بدل دواليب
05-23-2011 12:52 PM

ساخر سبيل

بدل دواليب

الفاتح جبرا

لكثير من القراء والأصدقاء طلبوا من العبدلله أن يكتب عن (عقد المسئول) الذى أحدث ضجة في كافة الأوساط وبعد إطلاعي على صورة العقد وجدته عقد أقل من عادى فى دولة (بترولية) تشهد نهضة إقتصادية كبري وتحسناً واضحاً فى كافة أوجه الحياة المختلفة من صحة وتعليم وخدمات وإرتفاعاً ملحوظاً في دخل الفرد فأيه يعنى لمن مرتب (الزول ده) يكون 18 مليون فى الشهر

؟ يعني 600 ألف فى اليوم .. يعنى أيراد 6 روزات – 30 راكب (الكلاكلة – السوق الشعبي) أيراد صافي لا فيهو حق (السواق) ولا (الكمسارى ولا (الجاز) ذاااتو ! ولو الروزات دى ما عاجباك ممكن نقول ليك إيراد 30 (ركشة) بس في اليوم يعنى إنتا تكون قاعد كل يوم المغربية خاتي ليك كرسي قدام باب البيت وتجى الركشات (التلاتين) تجي تقيف تترصا قدامك وكل سواق يقوم يغمت ليك 20 ألف !!

أما (البدلات) فما شايف فيها حاجه (فايته الحد) فـ 90 مليون جنية بدل (عيد ضحية) أعتقد إنو مبلغ معقول خاصة مع إرتفاع أسعار (الضباحين) شوفو بس الضباحين ح ياخدوا كم لمن (سعادتو) يضبح ليهو 220 خروف مدوعل في العيد؟ أما 90 مليون (عيد الفطر) فأعتقد إنها (شوية) وأن سعادتو سوف يضطر (يتدين ليهو) شوية قريشات عشان المسألة تظبط معاهو لأنو الـ90 مليون دي يا دوبك تجيب ليها 500 كيلو حلاوة من النوع الفاخر و600 كيلو (خبيز) و800 كيلو (منين) و900 كيلو (بيتى فور) و750 كيلو (مشكل) و2500 صندوق حاجة بااااردة ..أما ما يتبقى فهو يخصص لصواني الفطور الما خمج والغداء (الضلع) والتحلية والعشاء !!

أما بدل الإجازة المقدر بـ 90 مليون فأنا شايفو معقول وبما إنو (صاحبنا) لابس تمام فما محتاج يشترى هدوم للسفر وبما إنو التذاكر مجانية لأبعد حته تمشيها الخطوط السودانية فهو أيضا ما محتاج يصرف من التسعين مليون دى عشان يقطع تذاكر ! طيب يعمل بيها شينوووو !! يتعالج بيها هو وأفراد أسرتو ؟ أكيد لا لأنو العقد بيقول إنو العلاج ليهو ولأفراد أسرتو مجانن !! خلاس نقول إنو ح يشترى بيها هدايا لأقاربه وأصدقائه وكده .. يعنى شوية قمصان على شوية مقاطع جلاليب وعمم على كم فتيل ريحة على كم ساعة يد على كم توب نسائى وكم بلوزة وإسكيرت والبفضل أكيد ح يدفعوا (وزن زائد) عشان الشنط وزنها ح يكون سته طن وشوية !

حكايت (البونص) يكون مرتب 18 شهر (يعنى 324 مليون) في السنة فما شايف إنو فيها مشكلة ما الموظفين الفي البلد ديل كوووولهم قاعدين ياخدو بونص آآآى نعم بيمشوا يشتروا بيهو بنطلونين تلاته أو يسددوا بيهو حساب (سيد البقالة) لكن برضو أهو إسمو (بونص) برضو !!

أما حكاية بدل اللبس دى فالعبدلله ما شايف إنو 76 مليون جنيه في السنة كتيرة فهى يادوووبك ممكن تشتري ليها 60 عمة توتال أصلي وارد اليابان و60 ملفحة (مطرزة) و120طاقية (منسج) و 84 سروال طويل وعراقى و 30 بدلة (ماركة) ما خمج و 160 فانيلة داخلية 160و 160شورت و140 بشكير و30 جوز (سفنجات) و75 بنطلون صوف إنجليزي (مع الخياطة) و75 قميص أفرنجى (كم قصير) و75 قميص أفرنجي (كم طويل ) و 75 كارافتة (إيطالي) و30 ساعة يد (سويسرية) و75 جوز (شرابات) معتبر و65 دستة (مناديل) و75 جوز أحذية إيطالي (جلد طبيعى) و 120 جلابية تترون ياباني (زبدة) جاااهزة (العمود باليد) وعدد30 جوز مركوب نمر (فاشري) وعدد 60 عصاية أبنوس فاخرة مذهبة (يتم رفعها في المناسبات عند ترديد هي لله هي لله )

كسرة :

أكيد (العقد بتاع السنة الجاية) ح يكون فيهو مرتب سته شهور ... (بدل دواليب) !


تعليقات 21 | إهداء 5 | زيارات 6961

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#148219 [kamilia agag]
0.00/5 (0 صوت)

05-25-2011 03:28 AM
من كثرة المغص بقينا نضحك ههههههههه طيب نسيت حقوق الزوجة طبعا زوجة هيئة سياسية طبعا دا يعتبر عقد خارجي ليها متطلبات حق تياب العيد والحنة والدهب والملايات والستاير قالوا البشير قاعد يرسل هدايا لزوجات اصحابه دا غير وداد كل يوم نازلة مصر تجيب هدايا بمليون مش مليون سوداني لا مليون دولار كل نزلة في الشهر تنزل نزلتين ودا كله هدايا للصديقات ولاهلها بس المحيرني القروش دي زاتها بجيبوها من وين قالوا السودان مفلس بجيبوا الفلوس دي من وين سمعت قالوا شغالين تنزيل اموال جايبين سنغالي قالوا قاعد ينزل ليهم


#147903 [بت ابوها]
0.00/5 (0 صوت)

05-24-2011 03:26 PM
يااستاذ الفاتح -كدي روق المنقة -انا في حاجة واحدة دايرة افهمها -وعشان افهمها دايرة الشعب السوداني دا كلو يجي يكفتني -وهي انو هل العقد دا صحي صحي ولا كضب -ولا امشي للمسئول دا يديني 60 خبتة في راسي دا بعصايتو الابنوسية المذهبة دي عشان اصدق -ماقادرة اصدق عديل كدا فوق احتمال عقلي البشري -
ياعدلان يوسف انت بتتكلم عن المواطن انت ما من الصنف دا ولا شنو -كدي انت شيل السيف ونحن بنلحقك في اللفة البعديك
ويا اشرف زول زي دا حتي لو بنفع نحن زاتنا ما دايرينو -قال ما كتيرة ياها سوق الاوراق المالية دي ولا حاجة تانية -انا بشغلها ليكم وادوني ال18 من غير الباقي -الاتكون ولدو
يادوب عرفت البصيرة ام حمدجات من وين اتاريها حبوبته ام ابوه


#147436 [nubian]
0.00/5 (0 صوت)

05-23-2011 11:23 PM
يااستاذ جبرة طيب ممكن تعمل لينا لستة ذى دى لل77 وزير يعنى البقر المشى مصر دة باقى الحلل


#147421 [عدلان يوسف ]
0.00/5 (0 صوت)

05-23-2011 10:58 PM
قال الوزير أن مسألة النهب التي يقوم بها مع عصابته مسالة انصرافية ... ويبدو من هذا الكلام أن

المواطن نفسه هو الذي أصبح مسألة انصرافية في رأي الإنقاذ ... وهذا كله بسبب الصمت الغريب

للمواطن الذي سكت على اغتصاب الأعراض .. واغتصاب الأموال .. واغتصاب الإرادة ... أي إهانة

بليغة وجهها الوزير للمواطن بالقول \" هذه مسألة انصرافية \" ؟؟؟... أي احتقار هذا للمواطن ( لن

ننسى بالطبع في قائمة الإهانات الطويلة قول الإنقاذيين للشعب السوداني : انتفضوا وستجدون \"

الكتيبة \" التي

تعيدكم الى جحوركم ؟؟؟!!!

وياشعبي الطيب العظيم ماذا تنتظر لتنتفض ... فقد بلغ السيل الزبى ؟؟؟!!!

ياشعبي الطيب ماذا تنتظر ؟؟؟!!


#147409 [عدلان يوسف ]
0.00/5 (0 صوت)

05-23-2011 10:33 PM
عجبت لمن يقرأ مثل هذه الفضائح الإنقاذية ... ولايخرج على النظام شاهرا سيفه !


#147395 [عمر]
0.00/5 (0 صوت)

05-23-2011 09:50 PM
يا جماعه يا عالم اصلو الزول ده حوض رمله


#147375 [ابو الوليد]
0.00/5 (0 صوت)

05-23-2011 09:13 PM
الوزير ده كديانة ولا شنو ,,,؟


#147370 [الزول الكان سمح]
0.00/5 (0 صوت)

05-23-2011 09:06 PM


يا أستاذ جبرا

والله المفروض إنت تكون وزير المالية لأنو فى بند مهم سقط فى عقد عثمان حمد مرتبط بعنوان مقالك ده وهو بدل ( تأثيث ) وأتمنى من الوزراءوالمديرين وكافة الدستوريين التنبه مستقبلاً بعدم سقوط هذا البند عند توقيع العقود الكاملة الدسم.


#147307 [البلوفه]
0.00/5 (0 صوت)

05-23-2011 06:30 PM
ياربى الراجل بتاع الماليه ده لما مضى العقد المعارضه كانت قافله بلوفتو


ردود على البلوفه
Saudi Arabia [nubian] 05-23-2011 11:26 PM
لا كانت قافلة على دو


#147291 [ابو توفيق ]
0.00/5 (0 صوت)

05-23-2011 05:49 PM
هيا وزير العواسة . أتاريك كداب ودجال ومنافق وتوقع في العقود بالدس والمليارات ..... ووين كسرتك راحت ........... والله الكسرة للغلابة وبس وأنتم المصطفين الأخيار تاكلوا المليارات .......... والله الكسرة محتاجة مليارات ؟ ونحن ما عارفين ......إنشاء الله وبركة الله يدلى عليكم بالساحق والماحق والبلا المتلاحق يا دجالين يا منافقين ........آمين


ردود على ابو توفيق
Sudan [زنقه زنقه] 05-24-2011 03:56 AM
وزير العواسه اقصد الكسره هي اقلصد الماليه ده مرتو قبل كدي عملوا معاهم ناس اتلفزيون لقاء بمناسبة عيد الاضحي المرة لابسه دهب قيامه شي كرسي جابر وشي ختم في اصابعها الاربعه و اسوره فيي ايديها الاثنين لمن شين


#147276 [مغبون]
0.00/5 (0 صوت)

05-23-2011 05:21 PM
القروش دى اكل وشراب ومعيشة كتيرة الزول دة يكون بعمل الحاجات التانية الحاميانى والله العقد دة بان كى مون ما عندو الرجاء كشف موهلات هذا الدبيب المسعول دراكولا بيمص من


#147223 [ashref]
0.00/5 (0 صوت)

05-23-2011 04:18 PM
والله لو انسان بنفع وعارف شغلو ماكتير عليو


لكن للاسف كلها نصب فى نصب

وافتكر بالغرض ده ممكن يجيبو لينا وزير ماليه محترف من امريكا يحاول يحلها ويجيب قوون


ولا المناصب دى للناس الفاهمه فقه الستره بس

انا بطمنهم انو ما محتاجيين فقه الستره لاننا عارفيين اى حاجه

ويجماعه اسرقوا ساكت .عندكم شعب السرور يايما مابقول بغم فما تخجلو مننا وتقعدو تالفو فى الدين فقه الستره وفقه ما تحت الصره

اسرقو احنا راضيين وساكتيين .المويه بالدود شربناها عشان انتو تسرقو اغتصبتو البنات وقتلتو الاولاد واحنا ساكتيين

فما فى داعى تتعبو حالكم وتالفو ليكم دين .

خلو الدين فى حالو


#147221 [abuamin]
0.00/5 (0 صوت)

05-23-2011 04:16 PM

انه من البديهيات ان الله وحده الذى يـجـزى الـمـؤمن الحـق على عباداته مثل الحج و الصوم والصلاة و كل عمل صالح. و ليس وزير المالية او الخزانة العامة ببدلات من خزينة الدولة . فهذا العثمان حمد منذ 12.4.2009 بيصرف اجر صومه والحج من الخزينة العامة كبدل عيدين لجهله بامر دينه والعياذ بالله.

ياااااراجل اتقى الله و رجّع كل ما صرفته انت و الوزير ...
و كدى استغفروا الله و اغتسلوا وتوضو وصلو ركعتين عسى ان يـغـفـر لكما ................

و الّـلا شـنـو بـا شيخ عبد الـحى يوسف ؟؟؟؟ رايكم شــنو؟؟؟؟؟؟



#147173 [ehab]
0.00/5 (0 صوت)

05-23-2011 03:07 PM
يعنى الا يلزوك لز عشان تكتب عن الموضوع دا ما كان من اول , ولا خلاص عشان قبضت قروش الكتاب بقيت تنسى هموم الناس والا اذكروك ليها , حقك يا عمك تلقى حكومتك مجهجاك فى البيت وقالت ليك ما تفتح خشمك عشان ما يجوك ناس الضرائب.... عمليتك ما ظريفه وحركتك جبانه


#147154 [Waddkazzam Al-Jabalabey]
0.00/5 (0 صوت)

05-23-2011 02:40 PM
سلم عليك يا ود جبره انت بتجيب الكلام الحلو ده من وين ؟ عايز أذكرك انت نسيت ****** عايز ليهو كم عماره فى كافورى كل واحده فيها كم دور و كم غرفة نوم و تكون بعيده من زنقه زنقه و فيها كم حديقه لزوم المقيل ليوم الجمعه عند شراب شاى العصريه و لا ايش رايك ؟ ما تنسوا أعزمونا علشان نضوق العز و أكل الوز ها ها ها ها ها ها


#147144 [ابو النصر]
0.00/5 (0 صوت)

05-23-2011 02:25 PM
وما قولتي الزول متقشف جدا قالو صاج العوسة ( الدوكة ) شقال 24 ساعة وتقلية ساي جنس تقشف


#147143 [سوداني جد]
0.00/5 (0 صوت)

05-23-2011 02:22 PM
لا استغرب من مثل هذا العقد يعتبر عادي بالنسبه لحزب يعتبر الشعب والدوله غنيمه له لذلك ينهب بنهم وبشراهه كبير لانهم يعلمن انهم ليس في مأمن من الاطاحه بهم من كبيرهم او من قبل الشعب الصامد من الطبيعي ان اي منهم عندما توكل له مهمه اول ما يفكر فيه هو كنز اكبر كميه من المال وباسرعه زمن لذلك تظهر علهم علامات الثرأ وعندما توكل لاحدهم اي منصب بدل ان يحزن للمسؤاليه التي سوف يسئل عنها يوم القيامه يفعلوان العكس يفرحوان شد الفرح ويذبحوان الخراف والبقر تعبيرأ عن انهم ذاهبوان لكنز مال الشعب وتعبير عن علي انهم لا زالوا يتحكموان في كل غنيمتهم التي ظلت صامد و صامته


#147119 [ود مختار]
0.00/5 (0 صوت)

05-23-2011 01:49 PM
لازم تكون دواليب 9 ضلف عشان تشيل الحمولة دي يا أستاذ .. هههههههههههه


#147117 [Saif AlHagg]
0.00/5 (0 صوت)

05-23-2011 01:48 PM
عواسة الكسرة إلى نفاد بسبب عواثة الحكومة للفساد

العَيْثُ: مصدرُ عاثَ يَعِيثُ عَيْثاً وعُيوثاً وعَيَثاناً: أَفْسَدَ وأَخَذ بغير رِفْقٍ. قال الأَزهري: هو الإِسْراعُ في الفَساد.

وفي التنزيل: \"ولا تَعْثَوْا في الأرض مُفسِدين\"
وفي حديث عمر: كِسرى وقَيصَرُ يَعِيثانِ فيما يعيثانِ فيه، وأَنتَ هكذا؟ هو من عاثَ في ماله إِذا بَذَّرَه وأَْسَده.

لا اقدر ان اوصف شعورى حينما رايت عقد عمل السيد مدير سوق الخرطوم للاوراق المالية!!!. اجتاحتنى حالة من الغبن مع غصة و مرارة فى الحلق وشعور بالاهانة والاستفزاز... واشماززت لان علمى بان 95% من الشعب السودانى فقير ومتوسط الراتب للفرد بإحصائية سريعة لمن أعرف حولى على احسن تقدير 1% من راتب هذا المدير ناهيك عن جيش العاطلين والذين يبحثون عن عمل... هل تعلم أن راتب هذا المدير يمكن ان يوظف حوالى 100 عاطل أو عاطلة (باحثين عن عمل) وكم سنوظف من الرواتب الأخرى التى لا نعرفها!!.

و خطرت على بالى اسئلة لا اريد الاجابة من مغتصبي السلطة وناهبى اموال الشعب وانما لتفكروا معى فيها:
1- نريد رؤية السيرة الذاتية لهذا المدير لكى نعرف مؤهلاته وخبراته؟
2- ماهى المهام والفائدة التى يقدمها هذا المدير للوطن؟
3- ماهو راتب وزير المالية نفسه؛ الممسك للقلم الذى نادى بعواسة الكسرة فهل ياترى كتب نفسه مع الذين يعوسون الشقيانين!.
4- ماهى رواتب الرئيس ونائبه والوالى والتى اعلنتموها بين 9 الى 5مليون جنيه (بالقديم). فنحن لن نصدقكم. وحبل الكذب قصير.

نعلم ماخفى اعظم بل نريد ان ننبه و نقول هذا فساد وسيعمل هؤلاء المجرمون بخلطة الدين لعمل فقه جديد يسمونه فقه التغطية لكى لا يعرف راتب أى مسوؤل بعد هذا.

و يمكن ان يجعلوه مخرجهم من اتهامهم بالفساد بان الرواتب التى يتقاضونها هى هكذا ولهذا ترون هذا العز والنغنغة على هؤلاء فلا تتهموهم بالفساد. ولكن نقول ان هذا فساد على عينك يا شعب ويا وطن يمر من فوق صاج العواسة ويزيد ربط الاحزمة على البطون البتكركر من الجوع ويطلع فى الرأس يجنن العقول المشدوهة للجرى وراء لقمة عيش للرمق الأخير.

ونحن لا نلومك ولا نحسدك يا عثمان حمد المدير إنشاء الله تكون ضوت ليك من ما وقعت العقد يوم 12/4/2009. ولكن نريد أن نسأل مغتصبى السلطة وناهبى أموال الشعب هل ضميركم مرتاح وتنامون هانئين!! وقلوبكم مطمئنة!! إذا كانت الإجابة بلا أو نعم فذلك لن يغير حقيقة أنكم فاسدون ومفسدون ونرجوكم فقط أن لاتعاملونا كالبلهاء قنابيرنا طويلة وريالتنا سايلة بتصريحات نفاقكم، أغلقوا أفواهكم عنا، أغربوا عن وجوهنا الكالحة، فدعائنا لرب العالمين أن يزيل مقته وغضبه عنا وأن يجعل كسرتنا مبروكة علينا وفسادكم وإفسادكم ممحوق مسحوق ممحوق عليكم. آمين.

نشر بتاريخ 19-05-2011



ردود على Saif AlHagg
Saudi Arabia [لمتين ] 05-23-2011 02:06 PM
الزول دا دارس علم غيب ولا شنو ؟ أستغفر الله العظيم


#147112 [wala]
0.00/5 (0 صوت)

05-23-2011 01:36 PM
كلامك دايما في الصميم ويريح الغلابي والمغلوبين علي أمرهم ...... بس أنا عندي اقتراح يتمثل في ضرورة تكريم هذا الصحفي صاحب الوثيقة أو ترشيحه لجائزة اقليمية أو دولية , فما رأيكم ؟


#147092 [سروب اور ]
0.00/5 (0 صوت)

05-23-2011 01:14 PM


ياجماعة الخير موظف المذكور اعلاه وهذا المبلغ الخرافى ما بياخذ لنفسه او لاهله وانما يرسها الى غزه اخوانا فى الفلسطين

وهذا التبرير متوقع من حكومة الفساد
او اغبى من هذا التبرير


ردود على سروب اور
Saudi Arabia [AboAseel] 05-23-2011 03:11 PM
التكريم يجب أن يشمل صحيفة السوداني و كل الصحفيين بهذه الصحيفة المتميزة و تكريم خاص للأسد العملاق الاستاذ الطاهر ساتي و الصحفي المتميز النابه و الهداف الاستاذ أبو القاسم.
كل التحايا لإدارة راكوبتنا الظليلة الغير هادئة و الفعالة دائماً منذ عرفناها..


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة