المقالات
السياسة
ارشيف مقالات سياسية
غضـبك جمـيل زي رقصـتك .. فهي سـودانية 100%
غضـبك جمـيل زي رقصـتك .. فهي سـودانية 100%
07-09-2010 04:53 PM

غضـبك جمـيل زي رقصـتك

د.ابومحــمد ابوامنــة
[email protected]

المرة دي قلتها بصراحة وبوضوح انها سودانية 100% ولن تتنازل عنها ابدا.
عفيت منك يا الكيك!
زمان كنت وين يا الحبيب؟
سيادتك كنت ساكت السنين ده كلها والناس مستغربة ليه الريس ساكت. ولكن المثل يقول احذر غضب الحكيم. فانت لما زعلت من اخوك في شمال الوادي فقعتها وقلت حلايب سودانية.
والله غضبك جميل زي رقصتك. لكن والحق يقال حرمتنا من رقصاتك الجميلة. لكن الجو شايفه ما مساعد عليها.
الاجواء مكهربة جد..جد.
علاقتنا مع دول الجوار نزلت للحضيض, دول حوض النيل زعلانة علشان وقفتنا مع الحبيبة مصر, ليبيا زعلانة علشان همشنا دورها في مفاوضات دارفور, ومن ليبيا هدد خليل يخش الخرطوم. ومصر استقبلت خليل ورحبت بيه وفاتحة باباها لكل الحركات اياها. وزي شجعت الجنوبيبن للانفصال, المهم ادتهم الضوء الاخضر, وقالت من جانبنا ما فيش مشكلة لو انفصلتوا. ومفاوضات الدوحة طرشقت أو علي وشك, والانفصال قادم لا شك, وقروش البترول ضاعت عليك, الاسعار مولعة نار, السكر دسوه ورمضان علي الابواب, والاطباء يتملولوا ويمكن يعملوا اضراب من جديد لانه ما ادوهم استحقاقاتم بالكامل, والمرة الجاية الاطباء ما براهم البضربوا, فكل البلد في ازمة.
وفوق لدا كله اكامبو حايم قانص ليك وفي ايده شايفه شايل الكلابيش.
مش دا بالله يا ريس جو بتاع زعل؟ رقيص ايه في الزمن الضايع!
خليك في زعلتك, والمولي يطولا كمان.

اخوك في شمال الوادي مقتنع انه حلايب سودانية, لكن يوم نويت تصفيتو في اديس ابابا قال يقرصك شوية, وقام احتل حلايب وكان ما عنده مانع يخش لحد الخرطوم لو اعترضت وحركت اصبعك, كان ناوي يشيلك بره.
لكن انت حكيم واخدتها علي اللبادي. وسكت وسكت وسكت..السنة وراء السنة .. لحد امتي بقي؟ لحد ما قام الشقيق استقبل خليل وقال يشارك في حل مشاكل السودان كمان وادي النور الاخضر للانفصال.
يعني وصل الخط الاحمر فاعلنتها علي طول ان حلايب سودانية.
ان شاء الله غضبتك تستمر شوية لقدام لانه في مثلثات تانية من بلادنا محتلة زي الفشقة والمثلث في اقصي الشمال الغربي الادوه الانجليز للملك السنوسي. ديل برضه خليهم في بالك والخطبة الجاية زكر القدافي وزناوي بانو دي اراضي سودانية.

وقبل ما تفك الغضية لازم نعمل حاجة نحرر بيها حلايب اول باول.
باخوي واخوك مما ممكن.
بالجيش مما ممكن طبعا. بمجلس الامن؟ ممكن بس ياخد وقت.

انا عندي اقتراح جميل زي غضبتك.

يمكن اخراج الاحتلال بطريقة سلمية وبسيطة.
يجب تكوين حشد هايل .. هايل جدا من الجماهير ويشكلوا مسيرة مليونية تمشي من بورتسودان باللواري والبكاسي والبصات وبالتاكسي حتي بوابة حلايب ويشلوا البوابة والسور ويختوها شمال شلاتين. اخوانا في الجيش المحتل ما ممكن يطلقوا النار علي مسيرة سلمية تتابعها كل الفضائيات ووسائل الاعلام الدولية وخصوصا سيادتك وبجانبك أيلا حتكونو علي راس المسيرة.
لما المصريين جوا احتلوا المثلث سفكوا دماء كتيرة من قوتنا النظامية, ومن المدنيين اللي يقاوموا الاحتلال حتي اليوم. لابد عندما نصل هناك نترحم علي ارواحهم الطاهرة البرئية, وان نعامل اسرهم نفس معاملة اسر الشهداء في باقي القطر, ونخلد اسماءهم باطلاقها علي المدارس والشوارع في كل انحاء الوطن.


تعليقات 3 | إهداء 0 | زيارات 1193

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#6302 [وحيد]
0.00/5 (0 صوت)

07-10-2010 09:19 PM
غضب الريس الزي رقصته غضب فشوش و مضروب و شفناه قبل كده بيهدد اي قوات دولية تدخل دارفور و انها حتكون مقبرتها و ان سيادته حيكون قائد المجاهدين هناك و اكد غضبه بقسم مغلظ طلع فشوش و طلاق ثلاثي برضو طلع فشوش فما زالت \" ام الفقرا\" و ام ...... في عصمته و القوات الدولية في دارفور و الجنوب و الخرطوم و جبال النوبه و في راس المشير. حلايب سودانية حقيقة لكنه عند المشير كلام ساااااكت لانها اصبحت مصرية ثمنا لمحاولة اغتيال الرئيس المصري


#6218 [مسلم]
0.00/5 (0 صوت)

07-10-2010 03:38 PM
اسلوب رائع يادكتور ياريت تطلعنا علي مقالاتك التي لم يراها القارئ


#6069 [النورس]
0.00/5 (0 صوت)

07-10-2010 02:22 AM
حكاية واقع مرير بنكهة وردية - لك التحية ايه المبدع


د.ابومحمد ابوامنة
مساحة اعلانية





الرئيسة |المقالات |الأخبار |الصور |الفيديو |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة