فنى ساااااكت
07-06-2011 01:06 PM

ساخر سبيل

فنى ساااااكت

الفاتح جبرا

عندما يود الكاتب (أى كاتب) أن يكتب مقالاً أو عموداً فإنه يبحث عن الفكرة فإذا وجدها يقوم بوضع عناصر ومحاور يناقش من خلالها فكرته حتى يكتمل المقال .. بالنسبة للعبد لله لا أجد خلال مسيرتى فى الكتابة مشكلة إذا وجدت الفكرة .. مشكلتى دوماً هى (الفكرة) إذا وجدتها عندها تأتى الكتابة دونما (عصلجة) .. لم تصادفنى فكرة إستعصت علىّ فى أن أحولها إلى (ساخر سبيل) ما عدا فكرة اليوم (غلبتنى عدييييل كده).. وهى تصريح طالعته عيناى على الصفحة الأولى بإصدارة أمس من صحيفة (الرأي العام).
التصريح يا سادتى الأفاضل للسيد البروفيسور عبدالله الصادق مدير هيئة المساحة أدلى به أمس الأول يقول فيه بأن خارطة السودان بعد الإنفصال (جميلة) وأن شكلها الهندسى (جذاب) !
العبدلله إحتار حيرة ما بعدها حيرة من تعليق (البروف)، فلأول مرة بعد أن (هرمنا) ونحن فى هذا السن المتأخر نعرف بأن من (خرائط الأقطار) ما هو جميل وما هو (شين) يقطع الخميرة ..(ومش كده وبس) كمان ما هو جذاب يجذبك بأناقته وشكله الهندسى (الفاتن) وما هو (عااادى) تمر عليه مرور الكرام دون أن يلفت الإنتباه .
فجأة وجدت نفسى أنادى على طفلى (ناجى) ذي العشرة اعوام طالبا منه أن يأتى ومعه (الأطلس) وما أن حضر امامى حتى خاطبته قائلاً :
- كدى أفتح الأطلس ده وورينى أجمل خريطة بتاعت دولة.
- ودى يا بابا أعرفا كيف؟
- يكون شكلها الهندسى جذاباً !
- أنا غايتو يا بابا ما بعرف هندسى وما هندسى وجذاب وما جذاب .. أنا بحب خريطة السودان وممكن هسه أرسمها ليك من راسى !!
أصابتنى غصة فى الحلق وطفرت من عينى دمعة حزينة إذ لن يكون بمقدور ناجى أن يرسمها بعد الآن .. تذكرت حينما كنا أطفالاً فى عمر ناجى نرسم على كراسات (الهندسة البيضاء) خريطة السودان التى تقبع داخل نفوسنا عن ظهر قلب ونتفنن فى رسم وتلوين أنهارها وغاباتها ووديانها !
الآن .. أصبحت تلك الخريطة التى حفرت فى مخيلة وذهن كل سودانى (وحشة) وشينة وغير جميلة ولا جذابة !! يا الله .. كيف لمن تبتر ساقه أو يده أن يقول له الطبيب أن شكلك الآن أجمل .. وأنك تبدو أكثر جاذبية من قبل ؟؟
أن يفارقك عضو ولدت به وعشت معه ويبتر إلى الأبد، فالحزن واحد سواء كان البتر بسبب (السرطان) أو (حادث حركة) !!
لقد أجهدت ذهنى كثيراً لأفهم تصريح السيد البروف مدير المساحة ولما أعيانى التفكير حاولت أن أشرك الآخرين :
- (لينا عمر (19) سنة- طالبة جامعية) : أنا أفتكر البروف عاوز يقول ليكم ... ياااااى الخريطة كده بقت تجنن !!
- (حسن عمرين - (54) سنة -سواق ركشة) : شوف يا استاذ الزول ده الظاهر متخصص وبيعرف الخريطة الجميلة الجذابة من الما جذابة عشان كده أنا بفتكر ما تدخلوا معاهو فى نقاش و(عنكبة) !
- (حنان مسكول (37) سنة - حنانة) : أنا بفتكر والله كلامو صاح .. أصلو الخرائط دى زى نقشة الحنة فيهن واحدات جذابات وواحدات عاديات ساااكت !
- (حسن أبنص- (28) سنة - ميكانيكى) : المعلم ده عاوز (يحنكنا) يا استاذ ساااكت .. معقولة الخريطة بعد (الزعمطة) الحصلت ليها دى تكون جذابة ؟
- (عوض أنفاس- (92) سنة - عاطل) : بالله لو لقيت ليا الزول ده أسألو ليا قول ليهو خريطة (كوستاريكا) كيف؟
كسرة :
التحدث عن أمر هامشى و(غير مهم) .. وترك ما هو (عميق) يذكرنى بتلك الطرفة التى تقول بان جيران مدير أحد مصانع الأدوات الكهربائية قد أخبروه بأن أحد المهندسين الذين يعملون تحت إدارته دائم الوجود فى منزله اثناء غيابه وحتى يقنعوه بذلك طلبوا منه أن يجلس معهم فى مكان بعيد ليرى بأم عينيه (وقد كان) .. وما أن خرج الرجل من منزل المدير حتى صاح الأخير :- لكن يا جماعة ده ما مهندس .. ده (فنى) ساااكت !!



تعليقات 26 | إهداء 5 | زيارات 6167

خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook




التعليقات
#174431 [محمد فائق]
0.00/5 (0 صوت)

07-08-2011 01:33 PM
كلام المهندز صاح (هو مهندز ضيكور ولا شنو)

بعدين انت ما شفت شكل السودان بعد الانفصال
جميل جدا .......زى الفستان المشرشر من تحت

الله يشرشر اللى كان السبب



;)


#173947 [ابو العضل]
0.00/5 (0 صوت)

07-07-2011 03:14 PM
ياجبرا صحى الفهم قسم البروف بيقول ليك شوف خريطة الامريكتان العاملة ذى السياميان ثم ثانيا هما داخل الموية وكل يوم ضارباهم موجات الموية وما بتعرف ليهم حدود ونحن يا فرحتنا محاطين بافريقيا الوسطى واثيوبيا وبقية العقد الفريد من الدول المجاورة وديك ضارباهم امواج البحر تقول عليهم نجاسة ونحن مابينوبنا إلا موجات الهجرات الجماعية وجايننا كراعم ما بتتبلى!! تقول نحن ناقصين !! فهمت كده يا كوتش ؟ولا نزيدك شرح؟-


#173930 [عقرب]
0.00/5 (0 صوت)

07-07-2011 02:44 PM
و خريطة زمبابوى كيف؟؟؟


#173895 [هاشم ابورنات]
0.00/5 (0 صوت)

07-07-2011 01:52 PM
خريطة عاملة زي السروال الواقع وفي رواية زي الزول الشروم العندوا سن مكسورة ثم واحدة نصيحة والبعدها مقلوعة


#173876 [zoal]
0.00/5 (0 صوت)

07-07-2011 01:30 PM
لكن يا جبرة دا ما بروف سااااااااااااااااكت!!!!!!!!!!!!


#173849 [الزول الكان سمح]
0.00/5 (0 صوت)

07-07-2011 01:00 PM

يا أخوانا المعلقين

عليكم الله المابيستوعب إيماءات ونغزات وغرزات ساخر سبيل وما يرمى إليه أحسن يريح نفسو وما يقراها....رجاءً


#173667 [خضر الطيب]
0.00/5 (0 صوت)

07-07-2011 10:52 AM
يا ود جبرا
بالله عليك هسي دا كلام بروف ..قال جذاب ..إجذبك الله لحفرة ما تطلع منها ليوم القيامة
ولكن بالرغم من هذا الإستخفاف بعقول الناس للأسف سوف يجدون من يتبنى الفكرة ويدافع عنها
كلام إجيب الطمام


#173654 [العريفى]
0.00/5 (0 صوت)

07-07-2011 10:44 AM
لا أستقرب مثل هذا القول من شخص مسؤل فى هذا النظام ولا استقرب منهم أيضا اذا اصدر قرار بتصفية خمسين فى المية من أفراد الشعب السوانى حتى حتى يظل أنصف الاخر اخياءويستمرو فى حكمهم


#173571 [ولي]
0.00/5 (0 صوت)

07-07-2011 09:44 AM
ياخي ديل حتي في الجمال ما بفهموا؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟


#173428 [wedhamid]
0.00/5 (0 صوت)

07-07-2011 01:55 AM
البروف . ردد كلام الزلنطحيه بتاعين وزارة الاعلام الوزير بتاع الحقنه و الخبير الوطنى اياه و الزغيرة مدللة الجماعه ليرضى اولى الامر !!!!! و الغريبه السيد مدير المساحه ما عارف بالضبط عدد دول الجوار حيبقو كم!!!

((وستصبح حدوده مع ست دول بدلا من تسع. والدول التي ستكون له معها حدود هي اريتريا، واثيوبيا وافريقيا الوسطى وتشاد وليبيا ومصر)) مع انها حتبقى سبعة لانو ما حسب دولة جنوب السودان !!! ما امكن يكون فنى ساكت !!!!!!

و بمناسبة الافكار ليه ما جدعت لينا حاجه فى موضوع علاج ثقب اوزون-اسف- اذن الابن الزغير بتاع الوزير ذو الدفع الثلاثى ؟؟؟


#173423 [هندسه]
0.00/5 (0 صوت)

07-07-2011 01:34 AM
شكلو بقى شين ومزعمط انا بقترح يقرمو منو الحته الاسمها دارفور عشان يبقى زابط.... يااااي


#173382 [الباشا]
0.00/5 (0 صوت)

07-06-2011 11:10 PM
اجمل خريطة دولة فى العالم هى خريطة مصر - حطوط مستقيمة من الجهات الاربعة - لكن يا خسارة جاء مثلث حلايب بوظها عليهم - أنا أقترح نقطع الاجزاء المشرشرة فى خريطة السودان الجديدة و نتبرع بيها للجنوب علشان تبقى حدودنا الجنوبية مستقيمة مسطرة - و بذلك سوف نتخلص من بعض البلاوى القايمة الآن فى تلك الاجزاء 0


#173285 [SaifAlhag]
0.00/5 (0 صوت)

07-06-2011 07:28 PM
هؤلاء يا استاذ جبرا

مفتكرننا بلدا وبلهاء وعبطاء لانهم مافتئوا يمررون علينا اكاذيبهم فى حتى فى الجغرافيا قاتلهم الله

قال بروف قال...... دى واحدة من السذاجات برضو .... ياخ انشاالله ماخد جائزة نوبل فى الجغرافيا.... برضو مفروض يكون عندنا راس ويكونوا بيحترموا عقولنا

لكن يظهر نحنا ما محترميننا ابدا......................

والمابحترمك..................


#173277 [زعلان]
0.00/5 (0 صوت)

07-06-2011 07:10 PM

ياخي وين عيادات ومجمعات العلاج بالقرأن التي كتبت عنها سابقا ما ستشر تهم ليه في كلام البروف وخريطته الجميلة .

بالمناسبة كلامك عن هذه العيادات و المجماعات انا كنت متخيله كلام جرائد ساكت ولا اليوم داك ما لقيت الفكرة زي ما قلت وكتبتا لينا كلام ساكت لكن كانت المفاجأة انو احد مقدمين البرامج الدينية في احدي تلفزيوناتنا سال ضيفه الشيخ عن العلاج بالقرأن ولكن الشيخ دقس وقال له ياخي انت ماعندك مركز فاجابه صاحب البرنامج بنعم .

عشان كدا ياخوي كلام البروف عادي وكلوا عندنا بعد كده عادي .


#173230 [محمد الطيب البشير]
0.00/5 (0 صوت)

07-06-2011 06:07 PM
الأخ / الفاتح لك السلام وبعد، من ليلة أمس لم أنم بسبب تصريح البروف عبد الله الصادق،وأجهل لم يخالف اسمه؟ وأزيدك علما أنه من أبناء مدينة تندلتي التي تتميز بالذوق والجمال والتخطيط السليم - الذي يشبه كراسة الحساب (المربعات) فمن أين أتى بهذا الوصف لخريطة السودان الجديدة - والله إن ابني سألني كيف أستطيع رسم هذه الخريطة؟ والسؤال محول للبروف.


#173223 [ناصر]
0.00/5 (0 صوت)

07-06-2011 05:57 PM
كدي الموضوع بجيك تاني ليهو .

أنا ماشي موقع الراي العام الالكتروني اشوف (الكسرة) دي هناك في ولا نجر من الراكوبة ساي.

كسرة:
كان في والله تكون بالغتا عديل


#173191 [salman]
0.00/5 (0 صوت)

07-06-2011 05:21 PM
this is the best Article i have read so far


#173129 [الزول الكان سمح]
0.00/5 (0 صوت)

07-06-2011 04:07 PM

يا أستاذ جبرا

معقولة بس ...تعصلج معاك؟؟؟ هو إنت لما تكون رايق ومصطبح صباحاً زين.بتشوف القمرى بلوم ...والبعام كلتوم

اليومين ديل فى أزمة واللا شنو؟؟

الله يجبر بخاطرك...


#173106 [سودانية ]
0.00/5 (0 صوت)

07-06-2011 03:43 PM
اها ما وريتنا فني شنو :D :D :D


#173103 [monem musa]
0.00/5 (0 صوت)

07-06-2011 03:39 PM
ياهو ده السودان الفضل يا أخ جبره غايتو انا متبري من هذه الحكومة الي يوم الدين وربنا يورينا فيهم عجائب قدرته والله يمهل ولا يهمل


#173098 [جون]
0.00/5 (0 صوت)

07-06-2011 03:30 PM
هذا هو شر البلية الذي رزينا به ... اللهم ارفع مقتك وغضبك عنا واكفنا شر العتوهين قبل كدا ياجبرا نواب البرلمان صفقوا لوزير المالية عندما اعلن زيادة الاسعار ... هؤلاء القوم معتوهين.


#173096 [المواطن علي حسن سلوكه]
0.00/5 (0 صوت)

07-06-2011 03:26 PM
نحن ناس غضبك جميل زى بسمتك والواحد فينا يكون مشلخ سلم ويقول لك انا عربى حر وجدى العباس وعمره ما فى واحد بالغلط قال جده كان بلال بن رباح نحن يا سعادتك حياتنا كلها وهم و بعد اليوم التاسع ح نركب حصين ونشيل سيوف و نعمل خيمة لمنبر السلام العادل و ح ننصب الخال الرئاسى شيخا لعرب الخرطة الجميلة دى
علي ايام الرئيس القائد وفى واحدة من تجليات شعراء شيخ زايد ابتدره احدهم مرحبا بمقدمه الميمون قائلا
هلا ب اللجانا من بعيد................هلا بنميري شيخ العبيد
انتباهة زمن الغفلة حررتنا من الاستعمار الزنجى وضبحنا التور الاسود كرامة واقتنعنا بعروبتنا واننا مش حبة لكن البيقنع الديك شنو باننا عرب والشلوخ دى سببها حوادث الحركة


#173094 [أبوهاجر]
0.00/5 (0 صوت)

07-06-2011 03:25 PM
الجماعة إياهم لا يعرفون معتى الجمال ويرون الجمال فى كل ماهو قبيح والقبح فى كل ماهو جميل ولسان حالهم يقول ( أنا قبحت ما استبقيت شياً) هذا هو عمى البصر والبصيرة ... ويريدون أن يوهمونا حسب مصالحهم وفعائلهم المنكرة بأن باطلهم حق
ياخى ديل مالهم ومال السياحة ومالهم ومال الجمال ... إخخخى


#173042 [H]
0.00/5 (0 صوت)

07-06-2011 02:16 PM
والفني دا ياجبرا هو الطيب مصطفي العنقالي الكان نكرة وجيرانة لايعرفونة.


#173018 [أبو أحمد]
0.00/5 (0 صوت)

07-06-2011 01:35 PM
إنت عارف يا جبرا صاحبك مدير المصنع ما داقس زي زولك بتاع المساحة، لمن قال ليهم دة فني ساكت كان يعني ويعي ما يقول لأنه أكيد عارف إنه الشفرة العنده في البيت ما بفتحها إلا مهندس والفني دة بدخل ويمرق ساكت، لكن البروفيسور القال جميلة وجذابة أكيد من ناس أمريكا دنا عذابها واكان طارت بقول (عتود).


#173016 [شاهد العصر ]
0.00/5 (0 صوت)

07-06-2011 01:34 PM
خريطة شينة
========

مجبورين ماعندنا غيرا لانو نحنه الحياة عودتنا انو لازم يكون عندنا حاجة تكون موضوع للنقاش , وبعدين خريطة السودان وبشكلها الفروض علينا ده قبيحة جدا ومسحوبة كده وبعدين الانفصال تضررنا منه في شيئين :
1 / فراق اخواننا الجنوبيين 0
2 / شكل الخريطة 0
ولتجميل شكل الخريطة نتمني ان يتوحد السودان مرة تانية وعلي حكومة الشمال ان تناقش شكل الخريطة قبل البترول وكل زول في همه0


الفاتح جبرا
الفاتح جبرا

مساحة اعلانية





الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة