الحرامي بخاف من ضلو
05-24-2011 10:11 PM

الحرامي بخاف من ضلو

أسماء الجنيد
[email protected]


سلام يا اهلنا المنكم طولنا
اها النجيكم لي موضوعا مهم بالحيل محرق روحي وروح كتاااار كاتمين وممكونين وصابرين
من عمايل و سواة ناس الشوم ديل الله يقبحهم وين ما قبلوا ...
من الله خلقنا وقمنا وسمعنا إنه قانون حظر التجول في المدن الكبيرة والعاصمة مثلا ، بكون لما تقوم مصيبة في البلد.
يعني تحوطا من المشاكل ولي كشف الناس الشاكين فيهم أكان في إضرابات ولا إنقلابات, وبتكون مدتها إن طالت مهما طالت ما بتفوت ليها شهر ، ده إن ما كان 15 يوم مثلا,
لكن إطرشنا ما سمعنا بيها 22 سنة !!! وماشة في زيادة مع مدة قعادهم في قلب الناس,,
عارفين الناس ديل جوا من بدري وسنوا قانونهم ده لي عامة الخلق ليه ؟؟؟
ما سااااي كده قاطعنوا من نافوخهم عبث !!! ديل قصدهم ونيتهم خبيثة زيهم
جايين من بدري ناس سرقة ساي ولفحي , والحرامي اكيد معظم سرقتوا في الخفاء , يخاف من ضلو ومن الناس لكن ما يخاف من الله. وزي ما بقولوا الحرامي في راسو ريشة, عشان كده ديل جوا بي خطة يعموا بيها بصائر الناس وبصيرتهم ويعملوا هم عملتهم لا من شاف ولا من عرف,,
اها النوعية دي بفكروا بي ذكاء بشبه مكرهم , وربنا بمد ليهم حبل الصبر لكن ليهم يوم و إن شاء الله , قريب ,
اها فكروا في الفكرة الجهنمية دي وإنه يحموا الناس الحوامة بعد 11 بالليل عشان يخلا ليهم الجو براهم وبي مزاااااج
عشان كدة دفسوا كل الناس في بيوتهم من عشايا بدريي, وقعدوا هم يسرحوا ويمرحوا ويبرطعوا لا الدغش ، زولا بسعلهم مافي، وزولا شايفهم وشاهد عليهم مافي ,, يلهطوا في لهطيهم داك ، وفي سرقتهم وكل مصايبهم دي يسوها
وقلبهم قوي ، غير رفاقتهم وكلاب امنهم مافي زولا حايم, ليلهم طويييل يحمدو سيدهم لي صباح اليوم التاني وكلاب امنهم حارسنهم ، يعني حاميها حراميها ,و الغلابه على المغايس العليهم يا حليلهم كامدينهم في جحورهم من بدري’ لا سينما يفرقوا فيها زي زمان ولا مسرح ولا ونسة سوق ساي ’’ الساعة 11 دي يادوب الناس زمان تكون ماشة دور السينما التاني , ولا بتونسوا في الأندية الثقافية ولا في الأحياء ، يعني لو حصلت ليك اي مصيبة بعد 11 لا سامح الله , ماشي طواريء ولا مستشفي ولا إتأخرت في المواصلات تبقي في مسآلة , كنت وين وجيت من وين ؟؟ وتفتيش في العربية حتى لو مريضك ده بموت فرق ايديك , هم لازم يقيفوا ويبحبتوا حتى لو كانت الساعه 11 و5 دقائق!! كلو نفاق في نفاق..
بالله من سنوا قانونهم ده كتلوا الفرحة في قلوب الناس, على العليهم من حالة البلد من غلاء ومرض وظلم .. حرموا الناس من الترفيه لا مناسبات يتهنوا بيها , ولا الناس البتجي من الغربة والكاتمة السنة كلها ، بتضوق ليها طعم للإجازة , بي سببهم , شمعوا الفن كلوا وحرموا الناس من البهجة ومن الغنا والمسرح الكانوا بفرقوا بيهوا من حالة البلد الكلها وجع,, والعجب لو عندك مناسبة في البيت وجايها من سفرا بعيد ، الشكية لي الله إن عندك مناسبة عرس بتدور تفرح مع المعاك, حدك 11 بس إن شاء الله حفلتك ما بدت, وكنت مشغول بضايفة ضيوفك ما عندك طريقة خلاص , 11 بالضبط يجوك بي عصيهم وبكاسيهم تحلف تقول القبة تحتها فكي وديل خلاص الناس السبحهم لالوب والغرة في جبينهم ونايمين في المساجد , وهم حفلاتهم بي بلاويها حدها شمس اليوم التاني, وتصبح الواطة يقولوا ليك شيء لله والجبهة دي لله والجلابية دي لله, وهم يكونوا سايطنها بي عود من نادي لي نادي وفندق لي فندق ده غير برطعة القصور والفلل والشقق الملت البلد , خربوا البلد وشباب البلد المحتاجين من ضعاف النفوس علموهم الفساد بانواعه, وتاني يوم يجعجعوا بي إسم الدين!! زمنا ده كلو عارفين البلد وغيرها فيها السمح والشين وفيها اصحاب السؤء, لكن كونو إنه السوء يجي من ولاة الأمر ده شيء فوق للتصور, سمعونا أسامي زواج من الله خلقنا ما سمعنا بيها وكلها تحت إسم الدين البتاجروا بيهو علنا . شيء عرفي وشيء مسيار وشيء مسفار وهلمجرا وكلو قاطعنوا من طايوقهم المصوفن عشان يحللوا الحرام ليهم تحت إسم الدين,,
ملوا دار المايقوما بأطفال ابرياء يقطعوا القلب .قريت إحصائية عن اطفال المايقوما تبكي القلبوا حجر
وتخوف على مستقبل الشباب الضاع من الجنسين,,
وما خفي اعظم ..
قانون حظر التجول القصد منه واضح وصريح زي ما شايفين,,
كل يوم ظاهرة لينا وثيقة ولا عقد مزور 22 سنة نوموا الناس وقفلوهم في بيوتهم , وحاموا هم بي اقنعتهم وضمائرهم الفاسدة وسرقوا البلد واهل البلد هربوا الدايرين يهربوا وشالوا الدايرين يشيلوا , والناس نايمة في بيوتها مغلوبة على امرها, وكلوا تحت مظلة حظر التجول
منهم لله ربنا يعجل بي رحيلهم زي ما نهبوا البلد وفسدوها وتلذذوا في عذاب الغلابة والبسطاء من الشعب الفضل,,,,
يمهل ولا يهمل
نواصل إن شاء الله
ودعتكم الله
اسماء الجنيد


تعليقات 5 | إهداء 0 | زيارات 2664

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#148532 [مجدي ابوشاشه]
0.00/5 (0 صوت)

05-25-2011 01:53 PM
يأ أختي الفاضلة أسماء الحرامية البخافوا من ظلهم ماتوا زمان واندثروا وأصبحوا ذكريات والحرامية اليوم يخوفون ولا يخافون ويحاسبون الناس ولا يحاسبوا أنفسهم وممكن ووارد يحكمون الناس ويظنون أنهم يحكمون بالعدل .. كان زمان كان أسمهما أمدرمان .. نحن في زمن كل شيء جايز وصور مقلوبة وناس ما دايره تقتنع بأن الله سبحانه وتعالى موجود يمهل ولا يهمل 7


#148516 [ابو هاجر]
0.00/5 (0 صوت)

05-25-2011 01:32 PM
كلامك حلو جدا يا اخت اسما لكن الاجازة الجاية قضيها فى العمرة :o ;(


#148487 [ابو حمودي]
0.00/5 (0 صوت)

05-25-2011 12:41 PM
لن ارمي حجراّ في بئر شربتة منة ( التوقيع لونا الشبل )


#148261 [Zingar]
0.00/5 (0 صوت)

05-25-2011 08:54 AM
يا أخت أسماء مره أمير المؤمنين البشير إتصل بنائب أمير المؤمنين الزبير بن العوام ..وكان نائب الأمير وقتها فى مكتبه فى ساعه متأخره من الليل وقال له الأمير لأتبرح مكانك حتى أصلك...ووصل الأمير بعد الثانيه صباحا فى عربه إسلآميه تجرها خيول عربيه أصيله وتوجها هو ونائبه إلى أمارة أمدرمان وبالتحديد منزل فنان ودق الأمير الباب وجاء الفنان منزعجا يتثآئب...وقال له الأمير يازول النايم ليها شنو أمشى أمشى جيب عودك ويا حله تنورى جاك بلاء وترتره للصباح.


#148130 [سلايمان قش]
0.00/5 (0 صوت)

05-24-2011 11:15 PM
الرائعة اسما لك التحية بالمناسبة الحظر الساعة 11 جديد يعني 10 حقت زمااااان


أسماء الجنيد
أسماء الجنيد

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة