من سرق الكاميرا..؟؟ا
06-27-2011 04:32 PM

حديث المدينة

من سرق الكاميرا؟؟

عثمان ميرغني

أمس تلقيت اتصالاً هاتفياً في الصباح الباكر.. أهالي حي الامتداد بالخرطوم ثاروا ساخطين على محلية الخرطوم لأن العام الدراسي الجديد بدأ بينما مدرسته الوحيدة أطلال سويت بالأرض. في مثل هذه الأحوال.. ليس أمامنا في صحيفة التيار سوى خيار واحد.. أن نستجيب لمن يطلب حضورنا وشهودنا للحدث.. فنحن صحيفة يملكها الشعب.. وسلطة رابعة تمثله وتحمل آلامه وآماله.. بدون أدنى تردد اتصلت بالأخ الصحفي عباس عزت ليحمل الكاميرا ويكون في موقع الحدث.. يا (مؤمن يا مصدق) ذهب عباس لموقع الحدث، وانغمس في الجماهير الغاضبة.. يحمل الكاميرا ويسجل الوقائع.. فجأة ينبري له بعض الأشداء.. يأمرونه بالتوقف عن التصوير.. يوضح لهم مهمته الصحفية.. ويتدخل الجمهور ويصرّ على أن يواصل عمله.. لكن وقبل أن يتمكن من التقاط أنفاسه كان أحدهم يضرب، بكل قوة، يده التي تحمل الكاميرا.. ثم يجرّها منه آخر.. وينزعها من كتفه ويولي الأدبار بينما بقية زملائه يقفلون أمام عباس عزّت الحركة حتى لا يحاول اللّحاق بالشاب الذي قفز في ظهر (ركشة) كانت تنتظره (وليس عليها أية أرقام) فتهرب به بين حيرة القوم وكل المظاهرة برجالها ونسائها وتلاميذها الصغار. في لمحة بصر فقدنا كاميرا ثمينة وغالية.. لكن المشكلة ليست في الكاميرا.. فالحكمة الشعبية تنص (الجاتك في مالك سامحتك).. لكن المصيبة فيمن يكون الذي سرق الكاميرا من عباس.. إن كان السارق (حرامي).. محترف وله سوابق.. فأيضاً الأمر مقبول.. فالحرامي (جازف) وحصل بقوة عينه وسرعته ومهارته ومباغتته لعباس على صيده الثمين.. ويبقى اللوم والعتب على الجمهور الكبير. جمهور المظاهرة الذين بكل رجالهم فشلوا في حماية السلطة الرابعة التي خفت إليهم لتدافع عنهم وتحمل صوتهم للمسؤولين. أما إن كان السارق لا ينتمي للحرامية.. ولا يحمل رخصة (حرامي) وليس مقيداً في سجلاتهم فهنا المصيبة أكبر.. لأن ذلك يعني أن الفاصل المميز بين الحرامي الحرامي. والحرامي الذي هو ليس حرامياً لم يعد مفهوماً للمواطن.. بعبارة أخرى. إذا تعرض أي فرد لمثل هذا الموقف وكان في جيبه سلاح مرخص.. هل يدافع عن نفسه وماله فيطلق الرصاص على الحرامي باعتبار أنه حرامي.. أم يتمعّن ويحاول أن يتيقّن من أن الحرامي (مرخص) وهو حرامي فعلاً لا تمثيلاً.. والله العظيم أنا لا أمزح.. إذا تجرأ أي مواطن عادي أو مواطن غير عادي على تمثيل دور (حرامي) وسرق كاميرا التيار بهذه الطريقة فإن ذلك يعني أننا جميعاً في خطر.. لأن الفعل لم يعد يدلّ حقيقة على الفاعل.. فالفاعل إن لم يكن حرامي.. فالفعل كان سرقة.. وهنا تكمن المصيبة.. على كل حال فوضنا أمرنا لله .. اللهم أنت قادر فوق كل قادر.. فوضناك في أمرنا وكاميرتنا المسروقة في وضح النهار وفي قلب المظاهرة..!!

التيار


تعليقات 23 | إهداء 0 | زيارات 3561

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#168614 [ابومهند]
0.00/5 (0 صوت)

06-28-2011 04:50 PM
كان أحدهم يضرب، بكل قوة، يده التي تحمل الكاميرا.. ثم يجرّها منه آخر.. وينزعها من كتفه ويولي الأدبار بينما بقية زملائه يقفلون أمام عباس عزّت الحركة حتى لا يحاول اللّحاق بالشاب الذي قفز في ظهر (ركشة) كانت تنتظره (وليس عليها أية أرقام) فتهرب به
يا جماعه لو جينا قرينا الكلام دا يعني انو هو ما حرامي واحد مجموعه اكتر من اتنين شوفو عثمان قال (( واحد ضرب يد الصحفي - والتاني يجر منه الكاميرا من كتفه - بقيه زملائه يقفلون امام عباس ))

شوفو الكلام معناه وردوا عليهو

سلم لي على صاحبك


#168473 [شايل جراح]
0.00/5 (0 صوت)

06-28-2011 01:19 PM
في واحد بيسرق سفنجة وملاية,,,,
وواحد بيسرق خروف السماية,,,,
تصٌور في واحد بيسرق ولاية

او كما قال الرائع احمد مطر

بالتمادي يصبح اللص باوربا مديراً للنوادي
وبامريكا زعيماًً للعصابات واوكار الفسادِ
وفي بلادي التي من شرعها قطع الايادي
يصبح اللص رئيساً للبلادِ


يعني يالكاشف اخوي كميرتك شكلها كدا وصلت الصين


#168290 [محمد احمد السودانى]
0.00/5 (0 صوت)

06-28-2011 09:23 AM
مشكلتنا الكبرى هم انصاف المثقفين !!! يعرف سبب بلاوى الشعب ويلهوهم باسئلة غربية من شاكلة عنوان هذا المقال!!! ان انصضاف المثقفين على مر الدكتاتوريات الثلاث
كانت مهمتهم مثل موضوعنا هذا !!!
قال أية (((((فنحن صحيفة يملكها الشعب.. وسلطة رابعة تمثله وتحمل آلامه وآماله..))) شفتو قوة العين قال أية يمتلكة الشعب !!! وانت ماعارف سبب مشاكلنا !! ملعوبة يا عثمان

وقال أية(((أما إن كان السارق لا ينتمي للحرامية))) ياسلام !! شوفتو كيف عثمان
أنا للة
لك اللة ياوطنى

يعنى لم تتحدجث عن تدمير جماعتكم للمدرسة فى حين ان الشعوب المحترمة تبنى يوميا مدرسة وانتم تهدمون المدارس وشايف الفيل السرق الكميرة وتقول حرامى
هو فضل حرامى بعد 89 غيركم


#168265 [واحد]
0.00/5 (0 صوت)

06-28-2011 08:23 AM
عثمان
هو في حراميه ثانيين ؟
عثمان سامعني؟؟ عثمان ناس الامن شفتهم ؟ لماه وجوطه زى دي وهم مافيشين ؟؟ كاميرا ؟؟ الجيوب فاضيه بس منو ال بشترى كاميرا؟ ود الخدر امن العاصمه ما تبعو ، عثمان !!!قلت كيف ؟ الانتخابات مامخجوجه ؟ عثمان سمعت نكته السفنجه -- تبع الطيب سيخه لما خمو بالكومر وطارت فردة سفنجته --الكشك يا عثمان ركز على الكشك


#168219 [مدحت عروة]
0.00/5 (0 صوت)

06-28-2011 02:46 AM
سلطة رابعة مين يا راجل؟؟ انتو مصدقين انكم سلطة رابعة؟؟انتو سلطة خضار ساكت انتو قايلين نفسكم فى دولة سيادة القانون و الدستور و الحريات؟؟؟ اقراو مقالات عادل درويش فى الشرق الاوسط عن الصحافة فى بريطانيا و علاقتها بالبرلمان و النواب و الحكومة!!! عشان تعرفوا انكم سلطة خضار من السهل اكلها!!!


#168212 [حمدان]
0.00/5 (0 صوت)

06-28-2011 02:25 AM
حرامي صغير ظاهر... سرق حرامي كبير متستر
قال ايه
ركشة من دون نمر


#168076 [hamid la waham]
0.00/5 (0 صوت)

06-27-2011 10:36 PM
كاميرا !!!!!!
انت و الطبالين الزيك وأسيادك سرقتو اكتر من عشرين سنه من عمر 35 مليون سوداتى.
انت الحاصل ليك سنو الايام دى قلبت مالك ما كنت طبال درجة أولى
الناس ما حتنسى ليك ماضيك عشان كده احسن خليك فى القاد بتاعك و سيب السياسه


#168075 [مهاجر ]
0.00/5 (0 صوت)

06-27-2011 10:35 PM
السرق الكميرا هو السرق الوطن


#168069 [نصرالدين]
0.00/5 (0 صوت)

06-27-2011 10:19 PM
عثمان ميرغنى
انت ماقلت الكاميرا مامهتم ليها كتير. لكن الغريب انك ماكتبت الاّ عنها وماكتبت لينا عن تفاصيل موضوع المدرسة السوها بالأرض ولحقوها الكشك حق الزول الم انتحر وما لمّا فى أولادو الطشو

كسره :
قالوا العشر قامليهو شوك


#168061 [عبدالواحد المستغرب جدا!!]
0.00/5 (0 صوت)

06-27-2011 10:06 PM
اتفضل يا هندسة وأتأكد بنفسك بأن دولة المشروع الحضارى سجل فشلا زريعا ومريعا لاى درجة !! الرسول الكريم دعوته لم تستقرق أكثر من 23عاما وإنتشر الاسلام شرقا وغربا وشمالا وجنوبا بكل ما يحمله من سماحة ومرؤة ،ورب قائل أن الرسول الكريم كان يسنده الوحى فنرد عليه أن الحق سبحانه وتعالى وعد ووعده حق (إن تنصروا الله ينصركم ويثبت أقدامكم ) إذا نصر الله لم يكن حصرا على الرسل ، وما راى سيادتك يا هندسة فى رئيس دولتك الذى صار كالحرامى الذى خطف الكاميرة ،وزمانوا حرامى الكاميرة كان جارى يتلفت يمين وشمال لانو سارق والانسان الذى يرتكب الخطيئة يعرف نفسه والاطمئنان يفارقه ويصبح قلقا كحال رئيسك الذى يركب الطائرة والهواجس تملاء حوانحه وهو ليس ككل الرؤساء يزرع العالم جئتا وذهابا فسفرياته يغدو خبرا من نوع خاص ومكلفة وتصبح هما على الدول المضيفة ،هذا ياهندسة حصاد سنين الانقاذ !! وهل هناك بين ظهرانينا من بتمشدق ويصيح بأعلى صوته (بأن هى لله هى لله لا للسلطة ولا للجاه)؟ والتقيل يا أبو عفان جاى ورا أنت لسه شفت حاجة ؟إنما هى البداية فحسب !!-


#168051 [haj abbakar]
0.00/5 (0 صوت)

06-27-2011 09:59 PM
حاسب كان قلتو ديل ناس الامن الجماعة حايجرجروك وبعدين محاكم وانت عارف النهايه.
الحرامى كان داير يسرق بيسرق عديل او بيقلع حمرة عين اما مسالة التصوير هذه فلا تعنى الحرامى فى كبير شئ والا قام الحرامية باغلاق الاستوديوهات ومحلات التصوير المنتشرة فى العاصمة
والحرامى اذا تجرا وسرق امام هذا الجمع فالمسالة فيها نظر وكلك نظر
والبلد ولله الحمد والمنة تعج بالحرامية وعلى كافة المستويات
وبكرة امشو سوق الحرامية للالكترونيات كان لقيتو كاميرتكم خير وبركة فستعرض للبيع وان لم تجدوها فكلك نظر وعليهو العوض ومنو العوض


#168008 [abuamin]
0.00/5 (0 صوت)

06-27-2011 08:43 PM


يا عثمان افندى عيب كده تبكى على كاميرا بالشكل دا !!!!!!!!

دا درس اتعلمو ........شوف رد فعل الجماهير كان كيف ؟؟؟ سلبى مش كدا ؟؟؟ فى بلاد بره يا عثمان حدث زى دا ( زول يخطف كاميرا من صحافه و الناس بس تتفرج وسلبيه ) بيقولو ليهو قياس راى وسيناريو زى دا لو دفعو ملايين ما يلقو عمليه زى دى اهى جاتكم مجانا !!! موقف الجماهير درس رائع لكل الصحفيين !!! لازم تنحازوا للشعب عشان الشعب يغطيكم !!!!!!!!!!

الله يجمع الكاميرا بس انت اتحزم و اتلزم و طوالى لصاحبك الوالى ود الخدر,,,,,,,الما بنظلم عندو احد و الما رجع للزول........ الما انتحر ........كشكو ....و ..........اولادو... الطشو و هو اكيد عارف السر


#167981 [ابو سامي]
0.00/5 (0 صوت)

06-27-2011 07:47 PM
يا عثمان يا خي سمي الأشياء باسمائها ومتى كنت انت وصحيفتك سلطة رابعة أو خامسة أو عشرين ما انت منبطح حد الانبطاح وأظن أنت متفق مع الجماعة الشالوا كمرتك وأظن حاليا الكمرا بطرفكم لأنك أنت واحد منهم وأصلا لا يمكن يصادروا كمرتك البتصورهم بيها ثم في نظام الماسون لا يحق لك أن تعرف أكثر من المقرر وأنت اليومين ديل سويت ليك رويشات .......


#167977 [علي]
0.00/5 (0 صوت)

06-27-2011 07:36 PM
واحد من جماعتك المتنفذين نطه حرامي سرق دهب المره!! ولانهم مابقدروا علي زعله في اربعة وعشرين ساعه جابو الجرامي!! اها زي مابيقولو جماعتك عن الراجل المابيظلم عندو حد !!ممكن تكلموا يجيب ليك الكمره بعد ما يشيلوا منها الصور!! ماهو زي ماقلته مابيظلم عندو حد!!هو عارف الشال الكميرا منو!!!ووب عليك كان ظلمك !!وعمل ماعارف!!!;) ;) ;) ;) ;)


#167968 [hamid abdeen]
0.00/5 (0 صوت)

06-27-2011 07:20 PM
يقول عثمان ميرغني :-
(ويبقى اللوم والعتب على الجمهور الكبير. جمهور المظاهرة الذين بكل رجالهم فشلوا في حماية السلطة الرابعة التي خفت إليهم لتدافع عنهم وتحمل صوتهم للمسؤولين)
اين كانت سلطتك الرابعة ممثلة في قلمك طوال العشرين سنة الماضية؟
الم تكن كل كتاباتك السابقة هي دفاعا عن الانقاذ وضد هذا الجمهور الذي تلومه اليوم
الان فقط ادركت حاجتك للجمهور؟
واين حاجة الجمهور لك عندما كان في اشد الحوجة لمن يقف معه؟
اتحس انك الان تدافع عن الجمهور بعد ان هجر الجمهور كل اماله وتطلعاته في صحافة شريفة تعكس همومه وما عاد يبالي بما يكتب كثي من الصحفيين من امثالك الذين كانوا عليهم ولم يكونوا لهم
الجمهور الان ادرك انه صاحب القضية وكافح وناضل الى ان نضجت وهي قاب قوسين او ادنى
اما محاولاتك الادعاء بحمايه الجمهور والوقوف بجانبه فهي محاولات في الزمن الضائع لن تمنحك صك براءة.
اما من سرق الكاميرا فهو معروف لديك فيجب عليك ان تبحث عن صاحب المصلحة في عدم نشر الصور ولا داعي للانكار ورمي الاتهامات على لصوص لايعرفون كيف يستفيدون من الكاميرا.
وهذا المقال يبكي على الكاميرا اكثر من بكائه على المدرسة التي سويت بها الارض والتي اغتالت احلام تلاميذ واباء


#167953 [Shah]
0.00/5 (0 صوت)

06-27-2011 07:00 PM
من سرق الكاميرا؟ يا ود ما تشد حيلك معانا و تقول الحقيقة. لسه ما صدقنا إنك فقت من الغيبوبة تسأل سؤال زى ده ما تخاف من الله؟


#167941 [مندي]
0.00/5 (0 صوت)

06-27-2011 06:36 PM
اربعة اشهر علي مرت علي اقتلاع كشك الزول الكان داير ينتحر والاولادو طشوا ولسة ما رجعوا......يا باشمهندس الذى اغتصب الكشك هو الذي اغتصب الكاميرا يعني بالواضح كده ديل جماعة صاحبك ود الخضر الذي لا يظلم عنده احد.... اما الاحتمال التاني وهو الارجح ان تكون المعارضة هي التي سرقت الكاميرا كما قال صاحبك مدير الموية..... القفل البلف ممكن عادي يسرق الكامير ولا شنو؟ وظلموني قفلوا البلف اليلة ما ذنبي


#167934 [عبدالمنعم ]
0.00/5 (0 صوت)

06-27-2011 06:22 PM
يا عثمان من الطريقة التي تمت بها عملية خطف الكاميرا وشجاعة الفاعل اللامتناهية والناس المعاهو المنعوا الناس من ملاحقة الخاطف والركشة المن غير نمر الكانت جاهزة للعملية يتضح لكل زي بصيرة ان القصة منظمة ومحمية والتعليمات الا يتم تصوير كارثة المدرسة وذلك من قبل جهة حكومية !!!

وبرضو بتتكلم عن حرامي وما حرامي !!!! عجبا لك انت وانا نعرفهم وكل الشعب يعرف من يقدر ان يفعل مثل هذا السلوك



اترك الحرامي المرخص وابحث عن الكامير عند صاحب المصلحة من عدم نشر الصور وكشف الحقيقة للشعب والا فاصمت ياعثمان !!!!


#167900 [abubakr]
0.00/5 (0 صوت)

06-27-2011 05:37 PM
يا أخوانا عليكم الله كفاية موضوع كشك ود الخدر والزول الما إنتحر وأولاده الطشوا.خلاص مصارينا ما عادت تحتمل من مغصة الضحك الجاعورة.كفاية يا عصمان رد على الجماعة صاحبك ود الخدر عمل شنو عشان ترتاح إنت ونرتاح نحنا من الأسئلة دي في كل تعليق على مقالاتك.صدقني يا عصمان قبل ما أقرأ المقال على طول أروح على السكرول للتعليقات وأضحك حتى يوشك إن تتقطع أنفاسي وأسلم الروح لبارئها. أرجوك يا عصمان رد على التسآؤلات المشفقة عن الراجل صاحب الكشك.


#167885 [الزول الكان سمح]
0.00/5 (0 صوت)

06-27-2011 05:21 PM

يا عثمان ميرغنى

إنت عامل فيها صحفى متذاكى علينا نحنا ....يا عثمان إنت عارف منو (القلع ) مش السرق الكاميرا بتاعت مصور التيار...ولكنك بدددكم ...

دى رسالة واضحة ..من...................يعنى أعمل حسابكوألزم حدودك

خلى صاحبك ود الخدر المارجع للراجل الما إنتحر كشكو...وأولادو الطشو...يتوسط يرجعا ليك لأنو إيدو لاحقة


#167860 [الساير]
0.00/5 (0 صوت)

06-27-2011 04:54 PM
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

عصمان قال : ذلك يعني أننا جميعاً في خطر !!!!!!!!!!!!!!

يا دوبك يا عتيمونة عرفت نحن في خطر ؟؟

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

حرامي شنو يا عصمان ؟؟؟؟
ده جهاد في سبيل الحكم
هي لله هي لله

الغاية تبرر الوسيلة

يعني تفتكر السودانيين الغبش يغلبهم سراق عادي ؟؟

ده يا عتيمونة حرامي( متأنقذ )

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

الكشك يا عصمان
الحرامي ما يشيل الكشك ويطشطش العيال
الوصية في الذمة

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟


ردود على الساير
United States [hamid la waham] 06-27-2011 10:39 PM
قصة الكشك دى شنو؟؟
على اى حال اشد من اذرك و الشعار هو العار لكل طبال زمار

Sudan [جميل] 06-27-2011 06:29 PM
يا الساير
انت قريب الفاتح جبرا ؟

محنك عجيبة... بس متأنقذ دي قلبت فيها الهوبة
صدق بكون كلامك صاح
بعدين انتو زاتكم نجهتو عصمان ده بحكاية الكشك والزول الاولادو طشو
اها الكميرا البتصور الكشك ذاتها طشت
تعيش يا عزت وتشوف - اقصد تصور - غيرها


#167853 [سليمان قش]
0.00/5 (0 صوت)

06-27-2011 04:48 PM
اها ياعثمان خبر المدرسة شنو ؟بالمناسبة في منطقة الدباسين والعزوزاب هناك ايضا مدرسة سويت بالارض والناس اتجمهرت وجا السيد المعتمد وسُئل حتي عن الانقاض ولم يجد جواب انت دي موضة ولا شنو؟ لكن الكماميرا بتكون طشت مع اوالاد الزول الما انتحر وصاحبك ودالخضر الما بنظلم عندو احد ما رجع ليهو كشكو


ردود على سليمان قش
Netherlands [عبد القادر اسماعيل] 06-27-2011 10:41 PM
ألأخ المحترم عثمان ميرغني .. بعد التحية

إن كان كل ما صوّرت بمقالك هذا صحيحاً .. فالمسؤول و في غالب الأحوال جهاز ألأمن الوطني .. فلتبدأ المساءلة و التحري من هنالك .. و ليُرفع الأمر للأخ عطا رئيس الجهاز مباشرة .. فلا يمكن أن يكون هنالك تجمع أو جماهير غاضبة دون عناصر أمن للتغطية .. إن لم يكن للتداخل مع الجمهور فلرفع تقرير يوضح حجم الحدث .. و هذا من صميم واجباتهم .. عليكم عدم الإكتفاء بطرح الأمر علي الصحيفة و الشكيّة لله فحسب .. تابعوا الأمر بواسطة إدارة صحيفتكم .. إنها هيئة و مقننة و يملكها الناس .. يجب أن يعوّد .. أكرر أن يعوّد كل مسؤول أنه يدير مؤسسة لا يملكها هو .. بل يملكها الشعب .. و أنه قد يتعرض للمساءلة من قبل الناس إن رأوا خللاً يندرج أو يحتمل أن يندرج تحت مسؤليته .. هكذا الأمر .. لا ضرورة أن يتعوّد المسؤول أن الناس تهابه .. حتي و إن كان رئيس الجهاز .. فرئيس جهاز الأمن و رئيس قسم بيع الطوابع ببوستة أمدرمان .. سواسية .. كلٌ له عمل يختص به .. و كلٌ عمله يحتاجه الناس .. و كلٌ يجب علي الناس احترامه لأنه يخدمهم و يقوم بواجبه .. فقط .. ليس أكثر و ليس أقل.. و من كان له رأي آخر .. فليطلبني بواسطة صحيفتكم و أنا علي استعداد للمواجهة حتي يصح ما هو صحيح .. فقد عملنا بأشرف المهن و أرفعها و بأضخم السلطات الممنوحة و المخوّلة و ما خافنا أحد



عثمان ميرغني
عثمان ميرغني

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة