جات سلامة
05-28-2011 11:53 AM

ساخر سبيل

جات سلامة

الفاتح جبرا

الجيوب أنواع .. فالجيب فى الرياضيات هو النسبة بين الضلع (المقابل) لزاوية والوتر في مثلث ذو زاوية قائمة، أما

جيب التمام فهو النسبة بين الضلع )المجاور) لزاوية والوتر في مثلث ذو زاوية قائمة ، أما الجيوب فى الطب فكثر فهنالك (الجيوب الأنفية) وهي فراغات مليئة بالهواء، تتصل بالتجويف الأنفي عبر فتحات خاصة، تقع ضمن عظام الجمجمةِ والوجهِ وهنالك ( الجيوب الجفنية) وهي كما يقول الأطباء أكياس دهنية تتشكل عند الجفن الأسفل، وهى نوع من الأنتفاخات التى تحدث نتيجة فائض الدهون .

أما أكثر الجيوب إزعاجاً وخطورة فهى (جيوب المقاومة) وهي مجموعات من الأفراد المسلحين المختفين فى أماكن متفرقة ينطلقوا منها لمهاجمة العدو الذى غالبا ما يكون (محتل) المدينة !

أما الجيوب التى علي الملابس فهي أشكال وألوان فهى تستخدم لحفظ المتعلقات الصغيرة وأهمها (الفلوس) ولعل أشهر الجيوب هو(جيب الساعة) وهو جيب يقبع علي الجهة اليمنى أعلى (الجلابية) الرجالية له فتحة صغيرة تسمح فقط بدخول أصبعي (الوسطى والسبابة) وقد كانت يستخدمة أباؤنا وأجدادنا فيما مضى لوضع (ساعة الجيب) وهى ساعة مستديرة قطرها أكبر من البوصة بقليل ذات (دلاية) تربط فى طرف الجيب وعلي الرغم من أن (ساعة الجيب) قد إندثرت إلا أن الجيب لا زال باقياً حتى تاريخه وقد وجد له المواطن وظيفة أخرى هي الإحتفاظ بالفكة الحديد و(الخمسميات) لزوم دفعها للكمساري عند ركوب المواصلات!

وتزدهر الجيوب عادة فى الاسبوع الأول من كل شهر بالنسبة للموظفون فى الارض حيث يبدو إنتفاخها واضحاً للعيان ثم لا تلبث أن (تكش) وتضمر بسرعة البرق بعد القيام بدفع (الجرورة) وحساب البقالة وسيد اللبن والجزار وبتاع الخضار والجمرة الخبيثة موية (الكهرباء جايااااكم) وإيجار البيت والشنو ما بعرف وكووولها كم يوم ويصبح الجيب خالي الوفاض وما فيهو (أبو النوم) !

أما (الجماعة) فقد تركوا إستخدام الجيوب وإستعاضوا عنها (بضهرية) العربية لأنو دى ما (قروش جيوب) هسه الجيب بتاع (الزول داك) بشيل بدل اللبس (بس؟) خليكم من بدل (العيدين) والإجازة ؟

مناسبة الكلام عن (الجيوب) دى شنو؟ أقول ليكم :

أوصاني أحد الأصدقاء أن أحضر له معي (جهاز موبايل) من دولة الأمارات التى زرتها مؤخراً وبسبب المشغوليات و(الزهايمر) فقد نسيت طلبه حتى إذا ما عدت إلى البلاد (تذكرت الطلب) فقلت في نفسى ما مشكلة (أشتريهو ليهو من هنا) وبالفعل إرتديت جلابيتى و(لفيت) عمتى وعلى شارع (الجمهورية) حيث بعض محلات الموبايلات ، كان الوقت ظهراً و(البرندات) تعج بالباعة والجمهور ، وأنا اسير أصطدم بي شخص يسير فى الأتجاه المعاكس حتى كدت اقع على الشخص الذى يسير خلفى والذى أمسك بى قائلاً :

- جات سلامة يا حاج جات سلامة !

واصلت سيري حتى وصلت إلى أحد المحلات قمت بإختيار أحد (الموبايلات) القيمة طلبت من البائع أن يضعه لى فى (علبته) ويغلفه لي (لانو هدية وكده) ، أدخلت يدي فى جيبى اليمين فوجدته خاوياً ، الشمال (خاوى برضو) ، جيوب (العراقى) نفس الشئ ، لم تطل حيرتي فقد خاطبنى البائع قائلاً :

- يا أستاذ إنتا جيبك ده (مشروط)

- (فى دهشة) : لكن الشرطو شنو ؟

- كدى يا أستاذ أحكى ليا مما نزلتا من العربية الحصل شنو؟

وقصصت له (مساري) وما كان من امر (التصادم) حتى إذا ما وصلت إلى حته الشخص الذى كان يسير خلفى وأمسك بى حتى سألنى البائع :

- مش قال ليك جات سلامة !!



كسرة :

قال أيه : جات سلامة .... والدنيا )أربعاء) وعقاب شهر !!


تعليقات 14 | إهداء 4 | زيارات 6513

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#157482 [Naz]
0.00/5 (0 صوت)

06-09-2011 09:09 PM
انت عارف ياجبرا الزول قايلك من ناس جيوب العربية عشان بتسرقوها جملة وه و يسرقا قطاعي


#151030 [salah]
0.00/5 (0 صوت)

05-29-2011 06:30 PM
والله يا استاذنا طلعتا مسكين ومشت فيك الحركه القديمه دي دب بقت مكشوفه ومعروفه لي درجت اني لوزول طقشني ساااااي ما قاصد بتشعبط ليك فيو وما بفكو لو ما فتشته جيوبي ونفضتا نفيض اكان طلعت زي ما ياها خير وبركه بعتزر ليو وما بقيل وتنقلب كانفو واكان لقيتا فاضيه وطلع حرامي بقلعا منو وبرضو بتنقل كانفو


#150513 [ود أم در]
0.00/5 (0 صوت)

05-28-2011 11:11 PM
يا أستاذ جبرا أنا الكنت بشاغلك زمان وقايل بيتكم في المسالمة وبقول ليك تمشي عن طريق العدني عديل ، ويبدو إنني كنت على خطأ لأنني قد عرفت أنك تسكن في بيت المال، المهم عندي ليك ساعة جيب ممتازة أرجو أن تتقبلها هدية كعربون إعتذار . وأرجو الإتصال بي على إي ميلي [email protected] حتى أرسلها لك مع القادمين لقضاء إجازة الصيف في الأيام القادمة


#150497 [عمر]
0.00/5 (0 صوت)

05-28-2011 10:40 PM
يا جبرا ما تمشي للزول داك يديك حاجه تعوضك


#150458 [ashref]
0.00/5 (0 صوت)

05-28-2011 08:54 PM
اولا الجلابيه دى اسواء ملابس ممكن تتلبس وحاجه ماعمليه

لو كنت لابس بنطلون ما كان ده حصل

ولو قلت لينا جاى كنا ريحناك وجيبنا ليك هديه


#150454 [خضر الطيب]
0.00/5 (0 صوت)

05-28-2011 08:50 PM
لسع يا جبورة في أنواع كتيرة من الجيوب لم تذكر بسرعة كلفت الموضوع لتصل للنشال في محاولة ذكية للإعتذار لصاحبك بتاع الجوال.......!!

وين جيب الصدر المربع حق النضارة والنوته وين جيب الجزار وين الجيب السري ..ووين ووين...؟

المهم باله عليك كان إنت أو أي واحد من القراء ..إوريني ( أبو النوم ) المرتبط بالجيوب دا شنو؟؟؟؟ ضروووووووووووووووووووووري


#150417 [الشافوه خلوه]
0.00/5 (0 صوت)

05-28-2011 07:10 PM
كلامو صااااااااااااااح ياجبرا لأنو جات سلامة عليهو هو وصاحبو الصدمك يعني عمليتهم نجحت وكده ولا أيه رأيااااك؟ ههههههههههههها والله ديل بقوا يحيروا . لكن معليش بس صاحب الوصية عرف أنك نسيتو وحقو كمان يحاول يعوضك بس نبهو لما يكون جايي ليك مايخت القروش في جيبو عشان تجي سلامة عليك المرة دي.
لك التحية


#150311 [سودانية]
0.00/5 (0 صوت)

05-28-2011 03:49 PM
عالم ما مرزقة ...شفت يااستاذ لو كنت اشتريت الموبايل ده من الامارات كان ادوك معاهو هدية اقلاها لاب توب ...كنت طبقت الهدية لنفسك وباصيت الموبايل لصاحبك...انت زاتك الرجعك السودان للنشل شنو مالك ما كنكشت هناك


#150305 [ام الحسن ]
0.00/5 (0 صوت)

05-28-2011 03:40 PM
بى عمتك دى كوووولها وتتدقس ...وكمان تقص وترص دقستك على الملأ.....والله انا مرة واحدة بس فى حياتى كوووولها اتنشلت وما جبت سيرة الحادثة دى لاى مخلوق ليوم الليلة ده....زمان ...بس مازمان شديد ....اول عريس وعريس كان لقطةاتقدم لى رفضتو لاانو جانى يوم وحكى قصة كيف النشال دقسو ونشلو.....انت اظنك لو كنت من النوع البركب المواصلات كان اولادك لليلة بشحدو بى قرعة


#150273 [الحناك]
0.00/5 (0 صوت)

05-28-2011 02:49 PM
غايتو يا استاذ عصفرين بي حجر
كتبت عمودك وانسترت مع ناس الجريده
والتانيه لقيت ليك مراقه من قريبك العاوز الموبايل
مساكين النشالين غايتو:D


#150265 [علي]
0.00/5 (0 صوت)

05-28-2011 02:23 PM
اخير انت نحنه واحد دفرنه من عشرين سنه!!! وشال.... ولي اسه حتي جيوبنه الانفيه فاضيه!!!;( ;( ;( ;( ;( ;(


#150241 [mohamed]
0.00/5 (0 صوت)

05-28-2011 01:32 PM
انت يا جبره والله من ناس الضهريه ما من ناس الجيوب

وبتكون عربيت شرط والنشال ده لو صاح بكون شافك من ما نزلت من الفارهه بتاعتك

انت مش عندك فارهه


#150232 [abuamin]
0.00/5 (0 صوت)

05-28-2011 01:22 PM

استاذ جبر ه ..................الله يجبر فقدك الاليم ( اقصد ما كان فى الجيب) و يعوّضك.............
المهم طالما انت زول توثيق لسع الجيوب كتيرة لم تذكرا كلها ليه ؟؟

فاسمح لى ازيدك........ الجيب بمعنى الـقـبّـه الحديث بما يعنى (( ليس منا من لطم الخدود وشق الجيوب __ بس مش بتاعت النشال دا!!!!!__)) و كمان ( ان يضربن جلابيبهن بجيوبهن ) و كمان بمعنى طلب الجمعها طلبات الزول يقول ليك كده جـــيـــب لىْ موبايل و لما تكتر ( جمعها مش جيبات جمعها جيوب والله اعلم ) ........
و الله انا فهمت ما ترمى اليه يا ذكى !!!!!! انت ما سمعت بحكاية قريبك الحلفاوى لما مسافر لمصر الاهل كل واحد عندو طلب جيب ....جيب ساكت .... الا واحد بس اداهو مبلغ من المال وقال ليهو بالله جيب لى ولدى صفارة .............. فرد عليهو الحلفاوى قائلا والله بس ولدك الصفر


#150218 [الزول الكان سمح]
0.00/5 (0 صوت)

05-28-2011 12:59 PM

يا استاذ

والله فعلاً ..جات سلامة..الزول ده أكـــيد موصيهو عليك بتاع (البلوفة)



الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة