المقالات
السياسة
ارشيف مقالات سياسية
الشعب يريده صادقاً مهدياً!ا
الشعب يريده صادقاً مهدياً!ا
05-28-2011 02:46 PM

حروف حرة

الشعب يريده صادقاً مهدياً!

لنا مهدي عبدالله
[email protected]


الليلة كيف امسيتو يا ملوك أم در؟
الليلة كيف امسيتو..أيها الأجداد؟
نتقلب في مراقدنا!
الليلة كيف امسيتو..أيها الأحفاد؟
في ضيق وكدر!
فبعض بني الوطن أضاعوا الوطن!
الوطن الذي حرره الجدود ونفضوا يده من يد الذل والقهر
حرر الإمام المهدي الجد الأكبر للإمام الصادق المهدي الخرطوم
مظفراً في 26 يناير..عبر النيل
عبره ذلك الزاهد
الذي رفض أن يسكن قصر غوردون باشا.. ما يعرف بالقصر الجمهوري حالياً
رفض زخرف الدنيا وسمى القصر \"مساكن الذين ظلموا أنفسهم\"
ثم ترك العنان لناقته
أطلقها بعد عبوره النهر ووصوله أمدرمان لتنيخ به أنى شاءت
فأناخت به في أمدرمان في مكان القبة الآن
فكان مسكنه و مسجده و أصبح مرقده بعد أن انتقل إلى الرفيق الأعلى
فصدق ما عاهد عليه الله و ما بدل تبديلا
كما صدق في 12 فبراير عندما حرر الإمام المهدي الكبير أم در
وورث الإمام الصادق المهدي الرفض عن جده
فالكرامة موروثة كابراً عن كابر
رفض أن يسكن قصر الذين ظلموا أنفسهم
رفض أن يقتسم جثة الوطن مع سارقيه
رفض موائد اللئام!
***
أقلت أمدرمان؟
هيَا يا أخي
إمسك بيد الخيال و اعبر معه النيل إلى يمينه\"حيث سابق\"
أتلمح التماعة تلك الفضية التى تحنو على ملهمها ويعلوها هلال حقيقة وحربة جهاد؟
(الضريح الفاح طيبو عابق السلام يا المهدي الإمام)
هنالك حيث الأشواق تتكاثف كبخار محبة
وحيث الحنين يقودك لا تقوده
وحيث النفس تهفو والقلب يخفق
درب يطرقه صادقنا المهدي كل يوم
درب الحق والحقيقة يتجدد العهد معه كلما صافحت عينيه النهر الخالد من شرفة منزله
ببيت الأمة
وميثاق غليظ وقعه مع جده
مكتوب بماء النيل
كلما رأى التماعة القبة جدد العهد وغلظ الميثاق
ألا تراجع ولا انهزام ولا استسلام
فطب مرقداً يا جدي
***
أقلت أمدرمان؟؟
إمسك بيد الخيال و اعبر معه النيل و تمهل فاعرج يميناً
الى أب روف و اتئد و أنت تجتاز تلك الأزقة الضيقة
تلك الأزقة الضيقة التى كأنما خلقت لتكون هناك
كأنّ التاريخ يسجل في كل لحظة توقيعه على \"شهادة العجز و الإخفاق\" في أن ينال من صباها شيئاً
فلم تشخ أو تهرم رغم أنها عتيقة عتيقة
تنحني ظهور أبنائها في رحلات أعمارهم أطفالاً فصبية
فشباباً فكهولاً فشيوخاً ولا ينحني ظهرها أبداً
وكأنها ملكت إكسير الحياة الأبدية و مصل الخلود
***
أقلت أمدرمان؟؟
إمسك بيد الخيال و تمهل
و الذكرى قطعة سكر أذبها ببطء بداخل فم الواقع ولا أحلى
أقلت أمدرمان؟؟
إمسك بيد خيالك و لا تطلقها أبداً ورددا معاً أغنية الحب السرمدي:
(إمتى أرجع لى ام در و اعودا
اشوف نعيم دنيتى و سعودا)
ثم بح بحبك دفعة واحدة واهتف: (يا المن فراقك أيامي سودا
إمتى ارجع لى امدر و اعودا)
ثم ردد مع خليل فرح:
(من علايل أب روف
للمزالق
من فتيح
للخور
للمغالق
قدلة يا مولاي حافي حالق
في الطريق الشاقي الترام)
وإمتى أرجع لي ام در و اعودا؟؟
***
أمدرمان يا أخي حلقة راتب
تمتد بعمق \"تكسبون\"
مرورا نفسياً ب\"المسبعات العشر\" ف\"تنجينا\" ف\"دعاء ختم القرآن\"
إلى أن تحط على دفتي \"دعوة قساوة القلب والغفلة عن ذكر الله\"
أترى لهذا السبب معظم أهل أمدرمان ليَنو القلب؟؟
أمدرمان حلقة راتب تحت الشجرة الظليلة المطلة على خور الأمير أبوعنجة
تتلو وراءه الشهادتين و العهد بالخلاص صباح مساء
أمدرمان حلقة راتب تذيب فوارق البشر إلا من نظافة القلب
و طهر النفس و وسلامها الداخلي بألا تجعل اللهم فى قلوبنا غلاً للذين آمنوا
أمدرمان الشيخ الصديق أحمد العجب و الشيخ أحمد العجب
ودنوباوي الشامخة ببيوت الأئمة الإمام الشهيد الهادي المهدي طيب الله ثراه
الذي مضى وقدم روحه مهراً لتراب وطنه
والإمام الصادق المهدي أطال الله عمره أمل أمته ووطنه
أم در الشامخة ببيت الأمير نقدالله
مسجد الهجرة
طوابي الصمود
بوابة عبدالقيوم
و كل معالم الإباء
***
أم درمان بيت الأمة
\"بيت البحر\" بقرب الإذاعة
مكان جد خطير
مهوى قلوب المغامرين
محط طموحهم المعتدي
الظفر بحادي الأمة وضيائها
ولكنه بمنأى عن كل خطر
فحب الناس يحميه
والوفاء من أهل الوفاء دثار له
لا يخاف ولا يخشى
أم درمان الصادق والصادق أمدرمان
لا مجال لفصل القلب عن سويدائه
ولا النفس الكريمة عن منبع عظمتها
***
أقلت أمدرمان يا أخي؟

أم درمان عبدالله ود الزين الذي يلهج به ومعه أبوقرون
بعد أن اقتسما ينبوع محبة ام در:

(حبيبي جميل
جمال فتان
جمال تظهر سماتو الحلوة ميزات جوهر الانسان
جمال زى بقعة ام درمان
جمال فى طابعو سوداني
جمال فى شكلو انساني
جمال ما فيهو دور تالت ولا تاني
جمال فى بيت من الجالوص
وفوق للشعبة رابط سعف منسوج من حبال و بروش
ووسط الحوش
تنوم العزة تتوسد لحاف بالعاديات مفروش
حبيبي جميل
جمال فتان
جمال رايع
جمال فى قبة او جامع
جمال فى طابية بتدافع
جمال فى طاقة بتقبل على الشارع
وقفة بتقفل الطاقة
وزحام فى شارع الصاغة
وضيف فى خلوة او دهليز
وزول نايم تحت لالوبة او جميز
جمال ما بحسو غير زولن لعب شدَت ووسط الميس
حبيبي جميل
جمال بطران
جمال شبعان
جمال زى بقعة امدرمان
وامدرمان
بيشوفا الرامد المرضان:
بلد بيموت
وعز بيفوت
وواحدة عجوزة راجية الموت
وامدرمان
بعين الشاعر الانسان
وعين البعرف امدرمان:
سلام وامان
تخش بحمار
تسوي حصان
تنوم بردان
تقوم دفيان
وأسمعو كيف بقول عبدالله ود الزين
وليد الأوليا الصالحين
وليد الشهدا و الشاهدين
وأسمعو كيف بقول فى ام در
وليد البر
أنا امدرمان سليلة السيل
ولد ولدونى بالتهليل
أنا امدرمان)
**
وهل انتهى الحديث عن أمدر؟؟
أمسك بيد خيالك وأعبر النيل إلى الشاطئ الغربي حيث أم در
وتجول ملياً في كل شارع و كل بيت
فهنالك لكل شارع بوح و لكل بيت قصة تقبع في ركن منه
لتحكي برغم عاديات الزمن
حكاية مدينة تليدة لم تمل الخلود
لم ولن تعرف الانكسار
والليلة كيف أمسيتو....يا ملوك أم در؟
***
يا أهل أم در
ويا أهل الوطن قاطبة
فعلها جده
حقق المعجزة بالأمس
وحتماً هو محققها اليوم
حررنا جده من الاستعمار الخارجي
وحتماً سيحررنا حفيده من الاستعمار الداخلي ومن نير الجاثمين على صدر الوطن
الله كيف أمسيتو يا ملوك ام در؟
أسمعكم
نعم أسمعكم تقولون: أمسينا بخير
وأصبحنا بخير
يحدونا الأمل الكبير والثقة العظمى في الإمام الصادق محررنا
الوطن قضيته ومعركته
والليلة بخير أمسيتو يا أهل السودان
فالأمانة في حضن الأمين
لن يفلتها ولن يخذلنا
لن يخذلنا من عهدناه صادقاً مهدياً
والله أكبر ولله الحمد
***
مع محبتي؛


تعليقات 16 | إهداء 0 | زيارات 3817

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#151094 [السودانى]
0.00/5 (0 صوت)

05-29-2011 08:21 PM
اقول للاخ kahli يا اخى انا نسيت فعلا حلايب كانت محرره ايام حكم الصادق والصادق لم يقتل الناس لان قرنق وصل الكرمك واحتل 14 مدينه فى الجنوب تانى الصادق يقاتل من اجل ايه 0 ابنه عبدالرحمن عاد للجيش برتبه عقيد والان عميد لماذا لم يرفض الصادق عودة ابنه للجيش ويقول ابنى ليس على راسه بحطه ويطالب بعوده كل ابناء الشعب السودانى الزين فصلوا من الجيش لماذا ابنه فقط


#150965 [انور ]
0.00/5 (0 صوت)

05-29-2011 04:47 PM

الامام رجل مفكر ومثقف وخطيب من الدرجة الاولي ، كما انه عفيف اليد و اللسان و متديين من غير رهبنة او تمثيل و كمان رياضي . و كل من يقول بغير ذلك فهو صاحب هوي لانها هذه حقائق مثل 1 1 = 2 .


#150948 [kahli]
0.00/5 (0 صوت)

05-29-2011 04:23 PM
الى سوداني
الصادق حكمنا مرتين وفتراته قليلة جدا
لم يسرق لم يقتل لم يقسم السودان
لم يترك حلايب
لو رجع الينا حبابو عشرة الطاهر النقي العفيف


#150797 [ود الشيخ]
0.00/5 (0 صوت)

05-29-2011 01:03 PM
الأستاذة لنا.. بنت أصول بدون شك,,


#150653 [kahli]
0.00/5 (0 صوت)

05-29-2011 10:25 AM
نعم هو العفيف هو الطاهر
هو المنقذ للانقاذ
هو الطابور الخامس للانتفاضة


#150594 [الغاضبة]
0.00/5 (0 صوت)

05-29-2011 08:05 AM
لماذا يريد الشعب صادق مهديا، ليسمله مرة أخرى لللجبهة الاسلامية؟؟؟؟!!!!!


#150533 [عبد القادر اسماعيل]
0.00/5 (0 صوت)

05-29-2011 01:20 AM
صدقت يابنة القوم الصُياب

الرجل قامة ... كما الوطن و الدين و الأصل و العقيدة .. سليل الأفاضل .. أخ كريم و ابن أخ كريم

{ الجبل الما بنطلع .. الوافر الما بنضرع .. هو الأصل و الناس فرع }

علم و ثقافة و منطق .. و خلق حسن

لا نحس بالطمأنينة و الفخر عند محاورة الساسة و المفكرين و الأجانب ... عبر وسائط

الإعلام ... إلا في حضرته ... يغالبهم في الطرح .. حكمة و حنكة و علمآ وثقافة ... طويل

النجاد عفيف اليد و اللسان ... لايشابه اولئك المسطحون .. و إني لأراه ما بقي للناس أن

يستمسكوا به ... ففيه عبق الشموخ و ازمنة الإعتداد بالنفس و تفاخر السودان بالسودان ..

فوجب تقديره و احترامه ثم احترامه و تقديره .. .. أدعي هذا لمن فقه أو لمن حام حوله

كيمياء التعقل يا هؤلاء ّّ


#150494 [rami]
0.00/5 (0 صوت)

05-28-2011 10:28 PM
يابنتى كلامك سمح والصادق مثقف ودارس فى بلاد برة الا اهلنا القدام قالوا عيب الزاد من سيدو
وسيدنا الصادق حفيدو للمهدى الحرر البلد الا ما كل من كان جدو بطل بيكون بطل ممكن يطون بطل بس الباء طالعة
سيدى الصادق جاتو فرص اظن ملكة انجلترا مالقت فرص زى ود المهدى لكن عيب الزاد من سيدو وهلمجرا
وتانى حاجة الحين الناس الفى الحكومة متل الصادق بياكلو وبيقرقشوا ماشفتى حزب الامة بقى كم امة حتى دخلو فى بيت المهدى شققوا زى الدمورية
بنتى انت لسه صغيرة واشفتى لعالم السياسة شئ
اكتبى عن الجمال عن الفلسفة عن الفن ابعدى من السياسة والسياسيين
دا عالم قذر وحتى ولو كان من ضمنهم الحبيب ابن الحبيب الصادق ود سيدى المهدى
مع اعتذارى


#150489 [السودانى ]
0.00/5 (0 صوت)

05-28-2011 10:18 PM
الاخت لنا تغذلى فى الصادق كما تشائين ونحن جربنا الصادق فى الحكم مرتين
والشعب السودانى ما عاوز زول يعرفوا بالصادق 0 ثم الامام المهدى لم يورث المهديه لاحد اجدادنا ماتوا فى المهديه دفاعا عن السودان تحت رايه المهدى 0 الا ان ياتى حفيده لكى يرث دماء اجدادنا باسم المهديه هذا ما يرفضه الشعب 0ثم اين الديمقراطيه هل هناك شخص يمكث فترة قاربت ال 50 سنه رئيس لحزب ويعين اولاده فى المناصب العليا للحزب باسم الديمقراطية 0 اما الكلام عن امدرمان وربط تاريخها بالصادق ماذا فعل الصاددق لامدرمان 0 ام درمان وجدها الصادق كما هى واقفه شامخه مرويه بدماء الاجداد اجداد كل السودانيون 0 اختصار كل المهديه فى شخصية الصادق فيهو خداع لعقول الناس 0


#150422 [الرقيق]
0.00/5 (0 صوت)

05-28-2011 07:16 PM
المهدي له في تاريخ السودان صفحات ناصعة لكن لا توئهل ان يرهن السودان لاحفاده وبنيه فالصادق كغيره من من اتيحت لهم فرصة الحكم في السودان لم يقدم شئ سوي ديموقراطية عبثية كانت فقط تتمثل في التراشق بالكلمات الخطب الجوفاء لم يقدم ولن يقدم للسودان سوي السراب وان لم نتحرر من عبادة العباد الممثلة في تبجيل البشر سنكون في موقعنا بل سنضيع ما تبقي من السودان . وبالعودة للحديث عن السيد / الامام الصادق نجد انه كغيره فمرة نراه يداهن النظام ليهني ببعض من الغنيمة بل ونكاد نشك في انه عند سكوته بعد عاصفة يدلي بها انه قبض الثمن الشئ الذي يجعله في نظرنا وكثيرين من القابضين من النظام فالساسة في السودان اصبحوا تجار يبحثون عن المنافع الشخصية من خلال سعيهم وراء الكرسي .
اتركونا من الوجوه السياسية التي هي خراب السودان ولنترك فرصة لوجوه شابة ان تقدم شئ فالشباب اكثر فاعلية ووطنية من الذين هرموا في القصور وسرت ببدنهم اثار نعيم السنين الطوال تحت ظل السياسة الممزوجة بالافتراء وشراء الزمم


#150396 [واحد مقهور]
0.00/5 (0 صوت)

05-28-2011 06:29 PM
خلوا الاوهام .. قبل كدة الصادق ما كان ماسك البلد عمل شنو ..غير الضياع والجوع وعدم الامان .. السياسيين السابقين وناس الانقاذ الماسكين هسه .. ديل كلهم المفروض يضعوهم في غرفة ويولعوا فيهم النار .. ومؤيديهم يكونوا وقود تلك النار..


ردود على واحد مقهور
Sudan [الرمح الملتهب] 05-28-2011 07:34 PM
تعال امسك البلد دي انت يا الفالح الله لا كسبك وانشاء الله دائما مقهور


#150329 [bardora]
0.00/5 (0 صوت)

05-28-2011 04:09 PM
يا اختنا اخجلي صادق قندول ده رجل لا بيعرف السلطة و لا ممارسة عليكي الله ذول يضيع السلطة مرتين جهود شعب كله ويشيلوها الحرامية بحكم الاهمال و الناس يوروه في انقلاب و بدل بامن حسابه و يحافظ علي امانة الشعب يمش يرقص لنا في الحفل و يهرب بملابس نسوان الله لا كسبه


#150309 [امسلمة الصادق]
0.00/5 (0 صوت)

05-28-2011 03:46 PM
تسلمي يا حبيبة ويسلم قلمك هذه محبة معطونة بالراتب وعيون ام در


#150303 [الفالح]
0.00/5 (0 صوت)

05-28-2011 03:34 PM
الله عليك يالنا الله على امدرمان واهل امدرمان وعزامدرمان وياحليل ناس امدرمان النضاف جوه وبرة الحكموا السودان من استقلاله ماشفنا زول غنى واغتنى من المال العام ياها بيوتهم الزمان وحالهم الزمان قاعدين وسط اهلهم وسط ازقتهم الضيقة الواسعة قدر حبهم للسودان واهل السودان....انظرى هل ترين وسط العصابة الحاكمة اى واحد من امدرمان؟؟؟انهم اهل عز وشرف وعرض............


#150301 [لقمان]
0.00/5 (0 صوت)

05-28-2011 03:30 PM
ترى لهذا السبب معظم أهل أمدرمان ليَنو القلب؟؟
أمدرمان حلقة راتب تحت الشجرة الظليلة المطلة على خور الأمير أبوعنجة
تتلو وراءه الشهادتين و العهد بالخلاص صباح مساء
أمدرمان حلقة راتب تذيب فوارق البشر إلا من نظافة القلب
و طهر النفس و وسلامها الداخلي بألا تجعل اللهم فى قلوبنا غلاً للذين آمنوا
أمدرمان الشيخ الصديق أحمد العجب و الشيخ أحمد العجب
ودنوباوي الشامخة ببيوت الأئمة الإمام الشهيد الهادي المهدي طيب الله ثراه
الذي مضى وقدم روحه مهراً لتراب وطنه
والإمام الصادق المهدي أطال الله عمره أمل أمته ووطنه
أم در الشامخة ببيت الأمير نقدالله
مسجد الهجرة
طوابي الصمود
بوابة عبدالقيوم
و كل معالم الإباء
***
أم درمان بيت الأمة
\"بيت البحر\" بقرب الإذاعة
مكان جد خطير
مهوى قلوب المغامرين
محط طموحهم المعتدي
الظفر بحادي الأمة وضيائها
ولكنه بمنأى عن كل خطر
فحب الناس يحميه
والوفاء من أهل الوفاء دثار له
لا يخاف ولا يخشى
أم درمان الصادق والصادق أمدرمان
لا مجال لفصل القلب عن سويدائه
ولا النفس الكريمة عن منبع عظمتها
***
أقلت أمدرمان يا أخي؟

أم درمان عبدالله ود الزين الذي يلهج به ومعه أبوقرون
بعد أن اقتسما ينبوع محبة ام در:

الله اكبر ولله الحمد الله اكبر ولله الحمد


#150294 [خالد]
0.00/5 (0 صوت)

05-28-2011 03:24 PM
الاستاذه لنا لكي كامل الود والاحترام
من ناحية استاهل فهو يستاهل نعم مفكر ولسانه رطب بذكر الله ويده عفيفه وعينو مليانه اشتغل مرتين رئيس وزراء مجانا من غير مرتب والاهم من ده كلو انه رجل ديمقراطي وعنده طولة بال عجيبه
لو كان كمل المكارم العندو دي بشوية شراسه في الحق بمعني ايام الديمقراطيه كان لازم يبين للناس وللعسكر بالذات ان الديمقراطيه لها انياب واسنانها حاميه جدا لاي واحد بيحاول وأدها وبرضو كان لازم يتم محاسبة عناصر مايو بصرامه وقسوه عشان غيرهم ما يكرروها واهو حصل وحصل ونطوا فيها عسكر هجين مع كيزان وابقي قابليني لو فكوها ليوم الدين
بالمناسبه شفتي البرنامج بتاع قناة الشروق الاستضافو فيهو السيد الامام كان لقاء ظريف والمذيعه كانت ناجحه في التركيز علي الجانب الاجتماعي والشعر والموسيقي ودمتم


ردود على خالد
Saudi Arabia [الطيب رحمه قريمان ] 05-28-2011 07:38 PM
بسم الله الرحمن الرحيم

الاستاذة الحبيبة لنا

لك التحايا الطيبات العطرات

و نحن نرنو لغد مشرق بصباح كان عطره كلمات م الراتب

بصبح فيه الخليل لا يعرف غير السودان

و فيه يتساوى كل الناس بدون كيزان

تسلمى يا حبيبة


لنا مهدي عبدالله
لنا مهدي عبدالله

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة