المقالات
السياسة
ارشيف مقالات سياسية
الترابي الجديد
الترابي الجديد
05-28-2011 09:35 AM

حاطب ليل

الترابي الجديد (2 )

عبد اللطيف البوني
[email protected]

من قبل ذكرنا ماقاله الدكتور الترابي لصحيفة اخر حظة عن الشريعة المطبقة في السودان منذ ايام النميري الذي لم يطبق منها الا منع الخمر كما قال الشيخ الدكتور واستمرت طوال الفترة الانتقالية وحكومة الصادق والانقاذ بزعامة الشيخ نفسه وقد وصفها بانها كلها (كلام ساكت ) ومجافية لروح الاسلام ومجرد مشروع سلطوي وقال ان الحياة العامة اهم من الحياة الخاصة في الاسلام
ولمزيد من توضيح افكار الشيخ الدكتور الجديدة نتطرق لماقاله في البنوك الاسلامية حيث قال كل البنوك الاسلامية اخذت الاسم اما المضمون (لايوجد) وان معاملات البنوك التي نسميها مرابحات اسوا من الربا ثم دلفت به المحاورة هبة محمود الي الزكاة وسالته لماذا يخضع المسلم للزكاة والضرائب في نفس الوقت فرد عليها الترابي قائلا الفقه الصحيح لايوجد شئ اسمه زكاة وضرائب ولاتوجد ضرائب محددة والنبي صلى الله عليه وسلم كان في وقته كان يرى المحصول او المنتج ويحدد نسبة وغدا يقول شئ اخر ويجدد الفكر ولكن الحاصل الان جمود ساكت . فكل شئ تدفعه للعمل العام هو زكاة ولاتوجد زكاة لها مؤسسة (ليهم براهم وقائمين عليها لياكلوها) وكل ما تعطيه للصالح العام يزكيك ويزكي نفسك وربنا يعطيك اجرا بدله وعائدا في الاخرة وليس هناك ضرائب وزكاة المال كله للمصلحة العامة يجب دفعه تزكيه للشخص ولكن دا تخلف مسلمين ساكت (انتهى )
اثناء نقلي لنصوص الترابي اعلاه تقافزت عبارات التعليق الموجزة تقافزا لدرجة انني خفت ان يطرشق ياخوفي منها من شاكلة (ابو الزفت , خليت للعلمانيين شنو , يالفادني الشيخ قام عليك ,ومايسمع بيك القرضاوي , الكلام دا ماقالوا محمود محمد طه زمااااان ) ولكنني كبحتها حتى لا اقطع تسلسل هذا الكلام الخطير فنحن لسنا بصدد مضاهاة افكار الترابي بافكار غيره انما بصدد انقلاب الترابي على نفسه فتجربة البنوك الاسلامية هو عرابها بمرابحاتها وتامينها وقد كان المنافح عنها وكذلك الزكاة كان من المنظرين لها وبشكلها المؤسسي الحالي وفي كتابه الموسوم بالحركة الاسلامية الكسب والمنهج اوضح كيف انهم قاموا باسلمة الاقتصاد والسياسة وجعلوا الدولة تتعبد.
كان يمكن لشيخ حسن ان يقول انه بعد التجربة توصل الي ان ما تم تطبيقه مفارق لروح الاسلام للاسباب كذا , او انه كان يعوزهم الكادر المؤهل اخلاقيا ومهنيا , كان يمكنه ان يقول ان هناك اجتهادات في الدين قالها غيرهم ولكنهم لم ياخذوا بها ولكن بعد التجريب ثبت لهم صحة اولئك ولكن ان يقفز الترابي على تجربته السابقة ويعزل نفسه عنها ويقول فيها مالم يقله جعفر شيخ ادريس في حسن الترابي فهذا ما يحتاج لوقفة ولاشك ان الشيخ حسن يعلم وهو سيد العارفين ان الوسائل احيانا لاتقل اهيمة عن الغايات اقصد انه اذا اراد رجل في قامته وفي مستوى تفكيره واجتهاده ان يقدم اطروحة جديدة او مراجعات لاطروحات قديمة لايمكن ان يقلع من الصفر لانه مسئول عن افكاره السابقة ولاسيما ان هذة الافكار بنى عليها حركة وحزب ودولة لابل مست حياة شعب باكمله ان لم نقل شعوبا
يمتاز الترابي عن غيره من السياسين والمفكرين انه دوما في حالة تجديد وكما قال هو عن نفسه لايرتهن لماضي ولو كان عمر هذا الماضي ساعة واحدة وامتاز مؤخرا بجراته في اطلاق افكاره وتجديداته ولكن ليسمح لنا شياخته ان نقول له ان سياسة الالتفاف مرهقة ومربكة وملبسة وتجعل الفاقد الفكري كبيرا لدرجة العدم و بكل ادب واحترام نهديه مرة اخرى اغنية زيدان (خليك واضح ياجميل )


تعليقات 15 | إهداء 1 | زيارات 4745

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#151285 [ابو ابراهيم]
0.00/5 (0 صوت)

05-30-2011 08:18 AM
يا دكتور صاحبك دا من الذين قال الله فيهم (( وإذا قيل لهم لا تفسدوا في الأرض قالوا إنما نحن مصلحون ( 11 ) ألا إنهم هم المفسدون ولكن لا يشعرون ( 12 ) وإذا قيل لهم آمنوا كما آمن الناس قالوا أنؤمن كما آمن السفهاء ألا إنهم هم السفهاء ولكن لا يعلمون


#150945 [يسن الصاوي]
0.00/5 (0 صوت)

05-29-2011 03:21 PM
جعل الله كيده في نحره، والجزاء من جنس العمل.. هذا ما فعلته يداك .. ايها الخائن
في يوم 19 ديسمبر 2009 اجرت جريدة الاهرام اليوم لقاء مع مولانا خلف الله الرشيد رئيس القضاء الاسبق، قال الواحد ( الترابي هو من قام بتعديل الدستور ومازال تعديله معمول به حتى الان في القانون)

اسع جاي يقول كلام ساي .. وينك لما كنت عراب للنظام ؟؟؟؟؟؟؟؟؟؟؟

الحمد لله ازلك الله في حياتك وانشاء الله بعد مماتك يا دنئ ... يا حقير


#150529 [بوقى ]
0.00/5 (0 صوت)

05-29-2011 12:01 AM
والله حيرتنا يالترابى واحترنا معاك يالبونى الزول ده خرف يحتاج لاخصاي نفسيه وعصبيه ولو شايفين غير كده نمشى نحنا للاخصاي اهدى ليه اغنبة ابراهيم عوض حبيبى جننى ......................................


#150449 [Kalifa]
0.00/5 (0 صوت)

05-28-2011 07:33 PM
مقتبس من أعلاه : ( ان معاملات البنوك التي نسميها مرابحات اسوا من الربا )......عن تجربة شخصية في مرابحة لدي بنك فيصل لتخليص عربة بوكس دفعت دم قلبي....التخليص تم في مكتب المرحوم موسي حسين ضرار (كبير أهل الجبهة الاسلامية ببورتسودان ) وبضعف سعر السوق والتامين في الشركة الاسلامية للتأمين وهي من أذرع بنك فيصل وبضعف او يزيد عن سعر التأمين الشامل بالسوق واخيرا تسجيل البوكس بأسم بنك فيصل في المرور لحين سداد الأقساط،،، بعدها حسبت فوائدهم من هذة العملية فوصلت فوق 40%.......فهل هنالك فوائد في البنوك الربوية تصل لهذا الرقم الخرافي , ومن ذاك اليوم تبت توبة نصوح من عموم التسهيلات البنكية ربوية او اسلامية......رغم اختلافنا الحاد مع الدكتور الترابي ونعتبره سبب اساسي في ما وصل الية حال الوطن اليوم.... إلا أن هذا لا يمنع من مناقشة أفكاره وأخذ المفيد رغم أن الكثير من ما يردده هذة الأيام سبق وان ذكره المرحوم الأستاذ شهيد الفكر المتجرد محمود محمد طة ....وعلينا إعادة قراءة ما كتب بعقل منفتح وأخذ مايلزمنا من أفكار ورؤي.. عسي ولعل أن ينصلح حال المسلمين ليس في السودان بل في كل البلاد فالجميع في تردد وحيرة من الوضع الماثل العالم بغربه وشرقه يتقدم ونحن واقفين متجمدين مكبلين عقولنا بنصوص فقهية وإجتهادات ما قبل القرون الوسطي!!!!! الأستاذ طيب الله ثراه سبق عصره بثاقب فكره وطرح جزء كبير من مشاكل اليوم ووضع الرؤية الدينية السليمة المرنة المواكبة لعصرنا على الأقل....أما أطروحات الأخوان المسلمين التي يهاجمها شيخهم اليوم فلقد تصدي لها الأستاذ في ذات الوقت وكتب كمثال (بنك فيصل والربا) و(الهوس الديني والسلطة)....ألخ ،، فصار العدو الأول للأخوان والسلطة ... فتحركا معا ليصل الي حبل المشنقة وهو يبتسم في رضاء تام عن النفس !!!!! ;) ;) ;)


#150434 [علي]
0.00/5 (0 صوت)

05-28-2011 06:46 PM
امنا برب العالمين!!! بس طلب واحد وممكن نصدق الترابي ونقيم ليهو تمثال من العجوه!!! ونعرس ليهو بكر مكربة زواج يكمل فيهو باقي عمرو من غير مصلحة!!!! ونسامحوا !!!
بس يشيل الجابه ده من لغاليغه!!!!!!!!!!!!!!!!!!! لانو مامكن يكون جديد لنج ومساميرو في رسينا بدق


#150427 [adil a omer ]
0.00/5 (0 صوت)

05-28-2011 06:32 PM
والله صاحبنا ده حير الحرباء نفسها ده ابليس قاعد بيتفرج على عمايلوبمكن يتعلم منه شئ ينفعه


#150368 [جاليلو]
0.00/5 (0 صوت)

05-28-2011 04:42 PM
لكن يامحمد الطيب البوني ما عمل ليهو حزب ولا قال انا ربكم الاعلى عشان كدا ماخد حريتو ويعربد على كيفو ولو عندك اثبات انه دعا لحاكم او معارض ورينا ليهو فهو مثقف طليق ينتمي لهذا الوطن بكارته ومداحيه ومصليه وياهو دا السودان


#150307 [محمد الطيب]
0.00/5 (0 صوت)

05-28-2011 02:42 PM
أنت ذاتك متلون زي الترابي , كل يوم برأي ,تغني مع السكاري وتمدح مع المداح , تأكل مع الإنقاذ وتصلي مع المعارضة , نحن شعب طيب نصدق كل من يلعب علينا , العاطفة عندنا شديدة, والأبالسة من كل إتجاه ومن كل لون يعرفوا كيف يوظفوا هذه العاطفة لمصلحتهم فقط وليس لأي شئ آخر .


ردود على محمد الطيب
Oman [كوماندو] 05-28-2011 04:31 PM
كلامك صاح......
والبونى شغال معانا بى نظام الفيك بدربو و........


#150224 [عبد الله]
0.00/5 (0 صوت)

05-28-2011 12:11 PM
أستاذ البوني مبروك النظارة الجديدة.
الترابي من يومه وااااااااااااااااااااااااااااااااااااااحد ماتغير فيه شيء أبدا.
بس قل لنا رأيك في الحبر الجديد ( حبر الشاشة ) أكيد غير حبر الورق.
لكن لا تنسى مسح النظارة حتى لايظهر معك ( هلال بخيت )


#150221 [جاليلو]
0.00/5 (0 صوت)

05-28-2011 12:07 PM
يعني يابروف البوني عاوز تلعب باك مع الترابي ولاشنو ؟


#150215 [الساحر]
0.00/5 (0 صوت)

05-28-2011 11:58 AM
دكتور البونى كل ما قلته عن الترابى فى الحلقه الماضيه هو صحيح 0 الترابى من اتى
بالبشير فى الحكم ودعمه واعلن الجهاد فى الجنوب وظل يدير السودان بقبضة من حديد لمدة 10 اعوام وعندما اختلف مع البشير قال لا يجوز اعلان الجهاد على ابناء الوطن ووصل مرحله التحالف مع الحركه الشعبية ضد قادة الانقلاب الزين اتى بهم الا ان الحركه الشعبيه تدرك الاعيب الشيخ استخدمته ورمته 0 يا شيخ الترابى الشعب السودانى عارفك من تكون 0


#150211 [abuamin]
0.00/5 (0 صوت)

05-28-2011 11:53 AM

حضرة الاستاذ المحترم اما بعد التحية

فاسمح لى ان اقول راى حول المقصد (و هو حميد لا شك ) من هذا المقال ولكننا ندرك جميعا بان هناك من يحجر الراى على من يخالفونهم ولو ثـبت خطاءهم ..... و هذا ما تسميه ( بـالـمـكـابـرة ) و هى صفة رزيلة يتصف بها الكثيرين من ما يقال لهم الجبهجية الامر الذى كات سائدا و يمكن لا زال و ينم عن عميق جهلهم بالامور دنيا ودين .

ففى تراثنا الاسلامى العظيم مقولة (( خـيـر الـخـطـائين الـتوابين)) و فى زمنا الحاضر بنسميهو (( الـنـقـد الـذاتـى أو الإعتذار )) ......... عـمرك شـفـت و اللا سمعت زول اسلاموى اعترف بخطائه و اعـتـذر لمن اذنب فى حقهم ووراهم الويل لمّا تمكن .؟؟؟ شوف الكم و عشرين سنة الماضية والمآسى التى شهدتها !!!!!

مرة سمعت المدعو كمال عمر بيدافع عن شيخو فى تلفاز ابونى انو عارف و مـقّـرْ بانهم ( الجبهة الاسلامية ) ارتكبوا جرائم فى حق هذا الشعب و انو شيخ الترابى مسئول عنها......... وشوف بيقول لافض فوه ........ هـو مـا بـيـعـتـذر لـكن بس بيستغفر الله من اىْ ذنب !!!!!!!!

المفروض يا استاذ تفهم اتو سيـادة الشيخ بس غير رأيو لمتطلبات المرحلة !!!



#150186 [mohamed]
0.00/5 (0 صوت)

05-28-2011 11:24 AM
عايز اقابلك


#150152 [زعلان من الترابى]
0.00/5 (0 صوت)

05-28-2011 10:41 AM
التحية للبونى .. شوف يابونى إشهد الله انا خريج المتوسطة امتحنت العالى ولم
ولم ادخل الجامعة ورفضت الاعادة .. وحاليا اعمال حرة والحمد لله .. سمعت ان الترابى
مفكر ... الترابى مجدد .. الترابى بعبع يخافه الغرب ... الترابى داهية ... الترابى
الترابى ... الترابى التراب فى خشمُ ... الترابى دمر السودان ودمر النسيج الاجتماعى
وكل اسباب الطلاقات الترابى ولعنة الله على الترابى .. والراجل فى نظرى طلع اى
كلام .. والرسول قال خيركم خيركم لاهله .. وين خير الترابى للسودان


#150138 [سلايمان قش]
0.00/5 (0 صوت)

05-28-2011 10:12 AM
يعني داير 22سنة تاني للمشروع الجديد ياشيخ خاف الله فينا!!!!!!!!!!


عبد اللطيف البوني
عبد اللطيف البوني

مساحة اعلانية






الرئيسة |المقالات |الأخبار |الفيديو |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2016 www.alrakoba.net - All rights reserved

صحيفة الراكوبة