يا الرخصة .. يا الموتر
07-10-2010 01:21 PM

ساخر سبيل
يا الرخصة .. يا الموتر

الفاتح جبرا

أخبرنى شقيقى بأنه يود شراء (موتر فسبا) كيما يستغله فى مشاويره من وإلى أماكن عمله المتعددة إذ أنه يعمل بالأعمال الحرة :
- لقيت ليا (موتر نضيف) عاوز أشتريهو من واحد وقال عاوز فيهو (2 مليون بالقديم)
- والمشكلة وين؟
- لا مافى مشكلة بس عاوزك تمشى معاى بى عربيتك عشان أمتحن بيها عند ناس المرور عشان عاوز فى الأول أعمل ليا رخصة سواقة قبل ما أشترى الموتر
بالفعل أخذ شقيقى معه (إتنين مليون وميتين ألف) على اساس أن إتنين مليون ثمن الموتر وميتين ألف هو الحد الأقصى (الذى يعتقده) لقيمة رسوم إستخراج الرخصة .
وصلنا إلى مكان إصدار الرخص حيث قمنا بمقابلة الضابط المختص:
- ياسعادتك الحقيقة عاوز أعمل ليا رخصة سواقة ملاكى وعاوز بس أعرف الرسوم والإجراءات بتاعتا
- عندك رخصة قبل كده ولا أول مرة
- أول مرة
- طيب فى الحالة دى بتجيب لينا صورة فوتوغرافية وبتملأ الأورنيك ده وبتدفع الرسوم بتاعتو
- ورسومو كم؟
- مية وسبعطاشر جنيه
- خلاص كده ؟ دى الرسوم كووولها؟
- لا لسه .. بعد ده بتمشى لى واحدة من مدارس قيادة السيارات الأنحنا متعاقدين معاها تقوم تدرب معاهم شهر كده
- وديل رسومهم كم ؟
- خمسميت ألف !
- خلاص بعد أمشى المدرسة دى أجى أمتحن وتدونى الرخصة كان نجحتا؟
- لا لسه .. بعد ما تنتهى من (مدرسة قيادة السيارات) بنوديك (أكاديمية المرور) بتاعت الشرطة عشان تتعلم !
- (فى إندهاش) : طيب أنا ح أمشى مدرسة قيادة السيارات عشان شنو؟ هم مش مفروض يعلمونى؟
- ناس مدرسة القيادة ح يعلموك العملى بس !
- وفى أكاديمية امرور ح تعلمونى شنو؟
- فى أكاديمية المرور طبعن ح نعلمك النظرى
- وأكاديمية المرور دى رسوما كم ؟
- ميتين وتمانين ألف !
- وخلاص بعد ما أتم الكورس النظرى بتاع الأكاديمية ده أجى أمتحن وتدونى الرخصة كان نجحتا؟
- لا لسه .. لازم تمشى الفحص الطبى ويكشفو عليك عشان يعرفوك لائق طبياً !
- وده رسومو كم ؟
- ..........................
- خلاص بعد كده كان ناس الفحص الطبى ديل لقونى لائق أجى أمتحن وتدونى الرخصة كان نجحتا؟
- لا لسه .. بتجينا هنا تدفع أورنيك خمسطاشر بتاع المالية !!
- والكنتا بدفع فيهو داك شنو طيب ؟
- ديك رسوم بس ما بى أورنيك خمسطاشر
- وطيب أورنيك خمسطاشر ده رسومو بى كم ؟
- رسومو مية تمانية وتسعين ألف
- خلاص بعد ما أدفع أورنيك خمسطاشر ده أجى أمتحن وتدونى الرخصة كان نجحتا؟
- أيوااا ... كده ممكن تمشى تمتحن طواااالى بس بعد ما تدفع تااانى مية ألف !
- ودى بتاعت شنو كمان ؟
- خمسين ألف لإختبار (الخلف) وخمسين ألف لإختبار (الشارع)
- أها وكان نجحتا فى الإتنين ح تدونى الرخصة ؟
- طبعن أكيد بس بعد ما تدفع دمغة بى خمسة جنيه !!
كان الضابط يحكى وشقيقى يقوم بتدوين قيمة الرسوم على ورقة وضعها على رجله وما أن إنتهى حديث الضابط حتى بادره شقيقى قائلاً بعد أن قام بتضريب المسألة :
- يا سعادتك يعنى هسه الرخصة بتكلف ليها زى مليون وميتين وشوية مش كده ؟
- أيوه بالضبط كده .. (مستطرداً) ده لو نجحتا من المرة الأولى عشان لو ما نجحتا من المرة الأولى فى رسوم ح تدفعا تانى زى رسوم الخلف والشارع !
- (شقيقى يبتسم فى مرارة) : تعرف يا سعادتك دى ما المشكلة !
- طيب المشكلة وين ؟
- المشكلة إنو فى الحالة دى الواحد يطلع الرخصة وإلا يشترى الموتر؟
كسرة :
- نرجو من أخواننا فى الطيران المدنى أن يمدونا بتكلفة إستخراج (رخصة قيادة الأير بص) !!

الرأي العام


تعليقات 10 | إهداء 5 | زيارات 5867

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#29211 [dr_islam ]
0.00/5 (0 صوت)

10-01-2010 03:22 PM
بالجد كسرة ياجبرا وكسرة مرة كمان


#6714 [adam]
0.00/5 (0 صوت)

07-12-2010 05:07 PM
مازودتها حبا يافاتح جبرا واخوك ده اكان وين وقت الرخصه ميه الف اكان ماعندو الماتين لانو هسى دخلو ارتفع بقى عندو مليونين ودى عمليه نسبيه عرفت ياجبره


#6662 [نادر محمد]
0.00/5 (0 صوت)

07-12-2010 02:42 PM
انا خشيت المزاد ايه رايك ياشيخ جبرا بى 400 الف قبل ان تقوم من مقامك هذا وهى لله هى لله لا للسلطه ولا للجاه ولو عايز الموتر كمان قول الجمله دى وراى


#6601 [ابو صالح]
0.00/5 (0 صوت)

07-12-2010 10:17 AM
يا استاذ جبرة خلي اخوك دا اسلمنا خمسمية الف ويستلم رخصة تقيلة وهو قاعد في بيتو ، نحن في زمن حكومة المشروع الحضاري عندك تاخد الانت عايزو ، ما عندك اعمل نايم


#6424 [محتار]
0.00/5 (0 صوت)

07-11-2010 01:43 PM
والله دي مشكلة كبيرة معناها الواحد يعمل الرخصة بس ومايشتري لا موتر ولا عربية ابو الرخا


#6368 [ابومحمود]
0.00/5 (0 صوت)

07-11-2010 10:28 AM
ربنا يديك الصحة والعافية استاذنا الكبير الفاتح جبرا .
وحقيقة كل يوم تثبت انك اهل لمحبة الناس واحترامن .


#6342 [ابو اسامة]
0.00/5 (0 صوت)

07-11-2010 05:20 AM
نحب السودان والسودان اجرى فى عروقنا كما يجرى الدم .. سبحان الله رخصة تكلف
مليون وشوية معقول ياناس ؟ جبرا ده مخرف ولا جنا .. ابدا جبرا مامخرف ولاجنا
جنت الحكومة وخرفت الحكومة والجهجية تاهوا وفقدوا البوصلة واتحداكم شوفوا
اى واحد ليه علاقة بالانقاذ حتى لو كان الواحد من الاقرباء تحس إن هذا الشخص
غير سوئ وتحس إن غير مستقر نفسيا وفى المجتمع تجده شارد الذهن وغير طبيعى
اللهم اشغل الجبهجيه فى انفسهم اللهم شتت شملهم اللهم افتنهم فى بعضهم إنهم
لا يعجزونك يارب


#6299 [sudani]
0.00/5 (0 صوت)

07-10-2010 09:07 PM
بارك الله فيك اخ الفاتح جبرا ... ذهبت قبل فترة لامتحان الخلف وكنا 8 ممتحنين .. تخيل لم ينجح احد ... لان الامتحان تعجيزى لاكل اموال الناس بدون وجه حق ... وبعدين مافى معاير واضحة تحدد ابعاد الامتحان والمسالة كلها متروكة لتقدير العسكرى والضابط !!!
والله اتحدىالجنرالات الكبار فى المرور ان ينجحو فى امتحان الخلف !!!
وحقيقة كلو يوم الواحد بكره الحكومة اكتر .... الله لا رحم الكيزان ولا البشير اللهم اخذهم اخذ عزيز مقتدر .
والله المستعان


#6220 [محمد خير]
0.00/5 (0 صوت)

07-10-2010 03:47 PM
انت يا استاذ شغال لينا من الارشيف \"لسعة\" وما براك كمان في جماعة شغالين من ارشيفك ذي عبد الله علقم ده في الراكوية تحت عنوان مراجع هامة جايب عمودك \"بضبانته\". قايتو حزرنا وهو \"لابت\" حتي الان شكلو حيختفي مثل *****.


نص التعليق التحزيري :
استاذ علقم, هذه المراجع اذا كنت لا تعلم ماخوذة من عمود الاستاذ الفاتح جبرا \" ساخر سبيل\" بعنوان \"كانو عارفين\" بتاريخ 3\\7\\2010 ارجع للارشيف بموقع الاستاذ http://www.alfatihgabra.net/ ....
كله الا الاستاذ جبرا كفاية ***** بعد شوية انت كمان تقول ده بتاعك وتطالب بيه


#6188 [سامر]
0.00/5 (0 صوت)

07-10-2010 01:32 PM
رايك شنو في الزول البجيب ليك الرخصه في مكانك من غير ما تمتحن بس جيب 750 الف


الفاتح جبرا
الفاتح جبرا

مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة