الأخبار
منوعات سودانية
الدابي ينتقد جيل الفيسبوك ولبسة «حبيبي شطفني»«أديني حقنة»«وداق سستم»
الدابي ينتقد جيل الفيسبوك ولبسة «حبيبي شطفني»«أديني حقنة»«وداق سستم»



08-03-2013 08:12 AM

جعفر السقيد :سعيد بلقاء عاشق الطمبور في عيد التلفزيون القومي
اكد الفنان جعفر السقيد سعادته بلقاء جمهوره الكبير داخل وخارج السودان في عيد الفطر المبارك عبر شاشة الفضائية السودانية، وقال السقيد من داخل استديو علي شمو في كواليس تسجيل برنامج «مع السقيد» الذي يبثه التلفزيون القومي ثاني ايام عيد الفطر المبارك، ان اغنية الطمبور لها جمهور عريض من كل الاجيال وتجد متابعة واسعة ، وقال السقيد انه سيقدم في العيد باقة منتقاة من اغنياته القديمة والمسموعة، اضافة الي الاغنيات الجديدة.
واكد السقيد سعادته بمشاركة الشعراء حاتم حسن الدابي ومحمد سفلة في البرنامج الي جانب الشاعر الفاتح ابراهيم بشير الذي سيقدم البرنامج بطريقته المميزة .
وقال منتج ثاني ايام العيد بتلفزيون السودان المخرج اسماعيل عيساوي ان ابواب التلفزيون مفتوحة لجميع ابناء السودان وان التلفزيون سيبث خلال برمجة العيد برامج تعكس التنوع الثقافي في السودان وتبين إرث أهل الشمال والوسط والغرب والشرق .
وقال عيساوي ان برنامج «مع السقيد» يهدف الي التعريف بماضي وحاضر ومستقبل اغاني الطمبور ويشارك فيه بعد غيبة طويلة من استديوهات التلفزيون الفنان جعفر السقيد صاحب روائع اغنيات الطمبور «زحمة الايام وعاشقة وماتندهشي ومواسم الهجرة ومواعيدك ومرام وعم الزين وهذا المشترك وشتيلة ريد » .
من جانبه ، ارسل الشاعر حاتم حسن الدابي تحية حب وتقدير لكل جمهور الدليب والطمبور ، واعلن عن باقة من القصائد الجديدة يقوم بتقديمها في القريب العاجل، وجدد الدابي رسالته للجيل الجديد من الشباب بضرورة الحفاظ على عادات وتقاليد الاجداد ونصحهم بترك الموضة الغربية .
وقال الدابي انه سيقدم عبر البرنامج قصائد منوعة اضافة الي قصيدة زمن الفيسبوك التي نالت حظا من الشهرة وسط الشباب.


زمن الفيس بوك
كلمات: حاتم حسن الدابى
مهما هربنا من واقعنا..خلاص صبح الزمن مقلوب
دة الماذينا والموجعنا..وبقينا نسوي فى الحي ووب
كل ما نقول عدلنا وضعنا..نلقاهو الوضع مخروب
للموضات ترانا تبعنا..أدمنا وغلبنا نتوب
لما الهم مسك شارعنا..وكلنا قلنا فيهو الروب
اليوم الشباب في محنة..بين البدعة والمرغوب
قالو ثقافة بتفتحنا..وتتقلب الثقافة ذنوب
ارث اجدادنا ياهو سمحنا..تقاليد دينا هى الاسلوب
اسع منهن وين نحنا..حسينا الفقد يادوب
وما عارفين محل صالحنا..لا راكبين ولانا اقروب
وين ابواتنا اهل الحارة..اهل العمى والمركوب
والعراقى دمورية...وجاري وراهو سربادوب
ديل ربونا بالطورية..والعرق الدوام مصبوب
ترباة الاسر دينية..رزقا بالحلال مجلوب
حليل اماتنا امات طرقى..الفردى ولباس التوب
نار الدوكى والمشاطة..والواقود ورود الموية ليهو دروب
حش القش تحت فى الساقى..رفع الجدول المخروب
زمن المحفضة المندلى..واصل سيرة للعرقوب
حل علينا زمن كلو..ضيق ولبس مكروب
الولد والبت فد خلقى..وكل زول عن رفيقو ينوب
لبسة«حبيبى شطفنى»«ادينى حقنة»«وداق سستم» المحبوب
وشبشب قالو اسمو«الليزر» زي شقيانة العروب
بناطلين جنز«اخراج موية»..مفتوحة وملانى هبوب
وتلقى الشاب معلم الله..وفى الشى اللابسو عشرة جيوب
وحدث لا حرج فى الشارع..اجساد لا فهم لا قلوب
لا تقدير اهل لا خجل..حبيبة وماسكة فى محبوب
مجلبطة وشها وماسحاهو..كل كريم براهو يذوب
واي كريم مغالط التانى..انو هو وحدو المطلوب
وسبحان الله شفتو الحكمة..الوش زي كمينة الطوب
والروج والرموش بي غادى..كل تلاتة عاملى قروب
زمنكم يازمان الدسكو..زمان جاكسون وزمان البوب
زمن مافيهو حتى ثقافة..عن عنتر ولا شيبوب
زمن الدادا ماما وبابا..لا حبوبة ولا حبوب
ماحضرتو اللعب فى القمرة..طول الليل تصول وتجوب
واسع يازمن علمنا..قول اكشفلنا المحجوب
يازمن«البلى استيشن»..الدجتال أو الحاسوب
ايميل ولا انترنت..واليوم كلو فى اللابتوب
الفيس بوك مع الماسنجر..واخر صيحة فى اليوتيوب
sms من الموبايل..حليل زمن الخطاب مكتوب
راح زمن اللبن بالكسرة..وتحلية الفطيرة بالروب
والقراصة كمين بوصة..تخليك للعصر مكروب
بصلة وشطة بي ليمونة..يسيل عرقك تقول مصبوب
اسع جانا زمن البيرقر..وفيهو تمصر الكاتشوب
وكيفن هى البلد ما بتفقر..اذا جات فيها وجبة حبوب
زمان كان الحليب من امو..والقنانة فوقو تذوب
كان ناقصنا كلو يتمو..كان ماكلنو كان مشروب
اسع جانا«بست»«كابو»..وخلينا الصحن والكوب
بعد صبح الشطر كيس نايلون..مفتوح وبالطرف مثقوب
ليكم حق زمنكم ذاتو..فرق الناس شمال وجنوب
زمنا فيهو ما انطامنا..عدا وطنا كلو حروب
ارجعو لى ورا عيدوهو..عز اجدادكم المسلوب
عيدو الهيبة لى سودانا..ليسلم مايعيش مرعوب
امرقو من زمن يحتاج..عُمر نوح ومال قارون وصبر أيوب».

الصحافة


تعليقات 8 | إهداء 0 | زيارات 6716

التعليقات
#736595 [Nagi]
0.00/5 (0 صوت)

08-04-2013 10:33 AM
المشكلة لا في الحكومة لا يحزنون المشكلة في الشعب الباطل الما قادر يجيب حقو فلاحتكم في المواقع الالكترونية شعب اكتر من جبان اطلعوا الشارع زي ماالناس طلعت بلد ما فيها غير الاحزاب وناس التعليقات في المواقع والصحف الالكترونية اخجلوووووووووووووووووووووووووو
ووووا


#736219 [Lubna]
0.00/5 (0 صوت)

08-03-2013 05:51 PM
اشرحو لي أسماء لبسات البنات والشبط. في الواتس اب رسلت لي أخوي لسع ما ردت. عارفه بقصد الضيق


#736109 [كركاب]
0.00/5 (0 صوت)

08-03-2013 03:05 PM
نحمد للتلفزيون بانة يمدنا من فترة الى اخرى
بالبرامج التى ينوى بثها خلال العيد.
الى الان لم نجد ما يدعونا للجلوس والانتظار على مشاهدة برامج ضعيفة ورتيبة وقديمة كمان
اول يوم ندى القلعة وتانى يوم السقيد واكيد باقى الايام حاتكون على نفس الوتيرة..
نفس الفكرة التى لم يستطع التلفزيون على مر السنين الخروج منها فرض الغناء على المشاهد
كل البرامج غنا فى غنا الحاصل شنو


#736065 [حامد عابدين]
3.00/5 (1 صوت)

08-03-2013 02:16 PM
وهل يسمى هذا السجع شعرا ، ليس هناك ادنى قيمة جمالية في ماكتبه هذا المدعو حاتم حسن الدابي ، ولما احكمت السلطة الخناق على المبدعين وشردتهم فتحت اجهزة اعلامها لانصاف الموهوبين امثال الدابي هذا ، وارادات ان تملا فراغا لا ولن يسمى ابداعا وهو ليس الا كلام فاضي تماما كحال ماانتقده من ممارسات سائدة بين الشباب ، لماذا لا يبكي على حال الشعر الذي يدعيه ولماذا لم يرى سقوط الابداع ممثلا فيه ، ولماذا لايرى سقوط اخلاق اصحاب المشروع الحضاري ويحدثنا فيه ، لماذا لم ينتقد السلطه التي فتحت له اجهزة اعلامها ,
بئس هؤلاء الصنف من المطبلين الذين يدعون الشعر ، وهل يسمى من لايؤمن بقضايا شعبه شاعرا.
هؤلاء الشباب الذين تحدثت عنهم هم نفس طينتك وحكومتك وثقافتك ، اذا اردت ان ينصلح حالهم فأبدا بنقد الحكام وحس بقضايا الناس


#736054 [عمار بخيت]
0.00/5 (0 صوت)

08-03-2013 02:02 PM
الشاعر حاتم الزي نعرفه مات من زمن مدر مدر يارواسي اللهم اسكنه جنتك ولاعزا لحاتم اليوم


#736014 [[email protected]]
0.00/5 (0 صوت)

08-03-2013 12:51 PM
ولماذا لم يتطرق للمواصلات والطائرات وركوب الحمير..........
ده زمن مضى ولن يرجع تاني انها سنة التطوراذا كان احسن او سئي..........
والشاعر لما يفقدالاحساس بي نبض الناس ويكنب لارضاء مشروع معين يصبح فاشل..........


#735929 [عطشان حرية]
0.00/5 (0 صوت)

08-03-2013 11:06 AM
حاتم الدابى كان من الشعراء الجميلين ولكنه باع نسفه لاخوان الشيطان الظاهر العيال كبرو كنت اتمنى بدل أن يتكلم عنى تقاليد الشباب وشى طبيعى لانها من إفرازات اخوان الشيطان الافضل كان يكتب فى اولاياء نعمته السارقون والمغتصبون والقاتلون الاطفال والنساء والشيوخ العزل أين شعرك من الذين يموتون من الجوع وانتم واخوان الشيطان تموتون من التخمه كنت اتمن لو أنقطع لسانك قبل تتفوه بلبس السستم ياسستم


#735884 [سايكو]
5.00/5 (2 صوت)

08-03-2013 10:07 AM
مع اعترافنا بانه في سلوكيات و ظواهر غير حميده لكن كان بدل يهاجم الشباب و يدينهم بطريقه غير منطقيه كان تهاجم الناس الخربوا البلد و قسموها و ملوها حروب و عنصريه و كراهيه ، بعدين انتوا لبستوا الشأرلستون و عملتوا شعركم خنفس و البنات لبسن الميني و الميكرو جيب و كان عندكم الديسكوهات و البارات و كل زمن بلغته و العالم اتطور و احنا في زمن الفيس و الواتساب ما حنرجع لزمن الجوابات و الودك و المشأط و المحفضه و المشلعيب دي حاجأت زمنا فات و غناها مات ، بعدين العراقي و السروال و الجلابيه زي لمناطق و اثنيات معينه ما بالقوه حتفرضوا علي كل السودان .
قبل ما تحاسبوا ابناء الجيل دا حاسبوا روحكم يا ابناء الاجيال السابقه ، انتوا عملتوا شنو للبلد من قمنا لقينا الحروب و الكيزأن و المجأعات ، و علي راي ابو رياله و الفشل في كل يوم بولد الفشل .


ردود على سايكو
United States [خالد] 08-04-2013 03:38 AM
بامانة عفارم عليك يا سايكو ويااخونا الدابى ماحنعيش زماناوزمن غيرنا ده حال الدنياوديل شباب الانقاذ وزى مافيهم الدبابين فيهم الخايسين . ده ماضى تليد و اندثر وودع و زمانا فات وغناينامات و بامانة انا كنت فى جيل الشارلستون وفاتح 30 سم. و الشعر الخنفس ة التسريح بالخلال. و سايكو كلامو مية المية



خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في Facebook


مساحة اعلانية





الرئيسة |المقالات |الأخبار |الفيديو |الصور |راسلنا | للأعلى


المقالات والتعليقات وكل الآراء المنشورة في صحيفة الراكوبة سواء كانت بأسماء حقيقية أو مستعارة لا تـمـثـل بالضرورة الرأي الرسمي لإدارة الموقع بل تـمـثـل وجهة نظر كاتبيها.

Powered by Dimofinf cms Version 3.0.0
Copyright© Dimensions Of Information Inc.
Copyright © 2017 www.alrakoba.net - All rights reserved

صحيفة الراكوبة