المقالات
مكتبة كتاب المقالات والأعمدة
كمال كرار
قال ليهم وقالوا ليهو
قال ليهم وقالوا ليهو
06-22-2011 11:56 AM

قال ليهم وقالوا ليهو

كمال كرار

ذهب لدكتور ( براني ) بتوصية من زول معرفة لأنه لا يملك ” حق الكشف ” ، فشكا له من قرصة في المعدة وزغللة في العيون ورجفة في ( الدركسون ) أقصد الأصابع . ففهم الدكتور أصل الشكوي وكتب له روشتة مفادها وجبة عند اللزوم .
ذهب للاجزخانة وقابل الصيدلي فقال ليهو ” أمشي المطعم دااااك ” .
مشي المطعم وأداهم الروشتة فقالوا ليهو ” أدفع خمسة جنيه واقعد في ” الطربيزة ” ديك .
قال ليهم ما عندي ، قالوا ليهو ” أكل نارك ” بضم الألف والكاف ، قال ليهم جيبوا الحطب .
قالوا ليهو أمشي الغابة ، فدخل الغابة وتم اعتباره متمرداً خارجاً عن القانون .
قالوا ليهو أبوجا قال ليهم طرابلس . قالوا ليهو استراتيجية سلام دارفور قال ليهم مؤتمر أهل المصلحة . قالوا ليهو الحرب والدواس ، قال ليهم دواس بلا غبينة أحسن نمشي القطينة .
ومرة كان حايم في سوق ام دفسو لاقاه واحد بياكل ام تكشو قال ليهو أمشي ديوان الزكاة وما شابهها .
مشي الديوان قال ليهم ” هاكم الروشتة دي ” وكانت ممزقة من كترة الحوامة في أبو حمامة .
قالوا ليهو ” أمشي اللجنة الشعبية جيب شهادة فقر “
مشي اللجنة الشعبية قال ليهم أنا عاوز شهادة إني فقير ، عاينوا لملابسه الممزقة وكرعينو الحفيانات وخشمو الناشف وقالوا ليه جيب عشرة جنيه رسوم الشهادة .
قال ليهم ما عندي ، قالوا ليهو الحس كوعك .
قعد في ضل راكوبة وحاول لحس كوعه دون جدوي ، فأصابه انزلاق غضروفي .
مشي المستشفي قال ليهم ” ضهري تعبان ” قالوا ليهو سلامة ضهرك .
قال ليهم عايز اتعالج ، قالوا ليهو ادفع الرسوم واقيف في الصف . قال ليهم ما عندي قالوا ليهو ” انكشح ” .
ولما انكشح من أمامهم تذكر بطاقته العلاجية المركونة في ( تكل ) البيت فحملها مسروراً ثم عاد للاسبتالية .
قال ليهم أنا عندي تأمين صحي ، قالوا ليهو تعيش وتاخد غيرها ، قال ليهم يعني شنو . قالوا ليهو يعني وجع ضهرك دا خارج التأمين مثل علاج الايدز وطقوم الأسنان .
اشتري سنارة صيد علي الحساب ، وذهب عند المقرن لاصطياد سمكة فقبضت السنارة علي تامبيرة ، وحالما جمع الحطب لزوم ” شية الجمر ” جاهو بتاع الضرائب وفي يده ايصال ضريبة صيد جديدة قدرها 20 جنيه بناء علي قانون توسيع المظلة الضريبية . ولما رفض الدفع صودرت التامبيرة ، فذهب إلي مطعم السدنة بعكازه وسكينه وتغدي وشرب جنجبيرة والتحلية علي حساب السادنة الأميرة .

الميدان


تعليقات 0 | إهداء 0 | زيارات 1177

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




كمال كرار
كمال كرار

مساحة اعلانية






الرئيسة |المقالات |الأخبار |الفيديو |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة