المدافن النموذجية
06-15-2011 12:40 PM

ساخر سبيل

المدافن النموذجية

الفاتح جبرا

حملت أخبار الخرطوم الأسبوع الماضى إعلان الولاية عن عزمها عن

إنشاء خمسين مقبرة جديدة وقد سعدت جداً كمواطن لهكذا تصريح فبعد فشل الحكومة فى توفير أبسط مقومات الحياة للمواطن (كالموية) ها هي تتجه لتوفير أبسط مقومات (ما بعد الحياة) له ! ولكن وبالطبع و(قطع شك) لن يكون ذلك (لله فـ لله) فالولاية مولعة كثيرا بحكاية (الإستثمار وكده) .

من المؤكد أن المقابر الجديدة سوف تشيد طبقاً (للمواصفات العالمية) بواسطة (شركة المدافن النموذجية) إحدى الشركات التابعة للولاية والتى سوف تنشأ خصيصاً لبناء وإدارة المشروع والذى سوف يراعى فيه كل الجوانب التى من شأنها راحة الأموات من إنارة ونظافة وتشجير كما سوف يتم تزويده بأماكن تقوم بتوفير الحنوط والأكفان والشواهد علاوة على وجود (شبكة) معلومات تضم (قاعدة بيانات) مهمتها حفظ وإسترجاع بيانات المتوفين .. (وكلو بي تمنو)

:
بعد أن تم بحمد الله سبحانه وتعالى إفتتاح المدافن النموذجية فى أنحاء متفرقة من العاصمة نود أن ننبه المواطنين الكرام بأنه قد تم إيقاف عمليات الدفن فى جميع المقابر القديمة والبدء فى إستقبال الموتى بالمقابر النموذجية .. (إحتكار وكده) ! ويحتوى الإعلان على وصف تفصيلى لأماكن المقابر النموذجية الخمسين التى تغطى أرجاء وأنحاء كل الولاية كما يحتوى الإعلان أيضاً على ملحوظة تقول : بالمقابر أماكن لتجهيز الموتى غسيل – حنوط – تكفين – دعاء ، وفى آخر الإعلان ملحوظة صغيرة أخرى تقول : للحجز أو الإستفسار الإتصال بالهواتف المبينه أدناه .....

أما إعلانات الراديو والفضائيات فمن شاكلة :

عزيزى المواطن .. عزيزتى المواطنة .. سارع بحجز قبرك من الآن وتسلم شهادة البحث ..

توجد قبور سنقل .. قبور ناصية .. قبور عادية .. قبور سياحية وقبور فاخرة (تشطيب ديلوكس)

ما أن يتوفى لك شخص ما عليك إلا أن تتصل بالرقم الموجود بالإعلان فيأتيك صوت (مسجل) أنثوى ناعم يقول :

- المدافن النموذجية ترحب بكم وأحسن الله عزاءكم
:
-
لحجز مقبره أضغط على الرقم 3- لتجهيز الميت أضغط على الرقم 4- للإثنين معاً أضغط على الرقم 5- للإستفسار والتحدث لموظف الإستقبال أضغط على الرقم 6


لا يمضى وقت طويل على إفتتاح المشروع حتى يسافر وفد من شركة المدافن النموذجية حاملاً معه (كروكى للمدافن) فى جولة خليجية تستهدف حث المغتربين على حجز وشراء المواقع المتميزة (بالعملة الصعبة طبعن) !

لا يلبث أن ينتعش سوق (سماسرة القبور) وتنتشر ظاهرة (شهادات البحث المزورة) وتعم حكاية (بيع) قبر لأكتر من (ميت) !

نسبة لبطء عمليات التقاضى وروح المحاكم (الطويلة) يقترح المواطنون على المسئولين إنشاء (نيابة القبور) والتى مهمتها الفصل فى نزاعات القبور قبل ما الشاكى (يروح فيها) وقبرو يضيع وأهلوا ما يعرفوا يدفنوهو وين؟


كسرة :

بعد أقل من عام يتم إكتشاف فساد مالي فى شركة (المدافن النموذجية) حيث يتم فصل المدير العام ونقله (مترقيا) رئيساً لمجلس إدارة شركة (مستشفيات الولادة النموذجية) !


تعليقات 29 | إهداء 9 | زيارات 6221

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#161108 [وليد دارفور]
1.00/5 (1 صوت)

06-16-2011 11:57 AM
أخي جبرا

المقال يجسد الفساد الذي يستشرى في المجتمع السوداني من الحكومة وما ذكرته من سيناريوهات إجرامية ماهي إلا ما يجري في سوداننا اليوم من فساد أصبح بقدرة قادر لا لون ولا طعم و لا رائحة له من شدته

اللهم أرنا فيهم يوما أسودا كيوم عاد و ثمود


#160964 [SaifAlhag]
1.00/5 (1 صوت)

06-16-2011 09:29 AM
يضير الشاة سلخها بعد ذبحها.....
الكيزان ديل ذبحونا يا جبرا


#160910 [عبد الملك]
1.00/5 (1 صوت)

06-16-2011 02:42 AM
الميت طعباً شانه عند ربه إنتقل من الفانية إلى الباقية ويبقى جهد هذه المجموعات الخيرية لا يخطى على العين المنصفة وفى ذلك راحة للحى الذى يريد أن يتم القبر بسهولة ويسر ومن ثم تسهل زيارة الموتى بترقيم القبور وترتيبها بعكس السابق (دفن الليل) فلا تصرفنا بعض إخفاقات إدارة أمور الحياة من السعى ببعض التدابير والتنظيم لشئون المقابر والدفن (رأينا كيف تهتم بعض الأمم بنقل رفاة الجنود من بعض مستعمراتها السابقة بعد عشرات السنين) . ثم من قال أن هذا العمل يتعارض مع مشاريع التنمية فكلها ثغرات يجب سدها .


#160850 [عمر]
1.00/5 (1 صوت)

06-15-2011 10:27 PM
يا جبرا لا تسخر من الموت وما بعد الموت فانت ميت وكلنا ميتون ومن لم يعظه الموت فلا واعظ له اتق الله واعمل لاخرتك الم تقرأ ويل لكل همزة لمزة - - - -


#160830 [حمدان]
0.00/5 (0 صوت)

06-15-2011 09:22 PM
اعتذر عنك استاذ جبرا لكن واللة افتكرتكها من شطحات عووووضة..
لك العتبي
لكن باين بتستعملو نفس الصنف..
محبتي


#160827 [حمدان]
0.00/5 (0 صوت)

06-15-2011 09:17 PM
استاذ...
علي فكرة انا مغرم جدا بالمدافن والمقابر الاوربية... شي زهوز...شي ورود...
ومرات لمن احب لي واحدة..واحب اهديها زهور بمشي اسرق ليها باقة ورد من المقابر..
حتي مرات في زمن المراهقهة وما عندي مطرح...ما احلي كنبات المقابر وسط الزهور
والورود والموتي...

بس في شمس السودان الحارة.......

الا اذا تم تكييف المطرح...وهنا يمكن ان اقدم خدماتي للوالي الذي لا يظلم عنده احدا....
اقل شئ امكن صاحب الكشك اللي كان عاوز ينتحر يجد له مطرحا..
عوووووضة نحييييك


#160804 [علي]
0.00/5 (0 صوت)

06-15-2011 08:33 PM
واله قصة وطبعا ده بعد الفشل في تحويل حياة المواطن للافضل!! وفي ظل توقعاتهم واستراتيجياتهم في الايام المقبلة وازدياد عدد المتقشفين والمنشفين من الفلس !!فلابد من الاستفاده من كل توجه!! حضاري و طير خداري في جلب المنفعه !! واللبعة!!


#160785 [ابو امين]
0.00/5 (0 صوت)

06-15-2011 07:48 PM
الله يسامحك يا استاذ ما حتوقف اقتراحاتك دى انتا ماعارف الناس ديل بيسرقوا فى حقوقك الفكرية وبنفذوا كل المقترحات دى عاوز توصلنا وين اها بالله شوف لينا كبونات تخفيض العذاب بعد الدفن


#160780 [بلتعة]
0.00/5 (0 صوت)

06-15-2011 07:40 PM
يا جبرا هل هنالك قبور تكافلية لأنو لازم ناس ديوان الزكاة يساهمو وبارك الله في من نفع واستنفع ولا أيه رايك؟
البتاعة دي وارد وين الظاهر قوية ... لك التحية والود


#160736 [واحد]
0.00/5 (0 صوت)

06-15-2011 05:54 PM
القضيه وما فيها ياود جبره انو المقابر القديمه فى مواقع استثماريه .يعنى حيقفلوها


#160725 [نادر مجمد]
0.00/5 (0 صوت)

06-15-2011 05:31 PM
نقله مترقيا لمحل لغف تانى وهكذا دواليك يا ناس الدلاليك


#160704 [wedhamid]
0.00/5 (0 صوت)

06-15-2011 04:53 PM

أخى الفاتح ................حيّاك الله

قصتك دى ظريفه جدا و خيالك خصب لكن صدقنى حصلت فى الواقع و تقول كنت معانا لما حصلت !!!!! بنفس التفاصيل و بالتاكيد ستؤيدنى لو سمعتها !!!!!

مرة ذهبنا و مجموعة من الافراد نلبى دعوة كريمة من المهندس الشيخ الصافى جعفر لجبل الاولياء لمشروع سـنـد س الزراعى لما كان المدير هناك فى منتصف التسعينيات تقريبا !!!! فى اطار الدعاية لبيع قطع زراعية هناك لـلـدايـشـيـن منّـا ....... و الله الزول ما قصّر ...فطّرنا سـمـك مـدنـكـل بالشطه و الليمون و شربنا الببسي وكرعنا ...ثم بداء يتكلم عن المشروع نـفـس كـلامـك دا كـلـمـه كـلـمـه حـرف حـرف ( زنـقـه زنـقـه)!!!!!! و عمل لينا توور اى لـفـه على المشروع وهى صـقـيـعـه و لكنو كان بقول شايفين الخضره دى و الجمال ده والله ما ينقصو إلا الوجه الحسن ؟؟؟؟؟؟ حنجيب التوربينات من ماليزيا و نركبها هنا و حتتوفر الموية الزلال و الكلام المعسول و نحن نهز رؤوسنا كأنو موافقين على ما أظن تحت تخدير السمك داك او بعضنا طمعا فى ما سنحملو معنا ملفوف !!!!!

الناس ديل فكّروا فى كل حاجه!!! وبالكربون !!! وأظنك سرقت الفكره دى منهم يا حرامى!!!!!!!


#160682 [zahi]
0.00/5 (0 صوت)

06-15-2011 04:16 PM
طبعا يا استاذ لازم الشركه ترسل مجموعه لنقل الخبرات من الخارج للاستفاده منها في السودان زي ماليزيا تركيا البرازيل هاواي .......


#160681 [سلايمان قش]
0.00/5 (0 صوت)

06-15-2011 04:12 PM
غايتو ياجبرا اتلومت يعني الكيزان لحدي الموت معانا معانا الله يكفينا شرهم


#160674 [رمضان كريم]
0.00/5 (0 صوت)

06-15-2011 04:06 PM
طبعا في مقابر الحساب فيها خفيف والبعض الحساب فيها من نوع اخر
مقابر الجماعة ختكون ممنوع الدخول والاقتراب حتي لاتحرقك نار الظلم والجور


#160670 [محمد عبدالرحمن ]
0.00/5 (0 صوت)

06-15-2011 03:56 PM
دى ما دراسة جدوى لمشروع متحضر جديد
بس امشى سجلها فى الملكية الفكرية عشان ما تبقى بعدين فى الفكرة دى حقتى وتبقى فى الجرجرة مع نيابة القبور


#160629 [salah]
0.00/5 (0 صوت)

06-15-2011 03:02 PM
ياخى نطالب بقبور مكندشة .. وكت ما لقينا الكندشة احياء اخير نضوقا بعد الموت


#160619 [ابو القنفد]
0.00/5 (0 صوت)

06-15-2011 02:43 PM
الله يديك العافية يا استاذ ونحن دائما نستظل ببعض موضوعاتك هروبا من تعب الدنيا، لكن يا سيدي العزيز الموضوع حيصل بأذن الله ولكني رايت بام عيني في بعض دول الخليج كيف يتم معاملة الموتي بطرقة محترمة ولائقة تشعر فيها أنو المات ده مهم، و المقابر أخر نظافة وقبور مرصوصة ذي السبحة وتلاجة الموية شغالة 24 ساعة حتي الحنوط و الكفن مجان ويمكن تسألوا عنها وجزاكم الله خيرا


#160605 [مدحت عروة]
0.00/5 (0 صوت)

06-15-2011 02:28 PM
انت قايل كلامك ده ما ممكن يتحقق؟؟ بعد الذكر و الذاكرين و حسن الخاتمة انا ما ح استغرب اذا البتقول فيه ده حصل !!!!!!


#160580 [dalia]
0.00/5 (0 صوت)

06-15-2011 02:06 PM
الله يديك العافية يا ساخر سبيل

أضحك الله سنك

لكن والله عندنا هنا....... فى السودان ده بتحصل

أي شي عندنا بيحصل واكتر من كده كمان

حسبي الله ونعم الوكيل


#160564 [hla]
0.00/5 (0 صوت)

06-15-2011 01:50 PM
( ) :D same story every time you are right


ردود على hla
Malawi [algam] 06-16-2011 12:20 AM
tray to understand what he mean


#160553 [yahia ]
0.00/5 (0 صوت)

06-15-2011 01:41 PM
هاهاها . لا حول ولا قوة الا باللة . قوية واللة يا استاذ اقول ليك حاجة نبؤتك دى بتحصل وقريب دة


#160544 [Awaad M.Ahmed]
0.00/5 (0 صوت)

06-15-2011 01:35 PM
والله جزاك الله خيرا اخى الفاتح والله اضحكتنا بعد ان غاب الضحك من سمائنا من كثرة مانقرا من احوال بلادنا وما نسمعه عن الفساد وارتفاع تكاليف المعيشه كل ساعه -
الحقيقه هو مشروع هائل ومربح وياريت يصدروا ليه سندات عشان لقاف بن لقوف يلقى طريقه جديده للقف ولو اضيفت المشروع للمحليات فالموكد ان السيد مخترع بن مفكر سيستنبط طريقه للهف الاحياء قبل توجههم للمقابر النموذجيه -
واحد قابل مصرى قال ليه السودانيين بقو اولاد نكته اكتر من المصريين ، قاليه اكيد جاعوا


#160521 [أبو الياء]
0.00/5 (0 صوت)

06-15-2011 01:15 PM
الرجاء مراجعة استخدام (هكذا) في اللغة العربية
والجماعة ديل اظهر إنو عجبهم اقتراحك بتاع المقابر السياحية الكتبتو زماااااان داك


#160520 [مواطنة سودانية]
0.00/5 (0 صوت)

06-15-2011 01:14 PM
والله دى عوجة الزول اشيل هم ميت و حى .


#160513 [سوداني حزين]
0.00/5 (0 صوت)

06-15-2011 01:08 PM
شر البلية ما يضحك.:D وفي اعلان اخر تعلن حكومة المؤتمر اوطني عن نيتها في توفير قتلى واموات عن طريق صناعتها المتميزة(صناعة الموت) في ارجاء البلاد المختلفة دارفور والشرق وتبث البشرى با فتتاح مصنعها للموت في جنوب كردفان وابيي والنيل الازرق وذلك اقابلة احتياجات المدافن النموذجية وانا لله وانا اليه راجعون.;( ;( ;(


#160506 [ابو امجد]
0.00/5 (0 صوت)

06-15-2011 12:59 PM
جبرا وصلتنا النهاية خلاص ههههههههههههههههههههههههههههههههههههههههههههههههههههه دا فلم الانقاذ الوطني للشعب السوداني
حجز القبر تعرف ياجبرا دي امنية الكيزان لو بيدهم مايفضل واحد من الشعب السوداني دا الا هم بس الكيزان يقعدو فى السودان لو لا خوفهم من المجتمع الدولى لكانت الابادة الجماعية تبداء من الخرطوم وتشمل كل انحاء السودان لان وضح لنا ان الكيزان كرههم فى الدنيا والعالمين حاجة اسمها الشعب السوداني ودولة السودان عشان كدا الانتقام مستمر للشعب السوداني بصورة ممنهجه ومدروسه


#160494 [الزول الكان سمح]
0.00/5 (0 صوت)

06-15-2011 12:46 PM

يا استاذ جبرا

دى حكاية غير مستبعدة بالمرة....لكن إنت ( طبعن ) قا صد حاجة تانية...يالئيم


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة