أحلام الولاة وطموح الرعية .. !ا
05-30-2011 08:43 AM

إليكم

الطاهر ساتي
[email protected]

أحلام الولاة وطموح الرعية .. !!

** عمل رائع يستحق الإحتفاء، وليس من العدل ألا نحتفي بروائعنا..مطار رحب جدا، مساحته (77 كلم)، بمدرجين طولهما (4000 مترا)،وعرضهما (60 مترا)، بالتأكيد هو أحدث مطار في العالم، ولم لا؟، إذ به فندق عالمي بسعة (300 غرفة)، وكذلك فندق خاص لرجال الأعمال بسعة (15 غرفة)، ومركز تجاري هو الأكبر في القرن الأفريقي على مساحة ( 8000 متر مربع )،ولاننسى مركز التموين المناط به تقديم الوجبات للمسافرين بمعدل (300 وجبة يوميا)، ويا لهذه المداخل الإلكترونية المدهشة والتي يقدرعددها ب( 18 بوابة)، أما أشجار النخيل الشامخة التي ذؤاباتها تعانق السماء لاتعد ولاتحصى..ما أروعكم - يا سادة وحدة مطار الخرطوم الجديد - و أنتم تقدمون كل هذا الجمال وكل هذه العظمة وكل هذا الإبداع للشعب السوداني - في وقت وجيز جدا - عبر قرص إلكتروني سهل التشغيل والمشاهدة في أجهزة الحاسوب ..!!
** عفوا صديقي ، لم أجد في واقع حال المطار الجديد بالصالحة ما أسعدك به، ولذلك أسعدتك - مؤقتا - بحال المطار كما جسده خيال فني المونتاج - والفوتشوب - الذي ملأ ذاك القرص الإلكتروني بكل تلك الروائع بأمر سادة وحدة التنفيذ قبل كذا سنة، أي من كل تلك المدهشات ليس في الواقع غير شجيرات نخيل يابسة و( شوية ردميات وحفر ومقرات إدارة ومرتبات و عربات و سفريات وتبديد مال عام )، وبالتأكيد هذه الأشياء لم تعد من مدهشات بلادي، فالمدهش هو حفظ وصون المال العام ..على كل، ما بالقرص يختلف قليلا عن مجسد مشروع سندس، إذ وحدة تنفيذ المطار لم تؤصل أسماء تلك الروائع كما أصلتها إدارة سندس أسماء روائع مجسمها، إذ يتحفك مجسم سندس بأسماء من شاكلة (جداول يثرب، بيارة أم معبد، الكوثر لمنتجات الألبان،حقول الفردوس..وهكذا)، ولذلك نقترح لوحدة تنفيذ المطار الجديد إضافة أسماء أصيلة على ذاك القرص الإلكتروني، بأن تكون من شاكلة ( مدرج الأبابيل، فندق الغنائم لرجال الأعمال والسلاطين، صالات الحشروالويل وسقر للإستقبال، حمد الله على السلامة للمغادرة..و هكذا)، وبهذا يصبحا - سندس والوحدة - سيان في إقناع الدولة والناس بإنجازهما ( الرسالي الخيالي ) ..!!
** المهم..زيارة الدكتور نافع علي نافع التفقدية لمطار الخرطوم القديم، والتي عكستها صحف البارحة، هي التي ذكرتني وحدة تنفيذ المطار الجديد ومطارها الذي لايزال محض مجسم في قرص إلكتروني منذ عقد ونيف من الزمان..تم تأسيس تلك الوحدة بكل بناياتها وسياراتها وميزانياتها، بقرار رئاسي لتنفيذ المطار الجديد في فترة لاتتجاوز العام 2009..وعندما آن أوان التشغيل، فأجأت الوحدة الحكومة والناس بشجيرات نخيل بائسة ونيم يابسة تتوسط فيافي الصالحة،وكأنها كانت مطالبة فقط بعمل إجراء إحترازي لوقف زحف صحراوي مرتقب بتلك المنطقة ..عفوا لن نبخس جهد الوحدة، حيث مع الشجيرات قدمت للرأي العام إنجازا آخر - في موعد الإفتتاح - وهو ( سور من السلك الشائك)..أي ليس هناك مطار ولاحتى محض مهبط تهبط عليها طيور الرهو في موسم الربيع، ومع ذلك واصلت خزينة المال العام الصرف عليها ثلاث سنوات آخرى، أي إلي يومنا هذا ..ولاتزال الوحدة في محطة ( ح نجيب تمويل من برازيل، ح نجيب قرض من العرب، ح نجيب نجيب سلفية من الصين) ..أي علينا أن ننتظر وحدة اللواء عبد الكريم عبد الله ربع قرن أخر، وكذلك الحكومة لن تمانع الصرف عليها من أموال الناس والبلد،( الحكومة داقة فيها حجر دغش ؟) ..!!
** وعليه ..سؤال لسلاطين دولة حكومتها تضطهد المؤسسية، لماذا وحدة تنفيذ - رغم أنف وجود هيئة طيران مدني - لشييد مطار؟.. إن كانت الحكومة غير راغبة في مؤسساتها الرسمية التي من شاكلة هيئة طيران ووزارة الري ووزارة الإسكان وغيرها، فلماذا لاتصدر قرارا بحلها وقرارا آخر بترفيع وحدة عبد الكريم وصندوق غلام الدين القومي ووحدة أسامة والكاروري، لتحل محل تلك الوزارات والهيئات ؟.. أي، لماذا وإلى متى تهدروا أموال الناس بنهج (دول داخل دولة )..؟..كما حال وحدة المطار وهيئة الطيران، نموذجا.. ثم السؤال المهم ، بما أن مطار الخرطوم الحالي يشهد عمليات تطوير وتحديث حسب شهادة نافع البارحة، لماذا المطار الجديد؟، خاصة أن تمويله - إن تم - سوف يتم بالقروض التي تهلك حاضر البلاد ومستقبلها؟..هل شعب البلد بحاجة إلى مطار دولي تستدين له الحكومة التمويل من البرازيل والصين والصناديق العربية، أم أنه شعب عاصمته بحاجة إلى شبكات مياه وولاياته بحاجة إلى كل الخدمات المنقذة للحياة ومشاريع الإنتاج ؟..لم يعد هناك نفطا يسد القرض وبعض رمق الناس، فلماذا لا تسخر الحكومة هذا القرض وغيره - قرض تشييد القصر الجمهوري الجديد على سبيل المثال أيضا- في مشاريع المياه والكهرباء والزراعة والصناعة ..؟
** بالله عليكم، أية حكومة في الدنيا تشيد قصورها الرئاسية بالقروض، بيد أن ثلث شعبها في معسكرات اللجوء والنزوح؟..ألا تعلموا بأن الفاروق عمر بن الخطاب رضي الله عنه، كان يدير دولة الخلافة الراشدة من تحت شجرة في فلاة، وما ضره أن ينام تحتها، ليشهد له عدوه بالعدل ؟..ثم بالله عليكم،أي المشاريع أجدى لأوضاع البلد السياسية والأمنية و أنفع لأوضاع الناس الإقتصادية والإجتماعية، مطار جديد أم طريق أم درمان بارا الذي صار مصيره يبكي نواب كردفان بالبرلمان دما ودموعا ؟.. وأيهما أولى بالقروض، سياسيا وإقتصاديا وأمنيا وإجتماعيا، في هذه المرحلة التي تبشرون فيها الشعب بالكسرة والعصيدة والمزيد من الرهق، تشييد مطار جديد أم إكمال تشييد طريق الإنقاذ الغربي ؟..إلى متى تديرون حياة الناس والبلد بعقول المماليك والأباطرة، بحيث أن الشعب يحلم بحياة تحفظ نوعه من الإنقراض، بيد ان ملوكهم يبددون الموارد و القروض في (الشوفونية والخزعبلات السياسية) .؟..هكذا الأسئلة، إجاباتها - الرسمية - يجب أن تؤدي إلى عدم تجاهل مؤسسية الدولة وضروريات الناس في الجمهورية الثانية المرتقبة.. وتلك الجمهورية لن تكون الأخيرة إذا تواصل هذا (النهج الغريب)...!!
...................
نقلا عن السوداني


تعليقات 26 | إهداء 4 | زيارات 5080

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#152418 [mohammed]
0.00/5 (0 صوت)

06-01-2011 05:20 AM
ياجماعة سلام عليكم .
أول حاجة ياجماعة أختلاف الراي لايفسد للود قضية ودا من خلال كل البرامج التلفزيونية بنشاهدو عشان كدا بصراحة المساحة دي لكل زول يدلي بي رايو البعجبو مرحب والمابعجبو مرحبتين عشان الناس تصل لي نتيجة والاخوان في البيت ماواحد والاصابع في اليد ماواحد عشان كدا ادعوكم ان نسمع بعض ودي مشكلتنا كل واحد يقول رايو ولا فهمو الناس تشب لي في راسو .
تعليق الموضوع :
في رأي الاهم البنية التحتية الماء والكهرباء والطرق والبلد داخلة علي مرحلة صعبة , وأقترح علي الحكومة تسليم المطار والخطوط الجوية السودانية الي شركات المانية تطورها وتأخذ حقها انشاء الله بعد عشرة سنة وترجعا لينا بشروط ودا الحاصل في العالم . ودمتم


#152188 [سوداني حر]
0.00/5 (0 صوت)

05-31-2011 06:05 PM
احمد عثمان دا بتاع الماجستير بتاع انو مهندس في الشرقيه وما باقي الا يكتب سيرتو الزاتيه الكلها حبر علي ورق زي حكومتو ولا واحد تاني...

الناس ما قصرو وردو عليك لو فيك رأس بتفهم انو كلامك البتقول فيهو دا كلام زول ما عندو راس ولو ما فيك راس ما ح تفهم ليوم الدين عارف ليه لانو ما عندك راس...

بعدين مشكلة السودان شايف كيف السودان كلو انو الحكومة لمت شرزمة من الزيك ديل الما عندهم راس وطبعا زول بدون راس يعني زول بدون زمة وبدون ضمير ياخي بدون اي شيء عارف ليه لانو زيك بدون راس...

بالمناسبة انت لو رجعت السودان واشتغلت مع البدافع عنهم ديل اي اقصد اشباهك البدون راس ح تبدع معاهم وح تدهشنا ونقرا اسمك في الاخبار بدل التعليقات... وبدل ما تعلق انت ونرد عليك مغصة نعلق عليك وتكون في الخبر الرئيسي لدولة البدون ريسين ...

ياااا هندسة يااا ماجستير انت يااا ود الشرقيه ...والشرقيه اللمت الزيك ديل نحنا ح نفكر نغادرا من اليوم..


#152122 [الباع جملو]
0.00/5 (0 صوت)

05-31-2011 04:21 PM
أحمد الطاهر
أنت أظنك ما صاحي ولا عارف كوعك من بوعك
مطار شنو الداير تتشوفن بيهو
الناس تكد في لقمة العيش وما لاقياها بسبب الخونة تجار الدين.
وبعدين قال مطار ( دولي ) والناس بعد ما ينزلوا يمشوا وييين !!!!!!!!
ماك عارف أقول ليك
بعدين ما فاضي هسع
أو النقوليك ما ني خسران شئ
بيمشوا السكن العشوائي حول العاصمة مالو مو سكن
ما كان في ظني في واحد غبي لسع مثلك فيه روح ويسوح في بلاد الله
البلد أكان سمحة يا معولق أنت الشردك منها شنو ما كان تقعد تلهف مع الكيزان
أو أقولك أحسن تتشرد كدى فالبلد ما فضل فيها حتى الشعب الفضل
الناس تكتب وتتعب عشان نوعك دا يفهم ويعرف الحاصل في البلد وأنت جايب كلام الطير في الباقير
بالله أحسبهاهداك الله معقول كل الناس ديل خطأ وأنت الصح .


#151872 [ود بلد]
0.00/5 (0 صوت)

05-31-2011 10:33 AM
دايما كلامك كلام عقل يالطاهر في زمن اللامعقول العايشنو ده


#151752 [بنانكو]
0.00/5 (0 صوت)

05-31-2011 12:00 AM
يا احمد عثمان طاهر ...انت شكلك ما عندك طايوق ....او انت دبوس مدسوس و...كمان ...ثوب الى رشدك وحكم عقلك وبعدين اكتب


#151721 [أبو محمد]
0.00/5 (0 صوت)

05-30-2011 10:34 PM
دعت الحاجة للمطار الجديد المتوقع من التطور فى الإنتاج وفى عدد المسافرين المستقبلى وفق الخطة الربع قرنية. والناظر لهذه الخطة لا يرى لها حساً ولا خبراً بل هي مجموعة من الأمانى التى تم وضعها وتخيلها على عجل وبدون تحليل دقيق للواقع، وعيبها الأكبر أنها قامت على تخيل موارد يشكل البترول فيها نسبة كبيرة ونسوا جميعاً، هؤلاء الإستراتيجيون، أن البترول سينتقل قبل إنقضاء ربع مدة هذه الخطة إلى دولة أخرى. ولا ادرى ماذا سيفعل دهاقنة التخطيط الإستراتيجى بعد التاسع من يونيو لخططهم هذه؟ وهل من المعقول أن يبدأ الناس فى تنفيذ مشروع يكلف مليارات الدولارات من دون توفير اللازم من الميزانية، وهل هو مشروع مطار أم زير سقيا لعابرى السبيل؟ وكالعادة نعهد بمشاريع كبيرة وتحتاج لقدرات عالية من العلم والمعرفة والخبرة فى إدارة المشروعات، نعهد بها إلى أشخاص بقدرات بائسة وخبرات ضعيفة وتفتقر لأبسط قواعد العلم فى هذه المجالات ثم نتوقع أن تنجح مشروعاتنا وخططنا. أليس فى ذلك خطل وسفه؟ إن قانون الطبيعة الذى يسرى على كل شيئ أن المرء والجماعات والدول تحصد ما تزرع، فنحن نحصد الفشل دائماً لأننا نزرع البذور التالفة فى الأرض المالحة. إن اولوياتنا كثيرة ولكننا نعمي بدرجة عالية عن ترتيبها وفق الأهمية والأفضلية، وغالباً ما تجرفنا العاطفة أو تغلبنا مراكز القوى ومؤثرات جماعات الضغط والمصالح والجهوية فى إختيار مشروعات التنمية، ولعمرى أن ذلك من سوء الإدارة العظيم.


#151706 [عصمتووف ]
0.00/5 (0 صوت)

05-30-2011 09:53 PM

يا جماااااااااااااااااااعة المدعو اجمد ده فاعد يعمل شنو ما يكون بين اخوانه مجدع في السعوديه
اكيد شغال مربي مواشي وعائش وسطهم رائحته صنانه صنانة الغنم وهي شبه وما شابه مهنته ما ظلم


#151628 [أحمد عثمان طاهر]
0.00/5 (0 صوت)

05-30-2011 06:16 PM
يا شباب في داعي هسع للشخصنة والاهانات؟ يعني الواحد اصلا يوم كده ما يقول رائو بصراحة من غير يتهان؟

كلامي كان واضح وهو اني البلد بخير والحكومة عندها خطط وافكار دايرة تطبيق ودايرة رجال ونساء يقيفوا وراها ويدعموها بالمال والفكر والدم لو لزم الامر.

ستسير المسيرة عشرات السنين القادمة كماسارت عشرات السنين السابقة بكم او بدونكم.. وكما قال فخامة الرئيس: الدائرنا اليطلع لينا في الشارع مش يقعد وراء شاشة كمبيوتر من امريكا واسرائيل ويقعد يهوسك وينظر بدون فهم.

الله يوفق السودان وكل البيحبو السودان.


ردود على أحمد عثمان طاهر
Kenya [Muslim.Ana] 05-30-2011 07:17 PM
انت بتنتقد الشخصنة والاهانات وجايي تهينا كلنا بترديد كلام فخامة رئيسك الاهوج يا اهوج.
والله يا احمد الطاهر نفاق الكيزان النتن ده حقو تبطله. وانته وفخامة رئيسك ابقو رجال وخلو كلاب الامن وال .... المحتمين بيهم ديل وبعد داك والله بنعرف الراجل منو يا كوز يا ......

وبالمناسبة انت المطار المواسيره ما فيها موية ده كان في العهد الاموي. ما كان تصلحوهو خلال مسيرة عشرات السنين البتتبجح بيها دي يا كوز يا .... (مسيرة عشرات السنين من لهط اموال البترول واكل اموال الناس بالباطل).
ياخي عليك الله اتلمه وما تطلعنا من طورنا ساكت، وعبر عن رايك بي ادب وموضوعية دون ترديد الكلام الاخرق البقولو اسيادك ده. ودون اهانة كاتب المقال. ولو راسك فاضي وما فيهو حاجة فاقراء وحاول تتعلم وتفهم وبعد داك علق بي ادب وان شاء الله نرد عليك بي ادب.
وان عدتم عدنا


#151598 [wadelsheikh]
0.00/5 (0 صوت)

05-30-2011 05:07 PM
انتو سعادة اللوا دا شاور الشيخ علي بقنه الشهراني ::::::::::: يمكن عندو رأي في التصميم ماتستعجلو سكت ادوهو سنتين تلاته تاني وخلونا في الاودتين وبرنده ديل زي ماقالوا


#151547 [fki]
0.00/5 (0 صوت)

05-30-2011 03:51 PM
مطار شنو يا اخوانا ؟ هى سودانير ذاتها وين راحت ؟ بعدين القروض دي فى الغالب بفائدة ربوية ودي اللى حيلحقنا بالساحق والماحق . انا ما ضد المطار الجديد , ولكن يجب مراعاة الاولويات . توفير الطعام للجياع والارامل واليتلمى وتوفير المأوي للمشردين والصحة والتعليم للشعب الفضل وبعداك ان شاء الله تعمل الحكومة مطار فى كل قرية


#151512 [wwww]
0.00/5 (0 صوت)

05-30-2011 02:47 PM
استطاع اللواء بمساعدة الرئيس ارجاع مبلغ 600 مليون دولار جزءمن تمويل المطار من اسامة عبدالله اللذى كان قد انتزعه منه بحكم ان المطار ليس باولوية وكان قد حوله الى سد عطبرة. وايضاً بنكالصادرات والواردات الصينى بتسليم تمويل المطار كاملاً مبلغ قدره1.5 مليار دولار واصبحالان فى يد اللواء مبلغ 2مليار و60 مليون دولار التقديرات للمطار 2 مليار دولار يعنى البلغ يكفى ويذيد بمقدار 60 مليون دولار.
سجلوا هذا الان حتى لايخرجوا كالعادة بعجز يساوى مبالغ التنفيذ


#151485 [somer]
0.00/5 (0 صوت)

05-30-2011 02:03 PM
أجي تخجل يا أحمد عثمان شديتك في الله هسع الناس عايزه مطار ولا دواء للملاريا.
والناس عايزه مطار ولا شبكة مجاري تغطي عورتك من الأجانب. وشديتك في الله الناس عايزه مطار ولا موية يشربوها. وشديتك في الله الناس عايزه مطار جديد ولا كراسات لأولاد المدارس وشديتك في الله مطار ولا حمار لأحمد الماقادر يأكل ليه وجبتين في اليوم. وشديتك في الله مطار ولا عشة صغيرة لخادم الله المرمية في الخلا والهجير وتشرب في موية الترع وشديتك في الله يا الما بتخجل


#151451 [musa]
0.00/5 (0 صوت)

05-30-2011 01:18 PM
ذي احمد دا البفقش المراره


#151418 [abuali]
0.00/5 (0 صوت)

05-30-2011 12:27 PM
صباح الخير - ياجماعه العندو فكة يرجع للأخ أحمد عثمان طاهر ريالين علشان ينزل من الحافلة أصلوا راكب الخط الغلط والسائق ماعندوا فكة.
اما بالنسبة للكاتب الطاهر ساتي فنحن نشد على يدك ونثني على شجاعتك ومقالك ونقول لك ربنا يوفقك وسير سير والى الامام الى الامام حتى نقدم لهم النصيحه ونقيم عليهم الحجة امام الخالق الذي ينصر المخلوق المظلوم - مقالاتك رائعه وموضوعية


#151408 [امين الشريف]
0.00/5 (0 صوت)

05-30-2011 12:11 PM
الى مدير الراكوبة نرجو توفير فهامه لعضو الراكوبة المحترم(احمد عثمان طاهر) حتى لا تنفقع مرارتنا وهي اصلا مفقوعة ...


#151401 [المعلم]
0.00/5 (0 صوت)

05-30-2011 11:55 AM
احمد عثمان .. الفهم قسم الظاهر عليك من كوكب عطارد .. ركز شوية وخليك جادى
وبطل العبط ...


#151347 [القهراااااااااااان]
0.00/5 (0 صوت)

05-30-2011 10:55 AM
كلااااااااااااااااااامك سمح لكن البسمعك منو


#151318 [عمممك]
0.00/5 (0 صوت)

05-30-2011 10:19 AM
والله يا أحمد عثمان انت العجيب !!! هسه الزول دا قال ما داير مطار ؟؟؟ بسأل عشرة سنة والمطار وين ؟؟ و.. و... .. ها ناس افهمو أول وتاني علقو ... تحياتي


#151315 [Almahadi]
0.00/5 (0 صوت)

05-30-2011 10:15 AM
وانت البلد القاعد فيها دي علمتك شنو غير الفلسفه الفاضيه. كلام زي الناس مابقيتو تعرفو تتكلمو. ولا هناك كنت بتقدر تجدع ولكن ممكن تشيل حجاره. من التخلف. الكفلا يمهزلو بيكم وأنتو هات ياضحك. يعني بالله عليك الزول الجاي من برا وانبهر بالمطار الجديد وخشى البلد لقى ماسوره مكسوره في شارع ومغرقه الواطه وحل ووسخ. ومشى خطوتين لقى الشوارع هردبيس. وخشا البيت شغل مكيف الغاز الفيوز ضربت. فعلا اصبحنا واصبح الملك لله. وشكرا للتنبيه


#151313 [الزول الكان سمح]
0.00/5 (0 صوت)

05-30-2011 10:14 AM

يا أحمد عثمان طاهر

إن شاء الله الحجارة التفلقك...الراجل بقول ليك الموضوع داخل على السنة الخامسة وما ختوا فيهو طوبة وصرفوا فيه ماصرفوا من أموال ودايرين ( يجيبوا ) أى أنهم ماجابوا تمويل من البرازيل وسلفية من الصين وقرض من العرب.

وإستنوا يا عالم وجهزوا طياراتكم إلى يوم يبعثون.


#151309 [ثورة حتى دحر الطغاة]
0.00/5 (0 صوت)

05-30-2011 10:08 AM
;) عزيزي الطاهر ساتي .... نسأل الله ان يثبتك على الحق رغم كل المحن والاحن.;)

أخي لقد اوصلتنا حكومة المؤتمر اللا وطني الرسالية التي تحكم (بغير) شرع الله مراحل بعيدة من الفقر و العوز والمرض والجهل والتخلف والفشل والفساد والهزيمة على كافة اوجه الحياة من سياسة وتعليم وصحة .... إلخ

أخي لقد فقدنا الامل في ان تثوب هذه الشرزمة الظالمة الفاسدة الخائنة لله ورسوله والمؤمنين إلى رشدها وترعوي

أخي لقد مللنا الحال وسئمنا الانتظار فهل الى مخرج من سبيل!!!؟؟


#151308 [زوول]
0.00/5 (0 صوت)

05-30-2011 10:08 AM
ينصر دين يالطاهر
اما اخونا المعلق الوحيد حتى الان ... ياخ الناس ما لاقيه تاكل تفتيش في المطارات بالدين
عريان ولا بس سديري
وود اب زهانه يكال في اللكونده وينوم في المطعم


#151306 [ثورة حتى دحر الطغاة]
0.00/5 (0 صوت)

05-30-2011 10:04 AM
;) عزيزي الطاهر ساتي .... نسأل الله ان يثبتك على الحق رغم كل المحن والاحن.;)

أخي لقد اوصلتنا حكومة المؤتمر اللا وطني الرسالية التي تحكم (بغير) شرع الله مراحل بعيدة من الفقر و العوز والمرض والجهل والتخلف والفشل والفساد والهزيمة على كافة اوجه الحياة من سياسة وتعليم وصحة .... إلخ

أخي لقد فقدنا الامل في ان تثوب هذه الشرزمة الظالمة الفاسدة الخائنة لله ورسوله والمؤمنين إلى رشدها وترعوي

أخي لقد مللنا الحال وسئمنا الانتظار فهل الى مخرج من سبيل!!!؟؟


#151299 [أحمد عثمان طاهر]
0.00/5 (0 صوت)

05-30-2011 09:50 AM
إستغفر الله وأصبحنا واصبح الملك لله.

والله الناس الزيك ديل هم المودين البلد دي في ستين داهية. هسع عليك الله عاجبك مطارك الحالي التعبان المافيهو موية في حنفيات حماماتو ده؟؟

لو ما داير تشتغل في تطوير البلد فأسكت وخلي الناس تشتغل, الحكومة عاوزة تعمل ليك ولغيرك مطار يرفع مقامك بين شعوب الدنيا وأنت بتتكلم كلام خارج الشبكة

عالم عجيبة لا تجدع ولا بتجيب الحجارة.


ردود على أحمد عثمان طاهر
Kenya [Muslim.Ana] 05-30-2011 06:31 PM
يا أحمد كونو الزول يكون ما عارف فا دي مشكلة. اما المصيبة انو الزول يكون ما عارف ولسانو طويل.
ياخي اقرا المقال ده عشرين مره احتمال تفهم ولو غلبك تفهمو بعد عشرين مرة فخلاصة المقال انو وحدة تنفيذ المطار دي تضييع لاموال الشعب و انو الطيران المدني ممكن يقوم بالمهمة، وانو ما في داعي نصرف من خزينة الدولة على الوحدة بالذات لما تقعد عشرة سنين وما تعمل حاجة لما اللدولة ترجع تصرف على المطار القديم تاني، و انو في حاجة اسمها طيران مدني ممكن يتابع الموضوع وفيهو مهندسين مرتباتهم مدفوعة. وفي النهاية المقال بقول انو المصيبة انو الحكومة (و الذيك ديل) مركزين على الامور (الشوفونية) وقصة شوفوني عندي مطار جديد وقصر شديد. ويا احمد البسترك وبستر البلد انو نحل مشكلة دارفور والنازحين ونعالج مشاكلنا الاقتصادية معالجات فعالة. وحتى لو الناس خشت بالمطار الجديد (المواسيره شغالة) فبرضه الناس دي حتشوف في الاخبار فظائع دارفور وحقيقة اقتصادك الفقاعي وساعتها صدقني مطارك الجديد الفرحان بيهو انته وحكومتك (الدايره ترفع راسنا) لا برفع راسك ولا راسنا.
والله المستعان

United States [Hamid Al Waham] 05-30-2011 12:21 PM
و الناس الزيك ديل عملو شنو؟

United States [Hamid Al Waham] 05-30-2011 11:21 AM
و الناس الزيك ديل عملو شنو؟

Saudi Arabia [صبر الدين حسن ] 05-30-2011 10:30 AM
انت يا احمد عثمان الطاهر امثالك المودرين البلد وليس مثل هذا الكاتب الذي سخر نفسه في خدمة الوطن ،،، هل أنت تفهم أم تدعي الفهم ؟؟ هل أنت عائش في السودان ؟ أما تغرد خارج السرب ؟ ماذا تعرف عن المطار الجديد ؟ وهل سمعت عنه ؟ ومتى كان هذا المطار مفترض أن يتم إفتتاحه ؟ ياراجل خليك نايم في عسلك دا أنت بس ، ما عارف حال البلد أنت ، وفقط همك تجي بمطار جميل ونظيف ، يعني مصلحتك بس بتشوف ، ماعارف حال البلد من الداخل أنت الله يهديك ،،، خليك راقد تحت مكيفاتك دي بس أنت ..!!


الطاهر ساتي
الطاهر ساتي

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة