الأخبار
أخبار إقليمية
السودانيون فى السعودية الحكومة تبدى تخوفها !!
السودانيون فى السعودية الحكومة تبدى تخوفها !!
السودانيون فى السعودية الحكومة تبدى تخوفها !!


05-28-2013 05:42 AM
مديحة عبد الله

جاء فى صحيفة الخرطو م الصادرة امس ان وزيرة تنمية الموارد البشرية (تخوفت ) من عدم توفيق السودانيين المتواجدين بالمملكة السعودية لاوضاعهم مما يعرضهم لمواجهة القانون السعودى , وقالت الوزيرة انها بصدد زيارة للمملكة على رأس وفد من الوزارة للوقوف على اوضاع السودانيين فى المملكة ومعالجة بعض الاشكالات الفنية التى تواجه السودانيين هناك .

اخيرا تحركت الحكومة وابدت (تخوفها) على اوضاع السودانيين . امر اشبه بالعمل فى الوقت الضائع لان القضية اثيرت من قبل المملكة السعودية ومن قبل المواطنين السودانيين لكن تم التعامل مع الامر بالتجاهل وكأن الزمن كفيل بحل المشكلة وبشكل فردى كل مواطن وحسب قدرته على ايجاد بدائل تضمن له ولاسرته معالجة اوضاعه, حدث ذلك فى حين عمدت بعض الدول على القيام باجراءات واتصالات مع السلطات المختصة لوضع معالجات لمواطنيها حتى لايتضرروا اقتصاديا واجتماعيا .

ترى مافائدة الزيارة الان ؟ كان من الافضل لو عملت الوزارة على متابعة الموضوع منذ البداية لكن الوزارة لم يكن بامكانها القيام بذلك دون ان تتوفر على معلومات عبر ملحقيات عمالية بسفارات السودان بالخارج وذلك ببساطة لعدم وجود تلك الملحقيات فى الاصل حسب حديث صحفى لمديرة الادارة العامة للاستخدام والهجرة بوزارة العمل بل ولاتوجد اتفاقيات او بروتوكولات بين السودان لتبادل الايدى العاملة والدول التى توجد بها عمالة سودانية وعزت ذلك لميزانية وزارة الخارجية العاملة وقالت ان بعض المهاجرين يجهلون حقوقهم وقوانين الدول التى يهاجروناليها .

امام الوزارة امر يمكنها القيام به هو بذل الجهود لوضع ترتيبات لهؤلاء المواطنين بحيث يتم التخفيف من الخسائر الاقتصادية والاجتماعية الناجمة من فقدان العمل او الاضطرار للعودة للسودان دون بدائل او فرص متاحة لاستئناف الحياة فى بلد فضلوا العمل خارج حدوده دون ضمانات . اننى اتضامن مع هؤلاء المواطنين وارجو ان تجد قضيتهم المتابعة من وسائل الاعلام والاحزاب والمنظمات وجهات الاختصاص , ولنتذكر ان القضية قضية اسر والتزامات اجتماعية واقتصادية واخلاقية بقوم بحملها هؤلاء المواطنون ولاجل ذلك عرضوا انفسهم لمشقة البحث عن عمل فى المملكة السعودية دون ضمانات .

الميدان


تعليقات 39 | إهداء 0 | زيارات 12388

التعليقات
#681364 [AburishA]
0.00/5 (0 صوت)

05-29-2013 01:12 PM
المشكلة بسيطة! ادفعي ليهم حق الكفيل ونقل الكفالة وقضى الامر الذي فيه تستفتيان!!


#681178 [عبد اللطيف الاحساء]
0.00/5 (0 صوت)

05-29-2013 11:25 AM
إخوانى المغتربين السلام عليكم \يقول الله سبحانه وتعالى\عسى أن تكرهوا شئاوهوخير لكم\ يعنى لازم نكون إيجابيين فى كل شى مادام الامر كله لله وبدل مانضيع وقتنا فى زم ومدح الحكومه والسفاره لابد من الرجوع الى الله سبحانه وتعالى ونحن نعلم إن عنده مفاتيح الفرج والله الموفق0


#681130 [ابو ايمن ودالضو]
0.00/5 (0 صوت)

05-29-2013 10:55 AM
واها ابشرك بالخبر اليقين من دوله بطبق الدين واقول ليك مش لو بيقيتى وزيره حتى ولو اميره ؛؛لو مامعاك محرم تبقى مصيبه .. وحتى لو كانت رفقه مامونه زى مابقولوا اهلنا والمطاوعه هنا الستره واجبه واتغطى ياحرمه...


#680957 [عدي]
0.00/5 (0 صوت)

05-29-2013 09:43 AM
نحن يا ناس الحكومة لوراجنكم انتو كان وطاتنااصبحت ضيقتوها علينا في السودان ونحن خلينا ليكم السودان م عايزين منكم شئ الحمد لله صححنا اوضاعنا وخدمنا كتر لتصحيح اوضاعهم وحتي الان نعمل ليل نهار لاخراج اكبر قدر ممكن من السودانين المخالفين للنظام العمالة بالمملكةالي الوضع القانوني وحقيقة وللتاريخ السلطات السعودية بجميع مسمياتها قدمت تنازلات كتيرة جدافي سبيل تصحيح اوضاع العمالة المخالفةولم تقف في عرقلة اجراءات احد بل نتشرت تنوير اعلامي واضح وصريحي وبه كل التفاصيل وخصصت وقت اضافي للدوا م اليومي لتصيح الاوضاع ولكن للاسف تجد بعض العمالة ومن جميع الجنسيات ليس له اثبات شخصية واذا قلنامثلا دولة السودان بتلقي مئات الافراد بدون جواز سفر فبالله عليكم الله دا اصحح لية وضعو كيف وايش ضراني بانو هو سوداني من اصلو


#680684 [mhammad]
0.00/5 (0 صوت)

05-29-2013 12:48 AM
اولا المهلة انتهت - وبعدين لماذ لم يكن التحرك باكرا تعبنا من التخدير والاوهام التي لاتقدم


#680545 [um ahmed]
5.00/5 (1 صوت)

05-28-2013 09:38 PM
اخوانى الكرام 00 محمود جديد وحجازى 00 حياكما الله . اخوانى اشكركما جزيل الشكر لانصافكم لى وردكم لى اعتبارى والله فعلا اصبحت فى هذه الراكوبه اقدر اخوانى الرجال اكثر من هؤلاء النساء الماعندهن ايى شغله سوى اساءات الناس وبالذات الاساءه لى انا من غير ايى سبب . واقول لك اخى حجازى البت ما خانها التعبير صدقنى هى قاصده الاساءه لان الحكايه دى انا لاحظتها الايام الفاتت كل كم يوم تطلع لى واحده بدون سبب تسيىء لى دون بقية الناس فى هذه الراكوبه والغريبه كلهن نساء طيب اخى لماذا اخوانى الرجال فى الراكوبه لا يخونهم التعبير ويسيئوا لى ؟ اكيد هذا من امراض النساء التى قلتها الله يشفيهن . اكرر شكرى لكما اخوانى الكرام . ودمتم


#680518 [abosara]
5.00/5 (1 صوت)

05-28-2013 09:10 PM
يا أيها الشعب السوداني ( الفضّل ) في داخل وخارج السودان ( بالبلدي ) : عندكم حلين لا ثالث لهما ( 1 ) كل زول يشيل شيلتو . ( 2 ) تهبو هبة رجل واحد ( رجال ونساء ) وتكنسوا حكومة الظلمة , وتقرروا مصيركم بنفسكم ( إذا كنتم شعب يستحق الحياة ) . والسلام .


#680515 [بابكر السوداني]
0.00/5 (0 صوت)

05-28-2013 09:06 PM
الإخوة الأعزاء بجريدة الراكوبة الألكترونية نفيدكم علما" بأن الصورة المرفقة ليست للأستاذة مديحة عبدالله وإنما هي للأستاذة مها زين العابدين.http://swabp.org/wp-content/uploads/14.jpg


#680493 [Almo3lim]
5.00/5 (1 صوت)

05-28-2013 08:39 PM
أحد المسئولين السعوديين قال (( أننا جادون في قراراتنا ) و الأجانب (أضاعوا) الوقت بالتوجه إلى سفاراتهم ))...

حكومة الجن لا تعي أو أظنها تتعامى عن خطورة عودة (الآلاف) ممن سيفشلوا في تصحيح أوضاعهم و أقول لأولي العلم لماذا تبقت في بلادنا معسكرات اللاجئين الأريتريين و الأثيوبيين في بلادنا بالرغم من توقف الحرب بين الدولتين ؟؟؟

عودة اللاجئيين تسبب مشكل أمني و إقتصادي و بقائهم بالخارج تحت غطاء دولى يقدم لهم المساعدات أفضل من ( الجبجبة) إحتفالا بعودتهم (بدون) إستعدادات لتوظيفهم أو أستيعابهم في مناشط تساهم في إستقرارهم و في إستقرار بلادهم ، و كذا الحال بالنسبة لعشرات الآلأف من السودانيين الذين قد يواجهوا بفشل مجهوداتهم حيال توفيق أوضاعهم بالسعودية ...

هل يدرك المسئولون السودانيون خطورة الأمر أم أنهم كعادتهم (متواكلون) و يتبعون حكمة البتجي من السما تتلاقاها الواطه ؟؟؟.!!!!

عموما أتمنى أن يكون في الأمر مدعاة لأن تقوم قنصلياتنا بأحد أدوارها و أهمها (حصر العمالة السودانية بالخارج) و متابعة مشكلاتها و العمل على حلها أما السعودية فلا أظنها ستعيد النظر في قراراتها لأنها مسألة (أمن وطني) و لن تتغير القرارات بسبب العلاقة التاريخية بين البلدين ..


#680408 [فجاخ]
1.00/5 (1 صوت)

05-28-2013 07:16 PM
ا.


ردود على فجاخ
United States [صديق] 05-28-2013 10:59 PM
دا رد وسخ
حقو يسحب من التعليقات لأن من أورده واضح أنه من لسفالة بمكان
كيف تبيح لنفسك الإساءة للسودانيين ؟ يا ممرمط يا صايع ؟
أنا أحد السودانيين وأعتبر هذا فيه مساس بى لذا سأرد عليك بما يخزيك
وكان أجدر بك أن تكتب إسمك وعنوانك كاملا ؛ لكنطك للأسف دون الرجولة السودانية
فلذلك سنجهلك

[الله اكبر] 05-28-2013 10:57 PM
لا تقذف خلق الله وتجمع الناس في امر كهذا عن نفسي حسبي الله ونعم الوكيل فيك وربنا ياخد حقي منك يوم الوعيد

Hong Kong [واحد] 05-28-2013 10:18 PM
انت اسم علي مسمي , الله يفجخ نافوخك , لو سوداني ما بتقول نسائهم بس المحيرني فجاخ دي العلمك ليها منو , اكيد واحد فجخك


#680359 [سوداني مقهور]
0.00/5 (0 صوت)

05-28-2013 06:22 PM
أكتر ناس حيتضرروا من القرارات دي هم ناس حكومة الجبايات ممثلة فيما يسمى جهاز تشريد المغتربين وأذيتهم،،، أها النقاطة دي حتقل وتبقى حِبيييييييبة النشوفكم بتسرقوا شنو يا حرامية


#680342 [um ahmed]
0.00/5 (0 صوت)

05-28-2013 06:09 PM
انتى يا المدعوه 00 عازه سراج الدين 00 اولا احترمى نفسك وتادبى . ثانيا 0 كيف يعنى 00 اول مره اقول كلام مضبوط وفى محله 00 بتقولى كدا لانك ما بتفهمى كلامى فقط بتفهمى الكلام المسيىء . ثالثا تقولى انى 00 طيبانه 00 قصدك يعنى هبله وعبيطه سبحان الله ودا كلوا لزوموا ايه ؟ طبعا بترى انى طيبانه لان اسلوبى فى التعليقات يختلف تماما من غالبة المعلقات الاساليبهن تنم عن سوء البيئه الخرجن منها وشخصى ليس كذلك . رابعا 0 ايه حكاية كل يومين تنط لى واحده منكن بدل تعلق فى الموضوع لكن لانكن سطحيات وما بتعرفن تعلقن تعليقاتكن فقط اساءه لى انا شيىء يحير والله . خامسا انتى يختى طلعتى من وين اول مره اشوف اسمك دا فى الراكوبه ودا باكد لى انك واحده من الاثنين الاصبحن مستقصدنى بدون سبب وطلعتى باسم جديد لتواصلى حملة اساءتك لى . وانتن الظاهر عاوزنى اخلى ليكن الراكوبه لكن بعدكن والراكوبه بها اخوه رجال والله اكن لهم كل تقدير واحترام لانهم بتعاملوا بيصفاء نيه وقلوبهن نظيفه وبحترمونى وليس مثلكن انتن النساء الاثبتن لى مقولة النساء بغيرن من بعض وبحسدن بعض وانتى منهن واعوذ بالله منكن وكفانى الله شركن وحسبى الله ونعم الوكيل . واخيرا اقول لك ولبقية الحاقدات 00 الكلاب تنبح والقافله تسييييييييييييييييييير 00


ردود على um ahmed
United States [حجازى] 05-28-2013 06:44 PM
طولى بالك يا ام احمد ...الموضوع بسيط ...بس الظاهر البت ما قدرت تعبر عن مشاعرها بطريقة صحيحة(خانها التعبير بالدارجى)...للحقيقة تعليقاتك دائما موزنة ومنسقة ومابتسى لاى حد...ودا من كريم اصلك...وحطى فى بالك (الراكوبة)دى لامة كل المستويات والمتردية والنطيحة وماظلم البشير...لذلك استمرى ولا تعيرى اهتمامك لبعض السلبيين...


#680303 [حجازى]
5.00/5 (2 صوت)

05-28-2013 05:43 PM
يا وزيرة الهنا...جاية بعد الهنا بسنة.....وين الشهرين الفاتو فى الكوفير ولا عواسة الابرى....والله الراجيكم انتو واطاتو اصبحت....بالله بالمرة كدا امشى سفارة الفلبين والهند وشوفى عملو شنو عسى ولعل تستفيدى منهم فى رعاية مواطنيهم....امس فى شركة اخدت خمسة الف هندى (5000)....بعدين الديوك اللى رسلوك ديل ما عارفين نظام السعودية يعنى حتجى تقعدى مع عادل فقية راس براس...ياكافى البلاء لا فهم برتوكولات ولا فهم عمل (طرش بحر ذى مابقولو)...


#680227 [حداثة صالح]
0.00/5 (0 صوت)

05-28-2013 04:31 PM
قدر ما نقرأ كلام زي دا بجينا وجع قلب رغم اني الحمدلله قاعد في وسط البلد كرش الفيل وشغال في مجال العقارات .. الشئ البجيب وجع القلب بلد فيها كل مقومات انه ممكن تكون في مصافي الدول المتقدمة.... بس المصيبةء معانات اخوانا البرة لا يعلمها الا الخالق غربة وشقي ودموع وانين وامال واحلام ومهددين خاصة الناس الما عندهم شهادات جامعية ..في رأي الشخصي يشوفو الوفد الماشي دا مطلع ميزانية قدر شنو للسفرية وبعد داك يوزعوها للأشر الفقيرة لانه اصلا ما في حيتعمل السعودية طلعت قرار ملكي انه اي زول مخالف او قبل كدا سجن اكثر من 3 شهور حيبعد وطرد المخالفين وكدا وكلامهم واحد الناس ديل .


#680127 [حمد مفرح]
0.00/5 (0 صوت)

05-28-2013 03:19 PM
لو الوزيرة عايزة تعمل معروف ممكن تساعد الناس الما عندها فلوس لتصحيح اوضاعهم دي الحاجة الوحيدة الممكن تعملها


#680081 [ابومها]
0.00/5 (0 صوت)

05-28-2013 02:47 PM
الزيارة متأخرة جدا جدا ... لكن أن تصل خير من أن لاتصل .. ولا كيف؟؟


#680054 [الكتلتو الجدادة وخمت بيضو]
5.00/5 (1 صوت)

05-28-2013 02:31 PM
ارجو ان تسرع الوزىرة .بالمناسبة هي متزوجه


ردود على الكتلتو الجدادة وخمت بيضو
United States [الكتلتو الجدادة وخمت بيضو] 05-28-2013 11:45 PM
اقصد هل هي متزوجة؟

United States [؟!] 05-28-2013 05:10 PM
وماعلاقة سرعتها بزواجها؟؟!!!!


#679973 [ابوكباس]
5.00/5 (2 صوت)

05-28-2013 01:36 PM
واحد سودانى كفالته على اميرة وشغال لحسابه الخاص عايز ينقل كفالة الاميرة قالت لكل عمالهاالداير يشتغل في القصر مرحب به اما غير ذلك فليعمل خروج نهائى علما ان في القصر تملا كرشك بما لذ وطاب لاكن الرواتب ضعيفة جدا لاتتعدى الالف ريال اذا الموضوع بالجد خطير لاتوجد استثناءات فعلى السودانيين الاسراع بتصحيح اوضاعهم حتى لايقع الفاس في الراس


#679867 [جمال الدين محمود نصر/الاحساء]
4.88/5 (4 صوت)

05-28-2013 12:37 PM
الموضوع مامحتاج لوزيرة ولاحتى البشير نفسه - البلد هنا منظمة والمرسوم الملكى واضح وكل واحد

هنا بيصحح وضعه لحاله ومامتوقعين من حكومة السجم مساعدتنا لاننا اتعودنا على كده وعارفنهم

مافاضين لينا - اهم حاجة يجمعوا فى الجبايات والضرائب وكل يوم يضاعفوا الرسوم - تخيلوا راجعت

السفارة الاسبوع الماضى بخصوص استخراج جواز بدل فاقد لابنى الطالب عارفين دفعونى كم ؟؟ دفعونى

300 ريال بال بالتمام والكمال - مع العلم أن قيمة الجواز الجديد للطالب 90 ريال فقط ؟؟؟؟؟ دى

مامهزلة ؟؟؟ وكمان الوزيرة جاية ؟؟؟؟!!!!!!!!

لكن وللحق وللامانة اكثر شىء ملفت فى السفارة وبشهادة اى مراجع نزاهة وانسانية العقيد (حاتم)

مدير الجوازات - ابن ناس - شهم - رجل بمعنى الكلمة - سهل وحل كل المشكلات التى واجهت المغترب

ربنا يحفظه ويجعل ماقدمه فى ميزان حسناته,,,,, وربنا يكثر من امثاله


ردود على جمال الدين محمود نصر/الاحساء
[التحية لكل شريف ونضيف في السفارة وخلوق ومهذب] 05-28-2013 05:07 PM
المدعو/osman ياخي انت ليه ما فيك ذرة بتاعت انسانية وحسن نية وتوقع الخير في الناس.. الان وبشاهدة اثنين من الناس يعني الناس دي مصلحة شنو يكذبوا،، صراحة لما تسمع ناس بها المستوى وبهذه الأخلاق نفرح كمسملين اولا والحمد لله.

اضافة لكلام الاخوان هؤلاء اعجبني ايضا تعامل العقيد اللي كان في الجوازات المغتربين مدني الكلام دا سنة 8/ 2008.. راجل منضبط بمعنى الكلمة ومهذب وخلوق ومهتم جدا بقضايا الناس من تجديد وفيما يخص والله العظيم الفترة طويلة نسيت اسمه. ضابط الشغلة حتى في افراده من لبس وزيي

United States [ام عبد الواحد] 05-28-2013 05:02 PM
السلام عليكم اخى جمال الدين عرفت انك مقيم فى الاحساء اد ان اسألك عن حقيقة الوضع على ارض الواقع عندكم فيما يخص انتشار فيروس كورونا حمانا الله واياكم الرجاء الرد وشكرا

United States [واحد تانى] 05-28-2013 04:49 PM
يا osman لا تحصر الجيش السودانى بافعال البشير وعصابته......!!

United States [واحد تانى] 05-28-2013 01:27 PM
وكذلك يوجد موظف شاب ملتحى يعمل فى شباك العقود والتوكيلات، انه قمة الاخلاق والتهذيب،يقوم بخدمة المراجعين بكل اريحيه ... والله العظيم لا اعرفه ولا تربطنى به اى علاقة ..

[osman] 05-28-2013 01:23 PM
لاتنخدع فييييه فهو يتقاضي الاجر مقابل عمله ...... مافي عسكررررري ابن ناس من الجندي لحدي المشير.........


#679859 [um ah med]
5.00/5 (2 صوت)

05-28-2013 12:34 PM
عليكم الله يا اخوانى احسبوا الفتره المتبقيه من الشهر الفضل لنهاية تصحيح اوضاعكم بعد ما الوزيره تاتى وتادى عمرة رجب ثم تاتى لحرم الحبيب صلى الله عليه وسلم وتزوره وعلى الاقل تجلس ثمانيه ايام فى المدينه للصلاه فى الحرم كدا حوالى عشره ايام انتهت ثم زيارة الاهل والعوازيم والتسوق والذى منه تكون العشرين يوم الاخيره انتهت وامكن تفتح الموضوع فى يومها الاخير ويمكن لا يعنى فى النهايه هى اصلا جايه عمرة رجب واليومين دى قالوا الجو سخن شديد فى السودان بالمره تجى ترطب هى ومحرمها كم يوم لانه اصلا ما مفروض تاتى بعد ما انقضت المده . اين كانت طيلة الشهرين الماضيات اغلب الدول اتوا مسئوليها من بداية القرار لحل مشاكل رعاياهم الا السودان . الله يكون فى عونكم يا اخوانى ربنا وحده معكم ولن يضيع حقكم ان شاء الله


ردود على um ah med
United States [صديق] 05-28-2013 11:14 PM
لا يا أم أحمد ؛ لماذا كل هذا الكلام الما صح منك فى حق الوزيرة ؟
مش كفاية ما أصابها من حكومتك البائسة واللا عايزة تتمى الناقصة ؟
برضه وزيرة هميمة ونشكرها جدا على هذه المبادرة التى أصلا شأن حكومى مؤتمر وطنى
بجهاز شئون المغتربين والذى من المفترض أن يقوم بتحريكه السيد الباقر والذى عين فيه
ترضية للمغتربين بعد أن كان مغتربا هنا - وأيضا نوع من التمكين .
فيا أم أحمد لا تزيد جراح أختك الوزيرة ويجب مساعدتها بتهيئة الجو لها حتى تستطيع حل مشاكل من هم بحوجة للحل مع الجهات الرسمية بالمملكة ؛ ونشكرها على مبادرتها الكريمة / دكتورة إشراقة .
وبعدين عازة جاملتك فى كلامك بما أنه غلططططططططططططططططططططططط

United States [MAHMOUDJADEED] 05-28-2013 08:41 PM
يا عازة اسلوب ام احمد لم يتغيّر بس انتي غيري من نفسياتك شوية والأمور بتمشي عال العال .. حفظكما الله ورعاكما .

[عازه سراج دهب] 05-28-2013 03:40 PM
والله ياأم أحمد أول مره تقولي كلام مضبوط وفي محله لأنك دايما مطيباتيه سبحان الله مغير الاحوال.


#679819 [عابر سبيل]
5.00/5 (1 صوت)

05-28-2013 12:12 PM
السفارة لا تقوم باي دور في صالح رعاياها بالسعودية ومن الشكوى العامه هكذا حال كل السفارات في كل الدول .. لا اعرف ماذا درس من يعمل في السفارات وعلى ماذا تدرب وماهو فهمهم لدور السفارة او القنصلية او الملحقية ؟


#679800 [مليساي]
0.00/5 (0 صوت)

05-28-2013 12:02 PM
بس الدكتور قال لي ماتضحك


#679635 [حمادة]
0.00/5 (0 صوت)

05-28-2013 10:37 AM
الله يكون في العون


#679619 [ابو عناد]
3.00/5 (1 صوت)

05-28-2013 10:29 AM
لو ماجات تأكلوها ... ولو جات تقطعوها
التفاؤل محذوف من قاموسنا


ردود على ابو عناد
United States [دقيقة بالله] 05-28-2013 02:51 PM
قلت التعليقات العقلانية كتعليقك يا أباعناد ...أكثر الله من أمثالك...وأعان الله "حواء السودان" أن تلد لنا شعبا رشيد بعد أن أشتعل رأسها شيباوتوسد زوجها "أحمد شرفي"...فهل من أمل؟


#679614 [Mohd]
0.00/5 (0 صوت)

05-28-2013 10:25 AM
صحي النوم يا اخت هارون!!

بالمرة جيبي معاك هارون اخوك دا خليه يحرسك في الاسواق لما تمشي تتسوقي


المهلة راح منها شهرين وباقي شهر واحد او اقل

الان صاحية ؟

غريبة اول مرة الحكومة عايزة تعمل حاجة مفيدة زي ما قال عادل امام

لكن في الزمن الضايع


#679584 [ابو ايمن ودالضو]
4.96/5 (7 صوت)

05-28-2013 10:09 AM
يابت الحلال مبروك المنصب . ونصيحه اقولها ليك ماترجفى وتتكبكبى ساكت ؛ والله الحكومه السعوديه قوانينها واضحه زى الشمس وبكل اللغات والوان الطيف ومادايره ليها مترجم او مناديب من دول!!! خليك مع كفيلك وبس. على الطلاق تقعد عمرك كله مافى واحد بسالك .. خليك مقيم ونظامى حسب القانون وبس!!! لكن الناس الشغاليين هوبلى وكيرى وميرى والعداد رامى فى الجيب انتهى زمنه؛ صحح وضعك مع صاحب الاقامه ... حكومات بتعرف تحافظ على امنها واستقرار الدوله ؛ حكومه وقياده شرط .. فترة سماح لكل مخالف وكل مخل بشروط الاقامه. جانب انسانى ودينى راقى ؛ الناس عندهم واحد...والست الوزيره لو عاوزه تادية مناسك وشوية shopping وزيارة الربع والقرايب اهو فرصه والله جابا ليها طالما هى فى مهمه رسميه وبنود بالهبل عشان المصارى ؛؛ وماتنسى سيارة السفير والسواق فى الانتظار ؛ وزياره مبروكه...


ردود على ابو ايمن ودالضو
United States [saad] 05-28-2013 11:03 AM
يا جماعه الموضوع ما عاوز تحليل ولا تفسير زي ما قال الأخ ود الضو و ما في دهعي لللت و العجن كلام الحكومه السعوديه اي زول يشوف ليه كفيل و يشتغل معاه وينوم قفا ، غير كدا ما في حاجه نص نص ، وللاسف انا عارف سودانيين كتيير لي هسع ما عملو حاجه و بقولوا بتتحلا و بتنتهي و اغلبهم ما بقروا الأخبار قعدين ساي وقد اعذر من انذر


#679580 [شنان]
4.88/5 (4 صوت)

05-28-2013 10:07 AM
السودانيين من أفضل الجاليات في دول المهجر بشهادة الجميع بس للأسف القنصليات والسفارات السودانية مطنشة السوداني وهاضمة حقوقه لحد الاجحاف وكثير من المشاكل التي تواجه المغترب ولكن السفارات تغض الطرف عنها وليس ذلك فقط حتي عندما يتداول أي امر عام بشأن السوداني لايحرك ذلك ساكنا في السفارة .. فمثلا الاعلان الذي نشر في صحيفة سعودية في الرياض بأن مطلوب مهندسين من كل الجنسيات عدا السودانيين , هذا الامر من صميم عمل السفارة السودانية بأن يتحروا من الشركة ناشرة الخبر ويطلب منها إعتذار رسمي ويتم تحاكمها وأنا موجود بالمملكة والله الواحد يأسف لمن يجيب ليك الاعلان وأحد أجنبي ويقول ليك ياسوداني أقرأ الاعلان !!
ولو تحرت السفارة عن الموضوع أكيد سوف يكون وراه مصري .. لان المصريين يحاربون السودانيين في سوق العمل بكل ماأوتو من قوة ولن يعرف ذلك الا من كان مغتربا ..مثلما نشروا حكاية السوداني كسول يريدون أن يشككوا في المهندسين السودانيين نسبة لفشلهم ومعرفة العرب بهوية شهاداتهم المزورة وكثرة كذبهم في سوق العمل وحب العرب للسودانيين لنزاهتهم .. فيا حكومة السجم الرماد تحركوا وأحموا رعاياكم وياسفارات وسفراء الي متي سيظل السوداني الكبير في نظر الكل الى متي تقدروه .


#679555 [احمد المصطفي]
5.00/5 (1 صوت)

05-28-2013 09:55 AM
ماذا يفيد الشاة بعد زبحها


ردود على احمد المصطفي
United States [SAEED AL SAEED] 05-28-2013 12:27 PM
ماذا يضير الشاة سلخها بعد ذبحها


#679533 [ابوياسر]
5.00/5 (2 صوت)

05-28-2013 09:45 AM
الوزيرة كانت منتظره من زمان الوقت دا عشان تعمل ليها عمره في رجب والمغتربين كان راجينها تعمل ليهم حاجه وطاطهم اصبحت. ما في مغترب منتظر من حكومه السجم دي تعمل ليهو حاجه عشان كده كل زول بكون وفق اوضاعه بطريقته الخاصه


ردود على ابوياسر
United States [سواق القطر] 05-28-2013 12:55 PM
والله يا اخي مسألة اداء العمرة لا تحتاج لوزيرة كل الناس بتمشي عمرة حتى بتاع الورنيش ومسالة الغرض من الزيارة من صميم عمل الوزيرة الا ان الغرض من اثارة هذا الموضوع الآن تحت قصد وناجم عن دوافع لا تخفى على القارئ الحصيف حيث كان لها موقف واضح وصريح من ما كان يحدث في الوزارة من تحصيل اموال بدون ايصالات رسمية وهي من صنف ندر وقل وجوده في السودان فظهر لها اعداء كثر كل يريد ان ينتقم منها لما قامت من ردم الهوة بين الحلال والحرام في وزارتها اسال الله التفيق وكثر من امثالها


#679532 [معاوية ابو عشرة]
5.00/5 (1 صوت)

05-28-2013 09:45 AM
بعد ايه جيت تحكي بعد ايه ’ هكذا هو حال السودان و السودانيين داخل البلد ما عندهم وجيع ولما يخرجوا برة البلد برضو ما عندهم وجيع و لا صليح . وزارة و جهاز مغتربين علي الفاضي . نسأل الله ان يلطف بنا جميعا . واكيد السيدة الوزيرة جاية للعمرة و زيارة بعض الاهل و الاحباب و شراء بعض الاغراض العائلية . ارجو من السفارة تسهيل مهمتها شاكرا ...


#679513 [ALFAR]
3.50/5 (3 صوت)

05-28-2013 09:39 AM
خليها تمشى هى والوفود ويعملو عمرة احسن ليهم ويجو ناس الجالية والسفارة والقنصلية يعملو ليها حفلة
من اموالنا . وتحميلهم بالهداية وخلافة. وبالمرة تحضر احتفالات الجالية بتحرير ابو كرشولا .عالم وهم...


#679508 [USAMA]
5.00/5 (1 صوت)

05-28-2013 09:38 AM
ماذا تملك الوزيرة لتقدم للمغترب السوداني ، و اصلا متى قدمت الحكومة السودانية عوناً او مساعدة للمغترب اكثر من افراغ جيبه في مدفوعات لها اول و ليس لها آخر، يكفي زيارة واحدة لمكاتب ديوان شئون المغتربين في الخرطوم لنرى إن كانت الحكومة فعلا يهمها امر المغترب السوداني.


#679420 [كورينا]
5.00/5 (1 صوت)

05-28-2013 08:43 AM
الرئيس الهندي حضر للملكة بنفسه لحل مشكلة العمالة من دولته
ثلاثة مرات والآن موجود بجدة ويطالب بمد فترة توفيق الأوضاع
لثلاثة أشهر ثانية .
رحم الله بلدا بلا وجيع
رئيس يعشق الحرب والدماء
كل همه كم سيخلد في كرسي السلطة
كم سيقتل من أبناء شعبه
من جيشة ومن معارضية


ردود على كورينا
United States [mafia] 05-28-2013 11:37 AM
الهنود خامين البلد كلها معظم المحلات حقتهم والبضاعة من الهند يعنى فائدة مزدوجة نحنا ما عندنا ابو النوم, بعدين رئيسنا ما فاضى من الكوراك


#679401 [الدولي]
0.00/5 (0 صوت)

05-28-2013 08:25 AM
يا استاذة مديحة هنا خلي المهاجرين موظغي السفارة بتعاملو مع السلطات السعودية في حالة حدوث مشكلة زي التقول الواحد جاء عمرة وزوغة يعني الموظفين ذاتم بخافو


#679391 [alsudani]
3.00/5 (2 صوت)

05-28-2013 08:20 AM
تكون الوزيره مفلسه عايزه سبب لصرف بدل سفرية
اما العمال والشعب هم للجباية فقط
مافى وزير شغال بالشعب ،،، الجهة الوحيدة الشغاله
بالشعب هى جهاز الامن لتكميم افواه الشعب


ردود على alsudani
[osman] 05-28-2013 01:26 PM
صح لسانك اصبت كبد الحقيقة


#679339 [sabile]
0.00/5 (0 صوت)

05-28-2013 07:16 AM
طيب ياأخواني الناس الدايرين يرجعو السودان وما لاقين طريقة يسو شنو


ردود على sabile
United States [ALZARGHAA] 05-28-2013 11:28 AM
عدِّل وضعك بأي ثمن أسمع نصيحتي .


#679323 [معتز قورتي]
0.00/5 (0 صوت)

05-28-2013 06:12 AM
مافي فائدة من حضورها لانه القانون واضح خليها تحل مشاكل العطاله داخل البلد اولاً قبل ماتعمل عمرة!



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية




الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة