خروج نهائي ..!ا
06-28-2011 08:32 PM

هنــاك فرق.

خروج نهائي ..!

بقلم:محمد أحمد محمد حامد - الرياض ـ المملكة العربية السعودية

جرى توزيع بطاقات استبيان لبعض خريجي جامعة هارفارد الأمريكية الذين سوف يبدأون مشوارهم الحياتي فوراً، وقد جاء في الاستبيان: هل لديك خطة لتحقيق هدفك في هذه الحياة؟ 3% فقط ممن شملهم الاستبيان أجابوا بنعم، و97% كان ليس لديهم خطط لتحقيق أهدافهم، ثم عاد موزع الاستبيان بعد 15عاماً واجتمع بهذه الشريحة التي أجرى عليها بحثه، فوجد أن الذين كانت لديهم خطط لتحقيق أهدافهم وهم فقط 3% قد حققوا هذه الأهداف، وأن مجموع ثرواتهم التي حصلوا عليها تساوي مجموع ثروات الـ 97% مجتمعين، وبهذا تفوق علينا الأمريكان والأوروبيون في كل شيء ليس لأنهم أفضل منا عقولاً، ولكنهم كانوا أفضل منا تخطيطاً في تحقيق أهدافهم. ويتساوى في ذلك المغتربون الذين تركوا الأهل والوطن لتحسين أوضاعهم هل يوجد لأي واحد منهم هدف من هجرته؟ حتى وإن وجد هذا الهدف لا توجد خطة لتحقيقه!! لأن الأمور عندنا تمشي بالبركة فقط، فلان هاجر فأنا أهاجر مثله. فإذا كان هذا حال الرجال فحدث ولا حرج بالنسبة للنساء فالمرأة السودانية ليست ككل النساء معينة لزوجها، بل هي في أغلب الأوقات العائق الأول في تحقيق الأهداف التي من أجلها اغترب زوجها. فلا توجد أسرة سودانية واحدة لديها ميزانية شهرية بمنصرفاتها ولم تكلف نفسها بأخذ ورقة وقلم وتدوين هذه المنصرفات حتى تعرف ما لها وما عليها وكم التوفير المفترض الذي يمكن أن تواجه به أي ظرف طارئ لا قدر الله؟. فمثلاً تذهب الزوجة لزيارة جارتها فتجد عندها طقم من الملايات فتسألها: يا سلام والله طقمك دا حلو جداً، اشتريتيه بكم!! فتقول لها الجارة: تصدقي بـ 300 ريال بس.. يا بلاش بالله عاوزة لي منه واحد ثم تأتيك وهي تحمل الغنيمة، وأول ما تدخل البيت تقول لك بالله إيه رايك في الطقم دا؟ والهف جميل لكن بكم؟ بـ 300 ريال بس!! بس يرد الزوج لكن ميزانيتنا لا يوجد فيها هذا البند. فتصيح في وجهه: بالله سيبك من بند وكلام فارغ، يعني نحنا لغاية ما نسوي ليهو بند حيكون خلص. ذهبت مرة من المرات إلى السوق ـ وأنا من الناس الذين لا يحبون زيارة الأسواق إلا إذا حشرت في الزاوية ـ(مع الاعتذار للأستاذ أبو الجعافر)ـ فوجدت عدداً من السودانيات في معرض للثياب السودانية، قالت إحداهن لصاحب المحل: بكم الثوب المعلق داك، فقال لها صاحب المحل: دا بـ 400 ريال، والله يستاهل اسمو شنو؟ دا اسمو خروج نهائي. خروج نهائي! رددت الكلمة بتعجب!! بري والله مجان ما عاوزاه، الكلمة دي كارهنها في الجوازات جيتو لصقتوها لينا في الثياب الشر بره. هذا هو حالنا فكيف نستطيع أن نبني الأوطان ونعمرها، ونحن السودانيين بالذات من الشعوب المعمرة في الاغتراب ولكن بلا طائل. أما الكوادر السودانية المؤهلة من أطباء ومهندسين وأساتذة جامعات وفنيين فإن بصماتهم واضحة للعيان في أي بلد يهاجرون إليه، وهم متميزون في أعمالهم بشهادة الجميع، ولكنهم زي القرع يزرعوه جوه الحوش وإنتاجه بره.


(بقلم:محمد أحمد محمد حامد - الرياض ـ المملكة العربية السعودية)..

التيار


تعليقات 13 | إهداء 0 | زيارات 3526

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#169855 [mahmoudjadeed]
0.00/5 (0 صوت)

06-30-2011 06:16 PM
بعض المتداخلين لا يفرقون بين كاتب المقال وناقلته على كل حال الموضوع واقعي وجميل هناك دواليب ملآى بالملايات والتياب بدون أي داعي غايتو الا يمشو يفرشو ملاياتهم وحاجاتهم دي في الشارع ويقعدوا لو جاتهم كعه لا سمح الله . لا أبرئ نفسي مما أقول ولي 25 سنه في الغربة وما زلت أرتجف من الخروج النهائي قولوا التقولوه دي الحقيقة المرّة كل دخلي في الايجار والأكل والشراب وثلاثه أبناء شهادة عربية في جامعات السودان الخاصة حرم لو كفيتهم تكون ما قصرت أبداً أبداً بالاضافة للجدعات البينية للأهل هناك وربنا يعيننا على ذلك ( آمين ).


#169636 [الباشا]
0.00/5 (0 صوت)

06-30-2011 12:25 PM
وييييييييييييين الاغتراب والسعودية اذا انا باخد 7000ريال ومابوفر ريال كلو رايح ايجار ومصاريف مدارس واكل وشراب انحنا قاعدين هنا بس عشان نربي اولادنا والواحد لو عارف سكة مه الحرامية الفي السودان اعضاء الموتمر الحرامي كان رجعنا من زمان


#169455 [سلمي]
0.00/5 (0 صوت)

06-30-2011 02:35 AM
تحياتي كيف لنا ان ندق خروج نهائي وللسوداني التزامات لا يستطيع احد حتي طوب الارض ان يطيقها بعد ان يفيق منها تجية في رويحتة الحلوة حيث يجد ان ابناءة قد وصلوا الي اعتاب الجامعات فكيف باللة تجدي خطط واستراتيجيات كيف يتمكن من الحاق ابناءة الذين يسمونهم شهادة عربيةبافضل الجامعات السودانية وماادراك ما الجامعات السودانية كيف توفر لهم افضل الكليات والجامعات في وطنهم كيف توفر لهم العيش الرغيد كيف لمن يحمل اعلي الشهادات ان يوفر كل ذلك بمرتبة فقط وليس له في الاختلاس والمال الحرام اذا استطيعتوا حلها فسندق مليون خروج;(


#169099 [النصيح حديدو]
0.00/5 (0 صوت)

06-29-2011 01:22 PM
بعنوان: ما نخطط له بالليل تهدمه السياسة بالصباح
اول ما جينا للمملكة خططنا لنمضي 4 سنوات فقط والخطة ماشة تمام التمام ولكن فجأة تبدل الحال في السودان ودخلت عفواً (المجاعة) ايام الدمقراطية الثانية ، هل احدكم يذكر (عيش ريغان) ولمن لا يذكر (عيش ريغان) عبارة اغاثة للسودان من علف الخيول الامريكية!! (وهذه حقيقة وليس تجني) ، المهم جاءت هذه السنوات العجاف فأكلن ما قدمن لهن وتبعثرت الخطط وطارت اوراقها، لم نخلص من هذه الا وجاءت الانقاذ (ولك تغيير ثمنه) فدخلنا في دوامة الحصار الاقتصادي ، وتركزت تقريباً كل خطط المغتربين على انقاذ اهاليهم في السودان ولعمري ذاك هو التخطيط الذي كانت تحتاجه تلك المرحلة ، انا شخصياً غير نادم لانو ان شاء الله نلقاه قدام.
ودمتم في رعاية الله وكل سنة (تخطيط) وانتو بخير


#169064 [ابوعلا]
0.00/5 (0 صوت)

06-29-2011 12:34 PM
الاخ كاتب المقال لا ادرى هل هو لصيق بما يجرى فى السودان ولا مجرد كلام طق ليه فى راسه وعايز يكتب فيه . اولا اخى كاتب المقال لاى برنامج لابد ان يكون هنالك اهداف ولكن الاهداف احيانا تتبدل بما تقتضيه الضرورة حالات كثيرة لسوداني ما بعد الانقاذ . ناس لقت نفسها مرمية فى الشارع بسبب الصالح العام او رفض التعيين لسبب انتماء اهلك الحزبى كما فى حالتى حتعمل شنو ؟ اول شئ تحاول المخارجة من البلد بأى ثمن دون الرجوع الى اى برنامج فقط برنامجك هو النفد بجلدك . بعد ان يتحقق لك الخروج من البلد ووجود عمل بتلقى اخوك فى البلد يا دخلوه بيوت الاشباح او شالوه للصالح العام على اقل تقدير . بكون عندك اخوان فى المدارس واخوك عنده اطفال عايزين اكل وشراب وكسوة ومرة عايزه يكسوها ويأكلوها ويشربوها وهو لا حول اله ولا قوة واب وام كبيرين فى السن عايزين رعاية . اخى كاتب المقال هذا هو حالنا بالله عليك قول لى بس كيف يكون عنك برنامج عشان توفر منه لانو اصلا البرنامج ناس الانقاذ وضعوه ليك جاهز. عشان كده اى مغترب سودانى فى اى بقعة من بقاع الارض بكون شايل اهل بيته و الجيران معاهم ولذلك لن يكون هنالك برنامج ولا توفير وربنا يجعل لينا البنسويه دا فى ميزان حسناتنتا وما دايرنا نلم قروش ولا شئ فقط الستر وما يرضى الله بالحلال . اللهم اكفنا بحلالك عن حرامك اللهم لاتجعلنا ممن يأكل مال اليتيم اللهم اجعلنا ذخرا لاهلنا وسندا لهم بما يرضيك يارب العالمين.وفى الختام مافى حد حياخذ من هذه الفانية شئ الا من اتى الله بقلب سليم . اللهم احسن خاتمتنا يالله يا حنان يا منان اللهم امين.


#169009 [شاهد العصر ]
0.00/5 (0 صوت)

06-29-2011 11:24 AM
افهموها
===========
فترة اغتراب السوداني لا تقاس بعدد السنين التي يقضيها في الغربة وانما بما انجزه فيها لانه يختلف عن الجنسيات الاخري بما يتحمله من مسئؤوليات وما يلزمه من تكافل , وما يتقاضاه ليس حكرا عليه وعلي اسرته فالكل فاتح ليهو خشمو حتي الدولة 0
والغربة فيها معاناة يحس بها من جربها لكن المعاناة الحقيقية هي التي نحس بها ونحن في اوطاننا حيث يعجز البعض عن تقديم ابسط الاشياء لاقرب الناس ثم ان الغربة صارت للبعض مجرد شيل حنك للعقاب , والانسان دائما يبحث عن الافضل وللغربة مغرياتها منها 0
1 / ما يتقاضاه المغترب من مرتب وامتيازات اخري مقنع لمجهوده العملي ومؤهله العلمي 0
2 / الاحترام والتقدير الذي يتلقاه من الجميع 0
3 / ما يتوفر من تطور في القدرات ومواكبة الستجدات العالمية 0
4 / الاحساس الدائم بالمساواة في الثواب والعقاب 0
5 / جو العمل المناسب وتوفير كل سبل انجازه بالطريقة التي ترضي العامل وصاحب العمل 0
واشياء اخري كثيرة الكل يعلم بها 0


#168925 [عبد الله ]
0.00/5 (0 صوت)

06-29-2011 09:07 AM
عنوان المقال أوحى لي بخروج الرجل ( الراجل بتاعنا )( الراجل الراجل ) ( الراجل غير الراجل ) وهو ابن ( راجل ) حكى ذلك عمي وراءه رأي العين وشهد على ترجله . وعمي مازال حيا يرزق .

الخروج النهائي في هذه الحالة يكون سياحة .
أما الخروج النهائي بالمعنى الحقيقي في المقال فهو موت سريري .

ومن أسباب الموت السريري هذا ( عدم خروج الراجل )
لكن نخشى إذا خرج الراجل أن نموت ( صدمة )
والفرق بين الموت السريري والموت صدمة جد كبير

من لم يمت بالسيف مات بغيره تتعدد الأسباب والموت واحد
ربنا يحسن خاتمتنا .




#168830 [العركى]
0.00/5 (0 صوت)

06-29-2011 12:00 AM
القال ليك منو انو السودانيين ماعندهم شغلة بالتخطيط ؟ عندك الكيزان ديل شغالين يخططوا عشان امسكو السودان دا من اواخر ايام حكومة نميرى والاهداف شغالين يحققو فيها فرادى وجماعات وعلى عينك ياتاجر وكل السودان اتكوزن بس الباقى انتى بس!وبعدين انتى من الناس الماعندهم .شغالة معارضة على الورق وبس بدون فعل.


#168816 [ابو البنات]
0.00/5 (0 صوت)

06-28-2011 11:41 PM
يا استاذ ابو العبيد الكتب المقال ما الاستاذة منى شوف نهاية المقال بين قوسين وحقو تقرا المقال دة تاني ماتهاجم ساي وفعلا المغتربين السودانيين ماعندهم تخطيط ولو الواحد عندو حكومتنا الرشيدة مابتساعدو يرجع والله المستعان


#168807 [د.بشير]
0.00/5 (0 صوت)

06-28-2011 11:31 PM
سؤال بسيط للاخت الكاتبة.....ما هو العلاقة بين فحوي ومقصد المقال وبين عنوانه والنكتة التي حشرت حشرا في الموضوع؟؟؟؟؟


#168734 [Elmualim]
0.00/5 (0 صوت)

06-28-2011 09:27 PM
Ms. Mona, I think the difference between us and the people of the West is the restrains imposed on people by the culture. The Western culture highly influenced by business culture and thus why people are very calcualative and less emotional, while our culture is highly influenced by nomadic culture which put more emphasis on less calculation and high emphasis on social obligations. Thanks


#168731 [وحيد]
0.00/5 (0 صوت)

06-28-2011 09:27 PM
واللة المقال دا زعلنى شديد وعمل لى طمام......لكن يا بت الناس المغترب يوفر كيفاذا كان امة وابوة واخوانة واخواتة وخيلانة وعماتة كل يوم دايرين قروش.....اللة يلزمنا الصبر ويدينا العافية .........مهما كان هنالك من اهداف فان هنالك من يدمرها بطريقة مباشرة او غير مباشرة.........


#168715 [ود العبيد]
0.00/5 (0 صوت)

06-28-2011 09:06 PM
افضل منا عقلا بستين الف مرة يا بت الناس التخطيط دائما لمشروع معطيات التحطيط ليهو موجودة اما ان توجد شئا اصلا ماموجود هنا التفاضل في العقل 00 اتفرجي على الابحاث العلمية في معاملن او شوفي ناسا بتعمل في شنو 0
سيبك من الاسرة الدولة العندها خبراء في الاقتصاد والتخطيط التقارير في اول العام شئ وواقع بقية العام شئ اخر
الكوادر المؤهلة التي اشرت اليها دي تأهلت في الغربة والبصمة التي تشيرين اليها هي بصمة الرعيل السابق قبل ان تفسد الانقاذ التعليم 0قريبنا مهندس استوفد في السعودية في شركة كهرباء ذكر لي بكل صراحة انهم تعلموا من العمال الفلبينيين بالرغم انه في السودان كان مهندسا في كهربة ولاية كبيرة
بعدين ماتخمينا بهارفارد وغيره يا انت كضابة او العمل الاستبيان كضاب او الصيفة ناشرة الخبر
ومين قالك السودانيين ما بخططوا بالله عليك كم انقلاب خططوا ليهو ونجح
ثم ان السودانيات بالتوب شينات وبالعباية اشنأ وبالبنطلون ملولوات غايتو ما باقي ليهن الا يمشن ملط0


ردود على ود العبيد
Saudi Arabia [حامد ابوعبدالمجيد ] 06-29-2011 10:55 AM
تحياتي وسلامي
اقتباس (ثم ان السودانيات بالتوب شينات وبالعباية اشنأ وبالبنطلون ملولوات غايتو ما باقي ليهن الا يمشن ملط0 )انتهى
كلامك ده شين خالص وفيو اساءة لامي واختي ومرتي انا ده حامد والدخل المراة السودانية ولبسها وتوبها الشريف هنا شنو ولا بنطلونها العزيز ولمن يمشن ام فكو بضرب ليك ياسبع وفحل الفحول علي اليمين اتايلموك في ابوجنزير ويولعو فيك ماخسارة
وشغلك ده ماسواهو راغب علامة الممسح بالكريمات اظنك زيو واحد علي اليمين التوب السوداني ده لمن تشوفو في اي محل قرونك يقيفو
وامشي اقرا ابو الجعافر تلقا بقية الرد على امثالك والمتلك الواحد مايوسخ بيو ايدينو ناس الراكوبة مفروض الحتة دي تشيلوها كان رحمتونا من الرد علي امثاله

تصبحوا علي وطن

Saudi Arabia [Wally] 06-29-2011 12:27 AM
يا ود العبيد خليها تتفشى بالكلام ما تعمل ليها حواجز الكلام يقال وتقرير الصواب مرهون باحتمالات فهذا رايها والاستاذة منى ابوزيد كتابة لا غبار عليها


منى ابو زيد
منى ابو زيد

مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة