إلا.. الكرامة..!ا
05-09-2011 01:43 PM

حديث المدينة

إلا.. الكرامة..!!

عثمان ميرغني

زارني أمس صحفي بريطاني.. وسألني بصورة مركزة .. لماذا لم يخرج الشعب السوداني الى الشارع مثلما فعل أشقاؤه في تونس ومصر وليبيا واليمن.. وأردف .. ألم تؤثر الأزمة الاقتصادية على نخوة الغضب عند الشعب السوداني.. قلت له.. راجع تاريخ الثورات السودانية.. القديم والمعاصر منها. الشعب السوداني لا يخرج (من جوع) ولا يصمت (من خوف).. ولو كان الجوع والأزمة الاقتصادية تخرج السودانيين الى الشارع.. لخرجوا حينما كان الحصول على (رغيفة واحدة) في اليوم يتطلب الوقوف من الفجر أمام المخبز لعدة ساعات.. قلت له.. الشعب السوداني (مقفول) بشفرة خاصة.. من يفك الشفرة.. يفك المارد الجن من الجرة..على ما تروي القصة الأسطورة الشهيرة.. شفرة الشعب السوداني في (الكرامة).. !! خذ عندك.. الرئيس النميري. أذاق الشعب السوداني من ألوان الجوع.. صبر عليه الشعب.. وألبسه كل أنواع الحرمان.. فصبر عليه أيضاً.. ثم من فرط إحساس النميري بان الشعب مات وفقد رجولته.. وان الشعب (جرذان) لا ينقصهم سوى حذاء يصفع جبينه.. ألقى خطبته الأخيرة قبل السفر الى أمريكا وقال فيها كلمات التي لا تزال ترن في أذن كل سوداني (من يأكل ثلاث وجبات فليأكل وجبتين.. ومن كان يأكل اثنتين فليأكل واحدة..) وسكت النميري عن آخر جملة التي يفهم أنها (ومن كان يأكل واحدة.. فليترك الأكل..) لم تكن تلك الكلمات تعني للشعب السودان انذاراً بالجوع أو الضنك.. كانت تعني آخر مرحلة في (تتفيه) الشعب السوداني.. لم تكن نفسها سوى عبارة أخيرة نطق بها النميري من مقر اقامته في أمريكا ووضعتها صحيفة الشرق الأوسط في (مانشيت)الصفحة الأولى إذ قال( ما في واحد بقدر يشيلني).. كانت تلك آخر رسالة للشعب السوداني تبرهن على نظرة الرئيس له.. فما الذي حدث؟؟ ذات صباح إرتدى بعض السادة الوزراء ملابسهم الرسمية للذهاب الى مكاتبهم.. ذهلوا لما خرجوا الى الشارع.. وجدوا الشعب السوداني يكتب لافتة عريضة عليها عبارة (خرجنا.. ولم نجدكم).. وفي لمحة عين.. (أصبح الصبح.. فلا السجن ولا السجان باقٍ).. ذهب النميري ونظامه.. وطوى شعب السودان الصفحة إلى الأبد.. لأن النميري تجرأ وفك الشفرة.. شفرة الكرامة.. الشعب السوداني يصبر على الجوع.. والنكد والكدر والتكدير.. إلا (الحقارة!!).. إلا الكرامة يوم تمس..لا يرسل الشعب برقية انذار ولا رسالة (SMS) .. وعلى النقيض تماماً .. الذي يستثمر في (كرامة) الشعب السوداني.. الحسنة بضعفها.. تكفي كلمة.. ليرفعك الشعب فوق رأسه.. وتكفي كلمة ليخسف بك سابع أرض.. لكن (الكرامة) ليست مجرد بلاغة وفصاحة.. هي فعل.. تماماً مثل (الحقارة!) هي أيضاً.. فعل..

التيار


تعليقات 28 | إهداء 0 | زيارات 5135

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#140136 [ابو عماد]
0.00/5 (0 صوت)

05-10-2011 01:07 PM
والله يا اخوتي هذا الرجل لا يستحق الرد ........ قد نضطر احيانا للتعليق ولكن ليس من اجل مايكتب وانما لنشارك الاخوة المعلقين الراي ......
حسبنا الله في مثل هذا الرجل ومن امثاله ككمال حسن بخيت وزملائه بصحيفة التيار التى تحاول عبثا ان تسبح بنا عكس التيار ........


#140121 [الزول الكان سمح]
0.00/5 (0 صوت)

05-10-2011 12:36 PM

يا صديقى....عبدالواحد المستغرب جداً...يا خى حمدالله على السلامة

الموضوع يا سيدى عثمان ميرغنى كلنا عارفنو بطبٍل لصاحبه ود الخدر دايماً وإذا قريت الرابط ده حا تعرف الموضوع كامل....لك ودى

http://www.alrakoba.net/articles.php?action=show&id=5784


#140111 [الأمين محمد خير]
0.00/5 (0 صوت)

05-10-2011 12:12 PM
مقال إلا الكرامه

نقول يا استاذ عثمان ميرغنى


المقالات ليست مجرد فصاحه وبلاغه

لا يمكن إختذال ثورات الشعوب فى الكرامه وحقاره ...وإذاء أمتهنت الكرامه ..للشعب تكفى كلمه طيبه من الرئيس ليرفعك الشعب ويرضى عنك .... ما هذا يا عثمان ميرغنى ....إختذال وإبتذال لعلم الثورات وللوقع المرير لهذا الشعب وتبسيط لثورة إكتوبر وأبريل ....ويا عثمان مرغنى ...ليس بالضروره أن تكتب العمود يوميآ ...( يمكن أن تحتجب لظروف فنيه )


#140102 [البعير]
0.00/5 (0 صوت)

05-10-2011 11:53 AM
الاستاذ/ عثمان ميرغني انت رجل بخاطب ناس مثقفين وفاهمين وسياسيين بالدرجة الاولي لان الشعب السوداني يعشق السياسة بالفطرة فاى كرامة واى حقارة بتكلم عنها ، كرامة الصالح العام وحقارة تشريد الناس وقطع ارزقهم ولا كرامة فصل السودان الي دولتين ، ولا كرامة لو راجل أطلع الشارع ولا حقارة الحس كوعك ، فلا تظلم الرئيس السابق نميرى رحمة الله عليه فكان افضل من هولاء الظلمة والحاقدين علي الشعب السوداني مليون مرة ( والله زى ما الشعب السوداني قال للرئيس عبود ضيعناك وضعينا معاك ) فنحن نقول للنميرى ضيعناك وضيعنا معاك وضاع السودان وانفصل الي دولتين وكله بسبب ثورة الدمار الشامل للسودان ( فلا تضحك علي صديقك الصحفي البريطاني بكلام لا يخش العقل ولا تضحك علينا نحن كاقراء للمواضيعك البتكتبها في هذه الراكوبة العامرة 0


#139986 [يعقوب مبارك]
0.00/5 (0 صوت)

05-10-2011 08:44 AM
الاستاذ عثمان .... هذا المقال تأريخى ... علامة فارقة فى مسيرتك الصحفية ... إنت بجدك يا راجل ؟؟؟ غايتو ما عارف أقول ليك شنو !!! دية أغبى مقال ممكن الواحد يقراهو ليك ... دة شنو العملتو فى روحك دة !!!؟؟؟


#139967 [سليمان]
0.00/5 (0 صوت)

05-10-2011 06:04 AM
الناس ديل عايزين موضع قدم فى الثورة القادمة ولكن هيهات النميرى الله يرحمه قبل الانتفاضة بغباء اعتقل شيخهم الدجال الكبير الترابى والان الثورات التى حصلت فى المنطقة كلها بدون استثناء عايزين حكومات ديمقراطية ولكنها خالية من الكيزان لانهم استوعبوا الدرس منا فيا عثمان وغيرك من الذين يلبسون ثياب الاسلام مافى دقن ولالحية بتخدعوا بيها طفل فى السودان لان اللى سوف يحكمونا انشاء الله يكونوا مايكونوا لان اسوأ من الذى يرتدى ثياب الاسلام وهو فى قرارة نفسه متأكد بأنه ليس كذلك احسن منه الاشتراكى الشيوعى ولاحتى البوذى لانهم على الاقل مقتنعين وعشان كده لو عايزين تكونوا متواجدين عند التغيير حاولوا غيروا انفسكم لانكم ضمن شعب بتولد مسلم وبتعاليمه السمحة بالفطرة وكفاية ولاشنو ياناس


#139940 [عيد الواحد المستغرب جدا!!]
0.00/5 (0 صوت)

05-10-2011 12:21 AM
الزول السمح --سلام--عرفتنى ؟ انا زولك الكان اختفى لفترة !! وذى ما شايف عمك عثمان استفذانى بكلامو الشين ده وخلانى اغب من جديد وحرم مانى سايبو !! ولتعترو جانا فى الكلام الهو ما قدرو وما كفاه جاب لينا الضغط والسكرى !! اهو قوم علينا الطوحال والبنكرياس والمصران الاعور وزاد عليهم العميان !! وشنو حكاية ود الخدر وكشكو واولادو الطشو ؟ انا ماتابعت معاكم المسلسل ده لكنى سمعتو طشاش من اخوانا المشاركين معانا فى رابطة (احرار الراكوبة) وبالمناسبة انا بعيب على ناسنا فى الراكوبة عدم اتباعهم التقنية العالية التى يتبعها موقع (حريات) من حيث إستقبال رسائل المعلقين بالاضافة للخط الكبير الذى يجنب المعلق الاخطاء الاملائية التى نلاحظها فى تعليقات الاخوة المشاركين وانا منهم ،والمعلوم ان قوة البصر تدنة الى مانسبته 30% من الزمن الافتراضى لها بمعنى اخر القهر الذى تسبب فيه الانقاذ خلال العقدين الذى جسم فيه على صدورنا جعلنا نخسر 70% من ادميتنا !! وكقول محمد صبحى الممثل المصرى المعروف اصبحنا كعم ايوب الجواهرجى (ربنا اخد منى كل حاجة وساب لى الصحة) وهذا ما فعله معنا الانقاذ وليته اخذ كل شىء بما فيها الصحة وتركنا بكرامتنا (المغلقة ربما للتحسينات) بكود الشيخ عثمان ميرغنى رجل الكرامات-- قال زارو صحفى انجليزى!! والصحفى ده ياربى برضو ماعندو نظر؟ والا فاقد حنان؟-


#139933 [mohamed hassan jabir- London]
0.00/5 (0 صوت)

05-09-2011 11:38 PM
What was the reason of this visit, did he come to ask why the Sudanese people have not been demonstrated against Al-ingaz in line with the other uprisings erupted in some arab countries . As we know foreign correspondents or high-profile journalists run interviews to discuss matters of great significance or likely would have a profound effect on public opinion, however I can\'t believe a foreign journalist undertake this interview so that he can update his newspaper readers that the Sudanese people were in a deep slumber because their dignity has not been trampled on yet.*


#139925 [ خالد]
0.00/5 (0 صوت)

05-09-2011 10:43 PM
في البرنامج التلفزيوني ومعك ضياء الدين بلال وقطبي المهدي حاولت انت والاخ ضياء زكر بعض المرا رات والانطباعات التي خرج بها اسامه بن من السودان ولكن اراكم تتعتعون في الكلام عند زكرها ما عارف احترام لقطبي واو خوف من زكرها علب العموم فهمنا قصدكم وزادكم الله شجاعة


#139923 [عيد الواحد المستغرب جدا!!]
0.00/5 (0 صوت)

05-09-2011 10:40 PM
يا أهل الله فى زول فهم حاجة من الشخص ده؟ اظنو وإن كان بعض الظن اثم!! فعلى ما يبدو انه يتحدث عن الكرامة!! وكمان قدام الخواجات ولاشك ان الخواجة ضحك عليه فى سره وهو يترافع لصالح الانقاذ على زعم ان كرامة الشعب السودانى محفوظة ومصانة !!تخيلوا معى يرحمكم الله قال آيه كرامتنا بقت مبرمجة ومسدوده بكود !!وطبعا كلمة السر عند الكيزان !!وحسب ما فهمت هو بيعتقد بعد الحاصل ده لسه الشعب كرامتو ما انداست ومرمطت بها الارض!! ياناس --واحد يدينى عقلو عشان افهم !! هل نحن حقا نعيش فى عزة وكبرياء وهاماتنا مرفوعة كبقية خلائق الدنيا؟ ربما !! طالما هناك امثال هذا الكاتب (النحرير) ومن فضلكم مافى زول يسألنى عن كلمة (النحرير) دى!! لانها جات معاى كده وخلاص، والعجيب شنو ؟ اذا الباشمهندس بيقول (قصة الاسطورة) رغم ان الاسطورة هى فى اصلها قصة ويقال فى الصحيح (كما تقول الاسطورة) وآآآخ انا منك ياود ميرغنى!!والبتاع الذكرتو نقلا عن الصحيفة ما عندها ترجمة للانجليزى؟والله ياربى اتكتبت بالعربى !!الله يرحمك يالطيب صالح والف رحمة ونور على قبرك لقد قلت قولتك وخلصت ضميرك ولم يستمع اليك احد وعزائنا اننا كنا قد تبرمجنا وربما ليوم يبعثون !!-


#139921 [nubian]
0.00/5 (0 صوت)

05-09-2011 10:38 PM
ما سالتةعن تدنى مستوى الكرة الانجليزية


#139903 [دائرين نشم الهواء]
0.00/5 (0 صوت)

05-09-2011 09:45 PM
الاخ عثمان الظاهر الناس ديل شربوك عصير منقه بااااااااااااااااااااااااااااارد شكلك قاصد تكتب الكرم لخبت وكتبت الكرامه معذور


نميرى قال كده والكيزان كملوها ما خلو فيها كرامه


باعوا الوطن والشعب الفاضل نائم نوم اصحاب الكهف



ولسه تتكلم عن الكرامه


ما اوصيك اشرب عصير منقه بارد قبل تكتب


#139899 [الزول الكان سمح ]
0.00/5 (0 صوت)

05-09-2011 09:22 PM

يا عثمان ميرغنى

كرامة الشعب السودانى ذهبت أدراج الرياح منذ قدوم زمرتكم الفاسدة من أمثال صاحبك ود الخدر الما رجع للراجل الما إنتحر..كشكو ...وأولادو الطشو...وهذا أحد الأمثلة من إهانة كرامة الشعب

نعم نميرى قال مافى زول بيقدر يشيلو...لكنه خرج منها كما دخلها وليس فى رصيده مالدى أحد من هؤلاء السارقين للمال العام


#139851 [(عوجات)]
0.00/5 (0 صوت)

05-09-2011 06:35 PM
....الا الكرامة ؟ واي كرامة تتحدثون عنها يا ابناء الافاعي ..لم تتبق للسودانيين اي كرامة منذ مجيئ هؤلاء المغول .هل هناك كرامة وقد انتهكت حرماتنا واراضينا وسماؤنا وبحارنا وانهارنا اي كرامة وقد شوهوا اسلامنا اي كرامة وقد تشتت اهلنا في فجاج الارض يطلبون الرزق ويتدارون من الخيبة والهيبة ويطلبوا اللجوء الى اسرائيل بحثا عن الامن والرزق عن اي كرامة تتحدث ياهذا وسودان المليون ميل مربع الذي درسناه لم يتبق منه الا الميل الذي نأوي اليه..الشعب السوداني له شفرته الخاصة والتي لها ميقاتها..واليوم داك نشوف مين الراجل ومين اللي بيلحس الكوع


#139822 [أبو محمد]
0.00/5 (0 صوت)

05-09-2011 05:22 PM
يا عمك مالك هاااايج في السخانة دي

أهدا وروق المنقة لأنو الدنيا صبااااح وصبااااح تعيش إنتا يا مااان
ووردي مخيم في الدوحة وقريبك قوش بيكون بيتفسح في خذان مروي

فأنسى الفكرة وروق الجوااافة وأديها تسالي بدون ملح علشان نظام ضغطك وكده يا فرده...

بعدين بالجد في شنو؟؟ وصحفي وين؟؟ وسابع أرض وكلام الجلوجيا الفيزيائية ده قالو ليك الصحفي ؟ بالإنجليزي يا مرسي


#139811 [musta]
0.00/5 (0 صوت)

05-09-2011 04:51 PM
عليك الله الصحفي البريطاني دا اسمو منو ؟ بعدين هو لما يسال يسال ليهو مطبلاتي؟ انتا قايل الناس دي طير؟ بعدين لو رديت ليهو فعلا الرد دا ح يكون ضحك فيك :D لانو ردك دا ما بتاع زول صحفي بتاع كوز عاوز يطمن في نفسو


#139798 [الساير]
0.00/5 (0 صوت)

05-09-2011 04:19 PM

هل ما زالت هنا كرامة نتكلم عنها ؟؟؟؟
الخوف ملأ الشعب السوداني وفاض !
الكرامة صارت تاريخ!!
الشعب جعان لكنه جبان .
من ينكر ذلك فهو مكابر .
لقد قال نافع أكتر مما قال النميري الذي لم بفرض في وحدة السودان.

خليك أمين يا عصمان ولا تحاول البطولات فهي بعيدة المنال .

الشعب بالتأكيد سيخرج يوما ما ولكن الدوافع ستكون حاجات تانية والطريقة ستكون جديدة ومفاجئة وستري يا عصمان

وستري يا عصمان
وستري يا عصمان
وستري يا عصمان
وستري يا عصمان


#139784 [ابو حسان]
0.00/5 (0 صوت)

05-09-2011 03:43 PM
ليس عندك كثيرا لاضيفه ولكن القالو ناس نافع وناس منو ماعارفو وناس وناس مااظن اقل من نميرى ولا غير نميرى ديل قالو الراجل يطلع لينا الشارع وعايزنا يجى يقلعنا وشنو داك ماعارفو يلحس كوووع فى حقاره اكتر من كده فى اهانه اكتر من كده بس لسع ربنا ماكتب ليهم ينشالو مسطره كل بمقدار عنده


#139783 [أبو أسيل]
0.00/5 (0 صوت)

05-09-2011 03:41 PM
و هل تعني قتل ثلاثمائة الف في أراضي القرآن ليس بحقارة وهل تعني دخول القوات الأجنبية الغازية لبلادنا ليس بحقارة وهل تعني قلع حلايب وشلاتين ليس بحقارة وهل تعني إغتصاب صفية إسحاق وغيرها من الشريفات من قبل أفراد جهاز الامن الوطني لا علاقه له بالكرامة وهل تعني جلد الفتيات والضحك عليهن وهن يجلدن ليس بحقارة ..
يا خي أمشي نوم أنت مطبلاتي وإلى الآن لا تعرف درجة الوعي عند القراء .


#139781 [سلايمان قش]
0.00/5 (0 صوت)

05-09-2011 03:39 PM
والله ياشيخ عثمان حيرتنا !!!!طيب وزيرالمالية ماقال اكلوكسرة وكمال عبد اللطيف قال الراجل يطلع ومندور قال الكتائب ومصطفي اسماعيل قال شحادين اها باقي لينا شنو؟ ايواا نسيت ودالخضر المابنظلم عندو احد رجع للزول كشكو واولادوالطشو؟


#139778 [dalia]
0.00/5 (0 صوت)

05-09-2011 03:35 PM
قال النميرى( ما في واحد بقدر يشيلني).. كانت تلك آخر رسالة للشعب السوداني تبرهن على نظرة الرئيس له.. فما الذي حدث؟؟
قال كرامة قال

والجماعة ديل ما عندهم كلام غير الراجل يطلع الشارع ....... لحس الكوع ...........
ما فى ثورة حتشيل الاتقاذ ......... وغير و وغيرو

فما الذى سيحدث؟؟


#139777 [كان لنا كلمة]
0.00/5 (0 صوت)

05-09-2011 03:35 PM
( خذ عندك.. الرئيس النميري. أذاق الشعب السوداني من ألوان الجوع.. صبر عليه الشعب.. وألبسه كل أنواع الحرمان.. فصبر عليه أيضاً ) اقتباس

عثمان ميرغني حرام عليك !! جعفر نميري ليس من هكذا رجال !!

الله يسألك ما عارف الكان بلقى الرغيف في النيل منو ؟؟؟؟



#139757 [alisankal]
0.00/5 (0 صوت)

05-09-2011 03:00 PM
خلاس والله صدفناك ونمنا قفا يا عثمان ميرغني. كرامتنا لم يمسها إغتصاب الحرائر في مخافر الأمن ولم تمسها شريعة قدو . . قدو.
صدقناك .
و بالله في صحفين أجانب عندهم وقت لي متل النفاق دا.


#139754 [zahi]
0.00/5 (0 صوت)

05-09-2011 02:56 PM
قلت ان الكرامه ليست مجرد فصاحه وبلاغه ...... اذا ما هي الكرامه ؟؟ تجويع الشعب . الفصل من الخدمه لاسباب سياسيه . المحسوبيه في الوظائف . المحاباه لاهل الولاء . ده كلللللللللللللللللللللو ما هبش الكرامه لحدي هسي؟؟؟؟؟؟؟؟؟ هل تعتقد ان هناك تتفيه للشعب اكثر مما هو حادث الان ؟والله يا اخوانا الواحد مرات كثيره ياسف لمثل هذه الكتابات الساذجه والعبيطه .......... الله يزيل غمتنا


#139747 [الصاعقة ]
0.00/5 (0 صوت)

05-09-2011 02:38 PM
كرامة شنو ياااااااااااا دا احقر واغبى شعب خلقوا اللة ياااخ فكنا واللة ديل ما يطلعوا الشارع لو شنو شنو


#139746 [karlos]
0.00/5 (0 صوت)

05-09-2011 02:37 PM
عثمان ميرغنى من المشاركيين فى انقلاب عمل ضد كرامة الشعب السودانى لن نغفر للك ايها الدجال انت احد رموز هذا الانقلاب الفاشى الكل يعلم و حتى الجيل القادم لازم يعرف من هو عثمان ميرغن.


#139728 [Saif AlHagg]
0.00/5 (0 صوت)

05-09-2011 02:14 PM
استاذ عثمان هل تعنى ان كرامة الشعب لن تمس! والشعب يعيش بكرامة رغم الاستفراد بالسلطة ونهب ثروة الشعب والفساد الذى استشرى والمحيط بنا

هل تعنى ان الحكومة لم تمس كرامة الشعب للان لذلك الشعب لم يثر حتى الان!!!
ماذا عن لحس الكوع--والراجل يلاقينا فى الشارع و---و---- ماذا تريد ان يفعلوا اكثر من ذلك

يا استاذ عثمان: من النزاهة فى مهنة الصحافة قولة الحق وكلمة الشرف اهم شى
اعتقد انه يكفى فقط حكمنا من قبل فئة معينة اغتصبت السلطة واصبحت تقهر هذا الشعب بنفوذ سلطتها وبنهب ثرواته----
اليست هذه قمة الحقارة--- التى تدخل فى اللحم الحى للكرامة---
حسبنا الله ونعم الوكيل-- اتقوا الله


#139719 [أبو اواب]
0.00/5 (0 صوت)

05-09-2011 01:54 PM
يا أخوي ما تقول لي إلا الكرامة والمسرحيات بتاعتكم دي

الشعب السوداني إتمسح بي كرامتو الأرض منذ صبيحة 30 يونيو 1989

و كل الجوطة دي عشان تورينا أنو زارك صحفي بريطاني؟!!



عثمان ميرغني
عثمان ميرغني

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة