الأخبار
أخبار إقليمية
د.مريم الصادق المهدي : الكان محيرني هو د. نافع لأنو ماقادرة أصدق انو زول طول الوقت بيشتم في الناس وماشفت ليهو خير ..قلت لسائق التاكسي لما تفوق تعال لي في البيت الأبيض ده تلقانا قاعدين ومنتظرنكم.
د.مريم الصادق المهدي : الكان محيرني هو د. نافع لأنو ماقادرة أصدق انو زول طول الوقت بيشتم في الناس وماشفت ليهو خير ..قلت لسائق التاكسي لما تفوق تعال لي في البيت الأبيض ده تلقانا قاعدين ومنتظرنكم.
د.مريم الصادق المهدي : الكان محيرني هو د. نافع لأنو ماقادرة أصدق انو زول طول الوقت بيشتم في الناس وماشفت ليهو خير ..قلت لسائق التاكسي لما تفوق تعال لي في البيت الأبيض ده تلقانا قاعدين ومنتظرنكم.


قالت: مهري عشره جنيه..شرطي الوحيد هو عدم الزواج بأخرى..في ذمتك اسمع الكلام ده عليك الله يا استاذ ثروت قاسم!
05-26-2013 12:22 PM
كنت بقول لأمي عندما تشكو لي غيرتها من إحداهن كنت بقول ليها والله عندها حق يا أمي الكضب حرام وأنا لو ماكنت بتو كنت بنافس في الحتة دي!

القيادية بحزب الأمة القومي د. مريم الصادق المهدي : لم أفكر في الوزارة ومشاركة الحكومة غير مجدية
حوامة القبعات الزرقاء في البلد غبن لأي سوداني

(...) هذه أسباب رسائلي لمسئولين في جهاز الأمن بغرض تغليب المصلحة العليا للوطن
أردت الاستشهاد في فلسطين

الفروسية ما رياضة أولاد عز

حوار: نادية عثمان مختار

القيادية بحزب الأمة القومي د. مريم الصادق المهدي حدثتها عن رغبتي في إجراء حوار صحفي بعيداً عن السياسة فضحكت وقالت: ( هو في كلام ما فيهو سياسة)؟!.
فجاء حديثها خليطا من انشغالها بالسياسة ومجموعتها الإعلامية (تواصلنا) .. ومشاعرها كإبنة للمهدي وعشقها لـ(عادل) زوجها الذي ترفض أن تشاركه مع أخرى واستنجادها بشقيقها عبد الرحمن مساعد رئيس الجمهورية التقيناها فكان هذا الحوار الصريح.
أي الألقاب تحبين المناداة به د. مريم، بت المهدي، أم المنصورة؟
اولا مرحبا بصحيفة السوداني المتميزة في دار حزب الأمة وهي ذات الحضور القوي وأرجو لها المزيد من التفوق مع كل ما واجهتها من عقبات، ثانيا لا أحب كلمة الألقاب وأول ما يتبادر الى ذهني عند سماعها قوله تعالى ( ولا تنابذوا بالألقاب بئس الإثم الفسوق بعد الإيمان).
ولكن لك عدة أسماء ينادونك بها؟
(بت المهدي) تسمى به أختي طاهرة، أما الاسم الذي أنحاز له وأحبه فهو (مريوم) و(الدكتورة) لقب لا أحبه لكنني تصالحت معه أيام عملي في جيش الأمة للتحرير وأصبح اسمي الرسمي، أما (المنصورة) فهو اسمي في شهادة الميلاد، وهو اسم مركب (مريم المنصورة) ولكن والدي يناديني ( أم عيسى).
والدك الصادق المهدي أطلق عليك اسم مريم المنصورة ؟
والدتي رأت في المنام أن بنات المهدي جاءتهم بنت وأسموها مريم ووالدتي قبل حملها بي كانت قد تعرضت لعملية إجهاض عاصف مكثت على إثره ستة أشهر في المستشفى لدرجة أن قال واحد من الاخصائيين بأنها لن تنجب ثانية.
أنت الإبنة الكبرى بين أشقائك؟
نعم فقد ذهبت والدتي للدكتور احمد ابو الفتوح حينها وتم علاجها ومن بعد ذلك أنجبتني وأشقائي وراء بعض حيث لا يفرق بيننا سوى عام ويزيد قليلا فبيني وشقيقي عبد الرحمن ثلاثة عشر شهرا.
في الآونة الأخيرة قللتِ من ظهورك الإعلامي وكأنما لك موقف سلبي تجاه الصحف ومصداقيتها أم ماذا حدث؟
لا لم أفقد المصداقية لكنك تعرفين أكثر مني الظروف الصعبة التي يعمل فيها الصحافيون فهم لا تشرق شخصياتهم كثيرا إلا في حال وجدوا لهم مكانا خارج السودان أو عملوا من داخل السودان مع صحف تصدر خارجه لكي يعبروا عمن يكونوا.
كيف؟
لأننا نحن واقعين في دولة شمولية ورئيس التحرير لكل الصحف واحد بموجب الرقابة القبلية والبعدية رغم مايأتيهم بين الفينة والأخرى من اعلانات عن توقف هذه الرقابة.
تتابعين أخبار السودان في الصحافة الغربية والعربية أكثر من السودانية؟
أنا أتابع الشأن السوداني حيثما كان وفي الغالب عن طريق الانترنت حيث اطلع على أعمدة الكتاب وما يكتب في الصحف المحظورة ولذلك فالانترنت يأخد مني وقتا كبيرا في القراءة كل يوم.
علاقتك مع الإعلاميين جيدة من خلال مجموعة (تواصلنا) التي تجمع ألوان الطيف الإعلامي بمختلف أيدلوجياتهم حدثينا عن ذلك؟
من فترة طويلة تربطني علاقات مع عدد من الإعلاميين والسياسيين والحركات المسلحة وكوادرنا ومن المجتمع المدني وحتى ناس المؤتمر الوطني جميعهم كنت أتواصل معهم من خلال الايميل و.....
مقاطعة ...تراسلين ناس المؤتمر الوطني؟
مابراسلهم طوالي لكن عندما يكون هنالك أمرا لابد من أن يعرفوه (فبطلعها من ذمتي كدا).
تراسلينهم على مضض؟
ليس على مضض ولكن نحن بيننا استقطاب حاد وأنا أعرف أنهم لا يسمعونني بقلب وعقل مفتوح و.....
مقاطعة .. وأنت تراسلينهم على أي أساس هل بدواعي تغليب المصلحة العليا للبلد مثلا؟
أصلا تغليب المصلحة العليا لأنهم أناس ممسكون بزمام الأمر، حتى ناس مسؤولون في جهاز الأمن أتيحت لي أن أجد إيميلاتهم أيضا أراسلهم ولكن ما طوالي ولا أزعجهم ولا أرسل لهم التحليلات التي تدينهم كمتهمين وكدا.
وما الذي ترسلينه لهم؟
بيانات مهمة أو معلومات منا أو من غيرنا ففي اعتقادي أننا جميعنا في وضع مهددون في بقائنا، والسودان سيد الاسم الذي ندعي جميعنا أن هدفنا إسعاده والحفاظ عليه سيذهب!
كيف؟
لأن أخطر ماهو حادث الآن هو أن أشد العداوة هي بيننا؛ لذلك فعندما يقولون إن هنالك مهددات خارجية يظهر الأمر بشكل مضحك.
(هم عمرهم ما بعاينوا للمهدد الخارجي)
يرى البعض أن الصحافيين والإعلاميين في مجموعتك (تواصلنا) تربطهم بك علاقة صداقة قوية الأمر الذي يجعل انتقادهم لمواقفك السياسية محرجا بعض الشيء ماهو ردك؟
صاح كلامك ودي واحدة من حاجاتنا نحن كسودانيين لذلك فهذه مجموعة متفقة على أننا مختلفين ويجب أن نتعامل وفق هذا الاعتراف، ومعروف أننا من ثقافة تقول إن الاختلاف مضاداة أي أن من يختلف معي (يضاديني)!
تقصدين أننا من ثقافة يفسد فيها الاختلاف للود ألف قضية؟
بالضبط بينما واقعنا وموجهاتنا النفسية تقول بعكس ذلك فالرسول (صلى الله عليه وسلم) قال: (اختلاف أمتي رحمة) ونحن بالذات في السودان دون الآخرين نتعامل وفق أننا لا أقول حديثا يختلف عنك إلا لأنني ضدك!
ثم؟
هذا ما نريد تغييره لأنها جعلتنا أناس غريبين ومصرين على الادعاء على أننا واحد، ومن لا يقول إنه مثل الآخرين نقوم بتجريمه؛ وتجريمنا لبعضنا البعض وصل بنا للمحطة التي أوصلنا لها السودان.
وضحي أكثر؟
مثلا التعاطي والتناول لإخوانا في الجبهة الثورية جعلت الناس لا يرون أن هؤلاء أبناء وبنات بلد لهم مطالب وزعلانين وهؤلاء ليس كدولة أخرى تأتي من الخارج والتعامل معهم بهذه الطريقة مرفوض وعيب في حقنا كلنا لكننا نرفض فكرة آخر يعبر عن غضبه و....
مقاطعة .. الرفض ربما يكون لشكل التعبير عن هذا الغضب، خاصة وأن ثمة حوار كان قد بدأ بينهم والآخر المختلف؟
نحن نعلم أن هذا الحوار لم يأت إلا بضغط من الأجنبي بحسب القرار (20/46) في مايو من العام 2012م ومعروف أنه طالما فشل اثنان في التفاوض فأي آخر يجد مساحته للتدخل لذا يجب علينا ألا نجرّم الآخر وهو لديه مصلحة في مسألة (فرّق تسُد) وهو يجد مصالحه في ضعفنا وهذا ليس غريباً ولا مدهشا ولا جريمة ويقولون لنا اسرائيل وما الذي ستفعله اسرائيل لو لم تفرقنا وتضعفنا وهي جسم دخيل و(دي شغلانيتا تعمل كدا) وهي تريد أن تجد لها وجودا وهذا عادي وغير مدهش!
كيف تواجهين الشائعات التي تحاك ضدك؟
ضاحكة .. والله ده سؤال صعب خلاص لكن لاني اتطورتا
اكتسبتي مناعة ضد الغضب من الشائعات؟
بعد دراستي لعلم النفس بعتقد أنني لو فقدت الإحساس بالتفاعل مع الآخر معنى ذلك أنني قد فقدت الإيمان به وأنا مؤمنة بقوله تعالى(وهل جزاء الإحسان إلا الأحسان) وموقنة أن السودانيين أهل إحسان وبالتالي لا أفقد الأمل فيهم.
هل تحسبين نفسك إنسانة مثالية؟
لا لا مازولة مثالية ولكن شايفة الخير حقيقة ومصدقة به تصديقا كاملا.
خير مطلق في الجميع؟
ضاحكة .. قبل كدا بس الكان محيرني هو د. نافع علي نافع لأنو ماقادرة أصدق انو زول طول الوقت بيشتم في الناس وماشفت ليهو خير معقولة يعني كيف و....
مقاطعة .. ثم وجدتي فيه الخير؟
في العام 2012م كنت في الدوحة وفي ذلك الوقت كانت يدي مكسورة والجماعة كاسرنها وناكرنها ومشتميننا فوجدت أخ من الشعبي وهو مسئول المؤتمر الشعبي في لندن كان في ضيافة قناة الجزيرة فسألته ( عليك الله مابلقى كلام خير تقولوا لي في دكتور نافع) فقال لي : إنه يحترم الذين يعملون معه ولا يتكبر عليهم ويصلهم وذكره لي بكل الخير رغم أنه من معسكر مضاد له!.
إذن ترين الخير في كل السودانيين دون فرز؟
الزول الوحيد الذي لم أستطع أن أرى فيه خيرا ولم اجتهد في ذلك هو النميري فضربة الجزيرة أبا وكتلة الإمام الشهيد ولدت بدواخلنا غبنا حقيقيا للظلم الذي حدث و...
تتحدثين عن التسامح وتحملين الغبن بداخلك للنميري و....؟؟
قاطعتني .. مافي طريقة، نحن شعب متسامح ولكننا استهلكنا كل رصيد التسامح لدرجة إن فعلنا أكثر من ذلك يصبح اسمه خنوعا وده ماكويس لذلك فالعدالة والمحاسبة مهمة جدا.
تقصدين العدالة الانتقالية كما تسمونها؟
نعم وفكرتها أن مداخل السلام جميعها تسير مع بعضها؛ فالسلام يلزمه الاستقرار والأمن والعدالة والتنمية والتصالح وأن يتم الاعتراف بالأخطاء .
اعتراف من؟
أهم اعتراف الآن يجب أن تقر به الحكومة للقتل الحادث في دارفور وجبال النوبة والنيل الأزرق فالإنكار و........
مقاطعة ..قد لا ينكرون ولكنها ردة فعل تجاه من تمرد عليهم؟
لا ليس ردة فعل؛ فالحكومة ليس بوسعها أن ترد على فعل ولكن ذلك بوسعي أنا وأنتِ كمواطنين ولكن الدولة لا تتعامل برد الفعل.
الحكومة ترى أن من حقها الرد على من رفع السلاح في وجه الدولة ماهو رأيك؟
ده سؤال وجيه، ولكن السؤال هو لماذا وللمرة الأولى منذ الاستقلال يرفع السودانيون سلاح ضد الدولة وهم طوال الوقت كانوا يرفعون السلاح ضد بعضهم البعض؟ ذلك لأن هنالك فعل قد تم وهو محاولة فكفكة وإعادة صياغة الإنسان السوداني، ودخلوا له في عقائده ومفاهيمه وتكويناته المجتمعية وحتى حدوده الجغرافية غيروها ولم يطلب منهم أحد ذلك وكل ذلك في عملية هدم المراجع.
ماذا تعنين بهدم المراجع؟
أعني هدم (الكبير) والادعاء بأن نحن في فراغ ثقافي وحضاري فهم من أتوا بالشياطين وقاموا بتربيتها ثم بعد ذلك خرجت هذه الشياطين عليهم.
لماذا استنجدتِ بشقيقك عبد الرحمن مساعد رئيس الجمهورية عندما تم منعك من السفر هل في إطار الأخوة؟
ليس في إطار الأخوة ونحنا مشينا مع بعض في خوة موت ولكن لأنه يعرفني جيدا ومن منعوني كان منعهم بحسابات أني خائنة وعميلة وسأسافر للالتقاء بالعملاء و......
ولماذا عبد الرحمن وليس غيره من ناس الحكومة؟
أنا قلت له أنت بموجب الكلام القلت أنك دخلت تعملوا وتتكلم عن حقوق الانسان والمشاركة السياسية وحرية الإعلام فأنا بقول ليك وانت قاعد في القصر الجمهوري تم منعي من السفر ثلاث مرات من غير سبب فهل هذا ليس مخولا لك لتراجع البرنامج الذي دخلت القصر بموجبه؟ وأنت لو لم تسمع بما يحدث في جنوب كردفان والنيل الأزرق ألم تسمع بما حدث لي أنا؟ هذا ماقلته له وللسيد جعفر الصادق بحسبان أنهم أناس أتوا بمرجعيات محددة لتقوموا بنوع جديد من الفعل ولم أتحدث مع زول من ناس المؤتمر الوطني!
هم جزء من الحكومة فما الذي تتوقعينه منهم غير مايفعلونه ناس المؤتمر الوطني؟
أنا مصدقة أنهم فعلا عاوزين يعملوا فعل مختلف وانو المواطن الذي يتوجع يكون هنالك جريمة قام بارتكابها ومن يمنع من التجول داخل وخارج بلده يكون هنالك مصوغ قانوني لذلك!
إذا كان شقيقك يمكنه إحداث هذا الاختراق في داخل المؤتمر الوطني فهل يمكن أن تشاركي وتصبحين وزيرة و.....؟؟
قاطعتني بحدة ..لا أبدا .. ودعينا لا نلف حول هذا الموضوع فأنا إذا كنت مؤمنة بالكلام ده كنت حا ادعمو وكنت بشوف رأيه السياسي بالطريقة دي صحيحة.
ولكن؟
ولكن ومنذ اليوم الأول كنت أرى أن هذه المسألة غير مجدية ولكن رغم الاختلاف أتحت له الهامش طالما أنه مصدق الكلام ده ويمشي يخوض التجربة وإذا كنا نؤمن بمصداقية المؤتمر الوطني وشفافيته لماذا لم نشارك ونحن أدونا خمسين في المائة ما كان نشارك طيب!.
قد يقول قائل ومن ضيع الديمقراطية وأدخل السودان في هذا الوضع غير حكومة الصادق المهدي؟
ممكن وصحيح يمكن أن يقال مثل هذا الحديث ولكنني أعتقد أننا أصبحنا في حاجة للتفكير في الكلام الذي نقوله فإطلاق الكلام على عواهنه أصبح غير مجدٍ.
كيف؟
نحن في زمن تجاوزنا فيه الأحقاد وقد تحكمين علي بأنني ( أتفه) زول ولكن ده مابحلك من أني سودانية وثم ماذا بعدما أطلقتِ عليّ حكمك هل حاتشيلي مسدس تضربيني؟! برضو أهلي حايشيلوا مسدس يضربوك ويضربوا أهلك هل ده حل؟ والديمقراطية حقت كل زول و....
مقاطعة .. حقت كل زول ولكن هناك من يأتي بها وهناك من يضيعها أليس كذلك؟
هي بتجي وتضيع بينا كلنا، وهذا هو الدرس الذي يجب أن نعيه جميعنا، لكن أن تجلسي أنت في منصة البريئة وتضعينني في منصة المتهمة و( تفلقي فيني) مابتخارجك وهشاشة السودان لم تعد تحتمل أن تتحملنا ونحن ندوس بعضنا البعض.
السيد الصادق كان في تلك الحقبة هو الحكومة والمسئول عن الدولة فهل حافظ عليها؟
من الأشياء التي يجب علينا مراجعتها هو مقارنة الحكم الشمولي بالحكم الديمقراطي؛ فهذا هو الغلط المحوري الذي يقع فيه مثقفونا و.....
هو وضع المقارنة أم وضع التباكي على ماضاع والبكاء ممن أتى؟
أنت تقارنين لكي تلومي أو تقومي ولكن الاثنان مرجعيتهما مختلفة جدا في التقويم والمراجعة والحكم لأن الحكم الديمقراطي آلياته بالشورى وذلك لا يقارن بالشمولية ولأن من يأتون بالشمولية يأتون فوق الحكومات المنتخبة فهم يبحوث لأنفسهم عن شرعية ولذلك يجرمون الحكومة المنتخبة التي جاءت برأي الشعب فيهدون بذلك مرجعية الناس وكأنهم يقولون لهم ( انتو مابتفهموا وانتو جبتوا ناس حمير وخونة ساكت) وهذا أخطر مافي الأمر!
ثم؟
نحن نحتاج للتصالح مع بعضنا أولا، ثم النظر لما هو حادث في بلادنا فمثلا تكوني جوة بلدك يجوك خواجات يدرسوك في بلدك ويقعدوا بكل معرفة لتدريسك وتكوني حايمة في الأسواق وتشوفي القبعات الزرقاء حايمة جوة عينك وده غبن لأي سوداني.
البعض يرى المعارضة سببا فيما يحدث من تدهور مارأيك؟
أقول ( ألقيته في اليم وقلت له إياك إياك أن تبتل بالماء ) فالحكومة دي صارفة كم من القروش في حاجتين هم الأمن وفجخ الشعب من أن يقول لها بغم ومصروفة في انو تطلّع المعارضة مجموعة من الناس الخونة أو العملاء او المهابيل.
وما الذي تفعله المعارضة؟هل هي مكتوفة اليدين؟
لا ليست مكتوفة اليدين ولكنها تفعل كل الفعل الذي يمكن لبشر أن يفعله دون أن يرفع السلاح لكن للأسف أكثر جهة تروج لجدوى رفع السلاح هي حكومة المؤتمر الوطني فيما تفعله وتقوله لكل آخر ليس موال لها
وقد جلست مع من يحملون السلاح ووجدت حديثهم عقلانيا وهم لا يريدون حمل السلاح ولا يريدون أن يموتوا ولكنهم يرون دافعهم لذلك لأنهم غير متاح لهم هامش حياة !
وماذا يقول حملة السلاح أيضا؟
على كل غضبهم يقولون لو أن للمؤتمر الوطني مصداقية في مسألة الجلوس مع كل الناس فلا مانع من الجلوس معهم وعدم المصداقية هذا ماجعل مني اركوي يعود لحمل السلاح ونحن لا نقول ذلك للمزايدة على المؤتمر الوطني ولكني من حزب يرى المخرج في جلوسنا جميعا على قدم المساواة لإيجاد الحل.
ألا تفكرين في اعتزال العمل السياسي والعودة للمنزل؟
أنا مأثورة في كون أني مريم الصادق المهدي وناس كتار خاتين لي مكانة محددة و....
لزاما عليك الاشتغال بالسياسة ولو على حساب بيتك؟
ضاحكة ..والله حقو الواحد يجرب ولكن بالشايفاه ده برضو حاننضرب بالجزم ويقولوا لي كيف وانتي أمك ماتت في شنو و..
هو خيارك إذن؟
هو خياري بما في ذلك انضمامي للعمل المسلح ومنذ ذلك اليوم أصبحت أشوف السودان بعيون تجعلنني بقدر ما أبذل أشعر أنني لم أفعل شيئاً وبدأت أفهم مايفعله والدي من أفعال كنت أراها غير منطقية.
هل فكرت في خيارات أبنائك المستقبلية؟
فكرت في أولادي عندما زرت السويد مرة وسألت نفسي لماذا لا يعيش أبنائي في بلد مثل هذا ولماذا لا أتيح لهم خيارات أخرى موجودة لغيرنا من السودانيين فوجدت أنني سأفقد روحي وجذوري.
عملك ليس خصما على أبنائك وزوجك؟
لو كان خصما عليهم كنت شعرت بذلك.
زوجك يقوم بكل تكاليف عملك المادية؟
هذه الفكرة كانت توترني جدا لذا رفضت إلحاحه في أن يقوم بكل تكاليفي وهو يقول لي أنا أريد أن أصرف لأنني مؤمن بالذي تقومين به وأنا أرى أن دوره وواجبه في الصرف على بيته لكن لا أكلفه بتنقلاتي وملابس السفر واتصالاتي
كم راتبك من حزب الأمة؟
ماعندنا مرتبات.
وماهي مصادر دخلك للسفر والمشاركات الخارجية؟
في الغالب يدعمني والدي أو عادل.
لا تحسين أنك مقصرة تجاهه؟
كان الأمر سيشكل لي عبئا نفسيا ثقيلا لو أن زوجي يقول لي إنتي مشيتي وانتي خليتيني.
قد لا يريد أن يغضبك؟
ممكن لكن في الآخر هو شايل مني العبء ده لأن (عادل ) أكتر زول يحدثني على أن ما أقوم به له كبير المعنى بالنسبة له وأولادي وبناتي كذلك يفتكرون أن هذا العمل الذي أقوم به هو عمل عظيم و...
لا تخشين تفكيره في الزواج بأخرى؟
ضحكت عاليا ..هو يعرف أن شرطي الوحيد الذي لم أشترط غيره هو عدم الزواج بأخرى و...
مقاطعة .. أنت ضد تعدد الزوجات؟
أنا لا مع ولا ضد ولكني أعلم تماما أنني أريد في علاقتي الزوجية السكينة والرحمة والمودة وبوجود أي امرأة أخرى فانا لا أدعي ولا أكذب لن تكون وقلتها له واضحة (يوم تفكر تتزوج واحدة تانية تكون علاقتنا الزوجية انفصمت)!
قلت إن مواصفات فتى أحلامك أن يكون حافظا للقرآن والتفسير؟
عندما قلت هذا الكلام كان لدي موقفا من الزواج فأنا لولا أنني وجدت عادل فالزواج ماكان بالنسبة لي حلم وليس واحدا من أهدافي.
وبماذا كنت تحلمين؟
كانت نظريتي أنني سأذهب واستشهد في فلسطين.
أسرة زوجك هل لهم اسم كبير أم مال كثير ليتقدم ويخطب بت المهدي؟
كان عندهم عادل!
دفع ليك مهر كم؟
عشرة جنيهات وكان زواجي في العام 1995م.
أنت تسكنين مع نسابتك لماذا ماعندكم بيت؟
لا .. ماعندنا بيت.
ولا تحت الإنشاء؟
عندنا شقة بنعمل ليها توسعة.
هل حصل غضبت من زوجك وشلتي شنطتك على بيت أبوك؟
ضحكت عاليا .. والله يمكن أكون فكرت بس ماعملتها.
أبناؤك يشعرون أنك أم مختلفة عن بقية الأمهات؟
ضاحكة ..أبنائي في الروضة اتشاكلوا مرة في مسألة هل أنا بت ولا مابت، فحسب فهمهم والصياغة المجتمعية أن البنات أشياؤهم محدودة فقلت لهم أنا بت وأخذوا وقتا ليستوعبوا هذا الاعتراف الخطير!
والدك مشهور بكثرة كلامه هل اكتسبتِ هذه الخاصية و...؟
قاطعتني ..لو اكتسبت منو أي حاجة بختي، لكن أنا عموما بكون عاوزة أشرح الفكرة كاملة.
لا تعملين بمقولة خير الكلام ماقل ودل؟
أستطيع أن أختصر ولذلك أسأل الزول بقول ليهو عاوز كلام كم من الزمن.
بنات وأولاد المهدي تربيتم على العز حتى في الرياضة كالفروسية و..؟
قاطعتني .. الفروسية مارياضة أولاد عز في السودان ده ؛ أمشي شوفي أهلنا هنا في دارفور وبحر أبيض وكردفان هي جزء من التكوين اليومي بتاع الناس.
هل ركبت مواصلات مع العامة و(دافست) لركوب الحافلة يوما؟
لا ما قعد أركب مواصلات.
ولا تاكسي؟
ركوب التاكسي في حياتي بالعدد وفي ذلك الوقت تغير لون طلاء منزلنا من الأبيض للبني وكنت أسميه في طفولتي البيت الأبيض، المهم أن سايق التاكسي كان يشتم في آل المهدي طوال الطريق و...
مقاطعة ..لم يتعرف عليك؟
لا .. وطلبت منه أن يذهب بي لمنزل الصادق المهدي وعندما اقتربنا من الإذاعة قلت له: ( اتفشى زي الابن العاق البجي سكران بالليل لبيت ابوه ويشتم أبوه لأنه سكران وفاشل وماعارف يعمل شنو، لكن لما يقوم الصباح ويلاقي روحه ماعنده أكل ولا شراب ولا شيء يعملو بيجي لأبوه ذاتو، دحين لما تفوق تعال لي في البيت الأبيض الكبير الحاتنزلني فيهو ده تلقانا قاعدين هناك ومنتظرينكم)!
تربيتي في فمك معلقة ذهب؟
أنا ماعارفة الفكرة من الكلام ده شنو.
يعني وجدت كل شيء متوفر لك؟
هذا ليس صحيحا فأنا تربيت في حقبة مايو ووقتذاك نحن كنا متهمين في وجودنا ووجودنا خطيئة، وشتْمنا كان تقرباً للحكومة زلفى ولذلك فمنبع فخري أننا تربينا وسط أناس لديهم الوفاء والحب، هم الأساس في البقاء لأنه ماكان عندنا ناس شغالين معانا بالقروش و...
مقاطعة .. وهل معنى ذلك أنكم ماكان عندكم قروش؟
ماكان عندنا ونحنا ناس مايو صادروا مننا كل شيء.
هل تتذكرين موقفا صعبا مررت به لم تجد مالا لقضاء أمر مهم؟
مررنا بظروف صعبة وأغلب الأوقات والدي كان في السجون في مصر وجبيت وبورتسودان وإجازاتنا كنا نقضيها في السجون مع والدي في بورتسودان ومصر، وأذكر جيدا في صغري أن ميزانيتنا كانت اثنان وسبعون جنيها وكنت أكتب لأمي عرجون طلبات البيت.
ثم؟
كنت وقتها أقرأ الجرائد لأمي عرجون، ووجدت فيها حكما بالإعدام غيابيا على والدي ومنذ ذلك الحين نشأ بداخلي شيء تجاه الجرائد و...
مقاطعة .. اتعقدتي من الجرائد؟
لا ما بقول اتعقدت لكن بقيت قادرة أشوف الهول الشخصي الذي أتعرض له من الجرائد.
لا تعرفين معاناة قفة الخضار وحق الدواء والمواصلات ويقول البعض أن مناصرتك للغلابة ادعاء للنضال والشوفونية ماردك؟
أنا مقدرة جدا شكل هذه المعاناة وقادرة أفهم قدر شنو هي فتنة لكن الدنيا دار ابتلاء وفتنة وحتى المنعمين ليسوا ببعيدين عن هذه الفتنة ولكن أنا لا أريد أن أتبارى مع زول؛ والناس الذين تربيت معهم عاشوا هذه المعاناة التي تتحدثين عنها.
درستم في مدارس حكومية؟
نعم من الروضة حتى الثانوي العالي.
لا تعترفين بالفوارق الطبقية وتصنيفات الفقراء والأغنياء؟
خلفية الإمام المهدي نفسها أنه من أسرة بسيطة يصنعون المراكب ولكن الآن أولاد الفقراء هم من أفقروا الشعب السوداني!
تساءل السيد محمد احمد المحجوب يوم أن تم تعديل الدستور ليصبح والدك رئيسا للوزراء وقال:(هل يعرف الصادق كيلة البصل بكم ) فهل تعرفين (كيلة البصل بكم)؟
اضطرارا لأنني امرأة، ولكن السياسات التي قام بها السيد الصادق المهدي وهو رئيس للوزراء هي سياسات مرجعية جعلت للاقتصاد السوداني توسعا كبيرا.
هناك أناس يرون السبب في مأزق السودان هو السيد الصادق تعتبرين ذلك عتابا أم اتهاما لكونه أضاع الديمقراطية؟
أنا متأكدة تماما أنه عشم الابن في أبيه، ولأنه الزول الشايفو كبير ومسئول حقو كان يعمل كل حاجة وده قلتو زمان والآن كتر خيرو ذكرها الاستاذ ثروت قاسم و....
مقاطعة .. بمناسبة ثروت قاسم البعض يقول إنه السيد الصادق المهدي والبعض يقول هو مريم المهدي مارأيك؟
ضاحكة بشدة ومتسائلة ..عليك الله جد؟! وأقعد أشكر نفسي زي ده؟! في ذمتك اسمع الكلام ده عليك الله يا استاذ ثروت قاسم!
منو بيعرف ولا شاف ثروت قاسم؟
والله أنا ماعارفة!
تتحملين أي شائعات عن شخصك ولا تحتملين كلمة عن أبيك؟
بالضبط كدا، وتجدينني الآن في أحسن حالاتي لأنني قادمة من رحلة لبحر أبيض وهناك رأيت كم الحشود المحبة للسيد الصادق المهدي كان شيء غير معقول.
إنتي عاوزة كل الناس تحب أبوك؟
لا لا ماعاوزة كل الناس تحب أبوي، فالرسول صلى الله عليه وسلم لم يجمع الناس عليه، ولكن مايؤلمني هو الناس الذين أظن فيهم أن وعيهم مختلف، بالذات مثقفينا في الخارج ولا أريد منهم أن يقولوا إن والدي صاح مائة بالمائة ولا مائة المائة خير ولكني أريدهم أن يقولوا مافيه من خير ومافيه من شر.
الحديث لسائق التاكسي هل معناه أن السيد الصادق أبو السودان كله ومن يتحدث عنه سلبا هو ابن عاق؟
والله ليس بعيدا عن هذه المسألة لكني أقدر للابن العاق دوافعه وأسبابه النفسية التي جعلت منه ابنا عاقا وهذا ليس حكما على كل الناس.
كيف؟
أعتقد أن هناك تجهيل مؤسس ليس لدور الصادق المهدي فقط ولكن لكل الأنصار ودورهم في التاريخ.
أنت معجبة بأبيك كما قلت ( نحن سكارى بحب الصادق المهدي) وقولك أثار ضيق البعض وانتقادهم ماردك؟
نحن سكارى هذه كان يجب أن توضع في سياقها.
هل انتزعت من السياق؟
كان السؤال عن ضرورة تغيير الصادق المهدي عن رئاسة الحزب فقلت لهم نحن كلنا سكارى بحب الصادق المهدي وده كلام صحي و....
مقاطعة ..كلكم كأبناء وانصار في حزب الأمة ولا كلكم منو؟
نعم وقلت لأن له كاريزمته ومواقفه عندما يعمل البعض على مكاواتنا وترديد حديث إبعاده وتغييره فهذه المكانة حاتتقفل ومافي زول بقدر يناقشها فدعونا نناقش الأمر في مؤسساتنا وليس بالمكاواة فجاء الكلام عن حبنا للإمام حبا شديدا ومستحقا.
مستحقا لكم كحزبه وأبنائه وأنصاره و.......؟
قاطعتني ..هو شخص له تميزه ودوره في ظل زمن وضعت فيه قيادات السودان اسم السودان في الأرض وهو لا يأتي منه إلا رفعة وهم لا يريدون أن يقولوا ذلك ويريدون أن يقولوا إنه شر ويقارنوه و.......
توجعك مسألة المقارنة بينه ومن تسمينهم بالشموليين؟
أنا ماموجوعة للإمام الصادق فهو إنسان بذل لشعبه ووطنه وأهله بكل الوفاء والإخلاص الذي أعلم به تماما ومتيقنة من ذلك.
تعتقدين أننا ليس لدينا شخصية قومية مجمع عليها؟
قلت للدكتور الطيب عبد الله مابتقدروا تساعدونا بقدراتكم دي تخلقوا لينا زول نجمع عليه ؛ زول بطل مننا، نقول ده حقنا كلنا عشان نقدر نبني عليه تكويننا النفسي؛ نحن كأنصار ماعندنا مشكلة فلدينا الإمام المهدي وأمراء المهدية وسيدي خليفة المهدي و.......
تقصدين كوطن ليس لدينا هذه الشخصية؟
أيوه كتر خيرك، فالزبير باشا رغم كونه بطلا خرج من يقول عنه مجرد تاجر رقيق والسؤال هو من البطل لدينا ومن الذي نقول عنه كلاما طيبا بالإجماع و......
تريدين إجماعا على السيد الصادق؟
أنا ماقلت نجمع عليه. أنا عاوزة نقول مثلا فلانة دي بتنا ومننا وتشبهنا وعملت واحد واتنين صاح وعملت تلاتة واربعة غلط عشان إنتي في الآخر بصاحك وغلط حقتنا وحانقدر نبني عليك لكن نحن نجد من يقول إن فلانا أحسن زول وآخر يقول عنه أسوأ زول وهذا مايشعرني بالشفقة علينا.
كيف؟
لأن مافعله الإمام الصادق من أشياء كويسة واضحة بمعايير دولية لكونه مفكر وله مشاركاته ومادايرة ليها اجتهاد ولا مدح لكونه ود الجهة الفلانية ولا حفيد الرسول ولا المهدي؛ فألمانيا عندما جاءت بسفيرتها عندما كانت رئيسة ( الجي ايه) ورئيسة ( اليو ان ) في آن أتت بخمسة عشر مرجعا استراتيجيا من العالم كله لكي يستفيدوا منه وأنا أقصد بالمعايير الموضوعية أن نستفيد منه ومن علاقاته.
يقال إنك تحبين والدك حد الغيرة عليه و....؟
قاطعتني ضاحكة .. أغير عليهو من شنو لا والله ده كذب وكنت بقول لأمي عندما تشكو لي غيرتها من إحداهن كنت بقول ليها والله عندها حق يا أمي الكضب حرام وأنا لو ماكنت بتو كنت بنافس في الحتة دي!
يعني أنت تعلمين أن هناك نساء يحببن والدك؟
والله مقدرة ليهم هذا الشعور وكثيرات يوصوني وببلغ الوصايا بكل أريحية فأنا استطعت من فترة أن أحرر نفسي من كونه والدي وأرى أنه قيمة إنسانية وأريد أن نتشاركه مع كل الدنيا ولذلك ليس لدي عليه شعور الحجر بالعكس.
( صحيفة السوداني)
Nadiamukhtar2000@yahoo.com


تعليقات 42 | إهداء 0 | زيارات 21669

التعليقات
#678028 [sam]
0.00/5 (0 صوت)

05-27-2013 10:50 AM
ليه المراة دي بتتكلم كتير


#677947 [حسن]
0.00/5 (0 صوت)

05-27-2013 09:57 AM
نافع فيه خير؟؟؟؟ سبحان الله تذكرت قول نزار قباني حين قال : لافرق في الوطن العربي بين السياسة والدعارة. وانا اقول الدعارة ربما ينحصر اذاها على المومس ومن يضاجها في اعلب الاحيان ... لكن الدعارةالسياسية يمكن تدمر بلد بحالها ... وهذا ما نعيشه الان... لك يامريم الصادق ان تعلمي ان عشمك في كرسي وزارة في ظل نظام محترم سيكون عشم ابليس في الجنة.... لانه لامكان لامثالك في ديمقراطية حقيقية والا سوف تبكي البندقية اكثر من بكاءها الحالي.. تمهدين وتغازلين ضباع الموتمر الوطني ليرمو لك مزعة لحم من لحم الشعب السوداني نقول لك كليها لكن ستطرشينها دما يوما ما.


#677941 [اه لو اه تفيد مجروح]
0.00/5 (0 صوت)

05-27-2013 09:52 AM
كشي مشي بس يطبلو دايرين عشاء
اول مرة اشوف سوداني يشكر نافع المانافع


#677831 [كمال العجمى]
0.00/5 (0 صوت)

05-27-2013 08:22 AM
لا فرق بينها و والدها تحب التلميع و الكلام عن النفس و بدأت تكسر ثلج لنافع عشان تضمن كرسى فى الوزارة بالله ماذا استفدنا من هذا اللقاء يا نادية مشاكل السودان كلها انتهت و تفرغتى لمثل هذا القاء الفطير


#677769 [سامي]
1.00/5 (1 صوت)

05-27-2013 06:27 AM
الامام الصادق رجل محنك لكن ممكن يكون رئيس في دولة مطورة مش السودان . السودان مثل باقي الدول العربية والافريقية لاينفع معه غير الحكم العسكري وكمان حاكم عسكري في كل ولاية زي حكم عبود واعزروني لكن مريم الصادق ممكن تكون ناطقة رسمية زي اللي بتجي في الصورة بتاعت الابيض الابيض ديك .


#677744 [صلاح الدين عمر]
0.00/5 (0 صوت)

05-27-2013 04:03 AM
المرة دي مجنونة.. ولتجميل اللفظ أقول إنها مصابة بجنون العظمة.. لكن برضو هي مجنونة.. ده كلام شنو القاعدة تقول فيه ده؟؟


#677725 [انصاري]
0.00/5 (0 صوت)

05-27-2013 02:33 AM
***نميري رغم سواءته بالنسبة لنافع نبي ورسول علي الاقل ما حرامي


#677706 [adil a omer]
0.00/5 (0 صوت)

05-27-2013 01:58 AM
يا اخوانا مسكينه بقت تركب التاكسى خلونا نعمل ليها كشف نشترى ليها برادو


#677705 [إبن السودان البار ***]
4.50/5 (4 صوت)

05-27-2013 01:52 AM
الأستاذة / نادية عثمان مختار المحترمة لقد بدأتي موضوعك بالقيادية في حزب الأمة القومي ؟؟؟ فأرجو أن تتأكدي جيداً من معني كلمة حزب حتي لا تطلقينها جزافاً ؟؟؟ وببساطة الحزب لا يمكن أن يكون حكراً علي أسرة محددة ؟؟؟ ورئيسه لا يمكن أن يوجه أو ينتقد أو يقال ؟؟؟
سؤال :- وبماذا كنت تحلمين؟
أجابت بنت الصادق وقالت :- كانت نظريتي أنني سأذهب واستشهد في فلسطين.
فلسطين لها رجالها ونسائها الأبطال ؟؟؟ كنت سأحترمك لو قلتي إنك حلمتي بأن يجد كل طفل في السودان كوب حليب في الشهر حتي ؟؟؟ كنت سأحترمك لو حلمتي بعمل حملة لعلاج أطفال الشرق من السل وأطفال الغرب من الجوع ؟؟؟ كنت سأحترمك لو قلتي أنك حلمتي بتوفير الغذاء والتعليم لكل أطفال
السودان أسوة بأطفال الفلسطينيين في المخيمات الذي يستمتعون يومياً بثلاثة وجبات غذائية محترمة ومدروسة لتحمر خدودهم ؟؟؟؟ ويتلقون التعليم الجيد ؟؟ وإذا سألتيني بماذا أحلم ؟؟؟ فأنا أحلم بسودان حر ينعم بخيراته الوفيرة كل السودانيين بجميع أصولهم وسحناته ولغاتهم ودياناتهم وخالي من كل الدجالين تجار الدين أسياد الطوائف الكهنة القدامي وتجار الدين الجدد الكيزان اللصوص القتلة مغتصبي الرجال والإناث والأطفال قاتلهم الله جميعاً ؟؟؟ وإذا أردتي أن تعرفي شيء خير لنافع فأفتحي قوقل وأكتبي الدكتور فاروق محمد ابراهيم لتعرفي من ههو نافع وقصته مع المرحوم بدر الدين إدريس ؟؟؟

إقتباس ( لأن مافعله الإمام الصادق من أشياء كويسة واضحة بمعايير دولية لكونه مفكر ؟؟؟)
أتمني أن أعرف فكرة وطنية واحدة نظرياً كانت أم طبقها وأفاد بها السودان ؟؟؟

تحت الفهم الصحيح والتفسير العلمي لكلمة حزب ! هل يوجد في السودان أحزاب ؟؟؟ ما يسمي في السودان أحزاب هم عبارة عن طوائف دينية كونها وقواها الإستعمار لتساعده في حكم السودان وقد أدوا دورهم التاريخي هذا بكل تفاني وإخلاص وفي المقابل تكرموا عليهم بالألقاب والنياشين ( السير عبدالرحمن المهدي باشا حامل نيشان الإمبراطورية البريطانية من درجة فارس ونيشان الملكة فكتوريا من درجة قمندان ) (والسير علي الميرغني باشا حامل نيشان القديسين ميخائيل وجورج من درجة فارس ) وكذلك مكنهم الإنجليز من السلطة وإغدقوا عليهم بالمال والأراضي والمشاريع ليكونوا إمبراطوريات مافيوزية ليصبحوا أغني أسرتين في السودان علي الإطلاق وصاروا أسياد( آل الميرغني ) و(آل المهدي ) يبوس يدهم الغفير والوزير وحولهم كمية من الخدم والحشم يخدمونهم في قصورهم ومشاريعهم بدون أجور أو حقوق ؟؟؟ في شكل من أشكال العبودية في القرن ال21 ؟؟؟ أنهم عقبة كؤود في طريق تطوير السودان ؟؟؟ وبالتأكيد ليس في مصلحتهم تطوير السودان وأنعتاقه من التخلف والجهل والمرض ؟؟؟ أما بقية الشلل الخرطومية والتي منها أكثر من 86 شلة مسجلة وأكثر من ذلك غير مسجل فلا تخرج أصواتهم من صوالين وجهائهم ؟؟؟ نتمني أن يتوحدوا تحت برنامج مدروس ليكونوا حزب عصري شبابي طموح يكون له تأثير قوي وحزب يقضي عل الطائفية وتجارة الدين ويمضي بالسودان قدمأ في طريق الخير والنماء إن شاء الله؟ والثورة في الطريق لكنس الكهنوتية تجار الدين القدامي وحلفائهم تجار الدين الجدد الكيزان اللصوص القتلة مغتصبي الرجال والإناث والأطفال قاتلهم الله ؟؟؟


#677687 [ema]
5.00/5 (1 صوت)

05-27-2013 12:57 AM
انت وابوك اول الهادى القتلو النميرى حابينو ؟......ياناس احترموا عقولنا ده ما تاريخ بعيدانتو كارهين النميرى عشان حبوهو السودانية اكتر منكم...............كمان نادية كرهتنا السودان بى عمتها هى وحسين خوجلى يصرفهم مننا اللا نام ولا اكل الطعام


#677669 [داركولا]
5.00/5 (5 صوت)

05-27-2013 12:23 AM
يا بت الناس الرحمة للأموات واجبة ( أنتى كان تحبى أن تظهرى حقدك أنحنا كمان ما نازل لينا منزورنا جدك عبد الرحمن أتربيتوا من عرق الغبش السكرانين بالدين )......


#677632 [الراوي]
5.00/5 (2 صوت)

05-26-2013 11:00 PM
دائماً أقول أن أولاد السيدين هم في قمة التهذيب,وخاصة أولاد الأمام الصادق المهدي الذين كان لاحتكاكهم المباشر مع الناس دوراً مؤثراً,فالصادق نكن لشخصً تقديراً خاصاً لما يتمتع به من فكر ولباقة. وكنت أتمني يفوز حزبه بأغلبية تمكنه من الحكم منفرداً من حكم البلاد, وذلك في فترة الديمقراطية الثلاثة ً دون ائتلاف مع حزب أخر حتى يمكنه من تحقيق برنامجه " نهج الصحوة" وبعدها نحاسبه إذا قصر, ولكن في وجود مؤثرات سالبة, مثل عدم الاستقرار في الحكم والحرب اللعينة التي أوقفت التنمية ومعارضة غير مسئولة مهدت لمجيء العسكر ومعه الحكم الشمولي البغيض.كل هذا لم يمكن الصادق علي تنفيذ برنامج حزبه, الذي أن أخفق بعدها سيجعله في كنبة المعارضة في الدورة القادمة.
من الأشياء التي أخذتها علي الأحزاب ومن ضمنهم حزب الأمة طبعاً, مسألة الدوائر المغلقة, فمثل هذه يضر بالحزب أكثر من أن ينفعها, لأنها ببساطة تأتي بنوابها يعملون بالإشارة دون تفكير في الأمر, وهذا يمكن معالجته بنشر التعليم والتوعية .
أخيراً,الديمقراطية تعالج بمزيد من الديمقراطية , فالمحاسبة وتطبيق القانون واحترامه عوامل مساعده تجعل الناس تعمل علي تبنيه كنظام حكم لهم.


#677586 [sadig]
4.88/5 (4 صوت)

05-26-2013 09:47 PM
الصادق المهدي يحب الاطراء حد الثمالة وادرك ذلك اوائل مثقفي حزب الامة .. فأجادوا من صنف هذه المداهنة البائسة... فكيف يكون الحال عندك وانت رضعت ثديها ... بالله عليك اصابك الغبن من نميري لانه قتل الامام .. لم تتكون لديك غبينة واحدة من الانقاذ الذي قتلت جميع السودانيين ... وماذا عن الذين اغتالهم نميري .. شهداء يوليو 71 ويوليو 76 ومحمود محمد طه وشهداء انتفاضة مارسم/ ابريل 86... وجدانك الوطني مشروخ بسكين والدك ... لماذا لجأت لاخوك لكي يصرح لك بالسفر .. لن نصدقك فريتك بأنك رغبت في مواجهته وهو في القصر .. وماذا عن الممنوعيين الاخرين يا عضو المكتب السياسي لحزب قلتي انه يغطي السودان كله ...انت ووالدك وطنكم هو بيت المهدي... انتم ترهنون جماهير الانصار وتاريخهم لنظام الانقاذوعربونكم هو عبدالرحمن الصادق مقابل مصالحكم ...


#677583 [ابو حلقا مر]
5.00/5 (2 صوت)

05-26-2013 09:45 PM
كلام كتير شكلو مافيهو فائدة . البت دى انا شميتها من ما قالت نافع فيهو خير


#677577 [كرازي]
4.50/5 (2 صوت)

05-26-2013 09:37 PM
يا دكتوره مريم بامانه انتم نميري زعلكم ومابتسامحوه وهو الان ميت ما رايك في البشير قتل اهلنا وجوع السودانين وقسم البلد والجناءيه والتطهير العرقي والفساد مافي شي سيء في الدنيا ما عمله (دا كله مقابل اربعه كباري على النيل )


ردود على كرازي
United States [munie] 05-27-2013 12:41 AM
ماتنسى انو والدها هو المؤسس للمليشات والقتل على اسس قبلية٠٠ وبداءت بحادثة قطار الضعين ١٩٨٦ وبعدها تم تسليح المسيرية والحوازمة بدعوى قتال الحركة الشعبية والتى كانت تقاتل ضمنيا لحقوق عموم البقارة ٠٠٠


#677506 [حامد عابدين]
2.50/5 (3 صوت)

05-26-2013 07:30 PM
التحية لك يامريوم بنت الامام ، ونبارك لك وقفاتك الشجاعة ضد هذا النظام الظالم ، والتحية لوالدك الصادق المهدي الذي لا ننكر كفاحه الشديد من أجل ارساء قيم الديمقراطية في البلاد ، والشواهد كثيرة ، ففي ايام الديمقراطية قام يوهانس أكول ممسكا بالمايكرفون وهو على منصة البرلمان وشتم الصادق المهدي باقذع انواع الشتائم ، وهم أحد الاعضاء من حزب الامة بالرد عليه ، فأوقفه الصادق المهدي ، وقال للعضو ( دعوه فهذه هي سماحة الديمقراطية التي تسمح ليوهانس اكول ان يشتم رئيس الوزراء في الوقت الذي يحمل اخوه السلاح)
ولكن يا استاذة مريوم ، الا ترين ان السيد الصادق قد تساهل كثيرا خاصة مع هذا النظام ، بمبادراته التي لا تنفع مع هذا النظام ولا تجدي معه كل اشكال الحوار؟
الا ترين ان هذه المرحلة من الحكم الشمولي تحتم لغة مختلفة عن الحكم الديمقراطي؟
اليس التساهل يضر بمجمل الفعل الذي تقودة المعارضة بشقيها المدني والعسكري؟


ردود على حامد عابدين
United States [ود نمر] 05-26-2013 11:55 PM
كسر تلج , يا شيخنا اصبر وحاتسمع انها لحقت اخوانا وبقت وزيرة , وعمك حيتفرغ للجرتق والتنظير لانو ضيع الزمن في الكلام وما باقي ليهو حاجة تاني واولادو فهموها زمان بس انتو متين تفهمو


#677490 [الصليحابي]
3.50/5 (4 صوت)

05-26-2013 07:02 PM
د.مريم الصادق ، قامة نسائية توازي رجالاً كثر ، ينتظرها مستقبل كبير وواعد ، شجاعة ، قوية ، ثابتة في مواقفها ، تختلف عن أبيها واخيها ، هذا ما نعرفه عنها ولا نخلط بين مواقغها ومواقف ابيها ، لك التحية والتقدير ...


#677471 [حريف ما لاقي خانة]
5.00/5 (4 صوت)

05-26-2013 06:31 PM
المؤتمر الوطني عرف ان الشعب السوداني وصلت به الكراهية لاحزاب الامة والاتحادي درجة الموت عشان كده فسد وتجبر ... انتم برضو فهمتم هذه النقطة وعرفتم ان لا طريق لكم في حكم السودان الا من خلال وجود الانقاذ ...


#677363 [عربي كوبر]
2.19/5 (7 صوت)

05-26-2013 04:19 PM
الحديث عن السيد الامام الصادق المهدي غير منتهي الي ان يرث الله الارض ومن عليها ولو ابدعت مريم لن تفي لكني اقوال وانا لست من الانصار ولا علاقة لي بحزب الامة لي توجهاتي وميولي الحزبية اقول بصدق عقمت نساء بلادي ان يلدن مثله لك التحية الدكتوره مريم


ردود على عربي كوبر
United States [المكوفر] 05-26-2013 09:45 PM
والله ما ضيع السودان الا الصادق المهدي والسذج البطبلوا ليه بدون وعي وبدون عقل...

United States [حريف ما لاقي خانة] 05-26-2013 06:17 PM
انت ما عندك موضوع

United States [جركان فاضى] 05-26-2013 06:16 PM
يا اخى كوبر دى حيرتنا ما كفاية البشير جيت انت التانى


#677333 [جاسوس]
5.00/5 (3 صوت)

05-26-2013 03:51 PM
ولا أرسل لهم التحليلات التي تدينهم كمتهمين وكدا.
وما الذي ترسلينه لهم؟
بيانات مهمة أو معلومات منا أو من غيرنا ففي اعتقادي أننا جميعنا في وضع مهددون في بقائنا، والسودان سيد الاسم الذي ندعي جميعنا أن هدفنا إسعاده والحفاظ عليه سيذهب!
-------------------------
شغالة جاسوسة لجهاز الأمن ولا شنو ؟ والله ما فيكم فائدة للبلد أبدا أبدا جاتكم داهية كلكم


#677322 [مجهول]
3.00/5 (3 صوت)

05-26-2013 03:48 PM
انت ما فيك خير لا للسودان ولا للشعب السودان ولا للحزب الامة . تقولى نميرى مافية خير كفاية الخير العملوا فى عرفات حتى الان موجود وسيظل موجود انت عملتى شنوء يذكروك بية بعد ما تموتى .


ردود على مجهول
[ناجي] 05-27-2013 04:14 AM
عجبتني يا نصرالله في مجهول الموهوم وعرفات في عينك

European Union [نصرالله] 05-26-2013 10:05 PM
عرفات في عينك هذا التفكير الذي اضاع السودان وسينتهي منه --- البلد كلها مشاكل وتفكيرك في عرفات وامثال كثر قادننا لاءات ثلاث ولاءات مليون -- شعب فاشل لا يعرف مصلحته ولا هويته ويكره ذاته -- لذلك مصيره التلاشى وذهاب ريحه ولات حينة مندم


#677312 [الغضنفر]
4.50/5 (4 صوت)

05-26-2013 03:41 PM
أبوكي بتاع نظريات و بس. و الآن قاعد شوكة حوت في حلق أي جهة تحاول تثور في وجه نظام البائس. فرملة لأي حركة ضد الكيزان عشان لو جات ثورة حقيقية ح تكنسكم كلكم.
لقد أضعتم السودان.

المهدي الكبير طرد المستعمر ، نعم ، و ليته لم يفعل لكنا أفضل حالاً من الآن. خطأ المستعمر الوحيد أنّه ترك البلد لطوائف تعمل لمصالحها فقط و لو تأخر في منحنا الإستقلال قليلاً لحين نضوح المتعلمين و المثقفين لإدارة البلد لكنا في مصاف الدول المتقدمة.

العياذ بالله


#677288 [المتغرب الأبــدي]
5.00/5 (3 صوت)

05-26-2013 03:19 PM
الحكاية شنو الصحفيات الأيام دي شغالات تلميع في حريم الساسة ؟؟


#677275 [بتاع بتيخ]
0.00/5 (0 صوت)

05-26-2013 03:07 PM
طيب تعرسينى ؟


#677269 [tقارىْ]
0.00/5 (0 صوت)

05-26-2013 03:01 PM
والله فقرية


#677264 [hazim]
2.72/5 (7 صوت)

05-26-2013 02:57 PM
احسن ما في الصادق المهدي انه لم يتحكم فى اختيار بناته لازواجهم,و الدليل ان اصهاره لم يكونوا من امراء المهدية مثلا او الاسر التاريخة الكبيرة,فهم اناس من عامة الشعب


ردود على hazim
[Saeed] 05-27-2013 08:15 AM
أستاذة نجاة زوجها عادل من أقصى شمال السودان, وعلي ما أظن كان يعمل في منظمة مهتمة بالشأن الإنساني بالسودان عندنا التقى بدكتورة مريم والآن مغترب. المهم ليس من أسرة البرير الكريمة.

[nagatabuzaid] 05-27-2013 12:30 AM
القال ليك منو ؟ مريم زوجها ود ناس البرير كدى اذكر لى بقية ازواجهن ؟؟


#677254 [محايد]
1.00/5 (3 صوت)

05-26-2013 02:50 PM
معقول اقرأ الكلام ده كلووووووو عشان اعلق ؟؟؟
يا اخوانا البري الكتير ما كويس ،،، أرحمونااااا


ردود على محايد
European Union [sudani] 05-27-2013 01:19 AM
أنا زاتي قريت جزء من الموضوع وأصابنى الزهج لانه زكرني أبوها لمن أجى داخلا الى المنزل وأجده فى شاشة التلفزيون أقرب أدنقر وأشيل حجر أكسر بيه الشاشه ومن ثم انتقلت عشان أشوف التاس علقت قالت شنو وعجبني تعليقك وأنا عايز أقول ليها جدك محمد احمد المهدى كزاب ودعي وخدع الناس بأنه المهدى المنتظر خليكى من الذين خلفهم


#677252 [alex_81_82@hotmail.com]
4.00/5 (3 صوت)

05-26-2013 02:47 PM
خصلتين ما بتلمو الدقن والاخلاق


ردود على alex_81_82@hotmail.com
European Union [مهندس] 05-26-2013 08:00 PM
اعوذ بالله منك اعوذ بالله منك اعوذ بالله منك .... اللحية هدى محمد صلى الله عليه و سلم و من يحلقها اثم اثم اثم .... راجع دينك يا زول و ليس لناس الانقاذ لحية هم اشر منك

انهم اشرار

[jow1976] 05-26-2013 05:57 PM
يا أخي راجع كلامك وما تحكم حسب النظره الضيقة التي حدثت في سنين الإنقاذ , لأنو الدقن تشبه بالرسول الهادي الحبيب محمد صلي الله عليه وسلم وهو سيد الأخلاق , وبعث متمم لمكارم الأخلاق , ولا ما كده يا أخوي ؟


#677247 [صديقة الراكوبة]
3.75/5 (3 صوت)

05-26-2013 02:43 PM
ياجمااااااااااعة وين ثروت قااااااااااااااسم ؟؟


#677243 [Amin]
3.00/5 (3 صوت)

05-26-2013 02:41 PM
التحية للصحفية نادية عثمان وهي تجتهد في هذه اللقات . وتقوم بمجهودات مقدرة
وتطرح أسئلة تدور حقيقة في أذهان والسنة الكثيريين

هي مثال للصحفي ألمحب حقيقة لعمله


ما نراه من تميز المرأة السودانية في كل المجالات
يو ءكد إنه الزمن الجاي في السودان هو زمن و عهد المرأة (دع القيادة لنا وتمتع بالرحلة)

( وهذه أيضا إحدى اشراقات الامام في السودان .. فهو داعم قوي للمرأة)


ردود على Amin
[عوض ابوراس] 05-26-2013 09:57 PM
برضو بحيها لكن ابعد بعيد ياعواليق وماتقرب

شنو ياندوية ماتحنى وتلبى الدعوة لزيارة الاربيان بننسولا للوقوف على احوالنا

دكتور عوض ابوراس
كبير اخصائى المسالك البولية بمستشفى الملك سعود
عن تجمع مسقرطى الاربيان بننسولا


#677227 [فرقتنا]
5.00/5 (1 صوت)

05-26-2013 02:27 PM
تحية الصمود للجبهة الثورية اول الخطوات عند النزول الي المدن جمع كل الشرفاء الما مدغمسين وغير مخذلين وعمل دراسة طورائ في الامساك بزمام الامور كحل مؤقت وعدم اشراك الا من تاب وامن وعاد ال صوابة واصلح دون رياء وهي ثوره حتي النصر سوداني من ابناء الوسط المهضوم


#677221 [الهلالي]
4.50/5 (2 صوت)

05-26-2013 02:23 PM
الاستاذه الدكتورة مريم الصادق انت بت بلد أصيله ما في شك ولكن قولك ان النميري رحمه الله ما فيه خير تجافيت الحقيقة... يمكن ضربه للجزيرة أبا أثر فيكي وخلاكي ما تشوفي الجانب الخير في هذا الرجل الذي اجتمع حوله كل اهل السودان ... فكان رجلا عند كلمته ولا يعرف المداهنة والنفاق وكان قاطعا كالسيف ويكفيه فخرا ان ابن المؤسسة العسكرية الوطنية الذي لم يمتلك حتى بيتا يأويه وقضى عمره في بيت أسرة زوجته حتى وفاته فماذا تريدين من رئيس اكثر من ذلك... هل تريدين رئيسا مداهنا يلتف حوله المرتزقة والفساد؟


#677218 [ياسر حمد الدول]
3.00/5 (2 صوت)

05-26-2013 02:23 PM
ماشاء الله خير خلف لخير خلف ولاول مرة يعاب بيت الشعر الشهير
لاباس فى القوم من طول وعظم جسم البغال واحلام العصافير
ولكن فى عصر العولمة والفضاءت هل تنجح مسيرة الامس


ردود على ياسر حمد الدول
[nagatabuzaid] 05-27-2013 12:33 AM
كيف يعنى خير خلف لخير خلف ؟

United States [حسن] 05-26-2013 04:33 PM
خير تلف لخير سلف ،وديل السببو للسودان التلف (الفكري ،والتخلف والجهل )


#677154 [ابو الشيماء]
4.00/5 (4 صوت)

05-26-2013 01:28 PM
يا بت الامام انا والله بحترم والدك وكذلك انت
السيد الصادق المهدي رجل مؤدب ومهذب ومطلع وموسوعة في كثير من ضروب المعرفة والعلم ولكنه لا يصلح كرجل دولة اما كان لكم انتم ابنائه وبالاخص انت ان تغيروا وجهته حتي يستفيد منه الشعب السوداني في مجال اخر غير السياسة
اما كلامك عن المرحوم جعفر نميري فاني اري انك قد حدت عن الحق وتقمصت شخصية الانصاري المتعصب الذي لا يري الا بعين واحدة ان المرحوم جعفر نميري ما زالت اعماله الصالحة والتي نحسبها تصب في ميزان حسناته جارية الي الان فهو اول من اراق الخمور في شوارع المدن والريف وهذا لم يحدث في اي بلد اسلامي الا مرة واحدة في المدينة المنورة في عهد الرسول صلي الله عليه وسلم
وهو اول من رفع الاذان في عهده وبامر منه في الاذاعة والتلفزيون وهو اول من امر بدعاء السفر في سودانير وهو الذي زرع عشرات الالاف من اشجار الظل في عرفات ووووووو.... فكيف يكون بعد كل ذلك ما فيه خير


ردود على ابو الشيماء
[nagatabuzaid] 05-27-2013 12:37 AM
والله يا ابو الشيماء اليوم اول مرة تقول كلام يعجبنى جعفر نميرى فعلا كما قلت

[متعودة دائما] 05-26-2013 09:59 PM
ياناس ياهوى ابوشيماء ده علبة مقدودة اكتر من الهالك حاج نور وماعندو بت ولايحزنون وبتلقوا بالليل هناك فى شارع عبيد ختف

[بدون] 05-26-2013 06:37 PM
عغيت منك يا الضعيف

United States [ابوشنب] 05-26-2013 06:14 PM
ليه كل ما ننتقد ديكتاتور يقوم واحد ناطى يكلمنا عن ورع وتدين ظاهرى للشخص المعنى. يا ابو الشيماء يظل نميرى مستبدآ وعميلآ للأمريكان و مهربآ للفلاشة ..وأخيرآ متاجرآ بالدين تمامآكاخوان الشياطين. شكلك سدنة قديم.

[الحقيقة مرة] 05-26-2013 04:44 PM
الحي خلاس قنعتو من خيرا فوقو وبقيتو تشكرو للميت ولا شنو يا مولانا الذي غشانا ؟

United States [الضعيف] 05-26-2013 03:16 PM
ومن يعمل مثقال ذرة.. الكلمة على الميزان بعدين ولا أنا ولا انت لا ندري ميزانه..وصراحة هذا ليس بموضوعنا...ولا يهمنا..حسابه بعد هذا عند ربه

المهم الإرث الذي فعله نميري.. الدولة الديكتاتورية التي تحكم الناس بغير وجه حق.. غير الذين عذبوا وقتلوا في عهده.. يا أخي سفك الدماء والروح أهي هينة لكي تقارنها بالأفعال القليلة..


#677143 [سودان جديد]
5.00/5 (9 صوت)

05-26-2013 01:19 PM
بتكرهو النميري لدرجة انو بعد الانتفاضة ابوك ابى يواصل في التنمية البداها نميري بالعكس
من الانتفاضة لحدي ما قلبو عليو الحكومة كان مشغول بكنس اثار مايووووووووو
وبعدين المهدي الكبير كان عندو شنو لمن تتكلمي عن النميري الصادر اموالكم وحقوقكم ؟ من وين جبتوهاااااااااا
حموك تسافري فمشيتي لعبد الرحمن يتوسط ليك
اها الما عندو اخو في القصر ما يسافر ولا شنو ؟
ساعات لمن الواحد يلزم الصمت بكون احسن من الكلام الدراب
كرهتك وقلبي اباك يابت الناس
الصحفي سيد الحوار قال ليك بعيد عن السياسة انتي اصريتي تدخلي السياسة في كلامك وياريتك ما اتكلمتي فيها

لا مهدي لا ميرغني لا كيزان
دايرين شيطان رجيم بس


ردود على سودان جديد
[nagatabuzaid] 05-27-2013 12:40 AM
سلمت

[محمدون] 05-26-2013 11:09 PM
طيب ما يخلو ليك العهد الحالي وده هو الشيطان الرجيم .. وماذا تفعل اذا جادت الديمقراطية في السودان الجديد بالصادق حاكما؟


#677126 [خالد حسن]
4.94/5 (6 صوت)

05-26-2013 01:04 PM
كان تسأليها هل الصادق كوز مستتر؟
غايتو العمايل البعمل فيها ابوك دي ماعمايل زول محروق علي الديمقراطية الاتوأدت في عهده وعلي يده
ولاعمايل زول داير يرجع الديمقراطيه ولاهو حريص علي عودتها
حزب الامه فقد كثير من مصداقيته امام الناس بتمييع للصادق للمعارضه


#677124 [ابعاج]
4.96/5 (7 صوت)

05-26-2013 01:03 PM
انا لو ماكنت بتو كنت بنافس فى الحته دى..؟؟؟؟؟
قمة النفاق والرياء من بت المهدى ...تلميع وصنفره لرجل كان هو السبب فيما وصل اليه السودان اليوم ...دارفور فى طريقها للانفصال ...وان حدث ذلك فحزب الامه حينها يعتبر حزب اجنبى ...مافى فرق بينو وبين حزب سلفاكير ..فاهمين ياانصار ولا نزيدكم شويه؟؟؟


#677120 [ابو ايمن ودالضو]
4.41/5 (6 صوت)

05-26-2013 01:00 PM
كلام زى العسل !! وابن الوز عوام ؛ والمنضمه حقتكم وارثنها وراثه ؛؛؛ انا قريت الموضوع لغايت عينى مازغللن بس شايفو ونسة جيران ابوى مشى الحج وابوى كدا كدا ؛ والله المستعان للسودان .....


#677119 [عبد الحي]
4.25/5 (4 صوت)

05-26-2013 01:00 PM
لا تلم السكران في حال سكره****فقد رُفع التكليف في سكرنا عنا
نحترم السيد الصادق المهدي، ولكن:
ألا ترين يا دكتورة مريم أنه يُصدق المؤتمر الوطني أكثر مما يجب رغم إنو شاف فيه ما شاف؟

وكذلك قد ساعد في إطالة عمر النظام في مرات كثيرة وأخرجه من ورطاته؟
تحياتي لك وللأخت نادية


#677110 [Nureldin]
1.50/5 (6 صوت)

05-26-2013 12:56 PM
التحية لبنت الحبيب الامام الصادق المهدى


ردود على Nureldin
United States [نــصــر] 05-26-2013 02:22 PM
حـباك بـرص .. وللعـلم البرص هو الضـب أو الوزغ .. وهذا دعاء قول آمين..



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية




الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة