التتار..!ا
06-24-2011 01:06 PM

حديث المدينة

التتار..!!

عثمان ميرغني

ما الذي يجري في بلادنا.. أمس شرعت محلة الكاملين بولاية الجزيرة تجريدة (عسكرية!) مدججة بأوامر القبض على جيع المصانع في منطقة الباقير.. بينما في سوق أم درمان بولاية الخرطوم تجريدة من نوع آخر.. بطلها أيضاً المحلية.. حملة (عسكرية!!) مدججة بالترهيب والقهر.. تستهدف.. تصوروا من تستهدف.. الحمالين. بالدراجي (العتالة).. ما الذي يجري بالضبط.. سأكشف لكم السر في نهاية العمود..!! في ولاية الجزيرة عمدت محلية الكاملين لفعل أقل ما يوصف أنه جريمة قتل مع سبق الإصرار والترصد للصناعة في بلادنا. بعد أن نجحت في تعطيل أكثر من ثلاثة أرباع المصانع.. أعلنت أرقاماً فلكية خرافية للعوائد هذا العام.. تصوروا منشأة صناعية كانت تدفع في العام الماضي عوائد قدرها (9) مليون جنيه.. هذا العام طلبوا منها حوالي (400) مليون جنيهاً. مصنع دفع العام الماضي (17) مليون جنيهاً.. طلبوا منه هذا العام مليار جنيه.. بأي حق.. بأي قانون.. بأي دين.. الله أعلم.. زميلتنا الصحفية الأستاذة رشا بركات خفت سراعاً لموقع المعركة في الباقير وجردت كل شيء.. (التحقيق ينشر غداً بإذن الله) والله العظيم أنا شخصياً كاتب هذه السطور لا أجد إلا رفع الفاتحة على بلد يدار بمثل هذه العقلية.. من حق أي رجل أن يعطل عقله ويعلن جنونه ويصعد في أعلى صرح ويصرخ بما يشاء.. فنحن في بلد حر.. حرية الجنون.. . لكن أين العقلاء؟ كيف يحدث هذا في الجزيرة. أليس الأجدر أن تحتفي ولاية الجزيرة بقربها الجغرافي من ولاية الخرطوم، فتقدم (كل الجزر) الذي يجذب إليها الاستثمار والأعمال لتصبح موطناً للصناعة والتجارة والأعمال المزدهرة.. لكن ما الذي تجنيه الولاية من مثل هذا العمل الجنوني.. عندما يجد رجال الأعمال أنفسهم في الحرسات والسجون.. بسبب هذه العوائد الباهظة لن يكون متاحاً سوى التفكير في النجاة من بلد يقهر المنتج ويحتفي بالعاطل.. أما في أم درمان فالوضع لا يستحق أكثر من لافتة مكتوب عليها (شر البلية ما يضحك).. حملة منظمة عنيفة اجتاحت سوق أم درمان.. مطاردات ورجال يختفون داخل المخازن المظلمة في انتظار ذهاب كتائب القذافي.. تصوروا الحملة تبحث عن (العتالة).. للقبض عليهم. مطلوب من كل عتالي في السوق استخراج بطاقة عمل.. قيمتها (22) جنيهاً. وتجدد سنوياً.. صدقوني التركي المستعمر الغاشم في القرن التاسع عشر ما فعل بشعبنا مثل هذا الفعل.. طبعاً تنتظرون مني أن أجيب لكم على السؤال.. لماذا كل هذا؟؟ الإجابة سهلة بسيطة. لأننا بلد (أفندية) همهم الأول توفير الفصل الأول.. ولتذهب البلاد وأهلها إلا الجحيم.. والدنيا (آخر الشهر).. فأطلقوا كتائب القذافي في كل اتجاه. لم يتركوا رجال الأعمال في المصانع.. ولا (العتالين) في الأسواق الشعبية.. الهدف واحد.. وبأعجل ما تيسر قبل (المواهي).. جبايات.. جبايات.. جبايات.. على جثة الوطن.. ارفعوا أيديكم وادعوا مليكاً لا يقفل بابه من أحد.. وقولوا: اللهم من شقّ علينا.. (شقّو نصين)..!!

التيار


تعليقات 36 | إهداء 0 | زيارات 4773

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#166582 [SaifAlhag]
0.00/5 (0 صوت)

06-25-2011 06:51 PM
لكل ضعف ولكن لا تعلمون- ويمهل ولا يهمل-

لك التحية استاذ عثمان
ونرجو ان تواصل فى نفس المسار


#166362 [مكتوي]
0.00/5 (0 صوت)

06-25-2011 12:57 PM
طيب سعال يا ود ميرغني وينو الوالي الذي لا ينظلم عنده احد ما شايف العمايل الحاصله دي يمكن إذا عرف يمكن ينصفهم عليك الله كلمه عشان يشوف حل للمشكله دي زما تنسى يتاع الكشك


#166272 [الساير]
0.00/5 (0 صوت)

06-25-2011 10:54 AM
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

يا عثمان

دي البداية والتقل وراء

وده كله ما غريب علي الأنقاذ

غريب الشيطان

الظاهر عليك يا عتيمونة داير تتحلل من جماعتك

لكن بدون خبر الكشك مافي ليك طريقة

التوبة مهرها غالي لا يقل عن تمن الكشك وعزة الأولاد الطشو

ده لو وافق الزول السمح

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟


#166190 [عبد الملك]
0.00/5 (0 صوت)

06-25-2011 01:36 AM
فى مسألة المصانع هذه ضرورى نسمع ماعند الطرف الأخر أما مسألة تنظيم الأسواق فلابد منه تماما كأى نشاط إنسانى أخر .


#166188 [ناصحين]
0.00/5 (0 صوت)

06-25-2011 01:30 AM
كلكم خطاوؤن وخبر الخطاوؤن التوابوون نسال الله ان يتقبلها توبة نصوحة وان يهدينا واياك سبل الرشاد وان يجعلها فى ميزان حسناتك ان كان ذلك بنية خالصة للشعب ومع الشعب .............. فاصدح بالحق واطلق لقلمك العنان وخذ معنا الصف.................. اننا بك فرحون والحمد لله مادام بيننا امثالك ..............فاكثر الطرق فان الطرق يفل الحديد.


#166173 [حمدان]
0.00/5 (0 صوت)

06-25-2011 12:03 AM
اما لاحظتم انه كلما قلت الاعلانات في التيار ياتي ابو عفان بمقال لا يتمه وفضيحة يعد بسردها ولا يعود ابدا...
والجماعة فاهمنو وهو فاهم........... ياربي نحنا نفهم متين لكن احسن نعمل ما فاهمين
موش




ما الذي يجري بالضبط.. سأكشف لكم السر في نهاية العمود..!!


#166159 [طه محمد]
0.00/5 (0 صوت)

06-24-2011 11:04 PM
طبعا يا باشمهندس هذه هي سياسة الإنقاذ عند الفلس و الفشل فالجماعة فتحوا ميدانا جديدا للجهاد في جنوب كردفان و عائدات بترول الجنوب على وشك الإنقطاع و لتعويضها لا بد لهم من اللجوء لهذه الأساليب التي لم يلجأ لها الحكم التركي في السودان الذي كان من عوامل الثوره عليه الضرائب الباهظه وبهذا الأسلوب من الحكم تتجه الإنقاذ إلى حتفها بأقدامها بعد أن عبدت الطريق لحتفها بيدها و ربنا يحفظ السودان من جهل حكامه .


#166152 [حمزةالدارحامدي]
0.00/5 (0 صوت)

06-24-2011 10:34 PM
اتا يا ود مرغني .... عليك الله بتعرف شنو عن التتار؟


#166144 [طارق بشير]
0.00/5 (0 صوت)

06-24-2011 09:58 PM
يا ناس منتظرين شنو

الحيكومة تدفعكم دفعا للخروج وانتو محلكم سر الناس ديل بالعربى كدا قالوا ليكم فكونا من قرف البلد دى عجزنا عن ادارتها وحتى لا تشمتوا فينا اخرجوا وظاهروا
ليس هنالك اسباب ودوافع اكثر مما تقدمه الحكومة لكم من اجل ازاحتها بالعربى كدا الجماعة ديل عجزوا عن ادارة البلد وقالوا الروب عديل ويحرضوننا لمساعدتهم فى المخارجة والادلة الدامغة من مخارجة المنهوبات الى انجلترا طالعتنا بها صحف اليوم
فاخرجوا لا تخافوا فالطريق معبد ويعدكم بقصر المسافة وقلة المشقة
والله نصيركم سيروا الديمقراطية هدفكم


#166143 [طفح الكيل]
0.00/5 (0 صوت)

06-24-2011 09:56 PM
وين صاحبك ود الخضر من الحملة على العتالة!!!!!!!!!!!!!!!!!!!!!!!!!!!!!!!!!!!!!!!!


#166128 [wahied]
0.00/5 (0 صوت)

06-24-2011 09:12 PM
الناس ديل والله هروا عديل كدا (( ضريبة من العتالة ! ! ! )) دا توسيع المظلة الضريبية البتكلموا عنه سبحان الله ضريبة من العتالى ؟ ! ! نحن وين يا جماعة دى حكومة قلع وبوقاحة وقلة ادب هذا العتالى المسكين عايش على ضراعه يوم يجد فيه رزق ويوم لا يجد شيىء كيف بالله تأكلون اموال مثل هؤلاء الغلابة والذين يترزقون بالعمل على التحميل على ظهورهم واياديهم ومعرضين للمرض والاذى فى اى لحظة ولا رزق ياتيه غير هذا العمل الذى يؤديه خصما على صحته وطاقته ولو اصابته عاهة لمدة يومين فقط توقف دخله ودخل فى ديون وضنك اما انت يا سيادة الموظف علاجك مجان ولو جلست شهر مريض فى بيتك ما عليك الا ان تاخذ اورنيك مرضى وراتبك ماشى كاملا وطظ فى الغلابة والعتالة واصحاب المهن التى تستخفون بها هذه ليست حكومة الانقاذ هذه حكومة القلع والنهب والهمبتة بالله كيف تاكلون فلوس وعرق هذا العتالى المسكين لعنة الله عليكم الا تخافون الله والله البختشوا ماتوا المستعمر الانجليزى كان ارحم منكم على هذا الشعب كان عادلا وكان صادقا ( من اين اتى هؤلاء ؟؟؟1 ! ! ) يحكمنا اليهودى ولا هذا المدعو عمر البشير الشرير هؤلاء هم الكيزان الخنازير همهم جمع المال وبأى وسيلة ولا يبالون حلال ام حرام الموت بعزة ولا العيش بهذه الذلة اللهم انصر خليل اللهم انصر الحلو واعوانه على هذه العصابة الفاسدة من اين اتى هؤلاء القوم هؤلاء اسوء من قوم لوط فى الاخلاق والمعاملات هذا استعمار آخر استعمار الكيزان على الشعب ( الثورة الثورة الثورة ضد هؤلاء الخنازير الخزى والعار لك يا عمر الشرير .


#166099 [mohamed]
0.00/5 (0 صوت)

06-24-2011 07:42 PM
سبحان الله ده انت زاتو الكاتب المقال يا عثمان ميرغني شي عجيب الحاصل ليك شنو فجاءة تكتب انا احوال ( العتالة ) و اييييييييك مقالات ضد الطيب مصطفي والله الدنيا بخير كان كده ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟


السكره فكت


#166098 [mohamed]
0.00/5 (0 صوت)

06-24-2011 07:39 PM
اسال لينازولك ود الخدر الزى لا يظلم احد عنده وخليهو يفك العتاله ورجع
الكشك لصاحبو الطشه


#166097 [hamid al waham]
0.00/5 (0 صوت)

06-24-2011 07:39 PM
اتعجب للراقصين على اى ايقاع
فى البداية كل الصحافة انقاذ
و الان بعد ان ظهرت بوادر التغير اصبحت الصحافة حرة و نفس الطبالين الراقصين على ايقاع الانقاذ صاور مايستروهات ايقاع التغير
يا راجل خليك فى القاد بتاعك


#166093 [hamid al waham]
0.00/5 (0 صوت)

06-24-2011 07:23 PM
اتعجب للراقصين على اى ايقاع
فى البداية كل الصحافة انقاذ
و الان بعد ان ظهرت بوادر التغير اصبحت الصحافة حرة و نفس الطبالين الراقصين على ايقاع الانقاذ صاور مايستروهات ايقاع التغير
يا راجل خليك فى القاد بتاعك


#166092 [,حيد]
0.00/5 (0 صوت)

06-24-2011 07:23 PM
قلنا و نقول و نكر ر ان السودان اصبح اقطاعية خاصة باهل المؤتمر و اهله عبيد يعملون بنظام السخرة و يدفعوا عن يد و هم صاغرون حتى يرفدوا خزائن التتار و جيوبهم و لا يهم السلاطين ان يسرق الناس او يموتوا جوعا المهم ان يدفعوا الحوافز الملياريةاهل السلطان


#166076 [ابو مروة]
0.00/5 (0 صوت)

06-24-2011 06:51 PM
التاسع من يوليو ... والاقتراب من ذقنية الانقاذ
كلما اقترب الموعد المضروب اقرب موعد عودة قانون الذقنية .. - ارجو سؤال اقرب صديق اذا كنت لا تعرف قانون الذقنية - ولكن هل ستخارجنا الذقنية من نهم الحكومة؟
القضية يا عثمان ليست في التفاصيل بل في المنهج كما عودتنا على هذه المقولة.
القضية ليست على من تقع الضريبة فهي واقعة واقعة لا محالة سواء على العتالين ام على الذين يعتلونهم.
وان كنت محتاج الي تفاصيل اخبار يحدث غدا فتأمل الآتي:
ضريبة كماسرة المواصلات - السواقين طبعا دافعين-
ضريبة نديهة مواقف المواصلات
ضريبة عمال وعاملات البقالات والكافتيريات والافران وغيرها - طبعا هذا خلاف ضريبة التسجيل والكرت الصحي نصف السنوي المعمول بها اصلاً-
ضريبة بائعي الاكياس في الاسواق
ضريبة غسالي العربات خاصة في شارع النيل
ضريبة بائعي الادوات امام الاستوبات
ضريبة اكلي السندوتشات وغيرها في الطريق العام خاصة لاحسي الاسكريم في شارع 41
ضريبة شرب الشاي وغيره امام ستات الشاي خاصة غير الدافعات للضريبة
ضريبة عبور الطريق العام بالارجل خاصة اثناء ساعات العمل الرسمية
ضريبة النظر الي بنايات وابراج الحكومة وفللها خاصة بنايات الجيش والشرطة والامن لما فيه من تهديد للامن القومي
ضريبة النوم مع الزوجة (تحت الدراسة من اجل تحديد آليات المراقبة بالاشعة تحت وفوق وجنب الحمراء والصفراء والبنفسجية للبيوت والفنادق والعربات المظللة والمكاتب والاماكن المغلقة وغير المغلقة ) (تستمتعون ولا تدفعون ايها الغشماء؟)
ضريبة عدم دفع اي ضريبة ... هي سايبة؟

اذن القضية كما اسلفت ليست في التفاصيل
والحل في الاجابة على السؤال
الشعب اولا ام الحكومة اولا ؟
هنا مربط النعجة (مدفوعة الضريبة )


#166075 [سوداني مخلص]
0.00/5 (0 صوت)

06-24-2011 06:51 PM
والله لانملك الانقول سبحان الله الناس الفاهمه قاعده في بيوتا تقرا في الجرايد والناس المفروض اقعدو في بيوتم هم الماسكين زمام الامور والله ماعارفين لمتين حنقعد في الهم دا والناس دي دايره توصلنا وين لمن السودان دا يطرشق ليهم حتى يفكو ودا كان فكو سايقين البلد بعقلية سخله الناس الفي الولايات دييل مافي زول يردعهم الغريبه انو في ناس كنا نظن انهم بفهمو في المركز زي على عثمان و مصطفى وغازي وين هم من الحاجات الحاصله دي ناسا قرت بره واتعلمت واتدكترت على شنو ماقرو سياسه ولا مابارو سياسيين والله العظيم لو جبن طالب في الابتدائي ولا الثانو الخربو دا يفكر احسن من الناس دي اللهم خذهم يارب وارينا فيهم الانتقام يارب اللهم ابعدهم يارب عن السودان قبل ان تجف خيراته بافكارهم
ودا النحن خايفين منو لمن تجي ناس بتفهم ماتلقا حاجه يشتغلو عليها عشان كده لازم الناس دي تمشي قبل الزحف الصحراوي يكمل على الزراعه وقبل الانفصالات تقلل المساحه قبل السودانيين يخلو البلد بلا رجعه قبل العلماء ينسو وطنهم ويستقرو في دولهم الجديده الرحبت بيهم لازم يمشو المتخلفين مستجدين السياسه رغم القدم الحقو السودان ياناس الحقو السودان ياهووووووووووووووووووووووووووووووووووووووو;( ;( ;( ;( ;( ;( ;(


#166062 [wedhamid]
0.00/5 (0 صوت)

06-24-2011 06:27 PM

يـا عثمان ميرغنىانت ما سمعت الرئيس الشهر المضى فى مؤتمر الشورى قال شنو؟؟؟

مش قال الناس تستعد عشان حيوسعـوا الوعاء الضريبى ( طبعا الريس اكد انو ما حتكون فى زيادات فى الضرائب ) لكن كل شى وارد !!!!!! يعنى تفتكر الكلام دا قالو ساااكت؟؟؟

المويه حيزيدوها ....ما قالو كده ايام مظاهرة ناس برى !!!!! و اهو بدو بالجمرة الخبيثه و ان زى صمتو عنها شويه جايه جايه .............

كمان حتجى زيادة كبيره فى الكهربه عشان يقابلو بيهو الزيادة فى اسعار الفيرنس !!!! دى ما عالمية دحين يا جنا؟؟؟؟

حتكون فى زياده فى البنزىن و الجازولين و اظن بنفس نسبة ما نقص نصيبنا من واردات البترول!!!!!

و دا حيؤدى لزيادة اسعار النقل يعنى كل شى بشيلو فى قندران و اللا لورى و اللادفار و اللا ركشه و اللا كارو حيزيد !!!

حيزيدو اى شئ اسمو رسوم اكان للبناء او العلاج او المدرسية و شهادة الميلاد الخ الخ........

حيزيدو العوايد ورسوم الترخيص للعربات و كل المستندات الشخصية والرخص التجارية و الشخصية !!!!!
و حيصعدوا حملات الغرامات فى الطرقات على العربات لاتفه الاسباب !!!

حيزيدوا ايجار الدرداقات فى الاسواق و الاعمال الهامشيه فيها ويمكن الحكومة ذاتها تتولى بيع الاكياس فى الاسواق (غايتو دا قرارو لسع تحت البحث)!!!!!

و يوسعوا الوعاء الضريبى بــ

حيفرضو ضريبة على الشحاتين تصدق يـا مؤمن !!!!! تتصور الفكره دلى جات من راس وزير المالية شخصيا .......

حيرجعو مصادرة الدش الهوائى من الما بدفع الرسوم !!!!!

حتكون فى رسوم استخدام لمبات النايلون ( على كل لمبه مبلغ !!!) على لافتات المحلات التجارية والعيادات و اى محل تجارى يضئ محلو من الخرج !!!!!!!!

حيفرضو ضريبة باركينق ومواقف فى الاسواق او امام المنزل لاى عربه سيدها ما عندو قرّاش!!!!!

حيعملوا رســوم على الــكوندوم ( انت ما شفت روّجو ليهو كيف الايام الفاتت!!!!)

يمكن تكون فى رسوم على الصلاة فى المساجد؟؟؟؟ او ايجارة على بعض ادواتا و الله يعلم (دى من عندى!! )

و المسالة ما حتنتهى بالاضافات لانو الحكومه عليها التزامات كتيييييييييرة لازم تؤديها !!!!!
مثلا حتزيد رواتب العاملين يمكن حوالى 5 الى 10 % وحوافز الدستوريين 500% !!!!

غايتو الله يجيب العوائق سليمة !!!!!!

هذا التعليق كتبتو قبل 3 اسابيع تعليقا على مقاله للاستاذ حيدر المكاشفى


#166052 [سوداني قح]
0.00/5 (0 صوت)

06-24-2011 06:05 PM
هل طش عثمان ميرغني؟
احتجب عثمان ميرغني عن الراكوبة لأكثر من أربعة أيام متتالية فأرجو ألا يكون لحق بأبناء صاحب الكشك
قسما بالله مللنا الأسلوب الضبابي الذي يسمي الأشياء و لا يسمي الشخوص ,, كن شجاعا و أكتب و لو لمرة واحدة عن البشير بيت الداء ... البشير هو المشكلة فدع عنك ترميزك و قلها لمرة واحدة و لك أن تعرف أن المواقف الشجاعة هي التي تصنع الصحفي العظيم
عثمان مرغني .. ظللت في كل كتابتك أو قل أغلبها توهمنا بأن القراء اتصلوا بهواتفك و أن بريدك الإلكتروني مزدحم برسائل القراء في هم من هموم المجتمع السوداني لكني أحس و معي كثيرون بأنك فاقد تماما القدرة على توطين نفسك كأنك تستفيد من التجربة المصرية التي غربلت كل أفراد المجتمع سيما مشاهيرهم من الفنانين و الأدباء و الممثلين و الصحفيين فقسمتهم قسمين لا ثالث لهما إما مع الثورة أو مع النظام البائد..كل أولئك الذين نعقوا قبل الثورة بالدفاع عن مبارك أصبحوا اليوم على الهامش تماما منبوذين و مكروهين و لم تشفع لهم نجوميتهم و لا مكانتهم الإجتماعية بنيل القبول من الثوار ... عثمان ميرغني يريد و بفهلوة المصريين أن يلعب على الفرضيتين فرضية ألا تنجح الثورة ضد الحكومة الإنقاذية و بالتالي سيبقى مرضيا عنه من قبلها طالما أنه التزم بعدم الطعن بقلمه في أساسيات القضايا الواضحة وضوح الشمس و الفرضية الثانية هي أن تنجح الثورة فيطمع بكتاباته الخجولة أن تشفع له أمام الثوار حتى لا ينبذونه.
لا أنكر أن مقالاتك تلقى إهتماما من القراء بدليل عدد القراء و التعليقات التي تلي كل مقال لك في الراكوبة برغم أن غالبيتهم لا يوافقونك في طرحك بسبب إزدواجيتك و تمجيدك لرموز الإنقاذ كوصفك لوالي الخرطوم الذي لا يظلم عنده أحد ... ما حيرني هو أنك لم تشر يوما إلى هذه الآراء الجريئة بل قابلتها بتجاهل كامل و بتعمد ذلك لأنه مهما كانت شواغلك و إزدحام جدولك فلن تمنعك من الرد.


#166043 [ناصحين]
0.00/5 (0 صوت)

06-24-2011 05:45 PM
يا عثمان انت ماشى كويس ومن سار على الدرب وصل ........ واتمنى ان تفق بقلبك مع الشعب والامور بقت واضحة


#166039 [al ameen]
0.00/5 (0 صوت)

06-24-2011 05:39 PM
والله يا عثمان اتلومت مع التتار جنس لوم عليك الله هسه البعملو فيه اصحابك ديل التتار بقدرو عليه لو رجعت الايام


#166038 [hajabbakar]
0.00/5 (0 صوت)

06-24-2011 05:37 PM
الجماعة قالو الروب
يحول المقال الى جريدة الانتباهة
ماقلتو انجليز
الغريق قدام حرب وفصل اول
وقروض ربوية تانى مافى اقعدو سكو العتالة وستات الشاى
عالم ماتستحى
لمن قلبتوهالقيتو ليكن زول قال ناس الصادق المهدى سكو
اها دا الانقاد الجيتو عشانو خمو واشربو
والشعب السودانى صبور الى حد وكان قام عليكن انتو عارفين
كان غلبتكن الجماعة القبلكن قاعدين وبالتاكيد ما حا يسكو ليهن عتالى ولا ست شاى
ال ايه تحكيم شرع الله
عالم ماتختشيش




#166026 [قرفان خالص]
0.00/5 (0 صوت)

06-24-2011 04:52 PM

نسأل الله بان يكون هداك ... وتكون فعلا صحيت من اوهام بني كوز ..

أخخخخخخخخخ


#166021 [mustafa]
0.00/5 (0 صوت)

06-24-2011 04:34 PM
دا كلو عارفنو يا شيخ عثمان اها الحل شنو طيب؟؟؟ يعني كل مره جايب لينا حاجات بتحصل ليها عشرين سنه والحال ياهو نفس الحال .... ؟؟؟ اتكلم عن الحل ولا الحال عاجبك وسوقك ماشي


#166011 [ابو اسامة]
0.00/5 (0 صوت)

06-24-2011 04:20 PM
من 9 مليون لى 40 مليون ومن 17 لى مليار ... كل شئ جائز فى هذا العهد الظلامى
وقبل كده الطاهر ساتى كتب وقال لاشئ يدهش فى السودان يعنى لا توجد دهشة مهما بلغ الحال ... الدعاء وغير الدعاء لا شئ يمكن فعله ... تعليق سمح من الزول الكان سمح


#165992 [ابوالنصر]
0.00/5 (0 صوت)

06-24-2011 03:53 PM
لايحق لكل من ساهم في تحسين صورة النظام وبارك انتهاكته لحقوق الشعب السوداني لايحق له الان ان يتحدث عن معاناتنا فعثمان ميرغني الحرباءالدي يتلون مع الزمن وصاحب الاعلانات الضحمة من والي الخرطوم واكرميات رمضان لايحق له ان يتحدث عن فساد اخوانه شعب لايستحق الحياة لان الحياة ثمنها الموت


#165987 [ابوعـــــــلاء]
0.00/5 (0 صوت)

06-24-2011 03:38 PM
يا الزول السمح وسليمان قش ومندى

عثمان بعدما ظبط نفسه برحلات نيفاشا ومتابعة النائب الهمام فى القومة والقعده خارجيا وداخليا ونثريات والجريده واللقب الصحفى الكبير والفيلا الملياريه بصراحة كدا عاوز يقفز من السفينة بعدما ضمن انها غارقه لا محاله محتاج صكوك براءه هاجم الخال العنصرى الذى كان امامه بقذارة كتاباته طوال 22 سنه وبدأ الان فى طبطبة الطبقة الكادحة والايام دى زاد الجرعة حبتين
لكن هيهات لن نغفر لك من غرف من نتن الانقاذ حتى لو لساعة


#165969 [Aman]
0.00/5 (0 صوت)

06-24-2011 03:10 PM
سبحان الله ده انت زاتو الكاتب المقال يا عثمان ميرغني شي عجيب الحاصل ليك شنو فجاءة تكتب انا احوال ( العتالة ) و اييييييييك مقالات ضد الطيب مصطفي والله الدنيا بخير كان كده ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟


#165952 [kouz muratib]
0.00/5 (0 صوت)

06-24-2011 02:34 PM
يا شيخ عثمان المعتمدين ديل ما تبع المؤتمر الوطني ديل تبع الشعبي وغواصات من زمان معروفين وهسي بقوموا بواجبهم في خدمة الشعبي ودورهم دا مرسوم بي عنايه وما بعيد يكون عندهم ضلع في موت الشماسه


#165945 [مندي]
0.00/5 (0 صوت)

06-24-2011 02:19 PM
يا باشمهندس واضح انك حسمت امرك وتخليت عن اللون الرمادي.... ما سطرته امس الاول واليوم نعتبرو قولة خير وننتظر منك المزيد بس نخشى عليك من الانتكاسة وخصوصا انك صديق شخصي للوالي الذي لا يظلم عنده احد


#165944 [اقتربت قيامة الكيزان]
0.00/5 (0 صوت)

06-24-2011 02:18 PM
شكرا استاذنا عثمان وكتر خيرك المرحلة دي تصدق وصلنا ليها منذ اكتر من 10 سنين ,,,وهي ان لا صلاح لشعب السودان في ظل حكومة التتار كما ذكرت بالضبط مع العلم اننا لسا ما خشينا في التلاتين سنة ,,,وزمان ما كنا جايبين للدنيا خبر ,,,,,
هي حكومة التتار بل اسوأ من التتار بمراحل بدون تفصيل ,,,,,
نحن في الخرطوم وكذلك اهل الشمال واهل الوسط والجزيرة والشرق ,,,علينا ان نلتف بكل قوة حول الثوار لنقتلع التتار علينا ان نلتف حول الحلو وعبد الواحد وخليل ومناوي صدقني الناس ماخدا صورة سلبية عنهم لكن اهل الهامش افضل من هؤلاء التتار ومعا نصنع نظام يحكم كل السودان بعدل وبمخافة لله وبالقانون,,,,


#165941 [سليمان قش]
0.00/5 (0 صوت)

06-24-2011 02:10 PM
دا شنو ياعثمان مرغني يشقو نصين ويضربك الضريب دا ماصاحبك المابنظلم عندو احد والمارجع للزول الما انتحر كشكو واولادو الطشو كمان قبل علي العتالة؟وبرضو الفيلا المليارية من وين؟ (بئر معطلة وقصر مشيد) كشك ضايع وفيلا مليارية!!!!!والله يقدرك وتنشر التحقيق


#165938 [عديمان]
0.00/5 (0 صوت)

06-24-2011 02:00 PM
نعرفك جيدا الأخ عثملن ونعرفهم أيضا.ولكن الذي يصحى ضميره ويستغفر خير من الذي يسترسل في الظلم.لك التحيه وأنت تعكس معاناة الوطن وهي كثيره.بس بإختصار هذا النظام المجنون الآن يكتب نهاياته بيده.وكما نعلم كيف كانت نهاية الحكام الظالمبن ع مر التأريخ.اللهم عجل لهم.قبل ان يعجلوا بنا


#165916 [سوداني ]
0.00/5 (0 صوت)

06-24-2011 01:20 PM
الموضوع واضح ياود مرغني ؟؟
الحكومه مش قالت سوف تقوم بتوسيع المظلة الضريبية عشان تواجه تداعيات التاسع من يوليو ، وهذه الجبايات سوف تطال كل أهل السودان بصورة مباشرة او غير مباشرة ؟؟
لك الله ياوطني .. لك الله ياشعبي ... دائماُ أنت الضحية لعواسة سياسينا في كل المناحي .


#165913 [ الزول الكان سمح]
0.00/5 (0 صوت)

06-24-2011 01:08 PM
( أهلن ) والنون دى طبعن ودى كمان طريقة ساخر سبيل فى التنوين
يا عثمان ميرغنى.... الجزيرة واليها منو؟ والعاصمة واليها منو؟
إذا كانت الأرقام الإنتا ذكرتها دى صحيحة!!! فلقد بدأت إنعكاسات ما بعد التاسع من السابع تظهر.
وبعدين يا عثمان ميرغنى...رجال الأعمال دخلوا السجون دى من عهد الإنقاذ الأول..بدايةً بطلب أخوان ( الفاضل وأبراهيم طلب) تجارة عموم السودان ..ونهايةً بالشيخ مصطفى الأمين والذى تم إدخال إبنه السجن ولم يخرج منه إلا بعد بيع منزله لوداد زوجة الفطيس إبراهيم شمس الدين ...وين كنتوا إنتو الوكت داك لييه مادقيتوا ناقوس الخطر؟
تجار ورجال أعمال كثيرون ورثوها جداً عن أب راحوا فى سياسات التمكين التى أتت بها زمرتكم الفاسدة شمار فى مرقة. وجيء
بجهلاء القوم ودهمائهم وضخت لهم أموال الشعب السمح المتسامح ليسيطروا على قوت الغلابة والمساكين ويهينوا كرامة الأعزاء ليصبحوا أذلاء.
أخيراً يا عثمان ميرغنى ..واحد من الأسئلة التى كنت أطرحها تكشفت أسراره وعرفنا مصدر تمويل الفيللا المليارية.
أما السؤال المتبقى والأهم هو : موضوع الكشك بتاع الراجل الما إنتحر ..وأولادو الطشو ...صاحبك ود الخدر الما بنظلم عنده أحد عمل ليهو شنو؟؟ ولعلمك ود الخدر واحد ممن أتى بهم الزمن الغادر ليستثمر فى الدواجن والأبقار والزراعة..من مصائب أناس جار عليهم الزمن الغابر خلال العقدين الماضيين .ولكن ...كل دور إذا ماتم ...ينقلب ( ينقلب ياعثمان ).
دين عثمان ميرغنى ..ودين الطيب دلوكة


عثمان ميرغني
عثمان ميرغني

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة