المقالات
السياسة
ارشيف مقالات سياسية
الحل.. في الحل..!ا
الحل.. في الحل..!ا
06-08-2011 07:42 PM

حديث المدينة

الحل.. في الحل..!

عثمان ميرغني

مؤسستان حكوميتان.. أضحى وجودهما على قيد الحياة مشكلة لـ(المتضررين) منهما.. جهاز تنظيم شؤون السودانين العاملين بالخارج .. وهيئة الحج والعمرة.. وتلاحظ بكل سهول الرابط بينهما.. انتزاع المال من جيوب المواطنين مقابل خدمات وهمية.. سراب بقيعة يحسبه الظمآن ماء.. الأول .. المعروف اختصاراً بـ(جهاز المغتربين).. لا يقدم للمغترب سوى التربص به حين العودة للبلاد.. لانتزاع أكبر ما تيسر من أمواله.. التي تصبح بعد ذلك (غنيمة) لأطقم الجهاز في حلهم وترحالهم.. وكتبت عنه كثيراً منذ سنوات طويلة.. واقترحت حله وتحويله إلى (جهاز شؤون السودانيين (غير) العاملين بالداخل).. وكلمة (غير العاملين) مقصود بها العطالة الذين ينتظرون في صفوف طويلة فرصة عمل (في الداخل).. ولا جدوى. أما الثاني .. فهو هيئة الحج والعمرة.. كيف كان يحج حجاجنا في الماضي قبل هذه الهيئة؟ كم كانوا يغرمون من المال للحكومة.. ضريبة حج أو عمرة.. هل كانوا يحجون تحت إمرة أكثر من ألف (أمير!)..أمراء لا يجدهم الحاج حين الحيرة.. رغم وجود أسمائهم في كشوفات النثريات.. اتصل بي رجل أعمال.. قال إنه حاصل على تأشيرة خروج متعددة. تسمح له في أي وقت السفر خارج السودان وإلى أي مكان يرغبه.. وفي يوم روداته نفسه الأمارة بالسوء عندما سأله موظف الجوازات في مطار الخرطوم عن سبب سفره إلى جدة فرد عليه (لأداء العمرة) .. كانت رد موظف الجوازات تأشيرتك لا تسمح لك بالخروج.. احتار رجل الأعمال وسأل الموظف.. كيف لا تسمح له التأشيرة المتعددة بالخرود.. كانت لا إجابة بكل عفوية .. إذا كانت وجهتك جدة لأي سبب غير العمرة. تستطيع الخروج. أما إذا كنت تنوي العمرة.. (نأسف) لابد من الحصول على تأشيرة خروج ..تسمح لك بالعمرة.. هل يمكن لأحد أن يتصور هذا .. إذا كان ابنك مغترباً في مدينة مكة المكرمة.. وكنت تنوي زيارته.. فانت مخير بين تأشيرتين.. تأشيرة خروج عادية تسمح لك بزيارته على أن تقسم بالله العظيم أنك لن تتجرأ وتذهب إلى المسجد الحرام لأداء العمرة.. أو تأشيرة خروج (حج وعمرة) تسمح لك بدخول المسجد الحرام وأداء العمرة.. أنا موقن أن المصالح (الخاصة) هي وراء الدفاع عن وجود هاتين المؤسستين .. جهاز المغتربين.. وهيئة الحج والعمرة.. ولو جردنا العهدة ونظرنا في قوائم المستفيدين لوجدنا قائمة طويلة.. عريضة.. ليس من بينها (المغتربون) في الحالة الأولى.. و(الحجاج والمعتمرون) في الحالة الثانية.. القاعدة الذهبية . أننا نريد حكومة صغيرة.. لنصبح شعباً كبيراً.. والحكومة الصغيرة هي التي تترك ما للشعب للشعب.. هل يعقل لكي أسافر لأداء العمرة في بلد مجاور.. أن أحتاج إلى الحكومة.. (ذات نفسها) لتساعدني (أو الأجدر تعرقلني) في السفر ..

التيار


تعليقات 21 | إهداء 1 | زيارات 4901

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#157853 [كاسترو عبدالحميد]
0.00/5 (0 صوت)

06-10-2011 08:29 PM
العـيب ليس فى هاتـين المؤسـسـتـين فقط بل فى الرئيس البـشير الذى يعرف مسأؤى هـاتين المـؤسستين ولا يفعل شـيئا . و سوف يـسأله الله يوم القيامة لأنه لم يحـل هاتـين المؤسستين .


#157649 [wedhamid]
0.00/5 (0 صوت)

06-10-2011 11:34 AM


اظن الكثيرين هنا فى الداخل لا يتصورون ان هناك اجهزة للجبايات بـرضو على اخوتنا المغتربين الا فى حاجات بسيطه كده مقابل خدمات مريحه ليهم باعتبارهم مصدر هام لايراد العملة الصعبه للبلاد!!!!!

لكن لا تدرى استاذنا عثمان انك و الله اليوم عملت خدمه ودا شئ جميل سنحسبه لك عدلا و خليتنا اليوم نشوف و نسمع العجائب منهم .....هى الحكومه دى ورا الناس بره جوه ؟؟؟؟ و الله ما حصل تعاملنا لا مع جهاز المغتربين دا و لا مع ناس الحج و العمرة الاوغاد ديل !!! و حمانا الله من شرهم .......

و لكن و الله تعليق الاخوان جعفر الامين و خاصة ابو عماد يفقع المرارة زى ما بقولو !!!!! يعنى الرسوم والجبايات دى هى هـمـبـتـه دولة ساكت ؟؟؟؟؟ من ابن اتى هؤلاء!!!!!!!

صحيح بقولو تشوف مصيبة اخوك تهون عليك مصيبتك !!!!!! بس و عندنا مصيبة كبيرة هنا انو الاستاذ عثمان ما داير يـكـلـم صاحبو الوالى .....ود الخدر..... الما بتظلم عندو زول....و لسع ما رجع للزول .....الما انتحر..... كشكو..... و...... اولادو الطشو............ !!!!!!!!



#157485 [هيثم]
0.00/5 (0 صوت)

06-09-2011 09:14 PM
الخلل موجود فى كل مؤسسات الدولة


#157430 [علي]
0.00/5 (0 صوت)

06-09-2011 06:53 PM
بس ورينا شنو في البلد دي ماشي عديل وماداير تغيير!!!
زراعتنا الطاشه!!
ولا صحتنا الماشه!!
ولاداخليتنا الي الجبايا هاشة!!
والله كهربتنا الجمرته مع الموية خاشة!!
ولادفاعاتنا المبتشوف الطير ولا الباشه!!!
ولاخارجيتنا الي مواطنيه واشة!!
واله الصبر علي حكيومة المباشة!!!
واله عقول الناس البقت طاشة!!!
ان كوركت غرقت امبناين قاشة! !
حته الغترب لحقتو جباية الطفاشة!!!!


#157388 [عبدالواحد المستغرب جدا!!]
0.00/5 (0 صوت)

06-09-2011 05:24 PM
ياشباب كدى صلوا على النبى وخلوا الراجل ده فى حالوا وخلوه يشوف اكل عيشو !!ودى المقالة التانية الانحاز فيها لجانب الجماهير وده قطع شك مؤشر جيد بمقاييس الخبراء الاستراتجيين امثالكم (تحكوا الواحد ) لغاية ما تجيبوا ليه راسو فى محله ،وكده أدوا اخونا دكتور/البونى كمان دفرة لانو هو ايضا من عينة (دعاية الميشلان) وأعتقد الاسم المناسب لاخونا البونى حيكون (البقرة الضاحكة) وخاصة حسب علمنا هو ذو صلة بالبقر، واما بخصوص الموضوع الذى تناوله حبينا الهندسة فلا تعليق لى فقد كفوا واوفوا جميع المناضلين فى موقع الراكوبة ولا أظنى سوف اضيف جديد ،وطرقت الباب فقط لانى شفقت على صاحبنا بتاع ود الخدر الذى لا يظلم عنده احد وحكاية اولادوا الطشوا وقرر ينتحر !!او شىء من هذا القبيل الجابت ليه (الكفوة!!) وخلتوا ذى اللبانه فى خشم المعلقين !!وعشان تانى ما يشوبر ،واطلب من موقع الراكوبة نشر غثاءات المدعو إسحق احمد فضل الله وخاصة لدينا كلام كتير دايرين نقولوا ليه فى اضانوا !! وانا متأكد من ان كتائب الراكوبه سوف يقومون بالواجب واكتر وإعادته لجادة الصواب -


#157381 [جعفر الأمين]
0.00/5 (0 صوت)

06-09-2011 05:10 PM
يا أستاذ عثمان سلام لقد انتهي الامر الذي فيه تستفتيان احمد المصطفى تحدث قبل يومين عن شيكان للتأمين وقلت لة انها ليست شيكان بل هى شكلان وانت اليوم تتحدث عن جهاز شئون العاملين بالخارج لمصلحةالدولة والحج والعمرة ليس بالضم بل بفتح العين والميم
أنت غلطان لانو سموهو جهاز زيوا وزي أيى جهاز الكتروني يعنى زى ال رسيفر
ياخ هذا الجهاز كان يتحصل مننا رسوم قناة فضائية وقسما عظما ما شفتها يوم واحد
ويتحصل دمغة الجريح الذى لاهو مات أراح الناس ولا برأت جراحة وبنود أخرى مضحكة ما أنزل الله بها من سلطان.

يااخي عثمان لاتتحدث عن بقرات الحكومة الحلوبات شيكان وجهاز العاملين بالخازوق وهيئة الحج والعمرة بفتح العين والميم
تحياتى للجميع


#157236 [ابو عماد]
0.00/5 (0 صوت)

06-09-2011 01:25 PM

نسمع بسفر رئيس الجهاز لكل اقطار الدنيا ( بمصروفاته ونثرياته ) لكننا لم نسمع به يزور مدينة سواكن ليقف على ما يلاقيه المغتربون من زل وهوان (واستغلال ) داخل ميناء عثمان دقنة .الذي اصبح هاجسا يؤرق كل قادم او مسافر عبرهذه البوابة
وساستعرض في عجالة جانب واحد من هذه المعاناة والمتعلق بالجبايات رغم تردي الخدمات التي من اجلها تحصل الجبايات :
# قبل الدخول لصالة المسافرين عليك دفع مبلغ (10000 ) عشرة الف جنيه تحت مسمى رسوم صالة مغادرة ( طبعا هي غير رسوم المغادرة التي تتحصلها الشركة الناقلة عند تاكيد الحجز .... وتدر هذه الرسوم ما يقدر بمبلغ خمسة مليون جنيه يوميا اذا حسبنا ان متوسط المسافرين 500 راكب يوميا ..... لا يقابل هذه الرسوم اي خدمات ... فالصالة عبارة عن جملون مسقوف بمادة الاسبستوس المسرطنة والمحظورة دوليا ...... ويبقى الركاب في الانتظار داخل هذه الحظيرة لمدة لا تقل عن ثمانية ساعات في حر وهجير .... والسبب لفترة الاتظار هذه معلوم ( وهو ان تعمل الكافتيريا باقصى طاقتها وتدر ارباحا خيالية لمالكها ...... علما بانه لا توجد ثلاجات مياه او مرافق والتعامل فقط عبر الكافتيريا ..... اما المسجد فهو بحجم الغرفة بفرش مهترئة وبالية .... وجهاز مغتربينا مشغول بالمؤتمرات والسمنارات ويترفع عن هذه الصغائر .....
# بعد الدخول للصالة هناك نافذة ذات صف طويل يدفع خلالها مبلغ عشرة الف ريال اخري ( كانت تسمى رسوم دعم الجمعية الخيرية لضباط الجوازات بميناء عثمان دقنة ) اي والله كانت بهذا الاسم لكن التزمر جعلهم يعيدون التسمية الى (رسوم فحص جواز )
# بعد اجتياز البوابة الاولى ستجد شخصا جالس على طاولة يناديك بطريقة فظة ان حاولت تجاوزه ليطلب منك دفع مبلغ (ثلاثة الف حنيه ) اما الغرض فهو دعم جمعية رعاية المساجين ..... طبعا كله بدون اورنيك 15 ...
# اما صالة القدوم فحدث ولا حرج فهي ايضا مسقفة بنفس المادة المسرطنة ( خارج اختصاص هيئة المواصفات ) رغم المعاناة التي يلاقيها القادم لاخراج امتعته فقد استحدثت الصالة ضريبة جديدة لم تكن موجودة قبل اربع سنوات ...وهي دفع مبلغ (خمسة الف جنيه ) عن كل حقيبة او طرد ( بمعنى لو عندك عشرة طرود عليك دفع مبلغ ( 50000 جنيه ) وللتحايل على هذا الوضع يتم تحصيل الرسوم بايصال مروس باسم الشركة الناقلة (باعبود او السلام ) بالرغم من ان هذه المستودعات حكومية وملحقة بالصالة وكانت فيما مضى مجانية او بالاصح ضمن خدمات الشركة الناقلة ..... وبحساب بسيط (500 راكب ْX متوسط 4 قطع لكل راكب X المبلغ 5000 للقطعة يكون صافي الدخل على اقل تقدير = (عشرة مليون جنيه يوميا ) رغم الفوضى المؤزية والمعاناة ( ووجود جهاز لرعاية المغتربين ) عليك ان تدفع مقابل ماذا( ليس مهما ) انما المهم ان تدفع ...... فالدولة عندنا ملزمة باخذ حقوقها لكنها بكل تاكيد غير ملزمة بواجباتها ..... يقال ان جهاز المغتربين هو الجهة المناط بها رعاية مصالحنا كمغتربين ..... بينما واقع حاله يقول انه جزءا من المشكلة وعبئ اضافي يرهق كاهل المغترب .... فهذا الجهاز مهتم جدا بامر الجبايات والرسوم تماما كاهتمامه بعقد المؤتمرات ورفع التوصيات .. التي لم نسمع يوما الاستجابة لتوصية واحدة منها .....


#157204 [صلاح محجوب]
0.00/5 (0 صوت)

06-09-2011 12:44 PM
لله درك ياعثمان وأخيراً لوحكينا من الآن حتى يوم القيامة لن نستطيع أن نشرح المعاناة من هذا الجهاز يكفي أنه صار دولة داخل دولة.. أرجو المواصلة في الكتابة والمطالبة باسمنا جميعاً ... ويمكن الحصول على تفويض إذا أعلنت لكل المغتربين أن يصوتوا مع أو ضد حل الجهاز وستدهش أنت وناس الجهاز من النتيجة

شكراً استاذنا


#157184 [nasreldeen ]
0.00/5 (0 صوت)

06-09-2011 12:06 PM
هل تعلم أن مجموع الوظائف الدستورية الحالية بالسودان هو 937 وظيفة دستورية نعم تسعمائة وسبعة وثلاثون تزيد ولا تنقص
كم مخصصاتهم وماذا يعملون
هل احسست يوما بتحسن فى معيشة السودانيين منذ مجئ هذه الحكومة أى خلال 22 عاما
خذ ثمن اى سلعة أو خدمة واطلعنا على التحسن الذى طرأ عليها


#157180 [عثمان النضيف]
0.00/5 (0 صوت)

06-09-2011 12:01 PM
يا باشمهندس

أجد نفسي كلما قرأت لك مدفوعا دفعا للتعليق ، لأنك تمس دوما أوجاعا وجروحا ظلت تنزف وما فتئت . أما نحن المغتربين فقد فوضنا أمرنا لله آملين أن نجد حقنا يوما آت لا ريب فيه هو يوم التغابن.
وعموما مقالاتك تشفي ، وإن كانت لا تجدي كما قال إبن الرومي في رثاء ولده ..

لك كل الود وعاطر التحايا


#157057 [ابو مبارك ]
0.00/5 (0 صوت)

06-09-2011 03:48 AM
يا ود ميرغني انت ماك صاحي
ديل يحلوهم كيف ؟!!!!!!!!!!!!!!!!!!!!!!!!!!!!!
ديل ما الدجاجتين اللي ببيضوا الدهب ذاتو

غايتو حسبنا الله ونعم الوكيل


#157015 [شيخ تُلُب]
0.00/5 (0 صوت)

06-09-2011 12:36 AM
شنو يا شيخ شانى حملة على كيزانك .. اقصد اخوانك ديل ؟ فطموك من الشطر ولا اييييييه ؟ كده قول لينا انت حجيت كم مرة من مال الشعب ؟


#157001 [مندى]
0.00/5 (0 صوت)

06-09-2011 12:13 AM
يا باشمهندس والي نهر النيل صادر اكشاك الاهالي في ابوحمد... الرجاء مناشدته لارجاع الاكشاك لاصحابها


#156999 [abuamin]
0.00/5 (0 صوت)

06-09-2011 12:03 AM

يـا عـثـمـان ويـن انت الليله ؟؟؟

ما الليله طبزنا طبزه كبيره تتصور!!!!! واحد جانا لابس اسمك الناطق الخالق (عثمان ميرغنى) لكن بمقاله من جنس الياهو داك !!! ووالله اتبسطنا اكتر لانو قلنا دا زولنا ذاتو صاحب ......الوالى ..ود الخدر .......الما بنظلم عندو احد.....الما رجع للزول الما انتحر .......و .... اولادو....الطشو.......لكن للاسف طلع سيد المقال عثمان آخر .........المقال كان جميل و هادف و مريح ...... و انا و اظن معاى كل الراجين مـنـك .....تـتـوب ...و ...تـسـغـتـفـر.....و...تـوحـد الله وتبقى زول تمام و حقانى و ما بــنـغـصـبـك بـس عاوزنك ما تقول الا الحق و الصاح و تخليك من الـلـولـوة و مـمـارات الـحـيـكـومـه الـخـايـبـه دى .........كويس ؟؟ و كمان تـنـوّرنـا زولك ود الخدر العملو شنو فى المشكله بتاعت الزول الما انتحر و ليه ما عمل حاجه ؟؟ انت مش وعدت الراجل ؟؟؟ و كلمو ما شـغـلـو بـبـتـرول الـجـنـوب و الـقـضـايـا العامه ديـك و يركـز لينا فى مشاكل الولايه دى وبس .....

كويس با ابو عفان ؟؟


#156989 [mazin]
0.00/5 (0 صوت)

06-08-2011 11:42 PM
صحبك ود الخدر المارجع لى الزول الما انتحر كشكو ولا اولادو الطشو اخبارو شنو:D :D :D :D :D :D :D


#156976 [عبد القادر اسماعيل]
0.00/5 (0 صوت)

06-08-2011 11:08 PM
أنا ما عارف .. كلامكم البتكتبو ده مافي زول بيقراهو .. ولاّ الحاصل شنو .. يعني

افتراض إنو رئيس الهيئة أو المؤسسة عمل ما شايف .. الوزير المسؤل ما بقرا ؟ .. و لو

الوزير ما قرا .. ما خايف أمو أو أختو أو ولدو يتعقد من زملاءه أو يقول ليهو يا بابا

الناس كاتبين عنك كذا و كذا .. أو حتي زوجتو ما بتتناقش معاهو في حاجة .. ؟

عرفنا المواطنين البرّه .. كل زول خايف علي أكل عيشو و ساكت .. أها ناس البيت و

الأهل و الأصحاب القراب تعمل معاهم شنو.. ؟ العالم دي مقطوعة من شجرة .. ولاّ نحن

الما أدبنا وليداتنا و أهلنا كويس ... ؟


#156959 [rami]
0.00/5 (0 صوت)

06-08-2011 10:16 PM
حكومة صغيرة وحكومة متوسطة وحكومة كبيرة وكله موجودة فى هذا البلد وفى توقيت واحد هو الان
والملاحظ ان كل واحدة من تلك الحكومات لها نفس القوة والمقدرة اى ان الصلاحيات واحدة
والمصيبة انها احيانا تصدر قرارت متضاربة يكون ضحيتها المواطن
فالرئيس الكبير يقول لا جبايات من غير اورنيك15
الرئيس المتوسط يصدر مراسيم لجبايات جديدة من غير اورنيك15
ووالرئيس المتوسط يدخل حجاز يقول خلاص نفرض جبايات وما نفرض جبايات
الحل فى الحل
لكن ما حل دى ولا دى
الحل فى حل الكبيرة -الحكومة ام قرون
والحل فى حلحلة الكبار من الكراسي اللاصقين فيها من سنة اسكت
وحياة النعمة من كترة القعاد فيها الكراسي عفنت


#156944 [سلايمان قش]
0.00/5 (0 صوت)

06-08-2011 09:31 PM
ياشيخ عثمان الليلة مالك مسخن كده انشاالله خير ...لكن والله كلامك صاح من المفترض يتم الغاء المؤسستين وفعلا حقو نشوف قوائم المستفدين !!!!! وكان لقيت صاحبك ود الخضر الما بنظلم عندو احد الما رجع للزول الما انتحر كشكو واولادو الطشو .... تعملو شنو؟ وبرضو يا عثمان ماوريتنا عنوان صاحب الكشك!!!!!!!


#156943 [amgad]
0.00/5 (0 صوت)

06-08-2011 09:30 PM
;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( اضحك انت في السودان ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;( ;(


#156927 [عصمتووف]
0.00/5 (0 صوت)

06-08-2011 08:55 PM
لالالا لا يا شيخنا ما تكضب نسيت صاحبك و واليك الخدر الما رجع للزول كشكو الكان داير ينتحروا كان سبب اولادو الطشو


#156918 [الزول الكان سمح]
0.00/5 (0 صوت)

06-08-2011 08:23 PM
يا عثمان ميرغنى

فى كل دول العالم الإسلامى توجد وزارة للأوقاف والحج..هكذا يسمونها...وكانت كذلك عندنا..ولاأدرى لماذا سميت هيئة منبثقة منها بهيئة الحج والعمرة...هى وسيلة لتوطين وتمكين مئات بل ألاف المنتسبين لنهجكم الفاسد عشان يلحسوا مع اللاحسين أمثال صاحبك ود الخدر المارجع للراجل الما إنتحر كشكو وأولادو الطشو..وكما هيئة الحج والعمرة هناك ديوان ود الفادنى لتمويل حج الدستوريين وضباط القوات النظامية وكلو من الرسوم الوهمية من الحجاج المساكين..أنا أمى رحمها الله مشت الحج سنة1970 ومعاها 60 جنيه جابت منها هدايا من ضمنها ( ساعة رومر ) للعبد لله

كرار التهامى والمدعو كرمنو أليسو هم ممن بطانتكم الفاسدة ؟؟ رحلات وحفلات وفنادق وسياحة كلو من وراء ضهرنا...طيلة فترة إغترابنا لم نلمس أى قرار إيجابى فى حقنا كمغتربين.

ياعثمان ميرغنى ..نحن الشعب الفضل لا نريد حكومة صغيرة..ولاكبيرة ...نريد أن نحكم بالعمودية والإدارات الأهلية..على الأقل هم سيحترمون مواطنتنا كشعب واحد


عثمان ميرغني
عثمان ميرغني

مساحة اعلانية




الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة