الماعجبو يشرب من البحر
05-20-2011 01:11 PM

الماعجبو يشرب من البحر

ايمان حموري
[email protected]

شاهدتُ اليوم في التلفزيون القومي لقاء (ناس المويه) وكل ما سأل المذيع سؤال (الضيف بتاع الموية) (يدخل بي حمد ويمرق بي خوجلي ) لما بقي علينا (عطش وبلادة ) ما فهمنا اي حاجة كلو (مسكنّات) مرة عندهم خطة ٣ سنوات ومرة عندهم خطة خمس سنوات يعني في الفترة دي (اليعيش يعيش واليموت يموت ) يازول ياسيد المويه بقوليك بالدراجي السوداني (مويه) عرفت يعني شنو (مويه) ؟ والحكومه عندها والحكومه ما عندها ،طيب شن لزوم المولات والكباري وشركات الاتصالات،والناس عطشانه ؟،سبحان الله العطش ماسك ناس قريحتي راحت، احياء طرفيه بعيدة (الصالحه البقت ماصالحه) وما جاورها لكن الحكمه(كافوري ) تجري من تحتها الانهار بيرّشو في الحيشان رش وحتي (الحوش)البعيد داك مسقْي وموقيّ،اها نرجع للضيف (بتاع المويه) قال في مشكلة العطش دي بيحمّل المواطن ٤٠% والناس العندهم (مساطب) قدام البيوت ٣٠ % وناس الطرق والكباري ٣٠% وهم كفاية عليهم الهم الإدراي وتحصيل الفواتير انتو يا جماعه قايلين حساب القروش دا ساهل! ومرة يقفلوا
بلف ومرة يفتحو بلف حتي( الفتيحاب) بلوفاتها بقت (قيفلآب) هوي يا ناس الموية قاعدين (عشرين سنه ) بتسوا في شنو ؟، المواسير صدّت ،والبلوفه ضربّت والدود جانه بي خشم المواسير عديل ، شن شغلتكم؟ المهم (اللقاء شغال ) والفكِر شغال وكل شويه ناس (التلفزيون الحكومي) ينزلوا تقرير عن المويه ( موارد السودان المائيه) كأنو نحنا ما سودانيين وما عارفين البحر المرة يعكر ومرة يصفي ومرة بيقلّب (اللنشات) دا، ليهم حق (يدوا الحلِه وصي والنقارة عصي ) ما تلفزيون الحكومه المهم البرنامج شغال والاتصالات شغاله من الصالحة ٤٩ والفتيحاب ٥٠ وهلم جروالله الجماعه بتاعين المويه
سقونا وعود لما عطشنا زيادة ، وفي ا لنهايه ما طلعنا باي حل غير حل واحد هو الماعجبو يشرب البحر

اخر الشاي

بكرة الفوله بتتملي والبقارة بيجو

مع مودتي
ايمان حموري


تعليقات 4 | إهداء 0 | زيارات 2475

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#145948 [الصادق الهواري]
0.00/5 (0 صوت)

05-21-2011 04:31 PM
استاذتى العزيزة ... لا ادري لماذا تذكرت قول ذاك الشاعر ..( كالعيس في البيداء يقتلها الظمأ ... والماء فوق ظهورها محمول) ... اعتقد ان هذا الشاعر ذو البصيرة النافذة كان يقصدنا بالذات .. ولكن لزوم التورية وحتى لا يوقع دولتة في مشاكل معنا .. ذكر العيس .. بدلآ عن. ترابورا.بتاعتنا لكن بربك تأملى براعته ولاحظىجمال وروعة التمثيل بين ظهورها وبين الماء الذي يجري شمال ويمين في السودان .. هذا غير مطرة الله المنهمرة معظم شهور السنة .. وعفوآ .. اذا كان السودان بكل مخزونه المائىيشكو من العطش .. ماذا تقول دول أخرى .. لا تملك مياه جوفيه ولا سطحية ولا حتى عندها خور كابوعنجة.. وماذا يقول سكان الصحاري في كل من صحرائى كلهاري ونيفادا .. انا لو كنت ..( المسطول )كنت امرت بألقاء المسؤولين عن المياه في النيل بدلآ عن العرائس.. حتى يفيض ثانيآ ..وتنحل مشكلة المياه والخصوبةوالي اللقاء..


#145590 [دالدكيم]
0.00/5 (0 صوت)

05-21-2011 12:05 AM
المحيرنى ياأستاذة هؤلاء القوم قالوا ناس شريعة اسلامية وذهبت بنا الظنون بأن الدين الاسلامى دخل السودان على يد العارف بالله عمر البشير يوم 30/6/1989م طيب ياناس الشريعة الامام العادل عمر بن عبدالعزيز يقول بطون الجوعى أولى من كسوة الكعبة المشرفة يعنى ما فى داعى لانشاء كبارى وشركات اتصالات والرعية جوعى وعطشى


#145503 [الغاضبة]
0.00/5 (0 صوت)

05-20-2011 07:43 PM
والله يا ايمان يا اختي بلدنا اصبحت لا تصلح لعيش البشر ولا الحيوانات حتى، تنعدم فيها أبسط مقومات العيش (مش مهم يكون كريم)، بس الحل شنو، زمان سمعنا انو ناس السفارة البريطانية قالوا لي ناسهم ما تشربوا موية الخرطوم، واها طلع البلقى موية وفيها دود يقول الحمد لله ويسكت عليها بدودها، الدود بيداوى كعب ما تتلقي الموية في روحها ....... كان الله في عوننا يا ناس، ربنا يقوينا ويدعم جهاز مناعتنا للدود والبكتريا..... والله يجازي ناس الموية من زمان مكجناهم لمن كانوا بجوا حايمين في الحلة يقطعوا الموية من الناس ....


#145409 [ودالشايقى]
0.00/5 (0 صوت)

05-20-2011 04:23 PM
بالمناسبة انتى ناس حمورى بتاع الكورة الزمان ولا ناس تانين المهم ناس الموية يكفو المناطق بتاعة الناس القيافة النضيفة العندهم حيضان سباحة وبستحمو مرتين فى اليوم اما ناسك ديل ناس قريعتى راحة ساكة موية يوم فى الشهر كفاية يعنى ناس ام بدة والفتيحاب والحلفاية كفاية عليهو كباية موية نضيفة واحدة فى اليوم الباقى يتمو عكرانة وحمام واحد فى الشهر هو ذاتو مابتحمل اكثر من كدة عشان كدة ناس الموية على حق دايما مش موتمر وطنى


ايمان حموري
ايمان حموري

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة