاء
أخير من التيوس الحايمة تبرطع معاي هنا في القصر, لاهطين القروش في الكروش , وجايبين لي انا الأزية,,
آآه يا ناس جيبوا لي التلج التلج الحقوني بيهو ,,
يسمع في التلفزيون قدامو في الأخبار , اصدر الرئيس البشير قرار بإقالة قوش من منصبه ......
الريس: يكورك براهو البشير يطيــــــــــــــــــر ويقع في البير
علي الطلاق ماني انا , على الطلاق ده كلو من المو نافع , إن ما كرشت ليهو قوش ده وقشيتو من قدامنا ما ارتاح.
اها هو السبب والأخبار شايلة حسي انا , انا اطير وين واقبل وين ...
الكشحك يا قوش وريحك من برطعتنا في القصر , يكشحني انا ويرجعني اهلي , ولا يكشحني في الخور إن شاء الله , بس امرق من الورطة الأنا فيها دي ,,,
نواصل إن شاء الله
المرة دي كل زول يدعو بي الفي نفسو
انا غايتو دعوتي ياها دعوة حبوبتي التومة زاااااتا بس المرة دي طويلة
قولوا آمين بس
ودعتكم الله


تعليقات 4 | إهداء 1 | زيارات 3964

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#139000 [الزهجان]
0.00/5 (0 صوت)

05-08-2011 12:33 AM
قلنا ااااااااااااااااااااااااااااااااااااااااااااااااااااااااااااامين بس ما تطولي الفاصل ومشكورة على الترويحة


#138870 [Ali Abdelgawwi]
0.00/5 (0 صوت)

05-07-2011 06:15 PM
الاخت أسماء
شكلك كدا سمعت و طبقتي كلام وزير الداخلية بانه البنقو ما من المخدرات، و ضربتي ليك سيجارة بي كرتين قبل ما تكتبي المقال الرائع دا.
شكرا


#138810 [Mutaz]
0.00/5 (0 صوت)

05-07-2011 03:38 PM
Thanxs alot Miss.Asma 2provide us by these stories.showing what inside our goverment and ithink this was alittle pic of truth . and also we love ur words. warm greeting.Mutaz algenaid


#138377 [هشام]
0.00/5 (0 صوت)

05-06-2011 11:30 AM



الزول ده اسمو في الخليج وبين الدبلوماسيين \"فهمتونا غلط\"
بعد تحرير الكويت رسلوهو عشان يطبع العلاقات لأمير الكويت:
فهمتونا غلط


أسماء الجنيد
أسماء الجنيد

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة