أولاد .. إسرائيل..!ا
06-03-2011 08:58 PM

حديث المدينة

أولاد .. إسرائيل..!!

عثمان ميرغني

والي الخرطوم .. د. عبد الرحمن الخضر.. أعاد تأكيدات نائب رئيس الجمهورية بأن (لا) رسوم دراسية في التعليم العام (طبعاً الحكومي).. ومع ذلك انتظروا معي بداية العام الدراسي.. وتنهال شكاوى المواطنين من أنهم يدفعون عن يد وهم صاغرون.. الجزية التي تحددها إما ادارة المدرسة .. أو مجلس الآباء.. أو حتى مجلس الأمهات. حسناً .. أدرك تماماً أن القصة مملة.. كل عام الحكومة تنهى وتأمر وتهدد المدارس.. وكل عام المدارس (مثل كتائب القذافي) تدحر تهديدات الحكومة.. و لا يجدي الأنين .. لهذا لا أريد أن أبكى مع الآباء قبل بداية العام الدراسي لكني أريد أن أحاكم (المنطق) الرسمي. مدارس الحكومة (شينة) .. وفقيرة.. و بائسة ومزدحمة.. وأصلاً لا يقربها إلا مضطر.. تلميذاً كان أو معلماً.. ألا يستحق من يخلي مقعده – بكامل طوعه- ويتحمل تكاليف الرسوم الدراسة في مدرسة خاصة. ألا يستحق التكريم. لأنه (وفر) على الحكومة .. وعلى مدارسها مقعداً يستفيد منه غيره.. بالضرورة كل التلاميذ الذين يتركون مدارس الحكومة ويذهبون إلى المدارس الخاصة.. هم أفاضل تبرعوا بمقاعدهم لغيرهم من المحتاجين لها.. وبالضرورة تصبح المدارس الخاصة ذاتها استثمارات لمواطنين كرام يساعدون الدولة في سحب أكبر عدد من التلاميذ من المدارس الحكومية حتى لا يرهقوا الدولة بتكاليف تعليمهم. وبهذا الفهم.. فالواجب أن تعتبر الحكومة كل صاحب مدرسة خاصة.. مواطناً يستحق التكريم. وكل ولي أمر تلميذ في المدارس الخاصة .. هو مواطن صالح قرر أن يحمل على عاتقه تكليف تعليم أبنائه نيابة عن الحكومة.. ولكن ..!!! وما أفجع لواكن هذا الوطن..!! الواقع عكس ذلك تماماً.. الحكومة تنظر للمدارس الخاصة نظرة العرب لليهود.. تعتبرهم بغاة جباة يأكلون التراث أكلاً لماً.. فتحاربهم حرب الرئيس (علي صالح) لأهل اليمن .. تفرض عليهم رسوماً على كل (رأس).. و علاوة على الجبايات الأخرى.. تلزمهم بدفع رسوم الامتحان بقيمة أعلى مما يدفعه زملاؤهم في المدارس الحكومية.. بعبارة أخرى الحكومة تعاقب الأسرة التي تقرر بمحض إرادتها توفير مقعد مدرسي.. وليت الأمر يقف عند هذا الحد. تضع الحكومة عراقيل كبيرة لمنع تحويل التلاميذ من مدارس الحكومة إلى المدارس الخاصة. بل ولتأكيد (فهم الحكومة) سمعت بعض كبار المسؤولين في التعليم يقولون: إن المدارس الخاصة تحاول اختطاف التلاميذ النوابغ من المدارس الحكومية... وأنها أحياناً تغريهم لينتقلوا إليها.. من باب الصيت والدعاية للمدرسة الخاصة عندما تنجح في تلميع (النتيجة) بالمتفوقين من تلاميذها.. و للتمتع بالدهشة (أمتع نفسي بالدهشة ) على قول الشاعر عمر الدوش.. هب أن مدرسة خاصة اجتذبت تلميذاً متفوقاً من مدرسة حكومية.. إلى أين سيذهب هذا التلميد.. إلى محلية (تل أبيب) يدخل جامعة أورشليم.. ويتخرج ليعمل في الجيش الإسرائيلي؟؟ كل تلميذ يخلي مقعده في المدرسة الحكومية.. يمنح المدرسة فرصة التركيز على عدد أقل فترفع (المستوى العام) للتعليم.. إلا إذا كانت الحكومة نفسها (دخلت السوق) وتفترض إدارات المدارس الحكومية أنها أيضاً تنافس في تلميع مدارسهم .. وهنا تصبح المصيبة.. كارثة ولا أفجع..

التيار


تعليقات 30 | إهداء 0 | زيارات 4211

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#155107 [اخو البنات]
0.00/5 (0 صوت)

06-05-2011 05:36 PM
يااخونا عثمان ياخى بالله عليك تكلم ود الخدر الذى لايظلم عنده احد بان يرجع للزول الماانتحر كشكو واولادو الطشو رجعو ......ياخى خليك شجاع وافتينا فى حكاية زول الكشك دى


#154585 [عيد الواحد المستغرب جدا!!]
0.00/5 (0 صوت)

06-04-2011 09:12 PM
يا اخوانا دعاية (الميشلان)ده ما جننتوه جن !! والراجل كده وووب وكده ويببين !! وكان لاحظتوا مقالاتوا الاخيره جرى فيها تحسن واضح ويبدو انه آمن بأن الشعب له قضية وقرر الانضمام لثورة الشباب وكما يقال اول الغيث قطرة !! وعلينا مراقبته جيدا وإذا انحرف عن جادة الطريق الله قال بى قولوا وهذه سانحة لنلفت عناية بعض الصحفيين الذين ما زالوا يداهنون النظام عليهم الاسراع والانضمام لثورة الشباب بعد الاغتسال من نجاستة وفورا دون اى تردد والله اكبر ولا نامت اعين الجبناء والمنافقين -


#154556 [د.بشير]
0.00/5 (0 صوت)

06-04-2011 07:56 PM
يا الزول الكان سمح ........والله بنقرا عمود عثمان ميرغني وعلي مضض عشان نقرا تعليقاتك تحتو...وطبعا هو من جاه الملوك يلوك...ويومك التقيف من التعليق الضحك شرطو...الا ياجر ليهو ناس يقروا ليهو عمودو العصا قايمة وعصا نايمة ده.....


#154482 [wedhamid]
0.00/5 (0 صوت)

06-04-2011 05:24 PM
الاخ ابو صالح ...

تحية التضامن للاشياء السامية

أضم صوتى معك و اهيب بالاخوة و على رأسهم المغبون بالحيل الزول الكان ( و مازال )سمح و ابو امين و ساليمان قش و مندى و كل من ساهم ولا يزال بكتاباتهم الرائعة ازالة الغبن الحاصل للناس و مع كل دا استصحبوا مأساة الزول الكان عايز ينتحر وناشدوا الصحفى صاحب الوالى..... الما بنظلم عندو احد ....علشان يرجع للزول الما انتحر...... كشكو........ و الولادو..... الطشو .

و سنظل نكتب مناشداتنا دى الى ان يثبت لنا ان ما اوردهو السر احمد ادناه صحيح و ان الزول الما انتحر صحى رجعو ليهو كشكو و اولادو الطشو

و التحية لناس الراكوبة الحلوين و كتر خيرم ....................


#154477 [مندى]
0.00/5 (0 صوت)

06-04-2011 05:19 PM
شعار الرابطة( يا عثمان ميرغني صاحبك الوالي الذي لا يظلم عنده رجع الكشك للزول الكان داير ينتحر ولسة ما انتحر واولادو الطشو رجعوا ولا لسة)
معليش يا جماعة الشعار طويل شوية عشان كده بكرة في تسميع لكل الاعضاء اى زول يحاول يحفظو بباقي اليوم ده...
كسرة_ بما انو انا عينت نفسي الامين المالي فارجو من جميع الاعضاء ارسال مساهماتهم علي رقم الحساب 000000000000 والاعضاء الما حيدفعوا ما حارجع ليهم الكشك وحاخليهم دايرين ينتحروا ولسة ما انتحروا واولادهم الطشو ما حيرجعوا تاني لذلك نرجو من الجميع سداد التزاماتهم في اسرع وقت


#154470 [مندى]
0.00/5 (0 صوت)

06-04-2011 05:05 PM
ارشح الزول الكان سمح رئيسا لرابطة صاحب الكشك الاولادو طشوا وما رجعوا كما اعلن انضمامي للرابطة..... بس عليكم الله تمسكوني الامين المالي للرابطة


#154357 [السر احمد]
0.00/5 (0 صوت)

06-04-2011 02:17 PM
ياالزول الكان سمح قطعتو قلب عثمان ميرغنى بحكاية الزول الداير ينتحر والكشك بعدين عثمان ميرغنى ماقال ليكم الان الزول شافو ليهو استثمار بتاع كشك فراخ وهسع شغال تمام(غيتو انا قريت الكلام ده فى صحيفة التيار قبل اسبوع كده) بعدين ياجماعة الخير عثمان ميرغنى قصدو كان يساعد الراجل ماتحكوه كده ,لكن كده كويس ده درس ليو عشان تانى مايكسر تلج لاى مسؤل


#154321 [nasreldeen ]
0.00/5 (0 صوت)

06-04-2011 01:22 PM
يا أخوان عثمان ميرغنى ده ( أقصد صديق الوالى وذالخضر المابنظلم عنده أحد المارجّع للزول كشكو ولا أولادو الطشو للتو والحين ) بذكرنى ( مايكل كول ) مذيع المصارعة الحرة
أما ان سألتو عن كيف فدى ما عندها غير انكم تتفرجوا على مايكل كول وبعد داك تعقدوا المقارنة


#154318 [mohamed]
0.00/5 (0 صوت)

06-04-2011 01:16 PM
سيدى الفاضل

مؤسس الرابطه



ارجو شاكرا قبول عضويتى فى رابطتكم المناضله

ضد ود الخدر الما رجع للراجل كشكو واولادو الطشو

واتضامن مع طلبكم لقد اضان المدعو عثمان مرغنى

حتى يستسلم ويعترف بان ود الخدر هو الظلم ذات نفسو



ولكم فائق الاحترام
محمد


#154262 [(العوجات)]
0.00/5 (0 صوت)

06-04-2011 11:39 AM
لعلكم لاحظتم معنا انه ورغم ان الموضوع عن التعليم الخاص فقد بأب ...الوالي الذي لا يظلم عنده احد مع انو لم يرجع للراجل الما انتحر كشكو واولادو الطشو .. كما ظل يردد (سلايمان قش) و(الزول الكان سمح)لمن ريقهم نشف ..فما علاقة الوالي بما ذكر ام هو \"التذاكي \"الصحفي للتلميع مدفوع القيمة !!! مانحن حلقنا القنابير ياذكي؟؟


#154247 [الزول الكان سمح]
0.00/5 (0 صوت)

06-04-2011 11:19 AM

الأخوة أعضاء رابطة نصرة صااحب الكشك

نحن نطالب الصحفى عثمان ميرغنى أن يزودنا بمعلومات عن الراجل الما إنتحر أمام مقر صحيفة عثمان ميرغنى ..إسمه.. وعنوانه ..ورقم إتصاله. حتى يتسنى لنا مواصلته والتضامن معه لأجل رفع الظلم الذى لحق به فى قطع رزقه بمصادرة الكشك الذى كان يعتاش منه وأسرته..مما أدى لتشريد أولادو الثلاثة عشر ..

نحن فى إنتظار تضامن كل من يرغب فى تنظيم حملة ( إرجاع الكشك ) من عند الوالى صاحب عثمان ميرغنى الذى لا يظلم عنده أحد.


#154230 [سلايمان قش]
0.00/5 (0 صوت)

06-04-2011 10:54 AM
اخونا ابو صالح صاحب السبق في الرابطة لك الشكر علي الاهتمام وللعلم فقط والله العظيم انا ما بعرف الزول صاحب الكشك ولا حتي اخونا الزول الكان سمح لكن تملق عثمان مرغني وحيرة اسرة الراجل صاحب الكشك وملاحقت الزول الكان سمح هي التي دفعتني للاهتمام بالموضوع .... واقتراح للاخوة الاعضا المشاركة في حل ازمة الراجل صاحب الكشك بعد ان فشل عثمان وصاحبو ودالخضر وياعثمان مرغني بس ساعدينا بعنوان الراجل صاحب الكشك


#154223 [lمحمدزين]
0.00/5 (0 صوت)

06-04-2011 10:39 AM
سلام علي متضامني صاحب الكشك عندي ليكم بشارة في زول اسمه كرم الله عباس كوز برضو زعل من فساد ودالخدر وقال بطردوا من القضارف شايل بقجتوا عشان ورد الاف اطنان الاسمنت بشركة حقتوا بسعر اعلي من سعر دكاكين القطاعي في القضارف وفعلا اخد استراحة محارب جابوهو والي للخرطوم رايكم شنو تدخلوا رم الله معاكم


#154219 [ahmed]
0.00/5 (0 صوت)

06-04-2011 10:27 AM
الاهم من ده كلو......اين الكشك??واين الاولاد?...........


#154210 [saleh abbas]
0.00/5 (0 صوت)

06-04-2011 10:15 AM
يا عثمان ليه نسيت مدارس المعتمدين المسماة النموذجية التي يقبل لها الابناء المتفوقون بعدد ضئيل جدا مثلا ثلاثون طالب لفصل واحد مجانا ثم يقبلون 60او 90 طالب اضافي بمسمى قبول خاص بعض المدارس تقبل الطالب بمبلغ 1750 جنيه سنويا وبعضها يدفع الطالب 3000 جنيه لمرة واحدة هذه المبالغ ليست بسندقبض ارنيك 15 مع ان المدرسة حكومية هذه البالغ لها اسمع دلع (تبرع) كريم مع انه جباية خبيثة يتقاسمها مدير المدرسة اللي هو صديق مدير التعليم بالمحلية !!! وكلها استحداث مصادر رزق للمحاسيب
وحسبنا الله ونعم الوكيل


#154204 [مكتوي]
0.00/5 (0 صوت)

06-04-2011 10:11 AM
وين انت يا ود ميرغني الليله ليك عشره يوم ما شفناك حاسبه ياصابعيني دي وكيف اخبار ود الخدر انشاء الله يكون رجع للزول الحاول ينتحر كشكو واولاده الطشو؟

يعني هسي قلت لي(بالضرورة تصبح المدارس الخاصة ذاتها استثمارات لمواطنين كرام يساعدون الدولة في سحب أكبر عدد من التلاميذ من المدارس الحكومية حتى لا يرهقوا الدولة بتكاليف تعليمهم.)
طيب المواطنين ديل اغلبهم من حكومة السجم دي والقروش البيدفعوها دي كلها من الرشاوي واللقف مافي زول بيقدر يعيش في السودان ده إلا يكون مرتشي ولا حرامي وبعدين انحنا مالنا ومال الدوله انشاء الله تترهق وتكب زيت همنا كله المواطن المسكين والمغلوب على أمره ده والمليارات القاعده تصرفه للوزاء وامثال ود الخضر صاحبك ده كافية جداً انها تعمل ليها مليون مدرسه


#154175 [ابو صالح]
0.00/5 (0 صوت)

06-04-2011 09:14 AM
تأسيس رابطة مناصري صاحب الكشك
ايمانا مني بحق المواطن الذي انتزع منه المسئول صديق الصحفي عثمان ميرغني كشكه و تركه و اسرته بلا مصدر دخل. و لكثرة المطالبات التي بثها معارف المواطن الى الصحفي عثمان ميرغني عبر مداخلاتهم في هذا الموقع المشهور و تجاهل الرد عليهم، فانني اعلن تضامني الكامل و تعاطفي اللامحدود مع المواطن حتى يسترد كشكه او ينال التعويض المناسب ممن ظلمه.

و اود ان اوضح انني لا اعرف صاحب الكشك لانني من الهامش ( ما في زول من اهلي عندو كشك في عموم الخرتوم ولا بيعرفوا كيف يتحصلوا عليه) . كما لا اعرف المسئول الذي انتزع الكشك. ولكني اعرف عثمان ميرغني كجبهجي و كوز متمكن من خلال كتاباته الصحفية . و الكيزان بعضهم لبعض معين كاعوان الشياطين و لديهم حكمة بالغة تقول: اذا افسد اخاكم فلا تهاجموه حتى لا تعينوا عليه الشيطان. وهكذا يترك بعضهم بعضا حتى وان منحوا مديرا ما راتبا ببدلاته يقارب الـ 500 ألف دولار شهريا. 72 مليون جنيه بدل لبس لمدير... طيب الرئيس و نائبه كم يكون بدل لبسهم..... بل منحوا وكيل وزارة 165 مليون جنيه كحافز امتحانات الشهادة السودانية . بينما المواطن العادي الذي لا ينتمي للتنظيم الشيطاني يدفع ضريبة و زكاة على حزمة القش ليستمتع بها اؤلئك و هؤلاء ؟؟؟؟؟

كما اقر بانني لا اعرف اي شخص من الاشخاص المتداخلين او المعلقين او المطالبين برد الكشك لصاحبه الا من خلال تعليقاتهم في هذا الموقع الاوسع انتشارا.
بهذا اعلن البدء في تأسيس رابطة مناصري صاحب الكشك المنزوع و الذي تضررت اسرته .

اهداف الرابطة:
1. مواصلة الضغك لارجاع الكشك المنزوع الى صاحبه، او
2. تعويضه التعويض المناسب ان تعذر نزع الكشك من قريب المسئول صديق الصحفي المشهور عثمان ميرغني

وسائل تحقيق الاهداف بواسطة الاعضاء:
1. مواصلة التعليق ادني مقالات عثمان ميرغني المنشورة على موقع الراكوبة الاكثر انتشارا و قراءا داخل و خارج السودان. وتضمين اي تعليق (مهما كان الموضوع المنشور ) كلمة او اكثر عن الكشك المنزوع و عن صاحب الكشك والاسرة التي عانت بسبب تغول المسئول الكبير صديق الصحفي الكبير عثمان ميرغني.
2. ارسال ايميلات الى الصحفي الباشمهندس عثمان ميرغني حتى يقول الرووووووب.
3. حشد اكبر عدد من القراء المعلقين على كتابات الصحفي الكبيرعثمان ميرغني صديق المسئول الكبير و تحريضهم على الزن حتى يستجيب بالرد و توضيح موقفه و يبريء قلمه و يدلنا على طريقة الاتصال بالمسئول الكبير.

نعترف ان هذه الوسيلة ضعيفة في مواجهة طغيان الكيزان فهم لا يخافون الا من يحمل السلاح و يواجههم فيفاوضونه. ولكن نريد ان نسجل موقفا تاريخيا ستحتفظ به سجلات الانترنت و سيكون متاحا للناس ولو بعد قرن من الزمان ليروا كيف ظلم المسئول الكبير صاحب الكشك و كيف تجاهل الصحفي صديق المسئول الكبير مطالبات اهل و معارف صاحب الكشك. انه التاريخ يكتب ها هنا.
العضوية:
1. مفتوحة لكل من يظن في نفسه او تظن في نفسها خيرا لنصر المظلومين من الكيزان الظالمين.

والله ولي التوفيق.
صدر تحت توقيعي
ابو صالح
مؤسس رابطة مناصري صاحب الكشك الذي تشردت اسرته.
4 يونيو 2011



ردود على ابو صالح
Malaysia [mazin] 06-04-2011 03:35 PM
سجلنى معاك يا ابو صالح بس انا خارج الوطم لكن وعد منى ليك ولى الراجل الصادرو كشكو واولادو الطشو !! انا من اليوم كل يوم حعلق لى عثمان مرغنى تعليق واحد
( عملت شنو مع الراجل الصادرو كشكو واولادو الطشو )


#154151 [سلايمان قش]
0.00/5 (0 صوت)

06-04-2011 07:57 AM
تاني ودالخضر ياعثمان مافي مشكلة نحن اصلو لا حدود لطاقتنا في تحمل قرفكم وبالله عليك ارجع لتعليق ود حامد بخصوص الجمعية العمومية لسوداتل واكتب عنها .وبرضو كلنا منتظرين صاحبك المارجع للزول الماانتحر كشكو واولادو الطشو


#154125 [mazin]
0.00/5 (0 صوت)

06-04-2011 02:31 AM
سؤال هو صاحبك الوالى الذى لايظلم عند حد رجع لى الزول الما انت
حر كشو ولا اولادو الطشو !!! ولا اسة :D :D :D :D :D :D :D :D


#154123 [معمر حسن]
0.00/5 (0 صوت)

06-04-2011 02:16 AM
استهانة واضحة بذاكرة القراء 0 سودت الصفحات كثيرا بسلبيات موسم اعلان النتائج وممارسات المدارس الخاصة لفبركة التفوق 0 وفاخرت بمعالجة مدرسة كنت احد افراد مجلس امنائها لمعالجة ضعف خمسة طلاب ولم يرد رفد الجامعات السودانية وليس الاسرائيلية بهم في كتاباتك 0 ما الجديد اذن حتي تقف اليوم منافحا ؟ يا باشمهنننندس!!! رغم اعتراضنا علي الرسوم المدرسية واسلوب جبايتها المؤسف بجعل المعلم جابيا من تلميذه0 لكن في ظل تقزم نسبة ما يخصص للتعليم من ميزانبة الدولة يصبح الخيار اما توقف القدر الموجود من التعليم او دعم المجتمع للتعليم وتوزعه بين التعليم الحكومي واتحاد المعلمين والخاص كل حسب خياره الذي لم يجبر عليه في وجود االخيارات الاخري لان وجود المال وحده ليس هو الذي يوزع الطلاب في هذه النظم الثلاثة 0فللامر جوانب اجتماعية 0 عليه لا مجال لامتنان احد علي الدولة بما يساهم به في هدفه الشخصي الذي لايجول في خاطره عند اختيار المدارس الخاصة رفد الدولة من قريب او بعيد 0 بل محبة تغوق ابنه وتأمين مستقبله دون ان ننكر ان الدولة هي المستفيد النهائي من تعليم ابنائها


#154119 [sarkozi]
0.00/5 (0 صوت)

06-04-2011 02:11 AM
دا كلام خارم بارم وما يصدر من صحفي بل من منافق الله يكون في عون السودان من واقع مثل هذا الصحفي


#154099 [abuamin]
0.00/5 (0 صوت)

06-04-2011 12:42 AM

الاستاذ عثمان ميرغنى

يعنى انت عاوز تجمّل شنو ؟؟؟؟ وانت عارف دى حاجة مدبرة !!!!! الوالى والنايب و ادارات المدارس و المجالس الوهم كل واحد منهم بيؤدى الدور المرسوم ليهو من فوق !!!!! و انت كمان لاعب دورك لكن للاسف ليس باتقان و لا حصافة !!! و قدر ما تتدارى مكشوف مكشوف ... انت فاكر الناس ما عارفه انو الحكومة لازم تفرض الاتاوات والرسوم عشان تقدر تبقى سخية فى دفع الحوافز المليونية للارزقية !!!
يعنى القروش البدوها لامثال معتصم عبدالرحيم و عثمان حمد الليل سوق الاوراق المالية و امثالك حيجيبوهىا منين ياحدق؟؟؟
و بعدين ليه ما ذكرتنا انو الوالى .....ود الخدر...المابنظلم عندو اى احد......و الما رجع للزول الكان عايز ينتحر......كشكو....و...اولادو ..الطشو.......انو صاحبك عشان كده بتصلح ليهو.....إختشى !!!!!!


#154090 [wedhamid]
0.00/5 (0 صوت)

06-04-2011 12:21 AM

(والي الخرطوم .. د. عبد الرحمن الخضر.. أعاد تأكيدات نائب رئيس الجمهورية بأن (لا) رسوم دراسية في التعليم العام (طبعاً الحكومي).. ومع ذلك انتظروا معي بداية العام الدراسي.. وتنهال شكاوى المواطنين من أنهم يدفعون عن يد وهم صاغرون.. الجزية التي تحددها إما ادارة المدرسة .. أو مجلس الآباء.. أو حتى مجلس الأمهات. حسناً .. )

على الاقل با سيد عثمان تعرف انو صاحبك الوالى ود الخضر ( الزى ما قال الجماعة ما بيظم زول وما رجع للزول الما انتحر كشكو و لا اولادو الطشو) و جماعتك مقسمين الادوار باحكام بيناتهم و ناس ادارة المدارس و مجالس الاباء ديل ما هم زاتهم ناسكم يعنى زى البرلمان و المجالس الشعبية المؤلفنها دى!!! بس عاوزك تؤمن انو دى عصابه ياخينا !!!!!

((وكل ولي أمر تلميذ في المدارس الخاصة .. هو مواطن صالح قرر أن يحمل على عاتقه تكليف تعليم أبنائه نيابة عن الحكومة.. )) المواطن الصالح دا البتقصدو دا ما هو زولك مدير سوق الاوراق المالية و اشباهو.وانت اكيد منهم يا مواطن با صالح هههههههه.......هم ديل بدفعو من صحيح عرق جبينهم و اللا من الحوافز المليارية و الرشاوى المالين بيها جيوبكم يا ترى ؟؟؟؟؟ و مالك اليومين ديل ماسك فى الصهاينة و اللا الدم يحن انت فيك عرق واللا شنو ؟؟؟



#154082 [الزول الكان سمح]
0.00/5 (0 صوت)

06-03-2011 11:57 PM

يا عثمان ميرغنى

ياراجل خضيتنا عليك ..أنا قلت الراجل لاقدر الهه مايكون ( إتلحس )

وأول ماتطل علينا بعد أسبوع تجيب لينا أخبار صاحبك ود الخدر المارجع للراجل الما إنتحر كشكو...وأولادو الطشو

ماهو كل المسؤلين بيعيدوا ويأكدوا منذ عقدين والحال فى حالو..أهلنا الكبار طيب الله ثراهم عندهم مث بقول ( المتعود على أكلك لما يشوفك...يجـــــــــوع )

هكذا خبرنا الإنقاذ فهم يأكلون من لحمنا الحى فى كل مشارع الحياة فى الرسوم والجبايات والعتب والموية والكهرباء والمواد الغذائية وما فضل ليهم غير يدفعونا حتى فى الهواء البنتنفسو.

ياحليل مجانية التعليم.....


#154075 [ابراهيم]
0.00/5 (0 صوت)

06-03-2011 11:41 PM
أكتر صحفى أشتر و فارق زمن فى العالم هو عثمان ميرغنى ....الناس فى شنو والحسانية فى شنو ؟........كمان عامل فيها بتاع مبادرات....زى حكاية الانقلا ب الابيض بتاع صلاح قوش ....وحكاية الوالى الذى لايظلم عنده احد.......وحركات البلبصة الفارغة دى .....وعامل فيها واضح وموضوعى وهو أكثر زول فارغ.....غايتو هو وعادل الباز وضياءالدين بلال خدموا الحكومة فى التضليل الاعلامى أكتر من الزومة والهندى عزالدين....


#154063 [rami]
0.00/5 (0 صوت)

06-03-2011 11:17 PM
سيدى الفاضل دين وديدن الانقاذ هو ان لا تتحمل مسؤلية ولا تقوم بواجبها كحومة لهذا الشعب
وما تقوله عن تدافع ابناءنا الطلاب نحو المدارس الخاصة ليس للوجاهة او التنطع
انهم يذهبون الى المدارس الخاصة لانه لا توجد حكومة اصلا بالمفهوم المتعارف عليه عالميا
بماذا تفسر ان مدارس الحكومة - شيييييييييييييييييييييييييينة وفقيييييييييييييييييييييييييرة وجربااااااااااااااااااااااااااااانة
بماذا تعلل ان مستشفيات الحكومة وسخاااااااااااااااااااااااااانة
وتدخلها نصيح تطلع عيييييييييييييييييييييييييان جدا
سودانير وسودان لاين اجرب شركات نقل فى العالمين بينما الطيران الخاص انسي
كل دى مؤشرات تدل على اننا لا نملك حكومة
تعرف الحكومة تتمنى وتتمنى بشدة لو كل واحد من الشعب شاف ليهو وطن خاص - مش مدرسة خاصة - وطفش من وشها
دى الحكاية والروايه وبلاش نضحك على نفسنا


عثمان ميرغني
 عثمان ميرغني

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة