الأخبار
أخبار إقليمية
طرح سكر الجنيد للخصخصة ابتداء من 10 يونيو
طرح سكر الجنيد للخصخصة ابتداء من 10 يونيو



اتحاد مزارعي سكر الجنيد : موقفنا واضح ما بنفرط في أراضينا وحنقيف ألف احمر
06-03-2013 12:37 PM


البرلمان : سارة تاج السر : اعلن اتحاد مزارعي سكر الجنيد تمسكه بأرضيه المصنع وعدم التفريط فيها لاي مستثمر أجنبي ،وطالب بان تسير العلاقة بين المستثمر والمزارعين بحسب علاقة الانتاج القديمة بين «الحكومة والمزارعين».
في الاثناء، اعلنت الحكومة فتح باب العطاءات للمستثمرين الاجانب والسودانيين في مصنع سكر الجنيد ، ابتداء من 10 يونيو الجاري، وطرحت 70% من قيمة اصول المصنع للخصخصة بينما تدفع الحكومة 30% لتحديثه .
وحذر رئيس اتحاد مزارعي سكر الجنيد عبد الرحمن أحمد حسب الرسول ،عقب اجتماع ضم وفد المزارعين مع لجنتي الشؤون الاقتصادية والمالية والطاقة والتعدين بالبرلمان امس ، الحكومة من المساس بما تم الاتفاق عليه سابقاً ، 38% للصناعة و62% للمزارعين».
واعلن عن استعداد المزارعين للموت دفاعا عن اراضيهم وعدم التفريط فيها لاي مستثمر اجنبي ،وزاد « الارض ملكنا وما بنفرط فيها وما بندي زول فدانا واحدا يمتلكوا ويستثمر ارضنا ويضيع حقوقنا»،واضاف « موقفنا واضح ما بنفرط فيها وحنقيف ألف احمر» ، وهدد باللجوء الي اساليب اخري لم يفصح عنها في حال زادت نسبة الخصخصة عن 38%.
واعرب حسب الرسول عن مخاوفه من تجاوز الحكومة للمزارعين ، رغم التطمينات التي اكدها لهم رئيس لجنة الخصخصة والذي اشار الي ان الخصخصة ستطال النسبة التي تملكها الحكومة في المصنع والآليات والورشة والبيارة، وان المزارعين سيتم التعامل معهم وفقا للائحة والنظام المتفق عليه مسبقاً مع الحكومة .
وكشف حسب الرسول عن تضرر اكثر من 2518 مزارعا بالجنيد من قرار الخصخصة يمتلكون مساحة 44 ألف فدان، يمتلك كل مزارع منها 15 فدانا يزرع فيها 30 طن قصب خام ، ارتفعت الى 48 طن قصب ، تنتج حوالي 90 ألف طن سكر في العام.

الصحافة


تعليقات 7 | إهداء 0 | زيارات 2825

التعليقات
#687068 [فــــــــــــــلـــــــــــــــــتر]
5.00/5 (1 صوت)

06-04-2013 12:44 AM
السكر في السودان لايقل شأنا عن الماء والمراعي الكهرباء و شوية البترول العندنا وهي ملكيات عامه ليس من مصلحة السودان وحكوماته ان تتلاعب بها لمصلحه فرد ومجموعة افراد علي حساب المصلحه العامه ...يكفيينا خصخصه خسيسه...


#687003 [اهل الجنيد]
0.00/5 (0 صوت)

06-03-2013 11:12 PM
الفارس

ماك القليل ضرب القواسي بحقرك
في الحر والدواس دايماَ متلب صقرك
بلاع الكبار في عيونو باين نقرك
اوعاك من صديق ان خذ إمكن إعقرك
مايغرك زمان قبل عليك وتبارك
شين ان قلب باكر بمرق اسرارك
العمل السمح سويه واكرم جارك
اديه القروش صدقه وبتبرد نارك
الدنيا يوم والتاني تب موهولك
وإن جار الزمن ساويه قنب طولك
الزول القشيم عافيه بي مبزولك
واللايك الصبر في الحاره بصبح زولك
****
خربيش الزمن فوق النواعم ظاهر
والفقر إن غرز شيطانو ماكر وقاهر
طرف السقيد الفي خلاك ومساهر
الليله البعينك بكره بيها بجاهر
****
الليله الخلوق المإنقطع طاريها
في الدنيا ام زوال الناس تلملم فيها
الزول الشحيح لي نفسو مامديها
غاراه العبوس والاخره ديك ناسيها
****
ما فينا العرور الفي منامو مجلخ
في بيت العوين وسط البنات متفلخ
فينا الجنا ابناراَ هواها يسلخ
قران الحجاما الفي رقابنا مشلخ
****
يلاسد الرزم مابعجبك الهبيش
يامضاير الصفوف تقلع مشيك بشيش
إن دق النحاس وجات القايل ديش
بيجز الرقاب قبال تجيك معليش
****
الكي النجيض فوق الرقاب بتختو
والضيف ابحمل بتكرمو زاملو تألفو
ممحوق الرجال قولو البسيهو اخلفو
بوده وسعد بخرب مسورك إتلفو
****
انحنا سوادنا فوق المكرمات بنسابق
والقايلين طوال بلقونا فوقم طابق
حرم ناس خمج مافي القدرنا مطابق
بنفج ام لهيب في الحاره لينا سوابق
****
ماكلين القرض دابقنا في فشفاشنا
وابريشاَ نفش بندوسوا بي دراشنا
والمو زول فزع حرم نمرقو طراشنا
لابحسب عليه لابنفرشو فراشنا
****
ضرب النحاس مرقت عليه رجالو
والاسد النتر نجض عمارو الجالو
سيفو النجيض وسط الرجال كجالو
وشوف الرجال وسط النساوين جالو
****
إن شاف العدو بصرج سنونو يكز
العود البدين الفي شتاهو بنز
إن تاتا وقدل صقراَ مشتو تعز
شافنو الكبار سونلو عوم الوز
****
خلف الوعد بين المكارم خيبه
وسمحت عدوك ماتمشي تنكت عيبه
لفظك حسنو وراعي الكبر والشيبه
والسر احفظو ماتبقي سونا وريبه
****
الدابي ابدرق ماك القليل منلت
مضروب الدرت جماع فريكاَ خت
قارح يالاسد سيد القبايك جت
البحر ابزبد بلاع بحوراَ ست
****
لويعت الدود ابلطاماَ تخ
اقدل يارجل فوق الكبار ونجخ
يا اسد العرين المنعرفلك فخ
يالموت البخلي الناس تسوي شخ
****
الكل البجيك بتمدلو الكنتوش
في مشيك قلع ماك العوير بتكش
الضيف ان نزل بي طبعتك بتهوش
عند ساعة الكرم زي التقول مهبوش
****
الدود ابقباش ماجالس البنتو
مااتحكر معاهن وهبش المختوت
عسام الفقر للمكر والمسخوت
الفارس ابضرس عزاَ بلاه يفوت
****
العود ابضراع اياك عشا البايتات
المرق التقيل البسند الواقعات
إن حر الزمن ضلك ولا بنفات
ياحوم الخلا الركزاَ عليك ثابتات
****
ماك الدغور خايب المروه مسجم
قود المقلع في سراتو محجم
ماهو التعيس ضلاَ كبير ومتجم
قلام الرقاب المن سقرتو ملجم
****
بتعز الكريم فوق الرجال وهميم
زندك في اللقا ودخريك وقت الضيم
شمار منكرب في عيل عروضو لئيم
بتكجن كبير الشيب وماهو كريم
****
قلنا ابدقن إلا ابدقن موهولنا
مابنقبل نضم وكتين نقيف علي طولنا
النيه ننجضا وحرم نميز زولنا
والدارنا اللجي وخلي اللكضب قولنا
****
في السفر البعيد والمحنه زولنا رفيق
بي مالو وجنا وبي نغسو بلغا الضيق
في الحاره ام جمر تلقاه ليك شقيق
والقرش العفن حرم نحرقو حريق
****
راشي الضعيف زولاَ كبيراَ جلو
نقطع من لحمنا وما بنحقرو نقلو
والكايس المهانه حرم نهينو نزلو
والماسك الدرب رب العباد يعدلو
****
إن جيت الغرب تلقانا نحن رجال
وان درت الشرق نحن الهناك كمال
في وسط البلد وان كان جنوب وشمال
نحن الاسود رجال دواس وكتال
****
الحوم ان تبع بنشبعوا الباكريه
بندور العدو الدايرنا بالزنديه
البويل حرم بكفي الميه
وإن ولا الدبر حبوبتو مابت ريه
****
شور الكبير الفي حياتو مدرب
وقول الكبار عندو الصحيح ومجرب
مايقرك فلاحتك وإبقي بهمك سرب
والدنيا ام عبوس بنيانا بكره مخرب
****
ضرب المثل قالو الشقيق حساي
وناكر الفضل ناكر جميل نساي
الدارك زمان ياقلبي سارق الساي
انساه البفوت خليه قنب ساي
****
كتر الكلام في الشنه تب مابحلك
ولازم السكات طقو البجيك بشلك
حقرك للضعيف وتشوفو دايماَ قلك
إن ضاق الصبر وبقيت خزانه يقلك
****
كعب البقودك من قفاك للنيه
وماشكروه السوي للناس سيه
القاصدك عديل وبدور معاك الديه
إلقاك ابكريق من مدو حارس الليه
****
سمع اللزوم وكتين عدوه يريدو
وسمح البلحق في المكارم ايدو
سمح المقرم في المحاصه حديدو
وسمح البوسع في المجاعه مسيدو
****
كعب التداخلو ويبقي ماد قدومو
وكعب الدليب وكتين يصيح بومو
عريان العروض مابسترنو هدومو
وحدبو الضمير في الشينه كبر كومو
****
سمح الجنا البمرق وجيب رايحتو
وسمح الضمير وكتين تفارقو سنحتو
سمح الكريم وكتين إجيك بي سمحتو
وسمح الجنا البرمي الفوارس تحتو
****
سمح الجنا البتلبب القاسيات
فوقو الدرع والسيف جزم خايلات
تعوس البشاتن كان دنن قالات
ببقالن حكيم وبردهن راجعات
****
كعب الصبي الماسح الفريق حوام
وكعب الكبير إن بالبيوت نوام
كعب البشيل حال الخلوق لوام
وكعب البحر وكتين إشيل عوام
****
سمح البناصحك وإت براك وحيد
وسمح البراحمك وإنتي منو بعيد
سمح البذكر بي رقيب وعتيد
وسمح البباشرك زي قبايل العيد
****
كعب الزمن وكتين إتلب صقرو
وكعب البسولب للضعيف وبحقرو
كعب البشرك لي رفيقو وإعقرو
وكعب القرش وكتين إبين فقرو
****
ماكسره وملاح مالك بتبخل بيها؟
اديها العديم ربك ببارك فيها
ماتنسي القبير النعمه بتقافيها
وبنوبك قطن إملا القدود وإحشيها[/


#686809 [الطيب النور]
5.00/5 (1 صوت)

06-03-2013 05:39 PM
اول سؤال يتبادر الي الذهن هو هل مصنع الجنيد مؤسسة ( خسرانه )؟ لماذا الخصصة في مشروع اعاشي يخدم المواطن ( المزارع ) والمواطن ( العامل ) في هذه المنطقة ؟ ماذا خسرت الدولة من شراكتها مع مواطن منطقة الجنيد؟ لمذا تريد الحكومة تشريد اهالي الجنيد الذين هم خليط من جميع ابناء وقبائل السودان حتي الاخوة من الجنوب قد كانوا يسفيدون من ريع هذا المشروع ؟ لماذا لايذهب اهل الخصصة الي انشاء مشاريع جديدة للسكر في انحاء السودان المختلفة . فليقف اتحاد المزارعين وقفة جادة ولو لمرة واحدة لمصلحة المواطن والعامل بالجنيد . اتقوا الله في اهل هذا المنطقة ، ان هذا الامر له ما بعده فنرجو الا تسعي لجنة الخصصة في تشريد اهلنا هذا المنطقة.


#686619 [قاسم الجنيد]
5.00/5 (1 صوت)

06-03-2013 02:19 PM
مشروع الجنيد من اول المشاريع الحكومية الاهلية فى شرق الجزيرة و النيل الازرق ،، الاراضي ملك حر للمزارعين،، ادارة هذا المشروع مشتركة او شراكة بين الاهالي المزارعين ممثلين فى اتحاد المزارعين و يتم التصويت له دوريا و قد رأسه فى حقبة من الحقب الأخ / عبد الرحمن احمد القرشي الجنيد و عضوية الكثير من اهالي الجنيد مثل المرحوم الخضر احمد بلة و حسن احمد البدوي العباس الجنيد و الحكومات السابقة ،، مشروع الجنيد يمثل عصب الحياة لجميع الاهالي القاطنين على ضفتي النيل الازرق ،، منطقة الجنيد من اكثرالمناطق استقرار فى شرق الجزيرة و النيل الازرق ،، و قد قدمت الكثير و ساعدت على استقرار هذه المنطقة و نماء و تطوير انسان هذه المنطقة العزيزة على نفوسنا ،، و نتمني من الله ان يديم هذا الاستقرار على هذه المنطقة ،،


#686595 [جركان فاضى]
5.00/5 (2 صوت)

06-03-2013 01:49 PM
المشروع الوحيد الناجح حاليا فى السودان هو مشروع الجنيد وهو فى افضل حالته فان كان الغرض من الخصخصة زيادة حجم الطاقة الانتاجية وخفض تكاليف الانتاج فان ادارة المشروع قد وصلت لمستويات قياسية فى هذا المجال. لذلك فان موضوع الخصخصة هو حصول الدولة لاموال عشان تتسافه بيها كالعادة


#686531 [ابو ايمن الحلاوى]
0.00/5 (0 صوت)

06-03-2013 12:57 PM
هاناس: العود كان مافيهو شق مابقول طق .. جاينكم جاينكم؛ وديل ناس ابليس زاتو؛ بكره يلهطو منكم كم واحد من البلعلعو ديل ويدخلوهم عالم الطرطيبه يمين الله كان تشوفم ساقو اولادم وسكنو الخرتوم. قال الف احمر . والله كان وقفت مليار ديل ملاعين واخوان ابليس. وانت حتشوف....


#686528 [حجازى]
5.00/5 (1 صوت)

06-03-2013 12:56 PM
مصنع الجنيد من المناطق الاكثر استقرارا فى ولاية الجزيرة بعد قيام الانقاذ بتدمير مشروع الجزيرة ....كتير جدا من الاسر تعيش على هذه الحواشات وكتير من العمالة شرق البحر وغرب البحر تعمل فى المصنع كعمالة ثابتة وموسمية...عملية الخصخصة تفقد الكتير حقوقهم فلا اعرف لماذا تنوى الانقاذ تشريد ماتبقى من الناس هناك بالرغم من ان معظهم يؤيدون المؤتمر الوطنى فى الانتخابات....


ردود على حجازى
European Union [مع العدالة] 06-03-2013 06:17 PM
كثير تلج ما بنفعك ياحجازى مش لو تايدوا المؤتمر وللا الجبهة الثورية ديل ماهماهم غير عائداتهم ...بطل جرسة وخليك راجل وناضل بشرف لاخذ حقك الحكومة بتعرف البندقية بس ما عندكم بيبيعوكم فى سوق امدفسو



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية




الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة