الأخبار
منوعات سودانية
أنساب السادة العباسيين في العالم
أنساب السادة العباسيين في العالم



06-19-2013 07:15 AM

شهدت قاعة الشهيد الزبير محمد صالح الأحد الماضي الندوة التي نظمتها الأمانة العامة لأنساب السادة الأشراف الهاشميين العباسيين ، وقد شهدت الندوة مناقشات حول التاريخ العربي الإسلامي ، والدور الذي لعبه العباس بن عبدالمطلب وذريته سواء في مجال العلم أو السياسة .
و قد تحدث في مستهل الندوة الشريف الشيخ الدكتور حسني أحمد علي العباسي، الذي تطرق االى مفهوم الشرف و كيف أن أبناء العباس هم من بني هاشم ، و دحض الكثير من الافتراءات و الدس الشعوبي فيما يتعلق بهذه الأسرة العباسية التي لعبت أخطر الأدوار في التاريخ العربي و الاسلامي و العباسي . كما تناول سلسلة الأنساب المتداولة في السودان ، و أشار الى وجود مجموعات عباسية في تشاد و الصومال و مصر . كما أشار الى أنساب المجموعة العباسية المعروفة في السودان بالمجموعة الجعلية و هي التي تضم الجعليين و الشايقية و مجموعات و أسر أخرى في أنحاء متفرقة بالسودان .
كما تحدث في الندوة الشريف الدكتور فيصل بن فهد العاصمي الأمين العام لأنساب الأشراف الهاشميين العباسيين عن دور الأمانة في تتبع احوال المجموعات العباسية في شتى الاقطار، و التأكد من صحة انتسابها، و اشار الى أن بعض هذه المجموعات قد أخفت انتسابها في بعض الاحوال نتيجة لأوضاع معينة، كما تهدف الأمانة الى توثيق هذا التاريخ المجيد، و ايضاً اوضح أن من مهام الأمانة تقصي أحوال هذه المجموعة العباسية و تحقيق شكل من أشكال التضامن معها في المجالات الاقتصادية و الاجتماعية و ستكون في الخرطوم أمانة لهذه المجموعة تتولى تنظيم هذا الكيان.
و كان الوفد العباسي المكون من الشيخ حسني أحمد علي و الدكتور فيصل بن فهد العاصمي و الأستاذ خالد محسن مكادي و الشريفة الاديبة مها محسن مكادي قد قام بزيارات لمنطقة العرشكول بالنيل الأبيض حيث مقابر الملوك الأوائل بالمجموعة الجعلية ، كما زار محافظة مروي و مقابر شايق و أحفاده ، وستكون في المستقبل زيارات لبارا بكردفان التي شهدت قدوم الاسلاف و كان الاستاذ عامر عبد الحميد ببناء و تشييد هذه المقابر و الأضرحة على نفقته الخاصة في مختلف مناطق السودان .
وتحدث في الندوة الأستاذ خالد محسن مكادي والذي أفاض في الحديث عن مناقب الصحابي الجليل العباس بن عبد المطلب و سيرته العطرة و سلط الأضواء على التاريخ العباسي .
و كان قد أدار هذه الندوة الناقد مجذوب عيدروس الذي أشار الى الدور الشعوبي في تزوير التاريخ العباسي ، و الى أن هناك جوانب خفية من التاريخ السوداني لم تجد الاهتمام اللائق بها ومنها مساندتهم - أي المجموعة الجعلية - في دعم الحلف الذي قام بين الفونج و عرب القواسمة و أدى الى قيام مملكة سنار الاسلامية و الدور الأساسي الذي لعبته هذه المجموعة في قيام مملكة تقلي الاسلامية في جنوب كردفان و الى مساهمة هذه المجموعة الى جانب مكونات الشعب السوداني الاخرى :- العربية و الافريقية في مجالات التفسير و الفقه و العلوم العربية و المدائح النبوبية و قد قدم الأساتذة الذين شاركوا في النقاش اضاءات مهمة حول الدور الذي لعبته المجموعة العباسية في السودان عبر مراحل تطوره التاريخي.

الصحافة


تعليقات 26 | إهداء 0 | زيارات 7788

التعليقات
#701647 [adil a omer]
5.00/5 (1 صوت)

06-20-2013 05:39 AM
انتو يا اخوانا العرب العباسيين ديل ياهم زاتهم عرب العباسيه امدرمان

نحنا عارفين انو فى العرب العاربه والعرب المستعربه حسى طلع نوع ثالث فى السودان العرب المستنكحه


#701557 [ود الفاضل]
5.00/5 (2 صوت)

06-20-2013 12:04 AM
كل المعلقين الذين خاضوا فى الحديث حول هذا الخبر اما مصابين بمركب النقص او انهم جلاء جهل مركب 0 اولا موضوع القبائل والقبيلة لم يبتكره اهل السودان بل جاء به القرءان الكريم اذا كنتم مؤمنين بالقرءان الكريم - قال تعالى: يأأيها الناس إنا خلقناكم من ذكر وانثى وجعلناكم شعوبا وقبائل لتعارفوا إن أكرمكم عندالله أتقاهم إن الله عليم خبير 0 وورد عن الرسول عليه الصلاة والسلام انه قال: تعلموا من أنسابكم ماتصلوا به أرحامكم 0 وقالت العرب الناس مأمونون على أنسابهم 0 وكون السودان اجتمعت به قبائل افريقيا والعرب ليس فى ذلك عيب أو تعالي البعض على الاخر 0 والمجموعة الجعلية التي تعيش فى السودان شهد لها جميع علماء الانساب والسلالات انها فعلا تنحدر من بني العباس وإن شئتم فابحثوا عن كتب الانساب العربية فى مكتبات السعودية الكبيرة فسوف تجدوا دليلا قاطعا على انها هي الحقيقة وتلك الكتب لم يؤلفها السودانيون 00 والمجموعة الجعلية فى السودان للمعلومية انحدرت من أحمد كردم الفوار ابن ابراهيم جعل الذي ولد فى منطقة ابيار سرار باقليم شمال كردفان حيث كان وصول اوائلهم عن طريق الاربعين من مصر الى السودان بعد خراب بغداد ايام التتار وذلك فى القرن السادس الهجري --( اقرؤا التاريخ وتسلحوا بالعلم وبعد ذلك اكتبوا للناس بلاش فضائح وكلام فارغ ) مع العلم ان المجموعة الجعلية المذكورة فى السودان تضم القبائل التالية: الجميعاب والجموعية والجوامعة والجمع والشايقية والجعليين والبطاحين والبديرية ومن كل هذه القبائل تفرعت فروع عددا - ولا يعنى ذلك ان هذه القبائل نقية من الدماء الافريقية فقد اختلطت انسابها ودماؤها مع كل القبائل الافريقية من قبائل الفور والفلاته والنوبة والنوبيين فى شمال السودان والبجا والبني عامر كما اختلصت انسابها مع قبائل جهينة من الكبابيش والشنابلة والهواوير والكواهلة ودار حامد وقبائل الرزيقات والتعايشة والبني هلبه والزيادية ومن هذا الخليط تكون شعب السودان نسيج وحده بين شعوب الارض فى الطيبة والصدق وحسن العشرة 0
فالاخوة المعلقين اشعلوها حربا على مجرد ان هناك نفر اجتمعوا لتأصيل انساب قبائل تدعي ان اجدادها من جزيرة العرب وليس فى ذلك عيب او مخالفة لدين الله وليس معنى ذلك ان هذه المجموعة تدعي شرفا أو انها أفضل اهل السودان 0
وقيل ان الرئيس السنغالي السابق ليبود سنغور وهو أديب وكاتب معروف وعضو فى الاكاديمية الفرنسية قال ( كلما علمت بموت شيخ افريقي تأكد لي أن هناك مكتبة احترقت ) وكان يعبر بذلك عن ان هؤلاء الرجال كبار السن يختزنون علما اجتماعيا عظيما حول انساب الناس وصلاتهم وعاداتهم وتقاليدهم واعرافهم 00


#701516 [SHIBLI KONEN]
5.00/5 (1 صوت)

06-19-2013 10:39 PM
يا أمة ضحكت من اجلها الامم


#701475 [دايرين من السودان شنو يا عباسيين]
5.00/5 (1 صوت)

06-19-2013 09:26 PM
ما بصدق أصلو أصلو ... معقول دة يحصل ؟؟؟؟ لا حول ولا قوة إلا بالله ...

مافي زول ما يعتز بي نسبو لكن كدة علني علني في الاعلام مع الدكاترة والشهادات والنقاد والمفكرين .. شيء لا يصدق ابدا ابدا

يا ربي العباسيين البيض ديل دايرين شنو من السودان الاسود .. او ع يكونوا صدقوا كضة السودانيين السود انهم فعلا من سلالة العباس .. والله يا تقنعونا بالحمض النووي او تتفكفكوا مننا ؟؟!!!!!!!!!!!!!!!!!!!!!!!!!!!!!!!!!

الحاجة التانية : اقروا سيرة العباس وشوفوه اسلم متين وكيف ؟؟؟؟ ما في ميزة لدرجة الشرف المنافي لتوجيهات الاسلام ابدا ابدا .. وانت كمسلم تبا لاي شيئ يجعلك تقلل من قوة اسلامك من اجله ...

ثالثا:الافتخار بالعباس عدم اعتبار للاحاديث والايات الناهية عن الفخر .. يا مسلميييييين
موقفكم شنو من الدين اليمنع التباهي بالانساب ؟؟
رابعا: المخرج شنو من دراسة جامعة الخرطوم القاموا بيها دكاترة وبروفات اثبتوا انكم شايلين من دم الهوسا والفلاتة .؟؟؟ دايرين نكذب الدكاترة العلماء ونصدق كائنا من كان ؟؟؟؟ والله ما بنخلي كلام الدكتور نصدق العباس ذاتو خلي القالو هم احفادو!!!!!!!

خامسا :اس البلاء في تاريخ الحكم الاسلامي تحويلو الى قبلية وبيوتات والذي منو من بني امية لحد اليوم .. تثبيت حكم امة مسلمة وقصره على مدعي البيت النبوي او العباسي هي العملت كل الفتن بني امسة شنو من قبلهم الحكاية دي حاصلة بس اخق شوية ...

سادسا: يعني اثبات لي انكم ما سودانيين ولا شنو ؟؟ ما يا تبقى حفيد العباس يا تبقى سيد بلد اسمو السودان الاتنين ما بيتلموا ؟؟؟
سابعا : العملو الحكاية دي المفروض ما يتضايقو لو عملوها اي ناس من اي قبيلة .. واي زول عند اليتصلبط فيه ويبقى من اهلو ويا خد منو دعم .. دي فكرة ما ممكن اوافق عليها لكن بالمنطق الوافقوا عليها لفئة ما ممكن يرفضوها لي فئة تانية ..!!!!!!!!!!
ثامن: انتسبوا ببعياس لي ابولهب للرسولاللي حكمة الله ما عاش ليهو غير بنات مما يدل على حكمة الله في انو ما يحصل دة لو الاولاد عاشو وخلفو الاولاد .. مع ذلك ياهو الحاصل ..
تاسعا: لابد من كلمة لمختصين عن تحارة النسب الراجت في الجزيرة العربية وفي شمال السودان ..(حقيقة تحتاج للتأكد)
محمد جلال والوليد مادبو من خلالهم افهم انو الجعلية لهم صلة بالحبش وبعض منهم بالهوسا والفلاتة .. ولا احد يجهل محمد جلال احمد هاشم والوليد ما دبو .. رغمان الاخير قد يقول كلاما بسبب الغضب على ما اظن وان بعض الظن اثم ..



عاشرا بدل الجوطة الفارغة دي والفتن الما ليها لزوم دي ... ما تعالو نقول سودانيين وكفى نبني سودان قوي بعد داك نلتفت لي عباس و جميع الاجداد المحترمين .. يا دوب اليلة ناس اوباما عرفو جذورهم الايرلندية (النسوان ) الام وبناتها .. يعني وهم في اشد الغني عنها بس نوع من الذكريات وكدة ....
----------
الرابط فسبوك عن ثقافة الجلد لاظهار للتحمل.. ما من الجزيرة العربية من إثـــيـــوبيــا

https://www.facebook.com/photo.php?fbid=372133642894616&set=a.370564419718205.84241.370559739718673&type=1&theater


#701447 [شوك كتاد]
5.00/5 (2 صوت)

06-19-2013 08:24 PM
لا لا لا دى فاتت حد الجهل والسخف والموضوع والله مساكين الحسانية شالوا لهم مثل اصلا ماحقهم

الناس فى شنو والجعليين فى شنو

اكاد لا اصدق


#701416 [Alhoot]
0.00/5 (0 صوت)

06-19-2013 07:31 PM
لا أدري ماذا أصاب الناس هذه عقدنفسية تدل علي مركب النقص الذى يعانى منه البعض وفقدانهم الثقة بأنفسهم مما حدا بهم الى السعى لإتمام النقص الذى يعانون منه بالجرى وراء الإنتساب الى العباسيين وخلافهم يا علم الإنسان يقيم بمنجازته هو لا بنسبه

ليس الفتى من يقول كان أبى لكن الفتى من يقول هاأنذا

فأتركونا من هذا الجهل الذى أنتم فيه وأنهلوا من العلم وتسابقوا فى نيله. فالعلم يرفع بيتاً لا عمادله. والجهل يهدم بيت العز والشرف


#701399 [true sudanese]
0.00/5 (0 صوت)

06-19-2013 07:02 PM
Yet another form of ignorance = YAFI


#701386 [الملكي]
5.00/5 (2 صوت)

06-19-2013 06:42 PM
خلونا من الفارغة لو جينا للجد نحنا العباس الكبير نفسه عندنا فيهو رأي أولا تأخر إسلامه الي ما بعد الهجرة و كان مع الكفار في بدر حتي اسر و ما تقول لي كان يكتم إسلامه ففي الفترة ديك كان اعلان الإسلام من دعم الدعوة و علي الأقل ينصر ود اخوه أما الدولة العباسية فأكثر خلفاءها من أبناء الجواري من أبو جعفر المنصور و احسب ونرجع نقول تلك أمة لها ما كسبت و لكم ما كسبتم فما تكرهونا


#701380 [الشاعر]
4.50/5 (3 صوت)

06-19-2013 06:31 PM
شوفو ياناس هوى اسمعوا هنا انا ترى شايفكم الايام ديه زودتوا الحكايه شويه-انا جعلى وهذا نوباوى وهذا شايقى وفلاتى وادروب وشكرىى و.......الخ وانتوا جعانين عريانين شحادين مرضانين كسلانين نايمين مركلسين ما عندكم غير الفارغه يا ريت لو امسك الحكم ده الا اخليكم تشتغلوا 18 ساعه فى اليوم واحرم عليكم الكلام فى الانساب والقبائل باحكام رادعه مع الجلد لكل فارغ مضيع الوقت فى القبائل والانساب والله ديه كمان حاجه جديده لا كمان ده بقى مرض عديل كده الموضوع عايز حسم عشان تبطلوا الفتن والكلام الفارغ البتعملوا فيهو ده كل واحد قاعد فى هولندا والثانى وين ماعارف تخلقوا فى الفتن وهسع لو ولعت يمين كلكم الا تفكوا البيرق يا كضابين...الجهل استحكم فيكم وانى لارى رؤسا قد اينعت وحان قطافها...الباقى تموا براكم (اما ديه والله سفاهه وعدم شغله).


ردود على الشاعر
United States [الصادق أبو روان] 06-19-2013 08:49 PM
أويدك الرأي فهذه حاجة جديدة ولكن من أثارها الإنقاذ والحكومة الفاسدة بقيادة الضار نافع بن ضار حرك هذه النعرات القبلية ومن هو عربي ومن هو عجمي وزيادة مركب النقص لدى البعض ؟
ويعني أيه لو كنت عباسي ولا أندلسي وبيتك فيه أسود وأحمر وأصفر يعني خلطة شكلاتة جبتو اللون الأسود ده من وين يعني ليه تذكروا العرق بتاعكم الأبيض وتنكروا العرق الزنجي امال سمعتم الشاعر يقول (( نحن عرب ممزوجة بي دم الزنوج الحار )) ولا الشينة منكورة يا عالم اتقوا الله الحمد لله أننا مسلمين وهذا يكفي والحمد لله أننا سودانيين وهذا يكفي ؟
فدعكم من هذه الأرجاس والتفاخر بالألقاب والأنساب كل واحد بيعتز بي نسبه مهما كان زنجي أو عربي فخلوها على جنب وخلونا نشوف مشكلتنا مع الإنقاذ الرجعتنا للعبودية والرق من جديد عبر أنظمتها الجبارة فهذا هو مربط الفرس ......


#701279 [محمد علي عباس]
0.00/5 (0 صوت)

06-19-2013 04:36 PM
هذه زيارات تقليعة وبدعة يراد منها إثارت النعرات القبلية وإستفزاز القبائل ألخرى للرد عليهم وإقامت فعاليات مشابهة وأكثر تحريكا للتباري بالأنساب فوتوا عليهم الفرصة وتجاهلوهم إعلاميا ولا تروجوا لهم ولرحلتهم الدعائية هذه والفتنة نائمة لعن الله موقظها!!!


#701198 [Sabir]
0.00/5 (0 صوت)

06-19-2013 02:51 PM
وماذا سيستفيد السودانيون كأمة من تمحيص الأنساب سوي إنتشار الجهوية والقبلية؟ الآحري أن تكون هذه الندوة لتوحيد آهل السودان تحت إسم السودان, وليس التشويش. هل ستشفع لنا إنتماءتنا العرقية؟ عند رب العالمين؟ ليت مثقيفنا أن يتداركو مدى الهوة التى ستنشأ حيال هذه المغالطات


#701170 [ابوسآبق]
4.00/5 (4 صوت)

06-19-2013 02:14 PM
الجمآعة ديل زعلآنين ليه , لو جآء نفر من قبآئل ( الهوسا ) مثلاً من دولة نيجيريا ليتعرفوا بأهلهم الذين أستوطنوا فى السودآن منذ القدم وكونوا رآبطة أونقآبة .... هل كآن ذلك ليؤذى مشآعر احد , بالتأكيد لآ !!! ...
معلوم كل العلم ان القبآئل الشمالية العربية ليس لديها ( رطآنة ) وهم الجعليون والشوايقة, الرباطاب , الميرفآب , المنآصير وغيرهم , خلاف القبآئل الشمالية الأخرى التى لها رطآنة أو لهجة محلية . ومعلوم أن اللهجآت لا تندثر الا بأندثار أهلها . هنا يقفز السؤآل لماذا لا توجد ( رطآنة ) لقبآئل الجعليين وغيرها من القبآئل العربية الأخرى . الأجآبة بكل بسآطة لأن هذه لغتهم ( الأم ) لم يتعلموها بل ولدت معهم على الفطرة . أما انتسآبهم الى العباس أو عقيل أو آل البيت فهذآ ما وجدوه فى كتب التآريخ القديمة وما تحدث به اسلآفهم قبل مئآت السنين .


#701166 [سوداني]
5.00/5 (1 صوت)

06-19-2013 02:08 PM
الناس مؤتمنون علي انسابهم


#701164 [رطانى من الشرق]
5.00/5 (3 صوت)

06-19-2013 02:05 PM
هههههههههههههههههههههههههههههة ههههههههههههههههههههههههههههههههههههههههههههههة
بالله عليكم شوفوا الناس المواهيم المرضانيين ديل شغاليين بالفارغة دى كيف عشان تعرفوا عقدة النقص التى تعانى منها بعض القبائل السودانية وهم يحاولون بشتى السبل الانتساب للقبائل العربية الاصيلة لكن ماقادرين يواجهوا الحقيقة لذلك تجدهم هنا شغاليين بالفارغة والمقدودة ومافى زول فى السودان شغال بالاوهام دى الا هؤلاء الرعاع الذين يدعون الانتساب للعباسيين طيب نحن دخلنا شنو تنتسبوا للعباس ولأى كائن أخر دى ماقضيتنا ولا بتهمنا ولا تعنى لنل شيئا هو موضوع صفر على الشمال بالنسبة لنا نحن يهمنا الغذاء والدواء والتعليم انتوا الشغاليين بالموضوع دا ماتقعدوا كل يوم شاغلين الشعب السودانى بالتفاهات والسخافات والاوهام بتاعتكم دى والله نحن عشنا مع عرب اصلييين من اليمن والسعودية وقطر والامارات والكويت وهم قبائل عربية اصيلة من عدنان ومضر وبكر والكثير من القبائل العربية الاصيلة عشنا معهم ودرسنا معهم وعملنا معهم والله ماسمعنا يوم واحد شخص منهم بيتحدث عن قبيلته ولا اصله ولافصله لأنهم عارفين العارف عزه ومستريح وعارفين ان هذا الزمن قد ولى وهذا الزمن السيادة والزعامة للاقوى ونحن فى القرن الواحد وعشرون تلقى بعض مجهولى الهوية وبعض رعاع العرب مشغوليين بالفارغة يأخى روحوا بلا لمة معاكم نحن شو خصانا بكم وبجدكم هو عليك الله العباس نفسه لو كان موجود الان كان بيعترف بكم وصدق البشير عندما قال لبكرى حسن صالح هسي يقوم واحد سعودى يقول شوف كمان العبد دا متصلبت بالعباس لذلك دى ما قضيتنا شوية عبيد مغفليين جاريين خلف الاوهام لكن نقول لهم العزة والقوة والحكم لله سبحانه وتعالى وحده أما فى عالم سياستنا اليوم فالقوة لاسرائيل ولأمريكا ,اوباماهو الحاكم الفعلى للعالم ولو رجال امشوا قولوا لأسرائيل وأمريكا نحن احفاد العباس وشوفوا الرد شنو يا رعاع يا وهم


ردود على رطانى من الشرق
United States [الاقرع النزهى] 06-19-2013 05:08 PM
يا الرطانى ............هو ذااااااااااااااااااااااااتو شرف العباسيين يقال انه جاء بعد نحنحة !!!!!كيف ذلك ؟ فى حديث يروى عن الرسول [ص] /و العهدة على الراوى / انه قال : الشرف لى و لولدى الحسن و الحسين ....فتنحنح العباس عندها قال الرسول [ص] : ولعمى العباس ......]

United States [وليـد] 06-19-2013 04:10 PM
(البشير قال لبكرى حسن صالح هسي يقوم واحد سعودى يقول شوف كمان العبد دا متصلبت بالعباس) هذا الكلام ذكرني بقصة الجعلي الذي سافر الى السعودية بتأشيرة عمرة وكان قصـده البحث عن عمل فوجد عملا عند احد الشيوخ وأراد الشيخ أن يضـمه الى كفالته حين رآه يعمل بجد واخلاص فناداه وسأله عن اسـمه وكان اسـم صاحبنا الجعلي (عبيد) فقال للشيخ اسمي عبيد فضحك الشيخ وقال له:(أدري انك عبيد بس ويش اسـمك)؟!!


#701092 [algandawi]
4.50/5 (2 صوت)

06-19-2013 12:53 PM
خلو الكلام دا كله وأرجعوا للبحوث التي أجريت بجامعة الخرطوم عن حقيقة ((النقاء العرقي بالسودان)) سوف تجدون الإفادة وبلاش تهريج.......


#701072 [الكاشف]
0.00/5 (0 صوت)

06-19-2013 12:35 PM
من حق مجموعة القبائل الجعلية وهي تمثل اكثر من ثلثي السودان ان تثبت انسابها وتفتخر بها مادام هذا لا ينتقص من مكانة مجموعة قبلية اخرى
اما الذين ينسبون الجعلين والشايقية الى الهوسا والدينكا فهم اما مكابر او جاهل وفي كلا الحالتين لا يسحق الرد عليه


ردود على الكاشف
[شطة خدرا خدار شديييييييييد] 06-20-2013 02:22 AM
أها بالله يا أخونا الكاشف إنت أجريت التعداد ده متين كمان لمن عرفت إن هؤلا المتملقون يمثلون أكثر من ثلثي تعداد السودان عرفنا التزوير في الأنساب كمان جاي تزور لينا في بلدنا دي


#701035 [العربي]
0.00/5 (0 صوت)

06-19-2013 11:48 AM
السادة خالد مكادي و مها مكادي ، لو عندكم فرع تائه تبحثون عنه في السودان ، فقد سمعت بمجموعة من العرب في السودان تسمى (اولاد مكادي) او المكاداب حسب التسمية السودانيةعندما تنسب مجموعة ما الى جدهم ، يمكنكم البحث عنهم و التقصي إن كانوا يمتون لكم بصلة


#701030 [ahmed]
4.00/5 (1 صوت)

06-19-2013 11:43 AM
بالله عليك الله شوف الفراغ الانحنا فيهو اساتذه ودكاتره ونقاد وهلمجرا متلمين ليهم في موضوع فارغ ما استفاد منو السودان ولا استفدنا نحن منه ولا حا نستفيد منه شي وخسارة قاعه وقروش ووقت كان ممكن نستفيد منو في اشياء كتيره نفيد بيها نفسنا والاخرين ...ياخي ناس متخلفه ووهم ودي العطله زاتها ...


#701007 [حامد]
4.50/5 (2 صوت)

06-19-2013 11:32 AM
والله الكلام ده كلو فارغ الاسلام يا اخوان لما جاء كان من اهدافه الاساسية النهى عن التفاخر بالانساب لانها من عادات الجاهلية فلا فرق بين عربى على عجمى ةولا ابيض ولا اسود الا بالتقوووووووووووووووووووى فاتقوا الله .


#700992 [اب داقوشه]
0.00/5 (0 صوت)

06-19-2013 11:14 AM
حليلنا نحنا الما بنعرف و ما بهمنا غير الاربع اسامي الفي الجنسيه . بعدين خايفين نبحت ورا يطلع نسبنا مشعلق في ابو لهب يقوم الجماعه ديل يقرضو ابو اهلنا زاتو . دحين يا غبش ويا مجهولي النسب خلونا من الفاتو وماتو . وخلونا نركز في الحيين و الفقرانيين و العيانيين احسن ليهم واحسن لينا . خخخخخخخخخخخخخ


#700925 [ابوساره]
4.00/5 (3 صوت)

06-19-2013 10:27 AM
انا بالجد مستغرب في الجماعه المحتجين علي حكايه الانساب دى؟ ديل يارب محروقين مالن؟
ياجماعة الخير مافي زول في الدنيا دي اختار نسبو عشان كدا مافي داعي للفشخره وكمان مافي داعي للحسادة...الشي كلو من ربنا...بعدين مامعقول الموقع كلو سب وشتائم واحتجاج علي حاجات مامن كسب اي واحد فينا...يلافضوها سيرة..


#700917 [2]
5.00/5 (3 صوت)

06-19-2013 10:22 AM
اختبارات الحمض النووي


ردود على 2
European Union [ahmed] 06-19-2013 06:42 PM
ههههههههههههههههههههه اتنين ما عندهم تالت اما ختم من العباس شخصيا او الحمض النووي

European Union [ahmed] 06-19-2013 06:36 PM
ههههههههههه قلتا لي يا ختم من العباس شخصيا او الحمض النووي مافي تالت


#700884 [المندهش من جهلنا]
1.00/5 (1 صوت)

06-19-2013 09:49 AM
نحن الذين درســنا تاريخ السودان في زمــن المرحوم نميري تعلمنا ان المجموعة الجعلية فيها كل من الجعليين والشايقية والجمع والجوامعــة والجموعية والبديرية. ارجــو الأفــادة متى حصـل التعديل في العناصر المكونة لهذه المجموعــة.وكذلك ارجـو الافادة هل هذا التاصيل يقع ضمن "المشروع الحضاري " للانقاذ.


#700835 [كتكوت]
5.00/5 (1 صوت)

06-19-2013 09:10 AM
ياجماعة ديل جدودهم من الجعلييييين الشردوا مع المك نمر واستقروا فى السعودية


#700807 [كوكاب]
5.00/5 (3 صوت)

06-19-2013 08:38 AM
لماذا لا تضمو الوسا والفلاتة الي هذا الحلف ؟ الشايقية بطن من بطون الهوسا ولهم نفس الشلوخ شئتم ام ابيتم . واذا سالت اي هوساوي بيقول ليك الشوايقة ديل هوسا.ما علاقتكم بشريف نيجريا وانشاء الله تكونو راضين عنه .الذين اتو من السعوية ما هم الا نصابين مدفوعي الاجر ليقومو بهذا الدور واكيد طبعا ادوهم ملايين الافدنة .واذا كانت لكم علاقة بالعباس اعملو تحليل للحمض النووي في دولة محايدة واثبتو ذلك والي ان تثبتو ذلك ما انتم الا افارقة ناكري اصلهم .


#700797 [Zamzami]
5.00/5 (5 صوت)

06-19-2013 08:16 AM
انت جعلي اذا انت عباسي
عالم وهم مطلوب من الأستاذ مكادي إثبات عباسيته اولا وكفى مضحكة
نخاف من هؤلاء ان يطالبوا بالعباسية تقلي وعباسية امدرمان


ردود على Zamzami
United States [سعيد الياس] 06-19-2013 11:05 AM
يا الزمزمي يا خوي الطعن في الانساب كفر بعدين انت الضرر الواقع عليك شنو ؟ بمجرد زكر كلمة جعلي او عباسي النار تقوم في الناس ليه ما عارف . غايتو ربنا يشفيكم .



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية






الرئيسة |المقالات |الأخبار |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة